LUANKHI NUL NAWN KEI NING

By~ UMuan Ton's Dsp

Phalbi zingkal ahi a, vot mah mah hi na pi in sing chih di ka neih louh ziak un khovot hichi in ka pum thuak mai uhi. Puan lum silh ding chi leng lah a lum ding le kinei zou lou a hih chiang in ka lupna ua kou unau thum toh kanu toh ka lum tiptep mai uhi. Kapa hon paisan nung kum nih di bang ching ta hi, huai a kipat ka zawng leh ngau hong kipan hi. A ziak bel kapa lohsa ngen ne ka hihna uah amah omlouh tak in amah bang a zong hat ka omlouh ziak un ka hon zawng zaw uhi. Huai sim louh innveng, innpam te muh sit leh pampaih in ka om uhi. Hiamhleh ka nu chihtakna leh kuhkalna toh nek ding khop ka ngah veve thou uhi. Sun chiang in ah ka nu ka huh louh kaal chiang un skul ka kai louh chiang bang un ka unau thum te toh taang a vasa beng ding leh vasa thaang kam ding bang in ka kizui zeel uhi. Mite’n ka unau in hon sim moh thei mah mah ua, akhen in pa neilou te bang a hon chi ua, huai chiang bang in ka heh a suak mah mah a lah akhat lam ah ka khasiat a suak thei mah mah mai hi a ziak bel ka ut mawng ua pa neilou ka hih ziak un, himahleh  pa neilou mah ka hih man un a puak dan ka siam thoh mai uhi. Kanau te ka thu hilh zel a miin hon simmoh mah leh gilou gilou a thuk het lou ding in ka thu hilh zel hi. Nikhat skul kakai na uah ka inn kiang te uh nau pa in ka nau a hong vua a, kei leng heh lua ka hih chiang in kenle kana vo thuk kha mawk hi. A huchi leh inn ka pai tak un bang chi gen a diam ah anu ka inn uah hon phuul hi. Ka nu nuthoi, mi du dak lou, leh mi mai mai a hong chi a, nou mi mai mai in kou nau na na khoih sak him him chi in ka nu kiang ah hon phul hi. Ken leng kanu kiang ah aman kanau a vuak ziak a ka vuak ahi chih ka hilh a, ahon thei siam mah mah hi. A miot tui pawt kawm in hiai a hon chi hi “ ei dik in dik tawk le le mi muh a akhial kihi gige ahi” chiin a hon hilh hi.

Hun leh nite pai hat mah mah mai in kum nih bang hong pai khin a a huchih leh ka khua ua skul om ah ka kai thei nawn ta kei hi a ziak bel ka khua ua skul om pen ah pawl nga tan chauh om hi. Kei pawl nga ka pass toh kiton in ka kai thei nawn kei hi. Huchia a hong om tak in ka nu in Lamka lam a om ka paneu te kiang a om ding in hon gen sak hi. Kapa neu in leng aw hon chih sak pah a ka kipak mah mah hi. A leh lam ah inn a om di te ka ngaih tuah khak chiang in kho ngaih huai kasa mah mah mai hi, ka naute lah hai lo lai uh ka nu le pan pih thei tak tak nailou, kei a pan pih thei pen in pawt san di ka chih chiang in ka ki oi thei kei hi a hin lah ka laisim lak loh lua ka nu in hon chih zel chiang in lah ka nu thu seel ding leng ka ut tuan sam kei hi. Huchia ut lou pi pi in ka nu ka nawlh bawl bawl a, kei om kei leng nou bang zuak di ka chi zeel a, kanaute khong le a kho ngaih huai lo voi khong ka chi hi. Huai ka chih phet in ka nu in Pathian in hong pan pih dia bang mah ana chi lou di ka hi uh nang lai hoih tak in na va sim dia ei insung hong nawp zawk sem na dia a hak le thuak masak ngai ahi a hon chi hi. A nitak in ka nu in ka vante ka bag ah hon guang sak a, bag dim nih mah mah apha hi. Ka vante khong guang zoh in ah kon lumta uhi. Zingkal khua hong vaak a ka pai na di hun in hon naih hiai hiai hi. Kei lah lin mah mah hi na pi in a lin lou dan in ka nui sel sal hi. Ka nu khasiat di ka deih het kei hi. Ka pai hut dek tak in ka nu in thumna hon neih sak a huai zoh ka nau thum te toh station lam manawh in ka hong paita uhi. Huchia ka hon pai laitak un ka nau neu pen pen in “ Uu ei nang hong zin san di na maw, kou miin hon sim mawh lolou di hia, hon zin san kei ve a hon chih tak in ka kha siat tha a hon suak lo guih a ka mit tui a hon pawt hi. Ken leng ka nau kaing ah kei a zin di hilou kahi nau ei kei maw lai vasim di ing a huai chiang a officer hong pang di kahi huai ngim na a hon om louh san dek mai mai kahi chi in ka khem hi. A hin lah kei ah kidek zoh na a om kei a ka nu leh ka naute ka muh chiang in ka kha siat tha suak in ka mit tui a hong pawt pawt nak hi. Ken leng ka nu kiang ah “ Nu ei ka nau te toh hoih tak in na na om di uh aw Pathian in hon om pih lodi ahi” ka chi a aman le “ Nangle pathian in hon ompih henla hong gah suah tei tei din pan hah tak in hon la in aw, inn kuan sung kinepna nahi” chih toh mangpha hon khak hi. Huai zoh in khitui nuul kawm in ka nu leh ka naute inn lam paita uhi.


Ka nute pai zoh nung sawt lou in ka bus di uh hong pai a kei leng ka bag te la in bus sung ah ka hon tuang ta hi. Lampi hoih louh toh gari bang a ki sing ni louh mai hi. Bus sung a ka tuan lai tak in ah ka lung sim ah “ka nu te lou kuan ta di uh hi a, bang a chi di uh aw” chih khong hong piang hi. Huai lou in lah Lamka a ka pa neu te kiang om dek tawk hi leng le a nupa ua ka om di hon phal na uh adiam, ka paneu hi tawk lele a zi pen mi tuam ahih man in chih khong ka ngaih tuah hi. Lampi sau sim ahi ding a ka tung hak mah mah mai uhi, tung ding i ki sakchiang in kitung khe thei mah mah lou hi. A tawp tawp in Lamka a chih uh ka hong tungta hi. Ken leng ka tuan man ka bahar pia a ka pai dek leh a conductor pa in hon sam kik thak hi. Ken leng  bang a di aw chi in kava naih phei pah mai hi, a kiang ka tung tak in bang di a  U ka chih leh na bag man te na hon pe nai kei bag nih tak hilou maw, tam a tam thei lai zaw mah khut a toi thei le hilou hiai a puak man om di ahi hon chi hi. Kenle sum tawm nei ka hih man in U ka sum neih in hon daih lou a khat man chuah hon pe leng hi thei lou di hia ka chih leh hin driver pa toh vaki hou ua chi in driver pa kiang ah a hon sawl ta hi. Kenleng driver pa kiang naih peih pah in Pu ka sum neih in hon daih lou a bag puak man di pen chi luai luai a ka gen leh aw le poilou hi thei mah hi chi in a honna san sak pah vang lah hi. Kei leng kipak lua ka hi di a ka kha siat tha bang a hon suak mawk hi a ziak bel ka theih ngei le hilou in honn aheh pih lua a hih chiang a. Huai teng ka sai zawh in kapa neu mun khat ah ka hon ngak char char ta hi. Ka paneu office kai a hih ziak in ka nuneu in hon pi hi. Ka nuneu in hon pi tak in hoih tak tak in hon hou pih hi. Na hon paithei na maw? Buaina na hon tuak kei maw chi khawng in na gim hia khong le a hon chi hi kei leng ki pak tak in a hon dotna te ka dawng vek hi. Ka lung sim ah ka kipak gu mah mah mai hi a hang bel kei na kilametna sang a thupi zaw in ah honna vaidawn uhi. Ka paneu ten ahih leh ta nih nei ua numei khat leh pasal khat ahi. Ka nuneu hon hou pih dan te khawng nuam kasa a huchi den ding in ka koih kha pah mai hi. Ki neu lel lai a hih chiang in bang mah ki hisap thei lou a hih chiang in. Inn ka hon tung tak in ka vante ka room di a ka koih lut khit in a tate u toh hon kitheih tuah sak na hon bawl a, amau min te ahih leh sangboi leh nenem ahi. Huai ka hon zoh tak un ka nuneu in in kiim taam lota na hah siang pah ngai in teh sonboi a hon chi a ken leng amasa a hon hou pih dan toh teh in ka dawng a nuneu ka gim lolai zing chia hih leng hi lou maw ka chih leh ka nuneu a heh chih tak in hon heh a hiai mai mai na hih peih kei pah in chi in a ho tai zial zial hi kei leng khasia kisa in ka kap leh kap lai koh tagah pa khong hon chi hi. Station a hon hou pih dan te toh ka teh kak chiang in kikhai kasa lua hi. Kenleng huai zoh phet inn kim te ka khou siang pah hi. Huai khou a ka om lai tak in ka paneu a hong tung chet a, nasep a hon muh tak in, bang dia sonboi na sem sak u eh tunio a hon tung pan hilou a maw a hon chih leh ka nuneu in hah ken i chih leh va hah tei tei hi ven hon chita hi. Huai ka hah khit phet in ka paneu toh tom chik ka hou lim ua ann kon neta uh. An ka hon nek un tuh ka nu neu in a tung huum teng ka kuang ah a hon thuuk hi kenleng bang mah gen tam selou in ka ne suk mai hi. Ann ka nek zawh in ah tv sawt lou ka en a huai zawh in ka lumta hi. Huchiin ka hun ni masa ka hon zang bei pah ngal hi.

Zingkhua hon vaak a ka thoh leh ka nuneu le a hon thou a, ken le a mit mei ven na in ann khong, meh khong ka hon huan ta hi. Ka hon huan tak in i huan pat na ahih chia neng chik khong min lou a hi ding a an nek in ka nuneu in tuban an na huan chiah pil vangta ou ho chi hi. Ken leng aw le chih toh ka thuah hi. An ka nek zoh un ah ka paneu in tuni in na nuneu toh na skul kai na di nana en di uh aw a hon chi a ken le awle ka chi hi. Huai nung sawt lou in ka paneu kiang ah paneu nang toh hithei lou di hia ka chih leh ka nuneu lung lou lam hi kha a diam ah kei hon muang ka leh hoh pih aw ken ka hoh pih kei lo di hiai son boi mawng mawng bang kisa a singtang a hong kipan hilou a maw hon hichi sim mawh vial chi khawng in a hon hang zial zial hi. Kapaneu in lah bang mah gen lou in na nuneu toh ana hoh mai ua kei man theilou di hi veng aw a hon chih toh kuan khiak a thuah ngal hi. Huai zawh ka nuneu kiah ngaih dam ka ngen a, huai khit in skul zong ding in ka hong pawt kheta uhi. Skul ka hon zong chiang un ka nuneu in govt. skul hoih lo khol lou khat ah hon admit hi. A skul bang lei a kizuut ngen teacher nih leh thum khawng chauh om na ah hon khum ta hi. Ut huai khol kei mah leh amau hon chawm ding a hih ziak in kinial thei lou hi. Huchiin inn ka hon paita ua, ka paneu leng office hong tawp baih in inn a ka kisutuah uhi. Ka paneu in ka skul admit na khong hon kan a ka gen leh a nupa un hon ki nak loh uhi. Kapa neu in govt. skul a admit hoih salou a hih chiang in ka nuneu toh hong kina ta uhi. Huai hong kinak tawp tak in ka nuneu ka kiang a hong pai in nang mipa ka innsung suse dia maw na hong lut nap sakei hial ni teh. Na inn lam ah opai kik aw khong hon chi hi. Huai nitak chuh an leng ka ne kei a zan kho vak in ka kap mai hi. Ka lungsim a ka nute ka ngaih tha bang a hon suak a ka mit tui te ka nul hi. Ken ka nuneu huchi lawm lawm di dan inle ka ngaih tuah ngei kei him him hi.

Skul kai ka hon panta uhi. Zingkal a ann huan ngai, tui khai ngai, meh huan ngai puan leng a om chiang a sawp ngai lai sim na hun di leng a ki nei kei hi. Huchia kipang kawm kawm a buh hiam meh hiam neng kha chik hih khelh a om leh tai leh vuak ki tuak hi. Lai sim dia hong pai himah leng laisim na di hun man leng ka nei mah mah kei hi. Exam te ah bang pathian pan pih na toh fail lou in ka pass tou thei thei vanglak hi. Himahleh haksatna theih phak louh tawp khawk ka tuak hi a ziak bel inn na i sep toh i laisim na di toh hun hon kidaih thei kei hi. Skul kai lah ki ut mah mah a hih hang a kai louh ni bang tam a tam thei inn a hih di poi mawh om ziak a. Ka nuneu in a tate bang mah him him hih sak ngei kei hi kei kia in inn na sem hih di om leh hih. A zun a ek uh ken ka siak vek mai hi. Aki duat ua nek ding om le leng kei a di a tuam a hise hi himah leh ka paneu om chiang in hoih tak n hon bawl zel hi, huai thei lou in ka paneu in ka nuneu a phat thei mah mah lai zawmah hi. Skul kai lou hun tam nei lua ka hih chiang in absent fine ka hau mah mah hi. Nikhat absent fine ka hauh luat ziak in hon sawl kik uhi, inn ka tung tak a ka nuneu kia ka gen leh nang mipa skul le hoih kai ngeilou hi ve chin nang le nang nakisung kei dia ken nang thil teng hon sung sak tha hah lou di, nanu na hon sa a hia khong hon chih khum zial zial hi. Kum kim bang hon pai ta a, kanu laithon khong ka khak zel a himahleh ka haksat na khat vei mah leng ka gen kha ngei kei hi a ziak bel ka nu lung gim di leh hon lung hi mawh luat di ka ut louh ziak in.

Kumkim exam ka hon bawl uhi chih leh bu khat in ka hon fail ta hi. Ka hon fail tak in ka nuneu in hang chih tak in hon hangsan hi. Tu ban na fee leng ka sung nawn kei di nang leh nang nakisung vek di, a fail te khong ka chawm nuam het kei a hon chi hi, huai a hon chih tak in ka lung a liap mah mah mai hi. Kei ki lawh di hi leng le kua mah ka theih la om lou a ka fee te khong bang chi sung ta di chih khong ka lung sim ah hon pawt hi. Ka nu ka ngaih luat tha a hon suak a amah toh om leng hiai bang tuak lou di hing a chih bang ka lungsim a hon pawt hi. A bang bang hi leh ka in kiang ua nasem khat om hi a huai kiang a va gen leng houh hon na panpih theih kha di hia a chih ka lungsim a hon pawt khia hi. Huai ni zan bang ka ihmu thei hetkei a kakingaih tuah kha den hi. Zingkhua vak di leng ka ngak lah het kei hi lah zing khua hon vak lou thei lou hi. Zing khua a hon vak ta ngei a ka thoh phet in ka inn kiang pa uh kiang a na na sep na ah non ton pih thei diam ka va chi a aman leng kou mi kakim uh a hon chi a huai tak in chuh ka lung a liap gai vek hi, hiamh leh ka inn kiang pa un ka lawm te kiang khong ah kon na kan sak di hon chi thak leh ka lung a nuam tuam mah mah zel hi. Huai khit in ka inn uah ka pai phei leh ka nuneu in zingkal kal a mi inn a bang va hih eh hon chi pah ngal a, kenle va hoh mai mai ka hi ka chi hi. Mi inn khong a pawng hoh hoh di nasa a hia chih toh hon thuah ngal hi ken le dawng tam het lou in inn sung ka lut san a buh leh meh khong huan kava kipan hi. Kumkim khit nung chuh skul ka hoih kai deuh ta a lawm bang ka hon nei samta hi. Ka lawm pa min a hoih leh Khamboi ahi. Khamboi in ka hinkhua a hon thei a a hon hen pih mah mah hi. Skul a sun chiang in ann hon pozel a huai khong a hon nek pih zel hi a ziak chuh inn a ann ka kham ngei louh a hon theih ziak in. Khamboi toh kakithuah thei mah mah ua ka inn uah leng a hon hoh zel a, ka nasep khong a hon pan pih zel hi. Skul a ka om lai siah chuh na sem lou kahi mai hi inn a ka om nak leh na sep di om den hi, laisim na di hun kichi te a om kei hi. Lai ka sim nuam thei mah mah a skul ka kai chiang inn off period te bang a hih kei leh break chiang bang in kimawl hetlou in ka lai te kasim mai hi. Huchi kawm kawm in ka pang zel hi. Ka lawm te gen taak louh ka inn kiang te khong unleng a hon heh pih thei mah mah uhi. Kiginni te suti ka hih chiang un huai hun te kiloh na in ka zang zel hi. Kha khat in kaal khat ka kai kei gige hi huai sung a ka tup chuh ka fee di loh khiat di chih ahi. Mite inn va zuut a hih kei leh dai len buk tou bang khong in ka kuan zeel hi.  A khen chiang bang in kei kia om zaw leng zaw nuam sa zaw kha di kahi chih ka lung put khong ahi nak hi.

Hun te kei lam ngen in a om hi ka chi lou thei kei hi a ziak bel ka hih na lam lam ah ka lam zang a pathian pan pih na toh laite bang ka sim tou zom theih thei vang lak hi. Kum tawp lam bang a hon hita a ka fee te kha khat sung nailouh in a om hi. Exam lah nai mah mah ta  ahih ziak in ka principal pa kiang uah kava pai a “sir ka fee kha khat ka sung thei naikei a exam hon bawl sak mai un exam zoh chiah ka sung vek na di” kava chih leh a ut kei a himahleh ka om dan te khong ka gen chiang in a hon exam sak ding in hon phal sak ta hi. Kum tawp exam ka hon bawl a laileng kidaam lou hial in ka hon sim a inn sung nate hih kawm mah leng le ka hih kawm kawm bang in ka sim gui gui sek a huai ziak bang in taai ka thuak kha nak hi. Exam te nawp kasa thei vang lah hi. Ka hon exam zou ta ua ka zaang khai tuan mah mah hi. Kiloh ka hon pan nawn a ka fee te sung na ding in, pathian panpih na toh kiloh na di bang ka mumu thei vanglak a baan a mite hehpih na te ziak in leng kiloh na di ka mu thei se hi. Exam result te suak na di hon nai hiai hiai nawn ta hi. Ka diip bang a kothei mah mah a ka fail kha di aw chih bang ka lung sim hon luah pi pen ahi. Zingchiang a exam result suak di hileh a tunitak bang in ka ihmu thei mah mah kei hi. Ka pass di aw ka fail di aw chih chauh ka lung sim ah om hi. Zingkal a hong hih phet in kuamah thoh ma in result en ding in ka kuan khia hi. Skul ka tung phet in result board kava en pah hi, a tung a bang pan ngam jejen lou in a tawp na lam a pan tou tou leh vang phat huai tak a a khatna a ana om hi. Kei leng kakipak lua a a mun ah thumna ka neih pah hi. Huai tak in kipak mah mah in inn ka pai ta hi, ka sung kuante leng ana thou ta ua amasa pen in ka paneu ka hilh a huai zawh in ka nuneu ka hilh hi. ka nuneu ka hilh tak in nasem lou zen a sim na hih chia a khatna bek na tung louh a maw chi in hon hou hi kenle ka pona lomah mah hi a ziak bel theih tawp suah a inn na kisem a sem lou hon chih ziak in ka lungtang a hon suna mah mah hi. Ken leng bang mah gen tam lou in ka room a ka pai san a a guk in ka kap nilouh hi. Huai ni mah in laithon ka gelh a kanu te ka kha a ka exam na a akhat na tung ka hih dan khong ka hilh hi. Huai khit a pan kakiloh nilouh a inn pai ka sawm hi. Ka nuneu kiang ah christmas inlam a ka zang nuam ka paithei diam ka chih leh na ut leh kipai lel tak ve kua ngaih lah hilou chin a a hon chih khum geih hi, kei leng kisuang lah kawm kawm in ka kipak ka chi hi. Huan  inn lam te kiang a christmas zang dia hon pai di kahi chih ka hilh hi, honna pi ding in leng ka chi hi. Huan chuh inn lam pai ding in ka hon kisata hi, naute van di khong ka lei sak a, zinpak ding in chikhum bawm khat ka puak di chi in ka lei hi. Kapaneu te inn nusia in ka inn lam uh manawh in ka hon kipan kheta hi. Gari a ka tuang hun in inn tung kaal ding bang ka ngak lah mah mah mai a, kanau te bang ka mu nuam mah mah hi. Ka phur luat ziak a diam ah gari bang hat a hat in ka thei a ka tung pah uhi. Station ah ka nu leh ka nau thum ten honna ngak leilai ua ka muh tak in khasiat na toh ka pum dim a kap lou ding ka chih leh ka kap kha a, ka nu in bawi hon kap ngal kei ve ei kipak lua i ngal e i hon muh a hon chi hi. Inn lam ah kon pai ua, kanaute van di ye khong ka puak ye ka piak leh a kipak thei mah mah uhi. Kanu in a nawp hia a hon chi a kenle hi nawp mah e nu ka chi hi. Huchiin christmas nuam tak in ka hon zang uhi.

Christmas leh kum thak khong ka hon zat zawh un ah lamka lam ka kik hon hut dek nawn ta a ka lin mah mah zel hi. Kanu kiang a kei kia in inn ka luah di ka chi a aman le bang ziak e nuam salou maw na paneu te kiang a hon chi a kenle huai chi dan le hi tuan kei kei chauh in om leng ka ut a hi ka chi hi. Aman le aw le nang chih dan dan ahi mai kei dia a hon chi hi. Lamka lam ka pai dek in ka nu kiang ah “Nu officer ka hih ma teng inn lam hon pai nawn lou di kahi aw” ka chi a, ka nu in le bawi i hon munuam lo kei di mw a hon chi a, kenle nu ei kenle hon mu nuam lou hilou ka hi himahleh ka lohchinna dia kon pai pai kipha mawh lou ahi ka chi hi. Lamka lam ka hong zin ta a, ka lawmpa khamboi nu leh pate panpih nate toh ka inn luah di uh ka hon muta uhi. Huai a kei chauh ka om hi. A bul tung in haksa kasa sim mah mah mai hi, hi leleng hun hong pai zel in ka haksat nate hon kiam deuh hi. Skul a admission bawl dia kava pai leh ka principal pa un honna sam a kei leng kava pai leh “ Sonboi nikum a khatna na luah ziak in kum kim tan na skul fee a thawn di ahi admission le a thawn di ahi hon chi hi. Kei leng kipak lua in ka principal pa bang ka chibai hi. Skul kai ka hon panta uhi, ka paneu te inn a ka om sang in le ka hoih kai thei zaw a lai leng sim na di hun man ka nei zaw hi. Skul ka kai louh chiang bang in mi dai leng buk hah khong in ka kilawh zel a huchi in tampi pi ka loh khe zel hi. Huai te in ka inn bahara te ka sung zeel a ka skul fee di a ban ate ka khol zel hi. Huchi in kumkim hon hi man nawn a ka exam na uah khat na mah in ka hon pang nawn a huai ziak in a kumkim om teng leng ka skul fee a thawn nawn hi. Huai kum chuh skul fee k sung kei hi, a thawn ngen in ka kai hi.

Kum te hon pai zel in kum nga bang hon pai ta hi. Kum nga sung bang ka sung kuan te toh ka kimu ta kei uhi. Ken ah pawl sawm ka sim lel le lai hi. Huai kum nga sung te ah skul fee khat vei mah leng ka sung kha kei a, a thawn ngen in ka kia hi. Pawl sawm ka hon hih tak in ngaih zawng ka hon neita sam hi. A nu ten hon deih sak ua ka laisiam ziak le hi lou in ka mihin zia a hon theih ziak un. Kikim ahi a amin ken hi kimboi chi ngen in ka sam hi. A inn ua ka hoh chiang bang in ann ne sa ngen in ka pai hi. Amau leng hon deih sak ua, kou leng kaki ngai bok uhi. Kenleng nop kasa tuan mah mah hi. A inn uah om pih bang mai in a hon nei ua ka giah louh chiang bang in leng an ne sa in ka pai tei tei hi. Kimboi toh skul khat a kai khawm ka hih man un ka lai te bang uh ka theih louh te bang u leng ka kihilh thei zel uhi. Nikhat skul kai tawp inn lam a kapai lai tak in kimbawi pa toh lampi ah ka ki tuak ua ka hou pih leh aman le hon dawng a ka inn luah na a ka ton lut pih a huai ah singpi khawng dawn sak in ka om leh hon kha sia in hon kap a, Sonboi ka hon bawl dan te ka kipak lua chi in, ka inn uah na hon om diam a hon chi a kenleng huai ngai kasa kei e pa ei kei leh kei leng ka ki chawm zou lua ka chi a. Aman le huai thu hi lou ahi ka inn ua na hon om di ahi a hon chi a ka nial thei kei hi. Pawl sawm ka hih kumkim in ka inn ka suan a, kimboi te inn ah kava om hi. A nuam mah mah mai ua puan lah sawp ngai lou kimboi in sawp a kei hih chuh inn kim hah khong ahi hi. Lai hoih tak in kasim thei zaw lai di. Pawl sawm first division in ka pass hi. Ka nute toh laithon ki tat sat lou in kaki khak tuah gige uhi. Huai ban leng ka sunzom tou a class 12 leng first mah in ka zou hi. Huai zoh in BA ka hon la tou hi. Post graduate ka hon zoh in ah civil services ah exam kon sawm hi. Huai a exam na ding in sum tam a lut chi tuak sim hi a ziak bel coaching khong laak ngai ding ahih ziak in kei leng tawp kik ka sawm mai hi. Huchia ka om lai tak in kimboi pa in hon tosawn in ken kon pan pih di na exam nuam leh exam di na hi hon chi a kei leng kipah na toh ka mit tui bang a hon pawt hial hi. Civil service chuh ka hon exam ngei a huai a lochinna thupina tak ka hon ngah hi. Ka exam na uah IPS ka hon ngah hi. Ka ngah ka theih phet in Pathian kiang ah kipah thu ka gen a, huai zoh kimboi leh a nu leh pate ka hilh hi.

Huai ka hon ngah tak in mipin hon loppih in nidang a hon musit mah mah u leh nau, ka paneu ngoih ngoih na ngawn te in leng hon kipah pih in hon lop pih uhi.Nikhat chuh skul function khat a chief guest in hon pang sak ua ka speech tuh hiai bang ahi

“ Naupangte aw nu leh pa thuman kan a hoih om lou hi, ban ah kuh kal na ki tasam hi. Kuhkal na leh chih tak na ei Zomi sung ah poimawh mah mah hi. Huai ziak in ka hon hilh thei sun ahih leh kuhkal tak a pang a pathian phawk kawm ding in hanlung chiam thak ni. Kei hon en un nidang a haksa kana tuah nate, luankhi ka nuul nate leh kana kuh kal nate ziak in hiai tan ka tung hi. Kei ana kuh kal lou in ah pathian an phawk kei leng hiai tan tan tung ding in ka kiging kei hi. Huai ziak in Luankhi ka nul nawn kei ding a hinkhua nuam tak in ka zang ta ding. Kei bang bang a lohching na ut ua leh kuhkal leh pathian phawk kawm in hon gam tang un”

Huchiin ka speech ka zou hi. Hun te hon pai zung zung in ka na di teng khong, training teng khong ka zawh in ka kholam pai ding in thunei te kiang ah ka ngen hi. Ka ngetna bang in hon phal sak uhi. Kanu ka chiam mah bang in IPS ka hih khit nung in ka kho lam a ka pai kik a, ka sung kuan te ka pi khia a Lamka sang a thupi zaw leh khopi zaw Delhi ah ka om pih den ta hi.

Khen IIna :

Delhi ah kanute toh ka hon khosa uhi. A bul tung lam in kanu leh kanauten haksa asa mah mah uhi. A ziak bel singtang gam a khang khia leh kum 20 val di bang om nung in thakhat thu a gam thupi phaizaang mun a kisuan guih ahih ziak un. Himah leh Pathian pan pih nate toh ka khosa tou tou thei vanglak uhi. Sepna lam ah IPS khat hi saam leng le mibang a sum negu kahih louh man in ka lawh chauh a kinga ka hih na uah mi bang in khosak na lam ah nuamtak in ka khosa kei hial uhi. Himah leh huchi lawm2 a haksa le ahi tuan kei, a hun geih chih ding dan ahi. Kanau siamboi in engineering zil in, akhat pen lalboi pen in ah MSc (physic) zil lel hi. Inn ah inkuan kim a an nek khawm chih bang leng a vang mah mah hi. Kei bang a diak in a sun a zaan a duty a om zel kahih na ah inn aleng ka huci om tam kei hial hi. IPS kakai nung leh Delhi a ka om nung natan inleng kimboi toh kaki thuzaak zel ua, a nu leh pa te toh leng kaki thuzaak zel uhi. Huchiin kum 2 di'ng bang ka om nung un ka nau ten ah a siamsin nate uh hon zou uhi. Ken leng Imphal ah posting ka hon mu geih zomah lai hi. Hiai posting di thu katheih phet in ka sung kuan te kiang ah Lamka lam a pai di ka hih dan uh ka hilh hi. Huai phet in ka nu'n ah inn lam pai di chi in phur tak leh kitha lawp tak in a om hi.

Huchi'n ah march kha di lak khawng in ah Lamka lam zuan in Delhi apat ka hong kipan kheta uhi. Ka hong pai di chih kimboi leh a sung kuan te leng ka hilh leh kimboi' pa'n ah Imphal ah konna dawn ding uh a hon chi hi. Kenle huai kisuak buai sese a ngaikei sepgaih escort na nuai a hon pai di kahi uh ka chih leh leng ka hon pi di uh a hon chi teitei a, ken leng nial zoulou in awle kachi mai hi. Delhi akipat lenna in ka hon kipan khia ua Imphal airport chuh ka hon boh ta uhi. Police ten honna vaidawn in, Kimboi nu leh pate toh leng ka kimu uhi. Huchi'n ah imphal ka hon tung tak un ka om na di mun uh Game Village ah Police ten hon kha uhi, huai ah ken Kimboi te ka ton pih hi. Police te a fel zou khop mai ua inn ready sa in ana koih uhi. Inn ka tung tak un singpi khong dawn khawm in ka nu leh kimboi nu leh pate kitheih tuah na ding in introduction ka bawl hi. Ka nu inleng kimboi nu leh pa te kiang ah kipah thu khong gen in, nidang a ka tung a asiam na uh mang hilh ngeilou ding uh ahih dan khong agen hi. Ken len kanu kiang ah amau ei in a om phot ding uh ahih dan ka gen a, ni thum khong ei kiang a om di uh ahi ka chi hi. Amau ahih leh kihou in a buai mah mah uhi. Ken leng huai phet in office lam ah ka va hoh di chi in kimboi kakizui sak hi. Kimboi toh office ah kava hoh khawm uhi. Huai ah kanuai a omte toh kitheih tuah na leng ka nei ngal uhi. Kenleng zingciang apat dak hun chet chet a kuan ding leh kua mah zekai louh ding ahi dan khong ka sep pih te kiang ah ka gen ngal hi. Huai phet in off kala a inn lam ah kimboi toh kapai nawn ta uhi. Inn ka pai un khua mui dek pan pan hi a, ka gari tuan na sung ah kimboi in votsa in hon koi tinten a, ka driver pa bang un hon nuih san heuhau hi.

Inn ka tung u leh an nek hut toh aki tuak chet hi. Kimboi nu leh pa leh kou inkuan in khat vei an kuang ka um khawm pat na uh ahih ziak a diam ah ka nervous dek mawk hi, kanau ten le nawp asa khin kei uh chih ka thei ngal hi. Kanu in Kimboi ka ngaih mah mah ahi chih lah thei ngal hi lele ken kanu kiang a ka ngaih lam gen hetlou, gen dia piching hun tawk kisa nailou vetlou kahih chiang in gen lou a om mai. Ann ka hon nek khit un numei ten ah kuang khong hon sil in huaizoh in common room ah kon tu khawm ta uhi. Ka hon tut khawm phet un Kimboi pa (Pakham) in kikhop na nei di chi in hon ding hi. Thu khong hon gen a, ka neulai a ka om dan leh tua ka tan te khong hon gen hi. Huai zawh in thum khawmna ka hon nei uhi...huai zoh in lum ding in ka hon kisata uhi, lum dia kahon kisak tak un ah ka nu in kakiang ah "Son hon tu lai dih na pakham toh, ka hon houpih nuam na om hiveh aw" a hon chi a. Kenle kanu chih mah bang in lum nailou in Pakham toh common room ah ka hon tu tuantual uhi. Adang teng hon lup khit in ka nu'n ah Pakham kiang ah hichi in hon chi hi " a pakham aw nou ziak a katapa hiai tan tung ahi chi leng ka khial kei ding, na tung uah kipahthu ka gen zah zah a tawm ahi, na tung uah kakipak lua. Huai ban a kagen nawp leh ka hon nget nop ahih leh ka nau Sonboi toh Kimboi leng kingai mah mah uh ahih chiang in kiteng sak maileng hilou di hia, kei lah tek gawp ta ing a ka honna pai san hut di le kithei lou a hih chiang in, akin thei lam in sawm le bang na chi ua" a hon chi hi. Ken leng 'nu ei sih ding thu khong hon gen het ken, kei natapa nang lou a hithei lou di kahi' ka chi hi. Huai phet in Pakham in ka nu (nu Mawi) kiang ah kenle hiai kana ngaih tuah tuah leh nang na hon gen ah a hoih kasa, amau le kingai lua uh hi a maw? Himah lou maw sonboi? a hon chi nawn leu leu a kenle himah ei Pakham Kimboi kaneu a pat kana ngaih tutan leh kasih dong in ka ngai tawn tung ding kachi hi. A chih leh hun lem masa pen pen ah na kiteng theih na di uh i sai ding uh Pakham in hon chi hi. Huaizoh in kou leng ka lup nadi chiat uah ka hon lum ta uhi.

Zing khua te hon vaak in, kuamah a thoh ma un kei walking kava pai a. Walking pai in ka tung in miteng ana thou zou ta uhi, kanau Lalboi leh Siamboi ka kiang uah hon pai ua uson kou Bangalore ah pai ut uh hiveng aw a hon chi ua, kenle huai a kua bel a bang vasem di nahi ua ka chih leh Siamboi pen in U ei, i ni te inn belh phot theih dia kou zanlam a Delhi apat i pai ma ua interview om a kava tel ua leh huai a kanih ua ching kahi uh chih a hon hilh uhi. Kei leng kipak lua in i nu na hilh ta u hia ka chi a leh, hilh nailou nang kiang a hon gen masa kahi uh a hon chih uleh ka khasiat tha bang a hon suak a, i pa in hon dampih lai le zaw ama kiang a hilh masa di hi u chin a maw a ka chih kawm kawm in ka mit khitui te ka nul a, i nu kiang ah va hilh unla ken ah ka man hun hun in na ticket di uh na ukim toh kava la di uh kachi hi. Huai phet in amau leng ka chih mah bang in kanu kiang ah ava gen uhi. Kikim in ann khong a hon huan khit in, Kikim toh kanau te lenna ticket cut ding in kava pai di uh chi kawm in kanu kiang leh pakham leh azi kiang uah kaki ngen uhi. Kanu in vala unla hon pai pah un na office kuan nadi toh na zekai kha di a hon chi a, koule a kin theilam in gari lakhia in Kikim to chauh kava pawt khia uhi. Guard ten hon zuih sawm mah leh ka khaam hi. Kou leng kaam/sepna ka neih nung uh kanih chauh ua ka pawt khawm masak napen ahi hi. Airport ka hong tung ngei ua, a guard ten hon thei uh ahih man in kava lut thei pah ua, kou ma a mi om mah leh kou alut masa in kava pang kha uhi. Huchia ka pai lut theih tak un ka lungsim ah thil khat hon suak hi, huai chu "keile ka neu deuh lai a midang kanung a om mi toh aki theih ziak ua pai/lut masa uh ka muh chiang a, kenle mithei leng zaw" ka chih vung vung lai khawng ka phawk khe thak thak hi. Ka nung lam ka en a mipi a lut nuam a phu tet tet te kamuh chiang in ka hehpih tha bang a hon suak dek hi. Bang mah gen lou a nung lam en a ka ding gegu leh Kikim in Uson bang chi e? a hon chi a kenle bang chi khang chi kawm kawm in ticket counter lam kama nawh uhi. Ticket kalak zawh un ka hon pai kik nawn pah uhi.Ka hon pai kik tak un Kikim in Uson nang chuh milian pi na suak ta a, kei mai mai khong na hon deih nawn kei di maw a hon chi a, kenle kim huai khong chi mawk mawk ken, ken nang mah ka hon ngai a kasih dong ka hon ngai ding hi chi in ka hehnem hi. Huai ka chih khit phet in uson na tak tak maw chi kawm in a hon koi phei hi. Kenle tak tak ahi chi kawm in ze-et kawm in nang houh na hon deih lai diam maw? Ka chih leh kikim in Uson ken nang lou kua ka ngai dia nang kia nahi lung muang in a hon chi hi, huai a hon chih tak in ka lung a nuam a, zaang khai tuan mah ka bang hial hi. Huchia kihou tou tou kawm a kon tai touh u leh inn ka hon tungta ua. Huai kon tung phet in kanau te kiang uah ticket kapia a, zinghal ding ahi na zin ding uh chih leng ka hilh ngal hi. Huai zoh in an kon ne ua, huai khit in keileng kisa in office kuan ding in kakisa hi. Late dek simta ka hih man in kin a kin in "nu, pakham, kim" omnuam chih toh thuah in kakuan khe ngal hi.

Office kai ding ka ni masapen ahih ziak in kuamah i theih khol louh toh ka zum dek dek nak hi. Himah leh kaki dek dek hi. Nui khelou ham ham kahi mai chih ding ahi. Ka gingtak kheel in ka office mate te hi a nawp thei mah mah ua, kei hon kithuah pih di mi nih a om ua khat pasal khat numei, apasal pa min bobi ahi a, anumei nu min ruthi ahi. Hiai tegel in kei hon assist di chih dan ahi. Ka pai na na ka om na na a hon zuih di uh office hour sung teng chih ahi. Ruthi hi mi frank in kathei a, a polh nawp khop mai hi himah leh bobi hi mi pautam khol lou leh mi chitak mah mah khat ahi. Hichi'n ka office ni masapen ka hon zang bei hi. Dak 5 lak teng in staff teng teng ka khah khevek a, duty a om di te leh amun a om di te chih louh dak nga in kapaisak vek hi. Huai zawh in kou a senior deuh teng 5:30 in kaki khen zaak ta uhi. Huai khin kei leng in pai dia kaki sak lan lan lai in Ruthi in good bye sir a hon chi guih a kenle lamdang sasim mah leng le "you too" chi'n ka dawng hi. Gari sung ka ah ka lut dek chet leh Ruthi hon pai phei a ka kiang ah "sir will you please drop me to my home, my driver says that he couldn't come today so..... if there's no problem" a hon chi a kenle "ok my pleasure" ka chi a, ka nih un gari ah ka hon tuang ta uhi. Amau inn lam new chekon lam ahi a, huai lam ah ka hon tai ta uhi... Gari a ka hon tuang khawm lai un Ruthi in sir are you married? a hon chi a kenle nope, are you? Ka chih nawn leh nuih mai kawm in "we are the same" hon chi seisai hi. Ka ni masapen a hih toh kuamah hichi tuk a hon mai ngal om ding in le kalam en kei hi. Himah leh lam et kheng in mi frank pi khat le pau thei sim pih toh kaki thuah kha uhi. A inn uh ka hon tung ua, a kum dek in "once again goodbye" nui kawm sa in hon chi hi. Kenle ok chi kawm in ka tai khiak san pah uhi. Kei leng tung hak sim ka hih chiang in sung kuante ana lung hi mawh in inn kong khong ah honna en mai ta uhi. Ka tun tak in kanu in hiai tan tan kai nawn kei ua hon chi a, kenle nu i hih di atam chia ki zekai kha nak ahi chih toh ka thuah hi. Huai zoh kisuah ding in room a kalut leh kikim leng a hon lut a, ka kiang ah 'na hon pai hak di chiang in i nu na hilh kei dia, lung hi mawh lua eive' a hon chi hi. Huai khit in kenle awle tuban kathei ta di aw kim kachi a, huai zawh in kikim pawt khia hi. Kakisuah zoh in kakisil a. Ann nek di ka chih leh kanu leh kikim in honna ngak uh ana hih dan kathei khia hi. Huai tak in ann ka hon ne khawm uhi. Ngei na bang in kikhop na ka hon nei ua ka hon lup nawn uhi. Hun hon pai zek a ka nau te zin hun hong hita hi, ka naute kha ding in kikim toh kei toh kanu airport ah kava hoh uhi. Huai kanau te kha khin innlam ka hon pai kik leu leu ua, kikim te pai hut ahih nawn ziak in amau leng Lamka lam zuan ding in hong kisata uhi. Huai ni suty kala pah a aziak bel kanaute lah zin di kikim tele apai hut ta ka nu thawm hau khak leh chi in suty kala hi. Inn a ka omlai lai un pakham kiang ah 'pakham kikim ahih theih leh hiai lam ah a nurse zil zou henla, kanu amah kia om di ahih na toh om pih thei zel di'n hiai lam ah kou kiang ah om sak di na di uam maw'? Ka chih le pakham in a ut leh chuh poilou amah thu thu ahi hon chi a, huai phet in ken kim om lai maive ka chi a kanu'n le omlai aw a hon chih pih hi. Huchi'n kikim chuh om ding in a hon lem sata hi. Huai tak in pakham leh azi Lamka pai ding in station tan ka va kha nawn ta uhi.

Huai amau va kha khin phet kou leng inn lam zuan in ka hon pai ua, huaitak in kikim in uson hon hel mengta ve ua nang adi kia ka ut ta a hon chi hi. A zak a nawp tel khop mai huai bang i ngaihzawng te kam a pat hon pawt chiang in. Kenle lungkham koh kim kei a nahi a, kei a nahi den ding chi in ka koi hi. Inn a kanu chauh om ahih man in kou leng kapai hat deuh ua inn ka tung pah uhi. Huai sun chuh bang mah hih lou in inn ah ka om a, kikim toh kanu kihou uh a, huai khong ka muh chiang in "kapa omlai hi le zaw" hon kipah pih losam di hi a, chih khong ngaih tuah na ah hon kilaang chachauh hi. Ka ki-iit dan uh lah kanu ten hon theih pih ahih chiang in kou a ding in bang mah lauh nadi thu a om kei hi. Lungnuam leh lungmuang tak in ka om uhi. Hun te hon paitou zel a kei leng office lam khong ahih kei leh zin vialvial na di khong ka neih hun atam thei mah mah a, kikim toh kaki mu vaang mah mah uhi. Huailou in kikim in a nurse zilna inn mun apat gamla lou ahih chiang in inn apat agal kai thoh a, kanu toh kei sang in aom khawm mun zaw uhi. Ka office kakai louh chiang bang in ka assistant nu Ruthi in a vangkim khong in call hon bawl sek hi, va lak louh ding lah hilou i va lak chia lah agen di khop thei inchin sawt pipi khong hon hou pih zel, huai in kei toh kikim kal hon subuai thei di din mun in hon om sak mun mah mah hi. Kenle kikim kiang ah thu te hoih tak in ka hilh zel a, aman le hon thei siam zel hi. Nikhat hi saap te hong hoh di uh chih thu hong tung hi. Huai a ding in naktak in kakisa khol uhi, huai chi a kisak kholh lai tak in ka phone hon ging a, keile buailua ka hih chiang in kala pah kei hi. Ka laak pah louh tak in hon ki call thak nawn hi, ka phone ka et leh kikim ahi a, sun lailai a bang thu om a hon phone adi aw chi a kalak leh kikim a hon kap mawk hi. Keile ka lung a nuam het kei a, kikim kiang ah kap lou a thu hon gen ding in kangiat hi, huai ka chih phet in Kikim in Uson inn ah kin a kin in hon pai in i nu hon damlou guih mawk a a loh didan lah kathei tuan kei a damdoi inn lam ah kana po di inn lam hon zuan kin in hon chi hi. Kenle huai thu ka zaak phet in ka office staff te leh police personal te kiang ah i thil hih uh hoih tak a ana sun zom ding in thu kapia hi. Inn lam a buaina a om ziak in inn kapai ding a, ahih theih leh nitaklam chiang in inspection bawl ding in kon pai man leh ka hon pai nawn di kachi hi. Huai ka chih phet in Ruthi in leng sir ka hon zui di a hon chi a, kenle poi mawh kei hiailam ana buai pih aw kacih leh kimai ngal sak tak in ka gari ah hon tuang hi. Kenle bang mah genlou in driver pa kiang ah ahat thei pen a tai in, inn hon tung pih pah in kachi a, ka hon tai kheta uhi. Inn ka tung phet in kanu hi khua phawk lou in ana omlai a, kikim in a hih theih dan dan in ana hih a apha tuam tuan kei hi. Huai zoh in kanu tuh damdoi inn ah ka hon pota uhi. Damlou a kanu om a ka buai mah mah lai in Ruthi toh kikim ana kimai kha ua, ruthi in kikim kiang ah nang a kua e ana chi hi di, kikim in kei a lawmte kahi ana ci hi. Huai ana chih phet in Ruthi inleng ken Uson ngai kahi, aman le hon ngaih kaki lamen ana chi hi. Ken lah bang mah theilou in kanu ka buai pih mah mah a, doctor ten ah hon check ua, hon et chiang un Brain Tumour last stage ahi hon chi uhi. Kum khat le hun anei nawn kei a hon chi uhi. Huai thu ka zaak phet in ka lung a kham mah mah a gen leh hih masak ding bang kathei kei jejen a munkhat ah suangtum mah bang in katu mai hi. Kikim inle report atheih phet in a lung kham mah mah hi. Pa leh nu neilou suak ding a kaki ngaihtuah chiang in kapo siam thei mah mah kei hi. Huchi'n kanu tuh damdoi inn ah ka hon admit ua kikim leh ruthi in a giah pih uhi. Inn a ann huan dilah om lou a hih na ah ann khong ken ka huan a, damdoi inn a om te ann khong kava pia hi. Huai ni in ka office uh leng ka pha kei a, office ka phone a, ka omdan khong ka hilh chian a, kanuai a SI kiang ah kaal nih sung incharge ana la ding in kathei sak hi. Ann huan leh pia in ka buai thei mah mah a, thil dang hih na di hun kanei het kei hi. Kaal khat bang damdoi inn a ka om nung un damdoi inn apat ka hong pawt kheta uhi.

Kanu dam deuh ziak a pawt khia kahi hetkei uhi, himah leh inn lam a ki keem zaw di chi in ka pawt khia uhi. Inn tan gari un a hong kha ua medical team ten ah, kanu chauh gawp pau le pau peih nawn lou khop hial in om hi. Huchi himah leh gamdang a om kanute ka hilh kei hi, a lung hi mawh di dan uh kathei a, huai baak ah innlam hon pai tei tei ding uh ahih dan le katheih ziak in. Bang hiam zen a hon chih ka leh hilh lou ding in kikim toh kakithu kim uhi. Mi a hon veh di lah aki tawl nga kei a, inn khang, inn pam, lawm leh vual te'n hon kho ngaih thei mah mah mai uhi. Kikim nu leh pate leng ka hilh uhi,himah leh amau leng buaina a neih ziak un hon hoh thei kei uhi. Inn ah kei toh kikim toh Ruthi toh kanu ka om lel ua, kikim hi a gim theh petmah hi. A guk in ana lung gim mah mah ahih dan a khonung in kathei khia hi. Ruthi thu gente khong le kathei khe vekta hi. Huai katheih phet in ka heh lo mah mah a, inn a kanu damlou mai a maigum sa a om ding lah ka ut kei a, lah kaheh a suak mah mah hi. Kenle hun lem chaang zong in Ruthi hi ka sawl khiak sawm hi. Himah leh hun lem kamu thei mah mah kei a, himah leh Pathian lem gel dan adiam ah nikhat Ruthi nu leh pate'n a hon phone ua, ken ka pick up a ruthi inn a hon pai phot leh a hon chi uhi. Kenle huai hun lem chaang a la in Ruthi kiang ah nanu leh pate le lung hi mawh sam uh ahih na ah inn na pai phot ahoih ding ka chi a, hun lem dang ale na hon pha zel thei na chih toh ka thuah kawm hi. Huai phet in ka driver pa kasam a ruthi a inn tan uh vakha ding in thu kapia hi. Huai phet in ruthi leng gari a tuang in pai ngal hi. Tun chuh mithum chauh ka om ua, thawm hau huai abang jejen hi. Nitak hon hi a mi hon veh a omte leng a pai bei khit nung un, keile ka nu kiang ah kava tu a, nu hon dampah nadi nahi aw kachi hi. Amah leh hoih tak a a-ihmut tak in kenleng ka pawt khiat san a kikim amah chauh common room a tu kamuh in lamdang kasa hi. A kiang ah kava pai a kim bang chi e, lung kim louhna nei maw kava chi heng hang a thil thei selua athei lou dan in kava om hi. Aman le bang mah hikei a hon chi a, a hon ding khiat san vat a kanu room ah lum ding in a pai hi. Kenle a puak gik kathei mah mah a hile le tuhun a va gen pih leng lem kasa tuan kei hi. Huaiziak in gen louh in ka koih suk a hunlem dang a gen ding chi in ka koih hi.

Huai khit in kanu room ah kava dak leh kikim in kanu koi kawm in ana lum a, ihmut limchi deuh mai in a ihmut uhi. Huai phet in keileng lum ding in kakisa hi. Lum dia kaki sak kawm kawm in hiai bang ka ngaih tuah na ah hon pawt mawk hi "kikim ka zi le hilou hi a, ken hichia ka om pih mawk pen kou apate toh kithei siam tawk le ung le midang muh ding in bang achi ngaih tuah di uh aw, kenlah kazi bang mai a ka bawl hi a, kalum khawm kei uh chih thu man mai mai hi a" chih in ka lungtang hon deng lua hin kathei hi. A hin lah kikim paisak mawk lengle kanu enkol tu di omlou zel dia ban ah kei hon panpih tu pen le hi zaw mah eichia chi in ka lung sim aki sel nilouh hi. Huai khit in thil dang khat hon pawt nawn a huai chuh "ruthi in kikim kia ana gente ziak khong in kikim lungkia in hon kha mai di aw" chih hon suak nawn leu leu hi. Keileng buai kisa in ka lum suk mai dia a hi hi hita ve kachi suk mai hi. Kalung gim toh bang mah ka ngaih tuah sawm nawn kei phot di chi in ka lupna tung a sam bang ka zaal ta hi.

Sam bang zaalna laikhun tung ah ka hon zaal hi. Mang khat tuh ka hon nei a huai ka mang ah chuh ruthi in kei toh kikim kiteng di lai a hon kikhen sak hi. Ka thoh tak in kamang lamdang kasa mah mah a, a tak tak a houh hon tang tung dek amai ta di aw kachi a, ka lung a nuam thei kei hi. Lupna tung apan thou khe nailou in ka phone common room a ka koih hon ging a, ken laman pah lou ka hih na ah kikim in ana la hi. A lak tak in kua dang hilou in Ruthi ana hi a, kikim le heh sa in ka kiang ah " hin na ngaih zawng nu'n hon phone" chi in ka phone loudspeaker a koih kawm in hon paih touh gaih hi. Kaki hou ua ruthi in ka ihmut theih leh theihlou, i nu bang a chi a, chih khong a hon dong hi. Huailou in uson tuni office hon kaive i hon miss gawp voi khong le hon chi zaw mah lai a huaizoh in ka koih di aw le uson muuaah! Chi in hon kakoih ta uhi. Kaki hou nateng uh kikim in za ahih chiang in a heh mah mah a, ruthi in hon houpih dan khong hi ngei ngai zaw mah ahih chia a posiam thei kei hi. Kenlah ruthi ngai mah mah lou kikim kia chauh deih ka hih lam atheih louh ziak ahi ka ci mai hi. Kaki hou zawh phet in kikim in office kai di maw a hon chi pah ngal a kenle kai khol kei ning hi le2 sawt lou chuh ka phak louh theih louh di ka chih leh na khe lah thou maw lawm lawm mai a hon chi hi. Kenle agen di dan thei tuan lou in kikim ka koi phei a ka room ah ka tut pih a hichi'n ka gen pih hi "kim tua na ngaih dan dik hetlou ahi, ruthi toh ka kaal ua bang mah om lou, ken nang lou ngal kuamah chi het lou kahi" ka chih leh kikim in uson na nak nuai kam siam man mai mai eive maw? Ken ka bang chi gingtak di lah hiai teng ka muh leh ka tuah khit nung a, a hon chi a, keile ka heh sim a kim na hon ngai kei a maw leh ka chih leh kikim in "uson ka hon ngai mah ei, nang lou kua mah ka chi kei, adang na hon neih san le le nang kon na ngak di, nang a di kia ka ut" a hon chi hi. Huai phet in ka ding tou a kim kenle hon it hon ngailou hi zen zen lou ahi. Huai Ruthi khemna ahi a huai i ki zawh sak louh di ahi. I kikal a kip sem sem zawk di ahi ka chi hi. Huai phet in kikim inle theih siam na hon nei ahi ding a eimah ve maw uson a hon chi hi. Kenle kikim kiah kim kakipak lua na hon muan ngam na tung ah, chikmah chiang in ka hon zuau san kei ding aw chi kawm in a biang ah kiss kapia hi. Amanle a hon pethuk sam hi, ka gingtak louh pi in. Huai khit in kenle office kava pha dia an nekma ngei in kon tung di, i nu an ana pia inla na ut aleh nang le ana nele chin poilou chih toh pawt khiat ka thuah hi. Office chuh ka tung ngei a night duty te le staff khen khat ana om a, SI pa ka phone a office hon tung in kachi hi. Huai kachih khit minute tamlou in a hong tung a, kenle ana sep di leh a thil hih di te ka hilh vek a hu chi'n inlam pai ding in ka hon kisa ta hi. Dak 10 lak di vel khong ahi dia staff te hon tung hut ahih toh chi in kin deuh a gari a tuang dia kaki sak lai in ruthi in hon tuak man thou thou hi. "Morning sir" a hon chi a kenle morning chi kawm in ka gari a ka lut san hi. Tai dia kaki sak uleh a hon kham a "Sir kenle suty la kahi, ka hon zui di, i nu kaveh louh nale sawt lota" a hon chi a, mi'n huai hon chi ngal vaki zuih saklouh tel di hi ngal kei chi in kaki zui sak a, front seat ah tuang din in kathei sak leh atheilou kipang in kakiang ah hon tu thou thou hi. Va sawl khiat di lah nawp kasa nawn kei a ka kiang ah katu sak mai hi. Gari ka hon tai tak in hon neh phei deuh deuh hi. Kenle nawp kasa kei a den chia kikim in hon mu leh a hon muang nateng bei d ahih chiang in chi in kenle sun suak gari kham o kachi hi. Zun thalem kaki neih a huai zoh in kei front seat ah driver pa gei ah ka leh tuan daih hi.

Driver pa kiang a ka tut leh nuam sa lou deuh ahi dia pau le apau het kei a. Kenlah poi kasa mah mah kei hi. Inn kong tung ua kikim inle honna dawn chi dan in inn kong khak bul ah ana om hi. Ka kum khiat leh Ruthi le kintak in hon kum hi, ruthi a muh phet in ana lut hiau hi. Ruthi lah poisakna nei hetlou in nui leh pau kawm in inn sung hon lut hi. Kenle kikim kia an nezou maw? Ka chih leh nenailou a hon chi a kenle hon thuk aw i ne di ka chi hi. Ruthi bel ka om na lam lam hon zui hileh aki lawm hi. Ka room lam khong ah lut in kanu ana om pih a bang thu thu hiam khong ana gen pih hi. Huai kal in kou ann kane uhi. Ann kanek un kikim in bang dia Ruthi na hon ton pih hiam a hon chi a, kenle ka ut mawng ahi kei aman hon zui ahi ka chi. Ann ka nek khit ma un Ruthi in hon pai a, kana pai di ka nute'n hon phone a hon chi hi. An nek khit in kanu kiang ah kava pai leh kanu in Ruthi in denlam a a hon ngaih dan a hon gen a nang le ana ngai na maw a hon chi hi. Kenle mawk mawk eive kikim toh kingai kahih dan uh ka gen hi.

Kanu inle Ruthi toh kingai ding in hon gingta mawk hi, bang ziak ahi diam chih chu kathei kei himah leh ka om dan khong a ana ngai di dan in honna koih hi. A leh lam ah lah ken ruthi ngai mah mah lou kikim ngai ka hih dan ka chiang hun tawk hi. Kikim in lah hon hel meng ding in hon nawh nawh hi, kenlah thu kanei kei a, kanu hichia om lai a kiteng di vagen di chih pen thu hithei ahi kei ka chi zeel hi. Hon ngai zou nawn lou nahi hiam..? chih khong a hon dong nak hi. Kei le akhen chiang in ka heh tha bang a suak zel hi. Kanu lah hoih lam nawt tuan lou hi. Huai phet in kenle inndongta te kasam khawm a ka om dan uh ka gen hi. Kanu lah hichi mai, bang chik hun a hon beisan di a chih le kithei lou ahih na ah maban a hon hoih deuh ni-ni a kei toh kikim kiteng ding in lem hon sak pih uhi. Huai in kikim aki su paak mah mah mai hi. Kikim pate leng ka hilh khol ua, hon hel lou a, kiteng ding in ka nget ua leh hon phal vanglak uhi. Huai thu in kei le hon kipak sak mah mah hi. Kei lah ka suty ka nget teng beita a hih na ah office kailouh theih louh in hong omta hi. Ruthi in thu bang mah theilou in honna ngai ta hi. Kenle sawt lou in kathei khia hi. Katheih phet in ah Ruthi kasam a kei toh kikim kingai leh kiteng ding uh kahi ta ua, ahih theih leh nang hon kisalah dah mai in chi'n ka gen pih hi. Huai kachih phet in Ruthi in "Uson kei bang suak ta di, ka honna ngaih nang hon thawn suak sak mai ding maw" a hon chi hi. Kenle nawp kasa kei a, keilou leng midang hoih pi tam zaw namu ding, numei sia nahi kei chi peuh in khem daih katum hi. Himah leh ka tup nateng a thawn bang mai hi. A tawp in Ruthi in Uson naki teng ni ni uh kei a ding in ka hing tawp ni di ahi chi in hon pai khiak san ta hi. Kei mipa lung buai tak in ka om nawn leu leu hi. Kikim ka ngaih mah mah khat toh kiteng di ziak a mi honna ngai khat sih ding ka ngai ngam kei zel hi. Kalung a buai mah mah a, akhen chiang bang in hon chiam nuih khong hinteh kachi zel a, akhen chiang inlah a tak tak ana hi leh chih ka lau mah mah hi. Huai ni chuh ka office kai leng a nawp nawn kei a, ka lungsim office lam ah omlou in Ruthi leh kikim ka buai pih ban ah kanu ka ngaihtuah in ka buai gawp hi.

Lungsim buai tak a ka om laitak in phone hon ging hi. Ka et le kikim ahi, kenle thusia om adi aw chi in la ngam pah lou, a tawp tawp a la chih leh kikim in Uson tuni na hon pai baih thei diam i nu dam lolou inchin hon chi. Kenle huai phet in ka nasep di te sem meng meng in kinawh deuh in ka gam taang hi. Huailai tak in Ruthi hon lut nawn a, kenle kana ngaih sak het kei a, kei buai dan dan in kana buai hi. Huai phet in Ruthi inleng Uson hon chi masa a kenle kaki theih mawh bawl a, a nawn in "Sir. Ahon chih tak in aw bang a kachi a leh Ruthi kakiang ah hon pai a uson nang hon ngai hetlou maw chi in hon kap mawk hi. Office ahih ziak in office thu chauh i kihou ding kachih san hi, huai ban ah "mind your own business" ka chih khum lai hi. Huai phet in nawp salou adiam ah apawt khia hi. Kenle bang dang pi hikei chi in ka nasep ka hih fit fit hi. Dak nih bang hon ging ta a, kenle ka mate te kiah kana pai dia, hih dite hon zou unla bang kim ready sa in hon koih un aw chi kawm in ka hon paisanta hi. Ka hon pai khiat nung sawt lou in ka phone hon ging a,kenle inlam te hin teh chi in en selou a ka laak leh Ruthi ana hi mai mah a, va koih mawk di lah hi kasa khin kei hi. Ka hon kihou ua ka ngaih leh ngaih louh khong a hon kan a, kenle ngailou kahih dan ka gen a, hun hon pai di a zi nei pah ding ka hih dan leng ka gen khum zomah lai hi. Huai tak phet in ama pau manlou a kei kia ka pau zau zau leh a hon koih san hi. Poikasa tuan teuh kei hi, thil om dan hoih tak a i hilh khit nung a a heh theih lai leh ama thu ka lungsim ah ka chi hi. Inn ka hon tungta ua, amasa pen ah kanu room ka lut hi, huai ah mi a veh khong toh kikim ana om uhi. Kanu hi nak theilou in om chi in Oxygen ana khai uhi. Ka ngaih tuahna van a khai mah a bang jejen hi. Ka bei dong a va kap hial di lah ahi kei deuh a, ka pawt khia a ka room kava kinul leh kikim a hon lut a "Uson huci ken, hon dampah na di ahi, Pathian muang peuh le maw uson" a hon chih kawm in ka nung lam apat a hon koi hi. Keileng kaki hei a kakoi thuk sam ta hi.

Huchia kikoi a ka om tet tat lai tak un Ruthi gingtak leh lam et het louh a hon lut mawk hi. Kenle ka koi ka khah tuan kei. Amah muh mah mah in ka kiss hi. Huai mu khin chuh kikhin a diam ah ana pawt hi. Ka kikhah ua kanu room lam ah kava pai nawn uhi, huai ah Ruthi leng ana tu hi. Kenle kam dam tak in Kikim kiah Ruthi adi singpi hon bawl thak in kachi hi. Kikim leng apai pah hi, kei leh ruthi bel kanu kiang ah katu ngitnget uhi. Kikim in singpi hon bawl te ka dawn uhi. Huai ka dawn khit un dak 5 khon gingta a hih chiah kana pai mai di aw uson chi in Ruthi in hon paisan hi.

Kong tan di khong kava kha hi. Kapai laitak un Ruthi in Uson zingciang na man dia leh eitegel chauh private a kimu ut hiveng aw hon chi hi. Kenle man ding in ka um kei aziak bel kanu lah huchi a, office lam lah sep di tam a tam get zel a maw kachi hi. Hun lem a om leh aw chih toh ka thuah hi. Huai zoh in a gari ah tuang in tai khia hi. Inn ka lut dek leh kikim in bang a agen Ruthi in chi in a hon dong pah hi, kenle iim hetlou in ka hilh hi. Ka hilh tak in Uson hon pilvang mah mah in aw, nang kia ka kinepna nahi aw baan a i sung kuante kinepna pen le nahi hon chi hi. Kenle kathei na hon muan ngam natung ah kakipak lua kim kachi. Nitak hon sawt deuh leh kanu hon hoih deuh a hon naak thei ta hi, oxygen pen ka lakhia uhi. Huai phet in kanu ka houpih pah ngal a "nu hon dam pah di nahi, na hon dam chia kei toh kikim kiteng di kahi uh" ka chih leh ka nu in "bawi aw kei na nu in sawt hon dampih nawn lou di kahi,huaiziak in kiteng mai un" a hon chi hi. Hope chuh a om hetkei himah leh kanu kha muanna ding in "nu na damsiang ka ngak ding uh" ka chi thou thou hi.


Ka nu inlah a dam zoh louh di aki thei mah mah mai hi. Himah leh kei toh kikim in dam zou di ahih dan ka kup sawm sawm uhi. Ka khasiat tha bang a hon suak hial hi. Nitak dak 9 khong hon gingtak in keitoh kikim in thumna kanei uhi. Huai zawh in kikim toh lum dia kaki sak ua leh ka nu'n hon sam a, a kiang ah kava pai hi. Kikim toh giak khawm ahih na uah kikim le hon lut hi. Kanu in kikim kiang ah na uson hoih tak leh it tak a na kep di ahi, nu bei ahih lam na ngaih tuah sak hetlou di ahi aw. Ka nau son nang le kikim it tak leh ngai tak a nakep di ahi. Hun hon pai dia ki nak na hiam hon omthei mah ahi, a hun hun in Pathian in a bawlna ding hon pe di ahi hon chi hi. Kanu hi si dia kilam en mah mah ahih ziak in kakiang ah Son dam leh kikim pate hou pih inla tukaal khong a kiteng ding in hon genve a hon chi hi. Huai phet in kenle ama muh mah mah in kim nute ka phone a, tukaal sung ah kiteng theih din ka nu'n a hon ngen ka chih leh kikim pa in kou kisa man hetlou di keive uai huchi leh avan keng di khong le ngaih tuah manlou di uh kahi hon chi hi. Kenle kakiteng khit phot naak ua leh kanu lungkim di ahig man in, huai van piak khong awl in bawl le hitheilou di hia? ka chih leh huai chuh nou akiteng di tegel lem naki sak nak ua leh a hon chi nawn leu leu hi.

Kanu inlah hoih lam nawt malak ah siat lam nawt deuh deuh hi in kathei hi. Nidang bang lou in tut chuh a tu zou a, an ane thei kei hi. Huaiziak in glucose a sun leh zaan in aki khai mai hi. Huchi'n ama dam lai a kikim toh kiteng ding chih thupuk na ka hon bawl ta uhi. A zingchiang in kikim nu leh pa hon hoh suk uhi. Kanu veh lah hi kawm, kou thu gen di lah hi kawm chi dan a hon zin uh ahih dan a hon gen uhi. Himah leh tu din mun et in kiteng di chih hi a lem thei hetlou khat in a om hi. Kikim nu leh pa ten le lem asa chiah kei uhi a ziak bel kanu din mun a hon muh ziak un. Hiai thu te khong kihou khawm a kabuai lai tak un ka phone a hon ging hi, ka et a leh ruthi a ana hi a kenle lalou in ka off khum hi. Himah leh hon phone thak thak hi, a tawp in kikim kiang ah la inla ana kihou pih di kachi a ka phone ka pia hi. Kou leng ka thu uh khong gen khawm in kanu a hoih deuh di ahih nak leh mundang gamdang ah pua le chih khong ka gen uhi. Kanaute a lou theilou in ka hon hilh angai maita a ziak bel bangalore a puak ding in kaki thukim uhi.

Huai in kikim ruthi toh kihou zou a hon lut a, adah chi sim mah mah hi. Bang ziak a chih kathei kei. Kikim kiang ah bang thu om a kachih leh Ruthi damlou in damdoi inn ah apua uh chih a hon hilh ua hi a hon chi hi. Va ngaih sak luat di lah kilawm lou, va ngaih sak louh di lah mi'n hon hilh gegu a chih in om zel hi. Huchia ka omlai in pakham in kua e Ruthi a hon chi ta hi. Dawn di dan kathei pah kei a, kenle ka office kaina a ka assistant ahi kachi hi. Ka lungsim a chuh awl mawh na lianpi a om hi,himah leh kikim mai pha le a nu leh pate maipha i zong ngai zel ahih na ah a awl mawh lou dan in ka om suk hi. Huchia ka om phet in Uson na va veh hong kilawm lou di hia? a hon chi hi, ka dawng ma in pakham in na vaveh a hoih di,mi'n hon hilh thei ngal chuh a hon chi a. Kenlah inn lam a kanu le damlou huai taisan di le kachih leh kikim in kou ka om na ve uai. Va veh inla hon pai nawn pah lechin himai lou maw a hon chi hi. Huchia hon chi na na chuh chi in keileng a veh ding in kakuan khe pah ngal hi. Gamla sim ka tun un ka phone kikim kia om ka toi mang hilh kathei khia hi, a damdoi inn min hon hilh louh kathei khe thak hi. Huai phet in ka driver pa phone zat sak zual in kikim ka phone a, bang damdoi inn a om hiam chih ka dong hi. Ka dot zoh phet in RIMS lam zuan in ka hon tai ta uhi. RIMS ka hong tung phet in a room no. Ka kan ngal hi. I I-CARD i lah leh lampi a hon lamkaih di atam khop mai hi. Huchi'n a room kava muthei pah ngal hi. A room ah kava lut phet in ruthi nu leh pate leh a sang gam te ana om uhi. Ruthi hi khophawk lou in ana omlai hi. Anu leh pate kiang a bang chi dan a hon kipan hiam ka chih chiang in chiang tak in hon hilh nuam kei uhi. Ruthi ka et vel leh a khut lang khat kituam kamu hi. Huai phet in ka ngaih tuah na a thikhat hon kilang mawk hi. Kei ziak hi ding in gin lelh na kanei mawk hi. A diktak zaw kathei kei himah leh kei ziak hi ding in kaging ta tinten pah ngal hi. Sawt sim ka tut khit nung in ruthi in khua hon phawk a, a gei a tu a hon muh in hon nui ngal hi. Uson hon veh ngal sam maw?? a hon chi hi. Kenle jejen eive i hon veh ngal mah kei dia i lawm hoih na hih chiang in kachi ngal hi. Hon halh na hih leh kei kana pai phot di inn lam le buai huai sim a kachih leh kakhut hon len a pai nai keive a hon chi hi. Huai hon chih chiang in ka tu thak nawn hi. Sawt kuamtak ahih ziak in kikim in a hon phone a hon paita maw? a hon chi a kenle hon kipan kheta kahi kachi hi. Huai phet in ruthi kiang ah nidang chiah ka hon veh nawn na di, inn lamten hon phone uh kana pai phot di chi in ka hon paisan ta hi.

Huchi'n ruthi kiang apan ka pai khiat khit nun sawtlou in ka phone hon ging nawn leu leu hi. Huai in chuh en le en man lou in kala pah gaih hi, chih leh innlamte ana hikei a office lam ate ana hi mai mah hi. Kenle Hello ka chi leh "sir please come quick there is an emergency" a hon chi hi. Huaitak in kei innlam a tai dilai office lam ah ka leh tai daih hi, huai kawm kawm in inn lamte ka phone a inn lam hon pai hak di kahi ka chi a, a hi thei dan dan in ana ki enkol mai ua, office lam ah ka hih di om ka chi hi. Huan office chuh ka hon tung ngei a, bang emergency a di aw ka chih leh mun thum a akizom a bomb puak ana om ahi hon chi uhi. Kenle huai phet in emergency meeting kasam ngal hi, officer hoih pipi leh piching, chin pipi te hon pai khawm uhi. Kenle thil om dan hoih tak a suizui ding le a kin thei lam a report deih ka hih dan le kagen ngal hi.

Huai phet in officer, inspector ten hi amun ava delh pah ngal uhi. Kenle amun pha ding in kakisa hi. Huai dia kuan khe dek laitak in kalak ua khat kaki naih pih mah mah khat in "Sir are you in love with Ruthi"? chi'n hon dong hi, kenle why? Ka chih leh there is a rumour going around hon chi mawk hi. Kenle "no i'm not in love with ruthi, we're just friend" chiin ka dawng hi. Aman le ok may be i'm wrong hon chi kik hi. Keileng ka lau thawng mah mah hi aziak bel hiai thu khong kikim nu leh paten thei le uh hoih hetlou di ahih ziak in. A bang bang hileh chi in kaki pan khia hi. Bomb puah na mun a silung ni leh thum khong ka mu a, akhen te bang a khut bul, a khe bul khong om hi. Kenle akhen te ka en ngam kei hi. Huai amun teng ka phak khit in khua khong hon mial kuan ahih tak ziak in inn lamte'n hon lung hi mawh ahi ding ua, hon phone uhi. Kenle ka hon pai ta kachi hi. Inn katung in kikim in honna dawn a, thil hon kan pah hi. Keileng gimlua ka hih chiang awl in kon hilh di. Ka hon kisil dia ann ana thuk inla huai ah i nek kawm in ka hon hilh di kachi hi. Ka hon kisil khit phet in an kuang ka hon um ta uhi. Huai a tuni ka hun zat dan te kagen vek hi. Kazi hinai kei mah leh ka zi bang in ka bawl hi. Anu ten le hon theisiam mah mah uhi. Hun dang te mah bang in ann kanek zoh un kikhopna ka hon nei ua, huai ah pakham in kei toh kikim hi kha nawn chiang a kiteng ding ka hih dan uh a hon gen a. Amau indongta ten le lem sakhin ahih na uah tun ah kou indongta te thu hita hi a hon chi. Huai ni in chuh kanu ading in chauh thum khawmna kanei uhi. Huai khit in bangalore a om kanau te ka hilh ahi kanu damlouh lam. Huai ka hilh phet in kanau te'n kon pai ding uh ahon chi ngal a, ken hi ka khaam a hon pailou ding in ka hilh hi. Huai sang in huailam a damdoi inn hoih a na en ding in ka hilh a, kalnawn hiam a i nu huai lam a hon po ding uh kahih dan kagen hi.

Hun te hon paitou in a kal nawn di hon tung petmah ding ahi ta a. Zingchiang di ahita, tuni Pathianni in ticket lah kihawm lou ding ahih na ah ka kikhawm hi. Kikim toh kikhawm di chih himah leh kikim in i nu kana om pih di hon chi hi. Kenle huchi di ahih leh kei kava kikhawm di chi in kava kikhop san hi. Hun tam zaw ah kei sang inle kanu toh kikim om khawm mun zaw hi. Kaki tawp in kanu kiang ah ka om den a, kanu toh ka houlim nilouh uhi. Huai ah kikim toh hon deih sak petmah ahih dan le hon gen hi. Kenle nu i indongta ten lem hon sak pih ua leh kha nawn chiang a kiteng ding uh kahih dan ka hilh hi. Huai phet in ka nu'n le hon kiteng pah ua ka dam lai lai in a hon chi in a hon kap hi. Kenlah sawt hon dampih lou di ing a, na pa bek omlai hileh zaw nawp ni dah ni a hon kithuah pih thei di hi a maw. Kei lah hing na ing a bang mah a zat theih louh chi'n hon khasiat pau hi. Kenle kanu kakhem dam sawm a, nu ei nang non dampih kou a ding a hamphat huailua eive, mi'n nu leh pa le neilouh lai ua, kou pa nei kei mah le ung nu hoih tak a kaneih uh manpha salua kei ve ua nu aw ka chi hi. Keileng kanu thugen in hon khoih mah mah a ka khasiat tha suak lo mawk hi. Kamit tui hon pawt mawk hi. Huai in, ka nu'n ah "Bawi kap het koh, nang nakap leh kei hon heh nem di omlou ahi aw" hon chi hi. Kenle kamit tui ka nul kawm in ah nu na deih deih hon ngen in aw ka hih theih liai teng le hon hih na di kahi chi'n ka gen hi. Huai zawh Bible kasim pih a huai zawh kei toh kikim leh kanu ka thum khawm uhi. Huchi'n chuh ka kha muang mah mah hi. A zingchiang a hong hita a, office kakai a huai kawm kawm in lawmte khat hi bangalore a di ticket nih kala sak hi. Huai a lak khit phet in office ah a ticket a hon pia hi, kenle kipah et sakna in sum tamlou ka hawm hi. Huai ticket chuh zinghal ading ahi hi. Nitak lam a inn kapai tak in kikim ka hilh hi zinghal chiang a ka zin ding dan uh. Huai khit in apa te leng ka hilh hi. Huai ka zin sung uh inn a kikim toh ana om ding in ka ngen hi. Ka nget bang in kikim nu leh paten le hon lem sak pih uhi. Nitak ka lup mah deuh in ah ka lungsim ah bangalore ka zinna uah kikim kiton pih le bang a poi luat na om dia hia chih hon suak guih hi. Kenle huai lungsim a koih in zingkal ka thoh phet un pakham kiang ah kikim ton pih ding in ka ngen leu leu hi. Lem sa chiah kei mah le uh kathu hon seel ngam kei ua, ka lung gim luat thei uh ahih chiang in hon phal mai uhi. Huai tak in zin ding in kisakna thupi tak ka hon nei uhi.

Zin na ding lah nai hiai-hiai mai. Mi ngaih dan in chuh gamdang zin ding leh mun dang mu ding chih himah leh kei bel lunggim tak in ka om hi. Kikim leng ton pih ding kahih ziak in ka thawm hau kei deuh ding hi. A zingchiang ka zin ni ding uh a hon tung petmah ta hi. Kavan te uh la in ah gari sung ah guang in kuan ding in ka hon kisata uhi. Ka nu ka et chiang in hehpih huai leh kho ngaih huai kasa petmah hi. Himah leh amah damtheih na di ahih nak leh chi in ka hon kipan kheta uhi. Kon kuan kheta ua, airport lam manawh in ka hon tai uhi. Kanu kalai tak ua tuang sak in kei leh kikim a nawl ah ka tuang uhi. Airport mun ka hon tung tak un check point khat om a, kitheih pih kaneih ziak in huai check point ah buai selou in kapai suak thei uhi. Ka lenna uh dak kim khat a leng khe pan ding ahih na ah amun ah kanak zek uh a hon ngai hi. Huai mun a kangak kawm un, bangalore a om kanau te ka phone a, dakkal kim khat a hon leng khe ding uh kahih dan ka gen hi. Amun ah honna pi ding in kathei sak ngal hi.

Kaki phone khit phet un ka lenna ding uah ka lut uh hong hunta hi. Kou leng kalut sam ta uhi. Kikim ading in lenna sung a muh patna ahih ziak in a phur mah mah mai hi. Ka seat uh akizom chet a kanu alai a koih in a nawl tuak uah kei leh kikim ka tuang nawn leu leu uhi. Huchi'n ka lenna uh hon lengkheta (take off) hi. Dak kal bang za hiam nung in Kolkata ka boh ua, huai ah ka lenna uh ka khek ua huan bangalore zuan in ka hon lengkhe ta uhi. Kolkata toh teh ding in bangalore chuh ka tung hak zaw tham uhi. Tung ding i kisak chiang kitung khe theilou hi. A tawp tawp in bangalore ka hon bawh ta uhi. Tutna bang to a kham jejen hi. Ka pawt khiak phet un kanau te kagal muh ngal a, direct in amau kiang ka zuan ngal uhi. Huai mun apat inn mun lam ah kapai ngal mai uhi. Kanau te kagingtak sang in ana fel zaw ua, hospital ah len reservation ka koih ngal ua, ka tun ni mah un kanu damdoi inn ah ka admit pah ngal uhi. Huai apat observation leh treatment kapan ngal uhi. Hospital ah kanau tegel in a ompih louh chiang un kei toh kikim in ka om pih uhi. Huailam a treatment ka neih uh pha tuam mah mah in kathei a, sawt leng hon om sak lou un kaal nih chauh hon om sak ua, damdoi nek ding hon pia in hon pawt sak uhi. Ka pawt tak un kanu leng halh lua ahih na ah bangalore ka fang pih zeek uhi. Huchi'n huai kha tuh ka kipahna pen kha hi ding in ka ging hi. Kha nawn hong hi pah ding ahih na ah kei toh kikim kiteng na di kha ahong hita hi. Huai di ziak in kanau tenle a sepna ah suty la in inn lam pai nawn ding in ka hong kisa nawn ta uhi.

Huai in ka unau in kikim leh kanu toh Imphal lam zuan ding in ka hon kipan kheta uhi. Ni nih zawh nung in imphal tuh ka hon tung ngei uhi. Huai tan ka hong tung tan unle kanu chuh a hoih lai mah mah a, damlou hetlou in hoih tak tak in houpih theih leh kaki thuah thei uhi. Inn ah kikim nu leh pate'n honna dawn ua, a tung ua kipahna leh zahtakna a lian sem sem hi. Tun chuh insung a damlou omlou mah bang in nuam kasa ua, kaki thuah nai nai in nuam kasa thei mah mah uhi. Inn kuan kim a om leh damtak a om nawp na maizen e chih khong kathei khe thak thak hi. Ka tun ni uh a zinghal ding in Ruthi damdoi inn a om ka va veh dek leh damdoi inn a om nawn lou a inn lam a omta uh ahih dan kathei hi. Keileng a hoh di vang lak chi in a inn lam uah kava veh hi. Ruthi in honna muh in kipak mah mah mai hi. Kenle bang mah gen tam lou in chiam nuih kawm in "ana dam nailou na maw, zi dia hon kipi sawm ta a" chi kawm in ka nui hi. Huai phet in aman le a hon pi nuam tak tak dan a hon chih leh dawng di dan a bei hiau hi. Huchi'n sawt lou ka om nung in kapai pah a, office tawn in inn lam ah kapai ta hi. Office kai nalam ah leng lung nuamlou sa a kai chih leng a om nawn tadih kei phot hi. Huchia lung muang tak a office kai a ka om lai in, nikhat tuh inn lam apan phone hon pai hi. Kenle kalak leh kanau siamboi in Uson inn lam hon pai thei diam ukim kho phawk lou a hon puk inchin damdoi inn ah kana po dek uh chih thu ka za hi. Lungmuang tak a ki om a chih sim in aom hi. Huai phet in kenle kuamah hilh louh in office nusia in damdoi inlam ka zuan hi. Damdoi inn ka tung in kikim in khua ana phawk ta hi. Kenle doctor pa kiang a bang ziak tak a hichia hong om mawk hiam ka chih leh? Doctor pan ah a lung gim lua leh a tawl theilua a ahi hon chi hi. Kenle huai phet in kikim kiang ah kapai hi. Kanau siamboi toh ana om ahih man in, siamboi kiang ah na ut leh inn lam ana pai inla ana hoih ta chih ana hilh aw, nitak lam chiah kon pai di uh ka chi gaih hi. Huai phet in siamboi in hon pawt santa hi. Amah a pawt phet in ken kikim kiang a bang ngaih tuah e hon hilh dih? Ka chi a, aman bang mah ngaih tuah khang a hon chi hi. Kenle ka kalh tei tei a ngaih tuah nanei mah ve hon hilh ve ka chih tei tei leh kikim in "Uson ka lung gim na pen maw i nu in i kiteng hun in hon ompih lai diam chih ahi" a hon chi hi. Kenle huai khong ngaih tuah tuah di hilou, hon ompih lo di ahi. I kiten sung le hilou, i kiten khit nung le hon ompih di ahi chi'n ka muang sak hi.

Huchia khamuan sak a, kikim kawi kawm a ka om lai tak un Ruthi gingtaak louh pi in a hon lut mawk hi. Kenle kagen di bang kathei kei a kikim ka kawi ka khah tuan kei hi. Kenle huaiphet in ruthi bang hon hih dek neita ka chih leh "nou damlou te hon veh i voi" khauh deuh mai in a hon chi hi. Kenle ka dawng tam sekei a, himah leh ka hou chuh ka hou pih zeel hi. Nawp sa khol lou ahi ngei di'ng a sawt lou nung in a hon paisan hi. Kenle kha tuanlou in, ka tut na mun ah manpha leh ihmut lim ou a ka chi hi. Nitak lam dak 4 khong hon gingtak in doctor pa'n ah na ut ua leh na pawt khe theita uh a hon chi hi. Huai a hon chih phet in kenle innlamte ka phone a, hon pii di'ng in ka theisak hi. Hun sawt kuam tak ka ngak nung un kanau in gari in hon pii hi. Kou leng gari a tuang pah chih leh ka nau in uson bazar pha vanglak ni uh a hon chi a, kenle poilou phak theih mah e chi kawm in bazar lam ka hon zuan ta uhi. Bazar ah meh di khong ka hon lei ua huai leikhin phet, inn lam ka hong pai nawn uhi.

Inn lam ka hon tai un kikim in hon koi den hi ken ka koi hi. A hon iit dan leh hon ngaih dan hi a lamdang mah mah kachi lou theikei. Ruthi toh hichi mi'n hon dem nung ale it chih tak a hon it, ngaih chih tak a hon ngai. Inn ka tung un kikim hi ana ihmu man ahi ding a ka pawt khiak dek leh a honna koi lai a kenle ka et leh ana ihmu ngei a. Gimlua hi di hi a chih ka lungsim ah hon pawt hi. Phawng louh theih louh ahih ziak in ka phawng a ngai mai hi. Ka phawng leh kim in inn kitung ta a maw hon chi liliai hi, kenle nui kawm in hi kitung ta mah e ka chi hi. Kikim damtak a amuh tak un pakham te nupa chih phetlouh kanu leng akipak thei mah mah uhi. Damdoi nek di hon piak uh huai kava en pah ngal a, akim tak in kamu vang lak hi. Keileng damdoi lei khin pai leh inn tung dekta chih tak a, kaveng ua nupi khat toh kaki tuak kha ua, huai nupi pen in na inn ua om om numei pen nazi hia hon chi hi veh aw, kenle i hi kei ka ngaih zawng nu ahi kachi a ka nui heuhau kawm hi. Huai phet in huai nupi pen in "zi hou hon nei na di aw" ana kichi man dan ahi hon chi hi.

Inn ka tung phet in nitak an ne naikei mah le ung a damdoi nek di khat kapia hi. Huai zoh in kikim nasem ding in hon kisa a ken ka phal kei hi. Amah ka tu muang sak a, kikim nu toh kei leh kanau te ka taang uhi. Ann khong min vek phial hita chih di in, kikim atha bei lua chi'n hon lum hi. Kenleng ORS khong tawp sak in, adangte an ne ding in ka sawl a, kanu'n bel kei hon ngak pah pah a hih na ah kei honna ngak hi. Kikim hi hon hoih deuh tak in kei toh kikim leh ka nu'n an kon ne ta uhi. An nek lai in ka nu'n ah kikim kiang ah na hoih deuh hia, bang na chi a chih khawng a dong hi. Kikim leng pau peih khol lou ahi dia a dotna teng chauh a dawng hi. Kei a ding in aleh langkhat a nawp lou pi khat hon suak hi. Huchi'n ngei na dan te hih tou in ka om uhi. A zing in office kai ding in ka kuan san a, ka kuan ma in kanau te kiah hon gim sim a lele hon hilh pah un aw kachi hi. Lungsim thawm hau tak in office kai ding in ka kuan hi. Office ka tung tak in gingtak hetlouh ding in Ruthi office ana kai mawk hi. Kaki tuah un "damta na maw?" ka chih leh dam mah kei dia nang hong veh pah nahih chia chi kawm leh i hon muh louh na sawt lota chi a hong kai i voi a hon chi. Kenle aw a hoih eh chi in ka room ah ka lut san hi.Huai sun hi ka lung a nuam kei den a, inn lamte bang ana chi di uh aw? chih khong kia ka ngaih tuah hi. Lungsim khat a lah kanu le hoih lam nawt hiven amah le hon dampah inteh chih khong ahi zel hi. Kei leh kei khong ki heh nem in ka om nilouh hi. Nitak lam hong hita chih in ruthi kakiang ah hon pai a uson tuni bang chi e? na halh chi kei ngei hon chi a kenle kikim damlou inchin huai ziak hiveh aw kachi hi. Huaiphet in hon pawt khiak san a, kenle office vai a ka phak na di mun te pha ding in kakisa hi. Ka lawm di te aman tak un mun tuam tuam kapha kual uhi. Huai khit in office kon kik ua huai apan inn lam chiat ah kaki pai ta uhi. Keileng inn lam kapai pah a, inn ka tung in kuamah bang mah ana chi lou in ana halh vek tak inchuh ka zang huai mai hi.

Hun leh nite hon pai tou zel in, kanu leh kikim tele hoih tou zel hi. Tukha hi kikim toh kaki teng kha ding uh ahih ziak in pakham in kikim hi amau inn lam Lamka ah a ton pih suk ta hi. Kou unau thum leh kanu kia ka omta ua ka thawm hau sim mah mah uhi. Ahih ziak inlah hih theih om tuan kei hi. Kaki ten ni di uh date fix le fix, a kiten ni di ni chauh in samta ahih man in kou leng inn hah siang na leh vante hem theih dan dan in ka hem uhi. Mi hon pan pih di u le nau bang a tam thei mah mah uhi. Na khong sem a gimtak a ka om chiang in ka neulai hinkhua te ka phawk khe zel sek hi. Ka ngaih tuah na ah zaw sum kia hiveh aw maw mihing adia a poimawh chih phet in om lel hi. Kaneu lai a sum ka neih louh ziak a u leh nau ngoih ngoih ten le mit sik ale hon enlou. Tua lah IPS i kai leh tanau kihau petmah ka chih chiang in kanuih bang a leh zak mai mah hi. Kaki ten na ding uh ni thum chauh in samta ahih na ah kou leng programme teng le bawl zou bang teng, sai di om teng ka hih fel vek uhi. Card leng kitheih om liai teng inn veng, inn pam, lawm leh vual te lak ah ka hawm hi. Ruthi le va theih sak lou chih zen sang in chi in card kava pia hi. Kou lam apan chuh man kahi maita uhi. Dan siangthou a kiteng ding chi in keileng ka phur hi. A zingchiang (kaki ten ma ni un) reharshal hih ding chi in kanih un ka kuan uhi. Reharshal le zou a zingchiang a kiteng ding chi in kitha lawp tak mai in ka om uhi. A nitak bang ihmu thei jejen lou kipak lua chih di adiam ah, ka neu pek a pat kana ngaih kikim toh kiteng ding ka hih chiang in ka phur gawp hi. Nitak dak 12 lak vel in call hon pai a ka-et leh ruthi a ana hi hi. Kenle pick up hetlou in nga(5) vei mah mah ka ging thawn sak hi. Hon call nawn thou thou a hih chiang in kalak leh ruthi in "Uson hon ngai hetlou neivoi maw? Midang na hon neih san dek tel a, kei kana kihope den a, nawn kihope thawn sak mai maw?" a hon chi a kenle "ruthi thu chiang deuh in khatvei ka hon hilh khin hilou a maw, bang ding a honna ngai na hi hiam, ka hi thei nawn kei di ka chih sa hilou a maw" ka chih hi. Huai in ruthi chuh hon kap a a hin lah thil kikhel kik thei hi nawn talou a hih chiang in puak dan ana siam mai in aw ruthi ka chi hi.

Zan a ruthi in hon phone in lung hon khoih mah mah hi. A ziak bel mi hon ngai mah mah khat en midang khat neih san di chih chiang in kei ah lungmuan louh nakhat kanei mawk hi, thil hoihlou khat hon tung ding ahi chih thei khawl mah kabang hial hi. A zingchiang kakiten ni ding uh hi. Kei lah ihmu theilou in ka om hial hi. Zing khuate hon vak in, buh-al khuang in, vasa ten laa sa in ah kei a ding a ni thupi mah mah ding honna vai dawn bang tuk in ka ngai hi. Zing ann ne baih in kaki sata hi. Kei kisa khin in kanu kasa a, a nalh thei tawp in ka chei hi. Kanau tele aki sakhin vek uhi. Inn dongta te lah meh huan ann huai khong in a buai zelzul mai uhi. Kou leng biakinn lam manoh in ka pai ta uhi. Huchia ka hon pailai tak un ka nu'n ah ka lung a nawp hetkei hon chi hi. Keileng lungnuam lou sa ka hih chiang ah kanu' kiang ah "nu ei, bang a na lung nawp louh na?" chia ka dot leh kalu khong ahi beng bong ahi hon chi hi. Keile lung nuamlou sa sa in biakinn zuan in kapai thou thou uhi.

Huchia lung nawp lou sim himah leng alang khat ah kipah na a om hi. Mi gen dan le "a lang khat a kipahna, a lang khat a dahna" a chih te uh tun kei tung khol diak ah a dik mah mah hi. Biakin sung kong lut ta uhi. Kanu leh kanau te amasa lam a tu in a om ua, kikim toh ka lut ton uhi. Munkhat a tu khawm let lat in kipaktak a hun zang zou di chih ngaih tuah na toh ka dim hi. Huai phet in zung buh buhsak na Pastor pa'n hon nei sak dek hi. Ken zungbuh but sak zou, kikim in ka zungbuh di lakhe ta hon bun sak dek hita chih leh ka nu thakhat in hon puk guih hi. Kenle ka et suk leh ka nu kipuk ka mu hi. Huai phet in kikim in zungbuh hon bun sak dek lai tawp kik hi. Ken ka nu ka delh phei pah a, a nak dan hi hon khek in tha khat khat in hon nak guih guih hi, ka lung a buai ta hi. Kenle kanu ka dawm pawt in gari khat a ka guang a, damdoi inn lam ah hat deuh in katai pih hi. Damdoi in ka tung in doctor ten honna ngaih sak pah kei zawmah lai uhi. Ka heh tha suak in ka hang leh doctor khat in ICU a koih ding chi hi. ICU ah hon koih sak uhi. Minute 30 ding khong ahih in kikim, pakhamte leh kanau te a hon tung uhi.

Ka lungkham mah mah a, bang hon chi di aw? Chih kia ka lungsim ah om hi. Kei lah ka coat toh kikim lah moupuan toh ka om nengnung mai uhi. Kiteng dilai tai khia kahi mai uhi. Lung buai tak a omlai in Doctor khat hong pawt khia in kua e apasal? hon chita hi. Kenle apasal om nawn lou kei ata te lak ua upa pen kahi ka chih leh ka room ah hon zui lut in hon chi hi. Huai in chuh ka lungkham na hon behlap deuh deuh a, thilsia hon gen ngei ngei di dan in ka koih mawk hi. A room ah kava zuilut hi. Ka gingtak mah bang in doctor pa in nanu hi damzou nawn lou di ahi hon chi petmah hi. Na houpih theih lai un va houpih meng meng un a hon chita hi. Keileng lungkham dah leh tawl in ka pawt khia hi. Bang mah genlou di chi in ka iim sawm hi, himah leh dah lua kahih chiang kakap kha hi. Huaitak in Kikim in Uson kap keive bang hon chi a doctor pa'n hon chi pah ngal hi. Keile kidek zoulou in ka nu kiang ah kapai lut ngal a, kanu kiang ah kap lou in hoih tak tak in ka houpih hi.

Huai chi a kap hetlou a ka hou pih tau tau leh ka nu'n ah bawi doctor pa'n bang hon gen a hon chi hi. Kenle nu huaite gen kei ni dampah di nahi chi'n ka dawng hi. Kou leng kikhek hetlou ka hih na uah kikim leng moupuan toh hon lut in kanu le hon hou pih hi. Kanau te lah khasia in akap nilouh uhi. Kenle a tawp tawp in ki dek zoulou in "nu ei hehpihtak in kikim toh kakiteng tan uh hon dampih lai mai ve" ka chi kha hi. Huai phet in miteng in theivek ta uhi, kanu damzou lou di ahih chih a haih kei hial hi. Huai kachih phet in kikim in "Uson huai chi keive i nu hon dam pah di eive" kap kawm in hon chi hi. Dak kal nih khong huchia ka om khit nung in kanu hi hon nak nawn lou guih hi keileng patau in doctor pa kasam leh pawt ding in hon sawl hi. Kavek in ka pawt uhi. Minute tamlou nung in doctor pa hong pawt hi. Doctor pa in " i'm sorry, its the last minute" hon chi hi. Keileng ka diang lut pah ah, kanu lah pau zou nawn ding ka gingta kei uhi. Nu ei hon dampih lai ham ham ve, na tate nang lou a hing haksa salo lai ding keive ua kap kom in ka chi hi. Huai phet in pau peih lou sasa in ka nu'n " Bawi aw Luangkhi nul nawn ken aw bawi, na neu a na thuak nateng le hun lua, khitui luang sak nawn ken aw, hoih tak in nanau te na en kol di ua kikim toh hoih tak in nupa hon hi den un aw" hon chih kawm in ka khut hon len hi. Huai a gen khit phet in kakhu hon khah in hon beisanta mai hi.

Lungkham leh dah tak in ka om mai a, pasal toupi khat hi mah leng kanu ngai in kakap khe ngoih ngoih hi. A kap a chiau veng vung in ka om uhi. Kikim lah kidek zoulou in akap mai a. Kanau te lah kap kawm kawm in "nu ei hon paisan naikeive, kapa lah omlou a kou na tate bang suak ding kamai ua" khong hon chih chiang in ka khasiat tha bang a suak deuh deuh mai hi. Keileng kap kawm in "Nu ei kei nang lou a hing zou di ka maw?? Bang dia hon paisan nahi a a nu aw! Hon ngailua keive, nang lou in ann nek ding le haksa kasak natheih hilou a maw nu ei, hon pai kik maive" khong ka chi a, kakap kap mai hi. Kikim in lah "Nu ei ka uson hon ngaih na theilou natel maw? Ka uson a om ken kei le bang suak di kahi a, nu hon pai thak ve. Khatvei bek kikim na moupuan toh naki lawm lua hon chi lou a non paisan, nu ei naki oilua nu, hon heh pih lou tel maw?" khong hon chih lai chiang in ka khase deuh deuh hi. Kikim a ding in a pian na nu hi kei mah le anu bang a hon bawl a hih ziak bang inle kipahna in dim mah leng kakhase deuh deuh hi. Kei ka pawt khia a doctor te kiang ah a hih theih dan om non lou di hia chi'n chi mawh in ka va dong hi. IPS kahih hon theih phet un hon awl mawh zaw ua, form te khong fill up in damdoi in apan ka inn tan uh ka potung uhi.

Inn ka hon puak tung un zaw mi a hon dawn di lah tam a kap thei lah tam a ziak bel kanu mi polh nawp leh khovaan tang a kizang lua banah saptuam lam ale mi kizang mah mah khat ahih ziak hi. Mi hon ngaina tu u le nau, pianpih sang gam, lam leh vual, innsak innkhang te ka muh chiang in katha a thou thak jejen a, ka khasiat le a suak mah mah hi. Mit tui, nap tui nul kawm in inn sung ah kanu luang ka hon koih ta uhi. Kanu luang kiang apan ka pawt khe ut kei him him hi. Mi'n na thil hih di,sai di om hon chih chiang unle, na ut dan dan, hoih sak dan dan in ana hih mai ua, a bei zah teng ka hon pe na di ka chi mai hi. Kanu ka muh tawp na le hi ding ahih ziak in ka khe lah mah mah mai hi. Kanau te lah khasia kisa in kap in a kap mai ua "nu ei khat vei bek hon hou pih lai ve, na aw nem za nuam lo lai keive ua nu aw" khong a chi mai uhi. Ken le gen di dang theilou in "Nu aw khat bei vek na ann huan sa ne nuam lai keive, nu nang hon ngai nawn lou na maw? Hichia na hon beisan mai ding, khat vei bek kihou thei lai lou di i maw? Khong ka chi mai hi. A lawh ngaih na ka thei tuan kei, ka pau pau ziak a hon za nawn tuan di le ahi kei himah leh a hih di dan thei tuanlou i hih chiang in kihou pih kha nak hi. Kikim inlah a posiam thei mah mah kei a, kanu bang a hangsan mai "Nu ka uson toh ka kiteng di uh deih lou na maw? Mu nuam lou na maw? Kenlah hon kipah pih lua di hon sa ing a, nang hiai khong a na hon lupsan mai mah, nu ei naki oi lua. Khat vei bek kim na uson toh moupan silh kawm a na din khawm uh na nalh lua le chilou a na hon paisan ding zaw ka ngai theikei, nu hehpih tak in hon thou kik mai ve" khong a chi ngoih ngoih hi. Aki dek zou ka om sam kei uhi. Huchia ka omlai unle saptuam te vel na liau liau in thil teng ana sai vek ua, mi van hon pia, luang tung a puan hon silh sak lah aki tawl ngakei hi. Programme a bawl te uh ana paitou zel a, inn tek te thugen na hon tung tak in kei upa pen ka hih na toh ka va din a ngai hi. Ut leh ut louh chih omlou in kava ding tei sam hi.

Huai kava din tak in mipi tampi kamuh leh kanu hon it pih tu hichi zah a tam ahi maw chih bang kathei khe thak thak a, banah kou veng a skul om te'n a skul uh khak zen a kanu hon omlouh san na hon uap uh ka muh chiang bang in ka khase deuh deuh hi. Gen di pi pen le kathei kei a "Mi hichi zah zah na hon pai khawm uh ka kipak lua chih lou adang kagen thei kei" ka chi a, naupang te ading a thu kagen nawp tak pen ahih leh "nou te nu leh pa toh hing, nawp satak a na hinkhu na hon zang di ua, nu leh pa thu na hon mang ding uh, kei bel kanu leh pa hon omlou san ahi ta a, ut leh ut louh thu ahi kei" ka chi hi. Huchi'n thil tampi gen nuam nei mah leng ka gen thei nawn kei a, ka hun huchi'n kazang bei mai hi... Huai khit in kanu kiang ah ka va tu nawn hi. Hih theih dang lah omlou, ngaih tuah na bang pai a pai mai, kihah ngaih tuah leng lah paisual thei din mun a om zel, ngaih tuah lou a lah ki omthei lou. Programme kazang bei ta ua, a luang haan lam a puak di hon chih phet in ka phal kei a, kou inn mun a vui ding in ka ngen hi. Himah leh i teng det nadi ahih louh ziak in a hon phal kei uhi. Ka heh tha bang a suak ua, kikim hi'n kanau te hileh lah aki dek zou omlou in a kap kap mai ua, kei lah ka mit tui pawt pawt mai, a loh ngaihna kathei kei hi. Lim kilak na ka nei laitak un ka ka nu hing lai a innkuan kim a lim ka kilak uh bang ka mit kha khawng ah ahon dawk hi. Kikim in "nu ei hon thou ve kei toh lim khat vei bek i kila lai kei dia" khong a chi a. Ging tak khel in kikim in kanu hichi lawm lawm a honn a iit pih ding inle ka ging kei hi. Hanmual ka hong tung ta uh bang zaw khak khiak di hak na maizen e, kanu hichia vuiliam mai di ka gel chiang in hi kasathei mah mah kei hi. A hankuang ka koi tun tun mai a lah ahi thei nawn kei. A it a ngaih a tate nusia in Van khopi nuam a hon zot san ta hi. Ni 2 leh khong tuailai ten hon om pih ua, ka chim di dan uh a nuam tuam deuh hi. Himah leh nidang a kanu dam lai toh aki khai mah mah a, inn sung a thawm hau mah mah hi. Ka hin dan uh nawng kai tuan hi in kathei a, ann lah ane zou sam ki-om lou. Hichi'n dah leh ngui in ka om lai lai uhi.

Hunte hon pai tou in himah leh ngilh ni a kinei het kei a, a kha a sim bang ka nguai zou uhi. Kenle a tawp in hichi'n ka chi mai hi "i nguai ziak a i nu hon kik nawn di le ahi kei, huaiziak in kisu halh thak sawm chiat ni uh" ka chi hi. Inn te khong hah na ka hon nei ua, hih na lam peuh a "kanu omlai hile zaw" chih a baih sam a, a chi khalou le om kei ding. I office kai bang lah nuam thei nawn lou, lungsim khat thawm a thawm hau hileh kilawm. A khen chiang bang in kikim kiang a ka om dan khong kagen khe nak hi. I lusuun hon theih pih lah hi ngal Ruthi ta geet inla a hon iit dan leh a hon ngaih dan khong hon gen gen. Thil tam a hon gen zawh phot leh bang mah kitheilou tam hi zaw mai. Aman lah poisa hetlou, ei lah pasal piching khat kihi na a i nu ngai a kingui den lai. Kuamah theih louh in kei kana guk buai hi aziak bel kiteng dek lai apan tai khia ing a tua kiteng thak nawn di chih khong ka ngaih tuah chiang in ka ut tha a suak nawn kei a, himah leh kikim lah ka ngai zel a, ka hehpih zel hi. A lang khat a ruthi om a lang khat a kikim omta kei tel di himai. Ka nu'n bel kikim toh ka kiten di uh deih kei ut hilele ruthi in i kiteng kei a leh ka siluang na mu di khong hon chi zel. Ka lung hi a buai in a buai cherchur mai a, ka nu ka ngaih na toh, kikim toh kiteng kik di chih thu khong toh kua mah theih louh in ka buai hi. Nite hon pai tou zel in kaki ngeina seh thei dek pan pan uhi. Huchi'n ah kanau te leng a pai hut nawn ta ding a hih man in chi in kanau te hi a sepna lam ah pai ding in ka sawl hi. Himah leh kanau ten ah kikim toh kakiteng uh ka uap vanglak di uh a hon chi uah, ka hah nial nuam kei hi. Kikim nu leh pate'n lah lem sa chiah nawn lou uh hileh kilawm a bang sim a kikim toh kakiten kik nawn ding uh, lah hoih tak in a hon gen nuam kei uhi. Kenle nikhat hoih tak in ka kan a pakham kiang ah kikim toh kaki teng kik nawn di uh hon phallou nahi hia? Ka chih leh aphal lou pumlum hi khang hi lele mimuh dan in aki lawm kasa nawn kei a hon chita hi. Kenle a thu hon gente kikim kiang ah ka gen a, kikim kiang ah nang thu thu ahi ta kilawm salou a na hon kiteng pih nuam ka leh nang thu thu ahi ta chi in ka pai khiat san hi.

Amah leng sawt tak zaw hon kingaih tuah ahi ding a, kakiang a bang mah thu a hon gen kei a, pai lah a sawm kei hi. A hon it dan katheih sa ahih ziak in hon pawng paisan ngamlou di chih ka haih kei hial hi. Nikhat office kai dia kaki sak lai in common room a kanau te toh ama pate toh a hon sam khawm a, thugen nawp khat nei kahi a hon chi hi. A bang thu a diam chia ka om lai in kikim in Uson ka nu leh pate'n hon phal in phal kei le u le nang toh kiteng ding in kaman. Mi hon chih poikasa kei nang hon chih poikasa zaw a hon chi hi. Huai phet in pakham in nou thu thu ahi, kiteng thak di na chih ua leh hiai tung ah thil bang hiam a om leh a ban zaw kagen thei nawn kei di a hon chi hi. A lang khat a kipahna, a langkhat a lungkhamna a chih uh dik kasa mah mah hi a ziak bek kikim toh kiteng thak thei di ka chih chiang in kakipak petmah a, himah leh a lang khat ah kanu omlai hile zaw chih leh ruthi in a thil gen hon tak suah tak tak di hia?? Chih kia ka lungsim ah a om hi. Office ka kai na ah nikhat tuh sawt deuh om di Ruthi toh hoih tak a kaki hou theih khak leh chi in sawt kuam tak om, midang te paikhin ruthi le pai dia kisa lai kasam a, na kiang a thil gen di poi a poi mawh nei kahi kachi a ka room ah kasam lut hi. Huai phet in ruthi a hong lut a bang a uson na gen ut? A hon chi hi. Kenle Ruthi nang na hon thei siam kei, hehpih tak in hiai na hon ngaih na tawp san mai in, nidang ale kon hilh sa sa a na hon na ngaih kaki pak lua, himah leh tu din mun in Kikim kei adia bang kim ahi. Bang mah in kakal uh a hon subuai thei kei ding, huai ziak in nang le hehpihtak a thil hoih lou te hon chi'ng lou ding in kon ngen ka chi hi. Huai kagen khit in ruthi chuh a dah chi mah mah a, a lu kun kawm in bang mah lah genlou in minute tamlou a hon om hi. Huai khit in a hon dak tou a, thil khat na hon hih pih dia leh bang mah thil hoih hilou ding kahi a hon chi a. Kenle bang thil eita hon gen ve? Ka chih leh awl in ka hon gen di chi in room hon pawt san hi. Bang a mah mah di aw chih ka ngaih tuah na in a pum luah ta hi.

Hichia lungbuai tak a hon koih phet lou lungkham na hon behlap zaw mah lai hi. Den chia ka hih theih louh di khong, a hih ka leh thil dik lou khat khawng hon hih sak nuam hia chih khawng ka lungsim ah a hon suak hi. Poikei a hi hi hita ve Pathian muang peuh mah in gamta leng i lampi di hon bawl sak nadi aka hia chi khong in kei leh kei kakinem suk zel hi. Khatvei office kai lah gimhuai theilua inn ah ka om him him phot di kachi a inn ah ka om hi. Huai ni suun in ka phone a thawnkham la "zuang hong thou dih in pa" chih la ka ngaih ngaih le hon khim ahi ding a, ka theih louh kaal in ka ihmu kha hi. Dak kal 3 vaal bang ka suun ihmut hi. Ka thoh tak a ka et leh kikim kakiang a lum in hon koi thenthan a, va lak khiat sak dilah hilou deuh. Mi'n hn mu leh ahilou dan khong a alak khak di uh lah kalau zel hi. Hichia hon koi ka muh tak in lauhna om mah leh kakipak petmah hi a hang bel numei hichi tuk a ka gentheih sak nung ale it leh ngai chih tak a hon ngai nei kakichih chiang in ka hamphat lam kathei thak thak hi. Ka ang tung a khut koih a lum kikim chuh ka en en a, a sam khong ka sut sak a, ka et et chiang in hoih deuh deuh dan khong in kamu hi. Huaikhit in kenle kala ngaih ngai nawn in kikim khut tung ah kei khut koih in ka ihmu nawn hi. Huai ka thoh nawn in chuh kikim ana thou zou a kakhut ka koih dan mah in ana omlai hi. Mai khong kaphiat a kaki hah khit nung in kikim kiang a bang chik chiang in kiteng nawn le hoih nasa kachi a. Aman bel kapate'n hoih asak dan dan uh a chi. Huai phet in ken pakham kiang ah kakan pah ngal a, akin theilam in hih le hoih lou di hia chi kawm in kathu dot hi. Pakham in bel nang naki man hun hun kou lam mansa kahi uh a hon chi hi. Keileng kipak lua in kanau te khong ka hilh a, a date fix hinai kei mah le hon tung pah di ahih ziak in kaki pak hi. Kikim te'n Lamka ah hon paisan phot uhi. Nou na man chik chik a hong pai di kahi uh a hon vai khak na uh ahi. Khat vei thak pan la nawn in, inn te hah siang in, kikim toh kiteng thak ding in ka hon kisa nawn leu leu hi.

Kiteng thak ding in ka hon kisa uhi. Bang mah buaina om nawn lou di chi a kipak tak a ka om lai in Ruthi in numei adang him him na hon neih san aleh ka luang na mu di a hon chi leu leu hi. Aw kei mi vangtah pa kaki chi a, Luankhi nul nawn lou dia ka chih te bang chi mai mah a, nul nul lai tel di kamaw ka chi zel a. Akhen chiang bang in kei leh kei kaki buan zel hi. Bang hih khelh nei a, mi muh dah mu kahi hia? Chih bang a kaki dot hut a tam thei mah mah mai hi. A hang bel ka neu chik ua pan ka pa'n hon sih san, kaneu apat honna kem kanu lah nawp a sak dek pat a hon beisan nawn zel khong ngaih tuah in ka buai thei mah mah hi. Akhen chiang in lah Pathian muang tak a ka tup guh katun tak a kanu hon laksak kei adia a hoih zawk nadi adi aw kachi zel a. Abang bang hileh pathiang in thil teng thei hiven kachi suk hi. Kikim toh kaki teng thak ni di hun hong nai hiai hiai, kei lah ka diip ko hiai hiai, a ziak bel ruthi ngaih tuah zel kahih chiang in. Nikhat tuh Ruthi ka phone a, (kanau tele a om vek lai uh), hon hoh ding in kasam hi, bang dang hih ding hilou in ka kaal thu uh hoih tak a aven kei a leh kei kho nung buai ding ka hih ziak in,inn ah kasam hi. Kasap bang in a hon hoh ngut a kenle thu te hoih tak a hilh sip sip, iim neilou in kagen khe phek phek mai hi. A ziak pen bel kei maban ding ahih ziak in. Hichi'n Ruthi kiah ka chi a "Ruthi khat vei en thak him him dih, kou nu leh pa bei ung a, tua kou kiten ng hong suk buai sawm lai. Nou bang na nu leh pa ten hon dampih ua keisa hoih zaw le namu thei voi. Kou hichi liai liai hon suk buai tum na hiam"? Kap dek zen a ka chih mah leh zaw, ruthi inle nawp asa kei a, uson nidang chiah i kihou thak di hon chi in hon pai khiak san hi. Keile khase losam ka hih chiah ka khaam kei hi. Apai khit in chuh lung muan na kanei thei deuh hi. Kiten ni hon nai mah mah sim ta ahih chiang in inndongta te sam khawm in chialna lai hawm ding in ka hon kipat sawm ta uhi.

Huchiin indongta te panpih na leh lawmte panpih na ziak in kitenna ding a chialna lai ka hawm zou pah uhi. Ka lawmte'n le ruthi omdan thei ahih man un ava pe kei ua, ken katheih tak in pe ding in ka sawl hi, aziak bel pekei leng neng chik bek le hon iit lou hi di chih ahih ka leh hamsiat kampau a zat louh na di'ng in kape sak thou thou hi. Huai kapiak nitak in a hon phone pah a Uson na lungsim kihei tuanlou di neivoi maw? a hon chi a, kenle "hi" hei zen zen lou hial di kahi. Kathu gen te hoih tak in ngaih tuah thak in chi'n phone ka off khum hi. Ka off khit nung phone call hon pai nawn pah a, ruthi di mah sa in en lou hial in ka off gaih gaih hi. A tawp tawp in hon call ning gawp ka hih chiang in en selou in kala a "na bang a hon call peih na chia, khatvei ka hon ngaikei ka chih leh ngailou himai keivoi" chia ka hang zau zau leh a hon kap a uson kei kikim keive a hon chi a ka phone ka et leh kikim ana hipetmah, kagen di bang kathei nawn kei a lah kapau dek lai leh a hon koih khum hi. Kei chuh a buai hita ing ei kaki chi a, ka phone kik chiang in swtich off ngen a kichi ta hi. Ka lung a buai mah mah a, kakiten ding uh lah kalnawn hita tua thu hichi'n hon om mawk leh chi'n ka buai petmah hi. Hicia lungsim ale ngaih tuah di pen le theilou a ka om lai in message a hon lut a, "Uson na hon ngaih kei a leh i kiteng kei hial ding, ken lah hon ngai hon sa-sa hi ing a, i kiteng dileng i pate kiang a kana gen di" a hon chita hi. Kenle message a amah ahih louh dan ka gen dek chiang in a off den hi. A tawp tawp in zingchiang zingkal a baih thei pen in Lamka lam ka zuan suk di chi in kei mah mah in thupuk na kala ta hi. A nitak bang ka ihmu thei kei a, tun hong hichi nawn leh bang kasuak di chih khawng ngaih tuah in zan khovak in ka om hi. Zingkal lah a hon hi thei mah mah kei a, zan bang sawt kasa petmah hi. Zingkhua vak ta ding in sak chiang in honvak ngei ta lou. Huchi'n taikhua vak ding hai bang ngak in ka omta hi.

Zingkhua a hong vak petmah ta a ka chi bang a nuamtuam hi'n kathei jejen hi. Keileng 1st bus lap ding in kavan te pack in ka diang khe ngal hi. Zekai deuh zai adiam ah 1st bus te ah ka tuang kha kei a himah leh lawmte Lamka hoh ding a omte ka tuak kha a, huai te toh kakiton suk uhi. Lamka zuan a ka hon tailai un ka ngaih tuah na ah hiai a hon pawt mawk hi " Kikim in apa te kiang khong a ana gen khit a, hithei nawn lou di asak ua leh Ruthi kaki teng pih mai ke" chih hon suak mawk hi. Hiai bang ngaih tuah ding inle kaki ging ngei kei. Ahin lah kikim le kaneu ua pat kingai ding in hichia thutan na la guih ding in ka gingta tuan kei hi. Lamka tung kal bang ka ngak lah na maizen e aw chih tun tun a ngai mai hi. Moirang tan tungta chih ding in kagari bang uh a hon se zaw mah lai hi. Kenle lawmte kiang ah ka kin dan ka gen a, bus khat kaman zok a huai ah lamka tan tung ding ka tuang tahi. Lamka ka hon tungta ua, keile mundang a baang kual selou in kikim te inn ka manawh char char hi. Inn ka tung tak in kikim le ana omkei a puan sawp in a pawt achi ua, pakham te nupa ana kikhek hetlou in hoihtak in honna vai dawn uhi. Huai tak inchuh ka lung a nuam mah mah a, bang mah ana gen nailou hi ta e ka chi hi. Ann nelou a kuan ka hih na ah kagil bang a kial demdum hi, lah kagil a kial le kachi nuam tuan kei hi. Kimboi hon pai di ngak in a inn kong uah kana tu hi. Sawt lou nung in kikim a hon pai ngut a kei a hon muh leh lamdang asa a, Uson bang hih dia hon zin e? inn lamte a dam na u hia? hon chi hi. Kenle a kho hei dan lamdang kasa a, a hon dotna te ka dawng a inn sung ah hon lut pih hi. Amah hon pai phet in ann ana pelou u maw uson a gil kial lo di eive a hon chi ngal a, kenle duh sim mah leng kin huaikei kachi suk hi. Kalung sim buai chih tak in a buai nawnta hi. A inn ua a kho hei dan toh hon message a athil gen dan tuam lua ahih ziak in ka buai thak jejen hi.

Zing ann ka hon ne ua, pakham office kai ding in akuan khia a, pakham zi lah lou lam ah akuan dek a, tua din mun in kei toh kikim kia om kha di ka suak ua kipah na in kapum dim hi. A ziak bel thu te hoihtak a gen khawm thei di'ng ka hih ziak in. A vek ua a kuan khiak khit un kenle kikim an kuang hem lai, a kiang ah kava pai a, kikim zanitak a message na hon khak pen na tak tak a maw? Ka chih leh bang message maw, ken message ka hon khak louh pi a hon chih zel chiang in ka buai a. Chih leh kua adi aw chi zel, nitak in na hon phone hia leh ka chih leh ka hon phone phone a nala ngeisam nalak ale mi hangsan zaw mah hon chi a. Huaizoh message na hon khak voi huai ziak a Lamka a hon hoh kahi ka chih leh, bang message e hon en sak dih a chi a kenle ka et sak leh ken bang dia hiai khong hon khak di hon sa e, kanau nu hinteh hon chih san geih a. Ka gen di teng a bei hi. Ken kikim kiang ah kilung kham loman a kachih leh lungkham nadi omlou nang a kahi a kahi den ding hon taisan lou hial ding kahi a hon chi hi. Huaitak in kalung a muang pan hi. Huaitak in kenle huai chi dan ahi maw ka chi phet hi. Huai ni le giak selou in lung muang tak in kapai suk hi. Kiteng na ding nithum khong in samta kou leng mansa vitvet a om. Inndongta te khong in hon buaipih mah mah uh tanu te ann hoi toh a bang toh hih in a buai vengvung uhi. Nikhat chauh in samta chih ding in phone call a hong pai a ka et leh pakham ana hi a, kenle "HELLO, pakham bang chi sim e? Ka chih leh son nakiang ah gen di dan tuan le kathei kei kaki pah dan kikim toh kiteng theih di dinmun a hon omta u chin a hon chi hi. Kenle pakham noute ziak mah ahi hiai tan tan ka tung nou tung ah kipah thu gen di dan tuan le kathei kei kachi hi. Huai phet in kikim in hon hou pih nuam eive na kihou di uam a hon chi a hitham tham e ka chi a kikim toh kaki hou nawn uhi. Kikim in Uson neu chik lai a kiteng dia moupan hoihtak toh kizeem a kiteng di i chih te hon tangtung thei kakipak lua a hon chi a kenle keile kipak lua kahi kim, napate omlou hileh hiai tan tan ana kitung lou di hi a ka chi hi. Kikim in zingchia hon zin di kahi uh aw koih phot ni a hon chi a ka koih ta uhi.

A zing ahon hita a kikim te leng a hon tung khin tham ua Pastor pa'n ah reharshal nei di chi in kanih un a hon sam hi. Kou leng kava pai ua, zingchiang a ka hih di dan teng uh kava zil masa uhi. Ka neih zawh un kikim kiang ah zingchiang in kimu ni aw leh huai mateng omnuam kachi in kapai ngal hi innlam ah. Kiten mani chuh ka buai diak a, a ziak bel numei ki omlou pasal ngen hih di pilua le kitheilou lah buai a buai dan khat in ka om uhi. Mi bang katam in katam ua, a nitak in bang chuh mou pi khin mah kabang zai zai uhi. Huai ni ka ihmu kei phial uhi dakkal nih di lel khong ka ihmu man hi. Zingkal bang suak baih zaw deuh hileh aki lawm a, kou leng akin thei lam a biakin tung ding chi in an khawng ka ne baih ua. Dak sawm (10) akipan ding chih ahih ziak in sawm ma ngei in ka tung uhi. Himah leh hon lut sak naikei ua mipi chibai bawl masa ding chi in mipi te aki line sak ua huai mipi te chibai khit in biakinn sung uah ka lut pan uhi. I it i ngaih te toh om khawm ziak a diam ah hun tom bang aki sa mai mah a, hon kitengsak sun hi a sawt hetkei a, zung buh kibuh sak dek in kamit tui a hong luang mawk a, amasa a kanu tut namun en kawm in kamit tui ka nul hi. Ka nu hon dampih hile zaw kachi mah mah hi. Zung buh kabuh sak khit in katu nawn ua. Kanau te bang kamuh chiang in hehpih huai kasak tha khong a hon suak hi. Kiteng zou ta chih leh a khakna bawl nailou di a hon chi ua. Inn lam a kanih un kakiton ngal uhi. Inn lam a programme te khong ka zang ua, ka seppih te un van piak na hon nei ua ruthi a hon tel kei hi. Keile tuni kipahni ah kidah sak lou e ka chi a, kanu ngai mah mah leng le a ngailou dan le phawk lou dan in ka om sawm a himahleh kahi thei kei hi. Kap khak hun a tam sim mah mah hi. Hun nuam tak in kazang khin uhi, himahleh ruthi thu gen in kalung hon kam sim lai mah mah a, bang hon chi di hiam chih kia kangaih tuah hi. Kikim in Uson lungkham koh a nawp leh hak i thuak khawm na di. Bang mah hon chi kei na inteh a hon chi hi. Huchi'n kiteng zou phet a zingciang in office ka kai leh ruthi in congrates a hon chi a kenle thank you kachi hi. Huai nung kaki hou tam kei ua huchi'n kaki lawm pawl thou uhi. Hun leh nite hon paitou zel in kikim toh hinkho nawp tak ka zang khawm ua, a nawp a haksa ka thuak khawm ua, kua man hon subuai lou hial in ka om denta uhi.

BEITA..! BEITA..! BEITA..! BEITA..! BEITA..! BEITA..!

©Siamsinna leh Vakiangbu