NGILH TA NING E

By ~ Haopu Eimi

Silhpuan pian dang, tawikoi chiang toh nunlui zatam sial leh tung solkha galdot a, mabang patna singgam vangla pan', ngaih heina zogam galkhua kadot lai in.... 

E, hong tu ou, ana lungleng lua kahi, kachih toh kiton in a tusuk a, a sakhau a kipan nevla lakhia in a nuai a, kamuam toh kiton in khapi en kawm in, nak lunglen huai maw? kachi hi.

A lungleng sam ahi dia, khuisa vungvung kawm in a thau a liang a kipan lakhia in a pomthoh thinthen a, a mai suah a kipan lungkham na mahmah nei ahi cih a chet theih. Lung himoh tak in kadong a, dawn na kamu pahkei, ka dong zel a a tawp in khatvei hong khuisa vungvung nawn a, a lungkham na tangthu tuh hichin hong genkhe ta hi.

Pawl VIII kapass in mun dang ah laisim din kakuankhia a, huai ah haksapi in inn bahara la in laika va sim hi. Ka nu-leh-pa ten lah sum hon khak zou gige samlou ahih man un, skul khawlni chiang in kilohna ding zong in meikhu paisuak lou in kaki tou delh zousam hi. Huchia hunte zang a ka-om lai in, chikmah a kagelphak louh leh vei a leng kana neih louh, kakuli mel ah bang hiam lamdan na om hin kathei! Ahitak in a mel ah danglam na bangmah a omkei, a nuihmai siuseu te a ngeingei ahia, a aw suak te leng ama a mah ahilai. Kalungtang tawng apat itna hong pak khia in kamit leh ngaihtuah na te su lamdang ahi zaw.

Kakuli a hihleh ka inn kiangte nautum ahia, ka classmate leng ahi. Amau leng kei bang a muntuam apat laizil dia innluah a hong om ahi ua, himahleh koutoh tehvual bel ahikei uh. Apan Govt. skul ah clerk nasem a, a U te nih sepaih ahi uh, kou ka innkuan ua loukhoh a nek zongte toh tehvual ahi kei uh! Himahleh a siam mahmah ua, anu a veh dia a hong hoh chiang in meh leh theigah tuamtuam a innlam ua pat a honpuak te hong kholkhial kei. Inn bahara a om chilou din T.V leh fridge khong a koih ua, huaite I va zatpih louh khak lau mah a bang den ua, khen chiang in kisuanlah huai lehlam thei hi.

A nini in kangaih na a pung hulhul a, tomkal sung kamuh louh lel in leng kahin na sukha a bang hial! A lehlam ah aman leng hong ngaithou hin kathei, a inn ua kahoh chiang bang in angtang tuam hin kakithei a nop leng kasa mahmah, khen chiang bang in ka kipe hoih a kanungnung hong zui bang in kangaihtuah thethup zel! Huai khawngteng ziak a leng kangaihtuah phaklouh itna mit hong dawnkhia ahide aw, kachi khonung.

Ka-itna thute imm mangsawm hikeimah leng, genkhiat ding kachih chiang in haksa kasa mahmah, kalungsim khat in kei a sa dan in kakoih top! Amah leng huchi sam ahi diam? Numei dangtoh kakihou khak chiang bang un kathugente uh hon hahdot thei mahmah. Khosung miten kingai dan ngen in hon na koihkhin ua, a kallak ah honna chiamnuih theipawl bangleng omtham hi. Hiai bangthute kazak chiang in genkhiat theihlouh lungnop giugiau na khat kaneithei zel! chihbel, anu-leh-pan zakdah tuaklou uh ahi.

Khate hong kihei in kumbei dingkuan a hong hita, exam zoukhin mahle ung result ngak ding paulam in ka-omlai a, laisim ding cih omtalou hiven, kahun tamzaw kakulite inn ah kazang a, a innkuante mai et in sep ding poimohte kaseppih zel hi. Huchin ka result uh a hongsuak ngei a 2nd tuak in kapass uh!

Zingchiang a paiding kihita hiven, ka-itna thu gentei ding cin pawtna ding suanlam bawl in khavak nuai ah ka kizuikhe latlat uhi. A khut ah kalen a, nemtak in 'kaku aw' kahon it in ka honngai mahmah a hiai thugen dia tunitak a hon pawtpih kahi, bang ngaihdan nanei, cin kadong tahi. Kakinep na zaw, 'kenleng kahon it' cih ahi, himahleh a hon dawng theikei! Lamdang kasa petmah, kahehtah lamlam bang asuak a lah bang kaloh theikei, kagen thakthak a lah dawn na kamu tuankei! Hiaihun chiah in zaw khovel kilumlet a bang hial, kei asa dan a kana koih det ka it Kaku bangchi a tamai! nidang a keisang a gen ding hauzaw gige nu bangchi hita? Mangbangtak in ka-om a, loh ngaihna theilou in kapaisanta hi. Lupna tung kakiden na a, ka-omdan teng kaning akitel tutut! Hucin, zingkhua hongvak a, kisa in lung nuamloupi in innlam kazuanta.

Mangngilh mai din kalungtang kakunkun a, aphatuam kei. Ka innkuan ten damlou bang honsa hial uhi. Laithon bek a angaihdan dawt thak ka-ut mahmah a, lah a poding mi a omkei zel! Lungkham ahuai ngeimai!

A kum nawn in maban zomdin kakisa nawn a, Kakuli mangngilh a laisim mah pibawl din kahong kisathak nawn kiangkiang hi. Hostel ah om in laisim ngeileng kahahpan mahmah, ka exam nate uah hih hoihtou zel in, numei hong kitahbawl bang om zezen mahleh kangaihsak nuamnawn kei! Hucin, kumkim suty bang hongtung a, innlam kavaphata hi. Ni li (four)vel ka-om nung in kakhua ua pat skul kai mah a ana omkhia leh girls hostel a va-om khat hongtung a, lamet louhpi in kakuli thu tampi petmah hon puak hi.

Kakuli in honvei dan leh khatvei bek keitoh kimuh a utdan te hon vaikhak a, a hihtheih liai leh skul lutnawn hun a a kiang vapha teitei din hon thukhak hi. Hiaithu kazak in kahi dedu zuzen a, kipah ding hia, dah ding chih leng khenthei lou in kahikhe meimui hi. Bang gennop nei a diam? hong it hileh huailai a genta dia, bangziak a tua kimuh ut ahia? cihte kalungsim ah akisuang tuah lumlum maimah hi.

Ahitak in zaw, kangai utnawn kei! a itlou hilou in kalaisim na maban hoihtak in kasunzom nuam! Kingai hile ungle kou a din nopna a omkei ding, khokhat a omkhawm kahikei ua, ka-ut hun un kakimu theikei hial ding uh. Banah, simlai tuak kahihman un leh kei mahmah leng kibawl thak nuam kahih man in kingaihpih ka-ut nawn kei! Huchia, hunte zang a ka-om sung in kasuty hong bei a, siamsinna maban zom din ka kuankhe nawn ta hi.

Mabante zunzom in tha-it tak in kapangtou zel a, huchihlai in nikhat, gintat louh pin laithon khat kamu phut a, innlam ten buaina nei hi ding bang a koih in lungsim nuamloupi in huai laithon kaphel hi. Maizen! Pek thumtak dim metmot zen in akigelhsuk dendon maimah, kua dang a leng hilou in kakuli in a ma khut mahmah a agelh tuh ahive! Kasimsuk a, kalung ahikei pah! kasimsuk zel a, kahehtha a suak dedeuh mai! Kidek teitei in kasimsuak hamham a, kahehluat man in kamit te bang a san gelgual a, kakho-ul bang ana pawt hial hi. Kaku aw, hichimai a na-itna ana zuak mai nahi maw kachi vungvung mai!

A sana a en a, "Eh, dak 1.00am bang ana gingman vele, report piak hun eitave," cin report pezual din Bikash toh kakikhen ua, piak zoh chikchik chia a ban zom nawn pah din kakihou fel uhi. Kangaklah ziak a diam, kimuhna ding kachihna mun hontung nawn hak kana samahmah a, kasana bang kana en thithe hi. Atawp in ngaklah tak a kana ngak tuh kagal apat hongsuak khe thilthel a, kasana ka-et nawn in zinglam dak 1:35 ana hita. Huchin, kongtu lem nawn ua, thuduh kisatak in "aban a bang chi, nou kingai uh maw? bangchi uh e?" chin kadong nawn pah somsom hi. A bag apat tuibom khat hong lakhia a, tamlou a dawn zoh in hichin hon sunzom nawn hi.

A laithon tuh bangdang hilou in a kisikna leh ngaihdam ngetna ngen ahi. Itna thu kalel kum in ka mathematic teacher pa un ana ngai a, kaku ngei in leng a subject haksa asak ziak in hope ana piak bawl a huai tungtawn a pass khong ana aim dan ahi, huai nitak ngei leng result suah ni a hih khelkhel toh kathugen te ana 'aw' ding ki-awi lou ana hileltak ahi. Himahleh, a laithon ah a nitak mahmah a kisik leh hon na 'aw' louh hai kisa petmah leh chiklai peuh kei a dia mansa gige leh khatvei chance pethak dia hongngen ngutngut ahi hi

"Huchi hi a, chance na pia hia? bang na chi uh" chin kana pautuh man geet hi. A khete hongton tou in pemah ing ei... Hichi vengvung kal ah kenleng laithon hichin kagelh sam hi.

Ngilhlouh kaku aw!

Na laithon kana mu a, kenleng hiai a nuai a bang in konkum zek hihen aw..

Mihing hihna zal in hihkhelh leh kisik chihte I hinkhua ah paltouh in omzel mahleh, itna kichi tung solkha bang a khangzel kiamzel ahihlouh bang in kei hon itna leng a kidangkei. Himahleh hichimai a itna huangsung I lut ding hithei kasa kei.Non it a nonngaih taktak leh kiginni masapen in hong kimuhpih in aw.

Lai-at, Bikash.

Hongtung ding kiginni ngak tuh kahi tamai uh. Hongpai takpi dia leng kagintat louh lai in, Kiginni, zing ann nekkham in peon pan visitor nei kahih dan a hong hilh phut tamai hi. Kana itpen leh ngaih petmah a kana ngaih kaku mu ding chih mawk, chin ka nervous khonung phing a, ama a bangpi hidia kana gellouh himahleh ka kivat dingdan bang ka khonung buai phiing hi. Huchin a nalhthei bangpen a kichei in main gate lam kamanoh phei leh, maizen! kumkivei leng hinaisam loupin, kaku mel kamuh in genkhiat vuallouh kalungtang ah kikhekna lianpi a tun! A nuihmai siusiau in hon bumhai a, a duang etlawmtak in ka kha a pimang! Phavang lai gamsahei paak lun a bang a, a sam kaikhia huih in a seem hianhiante kuata a din a mithip huailou keihial ding!

Hon na khutvan leplep a, nuihmai siusiau toh kawng kimaituah uh zaw! kagen ding teng a mangvek! Kamit ah a hong en a, ka-om dan lamdang satak in 'bangchi e' chin hon dong tuantuan hial hi. Saulou kapai nung un park mun katung ua, huai ah tu in, hun paisate kong kikum tiptip uhi.

Itna thu kagenkal ngaklah tak a a omsung a teacher pa toh kimaikha man ahih dante uh immlou in honhilh a, ngaidam teitei ding in hong ngen hi. A haksa ngeimai, theihsiam haksa kasa! Ka-it kangaihlouh na ding a omkei, himahleh bang doh ai a hiai bangteng tung masa se a, kaku aw, nau sukkiat ngailou hamham in ana om mahmah ve maw? chin ka ngongkawi phei tamai hi! Kei mi ginalou na-itna tangtak din leng ka kikoih nawn kei, hehpih in hon ngaidam hamham in aw, chin hong kapkhe hithit tamai hi. Lohngaihna ka theikei, ka zanmang hizaw maileh ka chi vungvung! A mittuite ka nulsak thiamthiam kawm in, kaku aw, en in tung solkhapi a tan a, suahlam a pan kawlni a suah laisiah nang a kahi gige ta, lungmuang in om in lan, na mittuite nulhul in, hunluite ngilh in maban ding gel zawta ni, tuni a pat nang a kahita, chia ka hehnep na aw te a zak in, kipahna khitui kham vuallouh toh ka hun uh kazang nilouh tamai uhi!

Hun tam neilou kahih man in ka din khiatpih teitei a, kisukhalh na kawm a park sung ka fan kualzoh un theitui dawn din hon paipih hi. Ka hun nanung lam uh nuam satak a zang in nitaklam dak 2.00 pm vel in kikhelah pipi in kakikhen khong uhi.

Ka ngaihtuah zel a, lamdang kachilou theikei. Kaku tuh itna ziak a ngaidam kahi tamai! A ginatlouh nate ka ngaihdam bang in ka-itna leng a sang hiaihiai a, sihna lou in hongkhen zoudin ka gingta nawn kei! Hunlem zong in ka kimu zel ua, kimuh pen nuam mahleh kakikhen hun chiang un ka kikah phialphial sek uh. Hun-leh-kumte hong kivei a, ka kal uah thusia gen ding neuhneuh omzel mahleh huaite hihliin vual kahi takei uh!

B.A. second year ka sim kum in sepaih hong kila a, vang etna dan a kava try leh, lak in ka-om maimah a, ka khonung buai petmah. Kaku taihsat ding ka lin petmah, a langkhat a lah nu-leh-pa thuman a kuan mah hoih kasa a, huaimah tuh kaku deihdan leng ahi. A kikhual petmah a, kiteng hinaikei mahle ung maban ding a ngaikhok thei mahmah mai! Kanu, kapa ngei leng nu, pa chin hon sapsak pah a, hiai bang a a lung pichin nate'n hong kipaksak thei mahmah hi.

Awle, training din kahong kuan ngei a, haksa pipi hun om mahleh huaiteng sang in kaku puldou keidin a leh tampitak in a haksa zaw! Hucia training zoukuan a ka-omlai un, kaku damlou chihthu kaza a, himahleh khosik maimai hiven, dampah nave, chi'n ka ngaikhok vak kei, kinep banglou tak damsiang theilou in om nilouh a, banah a chikhong leng phual tektuk in a nini a kiam hulhul ahih dan thu ka zata hi! Training zohkal ka ngaklah petmah, zoulou a suty ngetmai ding lah kal nih khong lel in sam, huai bang kal ah kabuai mahmah mai, huai kalnih sungkan a sawt kei a din a omkei ding kachi hial! A tawpkhok in kazou khongkhong ua, suty lapah in innlam kadelh vengveng hi. Maizen! nidang a mum thrihthriah kaku tuh ana pek dikdek a, a maiguhte suak in guhvuak bang. 

Innlam pha suaklou kahihman in innlamte kathuzak a, kalkhat khawng kakuli buaipih a tamzek ding kahih dan kahilh hi. Ka nun hon awi kholkei mahleh theihsiam na lianpi toh a hon 'aw' hi. A zing in daktol kava ki-ensak ua, khosik damdawi leh vaitamin bangbang hiam gelh in hongpai kiksak hi, kaku in daktolpa kiah, hiaite ka neknek sa ahi, chimahleh nethak nawn in a hon zoukei a ahi ding, chihsan a, kalung ahikei mahmah.

Ni thum nung a leng phatuam a akilatlouh tak in, daktol specialist khat kava naih uhi. Daktol in a en a, lung himohtak in sisan na test kha uhia? Bangbang na hih in na bangchi etkawl ua chih te honna dong sipsip hi. Kaku in thil omdan teng hilh a, sisan test nailou ahih dan toh hilh ngal hi. Daktolpa hon sawl bang in sisan leh khaksuah chihte test din hospital lam kava naih ua, result suakpah ding sa a kangak sawmsim uleh, zinghal chia suak ding ahi, chin nurse nun honghilh a, lamdang kasa mahmah! A zinghal in kaku a khosik in a phak toh keikia in result ladin kava kuan hi. Daktol pan hon na limdot mahmah a, akip a-koi in hon dong sipsip hi. A tawp in, HIV posetive ahih dan hong hilh khong a, kum 3 lam bang kingaita na hih ua leh nang leng na kitest a hoih ding a chih behlap hi! Maizen! gintat a haksa ngei, nopna ni suak dia kisa pan kiangkiang a! gen ding kamai moh, kalung tang tei a dawt bang mai in ana a, kamit te zanmial bang mai in a mial dundun, katha a chau a kahute sam in kapum zoi top!

Councellor kiang ah a honsawl ua, thu tampi genmah leh bangmah kazakei! Kalai tawi ka-en lelu a lah kamu muih vek, a tawp in hospital nusia in kaku kiang kazuan hi. Kapaina leh kaki heina lam peuh hunlui paisa mah a bang dundun a, kathil chepteh theih na lungsim teng lakmang a om a bang!

Zawi ningniang leh maisuah dang tak in katung a, kaku nu'n thu omdan hong na dong pah somsom hi. Kagenthei kei, kagenkhe thei mahmah kei, Kakuli ka-en a khamvual louh kamit tuite a hong luangkhe zoihzoih! Kaku nu'n kalaitawi kakhut apat hong sahkhiat sak a, a etkhit toh kiton a kapkhe huthut mai hi. Lupna tung apan hong tukhe tou a a lung ahimoh mahmah, lah a genkhe masa zaw ding ka-om kei uh! Tuanglai a kiphah thang zengzung te hon khawm a, a result mulkim huaitak tuh kaku ngei in leng a hon muta!

A mittak ah kana en kilkel a, a lungsim mitkha in a muhte suantuah' theih hial ding khop in a lungngaih na mithah a ngui hi. A ban dot kasawm nawn kei! A thei utlou kahikei a, a gentu pa en ngam nawnlou kahi zaw! Huchin, a mithah te hong suuk lem a, "kum nih a pailiamta, NGILH TA NING E lungzuan zatam kasial," chin tung solkha tang silsial galdot in kinepna thak toh a mithah leh a maisuah a nuihmai a hong langsak hi.

THE END 

©Siamsinna leh Vakiangbu