NU
~Pau Lian
Sihsual
in aki pek a,tua pindan sung ah huih tasam leh naklah tak in a om
hi.Amai ah kho-ul naktak in a luang a,a mit apan lauhna leh gimna ziak
in khitui a luang hi.A lupna a lukham leh puan kiphahte khitui leh
kho-ul ziak in a kawtsuak a,na asak luat man in thakhat in alu a phong
kang guih zel a,akam ah huih naktak in a diklut a aki ing tonton
hi.Haksa sa in akap a,sisan pal in haksatna tengtoh ta anei ta.
Gim mahmah hinapi lamen tak leh kipaktak in adak gawkgawk a,naudomte ang a naungek kahna aw ging azaklouh man in a nuihmai tuh meivak thakhat a mit bang in amial nawnta hi.Patautak in bang chi a kanau a chi a,naudonnu mel patauh chitak a en a,hon hilh ve ua bangchi a kanau a chi a,tua laitak in nupinu patauh awging kuaman azakei uh.Ngaihtak in akikou a,kanau bei hia chi kawm in akap a,naudom nu'n, patau ken a hong hoih mai ding chi in naungek tuh muntuam ah kintak in a pomkheta uhi.
Nupinu
liamna ma ahah ua,nupi nu'n bel amah a khoihlam uh atheikei,a nau a
pomkhiak nalam kongkhak a en den a,a kam ah aw suak zoulou sasa in kanau
a dam hia? kanau adam hia?.. chin ama zakkhop in amuk a phun den
hi.Nurse ten nupinu akep zoh nung uh sawtlou in apasal leh a sungkuante a
hong lut ua,nuihmai kawm in inau ahong hoih ding,pasal ahi a,ahoih
zawkna ding in ICU ah sawtlou koih phot ahi uh aw chi in dawnding
theituite pedek mah leh tua nupi nu'n ata mel amuh ma ne a dawnlouh atup
ahi chi giugeu hi.
Dakkal 34 nung in tua naungek
tuh anu ang ah a hon tawi ua,anu'n a nawi apia a,deihthoh tak a zut
hianhian kawm in,bawi tua natep ka sisan ahi aw,hong lian mengmeng inla
,nanu leh pa kipak saktu hong hi ve aw chi hi.Tua naungek tuh lungmuang
tak in ahong ihmu a,himahleh anu bel a ihmu ngamkei,vot taleh lum taleh
phun ngamlou in atapa deihthoh tak tuh haksatna,gimna leh lungngaihna
toh a khoi piching ta hi.
Tua anu'n ittak a a don
let tangval pa'n anu itna leh kepna a mangngilh ta,zu leh sa kham in
vakthap mahleh anu a lungke ngeikei,a paihakni in ihmulou in anu'n lupna
apan kongkhak gingding a ngai den a,a bil a muangsak ngeikei,sana a
enen a,a khenchiang in khamsa,liam leh bai,luak siakngai tanpha in atapa
inn hongtung mahleh anu'n nemtak in...bawi naneu lai apan nazun na ek
siak kahi ta,non muan tantan kasiak ding,hiai hih dia kilawm nawnlou
nahi na chih chiang in nong kibawlhoih nading chin tailou in kamdam in
genzel hi.Tangval huntawk himah leh thillim leh nekding banghiam aneih
hun inleng anu'n nengamlou in atapa adin ana sitzel a,atapa in lim satak
a anek amuh a akipahna tuh amah adia kipahna amuh omsun ahita,himahleh
atapa in "Nu,alim lua,kakipak" a chi ngeikei.Anu ading in atapa vual
nopna tuh lungkhamna ahong hita,himahleh atapa in a theisiam ngeikei,anu
sang a ngaihzawk leh amah care zaw bang a angaih lawm ahauh tak ziak
in.
Tua tangvalpa'n zi hon neita,ta nih leh thum
toh,huchih hun nasan inleng anu itna a theisiam naikei,inn hoihpi ah anu
tengpih mahleh anu'n a poimawh itna adin zoukei.Anu bilbuk ah anu a
itdan thu khatvei mahleng a gen ngeikei,anu a hong teek hiaihiai a
naupang sia a hong suak ta,chikhum themkhat duhgawh a atute thilnek a et
lai inleng a lian tata nahai uh,valum suk aw chin salhna a muta.Akhum
aduh ni in kamkha a lawhtak ta.Kideknuam himah leh teksia,pilna tasamta
ahihman in phunkha sek a,duh tuntun himahleh ngen ngamlou a,nektang
sitngam tu leh ta neilou in a tute eng in tua gimthuak NU tuh itna
apiakkhiak a lehkikna gah nemanlou in a mualliamta hi.
Kum tampi painung in a tapa ahong teka,huaihun in lungngai vungvung kawm in varandah ah atu a,poi hina maizen e maw...naduh nadeih ding theisiam dia kilawm hinapi a theihsiam sawm a nang kon awlmoh manlouh ziak a iitna na poimawh zah hon pekhalou keitave maw NU...hon ngaidam in aw chi in akap a himahleh azading anu adam nawnkei.Huchi in tuapa mahleng anu khasiat na zahmah a khase kawm in atu leh taten hanmual ah a vuiliamta uhi.
©Siamsinna leh Vakiangbu
Comments
Post a Comment