ANG-MASIALNA

By - ZM Tonsing

"Khangtoulou chih ikitheihleng khantouhna chikhat ahi"

 

Im di bangmah a om kei, thilkhat pepeuh a zul(hem) gen nutnut chihkhawng ka hih theihdan ahi hauh kei, tuah leh muhkhak bangbang, ahi chetchet a genkhiak muatmuat chihkhawng ka paipih leh ka khankhiat pih le hikha'n teh!

Zu lah kidawn theilou! Khatvei lawmte toh pasal khat kihi teisam a, zu dawnlou a om seisai 'zu dawnlou; tuai hilou' chih khawng tan a, zu dawnlouh ziak a 'tuai' chih a om tel sang in chi'n kithutuak deuh mai in zudawn di'n k'ong kisa uhi. Glass a sung khe bibilh in dawn di'n k'ong kisa a, khai! ka gintak a bangkei, akha lo mahmah, ka gawl ah a lutthei mahmah kei. Lawmte'n bel khoksa khollou ahi ngei diing ua a valhpuak khutkhut mai uhi. Himahleh, ken ka dawn theih mahmah louhpi, ka gawl in a deihkei, ka gawl ah a tang, valh dia ka kisak chiang in lo (vomit) di'n ka kisa, ahi thei mahmah kei. Lawmte'n hon awlmawh thei mahmah ua, nak hetlou in valhle chin bangmah chilou di na hi hon chi ua, ken leng a mau thumang, a chih dandan uaka hih leleng ka hihtheituan mahmah kei, Lodia mansa ka hi mai! Kamkhat le dawn theilou inlawmte dawn en, a kihoulim na uh ngai leh a mehpih uh neksak in ka pang maimah hi. Ka hehlua, zu kham ka utut toh! Zukham te'n nopsak tuak uh ka sa, niania in!

Ahi, zu dawn zaw haksa ahingei di, zing-le-nitak a zudawn gige, zu lou a om theilou te'n le zudawn nuam a sa kei uh, lim leng salou ahi ngei diing ua, melse zen in dawn puaipuai teitei mai uhi.

Zukham ut lah khamkhop di kidawn zoulou ahih chiang in chi'n khatvei grape juice dawn di'n ka kisa nawn hi. Huaile a duh a dawn ka hi kei, a kham utka hi. Ka dawn a, hiai le ka dawn theikei, a limkei lo mahmah, a gimleng namsia ka sa. Lawmte'n a dawn gaihvek nung un kennoukhat ka neilai a, dawn di ka lin, ka duhkei lua. Lawmte'n ken k'on dawn di chi'n hon ngenngen mahle uh ka phalkei, kham ut ka hih man in ka kham zohlouh khak di ka lau a kuamah ka pe ngam kei! Ahuai kia le ahi kei, ken lawmte pe mawk le'ng kentawm dawn lotel di, lawmte dawn toh teh a chi'n kua mah ka pe ngamkei!

Duhlou pipi leh dawnhaksapipi'n ka dawn teitei a, gaih zo ka gaisam. Ka lunggualh pen 'akham' ahi a, himahleh ka kilam-et bang in ka kham kei, kham theihlouh khatle ahi a hi'n teh. Min theitui dia a zat enkham kisawm chuh haksa deuh mah in teh! Ka gintakleh lam-et bangtak in khamkei mahle'ng khamsim lamzaw himah ning-ka tha a zoi a, gik in ka gik, ka nguai a, ka sung a sa petmah. Haksa ka sa huntawk mahmah ve. Huaibanah, ka zun a suak thithe a, ka tu muang man kei. Zankhua'n zunnawn in ka diang nilouh hi. Hiai khawng hi'n teh ka angmasialna gah! Lawmte'n hon nget ngutngut lai un na pe-kha maile'ng zaw nuamtak a ihmu a, ihmut kham a thovengtak a om thei di hi'ng a. Ka angmasialna ziak in ihmut ka khamkei kho-loh hilhel, ka toh thou e!

Tua mah bang in i lak ah angmasialna ziak a haksatna tampi tuak i om ngei ding. Khente angmasialna ziak a sihna hanmual hon zotsan a om ngeileng ka gingta. Khatveii gelhkhinta, angmasialna ngen a pumdim, thilkhat pepeuh i deihnawnlouh, pa ihmai di natawm le mi a neilou zo-deuhte piak maibangle thik vulvul, kua mah pe ngam mahmah loute ihi tel uhi. Ei a kipat min hamphatna a ngah khak diing uh lau a, ei mah a hihtheihna omsa, kua mah honlaksak theih ngeilouh diing, piakkhiak nung a le ei theihna kiamtuanlou, pil na-siamna tuamtuam leh hihtheihna (talent) i neihte leng kuamah hilhsawn ngamlou ngen ihi uhi. Min a hoih, nna hoihsem a hontheih khak diing uh lau, a selam ngen a mite' theih a om ut i bangtel uh hi. A hoihlam a minthan sang a a selam a minthan kituh luluk geuh i kei ua! Khovel ah eichouh dam le ut ihi d'uam ah! Piakkhiak a kiamtuanlou chuh 'theihna' ahi, i piakkhiak tam zohpeuh leh ei a theihna tam kibehlap ahih banah, min hoihna leng kineitam ahih dan kuapeuh in ithei ua himahleh minhoih leh theihtam ut omlou i d'uam ah nna hoih sepsawm khuk-khak kua mah i om kei uh. Khantouh ut i om kei ua, thilkhat pepeuh ah angmasialna ngentang in i dim uhi. Ahi, eimah na, eimah aituam di a bel i pilthei mahmah mai uhi. Ei mah a di i sep/bawlchiang un a penpen hih i kidem ua, mipi a di (pubic) ahih chiang in leng a penpen, a hoihloulam a 'penpen' hih itum uhi. Mipi a ding ahih chiang in i angmasialna un hon zoulua a diam ah, ei a di hilou; mi tengteng a di, en hoihtak in va bawllele mipi hamphatpih di, ei hamphatna di om kei chi i bang ua, ei mipi lak a tellou bang in i kingai uhi. Hiai ahi i khanmawh bawk uh. Mipi a, ei a dan a i koihtheih hetlouh uh (public property is your property). Nangchouh kipak mailou a, nangsang in mipi te kipaksak zo le chin na hihkhial kei di, mipikipahna chuh nang kipahna ahi. Mipite na tunga a lungkim ua leh na lamzang dia; na maban leng a vang ding...

Khantouhna i deih ua, huai sepkhiak sawmlou in eimah aituam di chouh i buaipih uh. Nang na thupi a, changkangtak a na om a, na mihinpihte tuantual tak a, a om ua na kipah lailai a le zaw khovel nang a di'n akochik gawpta, nang bangbang khovel ah mihing kivaidawn kivaidawn lotel nawnlou diing hi!!

©Siamsinna leh Vakiangbu