IITNA ZIAKA TUAHKHAK
By ~ Bhyak Hawxel
Thumasa/Theihsakna: Hiai story ahihleh mimal khok tuam neilou
a phuahkhiat ahi a, nou hinkhua toh ana kibelh tuah khak aomleh thil
lamdang 1 phuah khe kha ka hi cihna ahi ding(hehe). Ngaihtuah na tamtak
kiseng sam ahihman in nou hoihzaw ding nasak dan uh bang leng hon gen
ut te adingin kihong takin ka om gige. KA KIPAK ;))
SEH/KHEN-1na (PART-1)
Khota khat a ki-iit kingai mahmah nupa khat kalah gil agah masa pen
ding in, "4th Dec 1989" in kana piang kheta hi. Ka nu'n haksa taka leh
iittak a honna pai nate ziakin amah hinna tan zenin ahon neih khiat
ahihmanin, leh ka pa'n ka nu a iitluat ziakin deihthoh takin a tapa tang
neihsun uh ahon duat mahmah mai hi. Gentheih taka nek zongin kum 2 ka
cing kum in ka khua ua skul omsun leh lou nasep lou lam deuh a sum muhna
neite'n atate uh ah kaisak na skul ua, ka pa'n ama kham khop leng a nek
ngamlouh lai in kei skul a hon kai sak hi. Naupang hai lai leh thil
theih utna nei panpan ka hihman in ka nu omna bang ka dong zel a, ka nu
mel hon musak ding bangin ka ngen kha sek hi. Kei naupang hailai in "na
nu sita" acih uh omzia ka theihlouh man ahi. Ka pan luankhi nulkawm in
"na nu'n nuamsatak a hon ngak ahi, aomna hiai apat gamla lua" ci in hon
gen zel hi.
Ka pa'n lou lian lou khah, ama etzoh khom ding nei in huai apiang
haici te zuak zel in, kei poimoh leina ding leh gual englou a ka omna
din hon khawl sak zel hi. Skul ka kuan leh tawp hun in hon kha leh hon
pi khial ngeikei a, ka skul tawpciang bang un lou apat hon manoh zel
ahihmanin a nasep puante toh honpi zel a, midang te'n bang hon engbawl
nangin ka pa zang mahleh u ka pa kana zumpi ngeikei a, pa hoihtak nei ci
in ka kipak petmah hi. Lou ah nektheih ding tangmai piang sunsun te
bang ka gilkial hun a ka nek dingin aman ne ngam lou zenin hon khetsak
a. Kei adin ka pa ka sungkuan neihsun leh ka lawm neihsun ahi pen mai.
Nitak hunin ka lehkha sim ciangin ka pa'n hon hilh theikei mahleh ka
kiangah thoukang, thouvai te apat hon veng dingin ka kiangah aom gige
hi. Hiaite ziakin ka lehkha sim ah ka hahpan mahmah mai. Ka kiangah lusu
kawm pipi a hon ngak hun le atam mahmah a, huai hunciangin "pa sun a na
nasepna na gimlua, honna lupsan in" cia ka sawl sek hangin kei man ma
hon lupsan ngei tuan himhim kei.
Ka lupciang un tangthu tuamtuamte hilh in hon kiim imu zel hi. Hon
tangthu hilh tangpi te- unau tangmai tuhte, Liandou leh thanghou,
Khupching leh Ngambawmte hon hih gige ziakin kenle huai tangthute kana
thei sipsip hial ta hi. Zankhat ka lup un thangthu hon hilh sek te
theigop ta ka hihman in "Ka nu bangziak a si hiam?" cih ka dong hi. Ka
pan le hichin hon gen hi, "Ka kiteng nung uh kum1 zohin nang ahon pai a,
ken na nu ka duat mahmah mai a, hucia nang hon pai hun in, lou a kuan
ding leng phal ngeilou himahleng, ni bangzah hiam kei ka hong damkei
guih a, huan ding antang le nei nonlou ka hihman un, lou ah haithakte va
la a huaizuak a ngaih tak manin, amah kia lou ava kuan a, hong tungkik
lamin, buan takin ahong tunga. Kenleng va kihikhial kha ding a gingta in
ka dot leh ka kitawtah kha maimai ahi ahon ci lel a, hunchin kha7 hon
pai nung in nau neidek hi omtak in hon gim mahmah a himahleh huai in
ahon neikhe zoukei a, kha 9 hon cingtakin le neikhe theizok lou in ahon
om non a. Keile lung himoh in khua a primary health care kihon sunsun
laitak ahihman in kava pai pih a, kenle daktor a gukin kava mu a huai
in, 'na zi in nau apai tung lai in kihihkhak na nei hiam?' cin honna
dong a kenle, thil omdan ka hilh le, 'huaiziakin nau aneih ciangin amah
adam leh a nau a si dia, amah asih leh a naupai dam ding' ci a honna
hilh hi. Na nu iitlua ka hihman in anau hon lakkhiat sak mai un, ci aka
nget leh a zekai lota hon ci ua, huai in dan vuallouh ka mittui hon
luang a na nu theih ding bang ka lau mahmah hi. Tuazan ngei in nau nei
dingin hon gim mahmah a, hucih zoh sawtlou in nau hong kap ging za in
kava delh ngal a himahleh na nu aw zak ding aom nonkei, nang na nu bang
tuk a kon et ahi" cih te hon gen in naupang ciik kum7 lel hipan mahleng
ka khasia a, ka nu melding bang suangtuah in, ka ngaihtha bang ahong
suak mahmah mai hi. Ka pa ngei leng, ka nu a iitluat manin a mittui te
nul in ka pata un ka ki diik hiithiit mai uhi.
Haksatna leh gentheihnate thuak kawmkawm in pawl 7 ka hong sin pan ta
hi. Pawl te hong tam tou dedeuh leh sum zatna hong tam dedeuh ahihman
in ka pa lou khoh kia in hon vak zou nonlou a bang ta hi. Kiloh ding
inlah naupang deuh ka hihlai manin, nasem dingin lah kuan hon deihkei
uhi. Ka pa bangmah a ka huuh zoukei hi. Skul kai tawp leh khawl ni
ciangin bel nasepte hihpih theih bangbang kana hih zel hi. Ka pa melte
bang vaikuan hong tungciang in a mual mahmah sek in ka thei a, himahleh
"ka gim ka tawl" cih kampau azang ngei himhim kei. Achang in skul kaai
bang tawp mai a ka pa loukhoh kek letpih a khohpih mai bang ka tum sek
a, himahleh huaiten ka maban biing sak semsem ding cih cian taka ka muh
manin, ka pa muh zoh khawmkhawmte ken skul kai na din ka zat beisak
asuak mai hi. Ka nu bek omlai hileh zaw khong ci in, ka nu mel lel le
muman lou pa'n ka nu ngai, a ka kah ni atam mahmah mai hi. Vanthak aak
louh na bang leng kum a sim hial pai ding ahita, himahleh ken van thak
neikei leng le uniform a thon a hon piak zel te uh bangin, ka pa le a
nasepna puan leh a inn omna puan bek a khenna ding nei lezo milak ale
kihel ngam deuh di hia ci in ka pa ka hehpih mahmah mai hi. Ka pa hon
iitna lamdang lua ahihdan ka theician a, kenle ka iit mahmah mai hi. Ka
nu a ngaihdante bang hon hilh zel a, kenle ka ngaihdan te ka gensek a,
alim bek munuam mahleng, huailel le muh ding aomkei hi. Neihzoh louhman a
lim lel le kila zoulou innkuan ka hi mai uhi. Veng leh paam te'n lah
mihing inle hon en lou tuk abang hial ta uh. A annkhing-ankaang te uh
lel le kou hon piak sangin paih a utzo lai uhi. Anuam-ahaksa thuak
khawm dingin ka pa toh ka om man un hampha ka kisa lai hi.
Zankhat ka pa toh lup kawmin ka houliim uhi. Huchin ka pa'n "Lamka
lama tanau omte kiangah sum lei tawi mai a, kei bek sumdawng in va
zinkhe mai leng ci sim hiveng aw bawi" ahon ci a huaitakin kenle "Pa,
huchi zaw hoih ding hi a, himahleh nang tellou a kana om di zaw, a
thawmhau huai mah di maw?" ka ci cencen mai hi. Tapa duat tak leh
lawmdang neilou ka hihman a ka pa ngailo petmah ka hihziak a, ka pa
tellou a awm di hi kasa kei himhim hi. Huchia kong houliim liim uh leh
zan hon sawtsim ta a, imu ta ni ci in imut kon sawmta uhi. Zingsang
beltakin khovot nuai ah tui tang zohlouh ding lau in tui kava tawi pah
hi. Ka zoh in annhuan kawm a taap bulah tu kawm a lehkha sim a ka omlai
in ka pa hong thou a, ahon kihahsiang zoh in "Bawi, tuni a exam pan ta
ding mo?" hon ci a, "hipan ding ka hi uh ei pa" ka cih zohin "bang a na
exam ding uh?" ci'n a hon dong a,"Eng-I ding hi ei " ka cih zoh bangtan
hiam nungin, "na siamtak leh na zekai kha dinga annkuang thumna dan leh
na exam pat ni ding uh ahih toh Pathian kiangah I thum ding aw" ci in
ahon thumsak hi. Ann te nezou a ka hong mantak un ka pa le vailou
kuanding toh ka tawn ngal ua, sikul kongtan hon kha in "bawi hoihtakin
hon hih in aw" hon ci a, kenle "Ole paa nang leng nasep nuam" ci in ka
hon kikhen phot ta uhi.
Dotna hon bawl te uh, hoihtak, siangthou tak leh fel takin ka hon
dawng suk zungzung hi. Himahleh a tawpna pen ah kong buai sim a, huaikia
lel hi ka dawng theilouh ci'n a zohkhiat mai ka tum a,bhilele ka pan
"hoihtakin non dawng vek sawm ding o" hon ci ngal a, va dawng khitlouh
ding ngaingam lou leh, ka tawpciang unlah "na dawng vek hia?" hon ci
ding sa ahihmanin, huai ngaihtuah kawmin ka omden hi. A dawn na kal
laklak khong ka hon theisuah liamluam a lah, a bul pat didan ka theizou
mahmah keia, hun bei ding kuan in ka ngaihtuah khiat zoh teng gelh mai
ding in ka kisa a, ka hon gelh hial leh a kim in ka hon theisuah kik a
hoihtaka aveka dawng thei sipsip in innlam kon kik ta hi. Keileng ka
uniform phelh zou in ka pa nasep va huh dingin ka lehkha leng simlou
tuanse lou in kava paipah mai hi. Lehkha sim ut mahleng ka pa a na
gimluat ding ka lauhman in a kiang va naih tenten mai ka hi. Ka pa'n ka
gintak bang ngei in dotna hon bawl pah hi. Kenle ka hihtheihvek dante
gen kawm in leh "pa non thumsak ziak adiamah khat va manghilh dek
mahmah inga theisuah thak keivoi" ka cih leh ka pa'n ka nung hon beng
kauhkauh kawmin "Bawi Pathian ei poimoh hun bang ngeia hon huhthei ding a
masa gige ahi a, Pathian muang kawm taka thilpeuh hih gige ding ahi aw"
ahon ci huathuat mai hi. Nitum kuan in lou nusia in innlam kon zuanta
ua, inn ka tung un anntang tawmcik ana om a, lei na ding sum lah ka
neihlouh man un, ann chiim in ka huanta tawp mai uhi. Kenbel liim kasa
veve a, ka pa'n bel limsa lou adiam ah tam le ane kei hi. Ahihkeh kei
zingsang annek dia hon siit sak a zo diamah ci'n ka pa kiah, "Pa na vah
na mo?" ka cihleh,"hi vah mah inge, bawi lehkha I sim ta ding aw" ci in
ka bulah ahon veng dingin hon tutpih tei ngal hi.
Zingsang in buh bel ka etleh ka pa'n zannitak a amah nek ai hon
khetsak ana hi a, kenle tamlou omteng ka mei oi khawmin ka sung lum hi.
Ka pa hong thoh in ann ka nek pih dek le "nang ne in kei ka gilkial lou
ahi" ci in ahon sawl a, himahleh gilkial lou in aom di ci bel ka thei
mahmah a, ka pa hon iitna let dan ka thei beh semsem hi. A omsun teng ne
khom dingin ka chial teitei hi. Huci in ka hong man in ka pa toh ka hon
tawn khe non uhi. Hon thumsak dinglam manghilh lam hon phok a, inn kik
hial ding lah hi non lou deuh ahihmanin, ka sikul lutna ding gate bul a
ahon thumsak top mai hi.
Huchia hun hon pai zel in ka examte uh bang kon zou ua, lou ah piang
buh tam lou te bang leng ka la khin ta uhi. Ka pa'n Lamka lamah zin
ding ahon sawm phut mok a, ka phur gu mahmah mai hi. Himahleh ka buh uh
ka zuak na ua sum tamlou ka neih sun ua zin ding ka hihman un, ka pa'n a
thilsawm hihthei kei ta leh khut vuak a kik ding ka hihman un, aguk in
kana mangbang petmah mai hi. Huchi in ka zin sawm ni uh ahong tung in
Lamka lam manoh in shaktiman nungah mitamlou toh kong kisiing napnap
kawm un, Lamka ka hong tung khongkhong uhi. Ka kho omna uh toh ka teh
ciangin thupi bang kasa mahmah mai hi. Lamka pha kha ci in kua hon phok
pih louh in kei khomkhom in ka kipak mahmah mai hi.
Ka tanau te uh inn zongin bangtan hiam ka buai mahmah nung un,
Vengnuam kici veng min khat a ka pute (pu taktak hilou kigui zopna
omkhak ziaka pu c a ka pan hon sap sak) inn kava tung khong uhi. Ana
siam mahmah ua, nitak ann bang ana nezou mahle uh kou ading hon huansak
thak ua, sahou phok meh toh ann kon ne bang zo kam ah a lut thei
mahmah mai dan eive. Hicikan a ann ka gilvah leh khamtek a ka nek patna
hi hial dingin ka gingta tawp hi. Ka lupna ding uh bang hon bawlsak lai
uhi. Ka gimsim man un ka lumpah ngal mai uhi. Hicikan a lumna nuam leh
puansilh nuam tak kala ka lupna hihial ding ahihman in, Ihmutlim tak
zo ahingei dia ka khanloh in ni bang na suak man ta a. Kihahsiang zoh in
nisa lum oi dingin veranda ah ka tu pawt pah mai hi.
Ka annek zoh un ka pu leh ka pa'n hih ding poimoh nei ahihman un, a
pawt uh a ngai a keibel innah kana om hi. Ka pute lah naupang polh ding
nei nonlou ahihman un ka ciim petmah a, innkong khong a ni lum oi kawm
in kana tu nget ngut mai hi. Huchia ka omlai in ka vual ding vel numei 1
ka mailam ah kana galmuh a, ka omna gate naih ahon pai ahihcih agal
apat inleng kana ze theih hi. Ana hah et lokha ka hi dia, dak ngam
nonlou khop in nuailam kia en in hong pai nalnal a, ka omnate innah thil
hih di nei a, hon pai kana sak le tui tawi dinga hon pai na hilel hi.
Huchia ciimtak mai a kana omlai in ka pa te hon pai kana galmuh non a
kenle kava delh ngal hi. Ka van ding leh nekding hon puak uh ahihlam
hon gen un, avan pen mu nailou himahleng, kipahna in ka diim a, ka
kipahdan cu genvual louh himai. Kum bangzah hiam vanthak neilou aom ka
hihman a kipak petmah leh christmas van ding nei ci in ka kipak khol
diak hi. Nitakin ka lumpah ua ka pa toh ka houliim ua, ka pan zingciah
ka puu sumdawn na lam ah amanle va zui tei ding ahihdan hon gen hi.
Kenlah ka pa hon zinsan ding ci pen ka ngaingam hetkeia himahleh kei
maban hon khualsak ziak liauliau ahihmanin a cih bangbang ka pawm mai
hi. Zankhua in imuthei lou in ka pa ka koi bet den mai hi. Thil hoihlou
lam khong ka ngaihtuahna a hong om a ka khasiat tha bang a suak mahmah
mai hi.
Huchi'n zingkal bel tak a thou in ka pate van ding te ka guang zoh un
thumnate nei in, huaizoh in station tan kava kha uhi. Gari ah alut zoh
un tawlet (window) apat hong dak khia in "bawi hoihtakin na om in aw"
ci kawm in a khut lik a nuikom in hon "byebye" ka muh in ka khase law
mawk a, kenle aw liing sim pi in "Ole pa nangleng zinnuam" ka cih zohin
ka mittui bang hon dai mahmah a, himahleh midangte theih ding ka lauhman
in ka kidek hamham hi. Ka pa hon zinsan apat khattang bang ka kisa a,
lupciang bangin "ka pa toh dam a kimukik lou hita le ung, ci khong peuh
ngaihtuah in ka pa bang, ka ngaihtuahna a sii sak in, lukham kawt zenzen
a ka kah hun bang atam mahmah hi".
Hucibang kawm kalah tui hong tawi a ka muh khak nu'n, nitaklam teng
phial a tui hong tawi kana mu sek hi. A khenciang in ken ka tui ding uh
ka diip hunlai taka hong tawi khak ciang bangin, kana diip sak sek hi.
Ka neu apat Lawm ana pawlkha lou tuk ka hihmanin, va lawmpolh ut mahleng
va lawmbawl masak dingdan ka siamkei a, houleng kana houpih ngam
ngeikei zomah lai hi. Himahleh polh bel ka ut mahmah mai hi. A mel
omdan bang ka ngaihtuah ciangin polhnop leh fel tak hi dingin ka gingta
alah va polh pat didan ka theizou kei. A changin bang kana guk et sek
hi.
Kalkhat vel ding bang hun hon pai zohin ka pu leh ka pa hong tung ta
uhi. Ka lungsim bang a zaang tuan hial hi. Khawlam pai non ding bang ka
ut nonkei hial tawp ka bang sim hi. Himahleh akalnawm krismas ding
ahihtak manin ka pa'n zingciang omlai in zinghal ah pai ding hon sawmpih
ta hi. Azing in annek zohin ka pan van tamlou lei ding leh ticket lak
ngai ding ci in bazar hon vak pih hi. Thupi bang sa mahmah a, ka et
senglouh ding bang et ut ka mu hial a, kana daak heuhou den mai hi.
Hichituk a thupi mudia kiging ngeilou leh khota cih aleng khota zosem
cih theih hial ding khop muna teng ka hihman un, Lamka bang cu kei adin
foreign zin hial tuk in ka ngai hi.
Nitaklam khomui ding kuan in inn ka pute in ka tung ua, tui hon tawi
zel nu tawi huncet tawh ana kituak a, kenle va houpih sawm mahleng ka
ngam mahmah keia, tuazoh hong kuan non pen ah cu houpih a amin bek dot
ka sawm ding ci in, well kiangah ana ding zenin kana ngak a. Himahleh
tuingah ta ahiding a, hong kuan muh dingin a om non mawngmawng keia,
kenle hong tawi non lou dek hinteh ci in, innsung lamah lut ka sawm
laitakin,"Lawm, ei ana khol dih" ci ahon kisam kazak in ka guih hial a
kinunghei pah ngamkei zomah hi.
Keile awl a kihei kik in ka etleh "Lawm hiai well ah a bucket pen ka
su khe kha a, loh didan ka theikei" ahon ci hi. Kenle awl a va naih phei
in well ah kava dak suk le bucket pen na tum dek manta hi. Kenleng
innsung a ka pute kiah kava genle hon en ua,"hinchin koih mai un", hon
ci tak un, tui hong tawi nu zong kisuanglah mel takin "kana pai dile" ci
in ahon paisan ta hi. Hicituka amin dot theih na di chance hoih om pen
ka khahsuah kha ta hi. Nitakin imu leng imulou hial in ka ngaihtuah
khakha a, omzek lai bang ka ut hial hi. Lawm ding banga kava polhnop
luat pen iitna ana cihcih sek pen ziak hita hiale? ci peuh keile kei
dotna ka ki bawl a, lah huai thei ding a ka naupang deuh ka hihlai manin
iitna omzia ka theisiam tuankei.
Huchi kawmkawm a ana imu kha zo ka hingei dinga, ka pa'n honna phong
lam ka theih phet in ka thoungal hi. Zannitaka, ka imut haksim manin
imut leng ka khamzou chiah keia, halh leng ka halh zouciah kei hi.
Khuabang a vot toh gari a tuang ding bang ka lin mahmah, banah
shaktiman a tuang non ding cih ka liin khol diak se hi.
Huchia kana ngaihtuah lai in kinep phak louh na lam daih in, station
lam a hong pai pih uh a bus ah tuang ding ka hih uh ka theih in ka
kipak mahmah mai hi. Ka khatvei tuangpat na ding hi a ka theih manin ka
kituangsak mahmah mai hi. Khuavawt lotel mahleh bus ah ka hong tai ua
pat in, mi hon muhlouh ding bang lau in vawtsa kawm pipi leh naksan
zenin window ah ka daak pawt den hi. Bangtan hiam ka hon tai zoh un, ka
imut hong suak sim a ka pa liangah kingai suk kawm a, ka om leh na
imukha ka hi ding a, ka khanloh in ka pan "khua kitung dek ta imu nawn
ken" ahon ci hi. Khosung ka hong lut un bang nidang a van se pi a om
gige te pata in van thak, mi a banga hoihlua bel hikei mahleh, vantuam
deuh a kithuam ahon muhziak uh adiamah, honna munuam thei mahmah mai
uhi.
Huchi'n inn ka hong tung khongkhong uhi. Kihahsiang zoh, Annte huan
in, ka huan min zoh un ka hon ne pah uhi. Gimsim leng ka hi ding ua
nitakin le lum dingin ka hon kisa non pah mai uhi. Huchia lumkawm in ka
pa tawh kahong houliim uhi. Ka pa'n "Tua I van lei nate na pute hon piak
ngen eive bawi" hon cih in ka pute ngaihnat huai semsem kasa hial hi.
Banah ka pa sumdawnna ding le amau apat ngen ahi lam ahon gen beh in, ka
pi-leh-pu bang ngaihnat huai kasa semsem hi. Mitampi ten banah ka
tanau nai zaw tenle bangmah a hon sim louh lai ua amau hichibang tuk
ahon panpih uh leh hon panpih nate uh, ka ngaihtuah ciah naupang cik
himahleng ka mittui bang hong pawt hial hi. Banah ka pa'n kumthak
lamciang a ka pute inn pansan skul hon kaisak ding ahihdan te ahon
genin ka phur mah a, azoh huai tui hon tawi sek nu pawl theiding tuk a
ka kingaihtuah manin le ka kipak khol diak hi.
Hunte hon liam zel in, ka pian apat christmas mipi laka ka tel patna
ni ding cileng ka ci khialzen kei dinga, tua ni ding ahon hita. Nidang
inbel sum ka thohzoh ngei louhman un ka tel ngei himhim kei ua, banah
vanhoih aak ding lel le ka nei ngeikei uh. Tu'n zo ka pute hon panpih na
ziak liauliau in mite laka tel theiding in ka omta ua ka pata un ka
kipak mahmah mai uhi. Huchi in krismas lopna a annek na ka tel patna uh a
hihziak inle zumhuai bang kasa gu mahmah hi. Ka hok dak sim na lama ka
pamlam deuh ua nupi 1 leh numei kei vual ding vel 1 mi, ka mu phei a,
kou pata dinmun toh kibangin ka koih hi. Neizou lou ahih ding uh ci leng
chiantakin etmai inle aki thei hi. Dak leng a dak khe ngam lokei uhi.
Annek kham a innlam ka zot lai unle ka ma lak uah pai ua, houpih bang
ka ut mahmah na a, mi bangzah ding hiam om ahihmanin ka houpih ngamkei
hi. Lawm kana polhngei louh ziak mahmah aleng kamtei lou ka hi a, ka
kimohsa tuankei hi. Huchin anun "Kim" ci a asap lam kazak in amin theita
ka hi phot mai hi. Ka gate kong uh ka tun inleng koipen a inn uh hi
hiam cih theinuam in ka gal et vengveng lai hi.
Huchin Krismas leh kumluite paikhin kumthak mel deih huai ka muh ni'n
"Kim" pen ka polh theih didan lampi ka ngaihtuah tinten a. Huchin
zinglam annezou in biakinn kikhopna ah amah ka zawn bawl a ka muta kei.
Annek khom na ahleng sawt tak mai ka zawn bawl nungin ka muta, ka om
bang anuam a, ka hi huai hialin ka kithei hi. Muh lahlah a ka muh
ahihziakin, va houpih teitei ut in ann bang ka ne kin zezen hial hi. Ka
kham phet in "Pa awlawl in na ne in" ci in "Kikim"te kiang lam naih in
kava pai pah a kenleng awlin "Kim" cin zumpipi in kava sam ngamsam hi.
Ka gingtak hetlouh pi in "Oi Uson" honna ci mawk pen lamdang kasa lotel
na a ka min a ahon sap in ngaihna hong omsak pah in ka thei hi. Kenleng
nitak kikhom ding a, va tawnding ka hihdan ka genzoh in ka pa kianglam
naih in ka pai non hi. Ka pa'n leng kava pai na hon mu ahi dinga
lamdang sak tuak takin honna en a, bangmah bel hon gensam kei hi.
Lawmding neia ka kikhop patna leh lawm ka polh pat na ahi cih theihkhop
ahihmanin ka kipahna khat aom den mok hi. Tuani apat Kikim toh kon
kithuahthei semsem uhi. Ka kithuahna uh sawt naikei mahleh tagah tuak
ka hihna ziak un, ka dinmun uh ki theisiam in lawmta hoihtak kong suak
pah uhi. Ka lawm neihsun ahihmanin ka ngaihnat mahmah ziakin, ka pute
innlam ah pai leng ka ut nonkei hi.
Huaikum a pawl 8 sinding a Lamka lam a omding ci himahleng ka
khiatlah ziakin, ka pa kiangah "khua ale pawl giat tan omsama, hiailak a
ka sin maiding ci a ngen teitei in, khua ah ka kai ta mai hi. Kikim
pawl khat asin kum a apan aomlouh san apat skul na kai nonlou ahihdan te
hon hilh apat in ka thei hi. Thilteng ka genkhom zel ua, tuate ziakin
kou tuk a ka dinmun uh kitheituah om dingin ka gingta kei hial hi.
Alehlam a Ka pa'n sumdawng a hong zin san ciangin keikia ka omsek a
tuahun chiangin Kikim nu'n amau laka sungkuan bang tuk ava omding in
hon chial sek mahleh naupang lua a kihihlouh manin ka nial teitei seka
keikia in khohar takin zanchiangin ka nu-leh-pa bang ka ngaithei mahmah
a, ka nu ngai a ka kah hun bang leng atam mahmah mai hi.
Huchia Ka pa bangtan hiam a zinsek a aom nungin kha 2 sungvel zinlou
aom zek ding ahihdan hon gen hi. Zankhat ka houliim na uah hichin hon
gen hi,"Sumdawng nale lamzang tou zel ahihmanin, sawt pipi kon omlouh
san sek a, huaiziakin "Kikim te nuta ompih dingin pi mai le hilou mo,
noulah Kikim toh lawmta na hih ban uah sanggam tuka ki-en bang tuk na
hithou ua, na cithou hia? bawi" hon cih in lamdangsa in, Kikim kei zi
dingdan a hon pisak sawm ade o ci a ngaihtuahna bang ka neia, hithei
bang kana sakei lua a, kenle,"Pa bang ci danin mo?" ka ci thak non hi.
"Kikim nu, na Numan pen ken zi ding in nei maileng ci sim ka hi, bawi,
ka omlouh kala nang hon kemtu ding omlou a na om hithei salou ka hi" hon
cih in kei hon khualziak liauliau ahi cih thei in, lem kasak pih mahmah
mai hi. Kikimte mihoih dan leh kou dinmun toh kibang ahihziak tak ua
leng, kitheisiam taka khosa dingin ka kigin manin, ka pa thilgen pompih
mahmah ka hihdante ka gen ngal hi.
Ka houliimna te uh bangin ka pa'n hih dingdan lampi hon ngaihtuah tou
zel hi. Mibang a tanau-laina ka neihlouh man un palai dingin khua upa
te ka zat uh a ngai hi. Ka pa'n bel hiaithu Kikim te kiangah theihsak
nailouh dinga hon nget manin Kikim toh kipawl pawl himahle ung bangmah
thu ka genkei hi.
Huchin zankhat Kikimte ka hoh lai in, upate ahong hoh thut uh a,
Kikim ten leng lamdang asa mahmah mai uhi. Himahleh kenbel ka Pa sawl
hi ding a ka gintak manin, pai mai ka sawm ngal a ka paita hi. Inn ka
tungin ka gintak bang ngei in ka Pa'n palai sawl ahih thu hon gen hi.
Huchin zingkal beltak in upate laka khat ahon hoh a thu omdan
hiaibangin hon gen hi, "Pa Thang ei, inntek nu'n lemsa nailou adiamah,
dawnna piak ding haksa a sak lai dan ahon gen hi" ci in ava lenglat na
thu uh ahon hilh hi. Keibel huaini apat Kikim va thuah ding bang ka zum
mawk hi, huaiziak inleng kava hoh vang a, kipolh nang hun le aom
nonkei phot hi. Hiaibang hunin ka nu bang om hileh ka nuthak ding
zongngai lou ding hi a maw khong ci khom a, kingaihtuah ngetngut a ka
omlai in, ka pa'n "Bawi lohching zohkei tak lele I posiam ding o" ci
kawmin ka nung ahon beng khakhuah hi.
Huchia kihouliim luatna ding ahong omlouh takin, keile kisu halh ding
ci in Kikim te inn phak ding lin kawm pipi in kava hoh ta mai hi.
Kikim inle honna muhtak in lamdang hon sak ciit deuh mai in,"oi uson non
hoh vangta lua" honna ci saisai hi. Numan ngei inle ka thilsawm pen uh
maksa in honna dong a, kenbel gen ding dan tuan theilou in, ka dai dedu
a, amah leng kisuanglah sim adiamah ah, thudang daih a hon houpih non
hi. Keileng sawtsim tak kava om nungin ann ka huan ngai manin ka kik ta
hi. Huchia ann kon nek zoh un ka pa'n,"kisa in tuzan eigel na Numan te
kiang I va hoh ding" hon cih in ka kiguih zot zezen a, himahleh
bangdang gentuan lou in, kei poimoh na aom a hinteh ci in ka kisa hi.
Kisa zou Kikim te inn hoh din ka pata un pau lou hial a kon kiton nung
un ka hohna ding uh ka hong tung uhi. Amau zong a nuta in na om ua,
bangtan hiam thuvan tang khong a houliim hon zoh un, ka pa'n le hichin
hon gen pan hi,"Man palai kon sawl uh lemsa mahmah lou na hi hiam?" hon
cih in Numan in hichin dawng hi,"Hiaibang non sawm pen kou nuta in
phulou ka kisa lua ua banah genlok sa lel le omlou a, non sawm phut pen
uh lamdang naa salua hial keive uai "hon cih zohin ka pa'n "Huaikhong ci
kenla, kou pata in hiaibang thil kon sawm uh, zum leh zah khual lou a
kon sawm uh leh Soson kiangah bangmah thu na gen ken ka cih ziak a, hon
genlok lou mah ka hi u, banah I dinmun uhleng kibang tuak ahihziak leh
kei zin cianga, Soson hon etkai saktu ding a, noubang tuk omlou na hi
uh, Man lem honsak pih un" ka pan hon ci ta ngutngut a, Numan inzong
"Aw huaibang ahihleh koubang mah ciinkei mah le ung, ka na kingaihtuah
di" hon ci non a, ka pa'n zong "Honna ngaihtuah sak teitei un o, tukha
tawpciah palai kon sawl thak ding uh" ci in zan bang ana sawtsim ta a,
koule pai ka sawm ngal mai uhi.
Hunte hon liamzel in, Kikim nu leh ka pa kitenni ding ahon hita. Mi
bang zah hiam te hon theihpih in, ka nuu ahi ta, Pathian panpihna tawh
sawttak kana gel uh tangtung hita ci in ka kipak petmah hi. Himahleh
Kikim mel bel a mual a, kipak taka om banga kilatsak sawm teitei ahi
cih ka haih kei himhim hi. Aman lem ana sak louh sa leng ahi a, lah
bangziak hi hiam cih kana dotsa hon hilh nuamlowh ahihmanin ka dong kik
nuam nonkei hi. Amanlah,"Lem kasak louhziak non theih hun om na inteh"
hon ci lel ahihmanin ka theihkhiat hun omna ding hiven ci in, ka dong
sau nonkei hi. Tua hon kiten zoh ua pat, Sungkuan khat ka hon hitak
bang un Kikim toh unau piangkhom sa bangin ka kithuah theipah ngal uhi.
Numan in hon iitna te ziak liauliau a, kou innsung bangmah aleng simtak
louh na ah hong lut ka kipak petmah ua, banah Kikim inleng anu phaltak a
hon piak ka kipak lotel uhi. Kitheisiam tak leh ki-iit tuah na ziak
liauliau a, Sungkuan nuamsatak ka hong suak pah mai uhi. A lehlam ah
khomite gintak khel in ka nidang hun uh toh teh in nuam kasak dan uh,
mit a muh theih dia aom bangin, ka hong khangtou mahmah ta uh cih hon
muhpih ua, nidang a bangmah a honna simlouh sa te innah sun-leh-zaan in
lengla ding om den ta hial hi. Nuamsatak a ki iittuah chiat a khosak
touh ka lamen bang un, ka hong khosatou ta uhi. Kipaktak-leh-kituaktak
in hinkhua ka hon zangtou zel ta uhi.
_BEITA!_
(END OF PART-1)
©Siamsinna leh Vakiangbu
Comments
Post a Comment