NIANGBAWI SIHDAN LAMDANG SUIKHIATNA

By: Paumuanlal Guite

Zingkhua vaak panpan chih ding ahi a, kei leng hotel a papi duhthusam gente khawng houlimna ngaikawm ding chi’n hotel lam ka zuanphei hi. Hotel ka tungma deuh in lamkawina khat om a, huai a ka khodaak leh mipi adim aom ka galmuh hi. Bangthu hipeuhmah ding hiam chi’n lungbuaitak leh thuduh deuh mai in a en ding in kava kuan hi. Lampi a hongpai khenkhat kiang ah “Bangthu om ahia?” chia ka dot chiang in amau “Ngalngam Park ah numei siluang khat om..” chih tan in hong gen uhi. Ka theih utna lian deuhdeuh ahihmanin ka kalsuan bang a kin deuhdeuh a, amun tun ding kal ka ngaklah mahmah mai hi.

Bangmahlou kal in Ngalngam Park kava tungsuk hi. Mi kawmlak kava phu a, a siluang bul kava tung petmah hi. Etmai in zahlak huaitak a thah ahi chih haih vual ding ahikei. Vuaktang in ana lum a, ana tuak masate’n puandum in ana khuh uhi. A mel et in siatna bangmah muh ding a omkei a, sual/rape a thah ahi chih achiang mahmah hi. A kiim aomte kiang ah “Hiai minu min bang ahia? Mi bangchi ahia?” chia ka dot leh a innsung mi lam deuhte ahidinga “Amin Niangbawi ahi a, Penglam Colony  a teeng ahi uh. Mi dan a hoih vekvuk hikei mahleh hiai tan hial ding a miselua ahikei..” chih teng in hon dawng uhi. Huchia ka houlim zoh nung uh sawtlou in Police te hongpai ua, a luang hong pawkhia uhi.

Awl in ka pai a, hotel ah kava tu hi. Papi hon houlimna ana sang mahmah a, mi nu kithahna ding dan bang a ngaihtuahna uh ana kigen huan uhi. Khenkhat bang in kizuak hiven ahichi thei mah ahi achi ua, akhen inlah kizuak hihial lehleng hichia thah chu thutuam hiding ahi, kizuak ahi a, luppih ut uh hileh a lei lel ding uh, a thah sese natak uh banghiam om ding ahi..chi’n ngaihdan gen ana thupi bawl mahmah uhi. Kenbel a thugente uh kana ngaingai a, kamkhat lel leng kup kasawm vetkei hi. A thugen uh ngaihnop salua kahi diam singpi bang nou 3 lam ka dawn gai kha zozen hi.

Hichibang a tualthahna I kristian gam a tung ding a kilawmlou banah tung mengmeng lou ahihmanin mipite a thangpai mahmah mai ua, hospital a post-mortem a bawlna bang ua mipi a pumdim mai hi. A thattu bang thei liai hile uh nuaizan le uh kilawm in tangvalnoute a phe tettet mai uhi. Ahitak a gen in a thattute pen zonsuah a matkhiat a, ahithei tan a gawtna piak teitei chu ahi ding dan ahi. Police te’n bang ngaihdan a nei ding uh de aw, zongkhe ding chihchih toh zonsuah zohlouh toh a thu daihsak in hon om nawn zel maimah diam chih bang ka lungsim ah ka ngaihtuah hi. Police sappa houh phone ding keide aw chih peuh ka ngaihtuah kha mawkmawk hi.

Innsung a ka chair ah kingai kawm in ka ngaihtuah nilouh hi. Huchia lungsim khoihtak a omlai thakhat in ka phone hong ging a, ka kiguih zozen hi. Kenleng kua amahmah diam aw chih toh “hello” chih ka thuah leh “Mr. Muanpu, tutung a I siluang uh toh kisai in na hong kithuahpih hoih ngai ding ahi. Nang toh Lia Sharon kha hiai case suikhe ding in mohpuakna hong kipe leh chi’n muang mahmah a hong ngen kahi uh..” hong chiphut hi. Ka lungsim kidang huai zozen hi’n ka thei a, kenleng “Sir, hiai case noumah in hong saile uchin ahoihpen zaw diam, kou ka fellouh utoh..” ka chih behlap leh aman “Muanpu, hilou ahi. You are selected” hongchi mawk hi. Hong genbeh a “tumah in na manleh Police station hong zuan ngal ding in kong theisak ahi..” hong chi hi.

Chial a ka ombang in keileng Police station lam ka zuanpah hi. Ahitakin keileng mibang a siamna thupilua nei hikei mahleng India kumpi nuai ah thuguk saipawl khat in kana omkha sam a, huaiziakin hiai thu nakpitaka va nial ding ka utkei hi. Tomchik sung in Police Station ka tungsuk hi. Sappa a seppihte bangzah hiam toh ana om ua, Miss Sharon ngei leng ana tungkhin ahi dinga, ana om hi. Sappa’n “Muan, thanks for coming, hiai ah hong tu ngal in..” chi’n hoihtakin honna vaidawn hi. Thu tuamtuam ka genkhawm ua, huaizoh in sappa room ah Sharon toh ka thum un singpi dawnkhawm in maban panlak ding dan tuamtuam ka kikum ua, huchi’n innlam zuan in ka paiphot uhi.

Sun hun hongbei a, nitak in pawtkhe lou in ka verandah uah keivuak in ka tu hi. Gintak louhpi in Sharon hong hawh a, “UMuan, bang hih e, hong kisa inla misite inn ah va lengkhawm ni..” chi’n hong zawn hi. Kenleng “tangval khat hisam mah vehang va lenkhop ding himah e..” chi’n ka room lam ka zuan a, ka kisa ngal hi. Ka kisakzoh phet in ka nih un lengkhawm ding in ka kizuikhia uhi. A inn uh gamla lou ahihmanin kava tungpah uhi. Leenkhawm hun in innteklamte leh mi tuamtuam apan thugen sauloulou om a, a thugente uh hoihtak in ka nih un kana ngaituak uhi.

Lenkhawmte zou in Sharon a inn uah kava kha a, zingchiang zingkal dak 6:00 a kimu ding, Niangbawi nu leh pate leh Niangbawi van, limlak tuamtuamte etna nei ding chi’n mangpha kikhak in ka kikhen uhi. Ka paikawm in ka lungsim ngaihtuahna a thuk mahmah a, muanmoh sim mawk bang kanei hi, himahleh muanmoh chih mawk a thil hitheilou, a dik ahihngai ahihmanin bangmah gen leh sak leng ka nei utkei hi. Inn ka tun in ka lumpah a, himahleh ka ihmu theikei. Sharon toh ka maban nasep ding uh ka ngaihtuahtuah mai a, ka lungsim bang a kisual tuahtuah hi’n ka thei ahi.

Zingkhua hongvaak a, ka sana ka etleh dak 5:30 ana gingman a, keileng kintak a kihahkhia in Sharonte innlam ka zuansuk pah vengveng hi. Sharonte inn ka tung in amah ana mansiang khinta a, huchi’n ka nih un Niangbawi sulnung suui ding in a innlam uh zuan in ka kuanta uhi.

KHEN NIH NA

Saulou ka painung un Niangbawite inn ka tung uhi. Kong ka kiuh uale anu ahingei dinga nupi khat in kong honna hon hi. Kamsiamtak in “hong luut un chih toh ka tutna ding uh honpe pah hi..” A inn uh ka etvel chiang in a nu leh pate misia a hichih hetkei chih ka musuahpah hi. Niangbawi nu’n singpi khawng hon awm a, huchi’n awl in ka houlim uhi. Banghiam tup nei himahle ung huai thu va panpah mawkle ung denchiang a hoihlou zaw ding ahi chih ka theihman un chiamnuih bang bawlpih in ka nuui zaizai phot zozen uhi.

Huchia ka tutkhawm lai un sam kang thiuthiau upat melsimtak papi khat hong luut a, apa ahingei dinga, ka kiang uah hong tu in hichi’n hong dong hi, “Bawite, nou koi aom e? Non zing hoh na zenzen uh e, bangthu om ahia? Bang na chisim ua?” chi’n hong kan hi. Sharon in hon melhphei gau a, kenleng ka dawngpah hi. “Pa aw, bangthupi lua le hikei, Niangbawi nidang a ka lawmhoih uh ahi a, kou mundang a kava om kal ua vangsiatna ana tuah poi kasa mahmah ua, huai toh kisai a hong pawt hi ung..” ka chih leh pautamlou in a luu asu ngaungau hi. Hong etdan apan a tanu min ka loh ziak uh hia, ahihkeileh alawmte ka hih ziak uhia, apa biang apan khitui hong taakkhe keuhkeuh a, ethaksa kasa mahmah hi.

Sharon inleng a pa lam enphei kawm in “Pa, ama room koilak a, nidang a ka limlaak luite khawng uleh lehkhathon kana kikhakte khawng uh a keem lai hiam ka en ut uh e…” chi’n apa kiang ah hon ngen hi. Apa’n leng “bawite, omlai mah inteh…” chih toh dinkhiat hon thuah hi. Kouleng apaina lam ka zuilut ngal ua, huchi’n Niangbawi room ah hon luutpih hi. A sihnung a room hichia a vuak aom mai ahihmanin a namse sim a, niin le a niin mahmah hi. “Bawite, hiai a singlem chabi ahi a, asung ah avan poimoh teng a keem ding, ana en un..” chih toh hon pawtkhiatsan hi. Kouleng a singlem chabi lapah in ka hong uhi.

A singlem sunga a limlaakte a banban in ka en ua, tunai a alimlaakte tuamkoih in alimluite bel ka koihkiik nawn pah uhi. A lai poimoh kepte ka en ua, muanmoh a banghiam ding thu omlou ahihmanin ka koihkiik nawn uhi. Huchi’n a lim athak deuh ka laakkhiatte uh ka nih un ka enkhawm uhi. A lim kilakna a telmun penpen zongkhe leng a lawmhoihpen hiding ahihmanin huai apan a tangval kizuihpih, ama ngai a aman a ngaihlouh bang leh thil tuamtuam theihkhiat theih ding chih ka tup uh ahihmanin hoihtak in ka envel uhi. Huchi’n a limlaak apan in alawmhoih numei ding a gintak khat leh pasal khat lim kala ua, huchi’n a innsung lam uh zuan in ka pawtkhe nawn uhi.

A limlaak chauh deihkhoplou, anu leh pate mahmah bangle houpih ut kahihman un tut a houlimzek ka sawmlai uhi. Huchi’n kenleng apa kiang ah, “Pa, Niangbawi toh kithuzak louhna sawtta ahihmanin thil ka theih ut uh omzek a, hong kan le ung apoi diam?” chi’n ka dong hi. Apa hong dawng dia kisa lai anu’n ana pautuh a, “Bawite, bang ahia? Ka theihtak un nou alawmte adin bangmah iim lou e..” chi’n hon dawng hi. Huchi’n kenleng “Nu, ahihleh Niangbawi a damlai a kua toh kipawl deuh a, tangval a nei hia?” chia ka dot leh anu hong nui masa zozen a, “a tangval neihlam zaw theilou kahi, huchibangte innsung a kikum kha ngeilou unga, lawm inchu hiai ah ka innkhangte uh nungak Hoihnu toh kipawlden uh ahi..” chi’n hong gen hi. Kenleng tu leh tu ading in hunphot chi in “Nu, ahihleh kouleng hih ding tuamtuam nei kahih utoh kana pai ding ua, awl in kon vakzel ding uh..” chi’n ka nih un ka dingkhia uhi.

Sun hun in Police station ah ka pai ua, huchi’n securityte sawl in Niangbawi lawmnu Hoihnu kava pikhesak uhi. Mel hoihtak a hon theih ding utlou kahihman un amai ka tuamsak ua, huchi’n awl in thudotna kapan uhi. Hoihnu bel lauthawng mahmah in om a, a chii bang liingsim hi. Kenleng “Hoihnu, lau zenzen ken aw, bangmah hon loh hetlou ding kahi uh. Na lawmhoih mahmah Niangbawi sihna toh kisai in thu tamlou kon dong ut ua hilel ahi…” chi’n ka hehnem hi. Sharon amai ah chair in hon tu a, Hoihnu kiang ah “Hoihnu, Niangbawi thahna toh kisai ah a thattu nang thei ahi chih migen kaza ua, huai non hilh ding hon ngen kahi uh. Lau ken, na thugen himhim koimah ah ka pawtsak kei ding ua, bangchihiam a lauhna na neihle leng security honpe lai ding kahi uh..” chi’n hon zedot ta hi. Pau hetlou in bangtan hiam hong om a, kenleng “Hoihnu, na lawm iit takmai mi’n hon thahsak ua, a thattu na gen ngam ding ahi…huchia na gen keileh nang le genkhe dinga hon muangmoh ding ua denchia nangle na lawmnu tuah bangbang tuak thei ding nahi…tu a hunlaitak hizaw ahi..” chi’n ka gen hi.

Atawptawp in Hoihnu leng hong paukhia a, “ken bangmah theilou kahi, a sihni ma in kei vengdang ah ka nupite inn ah ka giak a, amah toh leng kimukha lou kahi uh..” chi’n hon dawng hi. Kenleng dawngthukpah in “Hoihnu, ahihleh huai na nupite inn a giak dia kua hon sawl a, bangziaktak a huaini sese nava giah khiat ahi?” chi’n awl in ka dong thuk hi. Hoihnu leng hong buai deuhdeuh a, “ka nupi damlou a va ompih kahi..” hon chinawn hi. Huchi’n Sharon in, “Hoihnu, tua na gen zaw diklou hive aw, na nupi I sam dia, hiai ah a dam le damlou I gensak diam?” hon leh chih nawn hi. Hoihnu mai bang hong san hiaihiai a, hichi’n hong gen nawn hi, “a damlou lua hilou, hitaang maimai ahi a, a taang ngap taktak kei a ahi..” hong chi leuleu hi. Kenleng “Hoihnu, thil omdan teng ka theihvek nung ua konsap uh ahi a, na zuau gen leh genlouh le theivek kahi uh, huaiziakin thudiktak mah hon gen in, denchia zuau na genleh na awk dia, Jail ah na damsung hon kikhum ding ahi..” ka chihkhum hi.

Bangmah gen thei nawnlou in Hoihnu hon kapkhe gawpta hi. Huchia hon kap tak chiang in Sharon leng hehsim ahi dinga, “Hoihnu, nang bang kineih e, thudik na genkei leh tua na kah banglou dia, a na thuak a na kah ngai ding ahi. Huaiziakin, tu’n hon gen inla, bangmah chi lou in na innlam uh kon zuansak ding uh..” chi’n gen hi. Hoihnu in “ken bangmah theilou taktak kahi…” chi’n hon dawng nawn hi. Kenleng “Hoihnu, bangmah theilou na hikei a, bangkim na thei, hilele a gen utlou maimai nahi. Huchia na gen utkei taktak leh ken thudik kon gen dia, nang kon soisa ding ua, huaizoh na damsung Jail ah kon khum ding uam..?” chi’n gen ding in ka noh hi. Ka thudot tuung utoh teh in a melpuak leng a kilamdang mahmah ta hi. A sou ka khoihsak a, a kin deuhdeuhta hi. Ka thudot uh hon dawng ngeilouh chiang in kenleng chiangpum khat la in a kiang a table nakpitak a ka sat leh a lau mahmah mai hi.

KHEN THUM NA

Hoihnu in aw liing pelhpelh kawm in hichi’n hon gen hi, “heutute aw… ka taktak mah ahi, ken theikhalou mah kahi…” hon chinawn hi. A tak theihsuah hinailou a, a thattu theidia gintak thu hiphot ahihmanin nakpitak a soisak ding ki utlou ahihchiang in hichi’n ka leh dot thak hi. “Hoihnu, thudik lah kithei veve ahihmanin na gen leh genlouh thu hinawnlou in mat ding teng leng kitheivek hi. Himahleh tun bangmah kon loh naikei ding uh. Thilkhat hon genlai in, a ngaihzawng hinkhua toh kisai…” chi’n ka dong hi. Hoihnu inleng “tulel in ngaihzawng a neikei, himahleh khogaalte tangval amin Lunpu kichi khat inbel angai mahmah, a agen gige, hilele Niangbawi nu leh pate’n a deihsak kei uh..” chi’n hon gen hi. Huchi’n kou leng Sharon toh huaipa address teng ka kankhia ua, huchi’n Hoihnu kiang ah “Hoihnu, khatvei kon samthak ding uh, thutak genna hun konpe lai ding uh, tun kon kha phot ding uh..” chi’n Security te a inn ua ka khasak uhi.

Gim leng kigim thou ahihtoh Sharon toh innlam paiphot ding ka sawm uhi. Huchi’n kou leng ka paitou ua, innlam paisuak ngal ka sawm hang in Sharon toh Lunpu tungtang kikup zek ka utman in Sharonte inn ah ka baang tou hi. Singpi khawng dawn kawm in ka houlim uhi. Kouleng tangtak a Lunpu vamat sang in a khua uah hun saukhop vazat a, thil omdan theihchian zawk ding lem kasa zaw uhi. Huchia thutanna ka lak zoh un ka kikhen ua, keileng innlam zuan in ka paipah vengveng hi.

A nitak in Sharon kava tawn a Niangbawi nu leh pate houpih himhim lai ding chi’n kava kuan uhi. A nu leh pa leng ana om banah a tanaute uh papi nih leng ana om uhi. Kenleng Niangbawi pa kiang ah, “Pa, Niangbawi sihna tungtang ah, ka lawmhoih mahmah uh ahihtoh ka pawna lua ua ka om thei kei uh. Nou muanmoh khatbek ana neikhalou umaw?” chi’n ka leh dotta hi. Niangbawi pa’n leng “Bawite, muanmoh chih mawk ding leng theilou hive ung aw, huai ah khogalte tangval Lunpu kichi khat toh a kithuah zel ua, himahleh khamtheih hailua a a kithuah ding ka kham uh, huaiteng kan gen ding ka thei tuankei…” hon chihsan hi. Sharon toh ka ki-entuah ua, theih ut teng thei mah ka bang ua, thu tam dong nawn tuanlou in ka pai uhi.

Nitak hunte hongbei a, zingkhua hong vaak nawnta hi. Sharon toh gari khat ka la ua, van hunkhop pua in khogal lam zuan in kapai uhi. Lunpute khua pen gamla lou ahihmanin ka tungpah ua, hotel khat ah ka kinga uhi. Ann leh thil tuamtuam ka sai ua, huaizoh in innluahna ding khat ka ngaihtuah uhi. Hong lem kawikawi chih ding ahidia innluah ding inn hoihtak khat bang kamu ua, ka van teng uh ka lem pah uhi. Khomite khawng in nou nupa maw chih bang in honna kansek ua, koubel unau kahi uh, nekzonna nop na munmun a kituan vialvial kahi uh chi’n ka khem thoh zel uhi.

Ka omna bang uh hong kichian chiang in Lunpu kua hi a, mibangchi bang hi hiam chih kon zong nawnta uhi. A inn uleh a nu leh pa bang ka thei pah vanglak uhi. Hiai teng mai a hunlou ahihmanin Lunpu lunglut lam ka kansui nawn ua, Carrom lunglut mi leh zu duh mahmah ahi chih ka thei uhi. A khosung ading a mihat mahmah lawi ahihmanin mite’n alau un a huphulh thei mahmah uhi. Nikhat, a inn ua kava hoh uale amah kia ana om hi. Hoihtak in ka houpih ua, a lunglut lam thei kahihchiang in kenleng “Lun, khatvei hon hoh ve, ka u sepaih pang om a zu bangle na chep utleh, carom khawng I kaap khawm kawm dia…” chi’n ka dawp hi. Huai ka gen leh a maisuah hong kilamdang hi’n ka thei a, aman leng “Nitak chiang in kon hoh di aw…” chi’n hon nuihsan hi. Kenleng chiamnuih thutak in “hiai ka naunu Mawite le helkawm thei di neivele…” chi’n ka chiamnuih a, aman “eh, nou nupa hilou a unau maw? hon leh chih a, kenleng “Unau kahi uh, mi’n nupa ngen khawng honsa ua nuam zozen lou ahi..” chi’n ka nui khauhkhauh a, huchi’n awl in ka kikhenta uhi.

Inn ka tunphet in Sharon toh nitak hon hoh ngei lamen ka hihman un ka kithuahpih ding dan uh hoihtak in ka kikum uhi. Ka hih ding dan tuamtuamte uh ka genkhawm zoh un mansa diam in ka om ua, nitak dingkal ngak lel kahita uhi. Kenleng Pistol khat kem kahihmanin hon buaihuai khak aleh chi’n hoihtak in ka puankawm a ka kem hi. Hoihnu gendan leh a khote gen dan bang ka bulh tuahtuah ua, hi ngei ding in lametna liantak ka nei uhi. A lem leh hun tomchik sung a ka mohpuakna uh zou ding ka hihman un ka kithalawp mahmah uhi.

Nitaklam ann te nezou in khua mial ding in hon kisata hi. Huchihlai in ka gintak mah bang un Lunpu amah kia a kou innlam zuan a honpai ka galmuh ua, Sharon toh kana kiguk pah mahmah uhi. Inn hon luut in hoihtak in kana vaidawn ua, “kare, khothakte theihlah kinei taktak nailou a, nang hon kithei masa hon kingaina mahmah e…” chi’n Sharon in kamsiamtak in ana vaidawn a, Lunpu leng kipak mahmah ahihdan ka thei uhi. A khamlouh a thil dot ka utlouh man in kenleng “Lun, carom I kaap kawm dia dawn cheuh leng banga…” nuikawm a ka chihleh, aman leng “huaimah aka I ut, khosung a hichibang a mi kiphal leh nuam omlou a haksa lua ahi…” chi’n hon leh gen hi.

Zu dawn kon panta ua, kei apen tui tampi toh helsa, ama apen azu taktak siang ngen pia kahihman in hong khamsim pah a, hong pautam hiaihiai ta hi. Huchia hon pautam chiang in kenleng awl a pat sawm in hichi’n ka gen hi, “Lunpu, ka hinkhua taktak hon genleng non iim pih zou diam, lawm ginom di’n kon muang mahmah a, thuguk leng hon hilh utvek kahi…” kachih leh a kipak mahmah a, a carom kaap bang khawl zozen in ka nung hon beng khauhkhauh a, “lawm aw, hon gen in, nang a na nana chu iim di himai, nang hon banghiam aom lele sih ngam a pang ding kahi…” chi’n hon genkhum hi. Kenleng thil awlawl a pat sawm in pan konla taktak ta hi.

KHEN LI NA

Keileng awl a hem dot kon kipanta hi, “Lun, ka lungsim nuamlou mahmah khawng om a, mi muanhuai lah kitheilou a, kigenkhe ngamlou, banah hiai ka naunu le huchi bok, huaiziaka ka omna bang uh ka kituantuan mai uh ahi…” ka chihleh hong phur mahmah a, “eh, bangthu a, nalam ua pang kahi, koimah ale ka genkhe kei ding, hon hilh aw… tha sen a ngaih lele tha seen ding himai…” hon chi hi. Sharon leng thumu kisasim ahidiam awl a ka kiang ua honpai in Lunpu kiang ah, “Ulun, bang na deih omlai hia?” chi’n nuihmai kawm in hon dong a, Lunpu inleng “om nawnkei phot, kifuh hun mahmahta, nou unau kha nuam mahmah neive ua….nou adi’n chu bangkim ah ka kiman gige ahimai..” chi’n hon kipumpiak bawl mahmah ta hi.

Ken leng a liang ka beeng a, hun paisa ngaihtuah vengveng hileng kilawm deuhmai in, “Lunpu aw, nikum lama Shillong ah lawmte numei khat that kha inga huainung ka lungsim nuam theilou, ka diip kuakua mai ahi.. koimah a zaw hon genkhiat sak hetken aw…” ka chihleh hon en a, “eh, huaibang lungkhamna ding om amaw…pasal hihna alel vele..” chi’n hou deuh in hon laaksak hi. Huaiphet in Sharon in kamsiamtak in “Ulun ei, hichibang hinkhua ana zangkha theilou maw, na theihleh ki-omkhawm henla anuam ahak bang kithuak khawm leh…” chi’n Lunpu khut hong leen a, Lunpu leng kipak petmah ahidia, nuikawm in Sharon en a, “theimah ing, hilele tu’n kon gen naikei dia, awl in hon hilh ning..” chi’n pautam nawnlou a dingkhia in innkong lam azuan vengveng hi.

Zankhua in ka ihmu theikei ua, Sharon toh maban pan lak khawm ding dan ka kikum nilouh uhi. Maban bangchi sawn ding, zingkhua hong vak leh bangchi bang a panla ding chih khawng ka buaipih mahmah uhi. Lunpu bel ka ginglel mahmah ua, himahleh a thu chiang bangmah omlou a mat theih mawk hilou ahihchiang in a kam mahmah a thupawt zaak teitei ka ut uhi. Ka kihouna himhim uh record hoihtak a bawl kahihman un kamkhat a genkhiak khak nakleh chu panlak ding dan ka thei mahmah zel uhi. Huchia ka houlim nilouh sung un zinglam dak 2 bang gingman ahihmanin khuavak hun apan ka plan lak ding dan teng uh genfel in ka kou lupna tuak ka zuan uhi.

Ihmut ka sawm chiang in ka ihmu theikei a, ka lungsim peuh ah Sharon itna chii hong kituh khawng hileh kilawm in Lunpu tunga nasep ding dan ngaihtuah hun khawng bang in Sharon peuh hon suak thepthup zel a, kuamah muh hetlou in lupkawm in keivuak bang in kana nuikha heuhau zel hi. Ka ngaihtuahna ah tualthattu zong dia kuan, tualthattu toh kiiklou in zi peuh toh kikiik leh sungkuante’n lamdang honna sa zozen ding uh e….chih peuh ka ngaihtuah a, keivuak a nuikhop in khua hon vak loh hilhel hi. Huchia ka ngaihtuah bang a Sharon inleng honna ngaihtuah eide aw peuh ka chi a, zingkal hong thoh phet in “Umuan, zannitak ka mang a ei ana kingai…” chi’n hong nui selsal a, kenleng atak ale I kingaisim a eidiam maw chi’n ka leh chiamnuih hi.

Huchia ka kichiamnuih zoh un kihahsiang in bazar lam ah meh ding khawng lei in kava kizuikhia uhi. Lampi ah bangbang hiam khawng ka gen khawm ua, kichiamnuih in ka nuui ek-ek uhi. Lamdang bang kasa zozen a, nidang a ka kihoupih ngeilouhdan un ka kihou mawk ua, nidang a nungak-tangval et aleng ki-en ngeilou hinapi ka ki-etdan uh hong tuamguih mawk hi’n ka thei a, akallak ah ka nuihza a, a kallak in lah lamdang peuh kasa thepthup hi. Huchia ka paipai lai un bazar ka tungguih ua, meh ding tuamtuam khawng en in innlam zuan in kapai uhi.

Ka theih hetlouh lai un ka kal uh iitna chii ana kituh om a, ana poukhin dimdem maimah ahita hi. A ni-ni in ka ki-itna uh alian semsem a, khat omlou in ka om thei nawnta kei uhi. Himahleh hiai khua a zawlthu gen dinga hoh kahihlouh dan uh ka thei tuak ua, ki-itna thu himhim ka gen hetkei uhi. Ka lungsim ah ka thilsui uh zoh hunhun in Sharon kiang ah ka iitna thu ka gen ding chih ka tum tinten ta hi. Hiai ziak mah ahingei dinga ka thilsai uh thil haksapi himahleh ka kithalawp deuhdeuh uhi. Ka lungsim tawng in ka thilsai uh ka lohchin hunhun uh Sharon ka propose ngeingei ding chi’n ka thupuk hi.

Suun hun hong hita a, Sharon toh plan dang khat ka bawlthak uhi. Huchi’n khosunga tangval suanhuai, thuguk iim siam mahmah dia lamet leh Lunpu nasan in ana muan mahmah mi khat ka zongkhia uhi. Theih leh muh haksim mahleh a tawp in Lianpu kichi khat ka mu ua, inn a sam in ka houlimpih uhi. Ama theih dia kilawmtan ka genzoh un hichi’n ka sawl uhi. “Lunpu kiang ah nava hoh dinga, akiang ah tunitak na inn ua na giahlouh ding, koimun hiam na muan deuh, huai hong teengthakte inn lak khawng ah va giak in, Policete’n nang hon zong uh ahi..” chih gen dingin ka sawl ua, aman leng thumangtak in ka gen bangbang uh lem hon sakpih a, Lunpu kiang a gen ding in a innlam uh a manoh pah vengveng hi.

A painung in Sharon toh ka ki-entuah ua, ka nuizel uhi. Ka thilsui uh zohkhiat teitei ut kahihman un ka hahpan tuak mahmah uhi. Huchikawmkal ah nidang banglou deuh a itna mit toh ka ki-etziak uhiam ka zum tuak zel ua, hunpaisa bang in ka kineel nawnkei maimah uh abang hi. Ken ama mitmei ka veen na zah sang inleng kei mitmei hon veeng zaw hi’n ka thei a, lungsim guuktak ah ka kipahna a lian mahmah hi. Nitak hong hizok henla, Lunpu hong giak henla, thil omdan kisuikhe meng leh chih bang ka ut petmahta hi.

Sunni hong tum in khua hong mial nawnta hi. Ann bang nepah zozen in Lunpu hong hoh ding ka na ngak uhi. Ka ngaklah deuh ziak uhia sana bang ka enen mai uhi. Himahleh zan dak 8:30 tan aleng amel ka muhlouh chiang un ka lungsim khat uh abuai mahmah a, thil houh theihna tan chiang nei adiam maw, chihpeuh ka ngaihtuah uhi. Sharon ka en a, chiamnuih thutak in “Sharon, I thilsai lah suikhe ut ing, nanglah hon…” ka chihpat leh kong hon ginga, ka kilamet luat nawnlouh nung un Lunpu lauhmeltak in hong luut thalthal hi. Kouleng a thei hetlou dan in lamdang sak chikawmtak in Sharon toh kana en ua, hoihtak a vaidawn in singpi bang kana dawnsak uhi.

Lunpu in hichi’n hon gen ngal hi, “Muan, tunitak non giahsak uh ngai ding eive… Police te’n hon zong chimawk ua..” hon chi hi. Sharon toh ki-entuah in ka kimelh gaih ua, ka thilsawm uh paidik dekdekta chi’n a guuk in kana kipak mahmah uhi. Kenleng Lunpu lam ka nga phei a, “Lun, ei tegel kal ah hon genve, bang hihkhelh neikha e…” ka chihleh, “Muan, tunitak zaw ka lung noplouh toh bangmah kon gendah ding, hehpihtak in hon theisiam un, saupi thu ahihmanin awl in tunitak non hutkhiat theih ngeingei ualeh zingchia chiangtak in kon hilhvek ding..” chi’n hon chiam a, tutna tunga lumsuk in bangmah kallou in hong ihmu hiau mai hi.

Sharon toh genbeh ding tuan ka theikei uh. Lawmpa lah nakse doldolta ahihmanin pautam vetlouh a hon chiam banga zingchiang a thil omdan hon hilhvek ding ngak ka sawm maita uhi. Huchi’n kou leng puanphah khawng bawl in lup mai ka sawmta uhi. Lum dia ka kisak in Sharon in chikmah a kazak khak ngeilouh, za dia le kana kinep hetlouh a kamdam tawp in “Umuan, mangpha hoihtak mai…..lungsim teng toh..” chi’n nui hiuhiau kawm in hon khak a, keileng kipak law petmah “Sharon, nangle aw…” chi ut selua “Sharon, keile…” khawng ka chi kha zozen hi. Huchi’n ka lum ua, himahleh ka ihmu thei vetkei hi. Ka lungsim tawng in bangteng hileh pautam nawnlou a Sharon kiang a ka itna simthu leel mai ding adiam aw chih khawng ka ngaihtuah nilouh hi.

Ziinglam khua hong vaak ding hita chih in ka ihmu theipan hi. Ka ihmut nuam mahmah ahiding a khanglou hetlou in dak 8 tan bang ka ihmu suak hi. Ka khanloh phet a ka etleh Sharon leng ana ihmu lai zomah a, himahleh Lunpu pen muh ding in ana om nawn takei hi. Kintak in Sharon ka phawng a, innkong lam bang kava en ua, himahleh muh ding aom nawnkei. Inn ka luutkik un kongkhak bul ah lai kizep nih ana om a, kenleng kintak in kala hi. Khatpen Lunpu gelh ahi a, hiaiteng kigelh hi “Muan, khovak phet in kana pawt a, gamlak lam ah kava om dia, nitak dak 9 vel in inn kon zuan nawn ding…” chih teng kigelh kamu a, ka lung anuam tuan mahmah hi.

Lehkhathon khatpen ka etleh Police Officer pa’n hichi’n hon gelh hi, “Mr. Muan leh Miss Sharon, bangteng hileh innlam ah honpai phot un, na thilsai uh zekai kasa a, midang khut ah mohpuakna piak ahi…” chih teng ana om hi. Sharon toh ka en ua, poi kasa tuak petmah uhi. Himahleh kou hihtheih bangmah omlou ahihchiang in chi’n ka van teng uh ka bag uah ka guang nawn ua, a poimoh hihfel ding teng ka hihfel uhi. Huchi’n Police pa’n gari khat hon sawl hon tunga, ka vante guang mengmeng in pai ding in ka kisa uhi. Ka pai ding kuan un Sharon toh ka ki-entuah ua, mittui lamlam bang hon luang mawk hi. A khua nopna ding bangmah ka theikei uh, himahleh kou ki-it guk tuak ziak ahidia ka khelah mahmah uhi.

Gari sung ah Hoihnu ka tung ah hon kingai a, kenleng hoihtak in kana kawi hi. Itna simthu ana leelkha naikei mahle ung ka lungsim tawng tuak un ka ki-it in ka kingai tuak mahmah uh chih haihvual ahinawn kei hi. Gari sung banga itna thu gen pat mai ding eide aw, chih bang ka ngaihtuah hi. Ka thilsai uh nasan ka lungsim ah alang nawnkei a, Sharon kia hong kilang den maimah ta hi. Huchia nuam satak mai a gari a ka tuankhawm nung uh sawtlou in inn ka tung uhi. Sharonte inn ah hon paipih masa a, huchi’n kou inn ah gari pu pa’n hon kha hi.

Sharon in “UMuan, nitak chiang a non pawt teitei ding, lungsim a om tuamtuamte houlim ni..” hon chih ka bilkha ah mang theilou ahihmanin nitak hun ding bang ka ngaklah mahmah mai hi. Kisil in ka kihahsiang a, huchi’n nitaklam ann nek ding ngak in ka room ah ka tu hi. Ka ngaklah mahmah ziak ahingei ding a sawt bang kasa mahmah hi. Himahleh bangmah kallou in ann konne ua, ann nezou khua bang mial ding a hong kisapah ahihman in keileng Sharon kiang hoh ding chi’n nidang bang hetlou in ka van hoih penpente silh in siangthoutak a hoh ding in ka kuankhia hi.

Lamkal bang a kithalawp mahmah man ahingei dinga, ka kin mahmah a, hon mukei mahle uh ka tuah teng bang ka nuihsan heuhau kha zozen in ka om hi. Huchia sawtlou ka painung in Sharonte inn ka tung petmah hi. Kenleng kong ka kiu pah hi, Sharon nui hiuhiau kawm a honna vaidawn ding ka saklai in anu hon pawt a, “Eh, Muan lah nahi a, tunitak ana theisiam mai inla awl in hon hohthak in, pasal neihsak sawm unga, tua inndongta houlimna neilel kahi uh..” hon chiphut a, ka diip bang hawm huai zozen abang hi. Ka tha teng bei in ka dinna mun a kipuksuk ding ka bang hial hi.

KHEN NGA NA

Kenleng bangmah gentam tuanlou in innlam ka zuan hi. Ka thilsui uh zousiang manlou a sepaih sappa’n midang khut a mohpuakna pekhe phot ahihmanin Sharon ka muhna ding hun a tawm mahmahta ding chih ka haih hetkei hi. Haksa kasa mahmah mawk a, lah kei bawl a phathei ding bangmah omlou ahihmanin awl a lungkimdan siam ka mohpuakna hong suaknawn mai hi. Alehlam ah Sharon ka ngaihtuah chiang in amah bang inleng nuam asakei ding genlouh a ut lah ka gingta kei hi. Himahleh ama lemsakna tellou alah hiaitan a tung bang uh gintak haksa kasa mahmah zel hi.

Zankhua a ihmulou hial a Sharon tungtang ka ngaihtuah nung in zingkhua hong vaak khongkhongta hi. Nidang hun ihmut theihni chiang a zaan tom kasak mahmah tu in lunggimna zanmial chu a sawt khopmai… Khua lah vaakta ahihmanin keileng bangtak a pasal chi’n ka thoukhia a kisuhalh in zingkal news ka sim hi. News ah “Niangbawi sihna tutan suikhiat ahihlouh ziakin team dang khat hiai toh kisai kinohtak a suikhe ding guanthak ahi…” chih kamu a, ka lungsim a nuamsak kei semsem hi’n ka thei ahi. Aziakbel ka mohpuakna khat zou zoulou hi a ka kingaihsun man in.

Huchia lungsim nuamloupi a ka verandah ua ka tutlai in ka ui un gate lam nga in a haam ekh-ekh a, ka etleh gintaklouhpi in Sharon hong luut hi. Kenleng a tutna ding pia in innkong ah ka nih un ka tukhawm uhi. News a thu kigelhte khawng ka simkhawm ua, nuam kasaklouh thu bang uh ka genkhawm uhi. Huchia ka houlimlai un Sharon in kisuanlah meltak in “UMuan, zannitak ka inn ua nana hoh chih ka thei a, I kimuhlouh poi kasa mahmah. Kei utna leh theihna tel hetlou in ka nute’n pasal hon neihsak sawm uhi. Ka pasal ding leng hoihtak in ka theikei, amin ding Mungpu ahi.. himahleh ken ka theihtawp suah in ka nial a, huchi’n awl a kihouthak ding chi’n ka nute’n hon thupuksak uh…” hon chi hi. Keileng poi kasak thu ka gen a, lah ka lungsim guuk inbel kana nui heuhau hi…

Hunte hongpai liam zungzung a, Sharon toh leng nidang sang mah in ka kipawl tam zawta ua, ka kal ua genkhiatlouh itna leng a lian semsem hi’n kamu ahi. Huchi kawmkal ah Niangbawi sihna toh kisai in muanmoh pasal khat aman uh chih thu ka zak man un Sharon toh Police station lam kava zuan uhi. Thudotna room ah thu adong ua, a soisa ekh-ekh uhi. Etmai inleng a hehpihhuai mahmah, pasal toupi naa sa a kap zak chu ahak mahmah. A mimat pen uh adik leh diklouh thu theih ahihma in anak thuak mahmah a, ka lungsim guuk in amah taktak hile soisak behlai le uh adam nawnkei ding ka chi hi. Court khawng ah adingsak ua, himahleh a mimatpa pen un “kei hilou kahi, Niangbawi toh bel kithei ung, ahihhang in ken theikhalou asihna…” chi’n apang tinten hi. Siampu akha asim Jail ah akoih ua, achang in soisak aom in achang in Court hohpih in a omsek hi. Himahleh Siampu bel apanna ah apang den a, aloh ding dan leng a thei nawnkei uhi.

Kha bangzah hiam zohtan aleng tualthattu diktak muhkhiat zoh ahihnailouh manin sepaih sappa leng a lungbuai sim mahmahta hi. Siampu lah hilou chihlouh bangmah gen ding thei tuanlou ahimanin. Nikhat Sepaih sappa apan lai kamu a, kenleng hong in ka enpah hi. Hichi’n asung ah ana kigelh a, “Mr. Muanpu, I thilsui uh thudik theih ahaksa mahmah mai a, hehpihtak in khatvei Sharon toh hon kipanthak lai un..” chi’n ngetna honpia hi. Kenleng linsim mahleng ka thilsui zoulou a tawpsan ding ka utlouh banah Sharon toh ka kimuhtheihna lampi hoihpen uh ahihmanin lem kana sapah hi. Ka lai ka muh zohphet in Sharon kiang ah kava taisuk pah a, thil omdan teng kava genleh aman leng lem ana sa mahmah a, ka lawmta un ka guuk kipah mahmah uhi.

A zingnawn khua hong vak phet in Sharon toh gari la nawn in ka paina munlui lam uh zuan in ka kuan nawn uhi. Nuam kasak tuak mahmah man uh ahingei dinga amun bang ka tungbaih mahmah uhi. Ka innluahna pen uh leng vangphathuaitak in ana awnglai a, huaimun mah ah ka kinga uhi. Ka tunnung uh sawt hetlou in Lunpu hong hoh a, “kare, nou tegel bangmah genlou a innlam nana gukpai uh, nitak na liau uh ngai inteh…” chi’n hong gal chiamnuih a, kouleng “eh, lun hon genkhalou keimah ve ua, nitak hong pawt nawn in aw…” ka chithuk hi. Sharon toh ka kihahsiang ua, innsung khong susiang in ann ka huanpah uhi. Nitak Lunpu hong hoh nawnleh bangchi banga houpih ding chih khawng ka kikum uhi. Huchia ka buai vengvung sung un ann nek hong hun a, ann ne in ka tawldam uhi.

Sawtlou kal in muikhua hong zing a, huchi’n zankhua mial ding in kisa nawnta hi. Ka nih un Lunpu hong pai ding kal ka ngaklah mahmah tuak ua, innkong lam a ginteng bang in ka daak khepah gagaih uhi. Huchia ngaklahtak a ka omnung uh sawtlou in Lunpu hong pai khongkhong hi. Hong luutphet in Sharon toh hoihtak in kana vaidawn ua, amah leng kipah chi mahmah mai hi. Sa meh kahihman un annkhing peuh ka nesak ua, nidang sang inleng hong innkuan bawlzaw leh ka inn uh ngaina zaw hi’n kamu ua, koubel ka kipak mahmah uhi.

Saulou thu vantang gen a ka houlim zoh un ka thilsai thu uh pan utnawnta kahihman un zu ka puakte ka lakhia a, Lunpu a deih dandan a sung din ka hilh hi. Amah bel bangmah theilou in a kipak mahmah hi. Nou bangzah hiam hon dawnkhit in a aw bang hong ngaihpanpan ta a, Sharon toh ki entuah in pat pih ka sawm uhi. Huchi’n kenleng nidang a thil haksa kana tuah, gamsung deihlouh thil kana bawlkhakte khawng ka genpih masa hi. Amah tangtak in dong mawkleng denchia hoihlou ding ahihmanin. Ka thugen teng Lunpu in hoihtak in ana ngaikhia a, ka gen ding teng ka genzoh in a lu su ngaungau zozen hi.

Huchi’n Lunpu’n ka liang ah akhut hong koihtou a, “Muan, nalam a pang ding kahi, kuamah lauh neiken…” hon chi hi. Kenleng “Lun, kipahhuai mahmah e… nang ana tuakkha nailou maw?” chi’n ka leh dotta hi. Huchi’n Lunpu hon paukhe nawn a, “Muan, ken leng ana tuakmun lawta kahi, tualthahna tanpha ah sum deihman a ana kigolhkha munsimta kahi…. Hon gen ning maw……” hon chi a, Sharon toh kipaklua kahihman un kana kiguuk melh gaih uhi. Huchi’n Lunpu in……………

KHEN GUK NA

Huchi’n Lunpu in ka mai hoihtak a hon en kilkel kawm in, “Muan, sawtlua leng pai nailou in maw….” honchipan kong hon kikiu a, ka thugen uh ka sunzom thei nawnkei uh. Papi bangzah hiam hongluut ua, kuate eide aw chia hoihtak a ka etleh Sharonte inndongtate ana hi maimah ua, ka lungsim tengteng hong buaizou hi’n ka thei. Ka gen ding leng ka theikei a, bang hon hihsawm himhim uh eide aw tu zan nungnung in chi’n ka ngaihtuah khop hi. Khualzin dek a gari uh sia a hon giahsawm uh hia, ahihkeileh innlam a thusia om a hon zan pai uhia chihpeuh ka ngaihtuah a, ka lungbuai mahmah hi.

Huchia ka omlai in alak ua papi khat in keilam hong enphei a, “Muan, lungnoplouhna in ngai kenla, na lawmnu Sharon a nu leh pate deihna bang in innlam hong zotkiik phot ngai ding ahi..” chi’n hon gen hi. Kenleng “Pa aw, nou a nu leh pate’n na lem geel dandan uh himai lou ding hia, himahleh ka nasep uh zoudeklou a hiai bang thil hong ompen chu poi kasa mahmah..” chi’n ka genthuk hi. Sharon ngei inleng hitheilou ding ahihdan gen mahleh a innkuan lamte’n a gen teitei ziak un sel zou nawnlou in mittui luang zungzung kawm in a vante guang in pai ding in a kisa uhi.

Sharon in hon paisan dek hial chiang in haksa kasakna hong lian semsem a, gate tan kava delhzui a, himahleh kamkhat lel gen ding leng ka theikei. Mangpha leng ka khak kei, himahleh a tum matan ubel gate a ding in ka gal-et den hi. Huchimahbang in Sharon inleng hon khelah law mahmah ahingei dinga, hon kinunghei den hi. Himahleh a tonpihte’n a khut langkhat tuak a leen uh ahihmanin kiik ut leleng hong kiik thei ding vual ahinawn takei hi. Kei leh kei bang ka kimohsak mahmah a, bangziak a ana phallou ngamlou ka hia peuh chi in ka kihehsan semsem hi.

Awl in innsung ah ka luut a, Lunpu ana omlai ahihmanin zu lakbeh in ama a dawn tam ngeilou himahleng ka dawn ekh-ekh tamai hi. Ka thugen uh sunzom ding in ka kisa nawn ua, kenleng Lunpu kiang ah, “Lawm, den a na thilgen dek pen lakloh salua hive ing aw…” chi’n nuikawm in ka gen hi. Lunpu inleng “den a papi honte mawngmawng ana vuakdia hoih uh, mi thugen teng hon subuai zomah uh..” chi’n a hang phanphan hi. Ken bel ka lungsim guuktak in tunitak mahmah a thilteng theihkhiat a zingchiang a innlam pai a thuchian leh chianlou Police a report ngal ding chih ka tum tinten hi.

Huchi’n ka houlimna taktak uh panthei ding in ka omnawnta uhi. Lunpu in hon sunzom nawnta a, “Muan, sawtlua pai nailou in ka lawmpa lawmte Siampu kichi khat in sum cheng 20,000 honpia in nungak Niangbawi kichi hiam khat that ding in hon sawl a, kenleng huai va that kha kahi..” hon chipah hi. Ka thutheih utpen theita kahihman in ka kipak mahmah hi. Hon genbeh lai a, “huai Niangbawi kichi nu toh Siampu pen ana kingai ngei ahi ua, aguuk in khamtheih zuakkhawm zel uhi. Himahleh Niangbawi hon piangthak a, huaiphet in hong kikhen uhi. Hong kikhen chiang un Siampu in milak a akhamtheih zuaklam a genkhiat khak ding laulua ahihmana hon thahsak ahi.” Chi’n hon genbeh lai hi. Kenleng, “Lun, poina e maw, huai Siampu kichipa kua a?” chi’n ka dotbeh hi. Aman leng “Nou khote mah ahi, tukha hiam a zi neidek chi zomah uh hilou amaw…” chi’n hon leh hilh hi.

Ka lungtang asou deuhdeuh maita hi. Lunpu tung aleng ka hehkei, himahleh Siampu thilhihvek ahi chih ka theih mahmah manin ka hehna a uangkhol, a ziakbel Sharon pasal ding ana hi zomah lai a. Siampu I chih mihausa mahmah khat ahi a, nungakte ngaihsang mahmah ahi. Sepna neiloupi a hausa mahmah ahihmanin sawtpi apan kenleng kana muangmoh mikhat ana hi a, a thuguk teng theita ka hihman in ka heh mahmah hang in ka lungsim khat chu a nuam mahmahta hi. Lunpu toh thil omdan, a paidan tuamtuam tampi ka kikup beh ua, kenleng ka uplouh leh ka gintak louh dong thil tampi ka theihbeh hi. Zan leng sawt gawpta ahihmanin ka kikhenta uhi.

Lunpu a paizoh phet in inn ka hahsiang a, ka vanteng guansa a koih in huchi’n lum din ka kisa ngal hi. Ka lupkawm in Lunpu toh ka kihouna uh kana record guuk teng ka ngaithak vek a, lungtun huai kasa mahmah hi. Huchi’n thildang ngaihsak nawnlou a ihmut mai ding ka sawmta hi. Himahleh ihmut theihna ding vual ahikei, ka lungsim ah Sharon hon kilang deuhdeuh mawk a, ka ngaihtha bang asuak mahmah mai hi. Zan teng a ka pam a lum a, lupkawm a kihoulim sek lai ni bang ka phawk a, thawmhau ka kisa mahmah hi. Siampu toh ana kiten man khak ding bang uh kalau mahmah a, kintak a innlam delh ding chihkia ka lungsim ah hon suak hi.

Theihlouh kal in zingkhua hong vaak a, kintak in gari la in innlam ka zuan hi. Inn aleng pai masa lou in Police station lam kava naih hi. Dak 9 bang gingta Police sappa hong tung naikei a, ka kinoh toh ka lungbuai mahmah hi. Sawtkhoptak ka ngak nung in hon tung thei khongkhong a, huchi’n thil omdan teng ka gen sipsip hi. Ka gen zoh in Sharon minhoihsak sawm teitei kahihman in sappa kiang ah, “Sir, Sharon hongpai theikei a, himahleh aman recording ana bawl om ahi…” chi’n ka kihouna teng uh a record ka ngaisak vek hi. Huchi’n sappa bang inleng lungtun huaile chiang huntawk asa mahmah a, a lu su ngaungau in thilsaipah ding dan hon genpih a, ka man un kenleng innlam zuan in ka paisan vengveng hi.

Inn ka tun in ka nau kia ana om a, kenleng “Nau, I nute lah koi ahoh uh a?” chi’n ka kanpah hi. Ka nau inleng Sharon ka ngaih mahmah lam theilua ahihchiang in hon gen ngampah kei a, atawp in “Umuan, u Sharon maw amah utlou a Siampu toh tuni a kitengsak uh, I nute leng moukhakna lam a hoh uh..” honchi a, ka diip bang hong phuzut hi’n ka thei ahi. Ka gen ding ka thei nawnkei a, kisil leng kisil sianglou in lupna tung ka zuan ngal hi. Pawna law mahmah kahi ngei dinga, zankhua in khophawklou in ka lumsuak hi.

Zingkhua vaak in vasate hong haam chiaichiai a, keileng khanglou phut in ka thoh touh leh ka lupna ah kana lum a, lamdang bang kasa zozen hi. Kintak a thoukhia in kava kihahsiang hi. Ziing singpi dawnkawm in news ka en a, a page masa headlines ah liantak mai in “NIANGBAWI SIHNA SUIKHIAT HITA, A SIHNA TOH KISAI IN KHAMTHEIH ZUAK A MIHAUSA SIAMPU MAT IN OM..”  chih kigelh kamungal a, ka lungsim khat in ka nui heuhau ngal hi. Himahleh a lehlamtak ah Sharon ka hehpihtha asuak mahmah zel hi. A nuailam ka sim suksuk leh Police te’n Siampu te inn ah khamtheih tampi va mukhia uh chih bang aom zomah a, huai in ka thilsui dikna hon phoulak semsem ahihman in ka lung anuam mahmah hi.

Ziing hunte hong bei a, ann khawng konne hi. Ann nezou bangmah leng hihman nailou in laikhat kamu nawn a, ka etleh “Muan, Police station lam hon zuan in, na thilhih thupi mahmah ziak in pahtawina hon kipe ding ahi..” chih ana kigelh a, keileng kipahna toh ka kidim hi. Huchi’n kisa mengmeng in Police station lam ka zuanpah hi. Keileng maingaltak in ka luut pah a, mibang ana tam sim mahmah hi. Huchi’n tutna ding hoihtak khat honpia ua, tudia ka kuunsuk chet leh ka paam ah Sharon in a nu toh honna nuihsan cheichai uh kamu a, ka kiguih zozen hi.

Programme honpan ua, sepaih sappa kiang ah ka gen bangin Sharon in ahihlouhna natan ah pahtawina adongkha a, lamdang bang asa sim hi’n kamu ahi. Himahleh mipil ahihziak in ama adia ka deihsak thilhih ahi chi’n a theihsiam chi mahmah hi. Chikmah a hiaibang pahtawina thupi dongkha ngeilou kahihman un nuam kasa mahmah uhi. Kenleng ka nu tonpih kahihman in pahtawina hon piaktak un mipi mai ah “hiai pahtawina sangthei dinga hiaitan honna kol piching ka nu ahi a, ka pahtawina pen ama khut ah kape sawn ahi…” chi’n ka nu mipi mai ah kaleh pahtawi sawn hi.

Programme tengteng zoh in innkong ah singpi khawng dawnkhawm in ka kihoulim uhi. Ka nu’n Sharon nu zawn in munkhat kava pha ding uh chih toh hon pawtkhiatsan uhi. Kei toh Sharon singpi dawn in tutna khat a ka tukhawmta ua, gen ding mel thei leng ka omkei uh. A kitendan uh thuchian lah theilou kahihman in ka dot ding, ka gen ding ka thei mahmah kei hi. Huchihlai in Sharon in “Umuan, non deihsak dan thupi hina maizen e maw…” chi’n kipahthu hon gen hi. Hon sunzom a, “Umuan, Siampu toh hon kitengsak dek ua, bangkim manta, kitenna pan dia biakinn lam ka zotlai in ka kitenna uh tawp ahihthu hon gen ua, bangmah hoihtak hihman ka neikei uh…” hon chi hi. Kenleng “Poina e maw, lah kei adi’n a kipahhuai sim kachi…” chi’n ka leh chiamnuih hi. Sharon mah hon paukhe nawn a, “UMuan, lem nasak a, na itna ka tan lai leh nanga kahi gige ta ding tua kipan in…” chi’n ka khut hon leen hi.

Thakhat in “Muanpu…. Muanpu….” Chi’n hon kisam a, kenleng lamdang sakawmtaka ka etleh ka nau ana hi maimah a, bangchidan a chia ka ngaihtuah thak leh a ihmu kana hi maimah a, ZAALMANG THUPITAK MAN ANA HILELTAK kahi a, ka lupna tung a nui heuhau kawm in ka thoukhia hi.

BEITA……………………………….BEITA……………………………….BEITA
©Siamsinna leh Vakiangbu