VUALZAWLNA LAMDANG...

By ~ Mary Naulak

1st January 2015 zinglam dak 12:00 hong ging toh kituak cet in pathian kiang ah ka thum hi..."Toupa kei hatna tel hetlou in kumthak mel non musak a ka kipak. Hoihna khat leng neilou himah leng hiai tan hon pi tung na hih ngal leh hiai kum 2015 kei a din kipahna leh na vualzawlna ka tan kum hon hisak mahmah in..." ci'n ka ngen hi. Ka thumna ka muang a pathian in hon dawng ngei leng ka lam en mahmah hi. Ka hihtheih tawp a hoih sawm in Tuailai lak ah ka hihtheih dandan in ka kihel tou zel a, thumna neih leh bible sim cihte bang ka ngai poimoh mahmah hi.

Himah leh hun hong pai zel a...kei hatna a mihoih hih ka tup na te in bang mah tan hon daih kei, pathian muan a belh ding ahi cih ka lungsim in thei sam mah leh ka hinkhua ah kikhek lamdang na himhim a om tuan kei hi. Haksatna cituam tuam ka thuak khop tek ka hon pal tou zel a huai hun ciang bang in thuak lah kisa in ka lunggim thei mahmah hi. Ihmu lou zen a zankhovak a lunggim kisa a thum huthut in ka kingaihtuah sek a, a khenchiang bang a khitui luang zungzung a zingkal ka thoh khiak hun leng a tam mahmah hi. Huci bang hun haksa tawp a leng pathian mah belh semsem ding hina pi in kei mahmah inleng pathian mai a hoihna himhim neilou ka hih dan kithei ciang lua ka hih man in thumna neih, bible sim leh biakna lam a kihel cihte bang awlawl in ka khah khe hiaihiai hi. A nop zawk deuh khak leh ci a Ka utbang bang a ka om ciang inleng lungmuanna leh kipahna himhim ka mutuan kei a huaisang in ka lungkhamna te hong uang deuhdeuh zaw hi. Lawm leh vual lak ah ka om ciang in leng nuam ka sa taktak thei kei a ka innsung uah leng kipah mel himhim ka suah khe thei kei hi. Sungkuan te kiang a om bang leng nopsa lou ka hih man in ka room ah kei kia a om bang ka utzaw hi. Ka lungtom mahmah a thil neucik cik a leng heh pahpah ka hih man in ka nu bang in kolhak honsa petmah hi. Hoih tak a ihmut cih lah nei ngeilou ka hih man in ann nangawn le gina tak in ka ne thei kei a ka taksa a kiam hulhul a ka mel mahmah leng se gawp in zumhuai hial khop in ka gawng gawp hi.

Ka kingaihtuah vungvung zel a, Mite kipak leh nuamsa tak a aom lai ua kei bang cituam sese ka hi dia aww? Bang ziak a ken kipahna himhim le nei thei tel lou ka hi dia aww? Bang ziak pen tak a ken hiai bang haksatna teng tuak kha tuam sese ka hi dia aw?" ci'n ka kingai se thei petmah hi. Ka hinkhua ka theisiam thei kei a Ka heina lamlam ka ning a kitel petmah a ka kingaihsiat hun hong tun vanglak ciang bang a mi'n ka min a hon sap maimai uh leng khasia a kah pih ngoihngoih thei mihing ka hitel hi. Kholak pawt lenglah hon mu kha peuh in "gawng na cia damlou maw?" hon ci ua, kuahiam khat ngial in hou khamtheih hih na hi hon ci hilhial a ka pawna petmah hi. Bangmah lah sem peihlou, taksa lah se hulhul a om ka hihman in a khenciang bang in natna khoktak nei hi d bang in ka ki muangmoh a si d dan ngen khawng in ka kikoih mawkmawk hi. Ka nu kiang bang ah leng "nu tukum zaw hon dam pih suak zoulou d ka hi." cih bangzah veihiam tak ka gen kha zozen hi. Ka limlak hoih kasak deuh te bang ka sih cia hiai na tak diuh ahi cia ka etsak pawl bang leng a om hi. Bangmah lah sempeih lou taksa lah se hulhul mai...sih d kia genkhia khia ka hihman in ka nu lungsim nuam lou a hi dia doctor ki ensak din hon zawnzawn mai hi. A tung in ut kei mah leng a hon zot mun luat tak in ka zui khong a ka va ki ensak uhhi. Test theih citeng test mah le ung ka natna d himhim muhkhiak a om kei a, ka weight lah niteng phial a kiam hulhul a hihman in doctor pa bang a in lamdang asa a doctor dang a muan zawk deuh te kiang bang ah hon refer zel hi. Doctor nih leh thum kiang ah pai mah leng bangmah a thupi lua omtuan kei a natna neilou dam nahi hon cizel uhi. Ka taksa a natna neilou himah leng ka lungsim cidam lou ahih man in natna nei khat chu ka hi veve hi. Kumbul a ka thumna...kipahna leh vualzawlna tang dia kilam en mahmah nu chu lungkham leh mangbang tak in khitui toh hun ka zang toutou mai a akhenciang bang in Pathian inle keizaw hon taisan ta hinteh cih khawng ka ngaihtuah thethup hi.

Leitung a Lamet ding himhim nei nonlou a sih hun d ngak cihdan deuh a om himah leng hun hong pai tou zel a ka thuak khop teek haksatna in hon tuam a thuak zou mahmah lou a sihpih hial dia ka kikoih lai nangawn inleng ka phawk bat hetlouh in Pathian in honna kem tou zel a january apat november kha tan bang hon zang zou sak in 2015 a dia kha tawpna pen December bang ka ki lamet hetlouh pi in ka hon mutou lailai hi. Doctor te'n natna neilou hon cih khit nung ua leng si dia ki ngaihtuah teitei lai himah leng December mel ka hon muh hial tak in zaw ka ngaihtuahna hong kikhek guih in ka thei hi. Mi tam pi te'n sihna hanmual hon liam san ua, tuailai it huai taktak tampi te amau ut thu hihet lou a si phutphut a aom lai ua kei Pathian mai a hoihna himhim leng neilou, haksatna leh lungkhamna citeng thuak kisa a kingaise vungvung a om hizomah lai...leitung a hing tak leng hilou himah leng bangziak a Pathian in kei hinna honna hawi sak tuam a dia aw? Bang poimohna nei ka dia aw? cih khawng kon kingaihtuah thei ta hi. Huci'n ka lungbuai mahmah a thawmhau na khat nei hi'n leng ka kithei hi. Lungkhamna inlah hon nawse tuanlou a haksatna tuamtuam in hon tuam beh zawk mah toh a tawp in Pathian mah belh zawk ding utna lungtang ka hon nei ta hi. Hucin kisa in 11 December nitak lam apat "GILEAD TLANG" ah 13 tan giak lut in pathian kava buan hi. Huai mun a hun kava zat lai in...ken ka hun paisa te a keimah hoihsak na tan lel a Pathian nung zuih kana sawm a, a kilang a mite mitmuh a hoih kisa tak a kana om khak na teng le Pathian mitmuh a kih huai lotel ka hih dan khwng leh amah a dia ka hin d bang tak a ka na hin khak louh ziak a haksatna citeng tuak tou a, huai haksatna ka lungkhamna teng kei hatna a dou zoh kana sawm ziak a kazoh zoh louh dan khawng ka hon phawk khe zungzung hi. Kipahna leh a vualzawlna deih lua hina zen pi a hon vualzawl theihna d himhim a ka hinkhua zang khalou ka hih dan ka hon phawk tak in kisik in Pathian kiang ah ngaihdam ka ngen a ka lungkhamna leh ka mangbatna tengteng a khebul ah ka nga khe thei ta hi. 

Kisikna taktak toh ngaihdam ngen a amah i zot leh zaw hon ngaidam dia mansa gige ana hiveh aw...huaini a kipat leitung a ka na zonzon a ka muh zohlouh kipahna taktak leh tantawk a lungkim theihna ka neita hi. Ka puakgik te a zang a ka heina peuh kipahna in ka dim hi. Ka haksatna tengteng a bei vek zaw ka ci zenzen kei hilehleng Pathian a I kingak ciang in aman i puakgik teng thuak zoh vual d leng hilou a i ngaihtuah te thuak zohna hon pia ahi. Aman hon ompih ciang in zohlouh ding khat leng a om kei amah a dia bangmah haksa omlou ahih ziak in. Khristmass leh kumthak kum hiaizah kana zang kha ta na a 2015 kankan a nop kasak d ka theikha ngei het kei. Ka lungsim nuam himai. Hucia kipak tak a ka omlai in kumbul a Pathian kiang a ka thumna ka hon phawk khia a...a vualzawl na le dong zoulou hi a kikoih a ka thumna hon dawng lou sa a vuui tak mai a om himah leng Haksatna ka tuah te ziak a lungkham mangbang tak a ka om na te'n Pathian hon musak a lungtang tawng a kipahna hon neisak kia le hilou tangtawn hinna hon neisak lai...hiai ka haksatna tengteng kei adia a VUALZAWLNA THUPI PENPEN, VUALZAWLNA LAMDANG ahih dan ka hon thei khia a Pathian in ka thumna hon dawng lawtel ahi cih ka phawk khe thak a ka kipak mahmah hi.

Mihing te Leitung Pathian hamsiatsa gam a om i hihman in haksatna leh kipahna te I tuah touhtouh ding mah ana hi a, huai kia leng hilou in sihna bang leng khat vei tei i maituah ngeingei ding a hi zomah lai hi. Huai ziak mah in mihing te khat leh khat kidong leng kuamah nuam kasa lua aci om din a gintak huai kei hi. Himahleh haksatna leh lungkham na te ana thuak thei zaw deuh bang i om a, ana thuak lah deuh bang leng I om sese hi. Kei bang leng a thuaklah pawl kana hi gige hi. Naupang cik hilai mahleng Ka hinkhua ah haksatna tampi petmah kana pal tou sam a..."tutung zaw ka thuak a nuam zaw deuh, ka kingeina seh thei deuh ta" ka cih hun a om ngei kei himhim a ka tuah tam deuhdeuh leh ka thuak lah deuhdeuh zaw hi. Himahleh I hinkhua a haksatna leh lunggimna I tuah te ei thahat na a I douzoh ding khat leng a om kei hi. Jesu'n Matthai: 11: 1 na a...Nou sem gim leh puakgik po tengteng aw, ka kiangah hongpai unla, keiman khawlna konpe ding...ana cihmah bang in I haksatna tengteng a khebul a I tut leh aman damna hon pia ahi cih kei hinkhua mahmah a pat ka theihkhiak ahi a, a theipen leh a siampen ka hi het kei a, ahoih pen leh asiangthou pen hikei mah leng kei bangbang a lungkham leh mangbang kisa a lamet bei a om khat leh nih i om khak zenzen leh Pathian mah belh tak,muan tak leh buaipih tak a hi a amah ah lungkim theihna bukim om ahih dan i phawk thak ua bang lam hiam bek a i phattuam pih khak leh ci a kon share khiak ahi...

Toupa tuh ka hinna ahi.

Ka phaw leh ka ki humbitna.

Ka kha a din hinna ahi

Ka taksa a din damna.

Lungngaihna leh mangbat na te'n

Hon tuam buai lai in zong 

A ginomna hon musak zel.

Ka mangbang non kei ding hi.

Mihing pilna leh theihna ah

Na ginna nga lou in.

Pathian thil hihtheihna thupi

Tung ah kinga zaw un.

Na nuntak sung lel daih ginna

Tawp san sam ta un aw.. 

Tua chi'n Toupa kam a thuchiam

Lamdang ngeilou ding hi.

Simtu tengteng Pathian in a hon itna theisiam semsem thei din hon vualzawl ciat hen.

©Siamsinna leh Vakiangbu