ZOMI FOOTBALL CLUB (ZFC) LEH DIPHU ZOMITE

By :- S.Ginmuanlal 

Diphu. Karbi Anglong. Assam

                  

Football kimawlna lunglut thousam mahleng match teng endizen a haichilh kahikei hi. Match analysis bawlthei ding hial a football peksiam a gensiam kahikei lai zawmah hi. Ahih hang in ZFC in kou Diphu. Karbi Anglong. Assam a Eimi omte adia thilhoih ahong sepsuah dan uh im mangtheilou dan a kikoih in ZFC thu kahon gelh mawk hi.

                  

Khovel pumpi in a haichilh hial kimawlna football ana kilunglut kha ngeisam hi. Kum upa kihi hetkei mahleh football kimawlthei dingkhop akihih in ball pek ding chi in puansia kizial lum in khau in kihen a gik belbul, lianlou zawmah khevuak in kholai munzang, chiangthem palkhak theiding tampi leh Vok ek-Bawng ek keulak ah kho ul kaizen in kipek sam hi. "Puanselim" chi in kiminvuah a akansiam loute kaan in kimawlsung hon daih kei pahpah hi. Kou bel hamphat huaitak in tangval upa Ukap (KAPTA) kanei ua aman hoihtak a hon kaan tuh zaang (ligh) in let le aliandeuh a pekkhak anuam deuh hi. Ahihziak in amah (Ukap) toh ipek khawm chiang in a puanak hon suah a kho-ul ahauhtoh zul in a zul a ikituh khakleh anuam hetkei hi. Kou le kou ki kaante ahihleh suihkhak hak in khepi muk in leikisui khamun mahmah hi. Football lunglut thou himahleng Puanselim suihna a ka khepi muk kasuihkak munluat ziak in taklam khepi hek den in letnungtan inle football kapek thei nawnkei hi. Huai kia hilou lai skul a period kipatma leh recess chia kipek zel lai in lasiam Phamsa Pu (L) Muana Ngaihte in kasiak hon pekkhak sak a tunitan damtheilou a om in football himhim kisui ngam nawnlou hi. Ahihziak in kimawlna dang a lunglut himhim akihihziak in playerte hidingdan bel ground pua ah chiltui kaizen in kigen thei veve hi.... hehe

                 

Ithupi a ilut nading in Diphu mun a Eimi, adiak in Paite Zomite tanchin tamlou ikihilh masa ding aw. 80s lakvel apan in Karbi Anglong singtang khua apan in eimi khenkhat Pu K. Guite tulel a ZRO Adviser telawi in Sim lei vai toh kisai in Diphu ana based masa uhi. Amau hun in eimi inn tamhetlou ahihman un mite lak ah kilang zou hetlou ua himahleh achi asate uh khual in Diphu pansan theihna ding in govt a sepna muh theihtheih ana kizonsak in innkuan tamlou Diphu ah na khosa uhi. Amaute omziak a Diphu khua maingalna hong om in mun tuamtuam apan in Mission Nnasem ban ah inn tumsuang va omzek in huaite pansan in siamsin tuailai tamlou in siamsinna toh kisai in College va kikai hi. Huchi in early parts of 90s lakvel in tuailai mi 10 lakvel Diphu ah College vakikai khawmkha a huaiten local miten kuate ahi ua,kua mi ahi ua chih hontheih uh poimoh ahihdan thei in mipi lak a kilah (kilang) theihna ding ompeuh khahsuah sawmlou hial in pan kila hi. Nam lam lahtheih nading functions, celebrations tuamtuam ah "Kou le Kong tel ding uh" chi in va kingen a chial a ombang in va kitel gige hi. College kaite hong then nungtan inle amaute chituhsa hing gige a tunitan in "kuate kahi ua" chih local mite theivek ding tup in kinei tou ngiitnget hi.

                  

Tup a kinei hinapi in kholak a va kikou a va kigen theih ahihmawklouh ziak in mite hon theihna ding chance kizong gige hi. Huchi kawmkawm in aselam a mite hontheihding pen ki ut hetlou hi. Huchin moralities maintain tak a miten hontheih ding uh tup pipen hi gige hi. Hiaibang a miten bang chileh honthei baih ding ua chih kia lungsim a a omlai in ZFC kichi hong kiphuan in ma hon sawn a kumdang a Bhutan gam leh Sikkim state khawng a ahihhoihdan uh kizakha in Diphu ah leng hong kimawl thei le uh chih ki ut mahmah hi. Huchi in amau (ZFCte) le dong masa zezenlou in CEM GOLD CUP vaisai KARBI ANGLONG SPORTS ASSOCIATION (KASA) te kiang ah tukum CEM GOLD CUP (Chief Executive Member Gold Cup) ah ZFC tele chial un chi in va kingen hi. Amau leng gen hak hetlou in Bhutan leh Sikkim a ahihhoih na uh etlah huaisa in hon chial pah uhi.

                 

Huchi in kimawlna hong kipan a ZFC in hon hih hoih mahmah ua mite bildoh tuh Hiaite koi a kipan uh a? chih hong hita hi. Eimi om sunsunten kineitu sak deuhmai a awneihteng a ki support ahi.

                  

…...hman in genlouh in mipiten ""Hiaite namte eivele" chih hon thei ua fante lak ah Eimite ki hi pheuphau pah hi. Namdang kimawl entute iki patna, ikhosakdan, etc te theinuam ban ah hiaibang asiam kimawlmite tanchin thei ut in eimite hon lam naih sosouh mai uhi. Namdang kimawl entuten playerte angaihsan na uh luanglet in achipihte natan uh hon ngaisang uh ahi chih haihvuallouh in Eimi kimawl entute tutna mun hon naih ua athukan dan un kithei mai hi. Hong vualzou ua playerte congratulate khalou ahihman un Eimi khat peuhpeuh chibai buk in hon congratulate mai uhi. 

                  
 
Nuam hina maizen e aw….. ZFC damsawt hen..

                  

ZFC te kimawl en ut mipi lah phillei luang mahbang....huaiteng lak a "Kou mite ahi" chih lungsim nei a om lelleng lungnop dan leh khamuan dan iguh itaang in khansau lohleh kilawm hial hi. Miten ZFC chih min agenkhak lel uh zaak leeng nuam hina mai zen e.... Mi nih kihou a ZFC play hoihdan khawng leh disciplined ahihdan khawng uh kikum iza bangzaw kisak theihpih dan sulang a khuh kheuhkheuh dia hoihmai ahi. Diphu mipite ballpek et lunglut tam himahleh nupite ballpek en kimutam ngeilou a himahleh ZFC teziak in Diphu Nupi hon ballpek en sim senglouh hong kuante muh in khasiat lamlam suak hi. Diphu ah football tournament thupi taktak hong omkha zeuhzeuh hi. Santosh Trophy ah state tuamtuam kidemna inleeng Diphu hongzang ua India adia ballpek siam minthak taktakte leng ahong kimawl uhi. Himahleh ZFC te kimawl entu zah phadek lou hi. Zomite' Pasian in zaw hon domsang ut petmah ahi chihlouh theihlouh hi.

                 

Huchibang kawmkal ah mipi huaizah zouzaite etsang/muhsang/ngaihsang ZFCte kou a ahi chih mite kitheisak ut ahihman in kikou kihahbawl mahmah a kimawl khitnung in BYF in lapawl zilna ding omleh lasa theiding a Aw nei nungakte lak ah tam hetlou hi. Kikou ziak a gawl khaangkham thei hileh ZFC support ziak in Diphu nungak leh Nupite kagawl uh a khaangkham vek phial ding hi. Zomi apian khaklouh ding bang kilau khonung thak phial hi. Hoihna leh siamna a mite ngaihsang nuam hi natel e chih louh theihlouh hi.

                  

Mipi hiaizah zouzai in ZFC..ZFC...ZFC... chi a kikou dupdup himahleh Playerte lah kihihsakna lungsim putuanlou a kiniamkhiak tak a mipi mai a hong om zawmah uh.....ZFC playerte play siamdan leh discpline hoihdan genkhawm a ikiang a putek sim pipi hong houlim zaak bang zaw nehnou deuhte ading a mittui luan nakham chih inle genkhalou phial hi. Kimawl dan leh nundan hoih a mipite zouthoh mahmah ZFC playerte athak in zahna kapia hi.

                  

Midangten igam (Zogam) Lamka eh! CCPur amuhdan uh Zu le sa, khamtheih tuamtuam tamna leh numei pasal kal a thang tatna otna, ban ah AIDS natna tamna leh UGs tamluat ziak a khamuanna omlou chi a hontheih kia ule hilou a ei mahmah inle huchia itheihna a hong kipan playerte hoihna leh siamna ziak a huchituk ngaihsan leh pahtawi a ki om mawkpen gam it leh ngaina tu mi nehnoute adia khasiat huailou theilou hi. Diphu a Eimi adia tha lezung, gim le tawl khawksalou a napang gige mi phatuamngai leh nehnou mahmah hon napaisanta Pu (L) Jamchinthang damlai a omkha hileh kipahna khitui tampi seng ding hi.

                 

Igam uh (Lamka) miten igensa bang ahon galmuh uh ei mahmah inle tate khankhiatna ding a aki sa-ik namun apan hong kipan playerte omdan bang achi de aw chi a nangaihtuah khak veu ahi hi. Lamka a govt hileh pawlpi tuamtuam in Zu zuakding akhamna mun ale a ut teng in khamding mu a zukham a kisual kibuai omden zou hi a Diphu a Zu zuakding kikhamlou a Open a kizuak a Foreign Liquor Shop a kiman taktak a zu duhdandan muhtheihna mun ah hongkuanten enlah lua in ava leigu khaankhaan ding ua aw...chih lungsim ah om khazel hi. (Zu kihua leh zudawnte kimudah chihna hilou in local miten Christian ngen a hontheih uh ban ah eimite zukham isiamlouhtoh milak ah zahlak huaipi a i omkhak ding lauhna kinei hizaw hi.) Atung a igen bang a moralities hoih a mite hontheih kideih ahihna ah omdan kilawmlou kideihlouh peetmah hi. Ki goodboy sakna hilou in pilvan ki ut a pilvanglou tak a playerte leh official te hong om khakding uh kilau gu mahmah hi. I lauhna behlaptu ding a koihiam a ZFC in vuallelhna aneih hun a internet khawng a post leh comment ginalou imuhte ziak khawng in dip kawsimpi in ki om hi.

                  

Himahleh, ngaihtuahna khenlam pek ah ZFC (player hi in official hileh) zu khoihkha himhim omlou in omdan kilawm leh ki chapousakna gamtat om hetlou in ground sung leh pua ah om ua lohching ding mah hihang e chih in om hi. Kou Diphu Eimiten tuh kimawl ah hi in omdan gamtat ah ZFC tung ah khasiatna leh hichi zawdeuhleh chih neihetlou ka himai uhi. ZFC Toupa'n vual zawl zel hen. (Keibang a chilgil khenkhatten na muhlouh kal un....chi a ngaihdan naneihkhaak uleh... hehe ZFC pen ana kineisak mahmah kahihman un amaukia a nuse ngeilou a zanchiang ale tangval nih in giahpih den kahihman un amuangmoh kha i om leh muanmohna ding NO CHANCE himai hi..

                  

A ngaklah huai final kimawl ni ding hong hi a Diphu tualpi a neu alian in nitak kimawl hunding kingaklah mahmah in sunkhua sawt kisa mahmah hi. Nupi ann huanten khomialna ngei a ann minsak ding tup pipen ahi hi. (Diphu ah eilam banglou in agam mite cheetdan in nitum kuan in meh bazar kikai a khomial nung in ann kihuan zel hi) ZFC te final kimawl et teitei sawm in ngeinadan khek in ann huan minsa a koih in kimawlna mun KASA studium kizuan souhsouh hi. Seat hoih leh kimawl mite kimuh hoihna mun kuapeuh ki ut ahihman in kou ZFC kinei tusak eimite sang mah in agam mite leh Vaite bang ana kuan baihzaw ua ZFC supporter te chi in hon na en demduam uhi. Fans/Supporter mah kihimahleh ZFC te ziak in ami asate uh miten enhuai sa a hon et uh tuh zum huai hetlou in kidaak viauviau mai hi. ZFC te ziak a ami asate uh min a hon ngaihsang uh mizahkai pen ading inle zum nading himhim a omkei a igamtatdan peuhmah fuh vek abang hial hi.

                  

Final pekdia i playerte ground sung honglut bang utuh chi hum suak sungsung mai hi. Mipite ZFC...ZFC...ZFC... chi a kikou zaak bangtuh chihum suak tamlua khosik dek kisak in om thei hial hi. Anopdan bel gen zoh a suutzoh ding hilou hi. ZOMIte Pathian namin thang tawntung hen..

                 

Entu mipite kinepna lah ZFC in zouding chih hivek mai... kihou zaak peuh lah ZFC te cup dopding danthu himai.... Zaak nop sim mahleh aneitu Eimite ading intuh lauhthawngna in dip in kuduk kuduk chi hi. Vualzou dia kinepna sang mahleh alangte uh RHINO CLUB te Assam ading a minthang tak leh club kumluitak ahihna uah "Zoukei kha leng" chihna lian mahmah hi. Mipite expectations lah sanglua ahihman in zoukei phutleng maizum huaiding dan kithei chiat in abul tuunglam bangtuh kikou ngaihluat khakding lau mah kibang vek sim hi. Namdangte kikou aw in hon khamuan ahi ngeiding a kidek sawt zoh haksa kisa chiat in kidaam chih om nawnlou pah hi.

                 

Rhino club in tactic khat hon zang in abul apan attacking hon hah bawl mahmah ua ZFC goal lam ah ball pek lut zungzung ua lungsim hongnuam hetkei hi. Eilam goal hon neh lelah kidaithei lou in ki om vek a Nu KAMI bang ngial tuh skul kaikha hetlou himahleh Sappau in kikou ek ek mai hi... haha. Eilam goal hon naihzek leh Nu Kam in a aw neihteng a "NO GAWL" anachih ek ek phatuam adiam ah goal khuam khawng kha in aleh tuan kik zel vanglak hi. Huiha.....agim huai in atawl huai mahmah hi. Himahleh lungkelou leh displine tak a ZFC playerte kimawl in hun tawptan in en izou velvual hi. Diphu eimite khangthu a amasa pen ding in stadium sung ah SINGNOU TAMPI SUAN NI MAW chih khawng loudspeaker ah kisa khesak zuazua a amasapen mah hiding in Diphu mi singtampi mai ah ZOMI min kilou in the commonest and the most mentioned name himai mah hi. Hiaibang a hon tawisang ZOMI te Pasian pahtawi in om hen…

                 

Khovel kidem na Fifa world cup domte sang in kou Diphu eimite CEM GOLD CUP TROPHY dop ka kipahna uh a leh tampi in lian zaw hi. Cup toh ki pose a lim kila ut lah beilou....ka priceless possession uh Trophy toh lim kilak himai mah hi.

                  

Hichitel a hon minthangsak ZFC te tung a kipahna latsak ut mahmah napi in sumlam haksatna toh kikhosa gige ahihman in utdantak leh deihbang tak in loppih zoukei mah le ung Vok khat (alet....a neupen tuh gen lou himhim di haha) in kana lopsak zou hamham uhi. Mite adin thupi kei mahleh koubel hatzou kisa in hih hoihzou ka kisa mahmah uhi.

                  

ZFC te painung in thawmhau huai in tournament kumkhat phial om laileh chih huai kisa zezen hi. Ahihziak in kum 20val vingveng (since from 1992) Karbi Anglong mipiten hon thei le uh chih deihna a lam tuamtuam a kana zon ua.... (mipi lak a kilang theipen Nam lam lah (cultural dance show) chihkhawng hih a mi kidaihlouh ziak a Pasal te numeidan a kisiam zen a ka lam khawng uh) mipite hon theihna sang un ZFC in Nithum lel in hon sepkhiak sak uhi. ZFC in hon nutsiat nung natan in eimite mi hon muhdan (ahoihlam a) tuam in nop chihtak in nuam hi. ZFC DAMSAWT IN KHANG SEMSEM HEN AW!

                  



©Siamsinna leh Vakiangbu