LUNG A NATUP TAANGPA TOH HONG LEENG MAI UN AW
By ~ Thanuam Dahpa
On 06-07-2012 at 12:00am via mobile
Part - I
Itna kaneih tengteng a ka it leh kumkhua a ding a kateel, midang kuamah a ding a kaphal louh Chingnou in kei itbang a hon it a kei ngaihbang a hon ngaihziak in hampha kakisa a kipahna kia in kadim hi. Chingnou toh kingaih teitei tup a nei a kingai kahikei ua a hunpuak khiat leh ki it ding a siam kahihziak ua itna kipetuah ka hi lel uhi. Ahihziak in itna simthute kikum a kakithuah naziak un niteng in ka ki itna uh a khang semsem a kikhen theinawn ding hilou in itna ziak a sihna tuak ding hile ung le sizaw ding tan in ka ki itna uh a thuk hi. Ki it tuah tak a khosak khawm a nuam a tun leh zua hallouh a khosak a hamphat huai petmah hi. Ka kimuh hun un thudang gending om loubang phial in ka ki itdan thukia uh kakigen ua kagen tam peuh uleh genbeh tam ka ut uhi. Huchih lai in nitak khat kho omdan a lunglen huai mahmah hi. Tungsolkha a taangpha petmah mai a lunglengthei te a ding a lunglen louhna vual omlou in keileng inn a om maimai theilou kahihziak in Chingnou phone in hun aneihleh pawtpih ding in kazawn a amanle manding a hihdan gen in kava tawn hi. Khavak nuai a khut kilen helhel in hohnading chihluat omlou in kapai ua huchihlai in Chingnou in "Ukhual,nangbang a melhoih leh omdan hoih kahon neihkhak hampha ka kisalua" chi in kakhut honletna nakpi in hon meksak a kenle "Ching,keilah nang mel hoih leh thuahnop,kamsiam kahon neihkhak hampha kaki sazaw a, nang hon neilou hileng khovel hin man leng omlou ding ahih dan katheikhe thakthak a no it ka kipaklua" chi in kadawng a ka itna kilat sakna in kaletna mun kakhut khat in kalet beh a akhut katawp sak hi.
Chingnou inleeng katawpna khut la in kakhut a hontawpsak thuk a
"Ukhual, hamphat thu a zaw kei hampha zaw keive..tulai tangval khamtheih
guihtheih hihlou a vaanvaan toh nang bangmah hihlou leh zahngai theitak
kei nimnem in kom tankhak sese pathian in hamphatna thupi pen a kei hon
vualzawl a hi kachilou theikei..hon it hon ngai atamtheih toh denchia
kon tanzoh louh dinglau kahi" ahon chi a kenle "Ching,ka khamtheih
hihlouh ngal nang a dia suanding neilou kahihchia huaibek a hoihna kanei
ngal louh in..hon ngaitam in hon deih tam mahleh nanglou kuaman ka itna
kapethei nawnkei ding. Itna kaneih tengteng nang natang vekta..itna
kanei beh lai lehleng midang pelou in nangkon piakbeh ut lai" ka chithuk
a kathugen in Chingnu kipaksak a hiding a kanung ah akhut langkhat in
hon kawi ek hi. "Ching ei, kon itluatziak in khatveivei kahon tanzohlouh
khak ding lauzel kahi" ka chih leh "Ukhual,bangziak in eita?" a hon chi
a "nang namel lah hoih nakam lahsiam nang hondeih tangval tampi om a
denchia khat tei in hon zolzoh khakding lau ka hi" ka chi hi. Chingnou
in, "Ukhual ei,hondeih tam mahleh nang adia gin om nathuchiam kachiamsa
peel nawn lou ding kahi,nanglou in leng kahing zoukei ding,non tanzohlou
khakding zaw lau hetken..nang asa ka hi a nang a ka hilai a nang amah
hi gige lai ding kahi" a hon chi thuk hi. Itna simthu lelchim hetlou
himah le ung nitak sawtdek ta ahihman in inn lam kazuan ua kapailai un
Chingnou in "Ukhual, kalnawn chia khopi a tanau veh a hohding keive
ua,kon ngaimah di" a hon chi a kalung tang hong nazot zezen hi.
"kare,huaimun ana hoh ding zaw konphal kei e" chihkia in ka dawng a
aman "bang a chia maw Ukhual? Ka nu leh pa toh ding kave uale" ahon chi a
"Ching,kahon muanlouh ziak ahikei na a huaimun ah zaw numei leh pasal
kal a ki zahtaakna tawmlua ahi,na mel hon muding ua namin theilou nasan
in hon ngaihdan hon gen ngam ding ua,nanglah kamsiam zawmah nakamsiam a
kinem zawmah ding ua kahon phal hetkei" ka chithuk hi. Chingnou huaikhua
a avahoh ding kaphalkei taktak hi. Itna sang a thangtatna uangzaw leh
pasal in numei maingal tak a abawl ngamna khua ahihdan kathei chiang
mahmah mai a etlah na lel a en mite kamsiam Chingnou in a vadou zohlouh
ding kalau taktak hi. Kalung noplouh Chingnou in athei mahmah a "Ukhual
ei, keile naupang selua lah hinawnlou ing a huaikia le hilou nu leh pa
toh ding hilai ing a, enle khopi kimukha ngeilou khat veibek mu ut
keivoi.." a hon chi a "Ching, keithu hileh tuh kahon phal
theikei,ahihziak in nangthu a hohlou thei ding hilou a nanu leh napa thu
ahihchiah navahoh dia,kagen bang in lawmbawl na ah hong pilvang in
aw.. khamtheih guihtheih hihte bang in honzol taktak le uh nang innocent
tak hon khemzou lawding uh ahi...kei a ding in nagin omna khaksuah
hetken aw" chin kadawng hi. "Ukhual, hon muang in la,huchidan a itna thu
hon genpih a omleh kon gendi..lungmuang tak in ana om in nang adia gin
om ding kahi" hon chi a kenle "awle nagin om na honsuah in" chi in a
innkong uh katun ziak un mangpha kikhak in kakikhen uhi.
Kapai kawm in ka ngaihtuah a Chingnou huaikhua a ava hohding kaphal
thei hetkei mawk hi. Tangval ten numei melthak a boh lutlut dan uh
katheih luat ahi a,Chingnou melhoihna mule uh kituh zezen di ua asel
zohlouh ziak khawng hunlem a mu a khat tei in ana suk thanghuai ding
bang kalau mawk hi. Kei phal louh aphatuam ding lah a hikei a..a nu le
pa zin a amah kia inn a anutsiat ding uh gintaakna ahuaikei hi. A zan
sawtpi ihmu theilou in Chingnou suun mah kabang a amanbel phone laithon
apat in lungmuang din ahon hilhhilh hi. Kalung a muangthei kei,Chingnou
khahsuah ding bangmai in kakikoih hi.
Chingnoute zin niding a hongtung a azin ni un kalung aleeng a
Chingnou ngai vungvung in kalung a zuang mahmah hi. Chingnou inle a hon
ngaihdan leh a hon miss dan ahah gen mahmah a azinkhak a kisikdan khawng
gen in kaki houden uhi.
Kal khat khawng a om un Chingnou in "ukhual, mikhat in hon propose
eive" ahon chi a ka gintak mah ahihna ah ka pawna mahmah hi. Himahleh
kapuaknat lam genlou in "amel a hoih hia? Ana yes ta maw" ka cithuk a
"mawkmawk, ka yes keilaw ding,upat a upata hilele mihoih a mihoih" ahon
chi a "ki mupan a amihoih dan theibaihna cia" ka chih leh kalawm nun hon
gen eivoi" ahon chi hi. Huaini apan in kalungnop louhna a kibehlap a
huai kawmkal ah kenlah a top up ding thunsak gige theilou kahihziak in
Chingnou in laithon pack neizoulou in kenlah phone sum neizou gige lou
kahih man in kakihou theihna uh a vang hiaihiai hi. Kalung nop louhtoh
Chingnou apan thu kazaklouh chia omthei lou in ka neih sunsun in laithon
pack kava thunsak a kihou theiding chi in kakithalawp mahmah hi. A
kinthei bangpen a inzuan in laithon kakhak pah a hon thuk kei a kenle
3vei a kizom a kakhak leh "ana khawl ou ka mankei zual" chih hon khak a
keileng kakhawl hi. Kalam et bang a hon khak tuanlouh tak in kakhak nawn
a man mahmah lou ahihdan gen in manzaw deuhta kihou theita ding
kahihdan uleh "kahon thuk keileh hon khakthuk nawn ken aw" chih ahon
behlap hi. A ziak kadot teitei tak in "min ka phone hon etsak pahpah ua"
a hon chi a "zan a kagen pan na phone kon en ding chia tuale hon
ngenngen a kapia hon thuk nawn koh" chih ahon behlap hi.
Khopi a om ten phone huchituk a ana pahtak uh kahehtha a suak a
himahleh hihtheih kaneikei hi. Anitak in kahoupih nawn a kalawm nun hon
ngailua a huai ah kavagiak, a upa a strick lua a phone sawt imek chia
hon taizel koih phot ni a hön chipah a sawt kihou theilou in a phone a
off hi. A zing in kamsiam tak in hon houpìh a "imaw tunia mikhat hong
hoh a hon propose eive" a hon chinawn a kenle "na yes hia leh?" ka
chithuk pah hi. "zenzen eive" a hon chi a kenle "a mel hoihsalou maw" ka
chih leh "amelzaw hoihthou hilele khamtheih hìh chi uh" ahon chi a
kalauh mahtak chi in "kei non ngaìhnawn kei leh leeng khamtheih hih toh
hong kingai mahmah ken aw" chin kadawng hi. Amanle thu tam genlou in
"awle" chih teng in ahon dawng a ahon dawndan in ka Chingnou kei a ahi
nawnkei chih katheita. Kalung a leeng a milak a omle ka ut
nawnkei..keikia a om a Chingnou kia ngaihtuah ka ut..ka neih sunsun in
ka top up a Chingnou ka phone a "number busy" chih a hi gige hi. Phone
sum neilou busy kichihziak kadot in kalawm ten hon thunsak ua,amau toh
kaki hou ua hi, chih dawn na kamu hi. Nalawmte hon thunsak a kei honhou
pihtheilou maw chin ka khelhou sim a "tu mahmah a hon thun uh kipahthu
gen phot keivoi" a hon chi a kalung sim in diknawn lou chih thei in
"kinakpah tuakna chia dakal khat phial kipah thugen" ka chih leh hon
hehsan in nahon theisiam kei chi in hon koihsan hi.
Ka it lua Chingnou in keisang a ngaihsak utzawk nei ahi chih kathei
mahmah ta a tawpsan zou hi a tawpsan ka ut petmah hi. Kidek theihtawp a
kidek in houpih louh teitei kasawm a kakidek chiang in a vangkim in aman
hon houpih a top up sak dingbang in hon ngenzel hi. Kaki hou theihna
ding uh ahh nak leh chi in ka top up sak zel a laithon 100lak ah 40 lel
khawng ken katang zou lelta.! Lungnuam lou tak a om in ann le hoihtak a
netheilou in a sun azan chilou in Chingnou ngai in ka lungleeng vungvung
hi. Ahaksatdan genvual ahikei.. kuamah thuak din kadeihsak
kei...Nitaklam khat tuh kidekzou lou in Chingnou ka phone hi. A phone ki
off ahihziak in lungnop louhna in hon buak a alawmnu ka call aman pick
up in bangmah genlou in honkoihsak a ka call nawn a lalou in tampi vei a
ging paisuak hi. Kalung nuamlou deuhdeuh ahih man in ka call nawn
teitei a hon la in "ka kikhawm ua" hon chi hi. "Na lawm nu pia in
tomchik ka houpih ding" ka chi teitei a "kou tukhawm lou" a hon chi a
"na tawp chiang un hon miss call sak in aw" chin kangen hi.
Kikhop hun tangpi hisap in kenle ka call nawn a Chingnou phone
"number busy" ana kichi hi. Kenle a lawmnu ka call nawn leh "tu mahmah a
tawp,ka lawm daileng" a hon chi a biak inn kong a dailen theihdia
gingta lou kahihziak in kahehtha a suak petmah hi. A tawptawp in
Chingnou ka call khethei khong a "kua houpih e" ka chihleh "ka giahna nu
toh ka kisumang ua kakizon na ua ka call ahi" a hon chi a kikhom
kisumang a ki call a minit 15 bang lut gingta lou in "thu tak hon gen
in" chi a ka nget ngutngut leh "zan a hon propose ka chihpa'n hon call
in a chi a ka call hi" hon chi a a propose pa ziak a ka top up sakte
zang a kei call hon ngaihsak louhziak a heh in kakinak pih ek hi. Thu
tak non hilh keileh kikhen ding chin kavau a aman le hichin hon gen hi.
"amah kikhawmlou ki khawm ka tawp un hongpai a lampi katan katon ua
kakikhen khit ua hon call in a chihziak a ka call ahi" hon chizaw mah a
kaheh petmah... "ki khop tawpchiah hon call in ka chih nalawm nun genlou
hia?" ka chih leh "gen mah e, mitoh kiton lai kahih ziak a kon call
louh hi" hon chi a "na kikhen nung ua bngdia hon call lou e?" ka
chiteitei a aman "huaipan hon mis call call a huai call masa kahi" a hon
chi tang hilhial hi. Kaheh petmah a "huchia keisang a poimoh sazaw
nahih leh kana tawp mai d" chi in ka phone kakoih san a kalung sim in
hon call kik leh chih utna toh kinepna kanei hi. Himahleh hon call nawn
kei a ka ki houkhak nawn pen un "ka nu ten nangtoh hon kitengsak tuanlou
ding uh a hìhman in kikhen maini" hon chi a "midang nangaih ziak in na
nute paulam dah in" ka chih leh "huaiziak ahikei,hon taitai uh ahi" hon
chih behlap hi. Huaitak in kenle khasiatna toh "kikhen lele khamtheih
hihpen toh zaw hong kingai ken aw" chi in kathu khak a man le kapkawm in
"nanglou kuamah ka ngaikei ding" chi in a honkhem lai hi.
Chingnou ka ngaihna a beithei kei. It petmah a ka it leh ka ngaih ana
hi a neuchik leng ka itna akiam tuankei hi. Himahleh aman kei sang a
itzawk tomchik sung a aneih theihziak in kei itna phatuam in kathei nawn
kei... A kuan ding ua kahoulim nate uh kangaihtuah a gin om dia a
kichiam na thu agente tu kikal a mang ngilh mai zaw athuak ahak
lua..kuata thuak zoh ding a hikei,ahihziak in thuak hakmahleh kathuak
mualsuah hamham hi.
Kikhen na genkhin himahle ung Chingnou midang adin ka koih
theikei...kei a dan mah in ka koih a kakoih lailai hi. Ka itlua hon sut
kua hihiam chihthei ut in theih teitei ka sawm a ka dot in Chingnou in
kuamah ngailou hi in a hon gen lailai hi. A hongtun un khat veibek vak
khawm lai ding in Chingnou kangen a amanleng hon Aw hi. Nidang a kahohna
zel mun uah kava hoh ua sawtlou ka tut un a phone hong ging a Chingnou
mel ahong san tuaituai zezen hi. Lalou ngamlou in ala a akihou khit uh
ka ngak hi. "ka pawt ua koih phot ni hon call thak mai in" chi in a
kihouna uh a tawpsak uhi. Tup khatnei kahihman in Chingnou phone ka
laaksak a phal lou ngamlou in hon tawisak hi. Ka theih ut theihna dia
lemtang tak chuh a hi a himahleh katheih ut katheih tak in ka dip teipi a
sut bang in a hong na a kahkhiat ek ek ka ut hi.
Chingnou phone ah laithon a hongtung zungzung a huailak a "ka hon
tawp ut lawlai" chih in kataksa teng a suzoi gai hi. Ka kiang a Chingnou
tu tiautiau bet suk ek bang ka ut a himahleh hiaiziak a honkhen hiding
chih ka ngaihtuah chiang in kei a ahih nawnlouh dan kathei thakzel a
aloh dingdan omlou in "Ching, kei hon ngaikei lechinle bangziak a numei
thangtat te dan a tom chiksung a nava gamtat a?" chi in a laithon
kasimsak a huaisang a nasa zaw "i 1 a **** u" chihpen le ensak in "hon
it taktak in hichia hon chilou ding ahi,na pal lai am lel ahìhziak a
tomchik kal a tawp theih nahih toh kizuak tuk a hon ngai ahi" chi in
Chingnou hehpih petmah in kagen hi. A phone ka laksak ziak leh huaibang
laithonte kamuh ziak a heh in Chingnou in hon dawng hetkei hi. "Ching
ei,kei na hon it nawnlouh ziak a kahon hazat man a kon chih ahikei,na
hinkhua a suse ut teziak a nasiat ding kadeih louhziak ahi, en in hon it
taktak in hiaite hon chingam lou ding ahi. Kum hiaitan i kingai tana a
ka omdan leh kakam a pan kon **** ut kon chikhe ngeikei..kizuak lei d
inle huaichi a zawn ngeilou ding ahi" chi in kahilh a atawp in hon
ngaidam in iki hou nitak a non chihnate ka hehlua a huchia omkha ka hi
hon chi a haksa samahleng kanial zoukei.. "ka ngaihsak nawnkei ding a ka
contact nawn kei ding chia naki chiam a nazuih dingleh ban ah na omdan
teng uh non hilh leh kon ngaidam ding..huai ban ah Khopi a nahoh nawn
hunhun ikikhen ni hiding ahi" chi a condition bawl in ka itluat Chingnou
nial zoulou in ka ngaidam hi.
A nung sawtpi in kalung muangta a ka itna masa mahbang in Chingou ka
it nawn hi. Himahleh Chingnou in Khopi lam mang ngilh theilou a hiding a
phone a pat a number lakhia in a gelhkiat ka va mukha hi. Kaheh a atawp
phial tung in a hon ngetbang in ka ngaidam nawn hi. A nuam a theihsa
ziak hia Chingnou in Khopi a mangngilh theituan kei...kei lungmuang tak a
om in ka top up sak zel a Chingnou in Khopite houpihna ding in anazang
beizel..katheih in khen teitei ka ut a khending hial kahìh chiang in ka
itluat Chingnou ngaihdam ngetna ka nial zou keizel... "ki ngai nawn ding
lah hilou ung a houpih leng bang apoina a omdia" ka chi a kana houpih
khak zel ahi" chih Chingnou paulam ahi gige hi.
A poina zaw a om kei himahleh ngaihsak nawnlou dia kakiang a akichiam
na Chingnou in bangmah lou a a koih katheisiam theikei hi. Ken Chingnou
kangaih bang a taksa lel etlahna a enlou a ngai taktak hilehzaw
huchituk a a lung gulh leh a poimoh a adeek zohlouh toh khen teitei
sawmlou mahding hing a... Taksa utna sukpi chin nading in ka it pen
kaphal theikei..kei itna ziak a kathuakna sang in Chingnou thangbawl a a
om ding kaphal louhna ziak in haksatna kathuak a himai hi. Ken Chingnou
siat ding kalauh ziak a amah kaven det sung in hon it hon ngaitampi
kataanta..poi kasa kei kadamsung a ding a deih chibang katel Chingnou
ading in kathuak ding chìh kapaipih ahi gige hi. Tun Chingnou in
athuchiam masa Khopite ngaihsak lou in a omzou kei a agal a kihou lel
chin puakdan kasiam teitei himahleh kei adia a zehphitna mun Khopi a zot
hunhun in kahin na tan in athuak zong in ngaihdam na kanei nawn keiding
chi in kalung sim kasuang tuah gige a ka suangtuah lai hi. Ka it luat
Ching aw nangding a chinlou kahi maiding,kei hon gintak bang a nataksa
kia lung gulh ana hikei henla kei hon itna kimkhau bek a hon it ana
hileh nazot man bek om ding hi a.. Neih le lam ah na kipahna ding kanei
kei a himahleh itna ah zaw kei hon itna kimkhat lel a hon it namuh leh
minuamsa nahi ding hi. Kei hon itna lian in thuk mahleh nang dia khumlou
ahi maiding maw.. Itna khum lung a natup a sihsial bang na zot Khopi
toh nun nuam hong leeng unla keizaw na vangngai a kha kapham leh
tungthang van ah dawnbang tuah ding kinem in haibang hon nangak ning
aw... Khapham thangvan kalen hun in natong chiamsa keiding in itna rose
paksan khat non paihding lung in ngilhken aw...
"Save journey and best of luck... Bye." ...¤...
Part - II - KEI NGAIH A LUNGTUP TAANGPA TOH NUNNUAM HEI UH....
Ka ngaih Chingnou Khopi a ahohziak a khahsuah bang a ka kingaihtuah
ziak in khopi a hohnawn ding ka phal theikei...... Hoh nawn hetlou ding
in ka ngen a aman leeng hohnawn lou a na deihdan a om gige ta di kahi
chia hon chiamziak in ka lung a muang a hohnawn ding in le ka um kei
hi.... Ka thuvaikhah "KHOPI A NA HOHNAWN NINI I KAL BEI CHIHNA A HI"
Chingnou in mangngilh ding in kagingta thei kei... A man le AWLE,
KAHOHNAWN KEI HIMHIM DI a hon chih ziak in mangngilh ding in ka gingta
kei hi.... Himahleh hunte hong pai a Chingnou in a thuchiam mangngilh
hia Khopi a hoh ut dan a hon hilhzel a ken bel ka gensa na thei maw, chi
in ka dawng zel hi.....
Huchi in Chingnou in tamvei a sawm luat chiang in kei thahatna a kham
ka tup pen a lungtang in hon pompih lou a hi chih ngaihtuahna ka
neihziak in ka phal louh dan gengen kei ding a haihuai a bat ziak in ka
daihsan a Chingnou in ka phallouhna ka gen leh hoh lou ding a a thuchiam
a cancelled ta....
Huai ni tuh khuavaak ngeikei leh ka chi petmah..... Khua a hongvaak a
Chingnou Khopi lamzuan a a zinding ka phal thei mahmah kei a ka
hihtheih lah omlou a hihman in kum zawn in khua mial den maileh chih ka
ut petmah hi... A zin diu nitaak in Sana ka en zel a nidang tengsang in
hun a paisau petmah hi. Khuamial pan chih ding in nitaak dak 10 a naging
man a nitak dak 10 gingpan kasak leh dak 12 a na ging manzel hi.... Ka
lupna tung ah Chingnou va om dingdan ka suangtuah a ka suangtuahna te
genkhiat ngam ding hilou tan ka ngaihtuah a Naa sa in a khen chiang in
kei le kei ka kitum ek ek hi. Hun sawtlou kingaihtuah ka kisak kal in
Aak masa ahongkhuang a ka dip ngek a na a ka lungphu a hat hi... Tuapan a
dakal tamlou chik sung a ka it pen kuamah a ding a ka phal louh in
tomchik sung a dia a zot pa kiang hon zotsan ding ka chih chiang in a
khen chiah ka hehtha a suak a a khen chiah ka kah tha a suak hi...
Chingnou zaw ka it petmah.. kei a ding in gin om henla kei kia a hileh
aman nop a sak kei leh leeng kei khovel a mi nuamsa pen ding in ka ki
koih hial hi..... Kei phal leh phal louh hilou in aak a hong khuang nawn
a a nat dan kam a agen seng vual ding a hikei hi.
Kei ut leh ut louh, kei phal leh phal louh hun pailiam in hontheihpih
lou in ka itluat Chingnou in a thuchiam pel a kathu vaikhak palsia dia
Khopi a zot niding kawl ah ni hongsuak a keiding in huaini tuk a nisuah
kamuh nuam louh hun a om keiding hi. Ka itluat Chingnou khahsuah taktak
ding kahita chih kathei a aguuk in itna luankhi kanulnul hi. Chingnou
kuankhiat ding ka en ut a himahleh ka mungam kei.. Kalung sim in "Ching
ei, kon itna theisiam himai lechin maw... Neih leh lam in kahon
kipaksak zoukei maithei, himah leh itna ziak a kipahna khovel a om a
hihlam theisiam hile chin zaw maw... Kho-ul kai zungzung a ka loh khiat
na nezong a ka itna tampi kihel ahih ziak a lim sadiak ding neive...
Ching aw, kei hon pel in singdang siang zuan dah maive... Singdang
kawidin kahon phal thei kei..." chi in ka thum hithit hi. Kuamah
theihpih louh in Chingnou pul kadou mahmah mai a huchi in ka phone la in
Chingnou muh din laithon saulou gelh in kakhak hi.
"Ching, kahon itluat ziak in midang a din kahon phal theikei..
huaiziak in Khopi a nahun lui nava sutzop ding kahon phal theikei a
himahleh nang keisang a nalung gulh zawk siangzuan ding nahih chiang in
gending bangmah kathei kei.. Kadeih pen tuh kei hon itna kimkhat bek a
hon it toh nun nuam nahong len ding ahi.. Lamzang inla lungnatup toh nun
nuam sawlbang hei in vabang hon leeng mai un aw.. Itna tawplou in kahon
it a itna vuaksuak nahisak ta.." chi in kakhasiatna thu kagelh ka khak
hi. Chingnou in bangmah in ahon dawngkei a lungmuangtak in ka phallouh
na Khopi a zuanta...
Chingnou sulnung ah kalung leeng hia, ka lungzuang hia chih kakithei
zoukei... Kalai dip ngek ana a kasung a hawm a ka omlouhna ding mun a om
mah kabang den hi. Itna in mi a sukipak a khovel hinkhua a sunuam a
aleh lam in lah khovel a hinman omlou, anuam khempeuh ahaksa in ka itna
in honkheksak hi. Vangsia kisakna in ahon pumtuam a ka et lampeuh kipah
melpu bangmah a omkei.. Sing leh gua te ka en a ken Chingnou kangaih
bang a hon ngaihpih a lungleng toh kibang in a kivuang ngelngel ua...
Nidang a huihsiang in a mutziak a kipak a lam mahbangte tuni in itna
vuaksuak ziak a lungleng a kuiku a bang uhi. Ka itna vuaksuak ziak in
thilteng a nguai in kamu hi.
Itna ziak in ka kipahna atam... Itna ziak in Chingnou tung ah ka
nakipak mahmah a khovel a kei kaan a hampha leh nuamsa om ding in ka
ngaihtuah ngeikei hi. Chingnou toh hun kazat khawm un nuam kasakna
genzoh vualding a hikei.. Ka etna peuh kipak in a nui hiuhiau un kamu a
lungnop louhna zong lengle mudin kaki gingta kei hi. Huaihun lai in
milungkham te lamdang kasa a bang chidan a lungkham thei uh adiam chin
ka ngaihtuah a kei adin lungkham na piang lou bang in ka ngaihtuah hi.
Ka it luat Chingnou toh ki-it tuah a ka khosak lai uh anuam petmah hi.
Setember/October kha hin kathei a khavak a siang mahmah mai a
lungleng theite a ding in lungleen louhna vual a omkei hi. Kou leng
Chingnou toh chiilhet lou a itna ka kipiak tuahlaitak uh ahi a
kalungleng lawsam in ka itluat Chingnou kia ngaihtuah in a inn ua hoh
din kava kuan hi. Chingnou le keilung zuan bang a nalung zuang sam a
hiding a a inntual ua khawlna munding mun nuamtak kibawl ah anatu hi. A
hon muh in anakipak ahihdan kathei mai a "Ukhual, hong hoh lou di hon
nasa ing a nakhase lua kahi. Kon lamet bang in nahong hoh a kakipak lua"
chih leh a kiang a vatu ding in a hon na kawkmuh hi.
"Nitak teng a hong hoh zezen le kineisak lua ka bat khak ding leh
midang a dia hun om hetlou a ken kon uk luat nalung loulam a hihkhak
ding lau hing a khapi vak nangtoh zatkhawm louh ding hisalou a hong
teitei mai kahi" chi a chiam nuih in akiang ah kava tu hi.
"Ukhual, nahon kineih sak kaan a nuam kasak a om kei.. nang a
kahihman in non kineìhsak ding mah ahi. Nahon kineihsak louh hun a hong
tun khak ding ahi kalauh" chi in chitak tak in Chingnou ahon chi a
khavak in amai asalh vak sihsiah a et lawm petmah hi.
"Ching, kon kineisak gige ding... kon kineih saktheih louh hun
hongtun khak ding ahi kalauh, nungak melhoihtak leh kizentak na hi a
nang hon deih tampite'n kei apan ahon lakmang hun uh ahongtun khak ding
ahi kalauh pen.. Itna lou masuan ding kaneih louhziak in khat veivei
kalung a muangthei kei.. Itna kia ahon tangzou ding kahìhman in keiding
in khahsuah na baihlam lua.." chin ka lungmuan louhna ka gen hi.
"Mawkmawk, Ukhual neih leh lam ziak a ki-it din le kei itlouh dizen a
neilou nahi kei, neih le lam inle kahon hawmthoh kei a huaikawm kal ah
itna siangthou tak a non itna kaan a ka kipahpih a omkei.. Nang hon
kineisak keile chinle nahon paikhe zounawn keiding, ka itna kia leng
hilou in kalungsim tengteng toh kataksa tengtoh nang a kahita a kahi
dending hi. Ikal ah thusia leng in dalna tuipi kihawtmah leh ka itna in
beini a neingei keiding a nang a kahi gige ding hi. Ikal honkhen ding in
muallian pi ikal ah hon pou leleng huaimual liampi kaantan in nasiang
kahon zuan teitei ding hi" chi in Chingnou in gin om na thu ahon gen a
kakipahna tuh genvual ahikei hi.
Hiaikhawng ka lungsim ah puanbang ahongthak a katheih louhkal in ka
mit a itna mit tuipawt kabiang ah khamvual louh in ahongluang keuhkeuh
hi.
Ka hunlui uh ngaihtuah in keikia in luankhi kanul lai in Chingnou
tuh a na itsa Khopi a ompa zuan in kithalawp tak in a kuan hi.
Naa kasakna kagen siamkei, mibang a sutsiam hileng ka sutsut ut hi.
Leitung a hin kei ading a phatuam nawnlou chi in sihmai ka ut a, mibang a
hangsan kahihlouh ziak in keile kei ka hinna kilaak ding ka ngamkei zel
a ka inn uh hongchim maihen la hondelh lum maileh chihkhawng ka ngaih
tuah hi. Thakhat in lampi a gari hat tak atai vaki gawilum sak mai ka ut
a Chingnou mel khat veibek muh ka ut lai ziak in huaileng ka ngam
keizel hi.
Leitung a gawtmun sang a haksa zaw kazat hun a sawt in a zekai petmah
mai hi. Chingnou houpih ka ut a a om dingdan khawng hilh ka ut petmah
hi. Himahleh kidek theihtawp in ka kidek a kidek zoulou in nikhat tuh ka
call hi. Chingnou in ahon dawng a kamin ale honsam lou in mituam
takbang in a hon houpih hi. Ka gen ut leng gen manlou in "nitak chiang
in kon call sak ding.." chihteng gen in akoih mawk hi. A hon na itluat
hisam ing a tua hon theingeilou dan a hon houpih naa kasa petmah mai a
keile kei lungsim natna kiguan lel ding in ka call nawn keiding chi in
ka phone apat Chingnou number ka lakhia hi.
Ann lah nezoulou in ka om a ka thuak gim na Chingnou in hontheihpih
hileh hon hehpih thak a hon it thak dingbang kalam en hi. Ahihziak in a
hon itna masa beisakta ahihman in nuam asak laiteng Chingnou in ahon it
nawn kalam enkei hi. Ahi alah kei itna alet luatziak in ka kinepna a
beithei ngeikei hi. Himahleh Chingnou siangthou tak a hong kiknawn ding
kalam en kei a.. hong kiknawn ding chìhbel ka ginta hi. Itna tak a it
kiang zuan hilou a taksa pal lun enlah maimai zuan ahi chih ka gintaak
luatziak in Chingnou ka hehpih mahmah mai hi.
Hun ahong pailiam zel a Chingnou omdan mi apan kaza zeuhzeuh hi. Ka
gintaak mah bang in itna ana piakpa mahtoh kithuah in nitak hun
azangkhawm gige uh chih ka zazel a kahehtha a suak petmah hi. Himahleh
gentheih kanei nawnkei, kei ading a Chingnou mituam ahita.. hon theile
hon theinawnlou ahita himahleh kidek zoulou a number zong in nikhat ka
phone nawn hi. Tutung in Chingnou in ahon natheilai a kamsiam tak in
"honthei nawnlou konsak leh non phone zenzen a" ahon chi a kenle
"Ching, chikmah chiang in kahon mang ngilh ngeikei ding.. himahleh ka
hon phawkna ziak a hon phone ka hikei a na omdan na hong pilvang zohlouh
khak ding kalauh ziak a hon phone kahi.." chin kagen sukpah hi.
Chingnou in "huailamthu zaw keile piching kahita. Nahon awlmoh ziak in
kakipak.. ka ut dan in kahong omdia ka siat leh keisia kahi dia nang
kahon susekha keiding.. Siat leng kase kei ding.. Itna kipiak tuahna
nang nazat theihlouh man in nahua ahi.." chi in kamsiamtak in ahehna hon
genpih a theisiam lou ahihdan genpih ut mahleng kagen ma in phone akoih
hi. Kei gen ding om lou pi a kava ki chinlah ziak in kapuak natna ding
kava muzel a khasia in kei le kei kakiluan sak luankhi kanul hi.
Chingnou' nunnuam a sawlbang aheina kumkhat ahongpha dekta a ka itna
neu chik leng kiam naikei mahleh nidangdan a ka phawk vungvung hun a
kivangh deuhta hi. Ka itna bel kiam hetlou in midang it theihna ding ka
itna teng Chingnou mah in alagai vek lai hi. Ka kinep nawnlouh leh hong
kik nawnleh leng pomtaak lou ding chih kathei gegu Chingnou ka itna a
kiamtheihlouh lamdang kasa hi. Ka Itna keibawl tawm leh kei utthu a itna
kapiak ahihlouh ziak a itna tak leh kasung a suak itna a hihziak a
kiamlou bel ahi ngeiding.. ahi a lah Laktaak nawn dia ka gintaak louh
hinapi a ka itna katawp saktheih louh zaw itna in honsuk hai kahi petmah
hi.
Huci kawmkal ah nikhat tuh ka phone a hong ging aka lakleh Chingnou
aw in "Ukhual, nahon thuhilhna te anazui himaileng zaw maw..." chi in
bangmah gentheilou in kah petmah in akap hi. Bang chidan a chi a kadot
in banghiam gensawm mahleh gentheilou in akap zel a a genkhiat theih om
suntuh "Ukhual" chih a hilel hi. Kaplou a thil omdan gen ding in hilh
mahleng gentheilou in akap huphup nilouh hi. Hehnep theihtawp aka hehnep
nep zoh in Chingnou a hong paukhia a "Ukhual, nahon thuhilhna te khatle
adik lou a omkei.. na hon itna hazaatna in nangaìh tuahkha keileng zaw
hichilou ding hing a..." Thil omdan im hetlou a hon hilh ding in kagen a
Chingnou leng chimohlua in a bul apan in im hetlou in a hon gen a kadot
khak kakisik petmah hi.
Chingnou in "Ukhual ei, nang kahon itlouh ziak ahihet kei a Khopi
kavahoh masa in katup kholh leng hihet lou in mi omdan hidia kagintak
ziak in non thuhilhna te non hazatna ziak ding bang a kana ngaihtuah kha
a nadeihlouh dan a kava omkhak ziak in itlou leh ngailou dan in khen
kahon sawm hi. Kon khenzou kei a himahleh kava omdan ziak in nang ading
ka chitna tengbei akatheìh ziak in nang misiangthou ading a chin kisa
zou mahmah lou in taihsat teitei kahon sawm himhim hi. Nang taihsat
kahon sawm a himahleh ka hinna a belh nahihman in kahon taisan zoukei...
nangtaihsat theihna ding omsun Khopi a om kiang ka delh louh adang ding
omlou a katheih man in nahon phallouh theimah leng nang hon itbang a
hon it a kanatheih kiang kavazuan a atuung in hihhoih kisa in kopak den
ding in kakigingta hi.
Kei ut bang leh kei kinep bang in a man le hon na welcome mahmah a
ka tunitak mahmah in hon it gige dan hon na genkhum pah hi. Ka kipahna
in van a sutkha chileng kakhial kei ding hi. Nitak sawt kuamtak hon
tutpih a hon itdan te kamsiamtak a hon gen in keikianglou a tu ut lou
hileh kilawm in kanih un munkhat ah ka tukhawm hilhel ua maban omsa
ahihtoh sawtpi kimulou a dangtaak tak tuh ka kikhelah mahmah uhi. Ka
omdante uh ka ki oikei na a mite hihdan a hihleh chihtoh nang mamah
mangngilh teitei ka utna ziak in ki oilou pipi in a thu in ka om a ...
omkei leng hon taihsat khak ding kalau hi. Itna hichi eive chi in a
khenchiang in nang kei hon itlou a huchia hon ompih ngeilou dan bang in
ka ngaihtuah a itloupi itbang a hong kibawl ding bang in ka hon
ngaihtuah kha zel hi. Huchin ka niteng hikhua tuh Khopi a pa toh mundai
leh mun thoveng a ut dandan a om a hita hi. Hon deihsaktu kei hon
thuhilhtute kei a ding a ka melma bang a thei in ka hua a ka mupeih kei
hi. Ka khanvual hon thuhilh a om chiang in hon phaklouhman un chi in
kihihsakna in kala a tomchik hun a ding in hun nuamtak tuh zang kahi
mai hi.
Kuamah englou leh nang hial leeng hon phok phalou in hun kahon zang a
kha li bang a hong chin in ka sunglam hong dim in kathei a nikhat tuh
naupai ka hi chih ka kitheih in hon it mahmah a katheih kiang a gen kal
kangak lah mahmah mai a.... ka genchiang a, a kipahna mel ka muh ding
dan ka mitkha in ka mukhol zezen hi. Huchi in gen na ding hun kazong a
kamu ngei hi. Genkhiat kal ka ngaklah mahmah mai a thudang le kalung
sim a omlou in thutuam a genchiang in le ka lungsim ah a lut theikei hi.
Nidang a ut le dah a ka va om na mun uh katun un hon itdan leh hon
ngaihdan gen in ka hihdan ngeibang un hon tawp a hon kawi a ka taksa
utna uh pichin ma a thu kipah huai zasak ut in hon kawina khut lakhia in
zumsim tak in leh a zaak nop theih pen din ...U i ki itna gahsuah
ihita...chi in a khut ka gil kakhoih sak hi. Ka gin takdan in kipak a ka
gil hon zuutsak hialhial dia lam en himahleng kei lam et a nabang
hetkei a, a ziak ding katheihlouh in a maihong mual a bangmah genlou
hial in a tu hi. Kipahziak a gending theilou hidia gingta in akhut ka
len a thakhat a ka khut hon paihsak in "Kei ta a hikei..." a hon chikhia
a ka dip tei a sut sang inle na kasa zaw hi. Bang chi dan a huai
chikhia hiam chih kadot in dawnna kichian hon pelou in numei kiveng
theilou kahihdan gen in zawlta toh hinkhua zangding na hi a hon chi a
kon itluat taisan hial a kazot kam a pawt ding in hi kasa kei hi. A
theihsiamlouh ziak hidia gingta in ama ta a hihdan kagen hang in
phattuam na a omkei... amah toh ka hinkhua bang ua midang om gige na
hihdan theilou hon sa maw? Kuapen ta a hia? keita a hi kei, chi in hon
it a hihlouh dan leh taksa utna kipiak tuah utziak mai a huchia hon om
pih ahihdan khawng hon genkhum hi. Ken zaw it teitei sawm hing a kei
itna bangmah ahikei hi.
Ka zin ding a non thugente tun a dikna kathei thak a kisik a sithei
hileng kasi khinta ding hi. Hon it tu leh itna tak a hon it a zahtaakna
toh hon en kahon taihsat ziak a hichiteng thuak ja hi mai hi. Ukhual
ei, ka hinkhua haksa lua eive. Hiai bangthute im mangtheih hileh nang
pen tak kiang ah kahon gen hetkei ding hi. Himahleh nanglou hon
deihsaktu dang om a ka theihlouh ziak a zumzou lou a hong gen ka himai
hi. Ka hinkhua kise dimdem bawl hoihthei ding kahi nawn kei chih jo
kathei a poi chih kaanlouh gending kathei kei. Ka maban hinkhua ding
bang suak ding ahia chih kathei zoukei. Hiaibang haksat na ka hon thuak
mualsuah zou leh na mel khatvei beek hon musak lai hamham in aw Ukhual.
Na mel etlawm leh na aw suak kilawm mu a za taak ka hinawn kei chih ka
kithei hi.
Himahleh Ukhual ei khatvei kia a hizong in na mel hon musak in ka
maban ding kamkhat bek hon gen le chin hiai leitung ka nuse zong in
lungmuang in ka nuse ding hi. Kisiamtan na ding neuchikleng kanei kei,
non thuhilh louh leh lampi dik nahon kawk muhlouh a hikei a kei haiziak a
hiaitan tung ka hi chihleng ka haihkei hi.
Ukhual aw nakiang a gen ut kahau petmah a himahleh nang a ding a zaak
noplua leh simnoplua hilou ahi chih katheih ziak in hiaizah in ka hun
sak mai ding. Ukhual na hehpihna in khatvei na mel hon musak teitei in
aw..
Chingnou
Chingnou a pan hiai laithon ka muh kasim in ka buang ah khitui a
luanglou theikei hi. Chingnou mohsak sang in kei ka kimohsak na in katha
teng a zoisak a..... Ching, hon ngaidam in, keiziak ahi. Kahon itpen
leh kahon ngaihpen bangding a hon vengbit zoulou kahia? min a mah
huangsung vengbit zou a ken keimah huangsung vengbit zoulou a ka itna
huangsung a ka pak hoih leh ka itna kaigil sung a ka vahui nou hon veng
bit zoulou a na paak ningzu maw midang kahon tep beisak tel.....Ching
aw..hon ngaidam in kei hihkhelh ahi....chi in Chingnou kei apan mi hon
laaksak zoh kisiam tanlouhna in kadim hi. Ka ngaihtuah a, Chingnou
hikhua haksat dingdan ka suangtuah ahaksatna thuak dia kaphal louh
Chingnou gawtmun hinkhua zang ding ka hehpihmah mah hi.
Haksatna in a honpumtuam hi. Itna diktak a ka it leh hawmthohna
lianpi a kahawm thoh in tua haksatna thuak a dai maimai thei a kitheilou
in ka om dingdan kathei zoukei hi. Ka itna neuchik lel le kuamlou
bangmai in Chingnou ka itna aleh tampi in a hong kibehlap a ' hon itlou a
midang zuan hiven...chin kihehnep sawm majleng a hitheikei....Chingnou
ngaihnawn ka ut a himahleh a sung a midang nau om pen pomthei lengle
kanu kapa leh kasanggamte'n hon pompih lou ding uh ahihdan kahaih kei
hi. Zankhovak in ka kingaihtuah a, akhen chiah Chingnou naupai suk kiat
a kitenpih suk mai ka ut a, a khenchiang in pasal pitou mi suk botlohsa
zi in nei lou e chi in kalung sim kakhen tat theikei hi. A tawp in
zingkhua vak ding chih in Chingnou va muh a, a ut lai leh a tatoh
tonpihmai ding kahon thupuuk hi.
Zingkhua hongvaak a kisa in ka itpen mideihlouh ka itna leh hehpihna
ziak a ngaidam a minsiat pihleh siatpihding sawm in khopi lamzuan in ka
kipankhia hi. Lam khotawn in ka minsiat dingdan ka ngaihtuah a, ka vual
lelh le vual lelhpih mai ding thupukna ka bawl hi.
Ka kingaihtuah naakluat ziak hia, kagim lam leeng phoklou in Khopi
katung a Chingnou muh utna a letluat ziak in khawltawl dam manlou phial
in Chingnou kianglam java zuan hi. Chingnoute inn ah ja va dak a kuamah
omlou in a kong uh na kikalh hi. A inn kiangte kiang a kakan leh den mah
a pawt khia a hi hong paipah in teh hon chi ua Chingnou a pan kaithon
khat hon napia uhi. Ka hong a, kasim leh....
Ukhual aw, na mel muh ding ka ut mahmah mai a, a sun a zan chilou in
na mel muh utna in ne le nezoulou dawn le dawn zoulou in ka hinkhua
kazang hi. Hon mu ut mahleng na mel muding a chitna nei nawnlou
kahihdan ka kithei a nang leeng nahon muh ut ka kilam en nawn hetkei hi.
Na hon muh utna ding a ka mel a bangmah belh nawnlou a na mel muding a
maiphaw bangmah neilou ka hihman in hon mungamlou in hiai leitung nusia
in thangvan gamnuam kon na zotsan mai ding hi. Kei ziak in na biang ah
khitui a luang keizong in kahon moh sakei, nang a ding a khitui luanna
taak kahikei a, ka hi nawn kei ding hi... a hihziak in mohsakna kahon
neikei, nang moh a hikei a kei le kei hehpihtaak dia omlou ka hihziak in
ka luangtung ah nakap keizong in kisiam tanlouhna nei ken aw Ukhual...
Kei giitnaatlouh ziak a kagil a kapuak na omlou beek hileh na kiang a
ngaihdam ngen in ka kapkhe ek ek ut hi. Himahleh ngaihdam ngen theiding
kahih nawnlouh ziak in ka itluat kahon paisan mai ding.Thangvan ah mite
kikhekna om a sianthou louhna a omkei leh huai mun a ka hinkhua
siangthou ding a kikhek toh nang kahon na ngak ding hi. Ukhual ei, hiai
khovel ah nang ding a chitna neilou himahleng huaimun ah zaw nang ding
in ka sianthouna tengteng kana siit ding hi. Huaimun ah singdang englou
laitual leen khawm kinem in na hongtun ding kahon na ngak ding hi. Hiai
leitung ah hun naneih laiteng a nuamthei pen in honzang in, ka pialgal
na hongtun chiang a nunnuam sawlbang iheina ding
kahih theihtawp suah in kana lem ding aw.....
Chih a na kigelh a ... Ching ei, Ching ei, huntom chik bek hon na
hungaih hile chin zaw pialgal lou hiai leitung ale nunnuam sawlbang hei
kgawm ding hihang amaw, chi in ka kap khelou thei kei hi.
Beita
©Siamsinna leh Vakiangbu
Comments
Post a Comment