TUMTAI LEH HEISA

By ~ Vz Vualnam

Zokuam lentumang nuai ah
Leitual Tumtai a pou a
A kiang tulsing leel ah
Heisa kilawmtak in a kai hi.
Leitual a pou Tumtai in
Singleek a Heisa a muh in
Kilawm sa in a deihta mahmah a,
‘Hong kum inla tual ah
Kei kiang ah hong teng in,’
Chi’n a kun thapai hi.
Heisa lah a nuih bang a za zezen a,
‘Nang leilak a pou dia siam na hi a,
Kei zaw singleek a pou dia siam ka hi.
Nang lah kei’ kiang na hong tung theikei dia,
Kei lah nang’ kiang ka hong tung theikei ding.
Pou dia siam a i omna chiat ah,
Lungkim tak in i om zaw ding,’
Chi’n Tumtai’ kutna a dawng zel hi.
Tua bang ahih nung in leng
Phalvak in a en masa pen a,
Sun in a en a, nitum kuan in,
Kha vaak nuai ah,
Tumtai in zaw tua singleek Heisa
Donlouh lai himhim a neikei.
A etlouh lai nangawn in
A mitkha leh ngaihsutna ah
A thaamden hi.
Nite a liamzel a,
Kidanna a neikei.
Nikhat zing a thohma in
Banghiam khat in va lawng hi’n a thei a,
Hakkhia a a etleh, maizen!
Vul niingniang in Heisa,
A hiang ah ana kibaang a,
A kipaak peetpeet a,
Chikmah a a lam-et phaaklouh,
A lunggulh tawntung Heisa,
Ittak a huai dia kisa a,
‘Lauke’n, ka kiang ah na bit hi,’
Chia sawk dia a baan a zal leh,
A pouna hiang a pan a pulh a,
Amah leng a vul mahmah ta ngal a,
Heisa toh tual ah a kekhawm uhi.
‘Nikhat tei ka kiang na hon zuan ding chih
Chikmah in ka muanglah ngeikei,’
Chi in a khut a len a,
Khanloh nawnlouh ihmutna ah
A nih un a ihmuta uhi!

©Siamsinna Leh Vakiangbu