KOI AH LAWI BANG KA THANPIH DIA

~Vz Vualnam

Kulsin daidam a ka zaal nua
Gua bang hingte’n ka sakmin a loh leh
Lanu ka ngaih sakmin toh loukhawm hen.
Simlei ah ngaih toh tul di’n kiging la’ng;
Tang liang in ngaih lanu’ sinlai ka kuailou a
Lanu’n ka vaang zu bang hon nial hi e.
Tulkhawmlou hal in ka ngaih hi e;
Hon nial hal in lanu mu bang ka ngaihna
Loutual pat bang neem tuamlou e.
Ka ngaih hi e ngaih ka baanglou ding a
Sinlai ah khuam bang a kip den ding hi e.
Phammual a chiaului lumsuang a ka pou nua
Khangsawn ta’ gia bang zuun a
Thelnah kawikaih a ka sakmin a tuan leh;
Kei mah vuak a va bang tuan ka nuamlou e;
Ngaihnou’ sakmin toh tuangkhawm nuam ing.
Gua bang hinlai a va bang tuankhawm ding
Tem bang deih lanu’n zu bang hon nial nua’n
A mi singta’n pham nua’n hon niallou lai ve aw.
Hon niallou aw pham nua damlai duang zil
Lumsuang etlawmnou a vangkholai a ka pou leh
Kei mah vuak khattang daidam law ding a
Khuai bang ulna’n ngaihnou duang lawmnou toh
Vangkholai ah zata’ veel di’n ka pou nuam hi e.
Gua bang hinlai a ngaih toh thangkhawm theilou
Pham nua’n zanglawi bang thangkhawm nuam ing e.
Ka thang nuam hal in lelliang daiteng a taa hi’ng e.
Pham nua’n ka sakmin kua’n loulou dia;
Thelnah kawikaih ah ka tuanglou dia;
Duang zil lumsuang in ka poulou ding aw.
Mu bang ngaih lohlah lianu toh
Gua bang hinlai a lawi bang thangkhawm theilou
Pham nua’n koi ah ka thanpih ding hiam chi’ng e!
Lengvan ah lawi bang thanna om hiam chi'ng!

----------------------------------------------------

Ka sih nung a a damlaite’n ka min a loh uleh ka ngaihnou’ min toh loukhawm uhen. Leitung ah ka ngaih toh ka kitengkei ding uh, ahon ngaihlouh ziak in. Kitengkei mah le ung ka it ahi a, ka ngaihna a kiam tuankei hi. Ka it ahi a, ka itlou tuankei a, ka itden ding hi. Hansuang a ka pou nung a khangthakte khawng in ka min a gelh uleh ka it nungaknu’ min toh gelhkhawm uhen.  Damlai a gelhkhawm ding ka it in hon nial nung in ka sihnung beek in mite’n hon nialkei un.  Sihnung a ka lem (statue) mite’n a bawl uleh kei kia in zaw hon dingsakkei un, ka chimlaw di. Ka it nungak toh miteng muh di’n hon dingkhawmsak un.  Damlai a lah mite lak a thangkhawm theilou sihnung beek in ka thangkhawm nuam hi.  Thangkhawm nuam mah le’ng dai kilkaal a mi lel ka hi a, ka sih nung chiang in kua’n ka min loulou dia, kua’n ka min gelhlou ding ua, kua’n milem a hon bawllou ding ua, koi ah ka thangkhawm mahmah ding hiam! Van ah ka minthanna a om de aw!

©Siamsinna leh Vakiangbu