KA NU'N TANGMAI HON PUAK

By ~ Pau Lian

Zingkhua hong vak a, miten ngeina dan in nasem ua, akhente meh lei dia bazar lai a chiak vengvung toh agal a hotel a singpi dawn a papi hon mau vengvung a a omlai un Nuniang tuh varandah phiatlai bung kheikhei kawm in ataainem nasa in ataivun a khut a theihtawp a sim in lupna lam azuanphei hi. Hu te ala a, anak kin a ahu te akhah khezel hi, a kho-ul ten buak in adip hon kisai a lauthawng ahih man in asung te sam in damdawi inn ah puak in a om hi. Doctor pan leng tuni in naneikhe di, om phot inla, haksa nasak luat leh aat mai din na lemsak hi a chi hi. Nuniang inleng lem e chi in doctor pa'n leng sawtlou nung in kon paithak di chi in a pawtkhia hi.

Nuniang in a lauhna a paih theikei, atui a zunthak bang a thakkhiak mai thil hileh chi peuh in thil hitheilou di angaihtuah a himah leh kha sagih cih bang asuk a tung a kilang tak a ana puak a sung a naungek akinepna petmah angak lah mahmah zel hi. Ama nauvei bel a uang naikei, akiang ate nasa a kap loiloite azak ciah bang kachi mah dio chi in a lungsim ah a ngaihtuah vungvung a, min le thuakzou kenle ka thuakzou di chi in aki hehnem zel hi. A pasal lah sepaih pang in akiang a om lou a hih man in poi asa a, a gimthuakna theihpih din akiang ah omsamleh chin angai mahmah hi.

Dak 9 vel a gingta, inn lam apan in ann nek di hongtun in Nuniang inleng ane dek a himah leh kamkhat leng a valh zoukei, lungngai leh mangbang pi a ann kamlim tak a nek leng haksa pi ahih man in akiang a bawngnoi tak kikoih dencia bang chidi kahia cih theilou ahihman in a dawnzek a, dawnbei zoulou in a koihkhe pah zel in, hucia a omlai un doctor honlut a check up hon bawl in nauneih na room lam a din kawkmuh ta hi. Huailam ah sawtlou ava omnung in a dangte hon hul ta, a taina lah nat chih tak in hon na a, phim muk zum a dawt mah a bang, nasa a kipek in kho-ul in pumtuam a, amit te mial dundun in doctor leh nurse bangzah hiam in akiang ah buaipih pah ua, oxygen te bulhsak in lauthawng tak in akem nilouh uhi..

Huchia dakkal nihbang hon buaipih nung un a loh ngaihna theilou in operation mailouh adidan theilou in asung te houpih ua, sungte lemsakna toh aat in om a tapa melhoih tak hon neikhia hi. Aman bel ata neihlam a theikei, ICU ah sawtpi koih ahih nung in a hon khanglou ta, Nuniang in tanei ahi cih athei a akiang a zawt a himahleh bangmah a mukei, apasal asam alah a dawng ding a omkei. Amithah chiang nailou in amai ah puanngou silh khat ava daksuk a, huaipa'n Nuniang tawldam in tapa melhoihtak nanei a na gimpih mahmah ziak in tomkha tawldam in ava chi hi. Nuniang le kipak lua in a khitui a pawt a akam phun nipnip in Toupa kakipak a chi hi.

Nitaklam khua hon mialta, Nuniang leng ICU apat hon tawlpawt ua a omna ngei lupna lam azotlai un naungek kah ging honza pah hi, ki gamla pi hilai mah leh uh sung a suak huai naungek kahging in Nuniang sigui a sisan paite atok mawk hi, sisan kizopna nei ahih uh, atapa amah aki it bang a Nuniang in a iit angaita, iit leng a iitmah ngei hi. Lupna tung a naungek kiang ah Nuniang leng a lum a anawi gaulou pi himah leh a duhsak a, atepsak a, nau in nawi a teplai in a melte a en a, alamsam te a zutsak a a lungsim in hiai zahta gimthuak nung a kata, ka hon pai apan a kaki nepna, katek ka hatlouh nung a kei hon iitna zahzah a hon iit dia kon lamet nahi, bawi, hong khang mengmeng in aw chi in enchim louhial in a en nilouh hi. Atha bel chau lai mahleh, atapa ihmulou pi in Nuniang a ihmu ngamkei, ata akah zek ciang bang in adip a hawm a, akiang a api apu, ani agang tenlah ihmu din Nuniang a sawlsawl uhi.

Nuniang leng hong halhsuah ta in damdawi inn apan hon potkhia uhi. Inn ah hong kikem ua, ni tamlou nung in atapa min ding in Muanpu a phuak uhi. Muanpu bel kahnehtak, damtheilou, leh buaipih huai tak in hon om a ,a chang bang in Nuniang in a zanhah pih ni leng atam hi. Nuniang lah tangkhat ngal, buai kisa mahmah theisek hi.

Akipahna zaw sawtlou chik lel ana hilim hi, atapa damtheihna hon deldep a, anu lungkham tak in ata damna ding in om muang lou hial in niteng hunte hon zang hi. A pawtsan ni in a kahna awging te a bil ah amang kei a, ta nawi nelai pawtsan, Nuniang tuh a hihding leng hih zou manlou in innlam hon delh pahpah zelngai hi.

October kha beikuan ahita, lum leh vot kikhek in damlouh hitaan laang in vangsiat huaitak in naungek senlel phet Muanpu tuh a chi honsa in imu louhial in asun azan in hong kapta hi. Apa lah huchi bang hun te a omlem khageih khol lou ahih toh anu buai mahmah in Muanpu pua in a pite inn ah ava giak uhi. Muanpu lah kapkap mai, akua kua hitaleh loh di dan athei a omkei, anun a en a, na nasak na genthei bek hileteh maw, koi lak ana dia bawi chi in a gintak na munmun akhut in khoihsak zel hi. Gimse lozen hikei mahleh nitak tampi bang zanhah pih phial a kep ngai Muanpu a nu a din tunggik na ahita. Himahleh anu adia a sep di mah a hih lailai leh hih dia kilawm gige ahih man in gim leh tawl akhual kei, gim leng a gimkei. A kinepna bang a, a hong dam a, mite bang a vualpha a, mite bang a pil a nu leh pa zahtak mi khat hong hih lamen taktak mah kawm in atha athou a, lit leh iit bangmah atapa adi aneikei.

Himahleh akinepna bang un Muanpu hon halh ngeikei,patau hizen a pautau hak lokha in ana kikhel ta,damdawi inn mah tut in a om a doctor ten a etchian nung un a khosik hat in a khuakkawm ana luh a a dinmun kigenthei louphot ding ahi ana chi tamai uhi.nuniang adin hiaibang thusia zak anuam dek hetkei.zak leng azak noplouh thil lamtak ahi,mihing lemgel bang a deihdan pai himaizen leh aw chi in atapa nasa a lupna tung a kipek a en a,a mit in atap mel chauh amu a himahleh a lungsim ah thil tampi angaihtuah hi.kinep na thawn mai di adio chi a buaise dinmun a om in atapa simai dia ettak tuh khasiatna leh hehpihna mittui toh a enta hi.

Doctor telah lungliap uh hita mai, amau mahngei leng lungliap in taina di tuanlah theilou, atawp in Nuniang hichin hon thum ta hi.

"Toupa hia ka tapa Muanpu, bah leh chau takmai a om etthoh lel din nonphal ta a ahi maw? na lemgel ahih leh natna apan pikhia inla ahinna lamai in, himah leh kei deihna laktak a nasep leh a hinna zaw hon hawisak ve maw.. ka hinkhua ah thil na deihlouh tampi kana hih ta, ka kam kihhuai leh ka thumna mawlchik hon dawng inla a panpihtu doctor te khuak pilna guan inla a damdawi zatte uh nang hatkhum inla a hinna zaw hon lakmang sakken, ka tapa Muanpu nang thuthu hihen."

hon chita hi. doctor tenleng hutkhiak sawm in lungke pipi in hong kipei ua nitam pi hon bei in sihsual a om Muanpu tuh atawp in a khosik hong daita hi.

A khosik daita mahleh doctor te a lungliap losim sawnsawn uhi. Muanpu hing leh dam a a om leh leng mibang a khuak pilna neilou dia, mibang a tai a vual te phalou ding chi in anu hilh pah utlou uhi. Himahleh Nuniang in ana thei gu a Toupa'n ka ngetna zaw hon dawng ve. Ama lam kanaihzawk na dia na thupi tak hon kawkmuh hinte chi in apuak dan siam vanglak hi.

Hunte hong pai in Muanpu le gintaklouh bangtak in hong damthei mahmah hi. A thate hong gol in kum 4 bang mel muthei ahita. Himah leh naungek chik bang a keplai ngai in a om hi. Apau te chianglou in, a khete hatkei mahleh a lungsimlam bangmah buaina muhding a omkei. Anu angai mahmah a anu'n leng angai hi. Anu, Nuniang in lou akuansan ni bang in a chimthei mahmah sam hi. Akhenchiang in anu akah sek a, akhenchiang in nuihmaitak in akhakhe theizel, anu'n lou a huanhai a tuh te atapa Muanpu duhsak in tangmai te, vaimim te puak zel hi. Tangmai te lim asa a bangchi dan a, bang chih ziak a hiai kinethei hiam cih ngaihtuahlou in ane zel hi.. mite kiang ah anu tangmai puak te khong asial zel a, miteng nek hina zenpi ama kipah man in amah vuak nekpeuh asa mawk sek hi.

Hichia hinkhua hon zangtou in ataksa ah deldep lua a kilatna omkei vanglak hi. Lungkham na tengtoh anu'n ana keptouh ahih man in deldep leh vual phalou a koih in anu'n duat chih tak in duat a nuam sa sim mahmah in Muanpu in a hinkhua hon zangta hi.

Dawi havang kal a suakta Muanpu, anu'n apaai lai a a gimthuakna a thei pih phakei, ama haksatna ban ah lauthawng huaipi a hingkhia ahihlam leng a phawk kei. Hong khanglian a, avualte pha in mite noplen bang in tapa duat Muanpu tuh nuamsa in hon omta hi. Mi bang a khe a tangtak a paidia gintak louh leh mi chalak manpha dia kuaman a uplouh uh Muanpu tuh hon tei khengval a, mite tung ah hon leng a, laisiam mahmah leh mite phat hon hi hi. Anu kipak in aneu lai a a lungsim noplouhna teng anu lungsim ngei ah leng amang ta.. anu'n silah nungta Muanpu a en a akipak a, a nopsak bang in a omsak a, pahtak luat ziak in haina lampi apan a kaikhe bun nawnkei. Lawm gilou te pawl hizaw lou in lawm gilou leh chitaklou te chawmtu in hon pangta. Apawl lak uah piltuam leh thuneituam in gintaklouh kal in siatna tampi te ah a penpen hihna la in hon kidiahta, zumun samun leh noptalna namkim ah kibual in anu bang hon lau nawnlou a, anu sepkhiaksa nebei in sumduh tak in innsung a tok buai pianta hi.

Nuniang inbel atapa hoih ngei hi in a um a lungmuang tak in loukuan sanzel a, nitak inlah enkai manlou in kikhop san a, kikhawp ni lou inleng lupsan pahpah hi. Nuniang lungmuan luat laitak in thilsia a innsung uah hon kisiamta. Van hong mang zeuhzeuh ta a, Muanpu mah leng nitak pawt, inn a tun hun anu'n athei ngeikei. Khatvei tuh Nuniang leng patau samta in nitak khat ana ngak nilouh hi. Bible sim in bench ah ana tu a thakhat in a tapa mitbing sihseh in chiak nuanua in hon lut a, a room ah lutsuak a alum pah hi. Nuniang in huai a thilmuh a gingta naikei hi. A room ah ava lutsawm a, ana kisungkalh man in a lutthei kei a, atapa asam a bawi hon hon ve a chih hang in dawnna a zaklouh man in a lum maita hi.

Muanpu nu a din khovel zaw lunggim, thagim na toh kichimat den hi. Lupna ah a lum a, atapa duatsual hita in akikoih a lah lohtheih aneikei, duat louh thak theih lah ahikei, ama deihdan a anu duatna Muanpu in theisiam hi maizen leh a chi a, lungsim suangtuah na toh sawtpi ihmu louhial in a ngaihtuah hi.

Zingkhua hongvak a, annek kuan in Muanpu hong thou a anun ana thuhilh ding chi a akam akat pat leh anu pau tuhkhia in heh zomah hi. Anu'n bel iit taktak mah kichi in dawngthuk ngamlou a, annek zoh in loulam kuansan hi. Lampi ah Muanpu nu Nuniang a lawmte toh hong kiton ua, hong kihoulim na uah a lawmte'n Muanpu thu a genkha uhi. Nuniang inleng khamsa peuh a inntung ahi cih agen leh a lawmte'n nuihsan uhi. Muanpu nu'n leng alawmte kiang ah thu leh laa akan a a lawmte'n, nang na tapa na phatthei sek a bangmah kigen theilou ahi, a hoih louhna nangchauh ahi athei nailou cihsan uhi.

Muanpu nu leng lungsim nuamlou pi in a loukuan na ah kingaihtuah dedu hi. Anasep lah apai mahmah kei, ni lah sat cihtak in asa a, gimleh tawl a anasep leh a hinkhua a a tapa a itna ziak a athuak nate thawn mai din pammaih asa mahmah hi. Khatvei chang in itluat ziak a ka tapa deihthoh khahsuah leng ka bangchi puak dia? bang chileng lampi dik ah kapilut thei nawn de aw chin a kingaihtuah ngetngut hi. Himahleh a sunggil a chibang a kituh itna beithei ngeilou ziak in a lungke ngeikei. Ka tapa inzaw khatvei tei hon theisiam nadi ahi a chi hi. Atapa a iit na kam a gengen theilou himahleh a tak a semkhia in nisapi nuai a bah leh dangtak a a om ni inleng alim-a-al tuam nek ngamlou in a tapa ading mah in lou a nek di omsun haigah te a puak tiiptiip zel hi.

Vaipai a hunta, Muanpu nuleng a lawmte toh kiton nawn inn pau selou in lamtawn in apai hi. Inn atun chiang a a gim beilou hi napi in a tapa inn a ana omchiang bang in kipahna in adim a, a thatawl a beizou hial hi. Himahleh a tapa zaw muh khak mengmeng a hikei, sunkhua zankhua a vialvak, ganhing te bang a gilkial hun a ann omna delh lel a bangta, innsung khat a khosa himah le uh ki muhlouh na bang sawt thei mahmah sek hi.

Achang in Muanpu inn a giaklou peuh a om in, achang bang ngial in vuakliam sa peuh in inn hontung hi. Zankhat zaw Muanpu nu'n hithei sanawn mahmah lou ahi ding a Muanpu inn honpai ana ngak hi. Dak 11 bang hon gingta mahleh Muanpu melmuh din a omkei. Dak 12 honging tou nawn a melmuh ahi nai tuankei. Nuniang leng kingaihtuah in tate enkai zoulou kahi tave maw, tate'n aneu lai ua hon ngai ua ipotsan ding chiang a hon kah a hon nung delh laini te uh ngaihhuai na e, tate'n hon ngaihlai a kilep khiakhia ing a tua ka tapa in hon ngainuam nawnlou adiam aw chi peuh in a kimohsa hi. Tua atapa Muanpu a deihsak man a, mite eng a, a omding a ngaihngamlouh man a nasep ahahpan luat nalam a ata enkai manlou a chimtak a om gige atapa in a chimthoi nadi tuan theilou a lamhaih a thilsia ana hih hita e, a chi hi. Hucia ngaihtuahna thuktak leh nehnou tak a, a omlai tak in atapa Muanpu mel et aleng kilawm nawnlou, zusa gawlmek bangmai a gawng gikgek leh mit gau lile tuh honlut a anu'n leng eh bawi, hon tung khongkhong ta maw, ken hon ngak mai keive honpai mah chin asam a, akiang ah a tusak hi.

Nuniang inleng bawi kon itna thupi luat lam nathei hia? hon iit kadiam, hon iitlou kadiam a chi a, a dong a, Muanpu ingleng kinuai viaiviai kawm in leh kamsiam tak in, Nu, khovel ah itna, nang itna kan a ka tuah leh hampha ka kisakpih omkei. Kaneu chik apan itna toh nonkem a tun kalianta a, himahleh lampial kahita, hon kaikik a hon hunkhe ding kon saklai in non phawkpha kei. Tun zaw lamsaupi ka pai liamta, ka buaisiat tung in valnou lungsim kikokalh tak ka hi. Ka ut kadeih te kikhek in lawm ngai a ka om in nang kanu neihsun kalawm hoihpen chi a kon ngaih in non pawtsan a, lou te kuankuan in, biakinn te na zuanzuan a, sepkhiak sang in na thum a na ngenngen a Pathian in na thumna a dawng a hinte maw, itna kichi zaw ngetnget, thumthum leh kam a gen hilou ah sep leh bawl hizaw eive. Hon iit mah leteh na tapa khutlum leh bang lungsimneu leh chiangkuang lou, hamhaih tak in ka om a, kongzing a vakthaap lawm gilou kapawl ta, tu in ngawlvei ka hita, nanglah sahkho ngolvei, kapa lah zu ngolvei, ngolvei sungkuante hinkhua hichi hilim lou maw chi in lupna lam a zotsan hi.

Nuniang adin zaw gendi a om hetkei, hihhoih akisaklai in mohsakna dembei tampi takte aza a, iit akisak lai in atapa in a iitna deihkhoplou ana hih maimah a theisuah hi. A khitui ahong luang a a lungsim ah,"Muanpu khase hetken aw, iit tu beilou nahi, hihkhial mah kahi, tai leng kon taingam kei, zep leng könzep ngamkei, minek nanek louh ding lau in nasep hahpan ing a, na hinkhua hoihzawk nading khualna chi a Pathian kiang a ka hun awl neihteng a na hinna valan ing a, tuala hichi hita, nangtoh ahun tak a hun zatkhop na utbang a zangkhawm khalou himaita, poi hina maizen e maw chi vungvung hi. Ihmu louhial in Nuniang tuh lupna tung ah ki leplep ta hi.

Zingkhua hong vak a Nuniang in atapa toh ahun manpha te zatkhop sawm ta mahleh Muanpu in anu sang a angaih zawk tak a niteng khamkhop leh alawm leh vual ban ah kholak a kongzin a vialvak te a sunzom a anu kikhek na a vuaksuak tamai hi. Muanpu nu ading lungkiak huailua chih louh genbeh ding a vang mahmah ta. Himahleh Muanpu nu a lung kekei. Mihing zaw lamdang pi a bawl ahih na toh lungsim kikhek khek thei a, khatvei tei Muanpu lamdik a hon kalsuan nading ahi cih a kinem lailai hi.

Hun hongpai in tunggik nu Muanpu nu a din khasiat na ngen ahita. Khouhzoh vual louh hinkhua zang a sìh leh hin kikal a khosa Muanpu in neih leh lam kideklou hial leh maingal tak in a pokhe ta. Amau a puakhiak ding aneihlouh hun in mivan te vagu in a khenchiang in mat leh sawi in a om a, khotang tokbuai leh khotang chidamna subotloh tu in a pangta. Sum tampi bang liausek ua, inngam lougam louphet in Muanpu in a sisan gui a thun ding kia hisap in puakhiak theih a lianpen apan a neupen phimzang na tawm pokheta hi. Anu loubawl bang va kuanpih in lou a gan hong lut bang mai in haichi va lakiam hulhul hi. Amau a gentak louh khosung mite loubawl nateng ama a bangbang in haichi va kineihbawl sek a, mi huat leh kih in Muanpu a omta hi.

Tuabang hunte in Muanpu nu lunggim na ding kuan a theihpih a, mite lak a amaizun gentak lou miten a tapa tung a a lungkim louhna te uh sekhe sek ua, kizopna nei leh innsung khat a khosa khawm Muanpu leh anu suangtuah na ah kithei ngeilou hizaw mai le uh a chihsak huai mahmah. Pasal te kiang a omlou hilai, a tapa pasal in dawn zangkhai dia Nuniang in a lamet et toh, Muanpu pen hon khang mengmeng dia nu-tha te khek dia, pa-tha te khek dia lamet tua vakvai leh gintak nabei a khosa hita, lung hin a hing a nene leh dawn dawn toh hinkho zang tuh mite muh in nuamsalua hilel lou hia, mi akial lai a aman kham ngah chih tuh alou theilou dinmun a hita. Miten a en ua hai asa ua, amah ngei leng a ki-en a hai a kisa a himah leh mipi teleng hai asa veve thou hi. A kallak ah anu haksatna a theikhe zel a himah leh a mangngilh pah, ama sung a sisan gui a khelhna luanglet ten asam ta, a thilchin zongsat te ngawl ut himah leh a hithei nawn takei, aguh atangte thak in, a khuak te hik a, a ngawl zoh sun ni natawm inleng khatvei chauh va hihkha teitei laitel hi.

Kum honpai a, mite'n a innkuan khosa uh a khongaih mahmah uhi. Damtak a buai hinkhua a zatzat sang in sizaw mai leh a chi chiat uhi. Apa leng penson ta ahih man in avek un kimta uhi. Tun zet inzaw Muanpu te innkuan kinakna innkuan ahon hilai dep hi. Buaina omte Muanpu nu tung a tuta. Ngohna tampi tak toh siamlou leh kizenlou sakna in Muanpu pa'n a zukham chiang in azi hansan a, vuak peuh vua in nin bawl sek hi. Atapa siatna ama kizen lahna ahi chi in Muanpu pa kisiamtan tak in hang sek a, himah leh huchi bang buaina te theipha din Muanpu bel inn ah a om man vetkei sek hi..

Nitak khat tuh Muanpu kham ding ngah zoulou in inn hon manoh baih kha zenzen hi. A gal apan in kina leh kivua thawm honza a chiangkuan ni sunsun tuh awlmoh kisa in hon delh a inn ah lut hi. Apa kitom a anu singbul suangbul toh vuakthuak a nasa tak a tuanglai a tumai hon mu a gen ding leng theilou in a ding gegu mawk hi. Apa'n leng Muanpu kiang ah nang uital vaklah, kholak kongzing teng a buaina bawl ka tapa leng chih taak louh en in nanu, nanu thubup ziak a innsung a um leh bel teng zuakmang hita, innkuan kisia, ei innkuan in tunitak in dawmlou hial in i bawl ding uh ana chi loiloi hi. Muanpu leng kidek zoulou in apa hon maikawk a nang maw kapa nahih, numei deldep tak kanu na kamsia a nahou a bawn thuak lah dilai singbul suangbul man a numei a theihsa vua, nang zungol vei, ka kho theih apat na zunou toh namuk kibulh den a, ka kho theih a namel kamuh masak a chiangkuang lou leh kham a om pan maw tua innsung hoihna ding deih chi a suanlam bawl a tu khonung a numei su genthei a navuak. Hat kisa a dik kisa nahih leh pang in, kei hoih ding na deih leh bang dia ka mitmuh a zu dawn pan a ka muh a lua a vok bang a tuah nana a lum. Kenleng mibang in pahoih nei leng kei natapa dia non simtel nuam nawnlouh ka hinkhua a hici kei di, kua a pahoih deih lou, nang na chin kei, ken ka chin kei, chinlou taklou tuaktuak in bawl mah ni eih chi in kibohtuah din hon kisata uhi. Anu leng patau in innkiim innkiang te vasam hi. Awlmoh tu tamlou te ziak in vengthei hamham in kihoulou hial in lupna ah hong lum khong ta uhi.

Nitak zan khotawn in Muanpu a kingaihtuah a, a hinkhua zaw hichi tel di hilou hiveh aw a chi a kikhek a sawmta hi. Zingkhua hongvak a hunte ngeina bang a zang in Muanpu tuh pawt te kidek in inn ah om mahleh a hehna ding a mutam thei mahmah hi. Apa ki-uangsak tak a hinkhua zang in a kidek na a suthangpai mahmah hi. Muanpu a sa te zoi in sawlsam tak leh ning kitel a omlai apa zukham in a supuang zel a, kinak louh teitei sawm mah leh uh kihemkhe zoulou sek hi. Nikhat tuh a khosik a puang a, a tha a zoi a, a guhngek te kitam ding bangmai in na asa a, a guhsung ah tuiniin kìhawt bangmai in a guhte azau a, va hih cheuh leh pha ding ahihdan Muanpu inleng athei. Himah leh kidek zoutak a thuak teitei a a omlai in apa zukham in inn hontung a, kitom in, um le bel omsun te pai in Muanpu kiang ah ei tegel kua isi masa dia chi peuh in akikou a anui luahluah zel hi. Muanpu in zathadah mahleh a pianna pa hial tung ah kamsia azang nuam nawnkei. Muanpu paulou a a om chiang in apa bang a room lam ah vadak zezen in ngaih taktak in va hang lailai a atawp in Muanpu kidek zou ding hinawnlou in chiling derder in hong thoukhia a, apa lum maimai din vasawl khong hi.

Apa leng utlou in Muanpu ana sawnthal hi. Kidek ding chi himah leh aneu apat gum tak a khosa apa a hawi zoukei, a khamtheih guthuak toh a khauk sou bangzen in hong om a dingtou in apa tuh tuanglai ah boh in tuang toh nengbelh a nang zuhai, thagum thatang a khamsiat cia sungkuante nawk, Pa din na chingkei, chi kawm in innkong ah pawtsan hi. Himah leh apan anu vuaksawm a hon kisak zel chiang in bang chitel adio chi in delh lut thak a vaki sual maita uhi. Anu patau in innkim-innkiang te kiang ah panpihna ngen mahleh aveng te unleng va delhpeih zihzeh pah samlou ahi ding ua kuamah hon kodawk lou uhi. Anu'n a etthoh maita, tuanglai a pata kisual tuh ahai a bangta mai uhi.

Sawtpi tak huham tak in hong kisual ua atawp in apan tempawng hon maikhe ta a atapa satdin hon kisa zenhouh tuh anu'n amuh in vadelh hi. Anu thahat louchik inlah phelh zou talou, Muanpu in apa tempawng tawi nalam apum toh manbelh a, anun leng a langkhat lam va matpih hi. Hucih laitak in Muanpu pa thahat tak in Muanpu nu vei a, pangkhang tau feet 20 bang a sang ah hon lengkhe duaiduai hi. Muanpu pan lah atem khah nuamlou, Muanpu in anu awlmoh mahleh apa tempawng lau ahih man in manden a huai hun in patau tak in hong kikou a mipi'n leng tangval patau a kikou chi'n vadelh ua, va phelhkhe thei uhi. Muanpu inleng pangkhang a anu lengkhia vadelh pah a, anak leh kam a sisan pawt te a puannak a nul in a phong kang a, aphei ah a kingaisak zek a huchi in a dom a innsung a lutpih in lupna tung ah sial hi.

Muanpu pa a zukham a veng naikei. Mipi'n kemhoih in Muanpu nu buaipih uhi. Muanpu in ngaìtuah mulmal leng anei kei, anu nasa a thum a mitsi diaudiau a en a, ahoupih a anu'n a dawngkei, kisikna in a pumdim alah hun paisa bangmah lakik theih ahi takei. Zan khovak in apa tuh room bittak a khum uh a, aman anu'n buaipih in a zankhovak ta hi. Anu dinmun lauhthawng huai tak zinkhua hongvak in doctor te a ensak a doctor te thugen inzaw a lung a sukham mahmah hi. Anu vual phalou a koih ahita uh, anu adamsung a kumzawn natna nei a tangtheilou a naungek bang a zun leh ek siak ngai ding ahita. Anu mohna neilou, asungkuan ua gimthuak leh nasep hahpan pen tua hichi mai tuh Muanpu in zanmang tangthei hileh a chi, a hinkhua ding haksat chi hinatel e a chi a, hinkhua namai lou paltou din amah khamtheih ngolvei leltak akimuang hetkei. Huai puakgik teng ban a apa kolbulh maituak a lauhuai hinkhua zang bangchi kep di adio a chita.. um leh bel a zuak beisa, sum leh pai a zatbei sa, tua a kikhual thak ngai ding dinmun maituah ding ahita, akimuang louh bang ah ngap leng angap mahmah kei zomah hi.

Hinkhua hon kikhek ding leh maban a vangsiatna leh lungngaihna toh Muanpu in anu hinkhua zatding a suangtuah a, apa ngei leng pumvak a omding ban ah anu akep ding dan a lung a khamta, sih mai bang a ut alah anu hinkhua ding amah tellou a haksa ding ahi cih athei. Aneu lai a anu kepdan te leh khotuah dante tun Muanpu in adit angai ta, adin zou ngeikei ding chih tuh thukhotang aveng apam te lungkham pihna ahi. Muanpu ngei in leng hinkhua nuamsa tak a ana zangta, tua dause khonung kahi cihte bangziak adio a chi a, anu si lah hilou. Hing minpu lel a hinkhuazang akep na ding ah a lung a gim a gawtna tuakkha hi in akikoih hi. Kisik in kapkap mahleh Muanpu liangzang a napi takmai ngak a a om a theihsiam haksa, pathian sapna thuah nih a pai a gawt kawm a ahawi anu leh apa leh ama hinna ngeileng tu in a poimoh na a lianta. A thahat lai a anu thusim lou a hinkhua tampi ana zatsa te a en kik a, hihkhial hina maitel ing a chi a kibawl lou a om lah hithei salou in a buaigawp hi.

Apa penson na sum tamlou kha te azatna ding hisap a akidaihsak takei, anu louma keplouha tulmai dinglah aphal kei. Nikhat tuh loukuan din akisa a, sun nisa vingveng nuai ah lou hon khou hi. Gim leh tawl kisa tangmai, maigah leh mehteh tamlou bag a guang in a paita hi. Avanpuak tawmchik himahleh lel maimah a, lampam a niliim ah hong khawl in hong kingaih tuah ta hi.

A kawlzal sung a tangmai alakhia a, a gikkei deuhkhak leh chi in hon met a hon neta hi. A kingaihtuah kawmkawm a, adang tak phazou nailou chi in khat agaih in adang hon sem nawn a huai anek khit in adangtak adanom asata, lim na maizen ei chi khe khahial hi. Niliim a om nuam asa a, huih vot hiauhiau te kimutsak a a omlai in thakhat in anu itna hon phawksuahta hi. Eh kei mihai, tomchik nasem pan in tangmai bang 2 tak kagai a, kanu'n kaneu apat kei hon duhsak na liau liau a sun nisa, vuahsia, huihpi, vuahpi nuai a gim leh tawl khuallou a a om sunsun le nengamlou a kei adia hon puak hi leltak veh aw, tua kei ka dangtak bang a amah le dangtak ding, duh tuntun a nemai leh a tawldam di chih atheih natawm a kei hon puak teitei, sun nisat nuai a singliim ah khawl leh nuam di chih thei napi a khawl ngamlou a hahpan hia, kei kanu sepgim gah ne a inn a bawn ompeihlou leltak, thumang thei hileng keikan a kanu thugen te zui dia kilawm omlou hitah e hon chita hi.

Pasal phatak himah leh sunkim a tangkhat pi in kisikna mittui a hong luangkhe zungzung ta, anu itna te a sut kawmkawm in a kap huphup a, hun paisa a anu ana suk gentheih nate akisik a a lakik ut a lah akikhel ta.. anu'n asul a ana pai apat a a genthei thuak te tantan bang Muanpu in a suangtuah ta a, khitui nan vuallouh toh singliim nuai ah a kichiamta, maban a kong zapi anu leh pa ditkik nadia kong kihong a omlai a chi a tha ala thak a pil tadin a kichiam hi. Aneu apan a anun thu hoih leh paunak a azat gige "itna zaw gentam leh saktam thu ahikei, sep leh bawl lel ahi "a chih a phawk a, eh kanu'n gengen lou a ana sem a, kapan gengen lou a ana vak a, atawp a lungke lua a ka innkuan uh siatloh eive honchita hi.

Inn ah apai a Muanpu leng feltak in a gamtang ta hi. Hiaibang sapna lauhuai, innsung zawngkhal ma a ana theisiam a kibawl hoih himaizen leng aw, kanu kapa kipak natel ve uncia, tuala kapa kulkhum ta ing a, kanu lah zeng maimah, innkuan a potkhe thei a om a damtak a vaitun seklai ka ngaitel chikhe vungvung hi. Kanu mah damlou kep siam a, kanu mah anhuan siam a, kanu mah mi suk kipah siam a, kanu bawlsa nek mah nuam hina maizen e. Kanu'n tangmai hon puak a, kane a lim kasak dan ka genkei, ama thagim dangtak khuallou a a nektang kei kipahna dan theilou ana piakpiak lamdang kasa, tunlah kanu'n tangmai hon puakthei nawnlou dia maw chi a khuisa vungvung kawm in anu a di tangmai a metsak a nuihmai hieuhiau kawm in ava pesam ta hi. Innsung buaisiat ma a na damlai a ken hici'n hon pekha himaizen leng maw nu, hon ngaidam in aw chi'n Muanpu in anu bilbuk ah ava hou siausiau ta hi. Hun hong pai toutou in muanpu in a nu leh pa kuamah gintak louh ding khop in a sukipak denta hi.

Beita.beita.beita.beita.

*Kawktuam neilou a phuahtawm siksek ahi aw..

©Siamsinna leh Vakiangbu