ZOLAWKTA AW, CHIKCHIANG KHAWL DING NAHIAM??

By ~ Zo Khanthang

Zodawn a piang, ngeina, tawndan leh haksatna, azu aham thuak a khosakna theiman lou in lamka zang ah nu leh pa lemgeel na a keibang a khosa tulel a et in za lak a sawm giat te ihi ngei ding uh. Zodawn a nekzonna kiningching lou, buh leh bal leh khamkhop pianglou suanlam in lamka ah khuaivaitung bang in i diangkhe hehu ua, i kipatna ua ngaina leh mite haksatna teleng awlmoh chi mah lehang athu lel in i genta uhi. Zodawn a khuate mangthang leh tunung kum bangzah hiam a mangthang ding leng a tamta, huailam a khosa liailiai lai a mawltak leh amau nopsak khamkham a nopsakna zongte muhsit leh nuihsan in a om nalai uhi. Amau ten lou nasep leh zodawn a nekzonna nuamsa tuambiik leh mualgam a nasep mah lunggulh tuntun a om teitei hiding in i ngaihsun theikei hi.

Nikum masa in census lamtoh kisai in min lakhawm ding in zodawn lam khua tampi kava pha hi. Huai ah kava muh leh mi tangpi te genbel, hiailam ah nong pai sang un Lamka ah min lakhawm le uteh sum lah senglou di, mi lah kimzaw dia maw, chih ahi maimah hi. Inn khat a innkuan member kimtak a, ana omkip muh ding a omkei, mite leng a thawmhau ua, khosa liklik lel a omlai mi kuahiam mikhual mu tuh a ngaina se uh hi inleng kamu hi. 

Zodawn lam mun leh mual nuamtak te kava fangkual a, kho kumlui taktak, nutsiatsa, nidang a kholai luntak, i nam i gam adia mi suanhuai mahmah te khanlet na mun te kava mu a, khosung te gamlak suakta in, sialluang, dailing leh loupa ten a khuhmang sa nuai a Jubilee suang, hansuang leh nidanglai thu muhthei thil tampi te kava en a, kava simsim hi. Ka ngaihtuahna ah, nang kho kumlui, luahlouh a mang tamai, na khosung a mual suang kidoh ten na thupi na apuang a, himah leh tu in dailing ten honkhuh in, nidang a milian, milal leh mi thupi te vialvakna himah lechin, tu in gamsa, sihal leh vasa te khosakna nahi maimah ta maw ka chi hi.

Zodawn mah nuam veh aw chi in tangkou ding chi lenglah, atenglou kei kamsiam leh pauthei lel kasuak ding, khokiim khokiangte kadak a, mualsang taktak, tuivai kuam, tuiliam, ngazam, tuima luidung, vumpi mualtung, kaihlam tang sang taktak te etchim theih ahikei, mi gam hi maizen leh zaw ka chi a, kei leh kei ka ki-Question a, ka gam, Zogam chi a ka kisaktheih pih, nasung a tengte bang ka hi ua, mihing hi leteh bang na gentel diam maw? ka chi hi. Nektak zonna din' zodawn khosakna zaw hankihong banglel ahi. A kiningching dia goverment apat sum ki-sanctionte koi gam tung ata dia? kua ta dawh-ai siam a khim zingsak i hia, kachi vungvung hi. Khosung mite haksatdan genlouh inleng ka mu chian mai hi. Huansung a haichi tuh ding huanpua ah kiakpou in ane lou di ganta te'n ne maimah uh a bang hi. Government in tuantual te panpih nadi sum tampi paisak a, school te, damdawi inn te lam mahleh a manphat ding bang a zattheih mawk hilou ahi chi in agen uhi. Government school omsun telah keplouh puahlouh in om depdawp a, bawngte peuh giak in, azun, a-ek uh dim maimah hi. Bangziak a hiaite bek khosung mi'n enkai lou uh atel diam aw, ka chi a, himahleh goverment in a enkai dia aseh a, a nasep bang ua khaloh sangte muhkhak a omkei uh, Koi a om ahi ua? Amau genna ah, government apan sanction paite lah duh-amm pawlkhat te kituh in kinakna bang piang thethup a, ei a mawl, Lamka ale pem zoulou ten khutzep kawm a etmai ngai ahi, achi uhi.

Suanhuai mahmah dia gingta a heutu dia telte lah thugen siam lel ana hi maimah uh, sepna nei sunlah laihilh dia qualified nawnlou, atamzaw Lamka a om a gal et maimah, teacher kidaihlou suanlam a phunphun lai, a teacher omna sun alah a school building omlou. Christian value neilou tak a kikhosa hita, khaloh te sang in sawm a khat te pia in thumna lam ah hahpan mah le hang, i thumna in inntung lel le akaan kei ding, i sanggam khat khasiat nagah zaw inek ngai ahita ve. Siamsinna lam ah muhtheih in niamkiak ahi chih i thei, kuan i awlmoh tuan ale? Kei mahmah leng a kalsuan lou, kamlam thoh lel zaw kahi, zodawn a siamsin na om sunsun a kai zoulou leng a om nalai hi. A nu leh pate uh sulnung zui a makhuat a nekzong ding chih i ngaih tuahna ah leng a omkhakei maithei, i nam ngaina a, pil kisa a, neinung kisa, mipil khatzet ading in tuh awlmoh huai mah ahi. Nam changkang leh lamzang i hihtheih nading in aneilou, ahai, amawl te dopkang a khosakna lampi hilh a hunta ahi. Naupang tamlou te kava houpih a, sponsorship mu leng ana omta, adiak in i lak a lemgeel siam a project tuamtuam TEACH ZODAWN, leh mimal tak a pang Sir.KHUAL leh minloh khaklouh ten ana sem ngei uh ahi chih kava mu a phathuai uh kasa a, tamsem pethei ding in pathian in lamzang sak leh ichi ahi. Mualdawn zomi te kahna aw chikching in i khawlsak zoudia le?

©Siamsinna leh Vakiangbu