KANA TUAHKHAK THIL LAMDANGTE
By : Leon Guite
(Mikhat hon gensawn bang in)
Kaneu lai uh chilehang, 1932 kum lai vel ding in ka khua uh gammang sah takmai in um kimvel hi. Gamsa leh vasa chi tuamtuam tam mahmah mai a, kou naupangte'n gophel bawl in sailim kahual ua, khokim ah vasa ka beng zel uhi. Nikhat ka khokhang ua lui ah sailim hual in pawl khuh khum in ka hal tak uhi. Ka mansiang tak un vasa beng din ka kithoi khia uhi. Kei anunung pen in kapang a, ka liim uh ka et leh ka ma a paipa lim a san in asan mawk hi. Lamdang salua in amah kasam a, ka hilh leh aman leng lamdangsa in ka lawmteng toh kavek ua khawl in ka en diamduam uhi. Kou adangtenga bel avom in kilanga, amaha chauh san petmah in san mawk hi.
Huaitakin, kenleng kalawmpa kiang ah, "ahikei lawm aw, nang liim pen tuni tuamlua ahihman in inn ah ana paimai in denchiah tuahsia tuak kha phut thei ihi." ka chi hi. Himahleh amah ut tuanlou a, vasa mat ding penmah in lungsim zou zaw ahihman in ka sawlkik zou kei hi. Huchi'n ka pai zel ua, mun tuamchiat ah panmun kihawm in ka kikhendalh vek uhi. Ni ahong kai takin, kapan mun uapan in innlam kazuan siausiau uhi. Himahleh, kalawmpa uh a liim asana kimu pen khua mial tan inleng inn ahongtung kei hi. Khomialnung in mipi'n zontheihna teng zong mahle uh, asulnung sui theih ding bangmah muh aneikei uhi. Kou alawmteng thu ahon dong ua, ka panmun chiat uh ka zot nung uh kimu khanawnlou kahihdan uh ka gen chiat uhi. Atawp in aliim omdan ngeina banglou ahih kaphawk khia a, val upa te khat kiang ah kagen hi. Huaitak in aman leng, "iliim asan leh tuahsia kituak ding chihna ahi. Na thumang leh zaw damlai maithei hiven maw..." chi hithit lel hi. Tunitan in kalawmpa un bang tuahsia tuak ahia? Si hia? Hing hia? Chih kuamah athei omlou hi. Huainungteng hun sawngkhat gamlak ah vasa benga kuan ngamlou in kou naupangte khosung kia ah ka om ngam phet uhi.
Naupang lai aki hihman in nna kisem theinailou a, sunchiang in inn ngak in kapang zel hi. Sunkhat lawmte toh kimawl khin sun ann nek hun in, inn ah sun ann neding in kapai hi. Ka kelkong uh katun in ka singhon tung uah naupang puan-ak silh lou khekhat chauh nei ana tuang a, akhe bang ana pei velhvelh zozen hi. Kenleng lau kawmkawm in awl in ka paiphei zel a, kei hon mulou ahihman in aphe zalhzalh zel hi. Naupang khekhat chauh nei kamuh patna ahihman in lau mahmah kawm lah munuam lotel zel chih dan in ka om hi. Atawp in suangkhat la in ka deng ekh a, lamdangtak in ka denkhak toh kiton in a leng khe vengveng mawk hi. Keileng lau lua in ka inn uah lut ngamlou in kap kawm in kapute' inn tan ka taitung hi. Ka tuntak in ka thilmuh kapi kiang ah kagen leh, ka mimuh penPheisam ahihdan ahon hilh hi. Ka lau mahmah mai a, huai nitak ka inn uah giak ngamlou in kapute' inn ah ka giak hi.
Phavang hun in miteng in awllen hun kinei zel a, nitak chiang in nungak-tangval, naupangte akua chih omlou in Lentual ah khavak nuai ah kimawl nainai in nuam kisathei mahmah hi. Haam ah tangvalte giak zel ua, amau kimuang mahmah ahihman in lungmuangtak in ka kimawl zel uhi. Nikhat ki hen ate ka kineih uhi. Kei ahon mankha ua, hon hen sawm in ka hanmual geilam uah ahon paipih uhi. Kha avak mahmah mai a, himahleh thakhat in ka kim teng uh mial petmah in ahong mial guih hi. Ka kiang a pai kua ahia chihna tawm kuamah kitheizou lou khop in mialpetmah in hong mial hi. Huchi kawmkawm in khawllou in hon pitu om hileh kilawm in kapai zel ua, ka kiang ah khat in ka min hon sam in hon hou pihpih hi. Lamdang kasa mahmah, kahalh khiaktak in kha avak mahmah mai a, lawmte toh ki houlim kawmkawma paipai ka kisak leh kuamah muh ding a omta kei. Kamuh sunsun bel kakim ah singkung liantaktak ngen chauh ahi. Gamlak ah om kana himai mah a, lau lua in kap in ka kap ekh-ekh mai a, kintak in lampi zui in tai in katai petmah hi. Bangtan tai a, bangtan tung kahia? Ka theizou kei. Khua kaphawk tak in ka lupna tung ah om kana himaimah hi.
Kanu'n ka khophawk lam atheihtak in kakiang ah ahong pai a, kenleng ka omdan kadong pah hi. Zan nitak a inn kapai ngeilouh tak in khomipi patau in zon theihna teng hon zong ua, atawp in lou lampi ah khophawk lou a lum in ahon mu uhi. Ka lawmte toh "KI HEN ATE" kineih kahih dan uhleh kathil tuah teng ka gen leh, ka lawmte kuamah in hen dinga hon mankha lou uh ahihdan ahon genvek ua, kuamah in kei hon mukha lou uh ahihdan hongen chiat uhi. Lamdang kasa mahmah mai ua, dawite nasep ahi chi'n a zing in ahon thoih uhi.
Kou naupang lai inbel Pathian thu munkhen khat ah na tungta mah leh, kou khua ah Pathian thu awi khat mah zong omnailou hi. Dawi leh kau mahtoh na khosa khawm kahih man un, akhenchiangin anuamlou mahmah pawl zong tam hi.
Nikhat ka khote uh papi khat agam vakna ah hong tuahsia hi. Nitak lam in asihthu khosung mipi'n kitheipan hi. Tangval teng siluang paw ding in kuankhe bei uh a, numei leh naupang teng inn ah ki-om hi. Misipa pen adamlai in kou inn hong zual mahmah ahihman in kalauh tha ahong suak petmah mawk hi. Kei leh ka pi chauh om kahi ua, tu ngamlou in meipam lupna tung ah ka pi'n hon lup pih hi. Thuk khuk a meivak chauh meivak dang kinei lou a, mei in asalh khak louhna teng mial mahmah sek hi. Huchih laitak in mikhat in ka inn kongkhak uh hong in ahong lut a, ka dang atak lua chi'n tuikuang lam naih in tui hong dawn khutkhut hi. Atungin bangmah ngaihphat louhnang neikei mahleng, tui dawnpan tui dawnkhin theiloua dawndawn mai ahih chiang in lamdang kasa mahmah hi. Atawp in kapi'n le sawt sa mahmah ahi dinga, "Vialpum, huaizah dawnta inla paita oh" a hon chih leh thakhat in ahong mang guih mawk hi. Ka laupetmah mai a, puan kawm ah kilukhuh in lin petmah in ka ling hi. Aziak bel tua misipa pen amin Vialpum hi a, ka inn uah tui dawna ahong lut theih mawkpen lamdang sa in ka lau mahmah hi.
Kumkhat ka louh neihna lam uh gamla simtak ahi a, ka lou kiang uah SIH lianlou khat a om hi. Kho mite'n ka lou mun uh kheng din hon ngen mahle uh kapa a ut hetkei mawk hi. Kapa bel hangsan mahmah khat hisam a, gamvak hat mahmah in sa tampi zong ana man hi. Huchi'n huailou tuh ka hon bawlta thouthou ua, atung in bel bangmah thawm hi'n thu hita leh aom kei hi. Himahleh tuk ahong hihtak in vuah hongzu in SIH ah tui ahong vung ta a, huchi'n thawm bangbang hiam ahong kipanta hi. Nikhat kenleng ka nute loukuan kava zuitei a, loukhou siam nailou kahihman in buk ah kanute' kana ngak hi. Sunlai tak vel ding khawng in numei pau thawm ging kahon zata a, SIH lam manoh a kihou suk nainai uh hin kathei hi. Sih lak atuntak un tuisung ah kibual om hi awmtak in tui kitok ging akiza hi. Akhenchiang bang in nui ging kalkal zel uhi. Gamlak ah kua ahimahmah di uam aw tua kisilte chi'n ka ngaih apha thei nawnkei. Lau in kanute' loukhohna lam ah kataisuk a, akiang uah kagen leh, "Lawmte kisil dia hong kuan nawn uh ahi maw..."chi'n thudang genlou in kapa toh akinuihsan lel uhi. Akhonunga kapan ahon gen leh, "tua mun ah akhen chiang in sakhi peuh hong hawk zel a, kap dinga kava naih chiang in muh ding khatmah om ngeilou." chi'n gen hi.
Nikhat taget lah, keileh kalawmpa khat toh ka gal mual lam uah vasa kap ding in nitaklam ninem in ka kuan uhi. Vangpha mahmah in vasa thum vel kaman pah hi. Ka lawmpa anuailam ah pang in kei akhung lam ah kapai tou hi. Bangtan hiam nung in khua mial ding in ahong kisa ta a, ka lawmpa sam in pai ding in kahong kisa ta hi. Kalawmpa'n ahon dawng pah a, ken leng lampi ah ana om in ka hongpaisuk ding chi'n ka kikou suk hi. Kapai suk a kagen namun katun in kuamah ana omta kei, kanunglam apan ka lawmpa aw bangbang khat in ahon sam a, ka dawn leh kintak a keilam hon manoh om in kathei hi. Ahong painai hulhul a, huchih kawmkawm in ka min khawllou hial in ahonsam pheiphei hi. Keileng ka lung hong nuam nawnlou in ka lauh tha ahong suak phut a, kintak in ka khua sung lam uh manoh in katha neih teng in taipetmah in katai hi. Khosung ka lut tak in ka lung hong nuam deuh a, gimlua kahihman in khawltawldam zek in huchi'n innlam kamanoh hi. Kholai katun in ka lawmpa ann nezou hong pawtkhia toh kakituak ua, aman anute' loukuan paitoh kituak kha a khomialma a inn tung ahihdan ahon hilh hi. Keileng heh mahmah in, "kon sam a na hon dawng hilou amaw? Na pai ding bek bangziaka hon hilh lou nahi hiam?" ka chih leh aman "ken ka honsam a, na hondawnga, paita ni ka hon chih leh anapai in kong omzek lai di. Na hon chi a, honna paisan mai kahi." chi'n ahon dawng hi. Lamdang kasa mahmah mai a, ka lawmpa' hon sapna lah ken zalou, ahih hanga ana dawngtu om, ken amah kasap hun a amah paikhi'n ta lah ahon dawng tu om veve zel ahihman in ka khonung ngaihtuah thak leh dawite'n kou gel honna khem uh hiding a, ka lau thak mahmah hi.
Theihlouh kal in hun hong paizel a, teirawl ka hong hihtak un nungak hel bang in kipawt theisam ta hi. Nikhat vengkhung lam ah nungak hel in lawmte toh ka kuan uhi. Chiamnuihte bawl in nuamsatak in inntekte toh ka kithuah uhi. Nuamsak luat nalam in paihun ding ka theikei zozen uhi. Atawp akmasa bang in hon khuang khum man ahihman in pai ding in kahong kithawi khia uhi. Tuanitak pen kha vak hilhiala lunglenhuai mahmah hi. Kou inn veng tawlam ahihman in lawmte teng a inn chiat uah alut zohnung un keikia in kapai suk hi. Thawmhau sim kahi dinga, thawm ging zak dingbang tam mahmah hi. Kholai khengsukta, ka hausapa uh innkong lak ka totsuk laivel in ka nung ah mi hong pai ging kaza hi. Tua thawm kazaktak in kalung hong muang deuh a, awl a pai in kana ngak bawl hi. Himahleh, ahon pha ngei mahmah kei hi. Ka khawl chiang in kanunga kalsuan gingpenle khawl a, kapai chiang in amah leng hongpai zel hi.
Kenleng atawp in lamdang salua in kua hon engbawl om tel ahia tu zan nungnung a? Chi a ka nung et leh kuamah muh ding ana omta kei hi. Huaitakin, keileng laulua in katai suk a, kanung ah aman hon delh suk zomah in ka khetul ah ahon sui a, kakipuk toh kiton in ahon tailiamsan hi. Keileng lau lua in sibup phial in inn katung a, tuazan ihmu theilou in puankawm ah ka ling khovak den hi.
1940 vel ahong hih in ka khua uah Pathian thu ahong lut samta hi. Kapate leng Pathian thu awi masapen hiding in amin uh agelh lut ta uhi. Ka hausapa un atheihtak in heh mahmah mai a, siampupa uh zang in kapa a bum uhi. Huaitakin kapa khophawk lou in ahong om a, a chite hong khauh in kisan petmah in ahong kisang hi. Akhenchiang in ahong pau bualbual zel a, "huai ah a hong kuanta uh, ka tem hon pia un avek un ka bantan sin." "hon lau uh maw? Pang ngamlou nahi uhia? Pang ve ua..." peuh chi'n hong paukhe zel hi. Lamdang kasa mahmah mai ua, ahongkuan ding kuate ahi ua? Chih lah kimu lou ahihman in kanu bang in kah pihpih mai hi.
Huchibang in kalkhat sung khawng a oma, ann lah nelou, tui lah dawnlou in a omhi. Ahihhang in aphak hunchiang in mihat mahmah nga inleng amawk in lentang zoukei uhi. Nikhat Pathian thugente khat (amin kathei nawnkei) kakhua uah ahong lut a, ka inn uah ahong pai a, kapa thumsakna ahong nei hi. Athum laitak in kapa kisang petmah a, mi 10 in alentang zoukei phial uh chih ding ahi mai. Himahleh thumna neihzoh toh kiton in thakhat a hong kikou vongvong in awl in atha hong zoi hiaihiai a, awl a hong hak khia in ahong tutou a, "Toupa min phat in om hen." chi'n dam ahong himaimah hi.
Akhonung a kapan ahon hilh dan in huailaitak in mi melse pipi, lian taktak ten amah thah sawm in delh ua, himahleh, akiang ah mikhat puan ngou silh khat in sepaih tampi toh amah veng den uh ahihman in bangmah loh zoulou uh ahih dan ahon hilh hi. Hiai kapa thiltuah ziakin mi tamtak khristian suak in amin uh gelh lut ua, huaikum mah in biakinn ding lam pan uhi. Hausapa natawm in kapa damkhiak atheih in amah leng Khristian suak a, saptuam makai muanhuaitak in a sihni dong in pang hi.
Keileng tangval ka hong hihsam ta a, Bible simtheih sam ut in ka khua uapan a mel 10 vel a gamla khua khat ah (akhominte gelh dah maini maw, agentu hon ngetna bang in) laisim ding in ka lawmte mi 2 toh kakuan uhi. Kou khua leh ka zotna ding khua uh kikal ah khua dang bangmah omlou a, gam mang sahtak nuai ah paulou-phun lou in kakizui ngatngat uhi. Kei amasa apai kahi a, bangtan hiam kapai nung un kalawmpa uh ananung pen in ka hong masa ding chi'n ahon pel hi. Kenleng kana awn pah a, ananungpen ah kapai hi. Bangtan hiam kapainung un kavan puak ahong gik deuhdeuh mai a, mi kiluai om mah abang hi. Kanunglam ka etchiang in kuamah muh ding a omkei, lah ka vanpuak gik deuh deuh maimah ahihman in kalawmte sam a khawl phot mai ka tum hi. Kalawmte kasap tak in kuamah in ahon dawngta kei ua, ngaihtak in kikou mah leng ka kam hum om mah bang in ka aw asuakkhe thei het kei mawk hi. Amau lah hon paitum san vungvung uh ahihman in keikia in munkhat ah ka dinga, kavanlah lakhe zoulou gim petmah in ka gim hi. A chang in ka dek ah khut khat in a hon maiphei thuamthuam zel a, lau lua a sibup kahi dinga, kakhanloh in khua amialta hi. Sawtlou kal in ka lawmte mi bangzah hiam hong pai in ahon mu ua, huchi'n a zan zan in ka manohna khua lam uh zuan in ahon pua uhi. Katha a chau mahmah mai a, kal khat sung mawngmawng thoukhe zoulou in lupna ah kalum den hi.
Kapa'n ahon omlouhsan man in ka laizil sunzom theilou in inn ah ka chiahkik hi. Ka khua kim uah dawp atam mahmah hi. Tuate ah ngavok tamthei mahmah mai a, aman ding in kikuan theizel hi. Nitak lam khat keikia in ka khotaw lam uah kakuan suk hi. Atui theh khepan chih ding in kapam zek ah kei thawm ging bangbang hong om a, Kei ka khawl chiang in amah leng khawlzel hi. Atung in ka khawk ngaih lokei a, kana mah kabuai pih hi. Ahon houpih kei leh ken bel houpih sawm lou mah kahi hi. Himahleh, kei pan hun a pang, kei khawl hun a khawl zel a ahong omom tak in ka lung hong nuam nawnkei a, ka dip bang hong hawmpian in kisai latlat hi. Atawp in himahmah kei e chi a kava etphei thahah leh kuamah muh ding omta lou, athawm ging kazakna mun ah dawp ding dan mahmah natawm kimu lou ahihman in kintak a kavante la in innlam zuan in kapai kik vengveng hi.
Pawltak hunlai nikhat ka gophel tawi in ka khomual lam uah vasa kap ding in kapaitou hi. Nisa tum dingkuan in hon khohkha in ka liim kichiantak in kimu thei hi. Atung inbel bangmah chilou a, ahihang in bangtanhiam nung in ka liim thum hongpha mawk hi. Ka kim ka etchiang inlah kuamah kamu kei a, lah mithum kiton helhel bang in kapai dandan in liim nihten hon zuiden uhi. Lauthawng gawp sim, kik mai kasawm laitak in ka khang a dailing buk kawm ah baibek hon hongboh uh kamu a kintak in ka ngim pah hi. Ken kangim sung inleng liim nihten leng ana ngimtei uhi. Kakap leh khat kapkha in ahong kia a, lei lak atuk toh kiton in atuk na mun hong ging zoih a, kenleng kintak in ka delhsuk pah hi. Amun katun leh vasa dingdan khatmah kamu kei a, ahihhang in mi ki tholh sukna hi awmtak in lei ana paat suk kamu hi. Huaitakin, "eh! Lawmte'n ana deih mahmah dan uh ahive maw..." chi'n lungsim thawmhau giugiau kawm in kintak in inn lam kazuan hi.
Ka tangval lai nitak khat ka toihnu hel in ka bawmtapa toh kakuan uhi. Houlim tui lokha in zan sawtpi katu kha thahah uhi. Atawp in hinawn mahmah kei e.... Ngaih aw nangtoh tutkhawl ka chim lou zong, taikhua val ding buh-al khuang ta e, khaubang na chiah phot mai ning maw... Chi'n innlam zuan ding in ka hong kithawi khia uhi. Kha vak hoih mahmah mai a, phalbi kipanta ahihman in vot sim hiauhiau hi. Kou zong awlawl a houlim kawm a kapai zel uhleh ka ma uah naupang kum 3 mi ding vel khat ana paipai kamu uhi. Tu zan sawt nung a kuate tapa ahi mahmah dia aw? Chikawm in ka delh bawl uhi. Ka hat pai uhleh amah hatpai a, ka awlpai uh leh amah leng awlpai zel hi. Atawp in iplah lokhong in ka delh thoh uh leh.... Kare! Kal sautak a suan in taimang suk hiau hi. Ka zonzon hang un kamu nawn kei uhi. Kalawmpa toh lauh ding lamle phawk lou zen in akal sau na e maw.... "Naupang kalsau pa" chi'n ka nui suksuk thei vanglak uhi.
Kumkhat khrismas nikhat bawng thau tak gou in annkuang ka lui uhi. Lentual nawl ah meh huan in lentual ah nitak lam in ann kane khawm uhi. Huaini a ka mehnek uh lamdang kasa mahmah hi. San seksuk mawk a, sam nin gim mah nam seksuk hi. Thau mahleh alim na ding khatmah a omkei, kuapeuh in tam kine zoulou hi. Puteek khat in ka kiang ah, tuni a sahuan laitak in nungak nga in sa bel ah asam uh hong diah in ahong sawp ua, huaiziaka isameh uh san seksuk ahi ahon chi a, ka gingta mahmah hi.
Khristiante pen khangtou zel in khosung pumpi khristian in kipesiang vekta hi. Himahleh, dawite nasep bel kituak kha zeuhzeuh lah hi. Nikhat kikhawm khin ka sunghte' inn ah tomchik bangzual in inn zuan in kapai suk hi. Ka insak ua lampi gei ah tosaw sing liantak pou hiven tua mun katun tak in thakhat in mailam suanthei lou in hon dal om mah bang in ka tang den hi. Kal kasuan dekchiang in ahithei kei. Banglai phukha mah kabang hi. Masawm theilou, nungkin theilou in bangtan hiam tang theilou in ka om mun ah ka dingden hi. Awl in nak haksa ka honsa hiaihiai a, hon nengchip om mah bang in kathei hi. Huchihlai tak in thakhat in ui ahong ham kongkong hi. Tua ui ahong ham toh kiton in, hon daltu pen alengkhia mah bang in kathei hi. Huchi'n nak thei nawn in kal kasuan thei nawn a, inn katun in tawl petmah in katawl demdum hi. Ka lawinu'n paihak honsa lua in honna hansan zomah hi. Aman zun khat vei ana nawn man ahizomah lai hi. Ka ngaihtuah thakleh dakkal 3 vel huaimun ah tangden ka hihtuak hi.
Nitak khat ka lupkhit vek nung un mikhat, thum huthut kawm a ka inn uh hong vial nilouh hi. Keileh ka zi in ka za uhi. Ka naute bel a ihmut khit vek takman un bangmah aphawk sekei uhi. Thawm ging sawt lou nung in ahong dai a, himahleh ka inn uh honglut sawm hileh kilawmtak in ka kongkhak uh ahong kisawi ekh-ekh nawn hi. Atawp in keileng kipa sak deuh mai in kathou khia a, ka kongkhak lam uh ka et leh, vathangkalh ah mikhat hong dak keukau ka mu hi. Guta hi ding chih lah huaihunlai a kuamah guta himhim omlou ahihman in lamdang kasa mahmah hi. Kenleng ki hangsansak in "Kua nahia? Vathangkalh kong khak sa na maw?" ka chi phei hi. Huaitakin, ka sumtawng uh ahong ging lomlom petmah a, kong khak hong a kava et leh mikhat buai petmah a buai in ana ki pei lunglung hi. Kenleng akiang ah, "Kua nahia?" chi a kadot leh kam khat mah in leng ahon dawngkei hi.
Huchia buaitak in a phe velvul a, amel hoihtak a etsawm in kava naih deuh hi. Amel dingdan muchiang theikei mah leng, amelpuak dan ka tanau te uh Enpai khua a omkhat toh kibang kasa mahmah hi. Kenleng akiang ah, "Pa Thang, zan nungnung a bang hong hih na hiam?" chi a kamdam a kahou pih leh awl in pau hetlou in kelkong lam manoh in paiphei a, kelkong akan khit in mang vengveng hi. Azing in khualtai ahongtunga, Enpai khua a ka Pa Thang si ahihdan ahong hilh uhi. Asih taka akha kou in ah hong kihil ana hi maimah hi.
Ka thiltuah teng hon hilh kim sipsip ding chileng tampi petmah pha ding hi. Ka gamvakna a katuah te, khualzinna a katuahte zong lauhuai tam mahmah hi. Kou hunlai inbel dawi-le-kau mah kilaupen a, azom in gamsa kilau hi. Mihing pen lauh ding omlou a, meltheihlouh toh kituahkhak hun natawm in lawmta bang in kihou thei in lampi ah chiamnui kawm in tonkhawm thei hi ung. Ahih hangin, tulai inbel dawi-le-kau ban ah, gamsate kilau nawnlou a, amauleng milak ah hong kilak mengmeng lou uhi. Mihing mah lauhpen in kineita a, dawite sang in zong khawk zawphial hita hang e... Amau te'n hon buaisak in hon lausak khasek mah le uh, taksa hon liamsak kha khollou ua, tulai inbel mihingte ahuham pen suak gawp hita hang maw... Ei mihingte huham luat ziaka dawite leng mihingte muh a hong pawng kilak ngam nawnlou ahih mel uh kuan a thei a.........
BEI PHOT TA EI
© Siamsinna leh Vakiangbu
(Mikhat hon gensawn bang in)
Kaneu lai uh chilehang, 1932 kum lai vel ding in ka khua uh gammang sah takmai in um kimvel hi. Gamsa leh vasa chi tuamtuam tam mahmah mai a, kou naupangte'n gophel bawl in sailim kahual ua, khokim ah vasa ka beng zel uhi. Nikhat ka khokhang ua lui ah sailim hual in pawl khuh khum in ka hal tak uhi. Ka mansiang tak un vasa beng din ka kithoi khia uhi. Kei anunung pen in kapang a, ka liim uh ka et leh ka ma a paipa lim a san in asan mawk hi. Lamdang salua in amah kasam a, ka hilh leh aman leng lamdangsa in ka lawmteng toh kavek ua khawl in ka en diamduam uhi. Kou adangtenga bel avom in kilanga, amaha chauh san petmah in san mawk hi.
Huaitakin, kenleng kalawmpa kiang ah, "ahikei lawm aw, nang liim pen tuni tuamlua ahihman in inn ah ana paimai in denchiah tuahsia tuak kha phut thei ihi." ka chi hi. Himahleh amah ut tuanlou a, vasa mat ding penmah in lungsim zou zaw ahihman in ka sawlkik zou kei hi. Huchi'n ka pai zel ua, mun tuamchiat ah panmun kihawm in ka kikhendalh vek uhi. Ni ahong kai takin, kapan mun uapan in innlam kazuan siausiau uhi. Himahleh, kalawmpa uh a liim asana kimu pen khua mial tan inleng inn ahongtung kei hi. Khomialnung in mipi'n zontheihna teng zong mahle uh, asulnung sui theih ding bangmah muh aneikei uhi. Kou alawmteng thu ahon dong ua, ka panmun chiat uh ka zot nung uh kimu khanawnlou kahihdan uh ka gen chiat uhi. Atawp in aliim omdan ngeina banglou ahih kaphawk khia a, val upa te khat kiang ah kagen hi. Huaitak in aman leng, "iliim asan leh tuahsia kituak ding chihna ahi. Na thumang leh zaw damlai maithei hiven maw..." chi hithit lel hi. Tunitan in kalawmpa un bang tuahsia tuak ahia? Si hia? Hing hia? Chih kuamah athei omlou hi. Huainungteng hun sawngkhat gamlak ah vasa benga kuan ngamlou in kou naupangte khosung kia ah ka om ngam phet uhi.
Naupang lai aki hihman in nna kisem theinailou a, sunchiang in inn ngak in kapang zel hi. Sunkhat lawmte toh kimawl khin sun ann nek hun in, inn ah sun ann neding in kapai hi. Ka kelkong uh katun in ka singhon tung uah naupang puan-ak silh lou khekhat chauh nei ana tuang a, akhe bang ana pei velhvelh zozen hi. Kenleng lau kawmkawm in awl in ka paiphei zel a, kei hon mulou ahihman in aphe zalhzalh zel hi. Naupang khekhat chauh nei kamuh patna ahihman in lau mahmah kawm lah munuam lotel zel chih dan in ka om hi. Atawp in suangkhat la in ka deng ekh a, lamdangtak in ka denkhak toh kiton in a leng khe vengveng mawk hi. Keileng lau lua in ka inn uah lut ngamlou in kap kawm in kapute' inn tan ka taitung hi. Ka tuntak in ka thilmuh kapi kiang ah kagen leh, ka mimuh penPheisam ahihdan ahon hilh hi. Ka lau mahmah mai a, huai nitak ka inn uah giak ngamlou in kapute' inn ah ka giak hi.
Phavang hun in miteng in awllen hun kinei zel a, nitak chiang in nungak-tangval, naupangte akua chih omlou in Lentual ah khavak nuai ah kimawl nainai in nuam kisathei mahmah hi. Haam ah tangvalte giak zel ua, amau kimuang mahmah ahihman in lungmuangtak in ka kimawl zel uhi. Nikhat ki hen ate ka kineih uhi. Kei ahon mankha ua, hon hen sawm in ka hanmual geilam uah ahon paipih uhi. Kha avak mahmah mai a, himahleh thakhat in ka kim teng uh mial petmah in ahong mial guih hi. Ka kiang a pai kua ahia chihna tawm kuamah kitheizou lou khop in mialpetmah in hong mial hi. Huchi kawmkawm in khawllou in hon pitu om hileh kilawm in kapai zel ua, ka kiang ah khat in ka min hon sam in hon hou pihpih hi. Lamdang kasa mahmah, kahalh khiaktak in kha avak mahmah mai a, lawmte toh ki houlim kawmkawma paipai ka kisak leh kuamah muh ding a omta kei. Kamuh sunsun bel kakim ah singkung liantaktak ngen chauh ahi. Gamlak ah om kana himai mah a, lau lua in kap in ka kap ekh-ekh mai a, kintak in lampi zui in tai in katai petmah hi. Bangtan tai a, bangtan tung kahia? Ka theizou kei. Khua kaphawk tak in ka lupna tung ah om kana himaimah hi.
Kanu'n ka khophawk lam atheihtak in kakiang ah ahong pai a, kenleng ka omdan kadong pah hi. Zan nitak a inn kapai ngeilouh tak in khomipi patau in zon theihna teng hon zong ua, atawp in lou lampi ah khophawk lou a lum in ahon mu uhi. Ka lawmte toh "KI HEN ATE" kineih kahih dan uhleh kathil tuah teng ka gen leh, ka lawmte kuamah in hen dinga hon mankha lou uh ahihdan ahon genvek ua, kuamah in kei hon mukha lou uh ahihdan hongen chiat uhi. Lamdang kasa mahmah mai ua, dawite nasep ahi chi'n a zing in ahon thoih uhi.
Kou naupang lai inbel Pathian thu munkhen khat ah na tungta mah leh, kou khua ah Pathian thu awi khat mah zong omnailou hi. Dawi leh kau mahtoh na khosa khawm kahih man un, akhenchiangin anuamlou mahmah pawl zong tam hi.
Nikhat ka khote uh papi khat agam vakna ah hong tuahsia hi. Nitak lam in asihthu khosung mipi'n kitheipan hi. Tangval teng siluang paw ding in kuankhe bei uh a, numei leh naupang teng inn ah ki-om hi. Misipa pen adamlai in kou inn hong zual mahmah ahihman in kalauh tha ahong suak petmah mawk hi. Kei leh ka pi chauh om kahi ua, tu ngamlou in meipam lupna tung ah ka pi'n hon lup pih hi. Thuk khuk a meivak chauh meivak dang kinei lou a, mei in asalh khak louhna teng mial mahmah sek hi. Huchih laitak in mikhat in ka inn kongkhak uh hong in ahong lut a, ka dang atak lua chi'n tuikuang lam naih in tui hong dawn khutkhut hi. Atungin bangmah ngaihphat louhnang neikei mahleng, tui dawnpan tui dawnkhin theiloua dawndawn mai ahih chiang in lamdang kasa mahmah hi. Atawp in kapi'n le sawt sa mahmah ahi dinga, "Vialpum, huaizah dawnta inla paita oh" a hon chih leh thakhat in ahong mang guih mawk hi. Ka laupetmah mai a, puan kawm ah kilukhuh in lin petmah in ka ling hi. Aziak bel tua misipa pen amin Vialpum hi a, ka inn uah tui dawna ahong lut theih mawkpen lamdang sa in ka lau mahmah hi.
Kumkhat ka louh neihna lam uh gamla simtak ahi a, ka lou kiang uah SIH lianlou khat a om hi. Kho mite'n ka lou mun uh kheng din hon ngen mahle uh kapa a ut hetkei mawk hi. Kapa bel hangsan mahmah khat hisam a, gamvak hat mahmah in sa tampi zong ana man hi. Huchi'n huailou tuh ka hon bawlta thouthou ua, atung in bel bangmah thawm hi'n thu hita leh aom kei hi. Himahleh tuk ahong hihtak in vuah hongzu in SIH ah tui ahong vung ta a, huchi'n thawm bangbang hiam ahong kipanta hi. Nikhat kenleng ka nute loukuan kava zuitei a, loukhou siam nailou kahihman in buk ah kanute' kana ngak hi. Sunlai tak vel ding khawng in numei pau thawm ging kahon zata a, SIH lam manoh a kihou suk nainai uh hin kathei hi. Sih lak atuntak un tuisung ah kibual om hi awmtak in tui kitok ging akiza hi. Akhenchiang bang in nui ging kalkal zel uhi. Gamlak ah kua ahimahmah di uam aw tua kisilte chi'n ka ngaih apha thei nawnkei. Lau in kanute' loukhohna lam ah kataisuk a, akiang uah kagen leh, "Lawmte kisil dia hong kuan nawn uh ahi maw..."chi'n thudang genlou in kapa toh akinuihsan lel uhi. Akhonunga kapan ahon gen leh, "tua mun ah akhen chiang in sakhi peuh hong hawk zel a, kap dinga kava naih chiang in muh ding khatmah om ngeilou." chi'n gen hi.
Nikhat taget lah, keileh kalawmpa khat toh ka gal mual lam uah vasa kap ding in nitaklam ninem in ka kuan uhi. Vangpha mahmah in vasa thum vel kaman pah hi. Ka lawmpa anuailam ah pang in kei akhung lam ah kapai tou hi. Bangtan hiam nung in khua mial ding in ahong kisa ta a, ka lawmpa sam in pai ding in kahong kisa ta hi. Kalawmpa'n ahon dawng pah a, ken leng lampi ah ana om in ka hongpaisuk ding chi'n ka kikou suk hi. Kapai suk a kagen namun katun in kuamah ana omta kei, kanunglam apan ka lawmpa aw bangbang khat in ahon sam a, ka dawn leh kintak a keilam hon manoh om in kathei hi. Ahong painai hulhul a, huchih kawmkawm in ka min khawllou hial in ahonsam pheiphei hi. Keileng ka lung hong nuam nawnlou in ka lauh tha ahong suak phut a, kintak in ka khua sung lam uh manoh in katha neih teng in taipetmah in katai hi. Khosung ka lut tak in ka lung hong nuam deuh a, gimlua kahihman in khawltawldam zek in huchi'n innlam kamanoh hi. Kholai katun in ka lawmpa ann nezou hong pawtkhia toh kakituak ua, aman anute' loukuan paitoh kituak kha a khomialma a inn tung ahihdan ahon hilh hi. Keileng heh mahmah in, "kon sam a na hon dawng hilou amaw? Na pai ding bek bangziaka hon hilh lou nahi hiam?" ka chih leh aman "ken ka honsam a, na hondawnga, paita ni ka hon chih leh anapai in kong omzek lai di. Na hon chi a, honna paisan mai kahi." chi'n ahon dawng hi. Lamdang kasa mahmah mai a, ka lawmpa' hon sapna lah ken zalou, ahih hanga ana dawngtu om, ken amah kasap hun a amah paikhi'n ta lah ahon dawng tu om veve zel ahihman in ka khonung ngaihtuah thak leh dawite'n kou gel honna khem uh hiding a, ka lau thak mahmah hi.
Theihlouh kal in hun hong paizel a, teirawl ka hong hihtak un nungak hel bang in kipawt theisam ta hi. Nikhat vengkhung lam ah nungak hel in lawmte toh ka kuan uhi. Chiamnuihte bawl in nuamsatak in inntekte toh ka kithuah uhi. Nuamsak luat nalam in paihun ding ka theikei zozen uhi. Atawp akmasa bang in hon khuang khum man ahihman in pai ding in kahong kithawi khia uhi. Tuanitak pen kha vak hilhiala lunglenhuai mahmah hi. Kou inn veng tawlam ahihman in lawmte teng a inn chiat uah alut zohnung un keikia in kapai suk hi. Thawmhau sim kahi dinga, thawm ging zak dingbang tam mahmah hi. Kholai khengsukta, ka hausapa uh innkong lak ka totsuk laivel in ka nung ah mi hong pai ging kaza hi. Tua thawm kazaktak in kalung hong muang deuh a, awl a pai in kana ngak bawl hi. Himahleh, ahon pha ngei mahmah kei hi. Ka khawl chiang in kanunga kalsuan gingpenle khawl a, kapai chiang in amah leng hongpai zel hi.
Kenleng atawp in lamdang salua in kua hon engbawl om tel ahia tu zan nungnung a? Chi a ka nung et leh kuamah muh ding ana omta kei hi. Huaitakin, keileng laulua in katai suk a, kanung ah aman hon delh suk zomah in ka khetul ah ahon sui a, kakipuk toh kiton in ahon tailiamsan hi. Keileng lau lua in sibup phial in inn katung a, tuazan ihmu theilou in puankawm ah ka ling khovak den hi.
1940 vel ahong hih in ka khua uah Pathian thu ahong lut samta hi. Kapate leng Pathian thu awi masapen hiding in amin uh agelh lut ta uhi. Ka hausapa un atheihtak in heh mahmah mai a, siampupa uh zang in kapa a bum uhi. Huaitakin kapa khophawk lou in ahong om a, a chite hong khauh in kisan petmah in ahong kisang hi. Akhenchiang in ahong pau bualbual zel a, "huai ah a hong kuanta uh, ka tem hon pia un avek un ka bantan sin." "hon lau uh maw? Pang ngamlou nahi uhia? Pang ve ua..." peuh chi'n hong paukhe zel hi. Lamdang kasa mahmah mai ua, ahongkuan ding kuate ahi ua? Chih lah kimu lou ahihman in kanu bang in kah pihpih mai hi.
Huchibang in kalkhat sung khawng a oma, ann lah nelou, tui lah dawnlou in a omhi. Ahihhang in aphak hunchiang in mihat mahmah nga inleng amawk in lentang zoukei uhi. Nikhat Pathian thugente khat (amin kathei nawnkei) kakhua uah ahong lut a, ka inn uah ahong pai a, kapa thumsakna ahong nei hi. Athum laitak in kapa kisang petmah a, mi 10 in alentang zoukei phial uh chih ding ahi mai. Himahleh thumna neihzoh toh kiton in thakhat a hong kikou vongvong in awl in atha hong zoi hiaihiai a, awl a hong hak khia in ahong tutou a, "Toupa min phat in om hen." chi'n dam ahong himaimah hi.
Akhonung a kapan ahon hilh dan in huailaitak in mi melse pipi, lian taktak ten amah thah sawm in delh ua, himahleh, akiang ah mikhat puan ngou silh khat in sepaih tampi toh amah veng den uh ahihman in bangmah loh zoulou uh ahih dan ahon hilh hi. Hiai kapa thiltuah ziakin mi tamtak khristian suak in amin uh gelh lut ua, huaikum mah in biakinn ding lam pan uhi. Hausapa natawm in kapa damkhiak atheih in amah leng Khristian suak a, saptuam makai muanhuaitak in a sihni dong in pang hi.
Keileng tangval ka hong hihsam ta a, Bible simtheih sam ut in ka khua uapan a mel 10 vel a gamla khua khat ah (akhominte gelh dah maini maw, agentu hon ngetna bang in) laisim ding in ka lawmte mi 2 toh kakuan uhi. Kou khua leh ka zotna ding khua uh kikal ah khua dang bangmah omlou a, gam mang sahtak nuai ah paulou-phun lou in kakizui ngatngat uhi. Kei amasa apai kahi a, bangtan hiam kapai nung un kalawmpa uh ananung pen in ka hong masa ding chi'n ahon pel hi. Kenleng kana awn pah a, ananungpen ah kapai hi. Bangtan hiam kapainung un kavan puak ahong gik deuhdeuh mai a, mi kiluai om mah abang hi. Kanunglam ka etchiang in kuamah muh ding a omkei, lah ka vanpuak gik deuh deuh maimah ahihman in kalawmte sam a khawl phot mai ka tum hi. Kalawmte kasap tak in kuamah in ahon dawngta kei ua, ngaihtak in kikou mah leng ka kam hum om mah bang in ka aw asuakkhe thei het kei mawk hi. Amau lah hon paitum san vungvung uh ahihman in keikia in munkhat ah ka dinga, kavanlah lakhe zoulou gim petmah in ka gim hi. A chang in ka dek ah khut khat in a hon maiphei thuamthuam zel a, lau lua a sibup kahi dinga, kakhanloh in khua amialta hi. Sawtlou kal in ka lawmte mi bangzah hiam hong pai in ahon mu ua, huchi'n a zan zan in ka manohna khua lam uh zuan in ahon pua uhi. Katha a chau mahmah mai a, kal khat sung mawngmawng thoukhe zoulou in lupna ah kalum den hi.
Kapa'n ahon omlouhsan man in ka laizil sunzom theilou in inn ah ka chiahkik hi. Ka khua kim uah dawp atam mahmah hi. Tuate ah ngavok tamthei mahmah mai a, aman ding in kikuan theizel hi. Nitak lam khat keikia in ka khotaw lam uah kakuan suk hi. Atui theh khepan chih ding in kapam zek ah kei thawm ging bangbang hong om a, Kei ka khawl chiang in amah leng khawlzel hi. Atung in ka khawk ngaih lokei a, kana mah kabuai pih hi. Ahon houpih kei leh ken bel houpih sawm lou mah kahi hi. Himahleh, kei pan hun a pang, kei khawl hun a khawl zel a ahong omom tak in ka lung hong nuam nawnkei a, ka dip bang hong hawmpian in kisai latlat hi. Atawp in himahmah kei e chi a kava etphei thahah leh kuamah muh ding omta lou, athawm ging kazakna mun ah dawp ding dan mahmah natawm kimu lou ahihman in kintak a kavante la in innlam zuan in kapai kik vengveng hi.
Pawltak hunlai nikhat ka gophel tawi in ka khomual lam uah vasa kap ding in kapaitou hi. Nisa tum dingkuan in hon khohkha in ka liim kichiantak in kimu thei hi. Atung inbel bangmah chilou a, ahihang in bangtanhiam nung in ka liim thum hongpha mawk hi. Ka kim ka etchiang inlah kuamah kamu kei a, lah mithum kiton helhel bang in kapai dandan in liim nihten hon zuiden uhi. Lauthawng gawp sim, kik mai kasawm laitak in ka khang a dailing buk kawm ah baibek hon hongboh uh kamu a kintak in ka ngim pah hi. Ken kangim sung inleng liim nihten leng ana ngimtei uhi. Kakap leh khat kapkha in ahong kia a, lei lak atuk toh kiton in atuk na mun hong ging zoih a, kenleng kintak in ka delhsuk pah hi. Amun katun leh vasa dingdan khatmah kamu kei a, ahihhang in mi ki tholh sukna hi awmtak in lei ana paat suk kamu hi. Huaitakin, "eh! Lawmte'n ana deih mahmah dan uh ahive maw..." chi'n lungsim thawmhau giugiau kawm in kintak in inn lam kazuan hi.
Ka tangval lai nitak khat ka toihnu hel in ka bawmtapa toh kakuan uhi. Houlim tui lokha in zan sawtpi katu kha thahah uhi. Atawp in hinawn mahmah kei e.... Ngaih aw nangtoh tutkhawl ka chim lou zong, taikhua val ding buh-al khuang ta e, khaubang na chiah phot mai ning maw... Chi'n innlam zuan ding in ka hong kithawi khia uhi. Kha vak hoih mahmah mai a, phalbi kipanta ahihman in vot sim hiauhiau hi. Kou zong awlawl a houlim kawm a kapai zel uhleh ka ma uah naupang kum 3 mi ding vel khat ana paipai kamu uhi. Tu zan sawt nung a kuate tapa ahi mahmah dia aw? Chikawm in ka delh bawl uhi. Ka hat pai uhleh amah hatpai a, ka awlpai uh leh amah leng awlpai zel hi. Atawp in iplah lokhong in ka delh thoh uh leh.... Kare! Kal sautak a suan in taimang suk hiau hi. Ka zonzon hang un kamu nawn kei uhi. Kalawmpa toh lauh ding lamle phawk lou zen in akal sau na e maw.... "Naupang kalsau pa" chi'n ka nui suksuk thei vanglak uhi.
Kumkhat khrismas nikhat bawng thau tak gou in annkuang ka lui uhi. Lentual nawl ah meh huan in lentual ah nitak lam in ann kane khawm uhi. Huaini a ka mehnek uh lamdang kasa mahmah hi. San seksuk mawk a, sam nin gim mah nam seksuk hi. Thau mahleh alim na ding khatmah a omkei, kuapeuh in tam kine zoulou hi. Puteek khat in ka kiang ah, tuni a sahuan laitak in nungak nga in sa bel ah asam uh hong diah in ahong sawp ua, huaiziaka isameh uh san seksuk ahi ahon chi a, ka gingta mahmah hi.
Khristiante pen khangtou zel in khosung pumpi khristian in kipesiang vekta hi. Himahleh, dawite nasep bel kituak kha zeuhzeuh lah hi. Nikhat kikhawm khin ka sunghte' inn ah tomchik bangzual in inn zuan in kapai suk hi. Ka insak ua lampi gei ah tosaw sing liantak pou hiven tua mun katun tak in thakhat in mailam suanthei lou in hon dal om mah bang in ka tang den hi. Kal kasuan dekchiang in ahithei kei. Banglai phukha mah kabang hi. Masawm theilou, nungkin theilou in bangtan hiam tang theilou in ka om mun ah ka dingden hi. Awl in nak haksa ka honsa hiaihiai a, hon nengchip om mah bang in kathei hi. Huchihlai tak in thakhat in ui ahong ham kongkong hi. Tua ui ahong ham toh kiton in, hon daltu pen alengkhia mah bang in kathei hi. Huchi'n nak thei nawn in kal kasuan thei nawn a, inn katun in tawl petmah in katawl demdum hi. Ka lawinu'n paihak honsa lua in honna hansan zomah hi. Aman zun khat vei ana nawn man ahizomah lai hi. Ka ngaihtuah thakleh dakkal 3 vel huaimun ah tangden ka hihtuak hi.
Nitak khat ka lupkhit vek nung un mikhat, thum huthut kawm a ka inn uh hong vial nilouh hi. Keileh ka zi in ka za uhi. Ka naute bel a ihmut khit vek takman un bangmah aphawk sekei uhi. Thawm ging sawt lou nung in ahong dai a, himahleh ka inn uh honglut sawm hileh kilawmtak in ka kongkhak uh ahong kisawi ekh-ekh nawn hi. Atawp in keileng kipa sak deuh mai in kathou khia a, ka kongkhak lam uh ka et leh, vathangkalh ah mikhat hong dak keukau ka mu hi. Guta hi ding chih lah huaihunlai a kuamah guta himhim omlou ahihman in lamdang kasa mahmah hi. Kenleng ki hangsansak in "Kua nahia? Vathangkalh kong khak sa na maw?" ka chi phei hi. Huaitakin, ka sumtawng uh ahong ging lomlom petmah a, kong khak hong a kava et leh mikhat buai petmah a buai in ana ki pei lunglung hi. Kenleng akiang ah, "Kua nahia?" chi a kadot leh kam khat mah in leng ahon dawngkei hi.
Huchia buaitak in a phe velvul a, amel hoihtak a etsawm in kava naih deuh hi. Amel dingdan muchiang theikei mah leng, amelpuak dan ka tanau te uh Enpai khua a omkhat toh kibang kasa mahmah hi. Kenleng akiang ah, "Pa Thang, zan nungnung a bang hong hih na hiam?" chi a kamdam a kahou pih leh awl in pau hetlou in kelkong lam manoh in paiphei a, kelkong akan khit in mang vengveng hi. Azing in khualtai ahongtunga, Enpai khua a ka Pa Thang si ahihdan ahong hilh uhi. Asih taka akha kou in ah hong kihil ana hi maimah hi.
Ka thiltuah teng hon hilh kim sipsip ding chileng tampi petmah pha ding hi. Ka gamvakna a katuah te, khualzinna a katuahte zong lauhuai tam mahmah hi. Kou hunlai inbel dawi-le-kau mah kilaupen a, azom in gamsa kilau hi. Mihing pen lauh ding omlou a, meltheihlouh toh kituahkhak hun natawm in lawmta bang in kihou thei in lampi ah chiamnui kawm in tonkhawm thei hi ung. Ahih hangin, tulai inbel dawi-le-kau ban ah, gamsate kilau nawnlou a, amauleng milak ah hong kilak mengmeng lou uhi. Mihing mah lauhpen in kineita a, dawite sang in zong khawk zawphial hita hang e... Amau te'n hon buaisak in hon lausak khasek mah le uh, taksa hon liamsak kha khollou ua, tulai inbel mihingte ahuham pen suak gawp hita hang maw... Ei mihingte huham luat ziaka dawite leng mihingte muh a hong pawng kilak ngam nawnlou ahih mel uh kuan a thei a.........
BEI PHOT TA EI
© Siamsinna leh Vakiangbu
Comments
Post a Comment