HOIH PEN KA TUNNU

By~Minlian Valte

Ka tunnu sunggil pan simlei tungah mimbang ka hong piang a, ka senchil pan hong ching hong kem tunnu' nong itna lian nong kepnate thupi lua Nu aw!

Ka neulai a, nong dawn nong kepnate' ka ihmut a suah chia na aanglum a hon awi ihmu a, na nungzang ah nong puak zel, zan sawtpipi kei khualna a non tutpih a' ka kah hun a hon khemtawp zel, hong ching den ka Nu aw...

A nunkhum nawitui toh hong khansuah, a lim a pha ne nuam hi zenna pi kei nong it manin nong siit veuzel ka Nu'

Ka haksat hunin, ka dah hunin nong limsak den Nu aw' na kiang a om ka chimthei lou'

Nong itna lian Nu aw' kei nong khual manin guhtui kang zenin, gim leh tawl khawksa lou in, a zu a haam thuakin nuntakna ding zongin vailou na kuanzel... Ka Nu aw, nong khualna lian lua sang e'

Loukhoh singpuak nopna sak pen hi het lou ding hi ven maw'

Vailou kuan nong paichiang, lam kiang a, sialluang gaite nong dok sak, lingminte batlah pipi himahleh kei nong deihsakna hang, na nung a vangikpi pawkawmin, a gik a hahsa le chi lou in, chiang kawi zangin nong batsak kiangkiang zel maw' na niik mong a tuun thinthenin nong puakzel Nu aw, nong deihsaknate ngilh ngei kei ning'

Nek ding dawn ding na neihpeuh chiang nengam lou in, nong siit zel,,, duh lou na kineih ka Nu, a duh lou na kineihte kei nong lainatna hang hi zel maw Nu'

Na sakmel hoihtak zeem ngam lou, na duang kilawm tak ah puan hoih puan pha nounoute na baat ngam kei maw Nu' a hoih lou deih zaw hi het lou hi ve chin maw' kholpih gual toh tan bang ka kimna ding silh leh ten nong guan Nu aw' Lungdam lua ing'

Ka genchim thei kei Nu' non itna' ka gil a kial hunin' nek ding dawn ding om louh hunin zong, inn sak inn khangte kiangte kiang, ka gilkial ding phallou in, zum leh zahte khual zou lou in na diang zel' a zum thei lou na hi saam a Nu aw, mi simmohnate, gensiatnate poisa lou hialin nong it luat man na thuak tentan maw' Ka Nu.'Na hehpihna ka tangtel mai' Na hong khualna thupi lua, hong ngai pen ing Nu aw'

Nong it luat man thu ka mang louh chiang' aw neem ngiingei toh nong hilh' ka lup ding chiang thu nong ngetsak zel, khangual ka phak zohna ding, tawntung nuntakna ding lampi hong hilh ka Nu aw' hon ngai pen ing'

Ka heh ni'n nong lungkimsak' ka dah ni'n nong khamuan zel' itna laigil penpen toh hong kem ka Nu aw' na thuphate limsak lou a ka om khak chiang, hong simmoh leh hong thulak lou a ka om khak chiang' hi chi ding hi lou chi a deihsakna lianpi toh thu hoih la hoih nong hilh ngetnget, nute it ding nute bang om lou chi a aw neem tak toh nong gente manghilh thei keng Nu aw'

Na tongdam niingzu bang khum, hon ngai pen ing...

Nu nang hanga, na thuphate hang a hichiang tung thei hi ing' nong deihsakna lian lua' mite mai a nong kisaktheihpi, nong pahtak gige, kampau zia ding hong hilh, ka nuntak zia ding hong hilh hong sinsak, ka pil ding ka siam ding hong deihsak den, khangual lak a gualtung va bang hong tuaksak, ka hih bangbang a hong pakta den, hong phat den ka Nu,, hihna sanga saang zaw a hong pahtawi den, hong itsiam ka Nu aw,

Na tungah lungdam thu hong gen in, pahtawina sang pen kong pia hi Nu aw.

Nu aw hong simmoh kha ing, mite mai a zum huai pi a hong bawl kha, Nu aw, na thute nial a hong selsel, hong thuman louh kha hi ing' na lungtang na taka hong koih kha hi ka hih manin hong maisak in maw'

Ka it pen na hi, a hoih pen hi chia Nu aw.

Na kiang a om ka chimthei kei, na kiang om chiang maitai bukim kisa ing Nu aw.

Nong itna hong thukzou ngei ding hi lou hi ing, Nu aw' hong thukzou ngei lou ding ka hi zong nu aw,, ka Nu na hi na tungah lungdam lua hi ing, ka lungdamna thute kong thukzoh ngeihlouh hang Nu, hong pahtawi ing' na khan kumkhua sau hen maw Nu…

Sawtpi hong dampih ding thu hong ngetsak ing, tusawn khangsawn dong a nong dampih a, thu nong ngetsak a, na thuphate hong sung zelzel lai di'n hong ngen ing'

Ka deihpen ka Nu, ka it pen ka Nu aw' a hoih pen Tunnu hi chia.. "„"

©Siamsinna Leh Vakiangbu