ITNA VANGTAH
By : Khen Thang Hangxing
(Kua hiam min kibatpih, leh athu paidan ana kituak kha awm jenjen leh
agelhtu pan huai dia agelh hilou phuah tawm ahi chi ana thei masa ni)
..tring..tring..hello? Kua a?.. Siamte ka hi Uthang.. tunii hong hoh
teitei in aw.. na man diam?..man mah ning ka suty ni uh eive Siam..
ahoihve Uthang nong hoh teitei di eikha.. neklim aw.. awle aw Siam!...
Sana ka etleh dak 6.30am chet ana ging a, kenle thou mai di ci in lupna
tung ah ka tutou hi.
Siamte.. bang jiak a de aw?..bang gen ut nei a dia o? kipak sim lah lungnuamlou sim in ka awm a..
ka ngaihtuahna apaisau petmah mawk hi..a birthday ka lop nitak ua
utleh utlouh thu hilou a akong ua kaihpawt a ka awm khawng..Siamte in
apa awmdan theisiam lou a mittui pak niuniau a hon et gige lai bang ka
phawk guih jawjen hi. Ka heh lah suak, jum huai lah sa jel, kei jiak a
Siamte b'day party aflop khak ka kisuanglah petmah hi. Neihval le
hilou.. neihsunsun a Siamte in deihlua ci a teddy bear hoihte ka leisak
bangle akong gei ua tui nin lak ah hon paihlut sak ua.. white jou nawnlou
a himai.. hiaiteng chauh hileh adan awmlai! Siamte in ka ban ah hon
kai a.. ban langkhat ah apan hon kai a, a kikaituah jiak a heh a apa'n
Siamte a biangbet bangjaw ka lungtang teipi adawt a bang hial hi. Ka nau
Lianpu aw ka jak in ka ngaihtuah na adan awmdeuh ahi dia, ahon sap bang
in ann ne din ka thou sam ta hi.
Kihahsiang jou ann ne panpan.. ngaituahna leng hon kipan ngal hi.
Sangpu, apa contractor, aneih joh dan uh jaw hausa chihouh gen didan ka
thei tuan kei.. tun leh jua ten jaw tanute a itluat man un adeihsakna
uh hausa leh neijou te tung ana tusek mah jaw hi. Theihsiam tum in ka
pang teitei a.. ahaksa ngei.. itna a chihchih uh hici dan ahi maw..cih ka
thei khe dundun hi... ngaihtuah na paipai in kou innsung leng hon tawn
kha sam hi.. neih leh lam ah bang mah hilou...Pathian in bangjiak a mi
akhente hausa sak a, akhente jawng sak ade aw.? theihsiam hakngei
maw? ka neihjoh louhjiak a ka itpen tangjoulou di maw?..itna mah jaw a
poimohpen hi a maw? Ka mittui hong luang mawk a, ka sungkuante ka etleh
ka nau Kikim in hon na en gige ana hi a..'Kim, bang ci a? ann ne aw..
malta thak kasa lua.. kana kham di aw? cih toh din thuah in ka kham hi.
Lamdang hon sa ngei jaw a hi dia paulou hial in hon en-en hi. Mì'n
hong hoh in ci cuh.. ci in kisìl jou kisa vitvei in Siamte te innlam ka
juan pah vengveng hi.
Ni leng sang sim ta, 'sawt ki-awm manlou di hiveh aw'...chi kawm in kinohtak in ka pai suk hi. 'Uthang, koi a hoh dek?' aw ka jakngei hi ìn ka thei.. ka etleh
Lunching (Siamte lawmnu) ana hi a, eh! Lun Siamte kiang va pha jual di
ka hi.. nangla?...chia ka leh dot leh, 'keile hong vak khe jual maimai ka
hi.. Uthang, Siamte tanchin jak khak neilou maw?..janlam deuh hita,
Sangpute'n a Thallouhpa (palai) sawl uh eive!..lamdang kasa
petmah.. huaitan hialdia Siamte ut adiam maw? anu thubawl mah adiam?..
gen di ka thei sau nawnkei.. Lunching ka dong nawn a, 'Lun, a lohching uh
hia? Lohching chih gentheih awm nailou kong kihoulim di uh cì uh hilou
maw? Siamte a utkei lua a thutanna la theì nailou uh hinteh Uthang...
Ka höh na di jekai sim di ka hihtoh, pawtnuam ci in ka kikhen khe thei
vanglak uhi.. ka lungsim a bei petmah.
Hucia ka pai kawmkawm leh Siamte agate ua ana ding bang mulou in ka
paipel suk kha jawjen hi.. 'Are..Uthang koi a hoh dek e?.'.Eh! nou inn
mah akei dia, ka mangngilh kha dek jawjen voi kong kin lua a! ka ci
khemkhem hi. Siamte in ka banah hon kai ìn insung ah ka lut ta uhi.. Gen
pat di le awmlou.. 'Siam, na pate koi a awm uh a?..na inkuan dangte
la?' ka pa office kai, ann nek khawmna neidek uncin, ka nu jaw bajar kai
hi. Dak 3 pm ma in hong tung kenteh'. 'Uthang sawt pi awm in aw? chi in
singpi piak hon thuah hi. 'Awle hijenjen e Siam, eikhawng hucia non
khouh tak in chu.. 'genkhin manlou in Siamte in, 'eikhawng cipah kei ve
Uthang, ka lunggìm hon behlap di na maw?.i thuciam te mangngilh ta maw
Uthang?.'..
Amittui hong luangkhe jungjung mawk cuh pasal hihjiak inle doujoh
ahaksa ngei..ka lungsim guk a gik petmah hi. 'Tawp aw Siam, ka genkhial a
hi. Houlim jaw ni, i hun neih sunsun manpha thei pen in jang jaw ni' ci
in amittui ka nulsak thiamthiam hi. 'Uthang, ka nuleh pate'n lah
athiltup uh khawlsan lou ua, hiai tan kana dal hang inlah, kei kia in ka
pangjou tuan kei.. nang hon lung gel inla, thutanna khat hon bawl mai
ve...thutanna a cih cuh kiguk mai ding a ut dan ana hi a.. lamdangsa
tak in ka awm heihoi jawjen hi.. ka pa hon awmlouh san nung ka inkuan
khawsa uh ahaksat dan, ken ka pa sepna na awng hu in skulpu a sem ing a,
tamlou ka lohkhiak leh ka nu mehman a khawsa liailiai in zi va
neihmawk di.. haksa ka sa law mawk hi.. zi nei leng, duat jou lou,
adeih angaih pejou lou a ka awm di ka lauhman a hipen mai! 'Siam, itlouh
na dan in ngai hetken,..maban saupi en jaw ni, Pathian lemgeel a hih
inchu ahun hong tung mai di..thuumna ah phawk jel leng maw i maban...
genkhin manlou in, 'Uthang hiai bang hun hoih mu din na kinem laì a
hia?..kalmasa a Sangpu ten palai bang hon kha uh eìve...nang kon itjiak
liauliau in ka nuleh pa thu ka nialtheih tan in kana nial teitei lai
a..hici mai di maw Uthang??.. Naupang teirol pan..kum 23 mi adin lung
gel ahaksa ngei maw?.. Dawng dia kisa a Siamte liang ka letsak patpat
leh agate uh hong ging a, Siamte nu hong tung ahi maimah!..ka gintak mah
ci siausiau lel in gen di bang a awm hetkei hi.
'Eh! nu..hong tungta maw?..bangbang hon pua e? 'Cì kawm in Siamte in
anu vante kongbul ah va dawn hi. Anu kipak tak a hong lut kei hon muh in
amel bang hong kikheng hial hi.. 'Siamte, nang ana bang ci awmsek
e?..lengla na kholh dan deihlou ka hi..na Usang hong hoh lou hia?.. avan
di kon puak hi a.. Siamte in 'hi' ci chauh a dawg in nuamlou takin hon
en ngiungeu mai hi...
'Siam kana pai phot di aw' cih toh din ka thuah hi.. 'Uthang nangcih
dandan'. ci in hon khou ngam tuankei hi. Kongbul tan petmah hon kha a
hihman in anu taina aw ging ka ja ban lailai hi. 'Huai Thangpu, meithai
tapa, kikholh pih nawnken kon cici hilou maw?..kiteng le uteh bang hon
pe di sa mahmah e nang?..huai te inkuan...'.ka bil ka hum a hat deuh in
ka pai liam san hi. Ngaihtuahna a paisau mahmah...numei tampi tak awm a,
kei numei khat,..mi deìhsak louh khat ngai a haksapi a jumleh jah tuak
a ka awm khawng ka ngaihtuahtuah ciang in, ka gentheih man jaw hi
vencin maw ci in sih mai bang ka ut tuntun hi.
Hucia ka paitouh jel lai in ka phone hong ging a, 'Thangpu kin a kin
in damdawi inn ah hong pai in, na Pulian ka hi'.. ci in akoih gaih a..a
No. ka et thakthak leh ka nu No. ana hijawmah...Oi! kanu'n tuahlouh ding
khat va tuak hivencin maw..?.ka lungphu akinpetmah hi. Diesel auto ka
kham a, damdawi innlam ka direct vengveng hi. Damdawi inn ka tunleh kanu
khawphawk lou in ana lum dildel maimah hi!..NU!.bang ci na maimah
a?..hon dawngve nu!.nu..nu ei..'Thang, tuni nanu mehjuak a atutna ah,
gari khat in phukha a, lungkam koh hong hoih na di ahi.'.. doctor
damdawi gelhte ka va lei dia, nanu ana awmpih in aw... nanaute le hilh
jawjen nailou ka hi'.. Chi in ka Pulian in hon pawtsan hi.
Athu awmdan ka theih thakthak leh contractorpa tapa Sangpu jukhampi a
gari hek in a hetkhak ana hi a.. ka hehtha toh, kahtha toh, vangsia
kisakna'n ka dim hi. Hucia gari ahetkha a, bangmah genlou a taisan ana
hi cih ka theih thakthak ciang in ka pawna petmah hi.. ka Pulian bank
ahoh pailam in tuak kha a, mi phatuam ngai bangjah hiam toh damdawi inn
ana tut uh cih ka theih ciang inlah ka kipahna asang petmah hi. 'Thang,
Thangpu...bangci? bang ngaihtuah e?...Chì a ka Pulian hon sap bang ka
jakei hial hi.. 'Oh! Pulian, hong tung maw? Ka kipaklua..tuni bangci
dan ale Pulian, Sangpu in aphut khak a bangmah genlou a taisan tel
amaw?..chi'n ka dong chiang hi. 'Thang, hehna in la hetken, amehjuak pihte gendan in Sangpu thilhih
tupmawnga ahih hidia muangmoh uh eive.. Police ten jaw hon delhphei na
ua, lampi na nehdeuh ua hi hon ci uh, ci uh hiven. "Huai policete
mawngmawng..athuak tu te moh hijel maw?..thilpai dan theihsiam hakngei
e.. ka chih thoh vengveng mai hi.
Hucia ka paupau sung un kanu'n khua hon phawk a kenle ka va naihphei
pah hi. 'Nu, ana lua hia? bang a ci.. 'Thang, naa khol kei.. na naute
awlmoh huai kasa vapai phod inla, na Pulian toh na Piniang a awmnak leh
amau hon awmpih thei tadih di uh hiven' lung himawh koh Thang. 'Awle nu, anat luat leh gen pahpah in aw nu, na damlouh di hon
phalhetlou ka hi aw nu.. nang beek in hon nuse hetken aw nu..ka pa
lah.....Ka genjom theituankei, ka Pulian bang ana nehnou jawjen hi...ka
nu'n ittak in hon en a, 'Thang hucilou e..na naute va awmpih leteh
jingciah hong pawt ta ning.. tunle ka pha dawmdeuh ta..va pai mai aw
Thang, ka lungnuamlou ahi'... 'awle nu..ana dam teitei aw..ci in ka va
kawi a ka pawtsan ta hi.
Inn ka tun in ka nau te anakim vek ta ua ana thawmhau mahmah uh jaw a
hingei dia.. U, koi a hoh uh e? nunu hong tungnailou eive.. ci in ana
dong souhsouh maimah uhi. Ka nau neupen Kikim bang ana kap hial hi...
kum 7 khawng mi ahi a ka nu awmlou a don haksa mahmah lai ahihman in
agen di dan ka buai mahmah mai hi.. 'Lian, nanau te samkhawm inla ann ne
phot peuhmah ni"..ci chauh gen a lut mai ka sawmleh Kikim hong pai in,
'Uu, nunu ngaklou di maw?..nunu ka ngailua koi a awm a?.. ",nau, nunu
damdawi in ah kikap sak ahi denlam ciah hong pai inteh ann ana ne ni
aw?.".ci in ka pomlut hi.
Pautamlou hial a ann ka nek lai un Kikim a hong paukhia ka jak in a
hon nehnou sak mahmah h.."Ulian, nunu papa toh hong pai di uh hia?..
papa hong tungtaleh cuh.. kenle barbie ka nei ta dia hileh kei ka
lawmte kiang a va tel thei ta di hing a...(Kikim aneuchik a ka pa'n hon
awmlouhsan a hihman in ahon khotheih patpat in kanu'n papa khualjin
ahi ci in ana khemlungdam mai jel hi). "Nau, papa hong tungnai lou di, amah hongpai theinai lou ahi".. Chi in ka dawng lel hi. "Uu ei papa awmlou hia? ka lawmten nang pa nei lou hon cih uh eive".
Adawng di dan ahaksa mahmah mai.. "nau, neijenjen e.. ei papa maw, hat a
hat, nekdi khawng hon pe gige, na vante khawngle papa'n sum hon pia
incin ileidi uh eivoi..Aman hon taisan ngeilou di eikha aw nau.."chi in
kou tagah meithai te adia Pathian awm gige ahihdan ka hilh leh", ka
lawmte'n neilou ci a honkhem uh eivele, papa hong tungtaleh jaw maw
uu!?".
Ka nau Lianpu bang ana nehnou mahmah hi. Keileng ka ki- ipip mai hi..
Kikim lah kipaktak in anui hiuhiau maimah hi. Keilah aguk in ka
kisiaksiak mai hi...Ann kane khin vek ua, theihlouh kal in dak 7 bang
ana gingta mawk a.. Kanau te toh ka kimawl nainai ua.. amau kipaktak
chiat a awm a hihman un kanu awmlouh lamleng aki lang kei himhim hi. Zan
ahong sawt a kanau te ihmusak in kei varandah a ka tukhia hi.
Khapi a vak pha mahmah mai hi.. ka Pulian ka phone a buaina bang mah
awmkei analung himawh kei un ahon ci a kenle mangpha khak in ka koihsan
mai hi.. Ka lung anuam deuh a ka ngaituahna bang apai nasa mahmah hi.
"kanu bang awmlou hileh kou unau ka bang ci khosak di ua?..cih a ka
ngaihtuah laitak in phone hong ging a... "Uthang lumta maw?..nanu kisukha
chih bang kana ja a.. Sangpu jukham hongpawt in agen numnum nilouh
a..ka huathuat toh..ka lungnuamlou lua eive Uthang.. "lum nailou,
ah!Siam lung himawh na di awmkei, hongdampah na inteh..Siam, non houpih
na nute'n hon tailouh di uh amaw?" ci in ka lehdot hi. "Pawt khejual ing a
kon call hi Uthang..tuni kanu hon gente ngaihdam kon ngen ut a kon
houpih hi.. Uthang bangmah in ngaiken aw..hehphtakin.. "Siam, hithamtham
e.. huaibang non cih takin kakipak law di.. ka tantawk ka tan ban ah
nakipah thu non gen lailai a".... "Uthang kei adia naalua eive hucia na
kiniam koih luat ciah.. ka nute'n hausakna kipahpih mahle uh ken nang
hon kipah pih jaw ding ka hi aw Uthang.. nang ana lungke kei peuhleteh
nang adia hing a nang adia sih ahihleh jong ka tel jaw thamtham di
Uthang..kon ngailua.."hon ci ngutngut bangjaw aw.. kuadang ka engtuan
kei.. ka kihouna uh sawt sim a hidia, anu'n asapjiak in mangpha kikhak
in ka hunsak phot uhi. Kanau te room ah lut in kava en velvel a,
apuansilh lemlou te uh va bawl in kipaktak leh lungnuamtakin tawldam
ding in laikhun dohtam tung a sambang ka jaalta hi.
Nitak lum panpan himahleng ka gimsim jiak ahi dia ka imu kha pah
hi. Mang lamdangtak kana man mawk hi!.ka mang in, kanu kawl kense lak ah
kesuk mai ding in a om a, va panpih dia kakisak lai in kanunglam ah Siamte in honsapna aw ka za hi. Ka nunghei a ka etleh moupuan kilawmtak
toh Siamte lungkim louh mel tak in ana ding hi!.Kinunghei san a kanu va
panpih mai dia kakisak lai in Siamte in hon phal hetkei mawk hi!..paulah
paukhe theilou, tangtheilou jawmah haksa kasa mahmah mai
hi. 'Thangboi, hon panpih ve bawi!'..ka nu'n hon chih cuh ka zak tawpna
ahimai hi. Ka nu kawl ah akesuk vengveng hi.
Pawna lua kana kah ekek leh kap khe kha ka hidia, ka nau Lianpu in hon
delh jawjen hi. Ka mang lamdang kasa petmah hi. Dak 5 ana gingta a, keile
thoukhia in naute ann di ka huansak hi. Ka mangsiat luat jiak in
ngaihtuahna aluahjou khopmai!..ann ka huan kang jawjen hi.. Phone hong
ging a, damdawi inn lamte chuh ahi ngei dia, 'Thangboi hia?..himah ing
ei..bang a?..damdawi innlam ah hongpai kin in.!'.chi in honkoih khum
hi.. Kanau te le hilh selou in ka va paipah hi. Halh lua chi a ka taihsat
kanu houpih theihlouh in ana om maimah hi.! Ka paneu kiang ah, 'pa, bang ci
dan a?..makna e!.'chi a ka dotleh, "Thang, janitak a nanu hong buaisia
a, CT scan ka hih uleh akhuak a sisan lut ahi ci uh ei, lungkham
huailua"..Zan a, kipaktak a kikha khia ung a, tua hici maimah.!..damsuah
nawnlou dia,..maban la???..ka ngaihtuah ngam kei.
Doctor in honsap dungzui in, a room ah kava lut hi. "tu aw, tu
aw, Thangboi maw?"."himah ing e pu aw,"ci chauh in ka dawng leuhlauh
hi. "nanu, condition kha critical mahmah, panlak didan om nawnlou phial
ahita, tu leh tu in gentheih atawm mahmah,!.."Amel etmai inle lungkia
ahita chih a chiang mai hi.. "pu, hehpihtakin kanu hinna ding a hihpeuhleh
abei zahzah poilou, ahinna hon humbit sak teitei mai ve mw pu...."hitham
e thang, theihtawp kon suah di uh aw?".Kipahthu ka genkhit in ka pawt
khia hi. Mel-et mai a dot ngamhuai honsa lou uh ahi dia, kuaman bangmah
hon dongsau tuankei uhi. Naute phone in, ann leh van poimoh tuamtuam
hontawi ding in ka hilh hi.
Lametna toh ni 3 bang ka etkol nung un leng houpih theih din ahalh
kei!. Ni 4 ni hita, alupna kiim ah ka unau un ka tutpih ngiungeu mai
uhi..Lamet phak hetlou in akhut hong tang a, "Thangboi..." hon chi
siausiau a,..Lamdang sakna toh, kipahna toh, ka dawngjok khakei jawjen
hi.."nu, bang a? na noplouhna om hia?..bang na ci?".Ka houpih pah zungzung
hi. "Thang, na naute hoìhtakin nana kem ding aw,. keizaw hon lunghimawh
kei un...na pa kiang ah kana tawldam ta ding aw..?"..Ka pautuh
a, "nu, nang kei hon muangta maw? nu..nu ei, bangjiak a hiaikhawng na gen
e?..hon paisan mahmah kei ve nu, kou bangsuak di ee... "pauzom theih na
ding kam a awng nawnkei!. ka paukhe thei nawnkei, ka mittui hong luang
zungzung ka nulseng kei, ka naute teng toh ka husa uh ngaihmahmah
hi..."Thang, nanaute khentuam hetken aw.. nang khut ah lungkimtak a a om
chiat uh ka......"Anak atawp a, khovel a hon it tu ding ka neih sunsun uh
ka nu'n hon nuse ta!..
Vangtah na liantak kana tuak ta uh. Vangtah sawnsawn in ka nu'n hon
omlouhsan jaw mah hi. Puakdan haksa tel maw..?.ka jalmang hileh khangthei
bang lou nuam veng maw?..It in ngai mah leng lei a bawl, lei akik ding
in ka nu ittak in hon mualkhup santa hi. Avuina pro. ka bawltei
ua!.neihlouhman in tanau ka hau hetkei uhi!. himahleh it tu leh ngainatu
kou toh teh in midangte hoihnate thupi kasa petmah hi. Lungkhamlua leh
thawmhau tak a ka omlai in TUANGLAM TUNG AH HEISA KAI MEL IN MU INGH!.ka
kipak petmah. Siamte mel kamuh in kipahna toh kingaihsiatna in ka dim
a, ka mittui aluangtawp thei kei.
Amah ngeileng pawna lua ahingei dia, anguai in anguai petmah hi.. Sihna
tungtang ah Sangpu te innkuan hong kilang hetkei ua, anuneu uh chuh hong
hoh a, nuam kasa veve hi. Sivui zou, Siamte kiang kava juanpah
hi. "Siam, nong hoh jenjen a kakipak lua, na hoihjel na u mw?".Ka chih
leh "uthang, nangtel lou a nuamsa din non gingta himhim ahia?..nangsang mah
in inu (kanu) omlouh ka pawna zaw thamtham di..omkhawm ta maileng hilou maw
uthang?".
Thukipah huai lua abang na a, ka lungsim lam ahikei.. ka naute naupang
chikchik, haksa lejong ken enkai in, kanu hon vaikhak bang in kep ka ut
hi.. tua thamlou in, Sìamte gen jaw amahlungsim lel ahi, anu leh apa'n ka
nu hon dampih lai a hon sit uh, tun bangjahta in hon sit di ua.. ngaihtuah
ngamhuai kei..Hiai khawng kangaihtuah saulua ahi dia, Siamte in ka liang
honsawi a honsap ka phawk guih hi. "Siam, na maban limci takmai na tuah
ding ka ngaihtuah in kakipak petmah, sanggah kei toh tul din jaw, na tuun
leh zua'n lungsit simthu lel ding hi, sanggah anglai non bel jong, genthei
din ka ngaihlai ka phal lou e., pi leh pu te mabang patsa itna guitung
jou lou ding i himaita maw Siam?..
Itlouh vang hilou sanggah..(genkhin manlou in)."ka tun leh zua'n
lungsit jong,nangtoh laitawi ton ding lung in sitlou e, ka tuun lungtup
hauta luun mang ahi jong lungkuai lou e, senlai lungdeih chi bang kon tel
zanglawi bang ka thanpihsa, na vangngai in tul din non phalna
hiam, uthang aw?".Hong ki diik dupdup mai hi. Ken jong itpen hici bang a
kamuh in, kideek zou vual ka hinawnkei.. mitampi lak himahleh ka kawi sut
tonton mai hi.! Kei ziak liauliau a midang pasal a neih di utlou ahihman
in, anu leh pa leh contractor te inkuan adin, mitsiip huai pi ka suak
hi. Kei ut thu hilehjaw adalsawm jaw hilou ing a maw??.
Khawsak haksat jiak a khokhang a pem maitheih louh ahihna ah ka naute
2 ka nuneu te'n a ompih ua, keitoh Kikim chauh inn ah ka om unleng
khawsak haksatjiak ka sawkpha thouthou hi. Ka nuleh ka pa kana sit simsim
na a, kana khial lawtel cihlouh ka dikna gen di ka thei kei, amau hon
dampih lai bang hile uh, kipahthu mittui luangjen a gending bei lou ding
in gingta ing..Ka sepna (ka pa sepna lui) ah lah semthei nawnlou, ajiak
bel, Principal ding midang hong pai a, kei sepna pen kha midang sum in
aleisak a keichu hehpihtu ka neihlouh jiakin ka sepna chaan ka hijel ta
hi.
Jugali a kuan jel, damtheihna hatlouh toh kuantöh kuanlöuh ka thuah
nilouh hi. Hici bang hun haksa ah panpihtu, ka haksat na share pih ding ka
poimoh petmah!.midang lah ngaithei lou a, Siamte mah chi tentun ka
hihman in ka kinepna van akhai abang hi..Siamte toh achang in kithujak
jel mahleung ahi thei tan in ka manghilh sawm hi..Nitak khat, kou kanau
toh lumjou ta, kong höng kisat ging bokbok a, kenle kava hon leh Sangpu te
lawmta ana hi ua.. pautam lou in ka mai hon su guih ua, ka lungam sim ahi
dia, ka dingjok thei kei.
Ka hehlaw sim a, hilehjong ka kideek teitei a, "lawmte, bang thu a?..bang
jong uh e?..athu in genkhawm leng hilou mw?".Ka kampau ngaihsak a awm
hetkei ua, innsung teng apheklek ua, atawptawp in omkei e chi in pawt din
akisa uhi. "Thangpu, na dinmun ki-en inla, Siamte ana buaipihpih nawn keile
teh nang adin ahoih zaw di"!.Ci in Sangpu apawt khia a, alawmte'n
singkhuah toh bang toh kijui pawt uhi..Ka thawm ging uh ngaihsim a hi
dia, vengsung mite'n hon delh kheukhou ua, khenkhat keisang a ana pawna
jaw a awm ua, khenkhat taget lah hon iplah lua ana awm ua, himahleh kei
haksatna leh gentheihna ka tuah atheisìam kei hial uhi. Dik mahleng
genthei daikilkal a mi tuh akam humsak ahi gige.
Thu omdan theilou ka hih man in ka lung anuam hetkei mahmah ve!.ihmu
theinawn lou phial ka hi dia, jingkal ka khangma jawjen hi.Thu awmdan ka
theih thakthak chiang in Siamte toh Sangpu gawm dia inndongta te akisak
lai ua Siamte ana taikhia hong jong ana hi leltak uhi...lung himawh huai
kasa thak petmah hi..Zingkal nna teng sem mengmeng in siamte zong bawl a, a
thunung theih ka ut jiak in alawmnu kiang phak ding ka thupuk ta hi.
Zingkal ann nezou, kisilsiang jou ka kisak lai in ka phone hong ging
a,..Number thak ahihtoh pikup lou in ka silent sak nilouh hi. Hong ging
nilouh a hihman in thupoi mohlua hikhaleh chi a ka pikup
leh, "Thang, Siamte omna na theih khak leh hon imm hetken aw..ni 2 bang
mulou ka hihtaak utoh, ka lungkham petmah ua, panpih thei dia nong om
inchu kakipak law di". Siamte nu ana himai mah a!.Kenleng theihtawp suah
ding ka hihdan leh ka awlmoh pih dan ka gen nung in ka kihou tawp ta
uhi. Lungkham tawpkhawk in jaw i simmoh pen te le kimuang mai ahi cih ka
thei khe guih a, ka ngaihtuah kik chiang in ka kipak gusim mahmah hi. Kei
adia Siamte muhna lampi khat kihong ahi peuhmah hi.
Lungsim thoveng tak leh awlmohna kithuah in kalungsim a nuamthei taktak
kei.. Kisa fel khinta, ka gate uh paipel panpan chih ding khawng in Siamte
lawmnu Lunching in letter khat hon pia a,"uthang Siamte in janhal a hon
piaksak in chi a, ka buailua a tua hon pethei pan ka hi".."aw, kipah huai e Lun,"ci in bang dang gensau lou in ka kikhen pah mai uhi. Inn va lut kik
zawjen in Kilawptak in leh lametna lianpi toh letter ka hong a...
Damsung
adia ka itpen uthang.. Awle uthang amasa in itna lianpen toh chibaì
aw.. Uthang, ka dinmun na theihsa, ikal thu na theihsa, i gentheihnate
thuakzou vual ka hihnawnlouh man in thutanna kana la mai hi. Hon mohsa
ken aw uthang??Uthang, vaimang siamsil thelnah toh nasiang simthu ka leel
na sim hun in na itpen keima'n laukha toh thangvan ah haibang hon ngak
ta ding ka hi chih lung in ana haihken maw uthang!.
Uthang, leitung deihkim louhna khawvel ah nangtoh nunnuam heidia ka
lungtup ka mualsuah louh jong thangvan ah, gibang khenna omlou
dia, nangtoh nunnuam alengkhawm ding ka heina thangvan dawngkot pan hon
gal dotdot veng uthang aw.. na selung juangsak lou aw, ngaih omlai vei kha
bang pham din ka phallou e.. simlei guabang na hìnsung in na vangngai a
khapham dong a lungtup singbang gilsak keimah hon ngilh ngeiken aw
uthang,. na vangngai man gentheihna ka thuak sawlbang baan dingkal
haibang ngak in na heina gamtatna pan kasiang nong jot dingkal ngak in
ka laukha in nasiang hong lengleng mai ning maw uthang.. lungkelou inaute
hon enkol inla kei jiak a gentheihna na thuak teng manghlh ta in aw.
Uthang ka kam in gengen kei mahleng nang adia hinna phalngam a ka itna
kon latkhiak in theihsiam na hon pe leh ka chi lua..Gen nop tam mahleh
ka kiang non pai chia'n gen mai ni maw?..ka nute'n ka luang ajong ngei
ding ua, uthang, ana hilh mai in aw, iki muhmasak na penpen mun, mawngpi bul
ah ka luang ana la mai uheh aw.. Uthang, ka luangtung ah mittui ana nul
ken aw?..kipaktak a na hinkhua na jat ka utpen ahi
gige.. mangpha.. uthang, kon ngailua..uthang. Lai at@-nang adia sihtan dong a
pang, na nanau@ Siamte.. Ka pawna petmah..ka lungam toh ka taksa a chau
guih in ka thei a, himahleh ka itpen last wishes chu picinsak ka utjiak
in Siamte nute kiang kava pha hi. Amau leng beidong gawp petmah ahi di
ua, mi ana tampetmah uhi, Siamte nu'n hon muh in maitai tak in hon houpih
saisai mahleh alungsim bel kisiamtan louhna leh lungkham na nei ahi cih
amel et in akilang mai hi.
Vaikhak a ka om pen hilh ding in ka samkhe tuam a, haksapi a kisa
thakthak zawjen in ka genkhe thei khong hi. Ka genkhit in letter ka pia
hi. Siamte nu hong kap zoihzoih a, kahtam lou in ka tung a atatsiat dan
akisik dan genkawm in a kap dadalh hi.. Agen mahbang in vengsak lam a
mawngpi bul ah ana lum ningniang in ana daang kiuhkeuh hi..Puakdan haksa
petmah mai.. ka khovel, ka hatna leh ka neihsunsun ka itpen Siamte in hon
sihsan jaw ka kap huphup a ka hihtheih sunsun ahi.. ka itpen in thangvan hon
kaisan jong itna tullou in ka itna in amah ajui lailai hi. Ka damlouh loh
jawjen a, anu leh pate' lem gelsiam jiak in Siamte lim toh thilpiak khat
hon pe tei ua, ka kipak veve.. Huci'n puakdan siam kizil in kipaktak in
maban ah Siamte muhding galdot jel in ka hinkhua kong zangtou ta hi!
----------------BEITA-------------
© Siamsinna leh Vakiangbu
Comments
Post a Comment