HAIBANG NA NGAK IN LAMKA... (II)
By - Pau Lian
Bung -II
BEITA,BEITA,BEITA,BEITA,
http://siamsinnalehvakiangbu.blogspot.in/2012/07/haibang-na-ngak-in-lamka.html
© Siamsinna leh Vakinagbu
Bung -II
Kingaih kha lah tam semsem, ngaih mel lah hoih semsem, kha nga bang
mel kimu theilou a ka om nung un Decembar kha in ngaih lenna lamka zuan
in kapaita hi, Lamka tomchik ka omlouh sung in ana kikhek mahmah hi.
Suty ka pai sunsun a hun kibichilh gige ahih natoh, ka suty te a manpha
theitawp a zat ka tuppen ahi hi. Inn lum tun kan a nuam omlouh ban ah
phalbi khovot nuai a thathou tak a chih simsim te innlam zot mahmah
bangle a nop hipen mai hi.
Katun nitak in Hohoih toh ka kimuh masak napen uh hikei mahleh
amasapen bangtuk in kangai hi. Ka kingaihnung ua kimuh masak nipen le
ahihman in zumsim chemcham tuak in ka omtuak uhi. Innsung a meiphu awi
in ka kihoulim ua, duhtuina leh lametna bangtak in nuam kasa hi. A
zingchiang Pathiann ding leng ahih toh Hohoih in pawt din honzawn a,
keileng ka phur lamtak ahih toh ka amen mahmah a, ka pawt ding vai uh
genchiang in innlam zuan in ka paita hi.
Hinkhua zaw huihmutna lamlam a kihei ngai a bang, gintak louh dandan a
pei lumlet a om ka hinkhua lamdang kasa. Huai Pathianni zing a
sanggamte leh a ka nu leh pate mukpuak na thu kei adin a nawn valh hak
telmai hi. August khabul apan tamvei tak ka kiang a kanu leh pa'n agen
taksa uleh kana nial gige tu'n phutluih pian in hon omta. Ka ngaihtuah
a, kakum lah atam pianta, awlmoh huailua mahzaw kana hive, kachi a,
himahleh ahitheitan a keithu pai ding hileh kum nih kumthum bek tuailai
hun zangnuam lolai sam kahi kachi hi. Huaini tuh annkuang tau ah pau
kituh in ka phekhe suausuau uhi.
Ka nu leh pa deih teelna dan leh hun sakdan in kei adia kilawm
huntawk nungak semohlou ban ah sepna leng nei, Chingnu toh kiten a, nupa
a sepna nei suah a, maban ah tate kepna lam a lungngaih omlou ding chih
angim pipen uh ana hi hi. Ka nu ngial in houh Chingnu nu kiang a ana
kamteh khinsa ana hi zomah lai hi. Huai nupa tuak a sepna vaneih el-ul
khemkhem kenbel kiphamoh leng kasa hetkei hi. Kapa bel ka selngam
luatlouh ziak in akiang ah utlou ka chih thoh lel a, kanu kiang ah bel,
nou khanglui suangtuahna haihuai tulai in akizangthei nawnkei, akingai
chih le hilou, kiteng hita himhim le ung koimun pansan di e, amah a
sepna vaigam a kei vapai zel di maw? amah hiai inn a omtheilou di, keile
omtheilou di, zuauman ahi, kei zi di kei ka kibuaipih lel di, nou deih
nahih ualeh ka pa zi din vahel leltak ua ka chi gemgam phet hi. Ka nu
leh pa'n bel Hohoih toh ka kingaihlam uh atheikei, ka nauten bel athei
ua, amau leng kei ngaihdan bang ngaihdan neite ahi ua, bangmah agen
ngeikei uhi.
Utlou ka chihsa bel gentam angai nawnkei, kikhop ding lungeel a nei
hinapi in ka kikhop ka cancel a, sungte kuankhiak ma kava pawt a, akuan
khit un keileng inn kapai a kikhop tawp ding ngak in kana om hi. Huai
sun in ka ngaihtuah na ah thu tampi hong om hi. Ka nu leh pa thugen
Hohoih hilh di kadio? Bang ngaihdan anei de aw, a kum a sim le kingai
nailou a, kal a buaina pian nadi lel ahi khadio ka chi a, lungsim
kikochiik tak in gen ding leh genlouh ding kal ka hawmtan theikei hi.
Kikhop a tawpta, ka phone honging a, Hohoih in, Uthang, kamanta ve
chi in akoih a keileng ka paiphei pah a, a inn uh katun in kapawt ngal
uhi. A lawmte kiang peuh ah honva pawtpih a, zumsim lah sel ngamlou in
ka nungzuih hiahhiah hi. Amau bel numei chih mahtak gen di mah ahau ua
sawpi petmah a lawmte inn ah kava hoh uhi. Ka ngaihtuahna ah numei tezaw
a potman sunsun ua hi lawlaw uh hive uh aw, ka chih thoh a, ka thupi
ngaih hetkei hi. Nitaklam annek di kuan in kapai ua, lungsim guk a
kavei, gen ut hi lengle kagen man nawn takei a, anneklim ni aw chi in
innlam chiat ka zuanta uhi.
Inn katun in sungte'n ann neding chi in hon thuk ngal uhi. Annek na
ah kapa'n, Thangboi, na hehna omhia gen in, innsung na en di ka chih
theilou na maw? Na sepna ziak in kimutamlou hial in i om uh, nong pai
sunsun bek in nitak zaw pawt kon kham kei, tangval piching nahi, pawt in
a poikei, hilele sunchiang bek, adiak in Pathianni bek in, inn ah om
in ki houlim leng uthuai lua ahi. Huaiciah tuzing a kon gen le honsel
ken honchi hi. Keileng thakhat in ka hehtha honsuak a, ka pa chikmah a
ka sellouh tuh ka selta a, hichi in kachi hi. Kei na tapa kahi, ka u in
zi anei a, nakiang uah a om ua, huai ah lungkim un, ka neu apat non
iit, non khotuah nate uh ka theisiam a, vual ngai mahleng inn ah ka
kibukhum a, na sum neihsunte un lai non simsak ua, tung dia non gintak
tan uh ka tungkei, huaiziak in ngaihdam. Pa, nang mahmah le nahi, non
iitluat ziak in naupang kol in nonkol a, puanak khat ken ka deihtuam ka
gen nasan hon lei phallou in nang nalh nasak te non leisak a tuni dong
phunlou in ka silh, ka naute, ka ute'n a ngaihdan a genngam kei ua
thumang na chi ve, ken zaw kagen di. Huai puanak non leisakte nang
nalhsak di nasak lai in a dik kei, ken ka puanak thak silh te ah
lungkim na kanei kei, tuni tan in, kum 32 ka phak nung tan inle nou
deihmah non guan sawmlai uh, kazi dia non kawkmuh uh zaw a bul apat
inle itna kana kipe tuah khakei ua hon theisiam in, sum leh pai, pilna
hauhna ziak a itna hon piang ahikei, ka lungkimna mah ken kazong a, ka
damsung a ka dah, haksat a hon hehnem di Hohoih ka mukhin thamta, kazi
neih hunsa a kei sang a nou kiphamoh zaw nahih ualeh huai toh ka
kitengzaw di uh. Huchilou ahihleh zaw ka lengkul zomai di ka chih toh
kiton in kapa hon ding a, hon maitang kawk a, nang ka tapa, numei maimai
toh kiteng din honphal hileng innsung ah leng kon munawn keiding, tua
na annek, tuidawn te en in, vahna hon pelou hileh nane kei hial ding. Ka
tapa in apa kipah na a bawl keileh ka tapa ka chi keihial ding hon chi
a... thagum zat angaih leleng zangmai di'n hong kisa mawk hi.keileng
akin theilam in ka ki-awngsut a ka diangpawt hi.
Ka haitawp ni ahi ding, mak leng kasa uh. Ka pa hichi bang ah
ahehtel, Sian lemgel louh amaw? ka leitung Pathian thangpaihna sukha
ding ka bangta, koilam ah ka khasiatna ka sungkhe dia, Hohoih kiang a
gen inlah hoihlam sang in khasiatna leh kakal uah mittui daina atun lel
ding. Ka lungtang in a polah petmah mai hi. Nungak ka ngaihziak a ka
sungkuante toh kisiat di ka tel diam? Hohoih toh ka kisezaw di uam? chih
kathei zoukei. Diding leh Kikimte nupa enghuai uh ka sakna hon uang
nawn ua, amau zaw nuamsa lua uhia aw, keilah tuakkhial ding bangmai, ka
kichi a, atawp in ka nopsak hun a ka phawk khaklouh Lialian kiang ah ka
haksatna va sungkhe ding in ka paita hi. Lialian te'n ann nelai ahih man
un a innkong uah sawtlou ka nangak, atawp in Lialian hon pawt a, eh
Thang, nonpawt zenzen a bang chisim e honchi hi. Kenleng ka haksatnate
kim sipsip in kagen a, aman leng bang lohtuan di ahia chih athei tuankei
hi. Hong kingaihtuah dedu a atawp in ken napa ka houpih dia, huaizoh
awl in ngaihtuah ni, itna zaw pang teitei ahi. Hohoih na iit taktak leh
pang teitei in, hon chi a, ka innlam ka manoh uhi.
Inn a ka pate leng lungbuai chitak in ana tu ua, kihou louhial in ana
omkhe gegu uhi. Lut masa ngamlou kahih chiang in Lialian ka lutmasa sak
a, ka sungte kuamah ana paukei uhi. Lialian in kapa a houpih a, thu
tampi kum in theihsiam sak sawm mahleh ka pa theihsiamna in a phal
tuankei. Hichibang a mou thu a pata kal buai tampi leng kana thei
thamta, ken kapa deihlouh neileng ka innsung uh nawngkai ding ahi chi
leng kathei, a hi hi genleng, ken Chingnou muh leng mukha nailou, kiteng
le ung ka kal uah itna hon piang mawk di adiam? Ka kiten nung un itna
bel omthei maithei, himahleh mihing in lungkim na mah ahi aki buaipih ka
chi a ka thangpai ta hi. Lialian apai in kava zui a, bang ka chih di,
ka chihleh, Hohoih houpih inla, a lungsim taktak thei in, huaiciah napa
le lung-awi loulua chih namu a imm neilou in gen leteh, itna kichi pang
teitei ahi, na pan teitei ua, sia leh pha tung ding ka thuakngam uh
nachih uleh bel nou kingap dandan ahi, honchi a, kenleng Hohoih houpih
ding chi in Lialian ka kiksan hi.
Hohoih te inlam ka zot kawm in ka kingaihtuah a, bang chitel le ka
diam aw? Suty pai a nuamtak a zat di chi a lemgeel teng a nuamlou zosem
katung a hon tun. Kei maban di kei geel di kasak lai a keithu ana
tellou, ka hinkhua kei a kasak leh kei thu neihna omlou. Kaneu apat ka
tuppen i iitpen toh kiten a, dansiangthou a kiten a, khatvei zinei ding
sunsun lop zuazua ka ut pipen ahi, himahleh ka utpen te hon kilehhei a
ka utlouh pente honsuah ding ka lau mahmah hi.
Hohoih te inn ka tun in khua a vaksim lai a, a sungte kikhawm din
akuanta ua, amah ana kisa lel hi. Alou theilou a akikhop ngai ahi honchi
a kenbel pautam lou in ka phalkei hi. Hon en a, ka mai ah lungkim
louhna belh ahi chih amu a, akikhop di tawpsan in ka lungkim louhna hon
dongta hi. Ama tung a hehna nei hiding peuh in akoih a, akisuanglah a,
akisuanlah melte ka muh chiang in ka hehpih semsem a, gen ding chi a ka
ngaihtuahsa teng leng ka khek angai, ka nu leh pa lah lungawi loulua ua,
adang mulah ding na hikei i kitawpsan mai aw chia gen ding lai itna thu
kava gen tamai hi.
Ka neihsa, ka lamsa suang a, khovel a kei deihtel na suangthei hileng
nangtoh kikhenlouh ka ut. Nu le pate angtang a nopsakna leh lungkimna
kitatsatlou a khovel hinkhua zang ding ka kisaklai in gintak dan hon
kibaibuliik tamai ve. Ke'n kon iit bang a hon it na hihleh tua ka gen
ding thu ah na hehna na suklat louh kadeih. Ka nu le pa lemgeel na zui
hileng nangtoh kikhen a. midang toh kiteng maiding dinmun ah ka dingta,
himahleh ka hinna in a phalkei, bangteng hongtung in sihna tuipi te
kihawt in, dahna meipi in hon tuam in mangbatna khovel ah khosa lengle,
nang kon itna bei nawnlou ding ahi aw hoih, ka neu apat ka lemgeel
bangtak a pai hileh saptuam dan siangthou a zineih ka ut ahi, tu'n bel
ahithei nawntakei. Lei a teng ihih man in leitung paidan zui mai ni.
Itna taktak non piak a ahihleh haksa, anuam thuak khawm din honzui mai
in ka chi hi.
Hohoih inbel ka gen a theisiam kei, bang chidan in e, hon chi a,
kenleng ki-itt, kingai taktak ihih leh kiteng mai ni ka chih leh Hohoih
ngaihtuahdan ana hi hetkei, nu le pa dong masa lou in ken bangmah ka
saithei kei. Huchia na nu le pa hehluatna ka hih in, kiteng lengle ken
na innsung uah ann le ka nengam dia maw. Kathei zou kei, kenle kon
ngailua, himah leh kagen, kaloh didan ka theikei, ka nu, ka pa khosa
haksatak a omlai, ka taisan pah ngamkei. Amau lemgel na hi henla, ngeina
bang a chial leh kihoukhop hileh a uthuai e, hon chi hi. Ken gen di ka
kathei nawnkei, ka hehtha asuak a ka dingtou a, non ngai taktak kei a
hilel mailou di maw, ka haksatna hon theihpih leteh zaw, chi in, kapai
ta hi.
Tun kei bangchi tadi ka hia, ka lampi pai natawm a haksa, ka suty ni 2
chauh omta, Hohoih lah utlou, ka nu, kapa'n lah athugel uh khelou ua ka
chi a, atawp inzaw ka tung a hontung bangbang ka pomdi chi in inn ah
kapai a, kikhawm telah tawp nailou, nitak lah sawt nailou, chim kisa in
Lialian phone in ka houpih a, thu leh la omdan ka genkhawm uhi. Aman
leng numei pil kiang ah khatvei nihvei gen a thil piang di nasak lel
maw, gengen ngai eive, hi lele na suty bei di hita, a kikhel hita, na
pate'n le hon gawm man nawnkei di ua, Hohioh tole na kiguk uh thil
haihuai hiphot ahi honchi a, thil dangdang leng kagen khit un ka phone
ka koih a ka lumta hi.
Nitak zankhomial nuai ah, mit in khua mukei mahleh ngaihtuahna
lungsim inbel chiang hialtak in ka ngaihtuah peuh amu. Thilteng ka
muthei chi lengle ka khial din ka kigingkei, himahleh ka theih zohlouh,
ka muh theihlouh leh ka theihnoppen bel Hohoih in tu leltak in bang
angaihtuah diam aw kachi hi. Iitlouh vang a, lungna a om zaw ka hikei
uh, chih kathei, Kikim toh ka kingaih lai ua, ka kisel chiang ua zaw
kininna leh kihepkhiak nopna ngen ana hi a, ken ki-iit kal a kiselna
ana chiamkha nailou ka hihman in, Hohoih ka paisan dan tungtang ah
akhase ngei ding chih leng kathei. Dak 9 lelphet gingpan ahihman in
Hohoih ka kiang ah 'kon ngailou theikei' chih tengchauh sms in ka khak
hi. Kin leh buang in hon thuk pah a, 'kei azaw genlouh inle nathei' heh
nawnkei teh maw hon chi hi. Kenleng heh ka hi hia chi le kitheilou ka
hih chiang in ka lungbuai man hi. Heh ut lengle, ka hehna di kamu kei ka
chi hi. Hohoih in 'Uthang, nang itna kichi thei lou nahi, itna kichi i
hinkhua a hon kipan ta ahi. Itna taktak kuan anei a chih mite hon muhdan
in a kilangmai ding, na nu, na pa kiang a kei non itdan hehsa leh
thangpaisa a na gen sungteng, na nu le pate'n ei ki-itna theisiam
theilou di uh ahi. Itna ziak a nget ngai omleh ngen ni, thuak ngai omleh
thuak ni, na nu, leh napa na biak a na genlem zoh keileh nonpiak tua
itna taktak nachih alem maimai hiding ahi. Theihsiam louhna apan
kitheihsiam sakna zaw itna kalbi masa pen ahi. Kei non iit bang a na nu,
napa na iit kei inzaw kiteng lengle kei non iit khial khadia, itna
bukimlou in, na nu, na pa hamsia i tanglel khading. Nou kal bollem masa
phot ve maw Uthang hon chi a, ka pilna in a ban nawnkei, Hohoih pilna
huaizan in ka mukhe nawn a, ka itna a kibehlap ta, ka nu le pa'n "numei
hai" chi in musit mah le uh hiaibang lungpi gelthei, ka sungkuan a dia
sangak palai a pangthei dinmun hinapi, a thuhoih, lahoih hon deihsak
Hohoih na sakmin ngaih hina zouzen e, na lunggeel te'n na hoihna a
puangzak ta, ka chi a, ka nu le pa mai a kamsiam zang a nget ekek a, kah
angaih leh kah a bangteng hong tung zong leh chi in mangpha kikhak in
lungkim tak in ka ihmu tuakta uhi.
Zing ka thou a, huihvot hiauhiau ten kei ah khamuanna hon guan un
kathei hi. Ka nu'n meiphu a toh deklai ken kon toh di chi in kava suh a,
kanu le lamdang satak in a pawtkhia, meiphu ka tohzoh in innkiim ka va
phiatsiang a, votsim ahihman in meiphu lam kava delhpah tettet hi. Kapa
leng hong thou in hon kihah a, innkong lam vazuan hi. Pau selou in hong
lutnawn a, meiphu hong awi in ka kiang ah, bel nacia Thang, ihmut baih
leh kithoubaih a, khovot le kithuakbaih eive maw, chi in hon chiamnuih
hi. Kenleng ka lungsim in kapa zingkal nasep, inkiim phiatsiang kana
zohsak ziak a kipak hingei ding ahi, chikawm in huai hun phaze sa in
kapa kiang ah hichin kagen hi. "Pa, tutung kong pai kei a din kikhek
ngai na atam kasa, lemgeel siam hi in thuman dan siam hileng na kipahna
hih a sepdet ka ut, hilele kana haikha a, piching tak a gen a, na
theihsiam louh, ken kana theihsiam sunsun te nemtak a hon pulak ding
hinapi in kon selkha a, na hehlai hia ka chih leh ka pan leng, heh lou
e, kamsung a ha in lei akeih khak ngeina ahi, nagen nop leng kathei, na
deihtak na tel, nang adia khamuanna ahi, na hinkhua kana en a, nuamsa
leh innlum ngaina louzen in na diangdiang a, tunung in mi kuahiam numei
hoihlou toh bang le va kigaihtheih ahi chih venna a itna tak a ngaihding
tumta neilou konsa a, kei deihna kon kawkmuh mah ahi. Sepna nei nahi
a, nakum leng a tam lota, sum seng a nungak ban hel din kon phal hetkei
uh, na u endih, ka deihsak mi toh ka kitengsak a, innkuan ah nawnkaina a
omkei, nangleng lemgeelthei nahita, na deihpen ngai inla, zi neih lam
hon kin in, khovel aselua, ka tapa, nang kon iit bang in nang deih a
natel, inn apan diangkhe zen a lungkimlouh na latsak hial tuh manpha
ngei din ka gingta, innkuan ki tuahna bawlhoih mi ka deih chih mangngilh
kenla, ahi theitan liai in na nu, napa damlai mah in koppih nei un aw
bawi hon chi hi. Ken leng, Hohoih hon gen leh thuhilh dante kagen a ka
pa'n bel bangmah agen nawnkei, kanu'n hong pau a, nu thumang, pa thumang
nahloh pek ahi, kamdam a genpah hi leteh na chi hia ? chi in hon
chiamnuih hi. Ka u-zi leng daidide in malta meh bawl in ana guk nuih
nuih a, ka matdan intuh, ka sungkuante kithukim diamsa a zinei dia hon
phu uh ana hizaw dan ahi ka chi hi.
Thou nailoute hong thou in, ann leh meh kimin thamta ahih man in ann
kane ua, huaini tuh ka kipak a, asun a zan a nungak hel di himai chi in
ka nikhat hun neihsun ka amm sawm hi. Ann nek-khit in ka zinchia ka puan
ken dite nawtnuam kawm in Hohoihte inn kava tungpah hi. Manlahpi
himahleh hon tha-it pih mahmah a, kenle, Hoih, amm in aw, na nungak hun
kha 4 khawng zangkha lelta di nahi, chi in, ka chiamnuih leh Hohoih
hong chitak gemgam a, pasal tezaw na phur dandan in napau ua, numei ten
zaw ka maban di uh ka genngam hetkei uh. Ei ut leh lemgeel thu ana hilou
khathei eive hon chi a, kenleng hikhalou thei chichi ken, hikha thei
aka, ani hong tunchiah thei nani hang ka chi a, sunkhua in gen leh sak
ban ah deihthusam gen in ka kihoulim ua, annek bang hun hialta ahih leh
kava pai dia kong pawtnawn pah di chi in kapai ta hi.
Nitaklam ann nekhit a pawt kasawm leh kapa'n tunitak zaw na pawtsawt
ut lona dia, ahihtheih leh ka lupma un hong pai in aw, honchi a, kenleng
awle, chi in, ka pawtngal hi. Hohoihte inn ah sangman kang in ka om
zaizai ua, huai nitak bel Hohoih apau nuam mangkei mawk hi. Bangchi a
dia o kachi a, ama kiang alah ka kanngamkei. Dak 9 bang a gintak man in
pai din ka kisa a gate tan Hohoih in honkha hi. Paulou in ka kizuipawt
ua huaitak in kenle, Hoih, nalung noplouh na om amaw, bangchi e, maitai
tak in non khakhe keidia, paidi hingal ing a, ka chih leh Hohoih in,
ki-iit, kingaih vuak a hun himai leh kachi, kimupan a kikhen di hipah
zel, ka hehna di zaw a omkei, ka lungleng khol ahi. Nong painawnma kei
thawmhau lotel di ing a, non mangngilh louh di ahi aw, gamla in nai
taleh itna nonpiak bangmah in halkei heh aw Uthang hon chi hi. Lenleng
kimu zel di, kikhen zel di, hiai in lunggulh na honpia hizaw ahi, kimu
denthei hile keile ka utlua, nektak zonna ahi a theisiam ni chi'n
mangpha kakhak a ka pai ta hi. Lamkawi natan hon nung et a, alung
noplouh natak khat om ahi chih kathei, kapan hon gennop bang om adio?
Kikhel sakthak adia o? khong peuh ka chi a, ka lung a buaisim na a
kipakdan in ka om himhim hi.
Inn katun in innsung ah ana ki houlim ua, kenleng ka ngaigu khenkhan
hi. Kapa'n ka nu kiang ah,Thangboi nungak nu nute i houpih dia amau,
lemtan dan en in Thangboi inle suty honlak sawm leh na chi hia chi'n ana
kikum uhi. Keileng kalut a, kapa'n le, eh, Thang, ahun geih a hontung
nahi. Zi naneih hunlota ahihman in tukum December lamlah gamla lua a
June kha vel in suty lazaw ve maw, honchi, a kenle lem kasa ta hi.
Thutampi ka gen khawm ua, ka painung a, kanu kapa te uh ana kihou didan
ua thunamkip ahita. Kalum ua, zingkhua honvak in Lamka nusia in Dimapur
tual ka delh ta hi.
Kha te hong thak in hun leh nite pailiam zungzung a, May kha bang
hong tungtou ta hi. Ka kiten di ni uleng genlem ahita. July ni 7,
Kiginni masa pen a dia seh ahi. Kenbel suty July ni 2 apat ni 28 tan
adin kala a, lemgel dantak in suty piak leng ka hi. Lemgeel siam leh
kipak tak a ka omlai in vangtahna in hon buak hi. June 29 ni ahi ding,
ka camp ua pat gamla lou ah camp a zat ding cement podin mi tamlou ka
kuan uhi. Vangphat nalam tasam mah ka hi dia, kava accident ua, thautui
pua tanker khat in kou gari hon nawkphei in, ka gari uh ase dimdem a, ka
khophawk tan in ka kiang a tupa Vijay kichi in ana lua, ana lua a chi a
kenleng huaibang khua ka phawk nawnkei hi.
Ka khophawk in damdawi inn, ICU ah kana lum a, ka kiang ah Romen
Singh, meitei te, kou company temah leng a lum tuh kamu hi. Kalu lah
heilah ka hihmanin ka hem etphei zel a, a khete naktak a kituam in
akhaisak uh chih kamu. Huaihun in ka natna muntak ka theikei, koilak
liam a chih ennuam in tangdek mahleng ka tang zoukei, huai bang hun hi
a, bang dakkal hi a, bang ni hi a, chih leng katheikei, kamit ka vial
taisak lel leng kei adia gimna ahih man in ka ihmu suknawn hi.
Kamang lam hiamkhat in ka lawmte uh Rajesh Tamang kici nepali te toh
doctor pa kihou kaza a, doctor in Rajesh kiang ah na lawmpa a vangpha
ahi achih lamtak kaza, sawtlou nung in ka tal khut in hon kikhoih a,
Paite, dampah ding nahi aw, hon kichi a, ka khanloh in kenleng Rajesh
kiang ah lawm dangte la, ka chihleh, aman leng adangte a dam ua nangtoh
Romen hon kibuaipih lel ahi. Dampah ding nahi, nanakguh na tatliam ban
ah na lu na hihkha a ahi, lauken doctor ten serious lou nahi achi uh
honchi hi. Kenbel ICU a ka ompatna ahih ban ah, huaimun a omte seriou
lou ki-omsak lou ahihmanin khamuanna thu ka lawm apan kigen ka ngai
thupi kei hi. Tuni bangchik ni a ka chih leh July ni 2 ahi honchi hi. Ka
kitenni ding uh ni 7 zaw mel a mulou ding ka hi tave, kachi a, ka khase
sim maimah hi. Ka petition khiakdan a ka suty di ni le a chingta, ka
suty ding ni hihsau in om nave, ka chi a, Rajesh kiang ah hon tusak ve
ka chih leh, kinohken, awl in natu nadi, na taklam hiam, na veilam hiam
ah kon kiheisak thei di, huaichiah tuni apat hiai apan pawt di nahi. Na
sungte le a kihoupih a hong pai ding uh ahi honchi a, huai khit in
Rajesh, Romen lupna lam hon ngasak dih kachi a huailam ka ngata. Lupna a
lum sawtsim kahi dia, ka chipum a golhta ,huchih lai in doctor pa hon
lut a Romen a tawlpawt ua hon polut nawnkei uhi. Keivuak in ka om a,
ngaihtuahna a paisau telmai, keile hon tawlpawt sam le uh ka chi tuntun a
lah kagen na di omkei. Damlouh, nat leh sat hun a innlam ngaih kichi
thunuam ahi dekkei, naupang hinawnkei mahleng nu leh pa kiang a damlouh
toh akikhe telmai, kanu kapa kiang a om hileng hon zutzut zezen di uh
hia peuh kachi a, Lamka ngaihna zaw a uang tel, theihlouh gam a tangkhat
a nat leh sat thuaklou a i om a bawn innlam kingai, tunzaw ka ngaihna a
uang mahmah hi.
Huchia suangtuahna khenkak a kana omlai in nurse khat toh Rajesh hon
pai a, patience ward lak a omta di neive honchi a, aw hoihlam hita
keivoi maw chi in hon sawnpawt ngaingai uhi. Patience ward number 31 ah
hon koih ua, ka ngaihtuah thakthak leh ka kum toh kibang eive kachi a
kanuih bang aza zezen hi. Ka kiang lak ka envel a, damlou lupna ngak
tampi tak kamu, akhente dang dikdiak, akhente gawng gieigei bang, a
khente thum hithit bang kamu hi. Keizaw ahalh losim lam kana hive kachi
hi. Rajesh leng va pawtkhe zual sawtsim nung in hong tungta a kenleng
Romen la koi a om ale, kamu hetkei a ka chih leh nuam sakchi hetlou in
amah innlam pai di hita, camp ah a hankuang di leite tun hunhun inlam ah
apai di hon chi a, ka khase mahmah hi. Lawmkhat a kaneih, mi paunuam
leh Manipur mi tuak ka hihna uah ka kingainat ban uah, mi chitak leh
kimawl siam mi ahi a, keivuak itna hilou in ka company ua suun ding un
ka ngaihsun hi. Poina e maw, ka chi a, ka tuahsiat kuan ua, cement
liangpuak a amitmul khong a cement neng bang thieuthiau a, a chiamnuih
bawl te ka phawk khia a, huaini a ka maitai dan uh diklou mah a adio
khong kachi hi.
Dak 1 lam agin in ka phone honging a, Rajesh in a pick up a kapa toh
kihou uhi. A kihou zoh in napa hontungta ve, kava pi di aw, chi in a
pawt a, sawtlou nung in hong lutkhawm uh, pate mel muh kei din a nuamtel
mai, ka kan masak penzaw kanu ahi, kanu hong hohkei a, amah vuak in
hong hoh ban ah na kitenni ding ule suan gamlat ahi photmai ve.. Tuzan i
giak di ua zingchiang in ambulence gari i hire dia innlam i paidi
honchi hi. Ka khe inbel lei ka sikthei ta, himahleh tutu lou leh dinglou
phot dia thuhilh ka hih man in ka lum teitei hi. Tutung innlam paidi
zaw lupsa a tung di kahi maita ve maw, inn a hon lung himoh a, hon ngak
ka sungkuan, tanau laina ban ah, adiak in Hohoih ka khotuah a, ka
ngaihtuahnate paihat in ka taksa damdawi inn, Dimapur ah om mahleh, ka
lungsim zaw lamka ah a vialvak khinta.
July ni 5 in lamka puaktung kahi a, ka damlouhna in hoihlam manoh tou
himahleh tha ngahnailou ka hihman in lupna toh ka kinusekei hi. Ka
kiten ding uh inndongta vai a genkhop ahih nung in, ni 12 adia suan ahi
phot hi. Khutzung kuai in ka kitenni ding kia uh ka hisap a, kasim
chiang in ka khut langnih zaw ka enlai sam hi. Lamka ka tunnung ani 3 ni
tan inzaw ka halhta, pawt hialkei mahleng inpua a pusuak zihzeh in, ka
ning akitel ta hi. Ka damlouh sung a honkem Hohoih zaw mipi theih in
kiteng hial hikei mah le ung kiteng bangtuk in hun hon hawm a, buai pipi
himahleh hon awlmoh lua kisa in a manteng in hong vil gige hi.. Nite
hong pai in keibel buai zoulou ka hihman in, ka lawmpa Lialian in
thilteng saifel diam in July ni 12 ni in zinglam dak 11 geih in
kikhutsuih na kanei ua, innte ah lopna nei in hunnuam ka zangtou uhi.
Ka iit kangaih masak bang a omkei, himah leh ngaih nanung kan a hon
theisiam leh ngaihhuai a om tuankei chih kaphawk thakthak hi. Kikim
ngeileng nuamsatak in khosa uh a, keileng tua amau bang a inkuan bawl
ding ka hita, ka lungkim lahna leh ka kisikna a om kei. Hohoih ngei
inleng kisikna neidin ka gingta tuankei hi. Suty beikuan in ka liamma a
ka petition khiak, Army Family Quater ka ngetna lai hon tung a, vangpha
kisa in, tunzaw innlam ngai nawnlou in lungdeih kim in ka khosa tadi chi
in ka khamuang hial hi. Tanei lou sapsap dia family quater ngah kei leh
mi tamlou ahi pandi. Lamka nusia a Hohoih toh ka tunsuk nung uh kha
tamlou in Hohoih inleng vaipau hon thei panta, quater a kou toh kizom a
om Chakeshang Naga te nupa nih leh ata uh neulai 2 aneih te ubang
vadonpih zel in nuamsak chi vanglak hi.
Ni leh kha te hon kihei in, Pathian vualzawlna in chidam tak in ka
om uhi. Hohoih inleng theih ngeilouh gam chilou in lawm hon bawl a,
innkim, inkiangte toh kithuzat thei in hong om hi. Himah leh ki-iit,
kingai in omkhawm in, lunggulh deih leh duh a lungkim di ka kisaklai un
ka lungkim theikei uh, khualgam a khosa a innlam ngaihluat hunbang om
khasek hi. A kallak ah innlam ah ki-om leh zaw tuni bang a nuam mah di
chihton bang hon nei a, a pianna Lamka ngai in thum khasek hi. Kei
mahmah ngeileng, Hohoih toh om a lungkim di ka kisaklai in ka lungkim na
a bukim kei, u leh nau, nu leh pa ban a lawm leh vual te ngaih hun
atam, migam a mikhual a va om anuam din kana koihlouh man in kenbel
kathuak hamham hi.
Christmas kuan ahong hita, khua te vot in mei kai niainuai lak ah
duty zou ka quater lam uh kazuan hi. Inn ah kalut a meiphu awi kawm in
Hohoih toh christmas la kangaih lai un, Hohoih in na lung lenglou amaw
nang, tuhun khong in Lamka ah om hile zaw anuam mahdi, mi gam toh eigam a
kikhelua hon chi a, kenbel dawn na di katheikei a himah e maw, ka chih
thoh lel hi. Hohoih in hon genzom zel in, na suty di lah kizangkhinta,
inveng tenlah hon paisan, thawmhau huai theisek a, suty nei leteh zaw
chih kia ka ngaihtuah hon chi hi. Ke'nleng atawp in innlam ngailua zaw
neive maw, keilah paithei lou phot kahih chiah nangbek in innlam ah
vazang leteh adiam maw ka chi a, amah leng hon lungngai zek in, keivuak
di zaw ka ut tuankei, i om nana a omkhop zawk ka telpen ahi honchi hi.
Christmas tukum bek zatkhop uthuai hina maizen e, ka kitennung ua ni
20 le sungte toh omkhawm manlou hial a pai ing a, tukum innkuan kim a
zatkhop ka lunggulh leh ka ut himah leh hitheilou ahi lelmai hi. Hohoih
bek paileh kachih chiang in a ut kei a, a gari kham toh lamkal a
tangkhat lodi kasa a, kei mahmah inle ka phalkei gusim hi. Lamka mahleng
agal a thuthangte ziak in ka pai huphulh hun bang atam, kithah, kimat
leh thusia ngen niteng phial in ana kiza a, vapai lengle lauhuai
bangphial a, agen siamten hon gen uh bang kiginta mawk hi. Himah leh ka
khan letna zaw ngailou lem ka kineih theikei, ngai mah kahi a, kangaih
bang in asiat aphat ding leng ka ngaikhawk hi.
Christmas ni hong tung petmah ta, ka sahkho kibatpih teng innlam a
paibei man un kei toh Hohoih vuak in ka om ua, ak leh ngasa, ka camp
kong uah muhzoh sun kalei ua, ngasa meh dia zang in huai in Christmas
kalawm uhi. Innlam a pellou a lawmte toh kahih dan in nektheih neng
tamlou kalei ua, nitak in ak pen apum a mei ah ken ka haimin a, Hohoih
in sangte hon kang in christmas laa, lenkhop laa te khah in, ka
lungzuanna uh ka liahkhuh laitak un phone honging a, Hohoih in, Uthang i
pa ahi honchi a, kenle aw chi in kanih ua kazak di un loudspeaker ah
kakoih ua ka kipautuh hial uhi. Kapa'n agen nop agenzoh in, kanu hong
pau a bawi, nadam uh maw? Innkuan kim a christmas zatkhop nak lunggulh
huai emaw, naneu apat i zatkhoplouh uh a khatvei na ahi pan, sisuun
bangmai in ka nguizou, nanih ua nong pai theihkei ua lele Hohoih bek
honpai teitei heh kumthak mang din, honchi hi. Kenleng ka dawng pah a,
kumthak ken kuatoh ka zang khawmdia eita, eivuak a zat di ka utkei,
Hohoih inle utlou a chive chi'n kanu kakhem leh, Hohoih honpau heh, ka
gingtakei, honchi a amau hong kihou ua, ka sa-em leh sangkan te uh gen
in atawp in hong kihouzou uhi. Hohoih kiang ah nava paimai keidia maw ka
chi a, hon dawngkei hi. Sang kangzou, buaidi dandan a buai khin in
zinglam dak 1 in ka lumta uhi.
Zing kathou ua, kenleng Hohoih kiang ah, innlam ten poimoh honsa ua
ahi di, vapai mai in aw Hoih, Unem lah a naupai toh buai kisa, inu vuak
inlah buaipih zoulou dia, nava paimai louhleh, nanglou adang di lah
omlou phot a maw ka chi a, atawp in honsel ngamlou in a zingchiang in
inlam hon zotsan hi. Ka Unem nauneih zohchia hong kiknawn dia ka lemgel
pen himahleh a dikthei nawnkei. January ni 8 in Agartala ah posting
order kamu a, huaini hongtun in Agartala lam kazuan ta hi. Agartala a ka
om apat in Hohoih toh omkhop hong hithei takei hi. Agartala khopi sung
ka sak hang in khopi nawl mun neuchik a camp maimai ana hi a, innkuan a
om kuamah leng a om samkei uhi.
Kou nupa tuh ah gamla sem a khentuak in ka omta ua, ki-iit in
kikhelah mah-le-ung, sepaih pang te nupa kal adia a lou theilou kikhen
ahih ban ah, nekzonna leh khosak ngaihtuahna a omkhawm theilou a, aselam
a kikhen hilou a, ahoih lametna toh kikhen hizaw ihi chi a kihehnem
kawm in, dam a mel kimuh ngei lamen in, ka penson matan ka iit, kangaih,
ka zi leh ka tate galdon kawm in ka om a, gim leh tawl ban ah lungzuan
ni tam mahleh kei adia ginom Hohoih leh ka tate lenna Lamka lungsim a
phawk gige kawm in haibang na ngak in aw Lamka, vaibang kong chiah
niding sawt nawnlou hi ka chi vungvung sek hi.
BEITA,BEITA,BEITA,BEITA,
http://siamsinnalehvakiangbu.blogspot.in/2012/07/haibang-na-ngak-in-lamka.html
© Siamsinna leh Vakinagbu
Comments
Post a Comment