ITNA LAIKHAK

By ~ Kattie Mawite

To,

Ka mangngilh theihlouh UU.

Mi' laithon kikhak leh itna tangthu gil taktakte ah, 'Hiai laikhak na sim hunchiang in, genthei kei zaw, hankhuk vot dikdek sung a zaal in, lungkham mangbatna leh nat-le-sat thuak din om nawnkei mah leng' chih bang in a gen zel ua, himahleh kenzaw tua bang in ka chikei ding. Himahleh U, thilkhat bel ka gennuam. Hiai ka laikhak na simkhak chiang in, na sulnung ah keikia ka om a, nang hon ngai ngoihngoih in hinkhua kana zang bei zel chih ana thei in aw.

Awle U, damzel nahih ka lamen a, kei leng Pathian venna leh kepnate ziak in ka damzel chih ding ahi. U, hon mangngilh sawm in ka hihtheih tawk in pang mah leng, ka hihtheih khel ahi ding a, hon mangngilh ka sawm semsem chiang in ka hon phawk semsem. Nangle na hon ngaihtuah kha ngei sam hiam? Vuah hong zu a, khua bang hong votsim sipsip chiang in nang kon ngaihna a lian deuhdeuh. Vuahmal te ka en a, na mel ka mu. Ni a hong sa a, khua hong lum chiang in namel a hong langzel. Huihkhi'n hon sem hiauhiau chiang in ka bilbuk ah,'Nau kon ngailua' hon chi bang in ka ngaihtuah a, ka hon ngaihna a uangsak sem in ka thei.

Bandh lai a na hong pawt a, na paihak ziaka auto na lap nawnlouh lai na theilai hia? Ka inkhang ua kawltu tui dawn dia I kisak laia, naupangpa'n a kawltu hekna khawl a siatsak sese lai kha.... Khatvei a nong pawt, na paidek a pasal zukham khat in hon zuih a sawm laia, na ngaihlouh pipi a na gari nung a ahongtut lai na theilai hia? Na nuihmai te, na kamsuak nem ngiingei leh gamtat-khoheidan khempeuh ka mitkha ah a mang theikei. U, thil teng, bangteng hunlui phawkna in ka dim. Sapkik sawm mah leng, a hithei nawnkei. Nang na phawk zel sam hia? Na vangngaih lianu gelna in na mittui a luang sam hiam?

Pathianni zingkal in, 'U kikhawm di maw?'chi in ka hon dong a, 'Hmmm kikhop sawm kahi Nau. Nangla?' Na hon chi a. Nuamtak a kikhawm dia deihsakna kikhak in lungnuam tak in I kikhawm tuak a. Himahleh bangziaka kikhoptawp apan hon thuzak nawnlou nahiam U? Kon text a, non reply kei. Kon call a, na pickup tuankei. Bangziak ahiam? Tunitan in bangmah ka theisiam kei a, ka theisiam zoukei. 

Itna simthu na hon leel lai in, sih tanpha a dia na itna na hon piak hilou hiam? 'Nau, sihna loungal kikhensak kei ni aw' na chihlai te mangngilh ta nahi hiam? Ken zaw, ka damsung in ka mangngilh ngeikei ding. Hunte paizel in, ka ngaihtuahnate liammangpih din lamen mahleng, niteng in kakiang a na chiamsa simthute a hong thak zel.

A chang in, 'Damzel hina inte maw? Nuam sazel na inte maw?' Chih bang in ka hon ngaihtuah zel. A chang in hon thuzak sawm mahleng, kei ah kisuanlahna lianpi a om a, na no.call din ka kisa zel. Himahleh ka tawpkik zel. Hon text di chi in na message di ka gelh zel a, hon khak ngamlou in ka clear kik khazel.

"Someday, you will miss me like I miss you today

Someday you will need me like I need you today

Someday you will love me like I love you today" 

chi a message nahon khak kha, ka lungsim ah a hong thak zel a, dik kasa mahmah. Ahi a, bangziaka huai nagen hi hiam chih ka theinuam. Huailai pek apan hon paimangsan nana sawmsa ahi hiam chih theihnopna in kadim.

Bangteng hileh, huai bel apoimoh pen ahikei. A chang in, kei sanga paal zaw, chin zaw leh mel-le-puam, pilna-siamna leh neih-le-lam a chinzaw na mu dia, kipaktak leh nuamsa tak in hinkhua na zang din kon gingta a, kon kipahpih mahmah. A chang in lah, midang a din kon phal thei mahmah kei. Unaunu Chingthianngai in asak "Ngaih kahiam ngaihlouh kahiam, ngaih aw tel nuam ing" chih bang ka ngai zel a, kei a di liauliau a phuah a bang hial. Ahi a, U, ngaih kahiam? Ngaihlouh kahiam?

Nang toh kumsawt lou bang tulkhawm ding chi a hinkhua kilawptak akana zatzelte tu in a kilehbulh ta. Bangmah kilawpna himhim ka neithei nawnkei. 

Tun leh zua hal vang hiam? 'Sihna lou ngal in khenlou ding' na chih pen in tun-le-zua apan halna pen gen khalou hialeh? 

U, ka hon mohsa kei. Tun-le-zua' hal nihgel itna zaw bah leh ngui ding mah hi e. U, kamdam aw nem bek in hon khakhe lechinzaw maw, keia dia a puak nuam deuh di hiven. Bangteng hileh, tun-le-zua' simthu zaw, Tung Thianmang vaihawm hi e. 

Khovel nopsakna, kipahna leh vualzawlna te hong tang inla, na hinkhua nuamtak in hon zang in aw U. Tun-le-zua' lemgel lianu na anglai a na pom chiang in na vangngai kei nuihchiam in hon leel ken maw. Vondeih zatam tawi in, nunnuam phungching in hong leng un. Keileng Sianmang vang in ka dam dia, kimpih guallai ah vaal sam kei ning e. 

Hiai ka laikhak non simsuak sak man in ka kipak.

A tawpna pen din, U kon ngailua.

Kumtawn adin mangpha.

Laikhak- Nang hon it gige tu

©Siamsinna leh Vakiangbu