BANG THEI KEI VENG

By ~ Pau Lian

(Based on true stories) 

Hun tamzaw ah ka ngaihtuah khasek chi lengle ka khial kei ding, kua ahia lungkim mi kichi? Kua ahia hinkhua en a thupi kisa? Kua ahia ka hinkhua anuamlua chi ngam? Ken bel ka hinkhua ka en a, mak leh lamdang kasa, ka ngaithuahna ah akilangkhe mun mahmah tampi tak, ka hinkhua a haksatna tampi ka tuahte ka kaikhawm thak a, hiai bangchi dan adio chih vungvung theihlai ding bang kanei tham hi. Huaihun a ka maituah laitak a ka omdan, ka mitkha ah hong kilaak khe dundun te'n ngaihtuahna leh suangtuahna apei lungam zoulai hi in kathei hi. Ahun tak ah bel, bang chi lawmlawm tel katuam ale, lawm leh vualte lah nuamsa a om ua chi in lawm-le-vualte bang ka eng a, amau bang a nuamsa a om tuh huaihun a ka lunggulh ahi. Haksatna ka maituah chiang in lungkiatna in ka dim a, ka khete buannawi lak a tum bangmai in ka tangbuai a, a kawmte nal in ka kitalpuk a, ka kitung nilouh a, himahleh ka suakta kei, kua a hon panpih ding? mangbat tawpkhawk in Pathian ka phawkpan sek ahi, mihing gam ah lawm leh vualte leh mihing muan in damna hon pekei, pilna, siamnate delh in taimah leh ka lungsim, tha leh zung damlou tuh ka hunkhe zoukei a, natna in kasung ah na hon semzel hi. Akhen ten huai maimai na chi maithei uh, natna i thuak chiang a i lungsim suangtuah na bek damleh a thuak nepdeuh din ka gingta hi. Mihing kibanglou kal ah thil lakdan leng tuamchiat ahi, ka chilou theikei hi. Nang adia haksate kei adia nuamlua bang leng hithei thepthup zel hi.

Christmas mani December ni 23 khovot nuai ah exam a zingchiang a kipan ding chi in khuak sazen a laisim khin ka lum a, zing a damtak a exam pedia ka kikoihlai in damlou sa in ka thoukhe maimah hi. Sungkhoh khosik leh ann nelou pi in exam hall ah kava buaisia a, zou manlou in kapai a, hostel katun in dak 11 a pelzek a, kavan le kikhek lou in ka ihmu a ka khanloh in lawmte ka kiang ah ana dingdim ua, kamuk toh sikkeu sutuah in"NE IN, NE IN"hon chi nilouh uhi. Kenleng bang a chih theilou in ka kam kaka a, huai sikkeu a thil hon tulh uh ka valhzoh in dak bangzah gingta a ka chih leh dak 7:30 a gingta hon chi ua, kenleng aw chihthoh in ka imu sukzel hi. Ihmu pan phet ka bilbuk ah NENAWN IN hon kichi zel a, ka nene mai hi. Ka lei te aham a, ka ORS dawnte ka sung atun ma in ka lei ah kang a bangmai hi. Lawmte mel ka en a, ka mu chiangkei, mit leng hakpeih ngellou a om ka hihman in ka ihmu nawn a, ka khanloh in zingkhua ana vakta, dailenbuk toh kitaisan theilou in sun nitum in ka buai a, a nitaklam in RIIMS ah puak in ka om hi. Huai a omphot dia thupiak ka hihman un ka om ua, lawmte'n hon giahpih in zankhovak a kei damdawi kikhai hong ompih uhi.

December 25 ni a tungta, Miten hun kipahhuai, kum bul apat angak ni uh a tungta, kei mahmah leng kana phur gukten, hostel a lawmte toh zangkhawm liailiai dia kana kikoih lai un, damdawi in ah ka zankhawm ta uhi. Huaini inzaw ka halh deuhta, ka damdawi kikhai leh dailen pen bel ka khawlthei kei naikei. Innlam aten leng hon delh ua, a mel uh kamuh toh kiton in hostel a paikik ding adiam aihkeh innlam ah chi'n ka lungbuai hi. Exam lai ka hi a, ka tha teng a beitoh, simzou tuanlou ding chi in ka nu leh pate lemsak natoh innlam pai kasawm lai in lawmten hon phalkei ua, exam himhim in chihtoh hon mantang hilhial ua atawp in hostel lam ah kakik maita hi.

Hostel a pasal ngen omkhawm, ei damlou lupna ngak a va omtuam chih bel thilnuam ahik dek kei, huai hunsawng christmas leh kumthak huihkhi laang nuai ah kingai sesimpi in exam lah hihsia kihita, a ban a dite lah kisim ngap nailou, vangsiat kum ahita mai chi khong in ning kitel tak in ka lumlum mai hi. Mite nuamsa a, aphiat vengvung lai un kei bel lungngai leh mangbang a lawm leh vual eng a om kana hi maimah hi, himah leh ka phathun a ka phawk ngeilouh Pathian ka tung ah ahoih a, sih leh man tuakthei a sihna kong kihong a, ihmu a khanglou nawnlou thei hinapi in ka mitte a hongthak a, kakam te a kak a, ka sigui a damdawi kithun lutte zang in ka hinna a khamkhawl lai ban ah ka exam, sim zou ngellou hina pi in lohsam hetlou in hon koih mawk hi.

Himahleh hiaihun a ka lungkiak nate, ka khom a haksa ka saknate ka gen mangtheikei. Mitoh ka kihouna te uah haksatna ka tuah kagen hun in ka suanlam ahi sek, akhen in haksat chi hon sakpih ua, akhen inbel amau thuakna leh hasatna toh kikhiasa in hon nuihzatsan sek uhi. Mite haksatnate ka phawkkhak pih hun in kei thuak zaw maimai lua ahi mahve ka chi zel hi. Ka kipah hun in mi dahthei mite ka houpih a, ka dah hun in kei hon lungke sakthei di mi dahte houpih lou in mi kipak mite ka houpih zel hi. Facebook tekhong a lut in min status a update tekhong uh kava en a, mi tamlou khah te kava hehnem sek a, phatuam hia chihbel kathei kei, himah leh va thuakpih sam kahi chi in kei lungsim ana nuam mawk hi.

Sawtlou paisa a dahna, kipahna leh khovel vai gen kawm in lawmte khattoh haksatna te kana kikumkhawm ua, kenbel ka gensa te mah kana suanlam a, haksa salua kahi chinuam sim a ka gen touhtouh lai in ka lawmte (lawmnu/numei) khat in a haksatdan hon gen leh ka pautha hon bei in, ka gendi hong om nawnlou mawk hi. Hichi vingveng mah hi khovel chih lel tuh ka hehnep na omsun ahi maimah. A hinkhua hon sut a, a tangthu genten ka lungsim hon khoih a, a gen bangbang suahkhiak a haksatna kei mahmah in kana tuahtoh bukkak ka utna kawmtoh kon taklang mawk hi.

Hiai khovel ah mite mel bang pu in, mite neihbang neikim in lungmawl naupan laihun nuamtak in ka zang a, lametna lianpi toh numeisia himah leng kanu leh kapa'n haksatnate genlou in school ah hon na kaisak in, kei a di sintou a lungkim tak a lawm leh khanvual pawl leh lawm ngaitak a ka omlai in, innsung khosakna ziak in, ka siamsin nalam panpan lel, pawl 5 sinlel in ka maban khaktan in om a, ka sunzom theikei. Hiaibang hun in ka lawm, ka vualten, annek khit teng a hon tawntou ua, sapna aw ging uh ka za a manlah pi a ka dian khiak nite a beita, kalawm te ka kong uah hon paitou ua, amau leng hon ngai ua, hon zawnsek ua, zui ut in kap mahleh kei adia kisiamlou ahita, ka lawm ngaih hun laitak, kum 10 lel phapan ka hihman in ka lawmte school kaidia hong kuantouh chiang bang un, va kilang ngamlou in, bangvang ah ka na engu a, aguk in ka mittuite kanul sek hi. Zingsang a school tun hun a ka lawmte toh ka kihoulim dan teleh, school campus sung a lawmte toh ka kimawldante ka ngaihtuah a, tutan inle huai dak ging lengleng te ka bilkha ah amang naikei, huaihun a kipaktak a ka nuih gingte uh ka bilkha ah kaza a, ka dip hon sun a ka ngaihtuah hun inleng ka mittui a pawt kholoh lai hi. Khovel ah haksat na kichi kei a vuak ahi di zaw ka chikei. Khovel pilna mite bang a sinsiam a neizou hikei in khovel ah lungkimna, chidamna leh enna apan suakta ngei ding in kigingta kei, hithei hi zenzen leh tuate pumpelh a anuamzaw a hinkhonuam zat ka ut losek hi.

Hinkho nuam lamen a, mite bang a ka lunggulh leh ka veipen ten kei naupang neuchik hinkhua ah maizumna hon peta. lawm leh vual te polh ngamna lungsimte hong bei a, amau lak a mawltuam ka hihdan ka kimu a, lawm ngai mahmah hi mahleng theihna leh batphakna kikimlou lawmte kava polh di lel leng nuamlou pi hon suak hi. Sunday school kai chiang natawm inleng ka mawl tuamna a dawkta, lawmte lai sang pipi simte ahi ua, huai lak ah kei pawl nga lel sim in kuptheih ding kanei kei. Lawmte bang in school a nuam asak dante uh hong kikum in, genbei theihlouh phial in kipahna aneih dante uh gensek ua, kei adin huaite dahna a suak maimah, lawmte'n Sunday school kaitawp chiang in lampi a kihou in, seppatni chia, a nektheih puakdi te uh bang, sunkhawl chia akimawl didan uh bang, huai ban ah a pangkhawm ding teng bang kiseh khol masa sek ua, huaihun in keileng simtel hisam leng ka kichi, kenleng huai a nektheih puakte lak uah vathoh teltei sam in, lawmte toh lungkimtak in vane khawm thei laisam leng chih ka ut mahmah, himah leh ka lampi zuih uh atuam ahita, lawmte kipahna teng kei adi'n lungzuanna ahita, lawmten school kai ninhuai asak dante uh genzel mahle uh ken bel hai uh kasa a, school kaithei a, lawmte pawlthei chi in amaute ka enna abei theikei.

Kiakniam lamvai nawt keive maw chi a panla in haksatna apan suahtak sawm in numei naupang neuchik himah leng sungte gilkial dangtak a, a omlouh nading uh lunggulh in mi inn a va om a sum valawh tei ka sawmta. Ka nu leh pa phal luatna hikei mahleh, amau dawn zangkhai nuamsam chi in mi inn ah mitmei veng leh kisuanglahtak in hinkhua kon zangtou ta a, akhen chiang bang in dahna, salhna maigum te tuak in, akhenchiang in pahtakna leh phatnate ka tangsam a, kalung amuan hun natawm a ka dahna te mangngilh ding ka kisaklai in ka mangngilh louh ding vangtahna katung ah atung zel hi.

Ka hinkhua ka ngaihtuah sek a, a chang in seng tovang pua bangtuk ka hi kaki chi. Seng tovang ka pua a, ka dah hunte leh puakgikte ka nawlkhin a, kaki pahnate huai seng ah ka guangzel a, himah leh huai seng tovang a kaguan kipahna te avang ah a tolhkhia a, bangmah kholtheilou in senghawm ka vialpuak abang hi. Nuam sapan ka kichih chiang in, ka kipahna kholkhopte a bei pahzel. Mi inn a om kichi kisuanlah toh kitaisan lou mah ana hi hi. Ann ka huan a, anawiluat hun in ka dah a, ahul luat hun inleng ka dah, ka mehhuan te a alluat hun in maigum tak ka en a, ka puansawp inzut sianlouh ni leng thuhilhna khatakte kadong sek hi. Nuleh pa kiang a om lunggulh in khomui kuan inn innlam gal etet mahleng, kikthei ka hi nawnkei, ka pawtsan ka nu leh pa inn kangai a, ka kap khanak hi.

Hunte hon pai in nite'n kikhek lamdangna nei mahleh kei adin bangmah akikhek kei, sun nisa ten inkong a singnah selthak te salvuai in gallam khat ah school kai a naupang laisim a kikou nainai te ngaikawm in inn kazut a, kazut zoh in puan sawpkawm in inkong singliim ah kapuan sawpte kava nuai a ka kingaihtuah dedu hi. Huaini zaw ka chi a bankham a, ka om anuam hetkei, himah leh nasep di sehkhiatsa a kikoih pen kana zohlouh kei adin thil hithei ahihlouh man in ka nuai teitei a, kanuai zoh in kava sawp a, innsung ah tawlnga in ka lumzual hi. Theihlouh leh tuplouh pi in ka ihmu kha a ka khanloh in inn neite naute ana tawptham ta uhi, gilkial in phe vengvung ua, a singpi ding uh bawlsak in peihlou sasa a annhuan in ka kipei hi. Kalungte am in, amhai leh bahtak in ka huanzou a, pautamlou in ka lumnawn hi. Inntekte hong tung ua, apau ging uh kazak in ka thoupah a, ihmu lou dandan in ka pawtkhia a, a sinpi ding uh sung in, a poimoh kul dangteng leng ka sem a, annte ne in nitak tung in ka om anuamkei a kana lumdi aw chi in ka lumta hi.

Huai nitakzaw ka lunglenna apuang, khavak singseng ten ka pang a tukverh te honsal a, ke'n leng ka hong a, van a aksite ka simsim khamawk hi. Ka haksatnate hiai aksi tezah apha diam ka chinuam a, ka inn ua kanu-kapa leh kanau ten ka haksatna hontheipha di uah aw peuh chi in ka kikhasiat gawp a, nu leh pa anglum a om hile tubang hun a ka natnate gen a, kanu, kapa hon awlmoh dan theitel samdi hi ing a ka chi a sawtpi tak ihmulou in ka kingaihtuah a, atawp inzaw ka ihmu samta hi.

Zingkhua hongvak a, lametna tampite lumlet in a omta, thou khia a ngeina bang gamtang ding ka kisaklai in, ka chiteng a khamnat a, ka thouzoukei. damlou taktak mah zaw ka hita ve ka chi a, ka lumdap maita hi. Inn neite honthou ua, kei a thou masa sek thoukhe lou kahih man in hon awlmoh ua, hong enta uhi. Ka chi natdan kana gen a, damdawite valei in annek zoh in kane a huaini apan ni 5 lam lupna ngak in ka lum nilouh hi.

Ka kisuanlahna in ka damlouhna hon nasasak a, ka lungngaihnate'n ka lungtang asun sidup a, innlam ngai a kaguk khasiat naten ka mit a mitui a vung densak. Kum 12 lelphet, khualgam a mi inn a sumloh a nasem, ka kizentawp ale kisuanglah, tua ka damlouh hun in ka kisuanlah na in ka taksa khempeuh a banta a, gimsia hikei mahleng, lungsim chidamlouh in ka guh ngektak te amek chip a, inn ah om hileng aw, ka nu-ang a lum hileng aw, nu kon ngai telmai, pa, pautam kei lete le ka damlouh hun a ka tal non dapsak maimai lel le nuamlua eive, chi'n ka lungsim akap a, nan vuallouh in ka mit ah khitui te hong luang a, khimkhua zing abang tamai, ka mituite'n ka muhchiang theihna adal mun mahmah ziak in, mi mai le mel leng chiangtak in kamu pahpah thei kei a, kamit kanul zel a, kamu chiang zel hi.

Mi bang a lekha pawlsawm tanbek zil hileng kimuan ngamna leh hinkhua a chouna te nawkzou ding hi ing a ka chi a, mibang a upa hileng, piching lungsim toh ka damlouh posiam di hi ing a, mibang a neizou a khualgam lou zodeuh leh innmun a damlou hileng, bang ka chi dia? Inn a omthei hileng huai hunbi leh dakkal mahmah inle dam mai din ka kigingta hi. Kanu kapa leh kanaute omna innnuam kangai ngeimai, damding leltak leng ka lunggulh pipen ahikei, damdawi mantam taktakte sang inleng ka inn uh mi inn bang a innhoih hikei tawk in, kuamah ngaihsak louh hita leng le va lup maimai ka lunggulh zaw hi. Hiai ahi maw hinkhua kichi, kanu, kapa, ka sungkuan leh kei mahmah inle bang hihkhelh nei ka hi ua chi in Pathian kasam a, dawnna ka kinem a, muh baihlam liai ana hikei. Ka omna ten hon awlmoh mahmah ua damdawi te hon pia in ka kisuanlah louh ding dan gengen mah le uh ka sung a suak zahkai na in huaite a haizan zoukei a ka kisuanglah thouthou hi.

Kalkhat bang damlou a ka omnung in ka damta, ka tha zawi in bahsim mahleng ka damlouh sung a ka sepkhiaklouh teng ditkik ka ut man in ka kihatsak teitei a, maitai sawm kawm in ka innneite uh siamnate sep leh bawl theih sun in ka ditkik sawmta hi. Dinkik zoukei mahleng ka kizen nate lamdang asa ua, akipak ua, puansilh niikten in hon phungvuk zelzel uhi. Kipahna maimelte hon etlawm in, lungkhamna khovel taisan ta chi a lungsim nuamtak a ka omlai in ka damlouh masa pen zoh, akha nihnung in ka damkei getzel, bang ahia hichitel hinkhua ka zat, dawi leh kaute laitan ka maw? kei thuakna nasa tuamna e maw? chih mailouh tuh gen didandang katheikei. Ni 3 damlou a ka omnung in doctor ah kava ki ensak a, akal lak a ka khebawk sekte, ka chikham te leh numei ngeina dan pailemlou te gen leh sak ahau ua, ommuang phot ding leh nagum sem lolou din hon hasuan uhi. Tutung ka damlouh inbel ka pate'n hong pi ahihman un inn ah ka kikem ua, ka tawl adam a, ka lungsim leng anuam zodeuh hi in kathei hi.

Nu leh pa kepna nuai a lungkim kichi mahleng lungbuai naten hon taisan ahi zenzen kei. Nek ngawlthei a, semlou bawllou a omthei ka hi kei chih kathei a, ka innsung khosakna uh ka en a, haksa sa mahmah sam kanu kapa leh ka sanggamte keiziak a puansilh nikten ginatak ale kithuam zoulou a, damdawi manding sutuah zou hamham a kei hon awlmoh a, asuk atung a puktaw a vialtai deidei te ka muh chiang in ka hehpih a, ka dam hunhun, sum leh pai zon tawpsanlou ding chih tuh ka ginna thuchiam ahi ta hi. Nitam thuakkei mahleng ka damlouh hun a ann duhlouh nate ziakin ka bah tangpi hi. Kal-nih bang a pailiam nung in ka dam mahmah ta, ka omna tenleng hon ngailai ahih man un kiknawn kasawm a kapa kiang ah kangen a himah leh phal in ka omkei, ka nu ngei inleng hon phalkei a, dam in damta keileng, ngawl zenlou a omna ding ihi, i nop i dah hun in thuakkhawm zomai in, kialsih lou nading ihi, lungkham zenzen ken hon chi a, naupang lai ka hih toh inn mahmah leng ngailua kahih man in ka nute thugen ngaikhia in inn ah ka omta hi.

Hunte pailiam zungzung in, nopna leh dahnate ka hinkhua ah meipi leh nisa kikhengtuah zelzel te bang in a aki demtuah a, dah hun ah lungkhamna kichi puakdan siam in ka omtheita, kipah hun leh dam hun ah amanphat dan theichiang kahih man in amanpha theipen in ka zangzel, kum tam kuamtak innlum nuse louhial in ka sanggam te ban ah, ka nu leh pate toh lim leh al nekhawm liailiai in ka om uhi.

Kum te hon kikhen dungzui in taksa lam leh kum lam akhan ding bang a khang in nungak nou, mite bang a damtheilou himah leng ka mel ah lamdan na belh hetlou in ka khangkheta, khosung vai a mawl kisa kawmsim pi in ka kiheltei sam a, a chang in kingaih dauna te om mahleh nuamsa huntawk in ka om a, himahleh damlouhna ten bel ka hinkhua a nuse ngeikei, ka pallai hunhoih tampi anegai a, ka khangdawng kipahnate a liahmang khasek, hichi kawm pipi in lawm leh vual toh kipawl in lengla neithei kahi ta, nungak piching lua hi naikei mahleng hon it leh honngai ding bang ana om samta hi. Ka damtheihlouh ziak mah in hon ngai chi a akamsiam uh kazak teng ka gingta theikei, hon theichian mi adin itna piakngam vual ka hi kei, hon theisiam mi bel piak ka ut, himah leh muh ka kilamen theikei. Hehpihna ziak lel a itna hon pia teleng ka muangkei, theihsiamna tellou a itna mitdelh kamuh khak ding leng ka laulai hi. Mi tamkhopte'n hon theichian ua, hon taihsat khitnung un atawp inzaw mi kuhkal leh hon theisiam hingei dia ka lamet mikhat kamu khongta hi.

Nungak nou panphet, damtheilou hisim mahleh kei a chi kituhsa, itna nei a itna mah toh khangkhia ka hihna ah, min huchitel a itna manbei hon piak ngal leh kisathei hinuam samkei veng aw chi in tuapa, Umung kichi, semohlou leh mi kamnem tak ka lungsim teng kapeta hi.

ki-it kingaihna hinkhua zaw anuam a, lunggim dawnzangkhai theitak leh dah hun a langbei tak a ka thuakgim nate damna damdawi tui leng hilou, Siamna, pilnate leng hisamlou, hihna bangbang kizumpih lou a kihou tuah a kihehnep te ana nuamlua mah zaw ana hilim hi. Ka nopsak hun in nopsakna theihpih tu ka muta, ka dahhun in lungke loudia hon gen a, ka khutte len in, thathak honguan sek ka Umung tung ah kipahna alian a, ka itna leng niteng, hunteng, dakkal teng in a pungta hi.

Hinkhua nuam leh haksa ka tuahte ama kiang ah kagen zel a, maban a ka tuah ding leh ka lunglau nate kagen chiang bang in laulou ding in hon thuhilh zel a, kei ka om gige ding, lauken chi in hinkhua lamzang zaw a khosak hun dingte bang hon kawkmuh zel hi. Hiaibang hun in ka hinkho luite hon mangngilh sak zouhial a, sunhun a amah ka lunggulh ziak a lametna te ban ah kipahna kangah te'n nitak hun tan inleng hon taisan ngeikei. Hinkhua nuam leh haksa a kilamdan na kamu tam nawnkei, ka damlouh hun in ka kiang ah a om a, amah ka muh lel ingleng damna damdawi leh doctor siamte nasep theihnate nei bangmai in kamu a, a nuihmai melte lel inleng hon khamuan zou hial hi in kathei hi.

Himahleh kei suangtuahna leh gindan maimai in hiai ka Umung itna honpiak ka muang zoukei, kumkhat bang a valta, ka dip hawmna a uang a, ka kiginlouh kaltak a taisan a ka omkhak ding kalau, ka kisakhol sek a, khovel paidan tangpi et in mi khenkhat ten itna suanlam in hauhna, pilna, sum leh pai te enlah zaw uh ahih ban ah ken huaite khat lel leng ana neikha lou ka hih man in ka lung a muang thei kholkei hi. Ka kithuah uh hun tamzaw ah, a omdan, tatdan leh hon etdante ka en a, hon ngaimah zaw eive chi in ama kiang natawm ah leng ka lungnoplouh nate ka genzel hi. Aman bel gensiamtak in hon gen a, a hehnepna tongsuak khuaizu sang ale khumzaw te ah ka zulmang zel hi. Itna tak a hon en ing a, mel leh puam, pilna, siamnate thudon hileng nang kon naih keiding, kei ka melte, ka khohei gamtatte en leteh itna taklou kon piak hita zen leh na mukhe tading. Ginlahna nahau a, na lung anop kei leh nang non itna piak diklou hizaw ding ahi khong hon leh chih chiang in kadawng theikei. Gentam thu a ka itna a lungkim na muding nahih leh genden maiding ka hi, kon iit ka chih inzaw thilteng huamsuak vek eive khong hon chi ngutngut sek hi.

Ka ngaihtuahnate khek lumlet ta a, itna hiai ahi maw chi in ka sa leh sisan a belh zoukhop ding bangmai in ka itna tuh athuk ta, gensiam hileng ka Umung ka itna a thupi telmai, phulouh deihsakna honpiak ban ah, tantuan kiningching, chikmah a kana muh phaklouh KIPAHNA honpia a, hiai itna tantuan leh a thuguk kisel sung a itna toh kipahna kizomkhawm ten ka kal uh amekmat deuhdeuh ta hi. Khosung, vengsung mite theihphak leh genthang ka hita, aselam bang, a hoihlam bang in gen in ka omsek ua, huaite gente awlmohlou in midang in gensiam in, hon hal in, khovel pumpi kilumlet in tangsangte phaizang gamte suak thut ta lehleng ka kal ua kizopna, itna khaugui ka hualsa uh zaw akip a, atou a, phel mawkmawk vual hilou in ka koih hi.

Manhunte ah pawtkhawm in lungkhat tak in ka om ua, khaliik nitak chiang bang a pawt ka ut lamtak ahi. Huihvot nung hiauhiau te kimutsak in suangpi tung ah ka tusek ua, hiai khatang le niteng in tangleh maw Umung khong ka chih chiang in aman le achih luatdante hon kum zel hi. Mel kimulou a khavak chiang a pawt theilou hiam khat zosam zinkhia a ka omchiang un ka ngaihmel kamuh na omsun khapi ka en a, ka kisulungkim zel hi.

Kum tamtak zaw apha hialta, achang in iitluat man in ka kal uah kiselna piangsek in, damlouhna ten hontuam zelzel mahleh lungkiat na leh kikhen ding vai geelphak ahi kei. Ka Umung kei a ahi a, keileng ama a kahi, kua ahia hiaibang itna manpha, ka phuloh honpia chi in kei leh kei bang kana kipakta gusim sek hi. Akal lak bang in ka thugen uh a thuklut sek a 'I KITEN CHIANG IN...chih kampau bang zatmun lawi ahita. Ka kitenchiang ding bang uh kana hisap a, keivuak ka om inleng a guk in ka nuihmai mun mahmah hi.

Himah leh hunnuam leh kipahnate'n tangtawn adaih takei, kum 4 hialbang lungmuanna leh kipahna kana muhnung in vangtah sasa hinapi in vangtah beh in ka hinkho lui ah ka kik angaita. Hunlui a kikzaw hithei mah ahi, himah leh ka ki mannaikei, ut leh katel lamtak leng ahikei. Nidang in hunlui ah kana kik sek a, sawtpi kava vaitham a, ka khasiatna a puangsek, huai hunlui ka genbel, ka kingaihma ua ka gimthuakna ahi. Huai a ka gimthuakna beita kasak pen tu in va lehkik thak a huai gimthuakna bang va sunzom ding ka hita, huai gimthuakna ka tuah tawp a ihmu a, mangnei lel bang a kipahna mu ing a, tua ka khanloh leh alem, thuzuau leh ka manglam maimai ana hi bangtuk in kangai ahi. Ka Umung kampau zaw ka bil ah a lutthei na a, a pawtkhe nawnkei, kasung ah liitpi lut bangmai in a om a, kasung ah ateng a, ka sisan/pallai zaitha leh kipahna sawtpek a ka kholkhop tenten te a tawpkik a, ka tha bah in, chauhna ka dimta, huai sung tanglai pi a gen din a kilawm kei, genlou thei hileh ka chi a lah gensa ahita.

Ka Umung huaini in hong hoh a, damlou sim ka hihman in ka kiang tukawm in hon en a, akam aka, a lah agen ngamkei, akhutte aling a, kenleng bang a Umung gen ve ka chi hi. Amit hahte ka en a lamdang kasa, ka maitang a nidang a hon etdan in huaini in hon enngam hetkei. Sawt simtak huchi bang a, a om nung in hon genkhong a, Nem, na ngaihdan louleng ahi maithei, na khasiatna hihkha tuh kahi maita ding, kei deihtelna hileh kon taisan nuamkei, himahleh ka innsung ka en a, ka khosakna leh nu leh pa taihilhnate ngaikhawk kawm in, upa pen leh kei unau lak a pasal tangkhat keleu ka hihtoh, kei chin zohlouh na ahi chi in lamai inla, ki-it in kingai mahle tawpsan phot maini aw chi in adingkhia a, apai a, kenleng Umung bangchi dan e, nang chinlouh nadi a om sam a, hong paiphot ve i kihoulim keidia, bang a na lungkiatna chikawm in kathou a ka nungdelh hang in saupi ana tungkhin ta. Nunglam enlou hial in hon pai liamsan a, ka inkong ua khuam lenkawm in ka tusuk a, gending ka theikei. Huai hun in bang a kangaihtuah katheikei, ka mittui takkhe keuhkeuh te'n ka biang zau henhen kawm in hon zuisuk a, ka khuk tung ah atak keuhkeuh te ka en chih louhngal bangmah ka theikei, mulmal na neilou leh kek kiat thakhat a thu katung a hong tu in ka dip ahawmsak a, ka lungtang ana a, giksa bangmai ka dinpih zoukei. Hiai ahi maw khovel, kipah hun a tom telmai, vangsia hina tel ing e maw chikawm in ka Umung in a lungsim akhek ding ka ngak ta hi.

Ka khovel khuak pilna ten a bat zohlouh leh angaihsut phaklouh kikhenna, deihlai, itlai leh ngailai napi himah leh ka kiang ah kisik na kampau ka Umung in agen kei bilbel hi. Kha tampi paita mahleh itna kamnem zakphak ahi nawnkei. Alangbei a iitluatna hawmkhia ka hita, ka Umung kiang ah itna nidang sangmah a thukzaw le muizaw pemah leng a deih nawnkei, bang ziak a itna hichi lelmai a tawpthei adiam kachi a, lamdang leh hai bang kasa hi. Lawmta lel leng hilo, ki-it a kingai chi a mi tampi gensiat leh demsiatsa in bangziak a itna kipiak tuahsa tawpsan thei a, hunlui te mangngilh thei adio ka chi a, khasia ka hi chihlouh gending ka neikei. A lehlam tak inbel ka Umung tapa tang neihsun ahih natoh kei zi ding hial a hon en theilou hipen ding in ka gingta, mite bang a damthei a, pil leh siam hileng ka chitel mai, Itna mong neitak bangdia honpe se adio chi in ka hunlui sut tuh kei buaina khukpi ahi ta.

Ka hinkhua akip akawi a suutmai louh tuh kei adin hihtheih a omkei, itna taktak lunggulh a, dangtak tak a ka om lai a kei adia lungmuan leh khamuantu kichi te'nlah deihlou in hon nuse ta uh, lamlui zuihlouh a pumpelh a pelhthoh ka bangta, khovel hinman a omkei chileng ka khial keiding, itna vangtah tawpkhawk tangkha hi in ka kikoih, kisiamtan na in ka hinkhua ah mun anei takei, kei chitlouh man hizaw in ka koih a, ka lungtang ana a, suangtum pua bang in ka lungsim ngaihtuahna gik taktakte kalel petmah hi.

Hunte hong pai in ni leh kumte kihei zel mahleh ken ka hunlui te banni ka nei theikei, neih le ka sawmkei ban ah mangngilh mai din leng pammaih kasa, ka neu apat ka vangtahna, mi bang a piangsual zen hilou napi a vangtah na nepnawi tak ka tuahte nounel tak in ka sut a, damtheih louh liahkhuh na ding in lehkha bek ana kisimzou hi henla, sepna hoihtakte kinei henla, keimah damdawi ding neng ban ah hon enkol tuding ka neihlouh tawp in ka khaloh te bek in ka vangsiat na liahkhuh leh kachi tuntun hi.

Hauhna sum leh paite nei taleng, mite bang in pil in khovel siamna a kitaiteh na ah tel theisam leng, mite bang in damna nei taleng, kei adin hinna bangzahta in athupi dia? kei adin itna taktak kichi ana kibawllou adiam maw? achang in sih ka ut a himahleh numei lungsim mawltak mai, ken geel leh sut a kaneih chang in ka hinkhua mi kuahiam adia etteh na in pangthei na inteh ka chi a, ka kidek hamham hi, mi kuahiam in ka hinkho haksa apan in vangpha ahihdan muleh chih kalung gulh pipen ahi.

Kum tamtak a pai ta, ka siamsin na ding among a, mawltak in mitoh kihoulim thei changchang in ka hinkhua ka zangtou. Biakinn kikhop na natawm ah leng mite thugen te mathak ka sata, siamna, pilna leh khovel vai taktak te ah ka lung a am gawpta, sum zon kithalawp in, mi inn te ah om mahleng ka damtheih louhna in hon phal takei, nu leh pa don zangkhai dia ka lunggel bang in ka paithei nawn takei, dawn zangkhai naksang in tunggikna guantu ka hi a, ka tek tanpha inleng ka sanggamte tunggikna tup leh ngim hilou napi a bawltu ka hih ding ah ka lung a zing lua hi. Itna lam ah ka gen taksa mahbang in vangtah ka hi. Vangtah tungtuan leh ka kichi thei, tuni tan a ka hinkhua hankihong bangmai a detdou loulaite nou vangsia kisate atoh tehkak unla zil mahmah le uteh chih ka ut. Pilna, siamna sin a, khovel vaithak taktak toh kimekmat theipah ten damlouh hitan zeklel a maw vangsia nakisak di uh. Nou adin zaw hinman a omlua chi in message sautak honkhak a, ka chiltui valh tha leh asuak kei zezen hi.

Hiaibang hinkho haksate keithuak hileh bang ka chi taphet diam aw ka chi a, mite adia dongkholh simpi hikha thei kisakna a hinkhua zatlouh hampha hina ing e, hilhtu nangbang konmuh ka kipak a, na vangsiatnate ah kon thuakpih, maban kuamah amukhol kei, dam dia, i thum zel dia, damna te Pathian in hon pe ding ahi chih mangngilh ken aw, na hunlem ah kihouzel ni chikawm in mangpha ka kikhak ua ka facebook ka logout ta hi.

*hiai tangthu inbox/chating a kihouna pan a laksawn,atak a thiltung ahi.

*min kizang khate adik ahikei.

*vangtah kisa loken chih hon sinsak luat ziak a a tangthu ama phalna a ka gelh ahi.

*genkhelh,gelhkhelh omleh ngaihdam:-)

Beita.beita.beita.beita.

©Siamsinna leh Vakiangbu