TRIBAL UNITY

By ~ Kattei Mawite

"Mawi, tuni chiang in na papite' nasepna Dorcas Veng ah teklei toh leingawi sawp di'n iva kuan diam? Nou le na khawl ni uh hichet hi a. Sum muhna le haksat toh zon theihna lamlam a zong ngaisek a, na ut thou din kon gingta a huai dia hong zawn kahi" chi in ka annek lai un ka nupi in kei gen dia kilawm teng toh hong genkhawm zungzung hi. Kenle sum poimohdan theilua kahihman in bangmah dang gentam lou in kana aw suk pah hi. Annek zoh in ka kisa ua, Dorcas Veng lam manoh in khe in ka paitou vengveng uhi. 

Ka nasep di uh bel theihsa ahi. Phalbi lai hizomah, nungak khat zet a din chu teklei diah leh leingawi sawp a kiloh chu thil nuamlua ahikei. Himahleh, khosakna leh nekzonna niamlua ahihman in zum-le-zah khual zoulou ka suak hi. Huaiteng kia hileh pha ve... Teklei I diah chiang in I khut bang se nuam nemnum sese zomah a, ham phephu maimah hi. Mi nungak dangte khut nou ngiingei, nel thiamthiam a, kei bel na ka sepsep na kakhut sung bang aniin ketheilou toh bang toh vom nianua zozen hi. Niteng a nasem a kuan bel kahisam kei. Himahleh skul ka khawl chiang in sep theihtheih sem in, kei poimoh neng man di bek ka kilohtawm zel hi.

Na kasem ua, sep ngeilouh sem hilou kahihman in thil paidan ka theisiam mahmah. Nikhat a singpi nihvei kidawn hiven, huaile a nihveina dawn chiang in khut langnih a tawi di omsek hi. Ni a salaw lawmlawm keia, himahleh khua bel a lumsim veve. Sun singpi nihveina dawn hun in naseppihte papi hon toh ka ki-um kual kha pelpual zozen uhi. 

Huchia mun thoveng deuh khat a ka tutsuk pat uleh, ka naseppihte uh mah, papi agawngsim pen in koulam naih kawm in hong pauphei kangkang a, "Kare, I tulai buaina vengvung uh le ken zaw ning maimah ke. Kipilsak ngen, kuamah gen zuih sawm lah omlou. Veng zok lele chi mahmah ke" hon chih toh kiton in hong tusuk a, a puri duai penpun bang hon pet zan punpun hi. Kuapeuh ka lungsim ua omchiat zaw hinte, ama' zoh a gen di bang ka kituh kha zozen uhi. Khat a daih lelah ka dai vek khazel uhi. 

Huchihlai in kalak ua papi pilvang mel deuhmai khat in a hon gen a, "Kuapeuh in tulai buaina bill 3te chi a I theih pen uh ahoihlouh dan zaw kithei vek hia. Hilele pangkhawm thei om mawngmawng lou. Khanglam ten vai khat asawm leh saklamte'n kalh, saklamte'n asawm leh khanglamte'n kalh. Bangchik chiale thukhat a luangkhawm thei di ihi tel duam maw? Ei singtangmi teng I pangkhawm louh inlah suahtakna a om ngeikei dia. Banghiam thiltung om peuh lah, communal thil in ila ua. Adikna le kigenthei lou, amoh tele amoh ziak ua huchi-khachi ahi chih om theilou. Nam thil in ila vek tel ua. Lungkham huai kasa giap ve" chi in hon gen hi.

Gen di zaw nei vek kahi di uh chu... ka naseppihte uh laka a khat in, " Eilawi pankhawm theihlouh ziak zaw, Pathian I neihlouh ziak uh hi di ahi. Pathian nei a piangthak taktakte zaw genhak lou uh ahi. Mi vaihawmdan a deihkei uleh leng a soisel zawng in a paikei ua, mi le mawk demdem lou uh ahi. Pathian thu awi taktak I tamkei ua, a thu leh a deihdan zuih sawmlou in eimah ngaihdan chiat hoih isa ua kituak theilou ihi uh. Pathian neivek le zaw, hichi tellou di ihi uh" chi in hon kum nawn hi. Gendik mahmah kasa. Alak ua naupangpen kahihman in bangmah in kana kum kei a, angaikhetu in kana pang hi. 

Huchi in khat in a hon gen nawn a, "pankhawm leh pankhawmlouh pen thutuam in koih daih le.. I sumduh mahmah ule ahi I buaipih uh. I buaina san ule I sumduh ziak ahi. I MLA te'n khatvei mehman di peuh in I vote a hon leisak ua, I kipak mahmah a, tu'n bangzah in a hon zuak uale? Cheng10/20 ale I vote manphatak zuak ngamtel ihihchia... Hiaiteng tuak di mah ihi. Pil hun ta mahmah eive. Kumnawn in MLA election hong om nawn dia, singpi noukhat a kikhawng pawl adim-aha a ki-om lai tel di chih ka ngaihtuah chia zaw, kumnawn le tung ngeikei leh chi vungvung maimah kahi. Huaiteng kia hileh pha ve. Nasatak a kimuhdahna, kikhenna leh kilangetna hon tun laitel dia. Ka lungkham khol" chi in hon gen hi.

Kalak ua pautam ngellou khat in, "Eilawi buaina zaw, I thunung leh hunpaisa ziak hilim veh. I unau melhaihlai ngaihtuah in I ki-pumhuat lailai ua. I hunlui sang in I maban uh a limchitlouh dan ngaihtuah in, pan lak sawm chiat le zaw, hichitel a pau-le-ham a kideidanna leh kikhenna omlou dihia" chi in saulou khah in hon gen liuhleuh hi.

Huchihlai in ka nung deuh a paulou hial a tu khat ana nui ling sungsung a, hon naihphei in ama ngaihdan hon gen teisam hi. "Ken nalh kasak mahmah chu Press Release I suah sauhsauh ua, huchihlai in kuate hiam khat in Anti-Press Release hon suah khum geih uh. Typing hihthei taphot leh computer mai thei phot in PR bawl I sawm chiat ua, khat ten thu a hon suah ua, khat ten a dawngkik zel ua. Akhenchia zaw naupang kimawl mah kibang lel kasa a, akhenchiang in keikia bang ka nui kha vevu zel. Ahi a, ngaihdan gentheihna kha ahoih law zozen a, social networking site te I zangkhial dekdek uh bang kasakna chiang a om. Thuzuau leh thutak lah theihkhen zoh di hita mawngmawng lou. Cp chi a I gelh zatzat di mah la tam. Khovel le kichaivawt" chi in theihhak sim pi in a lungsim a pawt masa genkhiak masak in hon nei a, angaikhe te'n alepkhawm dan siamtak in kana lemkhawm limliam uhi.

Ka papi, pauthei mahmah leh thawlmut mahmah hiven, a gawl bang hon khuah zozen a, nui thremthram kawm in, "Tua na gengen teng uh phatuam lou di, phatuam lou di. EilawI I kipumkhat na dia lampi kihong khat kia om ahi. Na theinuam uhia?" Chi in hon dak kual dandan kawm in a hon dong a, kuamah ka pau hetkei ua, ka en liakluak maimah uh. A hon sunzom nawn a,"Tribal Unity chi a I gengen uh a taktak gam a atun theihna di khat kia om ahi. Gentehna khat hon gen masa leng. Kei Paite kahi , zi bang Mizo ana neikha bang hileng, ka tapate'n Zoute bang, Vaipheite bang, Simte te chih bang zi in hon nei uhenla, ka tanute'n Hmarte bang, Gangte te bang pasal in nei leuchu, kuamah ka paihtheih omlou di. Bangteng om in bangteng tung lele kou inkuan, makpa leh sunghte kikal ah kikhentuamna om theilou di. 

Tua bang in nam tuamtuam kitengpolh in, I makpate bang Zoute hi uhenla, I phal te bang Thadou hi henla, I sunghte bang Neihsial khawng ana hi henla, kiteng polh vengvung le chu, sia in pha leh kuamah kikhenthei omlou di. Ut in utkei le pankhawm teitei ngai di. Zi di pasal di chih khawng, hia nam, hiai zat ka deihkei chi a I kideidan lai teng chikmah chiang in tribal unity a omthei kei dia, huai chilou a, hiaite huaite chih omlou a zi leh pasal a I kilaktuah chiang un Tribal Unity taktak a omthei pan ding. Huai ding in tua a lenglai te na hong kipat uh ngai ahi. Adiak a nang mahmah in na pat di ahi, Mawite" chi in nui ruahruah kawm in ka nung hon betsak kauhkauh a, nasep pan ding in a kithawi khe nawn hi.

"Ahi lua..Na gen dik ei, nang gen a dikpen ei. Hiai di mah ahi" chi in khutbeng pawl toh kikou pawl toh, kana amen mahmah ua, nui vurvur kawm in ka nasep uh zom ding in ka kithawikhe nawn diamdiam uhi.

©Siamsinna leh Vakiangbu