AL BANG DAH KUA'N ANIANGZAW HIAM

By : Vz Vualnam Ospa

Khosakmual tullim pa’n vangkhua don ing e
Simthu khumei a hong zaam en-en ing e
Simthu lengthe a hong khuang ngaingai ing e
Sinlai va bang phawng itna’ simthu hi
Tangliang leh alohlah heisa simthu hi
Liapal leh puan bang ataan tangliang simthu
Tullim pa’n en-en ing e ngaingai ing e
Al bang dahluat kua’n aniangzaw hiam chi’ng e

Tang in lanu an bang it tem bang deih e
Hizong tangpa’n zamzou dung asuunlah a
Paam a nalgo kui dung asuun ngawn hi e
Lanu lah apaalbel heisa hi e
Vangkholai ah asiing ding mi omlou e
Heisa lah nalgo duang ah kailou a aw
Bangchi’n simthu khau bang hong kiheek hiam chi’ng
Khosak tullim ah gal in don dih ni e

Lanu siang ah tangpa laitual aleng e
Sum bang bia e asiang mimva bang thuum e
Tangliang’ luanli ding aw ngaihtamsial ding aw
Ngaingam la’ng e simthu zangam la’ng e
Sum bang nial e singdang siang’ laileng in chi
Heisa lah nalgo duang ah kailou a aw
Gamsingmang a kai a utlim ding hi e
Phualngou toh tul ding a utlim ding hi e

A luanli aw, a luanli muantui bang phuul
Simlei ah anemzou ding singdang omlou
Sunsawt sawlseh bang vul zansawt hui bang mau
Sianmanglou buang a dahluat nem ding omlou
Sianmang tongnem pai bang pomlou hileh
Sianmang’ baanzaal ah anunna ngalouleh
Simlei mel in amanuamlim ding hi e
Khosial mel in amanuamlim ding hi e

‘Ngaih in n’on nial hal in tual n’on khia hal in
Singphung na tanma hai bang hon ngakngak ning
Vual tam in hon peel taleh ka siallou e
Vual in nuihchiam in leel leh ka siallou
Hawmsiam sianmang’ siam a an bang na itna’n
Tangliang kei siang hon zon na ngakngak ning e’
Lungtulou an bang itna sial bang lian in
Kumsawt angakzou hiam na en dih ni e

Tang in lanu’ sul azuih lenkum vei nua’n
Phualngou dungsun tangpaal lanu’n dawn bang tuak
Alai kuai e sunchin duangvulloh hi e
Tem bang deih e gamva bang mannuam e
Lanu’n phualngou tuanglam taan e khauphah e
Heisa paalbel kua’n zu bang anial diam
Lanu’n phualngou paallun chi bang telta e
Vangkholai ah nunnuam in lengta uh e

Tangpa zuangthou e aluanli buan bang nul
Asakduang gia bang zuun e silhpuan thak baat
Sian’ hawm kei di’n tang bang damna hi chi e
Sianmang siang mim bang thum e hai bang ngak
Solkha nihthum liamma’n sianmang hong pau e
Lungtu ngiingei lungpil lanu hon sawl e
Simlei ngaihsial sawl bang abaan na’ng hi e
Siangsung alum na’ng nun anop na’ng hi e

Lanu’n phualngou toh alen kum kivei nua’n
Machiang khankhua ding khuam bang ageelgeel chia’n
‘Simlei ah kawi ding phualngou i deih hal in
Kiang-awi ding kumsawt lou bang tulpih ding
Kawi lianu leh vonkhan lou bang khual ding
Chiim bang chiim tangpa mah ngaizaw ing’ chi e
A sanlai phualngou paallun tual ah khia e
A nial tangpa’ siang sulhei simthu leel e

Tangpa’n lah lung amuanna ngaihsial baanna
Lungtu ngiingei lanu’ tong na sangzou e
Zansawt ngaihsial sunsawt hui bang mau
Lanu tangta e sunchin sawl bang vul
Lung asiikna sial bang lian e van bang saang
Nau bang kap hal in luankhi’n let zoulou e
Mim bang thum hal in let zoulou lai hi e
Simlei ah lung asiik let ding omlou e

‘Kumsawt hai bang ngak ding chia simthu no’n leel
Na simthu mualhem ah vai bang thaam hi e
Tuuk tang bang tunglou di bang di’n nei chiam hiam?’
‘Lenkum luang khat hai bang hon ngak ing e
Kenlam bang hon peel a singta na pom aw
Lungsiik in ka siang sul n’ong heinawn di’n ging la’ng
Selung khuam bang gelching di’n hon ging la’ng e
Chiim bang hong chiim di’n lanu hon ging la’ng e’

‘Mu bang kingai tem bang kideihta hal in
Tuahlouh ding vangsel nihgeel laitan hi e
Kungtung tu laitan pai bang pom mai ni e
Laukha zu bang sedah maita ni e
Sianmang in ahawm leh gia bang tang hi e
Dahluat luanli zingdai bang theng thong ding aw
Kei ka kungtung ah ngou bang lang khinzou e
Ngaihsial luanli nul mel in mazou ing e’

Khosak tullim ah selung geelgeel ing e
Deihpaal loulah tang’ luanli achiimzaw maw
Deihpaal taan lanu’ luanli achiimzaw maw
Kua’n khosial siah bang aniangzaw hiam aw
Luanli achih zingdai bang theng dih hen aw
Tangpa lungtu lanu siang munmuang hen aw
Lanu’n lungtu tangpa dawn bang tuak hen aw
Simthu khumei azaam theng tadih hen aw

----------------------------------------------------

Khosak mual a singlim a tu in khua ka gal et a, thu khat meikhu in ahong zaam a, the bang bang in ahong khuang a, ka na en nilouh a, ka na ngai nilouh a, lung hon phawng itna thu ahi. Tangval in adeih atanzohlouh thu ahi a, nungak in adeih a khahsuah thu ahi. Akua zawpen in lungkham athuakzaw uhiam ka chi uhi.

Tangval khat in nungak a it a, himahleh tangvalpa a melhoihkei a, gokung bangmai ahi. Nungaknu ahihleh sahei paak hoihpen bang ahi a, amah demzou ding kuamah a omkei hi. Himahleh sahei paak lah gokung a kai ngeilou a, bangchi bang in thu ahong pai ding hiam chih khosak singlim apan ana en-en ni.

Tangval in nungak ava heel a, ahoupih hi. Himahleh tangvalpa khitui kai ding, alungkham ding dan tuh aw! Nungak nu’n ana nial a, mi dang heel mai in ana chi hi. Sahei paak lah gokung a kai ngeilou a, gamlak a singlian pipite ah akai ut ding a, vaphual toh a tulkhawm a ut ding hi.

A khitui tam hina e, leitung ah anemzou ding midang himhim a omkei hi. Sunkhua in a ngui a, zankhua in akap hi. Pathian chihlouh kihehnepna ding himhim aneikei hi. Pathian a kingalou hileh leitung paisan mai a ut ding a, lungkhamna mangngilh a ut ding hi.

‘Ka ngaih in hon nial mahlechin pasal na neihma zaw ka honna ngakngak ding, lawmte’n hon makhelh zungzung mahleh poi ka sakei ding. Pathian’ vaihawm a na itna kei kiang a ahong kiik ka na ngak nilouh ding.’ (Tangvalpa’n achi a) Hon ngailoute bang tanvei kingaakzou hiam i na en di uh.

Tangvalpa’n nungaknu a ngak kum khat ahong ching a, huchi in nungak in tangval melhoihtak khat ahon mu a, adeih mahmah a, amah a in abawl ut hi. Sahei paak kilawmpen kua’n adeihlou mahmah dia!! Nungaknu’n tangval melhoihpa ateelta a, huchi in nuamtak in ahong lengta uhi.

Tangvalpa ahong thou a, akhitui anuulsiang a, Pathian vaihawm kei ding a hoih ding ahi chi in Pathian kiang a athuum a, avaihawm angakta hi. Kha aman ma in Pathian in vai ahon hawm a, a itluat ding nungak khat ahon sawl hi. Lungkham-lungngaih tengteng amangngilhna ding ahi. A innsung gamlumsak ding, akipah tawntungna ding ahi.

Nungaknu leng tangval melhoih toh alen nung uh kum khat ahong chingta, akingaihtuahtuah chiang in, ‘Pasal ding in amelhoih i deihta zong in, kumtawn i kitenpih hial ding in a mihoih mah poimohzaw hive aw,’ chih ahong kingaihtuahkhia hi. A ngaihlai tangval melhoihpa akhen a, tuma a anawlkhin tangvalpa’ kiang ah amah deih ahihdan agen hi.

Tangvalpa’n lah alungkimna, alungmuanna nungaknu ana lenpihzouta hi. Zankhotawn a kah, sunkhotawn a ngui tuh nungaknu a ahong hita hi. A kisiikna alian mahmah a, akap alah kah in abawldik theikei a, athuum alah thuum in leng bangmah aloh theikei hi.

‘Sawtpi ka honna ngak ding na chi a, na thugente koi a omta uh ahia? Na tangtunlouh ding bangziak a hon gen na hia?’ achi a, tangvalpa’n, ‘Kumkhat hiilhial k’onna ngak a, kei hon nawlkhin a midang na ngaih nung in ka kiang a hong kiiknawn ding in ka hon gingtakei a ahi. Hichia hong kingaihtuahkhe ngei di’n k’on gingtakei a ahi,’ chi in adawng hi.

Kingai in ki-it mahle hang kitenlouh ding i vang ahi a hi’n teh. I tung a hong tu i vang pomsiam mai ni. Khase dah mai ni. Pathian in vai ahawm chiang a ei a ding a ahoihna ding ngen ahi. I dahna khituite hong hul khong ding ahi. Kei tung mahmah a ka theichian hi. Tu in lungngai a khituinul chih himhim ka theinawnkei hi.

Khosak singliim atu in ka ngaihtuahtuah a, adeih tangzoulou tangvalpa’ khitui atamzaw de aw? Ahihkaleh adeih taan nungaknu’ khitui? Kua’n lungkhamna adeihkhopzaw de aw? Khitui tengteng hul henla, tangvalpa akipahna nungaknu’ ang ah tul henla, nungaknu leng alungkimna tangval ang ah tulsam hen. Hiai tangthu meikhu a zaam thengta hen.

©Siamsinna leh Vakiangbu