SINGDANG KHAWIHDIN KON PHAL THEILOU...

By ~ Thanuam Dahpa

Ka siang vabang nongleen tuunglai in naubang kahon saang theikei... Nang tuk a ka huat leh ka muhdah om din kagingta kei, kon hua a ka chitung na hon khoihkhak ding lel leng kalauh thoh zezen hi. Kalung sim theichian a kon ngaih louhdan thei himaizen lechin zaw nagal te khat pibawl utzaw ding hichin a... Hon ngailou kialeng a hikei huat in kon huat thoh hi. Na mel ah hoihsakna himhim kaneikei, na muksan sihseh lel lou suanding dang nei inle kahon theisam kei hi. Kon huatdan thei himahmah lechin kamuh in na om ngamkei ding... It a chibang nateel sate nang a lungkim zou omlou ahihdan kathei in kon it khak ding kalau a na hon propose tung in kon itlouh ziak leh kon huatziak in a sun a zan kalung sim ah vaibang natham loh hial hi.

Tampi te apan itna thu kaza ta a tampi te apan mah in ka itna kialou leeng ka taksa tan ngetna kana za in kana mu gige sam hi. Himahleh nangbang a maingal leh kuhkal ka theinai kei a theih leng kakinem kei hi. Kei non chih teitei dan a midang na chih teentuun lezaw kuaman a hon nialzou ngeikei ding.. Na tup tangtun louh lau a napan tinten dan nang a pan sinlai kamu khe zezen hi.

Huatna leh muhdahna a dou a nuam a himahleh itna zaw dou dingdan a omkei.. Om ana hihtaak leleeng ken kathei khakei... Ka sumlu la ding melma hilechin zaw kanei kalam, ka tha kalungsim tengteng in ka hondou thuk ding... Ka dou theihlouh Itna gal a non dou zaw kapang theikei... katha neih tengteng a nial kahon sawm a nial theih vual nahi kei. Na muhlouh a kibuk kasawm a na muhlouhna mun omtel lou ahiam nahon zongkhe thouthou hi. Kon ngaihlouh luatziak in melma bang a kidou ka ut mahmah a hon dou a hithei hileh hiai simleitung a om nawnlou dia hon sukmang hial leeng ka ut in kalung gulh zou hial hi..! Bangding a melma a hon neilou a it dia nahon muhkhak sese a diam? Melma in hon nei inla kidouna phual a kimu in kidou himaileng ka ut petmah hi. A hi alah gal kadou theihlouh na pentak ITNA GAL in nahon dou a vual lel ka hi mai hi.. Naa hina maizen e...

Itna zaw nial ahaksa pumpelhna ding lampi kazong a kamukei.. Ka paulam teng nang a ding in kinepna bei a hingei kei... Luhlur tak chu neive.. Kei udthu leh kei ngaihthu genlou a nangmah in no itna kia masuan a nahong lut kahon nialzoh louh manlel a kithuah himah lehang lungsim latheitak nahi. A sun a zan kalailung sung naluah a na ngaihtuahna a pan seken khat lel leng napai khengei kei hi. Lamdang tak tuh nahi maw.. Kahon deihlouh leh kataksa tung neng chik lel leeng nahon suk khakding kahon deihlou in hicitel a kalungsung naluah mai lamdang ka chilou theikei hi. Siamtu in a thilsiam dan theih khiat zohding nahikei...

Zinkhua hongvak a nasakmel muh ut in na om na ka zong a kahon muh in kalung sim a nuam a lungmuan natak kanei hi. Himahleh kon it ka chithei naituan kei hi. Kei it leh itlouh nang a ding in bangmah a poina a omlouh ziak a ka kiangtang zou lel in tua kalungsim teng naluah a midang a ding a ka lungsim kidaih nawnlou a nangkia in natan mai lamdang kakisa.. Sun hong hi a ni hongsa a kalungsim apat na pawt khetheikei.. Ni hongtum a muikhua hongzing a singdang siang ah laitual lengthei lou zen in nang mah kahon ngaihtuah a katheih louhkal in nang a kia in nahon bawlzou hi.

Itna in zaw hazaatna ahau khopmai... Kalungsim teng naluah kia leng hilou in kataksa kasapum teng nang a ahita... kon kisak theihpih a kuamah etding leng kahon phal kei.. na mel hoihtak a et ka ud hun in mite hon et pihding lau in mundai ka hon zot pih hi. Kuamah hon khoih ding kahon phal theikei..! Keilou kuamah in hon suk khakding kahon phal kei, kei a ding in nagin om na kahon poimoh pen ahita... Kei a kia nahi... nanglou kuadang kalung sim kape thei nawnkei.. Hichituk a kalungsim luah leh kahon kisak theihpih simleitung ah a om keiding hi. Itna zaw mel hoihna ziak kia a na om hilou eive maw... Kahon mel huat leh hoihna himhim nei a kahon muhlouh tua midang muhding leh khoihding phal lou zen a kon na it takmai.. Kumpipil pen Solomon in Itna a natheisiam keina mah a kuata theihsiam ding ana hilou eimah ve....

Hon it in hon kineisak mahleng kumkhua a ding in deihchibang kahon tel theikei... Singdang siang ah laitual ngabang hon leensan mai in.. Nang ding in apalzaw singdang za intam ding hi. Keilel tak ah nahin khua su vakvai dah inla keibang a lungsim teng leh kisak theihpih nateng a hon kisak theihpih ding nazong zaw mai in aw... Nangziak a kalung sim leh ka ngaihtuahna kasensa te ziak in kahon mang ngilh ngeikei ding...

Tung thianmang gawmlouh himai ni.. keizong lung a kadeih siang ah laitual ngabang leengta ning... Navang ngaihna luankhi toh kumtawn a ding mangpha.. Ka it luat mite muhding leh khoihding kon phal louh ka MEIMATUM aw kumtawn a din mangpha... Ka siang ah laitual ngabang hon leng nawn dah in aw....

Hahahahahaha...

©Siamsinna leh Vakiangbu