HON TUNGSAKLOU MAHMAH KE'N

By ~ Vz Vualnam

Ni a liamta a
Sep ding teng zoh ahi ta.
Himahleh ka tawl a dam naikei,
Na aw ka zaak nailouh ziak in.
Na aw ka zaak mateng zaw
Ni ka khinta ka chi theikei.

Zankim ahi ta a
Tut lailai nadan a om nawnkei.
Himahleh ka kha a tawlnga ut naikei,
Na aw ka zaak nailouh ziak in.
Na aw ka zaak mateng zaw
Ka kha ki’ah mangpha ka chi theikei.

Kumte ka peel zel a
Kumpha ka delh zel a
Khankhua kimkhat ka khit nung in leng
Kumpha ka tuakkha naikei,
Na aw ka zaak nailouh ziak in.
Na aw ka zaak mateng zaw
Kumpha ka tuakta ka chi theikei.

Huai kumpha delh a
Khat khit khat kumte ka pelh lai in
Miteng’ mittui luanna
Utlou pipi a mangpha kikhaakna hankhuuk
Kei a ding leng a hong hi saam ding a
Na aw za manlou a sial a ka om hial leh
Hon itte’n khitui toh mangpha hon khaak chiang un
Kei a di’n khitui na paai keita zong in
Mangpha beek hong khaak saam in aw
Ka kha in huai lel a zaak in leng
Ka ngaak kumpha a hong tungta
A chithei khamai na ke!

Hin sung in hiam aw sih nung in hiam
Hiai ka ngak kumpha zaw
Hon tungsaklou mahmah ke’n aw!

©Siamsinna Leh Vakiangbu