NUNGAK LINDA SIHNA THUBUAI

By ~ Sang Valte

Zan dak 9 khong in ka thei a, ka phone hong ging a, kenle a number ka etleh number thak ana hi a, kenle kua amahmah dia aw, chi'in ka pick up leh "heutupa akin theilam in ka inn uah hong pai in" chi'n numei khat in lauh chi deuh mai in hon gen hi. Kei leng pawt pai kisil leng kisil nailou, bang thu amah mah dia aw chi'n ka ngaihtuah hi. Ke'n leng lawmte ka phone ngal a, ka inn ua hong pai din ka theisak hi. Ka na kisa ngal a, ka lawmte hong tun di ngak in ka om hi. Sawtlou nung in hong tung ngal ua, address hong kipia tuah in ka lawmte nih toh car in ka kikhoh khe ngal uhi. Dakkal kim val katai nung un amun ka tung ngal ua, hon phone tu hidia ka gingtak numei gate bul ah ana ding a, kou leng ka kum khe ngal uhi. Numeinu'n "kei ka hi hon call, ka min Hoihnu ahi, den in ka lawmnu te inn a ka va hon leh kuamah ana om kei ua, ken leng lamdangsa lua van teng lah tha'ang zengzung mai, kua mahlah muh di omlou kasap chia lah kuaman hon dawnglou, atawp in ken leng bathroom ka va hong leh ka lawmnu sisan toh pumdim....... "chi'n hong kap khia a, aban a gen thei non kei hi. Ke'n leng akkhut ah len kawm in amun ah hon paipih in chi, in ka jawn a, aman le hon paipih hi. Lawmte'n a luang khoih sawm mah le uh ka phal kei hi.

Policete ka phone a, huai sung in kiangnai a eimi innluah omte, a theiteng hong hoh ua, aluang lak khiat mai sawm, awl ommah le uh police te hongtung ma lak khiat louh di ahih dan ka gen jel hi. Sawtlou nung in policete leng ambulance toh hong tung ngal ua, ken leng Inspectorpa kiang ka naih ngal a, aphone pa kei ka hihdan lehthil omdan ka theihna chiang ah kana gen pah hi. Policete'n leng tualthahna a ki-jang temta plastic cover in a guang ua, aliamna ma teng lem a la ua, huchi'n Inspectorpa'n honsam a, " ka min inspector Rajesh ahi, buaina na neihleh nawn phone di chi'n a phone no. hon pia a, huchi'in postmortem bawl din hospital lam juan ta uhi. Zan dak 4:30 bang ging di ahihtakman in ke'n leng kikhen phot di'n ka gen a inlam kon juan ta uhi. Inn ka tung in ka sungte ana lumkhin ta ua, keileng kei leng ihmut suak sim ahihchiah ka lumsuk pah hi. Zingchiang bang thu hong on ngei diam aw, bang chi pan laak leng ahoih dia aw, cih khong ngaihtuah in ka om a, ka ihmu pah theikei hi.Atawp in chu ka ihmu khong hi.

Zingkal khua hong vak a, keileng ihmut suaklai mah leh ka thou khia a, bathroom ah ka lut laitak in ka phone hong ging a, ka et leh inspectorpa ana hi a, kenle ka pick up leh a case kigelhlut ahih dan leh inspector pa'n keitoh ka kithuah ngai di ahih dan hon hilh hi. Kenleng ka awmoh jiak in kana aw a, inspectorpa kiang ah kana sepna buai leh bang chi ding ka hiam? ka cihleh, ken ka gen na di chi'n hon kha muan hi. Keileng ka lawmte (pawlpi a ka seppihte) ka phone ngal a, thu omdan teng gen a suty ngen din ka theisak ngal hi. Inspector pa toh buaipih theih dandan a buaipih din ka kisa top mai uhi. Police station gamla lou hiven ka tung hakkei vanglak a, sawtlou nung in ka lawmte leng hongtung ngal uhi. Inspectorpa ana buai sim jiak in sawtlou ka ngak ua, amah leng hong man pah vanglak hi.

Inspectorpa leng thil omdan thei ut in buai in a buai hi. Kou toh kithuah a thu sui sawm ahih dan leh hoih deuh a hon kithuah pih di'n hon ngen hi. Amah leng constable nih toh hong kisa a, hospital lam juan in kong pai uhi. Amau (policete) ka ma uah a tai ua kou anung uah ka jui uhi. Ka lawmte'n hiai hichi buaipih ngai amaw atangvalpa thah hilel lou di amaw, peuh achi ua, ken a tangvalpa hileh bang jiak a that mok ding hiam chi'n ka dawng tan hi. Postmortem a bawl khit un a inn uah ka pua ua, huai ah avui didan kangaihtuah ta uhi. Anu leh pa te hongtung nailou ahihman un kana ngak uhi. Innlam apan a nu leh pate hong tung phet un haanmual lam ah vui din ka paipih uhi. Eimi thah a om ahihman in mipi kithawmhau chiat hi. Postmortem dungjui in mi khat thah ahih dan leh a sihma in le sawt lou ki sual zek uh cih theih in om a, zu leh drugs leng kham ahih dan innsung athil muhte apan theih theih hi. Awle hiai LINDA pen bang chi bang mi hihiam cih theih na din aneu apan thu sui hong ngai ta.

Keileng inspectorpa toh ka office lam uh juan in kong tai vengveng nawn ua, gamlalou ahihman in ka tung hak kei uhi. Ka M.D.pa uh kiang ah suty ka laak angaih dan leh thil omdan teng inspectorpa'n agen khit in inlam chiat juan in kong kikhen ta uhi. Ka lawmte suty la din sawl mah leng, inspectorpa'n ei tegel in athu i sui phot dia apawimoh leh na lawmte i theisak na di a cih jiak in, ka lawmte jing chiang a nasem a, ana kuan din ka theisak hi. Kei leng nitak anne khin a upa (Linda upa) kianglam juan in kong tai vengveng nawn a, gamla lou ahihman in ka tung hakkei vanglak hi. A u'pa leng a zite toh T.V. en a ana tut laitak uh ahia, kei leng pautamlou in ka tusuk pah ngal hi. Ka kilamet banglou tak in anute (inlam apan hong paite) ana om kei ua, huchi'n houlimna kon pan ta uhi. A u'pan a theih bang bang in a hinkhua hon gen a, kenleng athu gendan apat ama sang a alawmte (Linda lawmte) kiang ah kikan leh chiang jo dia ka theihman in, jan a sawt sim tak toh ka paisan ta hi.

Hiai LINDA ahih leh i lenna LAMKA apan ahi a, unau mi thumte lak a aneu pen ahi. Aneu apan anute'n a duatluat jiak un anuamnuam in aki om hi. Kum 18 ahong phak chiang in school kai lah gina salou uh, ka lu na ka gilna chi peuh in school kailou in a om jel hi. A nu le pate'n naasem a kuansan uh ahihman in, amah chauh free tak in inn ah aki om hithiat jel hi. A u (alian pen) lah khopi ah laisim in aom a, a tung a pa lah school kai, amah chiingtu ding omlou in a om mai hi. Huchih jiak ahi dia huai kum final exam a pass jou kei hi. A kumnawn school kai sunjom nawnlou in inn ah a om mai hi. Hunte hong pai jel in kum nih bang hong bei maimah a, apate'n leng a omdan diklouhna chiang om ahihdan hon theih bawl simsim ta uhi. Kholak pawt, lawmte toh picnic cih te khong nuamsa mahmah ahihman in apate'n hichia aom om leh hoihlou di hiveh aw chi'n khopi ah, a u kiang ah omsak asom ta uhi. A upa'n a nasepna dijongsak in naa asem sak hi. Hunte hong pai jel in a upa'n leng ajilna jou in nasep hong kipan a, sawttlou nung in zi hon nei maimah hi.

A upa zi toh kituaklou ahihleh chu a u'pa toh leng kituaklou ahimai hi. Huchi'n inndang luah di hon geel a, inn tuam ah hong omta hi. Amah chauh intuam a om chu ahoih ding cihna thu a omkei, a ut dan teng a omta hi. Ahitak in a sihni jan inle Hoihnu a inn ua va hoh dek himahleh a thawm uh a jak chiang in nuamsa lou in kik hi. Keileng hiai thu teng ka jak in chu a thattu kuamah dang hilou in atangvalpa mah hi din ka gingta pah ngal hi. Himahleh ka ngaihtuahna a om khat chu atangvalpa kua hi ding hiam? Bang jiak a, a itpen that mawk ding hiam? cih ka ngaihtuah hi. Huchia ka ngaihtuahlai in inspectorpa'n hon phone a, kenleng Linda hinkhua ka theihdan teng in ka hilh ngal a, jingchiang police station a kimuh ngai ding ahihdan ahon hilh zoh in phone akoih ta hi. Kenleng a u'pa (Linda u'pa) ka phone ngal a kua toh kingai hiam? Cih ka dot bawl chiang in aman theikhalou ahihdan hon hilh hi.

Azing in keileng police station ka juan ngal a, inspectorpa'n Hoihnu in atangvalpa thei di achihman in Hoihnu toh kimu ding in kong kithoi khe ta uhi. Inn ah kihou lemlou ding ahihman in hotel ah anne kawm din ka sam ua, kei toh inspectorpa ka na tung masa ua, Hoihnu ngak in ka na tu uhi. Sawtlou ka ngak nung un hong tung hak kei vanglak hi. Huchi'n thu dot kon panta uhi. Ken Hoihnu kiang ah thudik gen din ka ngen a, aman leng gen didan haksa asa hi. Aziak ahih leh nitak teng in mituam tuam giak uh ahih man in. Hoihnu'n niteng a pawt ahihlouhdan leh apawt chiang a mituam ana om jel ahi chih ahon hilh hi. Kenleng kua kua hi uhiam mi bang chi bang chih ka dawt chiang in vaite, negro leh eimi chih ahon hilh hi. Inspectorpa'n leng Hoihnu kiang ah kholai na vak chiang in hiai mi thumte na muh leh akin thei bang pen in non hilh di chi'n a phone number Hoihnu apia hi. Kou leng an nekhin inlam chiat juan in kong kikhen ta uhi. Ka buaina mahmah khat ahihleh hiai mi thum te'n lah kithutuak a that peuhmahlou di ua akua pen thah hi ding hiam?? chih ahi.

Nitak ka ihmut dek kuan in Hoihnu ka phone a, asihma nitak in kua toh a om uh cih ka dot leh eimi pa toh hon chi hi. Kenleng eimipa pen kua a detail deuh in hon hilh in ka chih chiang in, Hoihnu'n amin le ka thei kei a, mel ka theih thoh chi'n dawn na ahon bawl jel a, ka buai deuh deuh mai hi. Ani nawn in keileng ka suty laak ahun chingta ahihman in, inspectorpa ka theisak a, aman le lung lellou a pan la din ahon hanchiam hi. Keileng ni bangjah hiam nung in pawlpi a ka seppihte tawh meeting ka bawl pih a, Hoihnu leng ka tonpih hi. Ka lungsim a nuam thei nawn taktak kei, ka suikhiak ma uh hichi bang a lung nuamlou a om di ka hi chih ka kingaihtuah chiang in inspectorpa a case khak pih bang ka ut hi. Hunte hongpai jel in kei leng winter vacation suty ka mu nawn hi. Keileng pianna vangkhua ah Christmas jat ut mah leng, bang hiam thukin a om khak di lau in pai ka sawm kei hi. A buai huaina bel a si nu tung apan bangmah muh ding a om kei hi. Kenleng thil khat ka ngaihtuah khe thut a huai chu a facebook account jon suah di chih ahi.

Hoihnu mah in theiding in ka ngaihtuah a, Hoihnu mah ka phone pah hi. Aman leng iim hetlou in ahon hilh ngal hi. Alimte ka baan et a, lim atam luat jiak in koi pen hi ding hiam chih thei joulou ka hihman in Hoihnu kiang ah ka va pawt a, huchi'n a print khesak ding in kava kuan uhi. Aman atheih teng aphoto uh ka print khesak a, police station lam ka juan nawm hi. Hoihnu bel inlam ah pai hi. Inspectorpa sawl bang in huai limte bang jah hiam ka print thuah sak nawn hi. Huai limte police station ah ka ban piak ua, amuh khak hunhun ua hon theisak ngal din thu ka pe ta uhi. Hun hong pai jel in christmas lenkhopna ah Hoihnu toh kava hoh ua, mun tuamtuak ah ka tu uhi. Huchih lai in ka phone hong ging a, ka et leh Hoihnu ana hi a, kenleng inkonglam ah kimu din ka gen ta hi. Hoihnu'n huai eimi pa mu ana hi a, kenleng inspectorpa kin deuh in ka phone ngal a hongpai din ka theisak hi. Sawtlou nung in constable nih toh ahongtung ngal a, thil omdan teng ka gen khit in, nungak khat asam din ka sawl ngal ua, amah leng lauhthong mel sim in ahong pawt khia hi.

Kouleng pautam lou in police station lam juan in ka paipih ta uhi. Inspectorpa'n thu dotna hon pan ngal a, aman leng hi chi'n a, ahin khua ahon genta hi. Ka min ahihleh Thangoi ahi a, Lamka akipan ka hi a, Linda toh inlam aka omlai pek aki pan kana kilawmta ua, hiailam a, ahong om akipan kingai dan in ka om uh. Hi leleng aman midang khong angai jel, ka hehsan chiang in ka inn khong uah ahong pai jel a, ahong giak jel, a ut hunhun in giak din ahon sam jel, asihma ni jan in kava giak mah, dak 8:30 lak vel in doorbell ahong ging a ihmu lem ka kineih ua, ka hon nuam kei uh achi hi. A sihni in keile muanmoh a ka om khak di lau in kana kibu chi'in gen beh hi. Ken leng door bell a ging joh in Linda phone ahong pai kha hiam? Chih ka dong kik a, aman a phone switch off achi ta hi. Inspectorpa'n leng Thangboi thu gen te apan amah hidin a gingta kei pah a, na paithei dia, apoimohna a om leh honsam di ka hi uh, chi'n apaisak ta hi. Thangboi pai nung in Linda sim jat a number, Hoihnu tungtawn a kan khiak kon sawm ta uhi.

Hunte hongpai jel in x-mas leh kumthak te bang theihlouh kal in abei maimah hi. Keileng kumthak ni nih ni in inspectorpa mu din ka pai ngal a, happy New Year chi'n khut ki-len in tutna ah ka tusuk ngal a, thu kong kikum panta uhi. Amasa pen a Linda phone no. kankhe din inspectorpa kiang ah ka gen ngal a, aman le Hoihnu a phone pah ngal hi. Hoihnu inleng ahon hilh ngal a, a sim Airtel ahihlam ka thei ngal uhi. Inspectorpa toh company te kiang ka juan ngal ua, asim no.pia in a call log teng ka check sak vek uhi. Huai ah a sihma in no. nih ka musuah uhi. A nih in ka phone theikei uhi. A sim no. ka jong nawn ua, kua proof a, kua hiam chihka kan nawn uhi. Huchi'n khat Linda min a kila ahi a, khat pen vaipa min a kila ahihlam kon theikhe nawn uhi. Huchi'n sawtlou nung police constable te nih ka sawl ngal ua ahon tonpih ngal uhi. Thangboi leng kasam ua, sawtlou nung in ahongtung ngal hi. Kouleng finger print ka check chiang un a temta a khut kuamah a, a kituak kei hi. Buai huai petmah jel, kou leng vaipa leh negro pa thu dot din kon tonpih ta uhi.

Kou leng thu dot kakipan ngal ua, negro pa pen atuam ah ka dong asa uhi. Awle Linda toh koi a bang chi dan a ki theikha? Bang tan kingai nahi uhiam? Chih leh bangbang hiam ka dong ta uhi. Aman (negropa'n) leng amin khong agen a, Linda toh club ka hohna ua kitheikha ka hi uh, kha bang jah hiam ka ki ngai ta ua, mi dang le ngai veve ahihlam haih vual louh in ka thei, hi lele sum le pai apoimoh bangbang a deih hunhun in ka piak theih jiak in ahon ngai pet mah hi, ka hehsan sim chiang in aroom ua giak din ajan ajan in ahong pi jel hi. Huchia ka lup khom chiang un ka heh di nuam ka sa nawn kei a, ka lungdam jel hi, chi'in a gen hi. Ajoh in vaipa ka sam nawn ua thu dotna kon panjui nawn uhi. Aman le amin a omna teng a gen joh in, Linda toh a thu uh hon genpan ta hi. Linda toh ka ki theihna uh ahihleh jan sawt nung a cinema en khin ka pai leh linda leng auto mu jou nawnlou ahi dia drop din ahon ngen a kenle ka va drop a, amah leng kipak lua in ka phone no. bang ahon ngen a ken le ka pe ngal hi.

Amasa pen in "thank u" chih ngenngen message ahon khak a, ka ngaihsak khol kei.A chang in ahon mis call jel a ken leng ka call back ut kei achi hi. Atawp in keileng (vaipa) kidekzou nawnlou in phone ka bawl ta hi. Ni bang jah hiam ka kihlou nung un kingai dan in ka hong om uh a, ka kimuhna masa pen ding un restaurant ah anne din ka chial a, huai jan ama (Linda) kiang ah ka giak ngal hi chi'in vaipa'n agen hi. A numeinu khatvei accident a hospital a aom lai a, eimipa, negropa leh amah va kituak kha thepthup uh ahih dan bang a gen hi. Inspectorpa leng alung buai ahi ding a pautam hetlou in lock up ah koih din thu apia a, hu chi'n ka nih un hotel ah anne din ka pawtsan ta uhi. Anne kawm a ka kihoulim lai un inspectorpa phone ahong pai a, akin thei bang a police station apai ngai ahihman in ka kikhen kha ta uhi. Inn a tung khit sawtlou nung in ka phone ahong ging a ka et leh inspectorpa ana hi a, Hoihnu anau pimang a om ahih dan, Hoihnu deih uh ahih dan ahon hilh hi.

Ken leng police station ka juan nawn a, Hoihnu leng ana om a, ken leng Hoihnu kiang ah bang jiak a nang honpi lou ua nanau pi se uh hiam chih ka dawt leh kei inna omlou kai chi'n ahon gen hi. Kei leng zing chiang office kai ngai di ahih chiang in Hoihnu ka tonpih a ka paita uhi. Hoihnu leng alungmuanglou ahi ding a na inn uah hon giak sak mai in, chi'n ahon ngen hi. Kenleng ka sel kei a ka tonpih ta hi. Keileng inn ka tun in zu tamlou ka dawn kawm in ka houlim pih hi. Huchi'n houlim khin lum din ka hong kisa ta uhi. Ka ihmu pah theikei a bangbang hiam ka ngaihtuah na in ka lungsim ah Hoihnu muanmoh na ka nei mawk hi. Kenleng inspectorpa ka message a jingkal dak 8 a hon phone din ka theisak a, ka hong ihmu ta hi. Jingal ka thoh in Hoihnu a thou khin a, keileng ama lam sa'ang mah in hon en ngamlou hileh kilawm in ka thei hi. Kenleng ka laptop la khia in Hoihnu kiang ah a facebook log in din ka sawl a, ken leng ahon muangmoh louhna din negropa friend teng ama (Hoihnu) account apan et ka sawm ta hi.

Huchia limte khong awl a ka et lai un ka phone ring hongpai a ka sana ka et leh dak 8 ana ging chet a keile ka phone pick up in kinoh chi deuh mai in kahong pai chi'i ka koih a, ka laptop leng ka bag ah ka guang a, huchi'n police station lam ka juan ta hi. Nasepna ah kai tohkailouh toh thuah ka hihman in ka MD pa uh muh di bang ka lin vungvung mai hi. Himahleh inspectorpa'n a gen mai thei jel hi. Inspectorpa toh Hoihnu nau hutkhiak didan ka ngaihtuah nawn uhi. Hoihnu nu te kiang a ka kan chiang un lah pasal mi li khong ahi ua, van toh ahong pai ua Hoihnu a omlouh man in ka nau neu uh a tonpih uh, chi'n ahon hilh uhi. Ni thum nung a hong pai nawn di kahi uh chi'n ahon paisan uh chih agenbeh uhi. Ken leng inspectorpa kiang ah matkhiak theih na dia chance omsun khah suah lou a ana tang pang din ka gen ngal hi. Huchi'n anne di'n inspectorpa toh restaurant juan in kongpai ta uhi. An ka nek kawm un ka laptop ka lakhia a, Hoihnu facebook log out lou ahihman in ka utut ka en theita hi. Hu chi'n Hoihnu inbox teng ka check vek a bangmah manmohna thu gelh ka mu tuan kei hi. Ann nekhin kong kikhen ta uhi.

Hoihnu naupa apimang te hong pai ni di ngak in ka om uhi. Zing ni hong suak a keileng office kailou jen in police station lam ka manoh jel hi. Inspector pa to ka kihou ngal ua, agen bang in police constable li toh kou tegel Hoihnu te inn kiim ah ka na tang pang ta uhi. Mi hon muangmoh louh na din inspectorpa leh constable te'n leng police uniform silh lou in a om vek uhi. Hoihnu ahihleh a verandah ah ka omsak uhi. Sawt simtak ka ngak nung un van khat hong tai a, Hoihnu te inn gei ah ahong khol a, mi khat ahong kumkhia a, Hoihnu asam ta hi. Hoihnu leng kap kawm ina nau aminloh ngal a, anau leng van sung apan ahong kap khe ngal hi. Van apan hong kumkhe pan na nau na it leh nang hong pai in, nang ahi kon deih uh chi'n thu a peta hi. Hoihnu'n le kanau hon khah khe phot un hong pai di kahi achi a, anau apaisak ta uhi. Huchia a kihou sung un police te'n a kil kawm teng ana khak manta uhi. Inspectorpa'n leng apistol lakhia ngal in mi pimanga chu a khut jak din a theisak ngala, mipa tai khiat sawm mah leh polecete'n um khual khin uh ahihman in mat ahi ta hi. Kei bel amel tuam deuh ka hih man in bangmah ka bawl nuam kei hi.

Inspectorpa'n leng van sung check di'n a sawl a, mi dang te leng a om vek ua, huchi'n gari a sam ua police custody ah a koih ngal uhi. Inspectorpa'n thu dotna anei ngal a, alak ua a leader deuh in hi chi'n hon gen ta hi. Thangboi in ahon sawl ahih dan leh sum bang jah hiam pe dia chiam ahihdan ahon gen a, advance a leng bangjah hiam lakhin ahih dan uh a gen hi. Inspectorpa'n court a dinsak ahihma in ama custody ah a koih phot hi. Kei leng inspectorpa'n ahon sam a, Thangboi jon khiak ngai ahih dan ahon hilh hi. Huchi'n ken leng ka paisan nawn hi. Huai mi li teng bel court a din sak ahih nung un kha guk jail a koih din thutan khum in a om uhi. Ani nawn in inspectorpa leng Thangboi te innluahna ah va hoh ahi ding a, omlou ahih lam ahon hilh hi. Ken leng inlam (lamka) ah enkhe tu ding mi bang jah hiam phone tung tawm in ka theisak hi.

Hunte hong pai jel in thu bangmah jak lah omlou kum khat bang ching ding hita, inspectorpa ka phone a bang loh a hoih ding hiam chih ka dot leh lungkham ken kei tua i omna mun ah CID koih vek kahi, i nasep jou dekdek ta ihi, thil suikhiak theihlouh di omlou ahi chi'n ahon kha muan hi. Ni khat kei leng ann ka nek laitak in ka phone a hong ging a Thangboi Singapore a om ahihlam theihsak in ka om hi. Ken leng inspectorpa thil om dan ka theisak ngal a, aman leng inih a Singapore jin ngai ding ahi ahon chi hi. Kou leng jin din kong kisa ua, Thangboi lem leh aproof ka pua ua kong jin khe ta uhi. Hotel thupi tak khat ah ka tung ua, ka hong tawl dam ta uhi. Ani nawn in police comissioner kava mu ngal ua, thil omdan leh ka jinna jiak uh ban ah kithuahpih din ka ngen uhi. Ni thum sung ngak dia nget in ka om ua, kou leng tourist spot te khong leh phak theih na munmun pha in ka om uhi. Huchi'n agen bang un ani thum ni jingkal in phone tungtawn in Thangboi amau kem uh ahih dan theihsak in ka om uhi. Kou leng flight ticket la ngal in kong paipih vengveng ta uhi.

Thangboi thu dot in om a, a kipuan dan dungjui in negropa leng mat in aom ngal hi. Negropa kipuan dan in Linda thahna dia plan bawl tu amah ahi a, asem suah tu Thangboi ahi. Sum leh pai abei teng negropa'n seng vek hi. Negropa smuggler ahihlam theihsuah in om hi. Court ah dinsak ahihnung un Thangboi leh ami zatte bel bail in pawt ua, negropa pen kum nga jail tang din thutan khum in om hi. Linda in kong ahong nuamlouh jiak a, alawmpa (negrote mah) a thah sak ahih dan a gen hi. A that tak tak pen bel a gam ua helpawl hat mahmah khat ah lut ahih dan a gen hi. Kei leh inspectorpa'n leng pah tawina government apan ka mu ua, ka sepna uah promotion leng ka mu tuak uh.

BEITA

©Siamsinna leh Vakiangbu