TUAI LUNGDEIH AW

By ~ Vz Vualnam

Phamsa ngalliam nihthum’ sakluang tung ah
Simthu tam e, vual aw, zaila tam e
Simthu-zaila khang chiauli bang ching ve’n
Litui bang ching damtui bang haak law’ng e

Simthu sathei, zingvai hawmthei tam e
Zolei lou bang i khualkim chiat na’m maw
Zolei lou bang i khualkim chiat na’m maw
Ei mah angma i khualkim chiat zaw maw

Tang ngalliam nihthum gawl bang a puuk ni’n
Khul a laizom diamdiam in i luang a
Et in lawm e lungtup mualsuah na’n lawm
Teitui lunmang suihlung a zing ding aw

Lenkum lung khat kivei manlou a aw
Bang simthu hiam aw suihlung i hual moh
Teitui lunmang suihlung ziing manlou e
Lungmawlte vaang in nau bang nui tah e

Nang na sinlai bang a hiam aw, tuai aw e
Phungmang toh simthu khat a na luan moh
Phungmang in na ma chiang k’on dal hiam aw
Zolei miza lousuul bang khual hi’ng e

Teitui lunmang toh tui bang na luan a
Teitui lunmang anglai nau bang na pom
Khangsawn ta’n nunnuam in a awi zaw maw
Na hawm khelh suunnau bang a awi zaw maw

Bilh bang thouta ni e tuai laizom aw
Seinou lungmawl’ khankhua zil nawnkei ni
Ei mah bu-al bang kitutu ta leng
Khangsawn ta teitui’ tengkhawi tang ding aw

Teitui luunmang tuan a i dougal in
Bang simthu’n ka tuai a hon bum hiam aw
Chiinmang toh tuakmoh a na hei mai aw
Teitui lun’ hon bupna lehzou la’ng e

Sesum’ vaang in laizom nialkei ni e
Muninn-gamlou’ vaang in nialkei ni e
Khangsawn momnou kil bang hong khangte’ di’n
Zolei ah kuhsa ling bang kip ni e

Sul hong hei aw ka tuai lungdeih aw
Teitui’ bupna sul ah leh dih ni e
Zodamtui ah hong bual tadih ve aw
Nang zong tui bang na siang nuam ding hi e

Tui bang siang aw laizom tuai momnou aw
Lal leidou dai bang nawkkhawm ta ni e
Teitui lunmang pupa’ khan a neem sa
Tuai aw suihlung zuangsak nawnta ni e

©Siamsinna leh Vakiangbu