KA SAB TE UN HON DEIHSAK

By Thanuam Dahpa
February 7, 2013  4:28pm

Hiai thumal kei kampau hilou in midang kampau kazaak khak ahi. Ka neulai in ka khua uh singtaang ah khatvei thu a Sepaih lut ton mili a om ua naupang te'n ka ngaisang thei mahmah uhi. Huchibang a khodang a sepna ziak a khopua a om kitamlou ahihman in nupi papi hi in nungak tangval hi taleh kipahpih in va kilakching khin kuan ding hun ngak a inn a om sung un mou neithak mah kibangsak hi. Nupi a tuah un sepaih a akuanding uh genpih in a om ua papi atuah unleng sepaihthu mah agenpih ua hampha mahmah ahihdan uleh kikhualsiam tak a hong pangding a a deihsakdan khawng uh agenpih lam uh kana za gige hi. Huaikia lou in nungak pichingtate bang in chiamnuih in khiatlah huailua ahihdan bang uh agen ua amauleng a kuankhiak ding uh a kithalawp luat uh gintaak huai lou zezen hi. 

Trainning ding a akuan uh ahong hundek taktak a sepaih kuandingte Saptuam in a khakna a hun a kuan khiak dek nitaak in kinei hi. Mikhat hile uh a kuanding pen inn a vaneihpih ding himahleh mi litak ahihman un a kuandingte inn alian pen ah a vek in khaakna in saptuam mipi va kileng khawm.dupdup hi. Huai hun in kuaman "eita lah hilou a" chih lungsim nei ki omhetlou in khosung mi ahihna uah mahni inn kuan mahbang in kikhelah chiat in kingaisang mahmah hi. Upa khenkhat in hasot na anei ua agentam pen utuh "Sab te deihsakna tan sawm teitei ding" chih ahi. Thu hoihtampi a kigenkhia a koipeuh ah om in gaal lak salak ah om mahle uh Pathian phawk a zuleh sa a kibual lou ding in thuhilh tuam omlou in a vek un kithuhilh khawm vek hi. 

A zing in milite tuh a pate chiat utoh bus hongtun na chiang khading in a kuan ua kho mipi in a paitum tan uh ki-en demduam hi. Milite leeng lamzangtak in training nading mun tung uh ahihdan nibang zah hiam nung in a innkuante uh laithon in a hon hilh chiat uhi. Khomipi inleeng kituam bawl lou ahihman in a nu le pate unleng kho mipi te tuam bawllou in amau a pan thuzak lamdang deuhleh nuihzaak huai pipi a gente uh milak a gen in amau lamthu ki uptodate thei mahmah hi. 

Khaguk hiamzoh in, huailai a achihdan un Rekrut (recruited) in ahong suty ua kou naupangte ngial bang intuh a innkuante uh amau vadawn ding zui in khomualtan kava dawn uhi. Khomual ahong tung ta ngei ua a sam uh belkuang lukhu style a tom in a hongpai ua huai lel leeng kizah taak mahmah hi. A mauleeng naupang tampi a mau dawn ahong kuanding chih theisa mahbang in khenkhat ten a va omna lam ua neektheih khawng ahon puak ua militak in a kibang ngen honpua hilou a hihman un chituam tuam neek khak leh muhkhaak ngeilouh a honpia ua nuam kisa petmah hi. Nitaak in saptuam mah in vaidawnna khat khitkhat in a inn chiat uah kileng khawm zaizai nawn hi. Nili sung a inn chiat ua leenkhawm ahihlai in amaute va khosakdan report kipesak vek ahihman in zaak nophuai tampi agen nalak uah atung a a thu "KA SAB TE UN HON DEIHSAK" chih a genkha vek uhi. Huai hun in hiai "Ka sab te un hon deihsak" chi thupi lua in ka koih kei a a feltungtuan ziak bang uh hidia koih in ka na ngaisang gu mahmah hi. Kum bangzah hiam a hong pan khit un keileng ka hong lian deuh a amau tohleeng kihoulim thei ka hong hita a Sepaih thukhawng ka houlim kha zel uhi. Ka houlim khak peuh in i thupi mah a gen kha veklai uhi. Huchi kawmkal ah mi kibanglou ahihna uah a thuguk uh leng kithei chiat simta a khenkhatte belh ngah zungzung a heutu dinmun ngah bang hong om uh khenkhatte bel belh khat le ngahlou a duty ginatlouh ziakbang a gawtna mumu ahihdan bang uh houlim nalak ah hon genkha zekzek uhi. Himahleh belh mute leh a muloute hileh a gen maihlouh utuh "Sab te deihsak dan" mah ahihi. Ka khonung ngaihtuah kiik chiang in bangziak a Sepaih pang peuh in Ka sab te un hon deihsak chithei chiat uh ahiding..? Sepna teng lak ah sepaihte kia Sab te deihsak hih ut sese uh adiam? Huai hidin zaw igingta kei.. sepna peuh a kuapeuh Sab te deihsak i ut chiat ding uh. A hihleh Sepaih pangte kia in zuau gen a a zuaupi ua Ka Sab ten hon deihsak chi uh a hidiam? Huaile gintaak huai vek din i umkei.. Sepaih khat le nih zuau gen hat leh kiphat ut himhim ana omkha maithei himahleh avek un kiphat in a nu apa leh khosung mite a hon khem kei ding uh. 

Ahihleh bangziak a Sepaih Sab ten a heute uh mi a nuai a simte kideihsak nalam a sulung kim zou uh ahiding? Eitoh kibanglou ua heute suk kipahdan siam tungtuan uh ahidiam? A hikha omzek mahleh Sab tengteng aheute uh sukipaak din a pilvek kei uh. Khenkhat tebang sepaih sab bang chidan a na hikha a de aw chih ding khop leng tamkhop om uhi. Huaite leeng ka sab pa ahailua chia gen a om lele atam keiding. Huaiziak in hiai sepaih sab ten a heute uh a kipahsakna thuguk uh bang a hidia?

Lungsim kibang hetlou ngen akhumte thumang mahmah om mahleh a khente gilou mahmah leh lungsim kawitak a om ding uh..Munkhat a pan kaihkhop a hikei ua India gamsung zapi a tamlou lou kaihkhop a hizaw mah ua huai lungsim tuam taktak leh tawbdan chituam pipi, Khankhiatna chituamtuam leh ki-etkolna kibang hetlou a khangkhiate gensiat a omlou a heute keptheihna ziak thuguk om ahidiam? Huchi om hileh eiten le itheikhe thamta ding un a gintaak huai hi. Thuguk om ahihtuan keileh min a zoh uh enbang dia zoulou tuam ihiding ?

A ziak tampi a omding himahleh eilak a i heute a khasiat naak utuh heutute pilvan zohlouh ziak ichilou theikei. Nidang a houpih nop mahmah leh nuih mai gige te heutu dinmun a ihong dinchiang un mipi lak ah khodaak haihuai sa hileh kilawm in nidang a i houpih maih ngeiloute nasan mit siik ale en nawnlou in theikha ngeilou mah ibang pah uhi. I heutu hihna in i mit hongmial sak ahih maimah chiang a iheute bang chi kipahsak theiding? Sepaih Sabte thuguk a kigen (adik leh diklouh bel katheikei) tuh mahni heute a min ua sap theih ahi. Dik in dik.keita leh heutu khat in aheute a min ua asap theih chuh minbei houpih a ahoupih sang in a ngainat huai zaw himhim hi. Deihsak kichi mahleng amin natawm itheihlouh tuh bang chiin ideihsakna a kilang thei dia.

Heutute'n a mangngilh naak uchuh mipi nautaangte ziak a heutu hi kahi chih amang ngilh louh ding uh ahi. Mahni ading a hon panpih theite kia thei a midang theihsawm lou heutu a i zat gige ziak a bangmah tan tung ngeilou ihi chih gen selouh in ithei hi. Sikul lel ah leng naupangten i pahtaak heutu tuh anaupangte a min ua samthei geihgeihte a hinaak hi. Heutu khat in minbei houpih a hon houpih a "Hey you boy" hon chih uleh kihei a et ding leeng ut huai khollou hi. Huchi hilou a " Mr/miss ....." chia hinsap uleh athu uh manlouh ding kisuanlah huai khin hi. Huchi bang in heutu ihihna ah kuapeuh mah heutu ihihman in bang chileh i heute'n hon ngaina ding ua chih i ngaihtuah leh izon ding ahi. I pu pa ten "kamsiam in Sial lei asang" a chih uapan inleng pil huai mahmah hi.

Huai ban ah ei mipite leng i heutu pa/nu ah muanna i kitaak sap mahmah uh ahi. Mahni punna ding mimaltak a hon sepsak lou heutu pil in siam mahleh i muanna i koih ut kei uhi. Ei a ding hiam i innsung ading a semlou heutu in Nnasep hoihtak sem khe lehleng demna ding ihaih kei uhi. Heutute pahtaak lohding in bang isem khia a chih kivel lou in Heutu in kei ading bang a semkhia a chih iheutute teh/buuk dan ahi. Sepaih ten aheutute uh a maivil ua ka sab pan hon pakta kei khading chih lau in sepdia kipia peuh asem uhi. I theihchiatsa bang in Sepaihte'n a mau mimal meetna ding kia in Nna asem keipeuh mah uhi. Huaiziak in kuapeuh a kipak ua kideihsak tuah in Nna aseem khawm thei uhi. Sepaihten a heute uh thumang keile uh gawt a omding uh ahi ichimai thei a adikna chiang a om ding himahleh pasal toupi gawt ding lauh ziak kia in niteng in a thumang zousam keiding uh.

Huaiziak in heutu ding a i vokkhiat mi kuapeuh hileh atung ah muanna ikoih poimoh hi. Bangmah tan hon tunpihlou ding heutu in ikoih kei himhim ding. Bangmah tan hontun pihlouh ding heutu a ikoih leh mipite moh mah hiding hizel hi. Heutu nungthuap a zuih mipi a ding ahi a heutu soiselna pen mipite khanmoh bawk ahi. Mahni in thuhoih i pawsuah theikei ua mipuak suahsa hoihlouhna ding i zongsiam zaw uhi. Ngaihdan hoihleh akhantouh huai lung geel neituanlou pi in mi geelsa i zui ngam kei ua ahoih hon tutpih ding uh sui lou in asia hontut pihtheih dingte i sui ua i khanmoh bawk uh kimuanlouhna a hi gige hi. Midang a muanna neilou leh koih ngamloute mahni muanhuailou te a hinaak uhi. Huaiziak in i heute ka sab ten hon deihsak a chihtheihna ding un i heute kipahna zong in i sabten ei a muanna a koih ua hon deihsak theihna ding in muanhuai in gin om chiat ni. 

@Siamsinna leh Vakiangbu