WITH THE PERMISSION OF THE MOTHER!

By ~ Haopu Eimi

Nui! dak 4 bang ana pelman vele, eh! zan nitak kavok ann huan suankhia mah kahi hia? Bangteng hileh kawng thoukhe phawt himhim di. Katei! kazunle ana engsuah na mahmah e, tehdek man leng hilou kamaw, chi'a nung-leh-ma' hum zen a dailen buk lam manoh a katai phei tantan leh, heiha! Na mei toh in lan, ann bel suangphawt ve, chin lupna tung apat loiloi veh. Teh mahmah ding kahihman in kadamsung adia apatna din a thugen kaki zakmoh bawl mai tave! Maizen, nuam hina... tel e, sial zun zahzet ana kikhol etut a avele, zan nitak alup nung a kisingpi bawl guk teng mah hi ngelngel in teh!

Aktal in akpi a gep bang zen mah in kongkhak kagem phei khiankhian a, sangkil sik pan i kichih leh naute khat hon kap khe baba thahah. Kisuanglah kawmpi a va delh toh pomkhiat thuah kawm a "tawp aw bawi, nunu ihmut hai hi e" chikha laizang, "damlou hi e" chih ding hizenpi! Lupna tung apat dak 9 gin ana ngak photphot ou hon kichi gumgum ei. Poikei mangngilh man nave, chi'n mei.... katohpah suamsuamta hi. Singthem se mengmeng, singkhuahte apehpah utluat na lam ah thautui tambuah law kha zaw hipeuh mah ning in, meigit kasai toh kituak in meikuang in kahumsam leh kanak multe hon hultou duap a, kadiik mui fitfit lel hi. Ann bel domkhe zok in annkang khing kanau ka nesak a bel sil saisai in ann bel suang zou tuh kahi phawt ta! Om muang hithiat hitheilou ahih man in tuisouma chi'n tuang kaphiat nawn zauzau a, kaki kinsak luat nalam ah bench baan ah kataw ngum kava tat puak dup get ve. Tawngum i tahkhak leh kinuilun a chihte uh zaw, hopeless ahi mai. Huai kawmkal ah room lam apat "hong ihmu sak maimai ve ua, na bang uh hih puak lemlum nilouh uh e?" chi'n hon kihan khum behlap zawsop!

Inn sung a pa pen ki hichih chisiam mah le'ng, ama lohsa ngen ne a hing kahih man un kakumpi nu u thu kasel louh u mah ahoih pen ahilel. Huchi'n, anntang khakhin naute bawngnoi ding anntui kadiik sak kawm in kaki ngaihtuah dedu a, ihmut khamlou lua zaw hining, kana lusu man dek khanglang. Kanau khat uh hong thou nawn a, kongte (napkong) hongthou maw bawi, na zun vatha khia in lan na bawngnoi hong dawn ngal ou, cihtoh kihei kathuah leh vaknu pen ana himaimah a, tate nasan theitum lou cin kanui themtham hi. Common room lam kamelh phei zauh leh kanautum uh tumte a zunlak ah ana tubial zeizai a, a khut bang tangsak lehleh a'ih cia kagal sap leh a kamgei teng ek in ana dim nena a, heh mahleng huai ne a dai khipkhep a om leh hong subuai lou a minit 10 bng om ahih man in kapakta leh lam hi...!

Eh! meh huan di kadong khasam a, phong leng lah heh law phonphon zel dia, sa duh hiven hiai sakhi hou te sihzou toh pok mai ning, cia khin dang kasawk touh ganggang leh koi kawm teng va sawk kha kata diam, menchim bang zen in dolhou, vaimin chi, lamkhuang leh singkhuah na san gial kiat in hong kekhe lemlum ua, lamkhuang in kanung zang hon deng a puak dup hial hi. A gin ngaih sim mah leh, ka boss nu un phawk selou ahih man in kakipak a, kanung zang hon dengkha lamkhuang bang muitang kasa lehlam mahmah!

Huci'n, katate anntui diik kaban hawm khit in mehtui dia kasuan tamlou kaleep a, avunte diah in asa takte mei aam lak ah ka carry tuah zatzat hi. Meh bang kakhak khit hial ciang in ka inn phiatsa teng phiatma sang in ana nin zaw tham man a, second round din phiat leh tumte ek siak kathuah nawn somsom hi. Tate lah hon kithuahpih thei om nailou, a lian pen kum li mi di hipan, anuai ah thum bang akum simna hileh kilawm hial a kivualsuk deudau uh, kua piak theih lah hilou ahih man in ka buai pih khop thei mahmah hi. A lehlam ah amau buaipih zaw le poikei, i thu amang ua lauh leng ahon lauh ziak un, himahleh ka sahang ihmu uh mahmah ahi a buai huai, selkha zek lenglah kick bag kibang giap, athu mang in a mitmei i veng a lah naungeksa khok zaw, a ek nasan thak sakngai hial leh kilawm, zan ciang diakdiak, alungkim natan a i om zohkei ngeingei leh goal ngakte ball dive hi awmtak a tuanglai ah kidive khiat hi gige mai! nitak ciah na i semkei alah kizing buai, i lumhak alah saptoh aw sia teng kituak zel...

Hiai tengpi ngaih tuah kawm a ann ka hawi saisai laitak in kameh hong phuul khe zuazua a, huai toh kiton in upa pa legistal 1 toh building sum phut dawng din hong lut geih hi. "Neilem nailou" cih gige kisuanlah huai tuntun mah leh, neilou mah i hih cia cih zut mai ngai, upa pa houh in hon hehsan khawng di aw? ka cihle bang mah a genkei vanglak hi. Kamei teng lah meh tui in dap khu luilui, huai toh a kibuai phaphet lou lai pi'n inn kong lam ah tate friendly match fighting ana kineih uh, a hatlou zaw pen cup lasa a hong lut, a hatzaw pen in lah gen ding tasam tuan samlou. A zillou na-na din 'judge' chu kasiam loh hithet ve.

Ann minta, boss nu thou nailou a'ihcia nek theih nai tuan lou, tate'n lah hunger strike pan nuamta uh, ahitak a zaw, sabang kimeh vaang inchin, ei mahmah in leng ann nek kingak lah mai ahi. Nethei nailou thouthou chi'n nau zun sawp din kawng kipan nawn geet a, kanui! ka ok sahbon kamu zou mahmah kei! a kilkawm teng zong mah leng muh a haksa khop mai, cimoh kisa selua belsung, lupna nuai, khindang khawng peuh zong mah leng ka lohsam hithet hi. Huai zahtat na bei, milup nung cia taileh zatzat, annbel mehbel luh a zaanteng a phaphet lou, milamsa sung ah a inntek pen hi awmtak a om, boss nu toh same rank, buhpang sung a play ground dia zang, huai maikawi pheiphui zusa direct in ka ngoh chot mai! Eh, buhpang! muangmoh tenten a kava etleh a hakuh limpi mun bangzah hiam ah ana kuui a, ana nusia hi.

Sawp pan, tumte ek kanuai lakloh laitak in BOSS nu hong thou khe buambuam a, etmai in leng a neel huai kei pha mahmah, thang kisai dia mansa mah hong bang khe lelu a, bang hon gen masa di aw? ci'a diip kisai litlit a ka-om laitak in, "Phalkhovak pa, na ann hong thuk ou" hon ci a, gilkial a ngak lah a bang hiam bang na-na cu, rang deuh in ka thuk pah hi. Sa meh ana huan i hih cia, maipha muh bang kiki lamen sim gaugau, i lungsim khat bang nui heuhau a ki-om hinapi, kamkhat bakpan in mit lawt dek zen in hon en gemgam maimah a, kisuanglah tak a, bang ci a Vaknu nu, cia kadot tiautiau leh, "na hol gawp dia sakhi pok tui mawl khawng na huan e? chi ka leilei hilou maw, bang chik in chi bei in ann kane ngei a hia?" chi'n hong hang khe lawlaw a, ka tutna apat ka ki-ip zutzut hial hi. Ngaisiam ou, keimoh liuliau hi ei, ci'a chi piak toh ka thuah leh a ann kuang bang khawng tuan zou hial khop in table tung ah tat puak dup phet hi. Hon nek hial leh limsa zaw hin teh, nitak ciah leng ana huan nawn oh, cih toh a khutsil in kham a thuah a, ka gen masat ding bang kathei kei zuzen, atawp in keithuak di thou hi cin, Vaknu nu' ei, sahou beita akei maw! kacih daldal leh aheh ei, mimawl maths theilou na-na cu, bang a cikhe hial hi. A himhim thu in bang ci tuk in maths siam in science siam lengle, huai sahou tang nih lel miguk in meh nih bang ci suah ding le ci apeuh mah diam ah!?

Hang kawmkwm leh lungkim loutak in lupna lam ah alut phei gulgul a, lutpan cih din hong puak dom a, huaisa huaise zaw in apuak duup nawn a, atawp in zaw banglai koptah hong cimkhe dek leiloi hial hi. A thu katheih thak leh, a lut a table siik a akawng va tatkha, na salua a table a phil ekleh akhe in akhepi tep khasuk, huai phet a heh law mahmah a table dom vonvon a banglai sehna a nei ana hileltak hi. Haihuai, heh huai leh nuihzat huai lamlam bang sasim mah le'ng ama leisa leh lohsa ahihna toh paulou phunlou in ka ann ka kinek mengmeng uhi. Sawtlou nung in hong pawt khia a, na kuang hem mengmeng tel ve, suun nitum thapaih sawm natel maw? ka puan le sawp louh ding kacih pen nana sawm a, sawp ding kacih pen nana nawt a, cin han leh bai loihloih hon thuah khia hi. Cik a puan sawp ding genle hiloupi, ama lungsim a om teng thei di khawng a mikoihkoih mai, lah haisak a honsa, sawp louh di cih pen i na nawt mamsak bang kipak ding i sak leh teuh lou mai! Huiha, cin ka khuisa vungvung hial hi.

Khuisat a na zoh ding ahih louh man in ka kipan thak a, ka kuang sil lai taisan in ka va buaipih thathat nawn hi. A khedap taw niam zaw deuh pen kana nawt siangsak leh, kuan huai nawt in ci a, ka manager pa un atul sang pen toh na kilawm hon ci ahi, huaipen nawt in, nou lawi lah miphatna chang thei mahmah lou, ci zauzau kawm in lipstik kitat zauzau hi. Kalungsim in kuankhe zok henla naute toh lungmuang tak in ki-om hithiat leh kaci mahmah. Ahi'a lah kihoih sak cihmah tak, lipstik, eyebrow, powder nih vei bek phiatkhe zen a akinuh keileh fuh kisa zoulou, huai dia dakkal khat bang hun latel a'ihcia, ngak hamham ngai ahi hi. Zingkal khat a manager pa min thumvei li vei lam hon loh ciang in hi kasa nawn kei a, ngailua na maw? kacih khiat leh gintat louh pi'n hong nui phuphulh a, nang bangbang sawm sang in leng kangai sang zaw! fuhsi maitai lai, mi care zaw mah hon cih hial tak in ka ki-daam zou nawn mahmah kei! Hucia kei na pasal sang a midang ngai zaw na hih leh hon ma ve, tate ziak liuliau a om kahi, nu-leh-pa bei leng kahi samkei, pasal toupi hileng le nang sep tang teng sem ing a, nanik napuan nasan kon sawp sak a nalung kim keileh hon maa in, kachi khe loiloi hi.

Huci'a ka han loiloi sung teng mit lawt dek zen in hon na en a, heh kisa selua alu bang ana su ngaungau phet hi. Kagen di teng kagen zoh in, zouta maw? cih toh ngei bet hon thuah zat a, keileng a doh zou nawnlou ka hihman in a ngeitak mah kamun phiah tawi in kasatsak hi. Sual petmah in kakisual ua, ka tate uh bang patau in kap in akapkhe lawilawi maimah uhi. Ka gintat sang mah in ana hat thuthu a, katung a hon boh khum in kalu toh tuang a tat puak dumdum a, na kasa ngel hi. Khah lah hon sawm tuak lou ahih man in ka kikou khe lualau a, hon khah tuan louh lai ziak in tang leng katang zou nawn kei, si ding bang kisa in ka aw neih teng suah in ka kikou ekek nawn a, hon khak tuan kei lailai, ka kikou a, ka kinak kou sem a, kou petmah in ka kikou a, ka kikou tuaituai leh, ka khe hon sik zauzau in "bang gen a kinei la, en ann kine khinta a nang lupna tung ah na kikoukou lai a" cin ka zizi'n hon phawng hi.

Kathoh leh kalu nat cihtak in ana na a, kamang lam a kazi gilou pen in tuangtoh hon tahna hia ci peuh in ka ngaihtuah mawkmawk hi. Kazi' kasam a damdawi leh tui ladin kasawl a, hong nuihlut salsal bang kamuh leh kamang a kazi' toh kikhai kasa lua a kana nervous dek hial hi. Huai teng banah, ann na ne ngal diam u? kana thuk aw? cia hon cih behlap laileh ka lungsim a ngaihtuahna tamtak hon guan hi. Kumkhat a suty nih vei khawng kipai hamham ahihna toh tanau lainate inn bawl leh nasep tuamtuam huh dia kilawmpi tam mahleh keileh kei rest kipia in inn ka-om maimai hi.

Sun nilouh in kamang kangaih tuah kha nilouh a, atak a tung ding bang a kangaih tuah khak ciang bang in ka-ut mahmah kei. A lehlam ah kei pe'n kazi dan in kakoih zel a, kamang a kana sep teng toh kazi' niteng nasepte ka etkak ciang in kizawi tawn kasa mahmah, ka zanmang zi kei ding dan in kaki koih nawn a, kamang a thuak hak kasak bang in atak in leng kazi'n thuak hak hon salaw di aw? kaheh deksim cia leng ka mitmei veng a maitai zou gige ka zi'n bang hon ci ngaih di aw? ci khawng in kalung sim in ka suang tuah nilouh hi. Mihing zaw cituam ciat hi, ana thai deuh le'ng om dia, ana cowboy deuh leng om in teh, himah leh amasa pen zaw eikal ki-et fel leh bawl lem ding ahi. Pasal khenkhat thai tak a lungkim mahmah leng om veve, huci bang mah a numeite leng hithou, i lungkim na pen tuh ei a dia ahoih pen himai! Nungak tangval lai a 'nau' 'u u' ci khawng a kisam tautau, kiten nung cia 'pheiphuai' 'pheiphui' 'pekpok' 'lekluak' 'nangpa' 'nangnu' cia kisap baihlam mahmah! bangziak?? tel khelh ziak maw? telkhelh ziak zaw himah, a diak in itna tak hilou neih-leh-gou khawng ziak a ki-enlah kha mawk! cih khawng leh, khat in a ngaihluat ziak a zawl lut thoh top, itna hilou zawl a zawl lut thoh ci dante... khuakhat a zawl gai in apasal mat ngoh/gaam zoulou! bangziak? a pasal panna tuh, na khut langkhat kia na beng ging theikei di, cih hitop mai dan ahi! Huai ziak a khatkia itna bukim lou, nupa kal nuam leh kituak hih na dia a bul apat ki-it tuah leh kitheisiam sa a kiten ding ahi, cihte kangaih tuah bualbual a, hampha bang ka kisa thakthak hial hi.

Hiai bang thuteng limtak a ka ngaih khit nung in ka phone a dak ka-et leh zaan dak 11 bang ana pelta a, huchi'n ka lawmpa toh lum dia kisa in ka ihmu hiihit ta hi....

BEITA BEITA BEITA!

©Siamsinna leh Vakiangbu