SINGTHUPI

~Vz Vualnam

 

'Numei ahihleh vau nou ka suan dia, a paak kilawm tak suun a a mel a hong hoih a, a liim nuamtak suun a tawldamna a hong hihna di’n. Pasal ahihleh singthupi nou ka suan ding. Singthupi ka meh duhpen leh meh teng lak a manpha ka sakpen ahih bang a mi thupi leh manpha, neeknaak a hong hih theihna ding in,' Muanpu'n Niangbawi kiang ah achi a, Niangbawi, khathum khawng gaita in, ‘Singthupi va chih pentak, singthupi bang in a hong uihzaw kha diam maw,' achi'n a chiamnuih dawn hi. A kumnawn May kha in nau a nei ua, numei ahi a, Muanpu'n a chih bang in a tanu Kimbawi’ pianni theih gigena ding in a innkong uah vau nou a suan hi. Kum nih nung in nau a nei nawn ua, tutung in bel pasal ahi a, Muanpu’n Kimbawi’ pian a ahih bang in Lianpu' pian kipahpihna leh theih gigena ding in a huansung uah singthupi nou a suan hi.

Kumte hong paizel a, a tate leh a sing suante hong khangzel in theihlouh kaal in lianpi a hong hita uhi. Vaukung in khokhaal chiang in paak kilawmtak a suahkhia a, amau kia hilou in a mu peuhmah in kilawm sa in a enchim theikei uhi. Kimbawi leng tua bang a hong piching a, meel kia hilou a gamtatdan a leng kilawm a, mite' pahtaak leh geen a hong hih kaal a ngaklah mahmah hi. Singthupi bel vau kung bang in a khang haatkei a, himahleh a kum ahong sawt chiang in bel hong piching khong in meh ding neeksenglouh a pia a, amaukia a nelou in veng leh paam khol in atai mahmah chiat ua, tua singthupi kung tuh a paakta chiat uhi. Tua bang a Lianpu leng amau innkuan kia hilou a, veng leh paam leh huaite kheng lai a mite' kingakna a hong hihkaal a ngaklah mahmah hi.

Kumte pai zungzung ahihman in Kimbawi in leng pawl sawmlenih hon zou a, Lamka zaang a tuailai dangte bang in maban khopi a sutzop a lunggulh hi. A pa’n bel tulai a khopi a tuailaite’ thangtatdan kigen thang vengvungte khawng a ngaihsut chiang a a tanu sawlkhe ngamlou ahi sim a, Kimbawi’ kiang a, ‘bang hiam lungluut taktak hiam, ahihkaleh tup tinten nei le hikhollou a, huai BA maimai zil ding thouthou bang Lamka a sutzop theih nana ah sunzom mai leteh,’ chia a kutbawl chiang in Kimbawi a utkei hi. A lawmte teng phial in khopi zuan ding ua, amah Lamka a om tuam ding a utkei. Huchia a kut zohlouh chang in koikoi hiam a en ua, Bangalore ah amu uhi. A zinma ni un apa'n tua vaukung nuai ah a tonpih a, a kiang ah, 'Bawi, en dih, hiai vau kung, na pianni a ka suan ahi a, a paak kilawm mahmah in a liim a nuam mahmah a, a mu teng in a paakta uh. Tua bang a nang leng mel hileh gamtat hileh kilawm mahmah na hong hih a, hon mu teng in a hon pahtaak ding uh ka deih etsakna a ka suan ahi. Hiai thu chikmah chiang in hon mangngilhke'n aw,' chi in a Kimbawi a thuhilh hi. Huchi’n Kimbawi tuh Bangalore ah maban sunzom ding in a kuanta.

Lianpu leng piching ding a hong hita a, himahleh kholai thuthang a zaak zeuhzeuhte' ziak in a pa tuh a lung a nuam hetkei. Innsung ah bel thumang mahmah bang in a om a, huchi bang a gamta ding in a gingta thei himhimkei a, himahleh kholak thuthang in damdawi tang ne in agen hi. Ama'n leng pawl sawmlenih ahon zou nawn a, amah tuh Delhi a kai ding in a kisa hi. A pa’n tuh khaamna se theilou in a utnana a koihmai ding in a kiman hi. Kimbawi a thuhilh bang in apa'n Lianpu leng tua singthupi nuai ah a pi a, 'Bawi, ka gintaak sang in kei n'on suunzaw a, ka meh duh natan in na hon suun a, en dih hiai singthupi, kei duh zahzah in na duh a, sa sang in leng i ngaina zaw hi. Hiai singthupi kung in meh ding ahon piakkhiat teng leithoh ding hileh tampi man ding ahi a, i leizou gige kholkei maithei. Himahleh na pianni a ka kipahna ka theih gigena ding leh hiai singthupi, singkungte lak a singkung manphapi ahih bang a nang leng mi tampite' lak a mi manphapi na hong hih a, na gah mite'n a neek ua, na innkuante kia gentaaklouh naveng-napaam tanpha a dia nianna-taina na hong hih ding lunggulhna a hiai ka suan ahi. Na liangkou a kinga hiai lam-etna chikmah chiang in hon mangngilh ke'n aw,' chi in Lianpu a houlimpih hi.

Unau tegel tuh a omna chiat ua om in nu leh pa toh a vangkim a kithuzaak zel in a om uhi. Khopi a om numei khenkhatte’ omdan khawng hong kigenthang vengvung a, a limlak nasan utoh miteng muh dia ahong kithan vengvung chiang un a nu leh pa a lunghimoh mahmah ua, damdawi tang khawng baihlam taktak a muhtheih ahihdan khawng atheih chiang un a lunglau ua, himahleh a naupan hun sungteng uh hoihtak a Pathian thu leh khotang thu a hichi tuk a thuhilhsa hive'n, theisiamna nei sam mah ngallou ding uh hia chi in lungmuan a kiguan ua, himahleh a guuktak in bel a thawmhau mahmah uhi.

A tate a pichin tan uh a kep nung ua tua amau nupa kia a a om khonung phit chiang un lungleng kisa in inn bang lian asa hial uhi. Innkong a vau leh huan sung a singthupite'n lah a hun bangzel in paakte leh gahte ahon suangzel ua, a tate omlou in amaukia in a lungzuanna khop uh apha hi.

Nikhat sunnung a Muanpu innkong a a va pawt leh vaukung a a baakpi khat ateh teng ana vul vek a, Niangbawi a sam a, 'A sung a lung om ahi peuhmah di maw,' chi in tua lung in a hiang dangte pehlouhna ding tua singhiang khe di'n a hong kisa uhi. A khiat uleh a sing sung a na vang hemhom a, a khiatna ua pan thukpi a kungpi lam ah a vangsuk lai hi.A ziinglam chiang in a kapi dang khat ahong vul nawn a, huai phet in, 'abul niam deuh a i phukkei leh si peetmah ding eive,' kichi in lung in a batsuk nailouhna hi ding ua a gintakna mun uah a phuk uhi. A gintak bang un lung in ana baansuk naikei a, a hong selnawn a lam-en uhi.

Muanpu'n tua bang a Kimbawi' pianni a a singsuan hong vul maimah tuh bangchi hiam a a ngaihsut leh a lungsim a nuam hetkei a, lah huai khawng peuh lungnoplouh pih haihuai a sasim zel a, lah a lungsim kilkhat a kam gegu den hi. Tua vau kung a hong sel de aw? Sellou in a si maimah de aw? Chi in a lungnuam keihial hi. Zingkal teng in a selta hiam chi'n a va en gige a, sawtkuam sellou in a om a, a lung nuamkei seemseem hi. Huchia et leng a va et peih nawnlouh nung in nikhat tuh a sel a mu a, a lung anuam mahmah hi.

Nikhat tuh thu lungzinhuai mahmah in a hon buak hi. Lianpu tuh zukham a buaina a bawl ziak in a hostel ua pan nohkhiat ahih thu a za uhi. A tapa uh huchi zenkei na'n teh a chihchih sung ua tua bang thu a zaak uh tuh a lungdong mahmah ua, Muanpu tuh Delhi va zin a, a tapa tungtang va enkai ding in a kisa hi. A va tung a, hoihtak a thuhilh in a omna ding a va ngaihtuah sak a, a hong kiiknawn hi.

Hunte hong paizel in a tate hong graduate ua, Kimbawi in Bangalore mah a private company a sem in a lawmte toh innluah in a om ua, Lianpu bel sepna ding mu theilou in innlam a hong pai a, innlam a leng bang mah sem peihlou in a vaakthaap a, damdawi khamtheih leh zu a kibual in man na'ng omlou in a hinkhua a zang hi. Tua bang a a lam-etna teng a ngakna a tapa hichi maimah hong suak tuh a lungzing mahmah a, lah hihtheih anei tuankei hi.

Huchia niteng a lungngai a a omlai in lungngaihna i chih ama a ding khol hileh kilawm sak ding in thu lungzinhuai sem in a buakta hi. A tanu Kimbawi leh negrote' lupkhawmna video clip miteng muh ding a thehzaak in a hong om maimah hi. Dahlua kisa in dah ahihlam leng kitheilou bang in a kithei lehlam hi. Khosung a en a, taatna ding himhim a mukei a, innsung a en a, mikhual mah bang a kisa hi.

Kimbawi houpih sawm in a phone zel a, himahleh a phone a kisumit a, houpih but in a omkei hi. Bangalore a saptuamte leh pawl tuamtuamte tungtawn in a kanzel ua, amau leng theihtawp a suah nung un leng a mu zoukei ua, atungtang bangmah kankhiat zohlouh in a om hi. A sepna a pan leng ana tawpta a, a sepnate’n leng a tungtang a theiphakei uhi. A facebook leng a khaak man in kankhiak didan himhim a theibun nawnkei uhi.

Sawtpi nung in khatvei Kimbawi in anu ahon phone zenzen a, zum leh kisuanglahlua a kibumang ahihdan a anu ahilh a, tuban thuzaak nawnlou ding ahihdan leng ahilh hi. A nu'n bangchiteng a khem in innlam hong pai ding in kun mahleh a kun zoukei a, huchih laitak in a pa a hong pai a, a nu'n a pa toh a kihousak a, a pa'n awl in, 'Bawi, i innkong ua nang a dia kisuan vaupaak na theilai hiam? Tuma in lung in a hon ne a, a sih ding lau in ka phuuk ua, a hong sel nawn theihna ding in, en ve, tua sel nawnta in chin, liim nuamtak leh paak kilawmtak pe nawnta eivoi. A kiphuukna ma bel mite'n a mu gige ding ua, himahleh huai sang in a liim nuam leh a paak kilawmte a paakta zaw ding uhi. Kua ma’n a kiphuukna ma a buaipih nawnkei uh. Bawi, puuk theihmah ahi a, himahleh i puuk nung a i thohnawn pen hilou maw a poimoh zaw? Thou inla, hinkhua panthak le teh mite'n na puukziak a a hon muhsit sang un na thohnawn a hinkho thak na zatna ah ahon paakta zaw ding uh. Na puuk ziak in ka hon itna uh a kiam tuankei a, nidang a ka hon itna mah u toh ka hon it uh. Nidang sang in ka hon itzaw lai uh. Hong pai mahmah in bawi, ka hon ngailawta uh,' achi a, himahleh Kimbawi in, 'Himah e pa, hilele kua mah ka hon mu ngam nawnkei, inn leng ka hong lut ngam nawn kei, i khua uh leng ka siik ngam nawnkei. Hunsak phot ni pa, ka omna a chidam in ka omlel, hon lung himohkei un,' chi in a pa' pau na'ng hun leng awn nawnlou in akoih hi.

Kum hong paizel a, tua vaukung lah buk deuhdeuh in paakpha deuhdeuh in a om a, singthupi in lah neek ding tam semsem a piangsak a, Lianpu lah uang semsem in a om a, Kimbawi lah tanchin kan butlouh in a om vengveng hi. Nikhat nitumkuan a innkong a a nupa ua a tutlai un Niangbawi in Muanpu' kiang ah, 'Hiai singkungte i phuuk mai diam? Muhmuhle lungsim natsak sa hi veng aw,' achi a, Muanpu'n bel, 'Phuuklou e. Tanu khenkhat sang a vaupaak leltak leng manpha theizaw ahi chih mite'n a theih ua, tapa khenkhat sang a singthupi kung leltak leng manphazaw ahi chih mite'n atheihna ding un pouden uheh. Amau ka kep zahzah in vaukung leh singthupi kungte ana keem in, a tung ua ka sen tengteng vaukung leh singthupi kung buaipihna in zang zaw lengzaw tu hun a hinkhua a kilawmna leh lungkimna neizaw mahmah ding hi ve'ng ing, khovel a lohchingzaw ding hi veng ing,' achi vungvung hi.

©Siamsinna leh Vakiangbu