VALENTINE'S DAY SPECIAL
By Sang Valte
Pawl kua kasim kum ahi a, kitangval sak thei panpan kum
sawm-leh-kua khong hi'in ka kithei, ka lawmte tawh kihon thuah in niteng
hun ka zang den uhi. Skul lut pan kahih jiak un midang hong kai thak
bang jah hiam a om uhi. Lai siam khol kei mah leng mi awm moh mahmah
ka hihziak in ka skul uah hon theilou a va'ng khop mai. Huchia mi bangjah
hiam honglut thakte lak ah numei pian nalh tak mai duang etlawmtak ka
muh in kalungsim teng ala khin vek ta hi. Ka lungsim ah bangmah a om nawn
ta kei, ka houpih ut alah ka houpih ngam tuan kei hi. Awle ka phone hoih
khol kei mah leh message hong lut thei sam hiven valentine's day naih
ahihman in ka lawmte apan "HAPPY VALENTINES DAY" chih message ahong lut
zungzung mai hi. Himahleh huai skul a ka hoihsaknu wish na khat bek omlou
ahihman in ka lung a kim theikei hi.
Hun hong pai zel in kalawmte valentine's thilpiak (anungakte
uh piak di) toh abuai vengvung kal un, kei leng huai ka hoihsak nu
banghiam piak ut in buai in ka buai hi. Kithei ngei leng hilou bang va
pe mawk ding ka hiam midang tawh kingai ana hileh bang chi ding????? chih
khong kei le kei kaki dong tuahtuah hi. Hun lem zongzong mah leng amah
alawmte toh omkhawm den ahihman in ka ngam kei jel hi. Nikhat tuh
sih-le-sih dam-le-dam chi'n ka break un akiang ah kava pai a, amah
alawmte toh bangbang hiam gen a, ana nuih zaizai lai un, "hong pai
dih" kava chih mawk leh adai dup zozen uhi. Keileng zumsim mah leng ki
pasal sak in kasam teitei a amah utkei sim mahleh atawp in ahong ding
khia a skul ning lam ah kapai pih a, kapai kawm un "na phone number hon
pia ou "ka chih mawk leh lamdang sak mel tak in ahon en a lam pai lai
bang a khawl hial hi. "Na bang di la????" ahon chi ngal a ken leng "ka
deih" ka chih leh "khemkhem "ahon chih khum nawn hi. Kin
ou chi kawm in a mit hoih deuh in ka en a, aman leng aloh ngaihna hon
theilou ahi ding a, a tawp in lai them khat ah a number a gelh khia
a, ahon piak khit in atai khia hi. Ka kipak petmah a, skul kai tawp di kal
bang na ngaklah mahmah hi. Skul kai tawp inntung phet ka Nu kiang ah sum
ka ngen a, ka phone a sum thun din ka kuan khe ngal hi. Sum thun khin
phone dia kaki sak leh ka ngam kei deuh a, nitak chiah ka phone mai di
chi'n ka phone ka sakhau ah ka guang lut hi. Nitak an nekhin ka verandah
uah tu kawm a ka phone sawm leh ka ngam nai tuan kei hi. Ka omdan bang a
nuam theikei hi. Ka zun bang asuak zihzeh mai hi. Ka pawt khia a ka omna
apan gamla lou ah park lian huntawk a om a huai ah ka va lut tei hi. A
sung ah nungak leh tangval a kopkop in ana om uhi. Kei leng pau tamlou in
amial simna kuamah omlouhna khat ah kava tu tei hi. Awl in ka phone ka
lakhia a laithem a no. hong kipia chu phone di'n kaki sa ta hi.
Ka call leh ala kei zomah a, thumvei ka call na in ala a, gen
di bang ka thei kei jojen hi. Amin khong ka dong a, aman leng amin MERCY
ahih dan leh a kum jah, a inkuan sung thu khong uh ahon hilh vek hi. Ka
gintak sa'ng in ana pau nuam vanglak a, ka balance bang a beikhak di
kalau gu sim mahmah hi. Sawt simtak ka kihou khit nung un park ah om
kahih dan ka gen a inn ka tun chiah phone thak di'n ka gen a, aman "kei
ihmu ta di" ahon chih khum zomah hi. Ahihleh zingchiah iki hou thak mai
di aw chi'n mangpha kakhak a ka koih ta hi. Ka koih khit in ka kipak
petmah a, a number bang ka en thakthak mai hi. Paunuam tak leh kamsiamtak
thuah ahihman in ka lungsim ah amah kia a omden hi. Inn ka tun in ka ihmu
pah theikei a, zingchiang ka muh di kal khong ka ngaklah mahmah mai
hi. A kingai bang in ka kingaihtuah a kalung akim petmah mai
hi..Valentine's ni di lah nai deuhdeuh kei lah nungak deih a buai, ka
lawmte kiang ah lah gen ngam lou in ka om hi. Ni bang jah hiam nung in
Mercy toh kahong kimaingal deuh ta ua, nidang sa'ng in ka kihou tam zaw
ta uhi. Huchia ka om ziak un ka lawmte'n akingai dan in ahon koih
ua, class room sung khong ah chi chiamnuih vak sek uhi. Skul kai tawp a
zing chiang "valentine's day" di hita ahihman in bazar ah rose pak san
alom a kigak lom khat kava lei a, inn ah ka paipih ta hi. Hoih
deuh a zem in, analh thei bang pen in ka bawl hi. Nitak annekhin phet
Mercy ka phone a park ah hoh di'n ka zawn a, aman leng an ka nek khit
chiah hong tawn in achih man in, ken leng ka pulsar 220 uh kapate'n ka
khoih khak di le aphal ngeilouh uh, a chabi ka lakhia a hoih deuh in
kasil siang hi. Kapa'n a pawt ma in na sil khit chit chiah gari koihna ah
koih in aw hon chi zomah hi. Kapa pawt kin phet chu kei leng pawt di'n
kaki sa ngal a, Mercy ka phone leh a innkong uah ana ngak ahih dan ahon
hilh a kei leng kinoh deuh in ka kikhoh phei ngal hi. A inn uh ka tun tak
in a 'Nu toh inn verandah ah ana tukhawm uh a, anu kiang ah alawm kahih
dan khong a gen a, huai khit in park lam zuan in ka tai khiat pih ta hi..
Sawtlou ka tai nung un dawr khat ah theitui bottle khat ka
lei a huai toh park ah ka lut ta uhi. Mi hon muh di ut khollou kahihman
in a mial nalam deuh mah ka naih pih hi. Tutna dia kibawl teng ana dim
ahih man in loupa mul tung ah ka dial ka phah a huai tung ah Mercy ka
tusak ta hi. A pau masa di omsam lou in ka phone a message om te khong
kaban et leh Mercy in leng a phone ahon lakhia a, a phone ka muh phet in
kei a ka deih tha a suak bawn kei hi. Phone hoih tak ana nei a, ka zum tha
asuak a ka hou pih ngam kei deuhdeuh hi. Ka theitui tawi ka dawn a, amah
leng ka piak leh "kipah huai na e"ahon chi a ken leng "hiai khong maimai
kipahna ta'k kei"ka chih behlap a, huai apan kong kihou pan ta
uhi. Sawtlou kihou pan kaki chih leh dak kua bang ana ging khin ahi
dia, park security te aging pai ua "sir khak hun hita ahi ana pai phot mai
un" ahong chi ua, kou leng kapai khe ngal uhi. Gen ut pen leng gen manlou
in kapaipih a Mercy a inn uah ka khak khit in ka inn uah kapai ua kalum
pah veng veng hi. Ka ihmu pah thei kei a, kalungsim in alim bek kingen
kha leh ka chisim alah hun om na inte chi'n kaki hehnem jel hi. Mercy ka
phone leh ana ihmu naikei vanglak a, sawtlou kaki hou ua "ka ihmut suak"
achih jiak in ka koih pih ta hi. A ni nawn akipan chu message ka khak
a, kam a kagen utlouh teng ka gen ta ahi. Himahleh ka lamet abang het kei
a, ka gen khak ka kisi'k petmah a aloh didan tuan lah ka thei kei. Kam in
lam ka houpih ngam nawn kei a, aman leng lamdang sa sim a diam a, message
bang ahon khak jel sam hi. Dawn na lungtun huai mulou kahih man in a
message te vang thuk (reply) le ka sawm kei a, phone ka khoih tha bang
leng dah petmah in ka om hi. Ka message a ka gen jel a, na kuhkal ngei ka
gen khin hilou mw ahon chih san jel hi. Ka paw na petmah a, ka an duh tha
bang leng suak zoulou in ka om hi. Ka pawt di leng ka utna teng a bei ta
a, kei chauh la room uah ka om den a ka kingaihtuah nilouh hi. Huchia ka
omlai in ka laibu lui koihna uh kava etleh ITNA TANGTHU khat akawm le om
nawnlou ka va mai khia a, ka hon sim ta hi. Ka sim suksuk leh kei
bangbang a ana om ngei khat thu kasim lha zomah a, kei toh kaki bulh
khawm a ka hehtha bang asuak mahmah mai hi. Heh kawm a kasim zel leh aban
lam ah huai tang thu apa'n leng atawp a heh tha suak gawp a top san
vengveng ahi, chih ka sim kha a, huai dan a tawpsan mai di ka ngaihtuah
chiang in ka ngaihna a lian hiaihiai jel hi. Ka ning kitel gawp om didan
le theilou in ka om a, atawp in zu dawn sawm in pawt khiak kasaem ta
hi. Ka vang pha hia sia hia chih ka theikei ka U'n gari ana zang khia a, kei leng ka room ah ka lut kik a kalum ta hi.
Ihmu thei lou ka hih man ka Nu kiang ah damdoi ka ngen a aman
leng "bang damdoi e?? bang di?? bang na'??? ahon chi nilouh a ahon pe zok
kei zomah hi. Ken leng gen di tuan theilou in 'Lu'na damdoi" ka chih leh
damdoi ahon nesak a, kei leng kalum pah a, ka ihmut lam leng ka theikei. A
zing kal in leng ka khang ma zomah hi. Valentine' day ahih toh kei leng
ka Pa kiang ah sa man di ka ngen a, sa lei din ka kuan ngal hi. Lampi ah
bike a katai lai in Mercy leng meh lei Hong kik lam toh kaki tuak
ua, houpih di chisim mah leng ngam lou deuh kahi ding a, ka tai pel hi.Sa
leina mun ah ka lei di zah a zuakte kiang a ka gen khit in Mercy ka
message ngal a "HAPPY VALENTINES DAY," hiai teng gelh in ka khak veuh
vauh hi. Aman leng ahon wish tei a, tuni amah tawh pawt khom di'n ahon gen
hi. Ken leng ka aw ngal a, ka sa lei kin akin a la in inn zuan in ka
paipah vengveng hi. Ka Nu meh huan kal in Mercy tawh kaki message den
ua, ka kimuh na mun di khong uh ka gen khit un ka phone ka charging a
hoih kei sim mah leh a battery be'k a full a koih ka sawm teitei hi. Anne
khin phet chu ka pak lei hoih deuh in ka tuam a lai them khat toh ka
tu'n khawm ta hi. Ka phone charging bang kava en zihzeh a, full hak kasa
mahmah mai hi. Ka puanak hoih khollou sim khat ka nawt tang zit zet
a, kisil dia ka kisak leh ka phone a ging a ka etleh Mercy ana hi a, ka la
nuam pah kei zomah hi. A tawp a ka lak leh Mercy' in a pu'te khat si
ahih dan leh huai lam a, avek ua hoh ngai ahih ziak a kei toh ki mu
theilou di ahih dan ahon hilh hi.
Hiai thu ka zak phet in ka heh petmah a, kisil lou in ka room
ah ka lut a, ka pak hoih deuh a ka tu'n ka lakhia a
sakolbakteh (scissor) in a neu thei bang pen in ka tep zak a ka ninbawm ah
ka koih hi. Huchi'n ja inn nunglam uah ka paipih a khawnvak tui ka buak a
ka hal tum dimden ta hi. Heiha!!!!!!!! Itna kichi hichi dan ahi maw chih
khong ka ngaihtuah hi. Mi kingai a omte lah nuam asa mahmah ua, kei bang
ziak a genthei tuam kahi hiam????, ka ngaihtuah atam khop mai. Ka bike
chabi ka la a, zu zuakna lam ka zuan vengveng mai hi. Chik mah a zu dawn
ngeilou huai ni chu ka zu dawn pat ni ahi mai. Awl in ka lawm te a
nungakte u tawh nuam tak a om dan di khong uh ka ngaihtuah a ka ning aki
tel ngei mai, amau valentine's day zatdan tawh kei zat dan akibang kei
khop mai. Ka nute'n nau pang koih a hon koih uh huai ni chu zu zuakna inn
ah puak khiat ka ngai hi. Dak bang zah a inn tung kahiam chih le ka
theikei, nitak an leng ka ne kei hi. Huchi'n zan dak sawm-le-nih bang pel
ta ka halh deuh ta a, kagil kial sim ahihman in an khing vot nguingui
zezen chu kahon ne a, ahaksa tel mai. An tam lou kanek khit in ka lum nawn
a, ka ihmu pah vanglak hi. Zingkal ka thou khia chu ka pate'n bang teng
ana thei ua ahon awi het kei uhi. Nitak a ka kham luat ziak aka phone
ngaih sak nawnlou kahih ziak in ka nu'n ana kem kha a huai apan thu teng
ana thei vek uhi. Keileng pau tamlou in an ja ne a, skul kai din ka kuan
khia hi. Ahi tak in valentine's day suty ka nei kei a, himahleh ka nungak
ngaih ziak a suty ka lak ahi hi. Ka lunsim ah bangmah a om thei kei
a, skul kai tawp di kal bang ka ngaklah mahmah mai hi.
Huchi'n lin kawm pipi in skul kong kai tou zel a, a Mercy lah
muh khak a om nailou ka phone chiang inlah ala ngei kei zomah hi. Nitak
khat kholak pawt pai inn ka tun in Mercy ka I phone leh aki pik up
a, kenleng "bang chi e na phone nala ngeikei a, kisa thei na chia "heh sim
a ka chih leh a Nu ana hi zomah a pau tam ngam nawnlou in ka koih san
hi. Hunte hong pai zel in kumkim bang ahong bei a, Mercy bel ka mang ngilh
theikei hi. Ken leng houpih tam lou kahih man in aman leng ahon houpih
masa ngam sam kei hi. Ama kiang a itna thu va gen ding himhim ka
ngaihtuahna ah a om nawn kei mawk hi. Ka lungsim ah bel omden ahi ding
a, khat veivei ka message kha jel a, aman leng ahon thuk zel sam hi. Huchia
ka om nim-nem sung in hunte ana pai zel ahi ding a kumtawp exam na ding
bang ahon naih ta hi. Huchih lai in INDIAN ARMY kilak na ding ka exam uh
tawh kituak in a om a ka lung a buai mahmah mai hi. Kei leng sepaih din
chin(fit)kisa thou kahih man in va kuan leng ching ding in ka ki koih
mawkmawk hi. Ka pa'te kiang a angaihdan uh ka gen chiang inlah "nang thu
ahi" hon chihsan zel ua ka tel di pen ka theilei hi. Keileng kal (week)
khat khong zingkal chiang a exercise la in nitak chiang a lai dim in ka
om zel hi. Huchia ni khat kong kingaihtuah tuah thumna khong ka nei zel
a, atawp in sepaih kilaak na ah kuan din thupukna kahon bawl ta hi. Laisim
lam ka khol a, exercise hah tak in kahon la a, ka tha hoihna di leh ka
hatna di ka Nu'n ahon leisak a, huai te tawh hoih tak in kaki sa khol ta
hi.
Ka kuan ni di ahong tung petmah ta a, ka Nu'n thumna hon
neihsak khit in Bus stand ah ahong kha a kapai khiat tan ahon ngak hi. Mi
kiang a om didan,thil nek di leh neklouh di chih khong hoihtak in ahon
hilh hi. Bus stand ah ka lawm di mi nga toh kaki sutuah kha ua ka lung
amuang tuan mahmah hi. Kaki pan khe ta ua, lampi ah Mercy ngaihtuah
cheuhcheuh zel, akhen chia ka tung chiang ua ka om didan khong uh
ngaihtuah in ka om hi. Huchi'n ka theihlouh kal in ka ihmu kha a, ka kum
hun di uh leng ka theikei hi. Ka lawmte'n ahon phawng ua, huchi'n gari
apan kakum khe ta uhi. Kei bel ka lung ana buai manzel hi mi theihneilou
kahihman in, koi a tung di???? koi a an ne di???? koi a giak di?????chih
khong ka ngaihtuah hi. Huchi'n ka lawmte pautam hetlou in ka zui a amau
hon paipih na lamlam ah ka zui ta hi. Sawtlou nung in inn khat lian vak
lou ah ahon lut pih ta uhi. Ka lawmte lak ua khat in "hiai zon pansan
di'uh ahi "ahon chi a, a Pu'te inn ahih dan ahon gen behlap hi. Ka kihah
khiak khit in lawmte khat toh meh di lei di'n kaki zui khe ta uhi. Ka
pawt pih la bel nidang aleng hiaimun a sepaih kila a ana kuan ngei ahih
man in a khosung leng a thei mahmah hi. Huchia ka pai lai un "lawm iki
lak na mun di'uh koi san ahi di"ka chih leh aman"meh i lei phot dia kik
lam in i tawn tou di" ahon chi hi. Antehlouhing tamlou toh sa ser khat
lei in ka pai ta uhi. Ka sepaih kilak na mun di'uh ka tung ta ua,a ground
ka et leh lian kasa sim mahmah a ka huphulh sim hi. Ka lawmpa kiang ah
nuam hun mahmah in te chi'n ka paipih ta hi. Inn ka tung uleh lawmte
leng ana kihah khin ua, an huan di'n ana kisa uhi.Inn tekte lah nungak
chih dan leng omlou atate teng uh mun dang a laisim a om khe gai ahihman
un nek bawl din ka pawt pih pa toh kakisa uhi.
Inntek nu'n a bawl pih theihtheih ahon bawl pih a ahon dawn
zangkhai tuan mahmah hi. An ka huan khin un T.V ka en ua sawtlou nung in
inntekpa office kai ahong tung a, ka lawmte uh a inntek deuhpa'n ka min
khong uh leh bang bang hiam inntek pa kiang ah agen khit in inntekpa'n
kisil din ahon paikhiak san hi. Sawtlou nung in ahong lut a an kahon neta
uhi. An ne khin dawr ah zarda lei din ka pawt a, ka lawm te ka puak a kihoulim kawm in ka hai souhsouh ta uhi. Zingkal thoh baih ut ngen kahih
man un sawt tu peih leng ka omkei uhi. Kong ihmu ta a, ka mang lam
in, "sepaih kila theilou in ka kik a ka innkuante'n ahon tai vak uhi. Kei
leng pautamlou in an ja na ne a Mercy te inlam zuan a ka pai leh ka
lawm (skul a) te'n hon na kha'm ua hon na vuak sawm uhi. Keileng ka heh law
petmah a ka kisualpih ta hi. Sawt simtak kana kisual pih a a tawp in
apang zou nawn kei ua, atai khia uhi. Kei leng ka lu mun khat akek a, a si
tamsim ahih man in numei khat in ahongtuak kha a, damdoi inn ahon paipih
a, ka tunma um lampi ana bei mawk a keileng 'si di kahita maw 'pai theih
nawn louh chih khong ka ngaihtuah hi "hucin ka khang guih a ka gei khong
bang ka en a damdoi inn a om di bang in ka kingaihtuah man hi. Ka mang
ahihlam ka theisuah a kei chauh kuamah theihlouh in ka nui vevu hi. Kaki
hah khia a huai kit in ka lawmte ka ban phawng a, kei bel exercise la dia
mansa in ka om hi. Ahong man siang tak un ka kilak na mun di'uh ka zuan
ta uhi. Mi ana tamsim ua,kouleng ground nawl ah fit ana teh ngal ua huai
khit in ka lut suak ngal uhi. Groung sung ka lut khit un a group in bang
ahon khen khia ua kei leng ka kuanpih te tawh kaki khen khata hi. Group
khat ah mi sawm nih in ahon khen uhi. Mi ka tamsim mahmah ua, nisa bang
kana thuak lah sim man hi. Kong tai ta ua ahat theihtawp in ka tai a
himahleh ka phak zoh hetlouh mi thum a om uhi. Kei leng anung uah ka tai
a, atawplam in amau leng gimsim ahi di ua, awlawl in ka delh kheng a, a zou
masa pen in ka pang hi. Tai chu ching phot ka lung khat anuam pah ngal
hi. Mi tam aim kahihman un tuni pen tai chauh ahon bawl sak uhi.
Ka lawmte leng mi nih tai ka ching ua, keitoh akuan khom teng
mi thum ka ching uhi. Ka tai na uh gimsim kahi ding ua an nekhin phet
lupna ka zuan ngal uhi. A ni nawn in medical leh a dangdang ahon hih sak
uhi. Ni nga khong in bang teng ka zou siang ua, ka lawmte mi nih in bel
ahon paisan uhi. Kou mi thum te bel ka ching suak uhi. Inlam kapai uh
a, call letter a chih te uh ngak in lungsim nuamtak in ka om uhi. Inn ka
tung uh chu ma sungte'n ching maw????? Chinglou??????? thei nuam in inn
ka tung phet ahon dong ngal uhi. Kei leng bangmah gen kei mah leng nui
sim vevu a inn lut kahih man in ahon thei ngal uhi. Ahon kipahpih
mahmah ua, kipahthu genna thumna bang ahon neihsak uhi. Ka kisil a Dec kha
ahihman in vot kasa sim mahmah hi. An nekhin Mercy te inn ah pawt ut sim
mah leng ka zum tha a suak a, dawr ah zarda khong hai in ka tu maimai
hi. Inn lam pai a Mercy ka message leh ana ihmu kei vanglak a sawtsimtak
ka kimessage uhi. Aman leng ka thu ana thei ahi ding a, ahon kipah pih
mahmah hi. Christmas bang hon naih hiaihiai ahih man in kenleng Mercy ka
houpih zel a, himahleh lawm bang a om kahih man un bangmah ka gen ngam
kei hi. Amah toh Christmas leh New Year zang khawm di chin ka gen a aman
leng ahon lemsak pih a, ka kipak mahmah hi. Huchi'n ka kizui den ua
leenkhop na khong ah amah toh kakithuah den uhi. Kumthak te kahon zang
zou ua niteng in sep theihtheih sem in ka om a, achang in ka va kiloh
thepthup zel hi. Hun te pai zel in January kha top nitaklam khat lawmte
toh football kimawl khin inn ka pai leh call letter achih uh ana om a ka
sim leh Feb. ni sawm nih a kaki report ngai di ahih dan ana ki gelh hi
keileng kipak sim mah leng huai ma a Mercy kiang a ka itna thu gen ka ut
hi. Huai din valentines day ma ngei a gen ka sawm a hun lem ka zongzong
mai hi.
Huchi'n Valentines day mah in ka gen sawm nawn hi. A omdan
apan a lungsim kei a dia kihong ahih dan ka thei hi. Nidang toh teh in a
omdan aki khek mahmah a nitak teng bang in a ihmut dek chiang in mangpha
ahon khak khial ngeikei hi. Valentine's day ahongtung petmah ta a, ken
leng ka kimuh na di'uh nidang a ka tutkhawm na uh Park ahihdan ka hilh
hi. Huchi'n ka gari uh ka lakhia a, an nekhin phet kinoh deuh in Park lam
ka zuan ngal hi. Tung baih kahi di'a, Mercy ana tung naikei hi. Ka phone
leh bang hiam khat kei a di lei ahih dan ahon hilh hi. Kenleng
amah (Mercy) a di' lei khalou kahih lam ka thei hi. Ken leng a lei din ka
pai thak a, bang pen lei di hiam chih ka thei kei. Bang teng hileh paak ka
lei a hoih deuh in packing ka bawlsak a huai khit in ka phone a hong
ging a ka et leh Mercy ana hi a, kalak leh "Gate ah ka om hong pii in" Ken
leng "aw kong pai" ka chi a, hat deuh in ka ki khoh a sawtlou nung in
Park mun chu ka tung ta hi. A gate ah ding in asunglam en keilah a etlouh
na lam daih ah suak aheh suak sim mah leh ama a dia ka lei PAAK chu ka
pe ngal hi. Ka gari parking ah ka va koih a, mun khat ah kahong tu khawm
ta uhi. Ka hun paisa thu te khong uh ahon gen a kenleng kam ka heu hou
zozen hi. Sawt simta apau khit in nang hong pau phot in ahon chi a ken
leng ka gen ut pen kahon pan ngal hi."Mercy ka hon muh tung apan
in..."ka chih pat leh "huaite gen ngailou adang gen ou" ahon chi a
himahleh kei chitak lua kahihman in ahon kha'm taktak ngam kei
hi. Huchi'n amit te hoihtak in ka en a, akhut lenkawm in ka gen ta hi. Aman
leng hoihtak in a ngaikhia a, atawp in ka ngetna chu ahon sa'ng ta hi.
Abag apan thilpiak kei a di ahon lakhia a, ahon peta
hi. Kenleng ka phel khia a, ka et leh SANA hoihmahmah khat ana om
hi. Mercy'n " hiai ahi kahon thil piak theih adang piak zoh kahon
neihlouh ziak in hon ngaisiam in" a chi behlap zomah
hi. Kenleng "kisuanglah het ken hiai "sana" na hon piak louh in leng kei a
ding a thupi pen na itna nahon piak ziak in hiai sa'ng a thupi zaw leh
hoih zaw nang apan bangmah ka lam en kei ka chi hi. Ka nih un kipak tak
in ka om tuak ua, ni bang tum thei keileh ka chi uh. Kikhelah mah le ung
hun in hon ngaklou ahih man in dak 5.30pm bang gingta ahih man in Park
ka pawt khiat san ua, ka gari kava lakkhia a, restaurant ah an nedin ka
tai khiat pih ta hi.
Ann ka nek zoh un a inn tan uh kava kha a, kei leng innlam
zuan in kong tai vengveng ta hi. Inn ka tung ka lum ngal a, ka kingaihtuah tuah mai hi. Valentines day hichi bang a manphatak a ka zat
patna ahih ziak in ka room ua calendar ah ka chiamteh zozen hi. Mercy toh
sawtlou ka ki-message khit in Mangpha ka khak a ka ihmu ta hi. Hun ka
neih teng un Park ah ka hoh zel ua ka nih un kuamah hin lam le phok lou
khop in ka om uhi. Ka kimuh teng un ka ki-itna thu ngen uh ka gen uhi. Hun
in hon ngak lou ahihman in keileng ka kuan hun ahong tungta hi. Ka lin
mahmah a kuanlouh mai bang ka ut hi. Mercy in Bus stand tan ahong kha
a, khelahtak mai in ka paisan ta hi. Ka training na di mun uh ka tung in
ka lung bang a ke vungvung hi. Innlam ka ngaih luat ziak a diam haksa
kasa mahmah hi. Himah leh kipasal sak in kapang teitei hi. Kum khat val
ka training khit un ka zou ta ua party ahon neih pih uhi. A ninawn in
thil bang fel ta ahihdan ahon hilh ua, ni sawm-li suty ahon pia ua ken
leng ka sungte leh Mercy kiang ah inlam hong pai di kahi chih ka gen
ngal hi.
Aninawn in inlam zuan in kapai a ka tun di kal ka ngaklah
mahmah hi. In ka tun in ni a niam mahmah ta a, ka nu-le-pate'n bus stang
ah ahon na dawn uhi. Ka kihah siang a an ka nek ma un ka nu'n kipahthu
genna thumna ahon nei pih hi. An nek khit in Mercy ka houpih a, amah toh
pawt sawm kahih dan ka hilh hi. Aman leng kana kisa dia Hong kinoh in
ahon chi hi. Kei leng sam sathau leng nuh manlou zen a ka tai pawt leh ka
bike chabi ka mangilh zomah hi. Kin deuh in innsung ah ka tai lutkik
nawn hi. Mercy te inn ka tun in ana ngak lah sim ahi ding a inn kong ah
ana om hi. Ka pawt khia ua, pawtpihna di le thei tuanlou kahih man in, Park
ka tungpih ta hi. Aman leng "hiai san maw i pawt na di ??????"ahon
chia, kenleng "hi" ka chih leh aheh a suak sim a lah aheh ngam kei hi. Mun
khat ah kong tukhawm ua, ka omlouh sung a ahon ngaih dan khong a gen a, ka
chiam nuih bawl sim chiang bang in aheh sim zel a ahon tum vak vak zel
hi. A ban a gen zel a, kei omlou a alungmuang theilou ahihdan te khong
agen a, kenleng chiamnuih toh zou zel kahihman in atawp in a mit apan
kha'm vuallouh in amittui ahong luang khia mawk a, kenleng lamdang kasa
petmah hi. Ka tuah patna ahihman in ka chiamnuih khak bang kakisik mahmah
hi. Ka khem a tawp thei mahmah Lou ahihman in kenleng ka itdan thute ka
gen khum tei a himahleh a tawp tuan kei. Aloh didan theinawn lou in ka
koi phei a, amit tui te ka nul sak a, amuk katawp chonchon ta hi. Amah leng
sawtlou in atawp ta hi. Bang ziak a na kah e?? ka chih leh aman "kon it
lam na ngaihtuah kei a chiamnuih in mi na zou zel a vele" a chita
hi. Kenleng hon ngaidam in i hun te anuam thei bang pen a zat ka ut man a
chiamniuh ka bawl mah ahi ka chi hi. Amah leng anui a amuk te amit te ka
en a, nidang sang inleng etlawm zaw hileh kilawm in ka thei hi. Huchia
hun nuam tak a ka zatlai un dak kua bang ana ging a kikhelah mah le ung
innlam ka zuan ta uhi. Inn ka tun in sawtlou ka ki-message zek ua huai
khit in ka ihmu vengveng ta hi. Bang ziak a Mercy hichi ngaih ka
hiam??chih bang ka lungsim ah dotna a omden hi.
Hunte pai zel in ka kingai deuhdeuh ua, miteng inle ahon thei
ta uhi. Kholak ka pawt chiang in bang "zi nei dek mailou maw" chih khong
in mi'n ahon chaimnuih zel uhi. Mercy bang in leng a chang in kiteng di
bang chiamnuih thutak in ahon gen zel hi. Kenleng hun nailou ahi ka
chihsan zel hi. Hun in hon ngaklou ahih man in ka suty bei ding hita
ahihman in ka khelah petmah hi. Ka pai di nitak inleng sawt pawt ut
mahleng ka sungkuante'n hon kithuah pih ut ahihman un ka pai hak kei
hi. Inn ka pai ma in Mercy ka phone a ka pia a, amuk ka tawp a ka paisan ta
hi. Inn ah kasung te'n paihak ana sa sim zomah ua, keileng pau tamlou
in, tutna ah ka tusuk a, huchi'n hun ahon zat pih ua, hasot na thu khong
ahon gen uhi. Ka ning sim man mahmah a atawplam in chu bang bang gen uh a
chihleng ka theikei ka message hongtung ahihman in. Mercy message dia
gingta kahih man in a et di kal ka ngaklah mahmah hi. Hun ka neih zoh un
ka lum a, ka message ka etleh Mercy a ana hi a, kenleng ka thuk leh dawn
na ka mu nawn kei hi. Atawp in mangpha ka khak a ka ihmu ta hi. Zingkal ka
thoh di ka lin mahmah a, himahleh alou theilou ahih man in ka thou khia
a, ka kihah siang a, ka van te ka bag ah ka guang khit in Bus stand ka
zuan vengveng ta hi. Mercy muh kilam en lai mah leng buai ahi ding a, muh
in a omkei a, ken leng lung leng tak in ka omna di lam zuan in ka paisan
ta hi.
A lung lenglaw petmah ahi dia an bang aduh tha asuak kei
hi. Huchi kawm pipi in ka omna di mun a tung ta a, nitak an kanek khit a
ka lup leh gimsim kahi ding a ka ihmu suk pah hi. A zing in thouphet kaki
sil a, ka duty post ma zuan ta hi. Hun te hong pai zel in ka hun ka neih
chiang in Mercy ka phone khial ngeikei hi. Niteng phial in ka phone a, achang in a balance ka thunsak zel a aman leng ahon phone zel hi. Akhen
chiang in ka ngaih luat ziak in kiteng ding bang ka chiamnuih gen zel
a, aman leng nang nakiman leh ka man ahon chi thuk zel hi. Nitak ka lup
chiang bang in ka kiteng didan khong uh kangaihtuah jel a, ka itna a lian
deuh deuh hi. Ka hunlui te khong uh ka ngaihtuah zel a, ka ngai thei
mahmah hi. Ka omna uah pasal ngen omkhawm kahi ua, numei muh di omlou
ahih toh kholak i pawt khak chiang bang in numei i muh leh ki en ut sim
mai hi. Himahleh i saap te toh kipawt khawm ahih man in deih bang a va
et sau di hi theilou hi. Keileng ka suty muh na ding kha thum in sam ta
ahihman in Mercy a din bang ka puak dia aw??? chih khong ka ngaihtuah na
ah a omta hi. Amah ka dot chiang inlah nahon deihsak sak non puak di
achi zel hi. Nitak ka lup dek chiang in Mercy ka houpih zel a zan sawt
sim lehleng ana ngak zel a, kenleng ka ngaihna alian deubdeuh hi. Ka
ngaklah mahmah ka suty lai hun ding a hong tung petmah ta a, kei leng ka
pai ma in ka zinpak puak ding en in bazar ah ka vak tei hi. Leiding pen
leng ka thei tuan kei a, Mercy ka dong zel a lah a gen ngei mah a gen zel
hi. Kenleng atawp in jean khekol khat kava lei a, huai khit tulai a
kithang mahmah iPhone 4s a thak lik lek kava lei a, kei a toh akibang
chet ka leisak hi. Huchi'n ka sungte a di bel lei ka neikei a, dangka tamlou
ka pua a, huaiteng toh inn zuan in ka pai veng veng ta hi. Inn ka tun in
auto ka la a, ka inn tan uh ka kikhasak hi. Ka nu'n singpi ahon bawlsak a
huaikhit in ka kihah siang a, an nekhin Mercy te inlam ka zuan ngal
hi. Nidang in a inn uah pawt ngam khol kei mah leng tu'n chu anu (Mercy
nu) te'n ahon deihsak ziak un ka maingal gawp hi. Nidang bang a Park a hoh
chihte omlou in a inn uah ka omden hi. A chang in bel Park ah ka hoh pih
zel thou hi.
Huchi'n hunte Hong pai zel in ka pai kik hun di ahong nai
mahmah ta a, kenleng Mercy ka khelah petmah hi. Ka pai di nitak in ka
iPhone amah (Mercy) a dia ka puak ka sakhau ah pua in amah ka manoh a
Park ah ka paipih ta hi. Nidang bangloutak in mi ana tamkei vanglak ua
aguk in ka kipak mahmah hi. Loupa mul tung ah ka tutpih a, awl a ka kihou
kawm un ka iPhone ama adia ka puak tuh ka lakhia a, "nang adia kon puak
ahi" chi'n ka pia a, amah leng kipak lua ahi ding a ka biang ahon tawpsak
hi. Kiteng didan khong ka kihoulim pih a, aman leng angaihdan ahon gen zel
hi. Ken zingkal a paisan ding kahihman in tunitak a amah pii ding sawm
mah leng ahon nial a, ka suty pai nawn chiang a din thukimna ahon bawl
pih hi. Ka kikhelah mahmah ua, pai di sawm ut leng ka om kei uhi.
A chang in ka koi zel a, a muk ka tawp sak zel hi. Kou bang a
kingai leng om din ka ngaihtuah theikei. Ka it in ka ngai deuhdeuh hi. Zan
sawt simta ahihman in kikhelah mah le ung ka pai pih a, a inn tan uh
kava kha a, keileng innlam zuan a kapai leh ka phone hong ging a ka
etleh ka lawmte nidang ale hon houpih ngei vak lou ana hi a, kenleng ka
lapah a sawt sim tak ka kihou nung un kimu din hon sam mahleh zansawt ta
ahihman in ka koih san ta hi. Inn katung phet in Mercy ka message ngal a
aman leng ahon thuk a huchin mangpha kikhak in ka ihmutsan ta hi. Zing
thou chu ka omna lam a pai ding in kakisa a, bandh bang om henla kipai
theikei leh chih bang ka ngaihtuah hi. Himahleh buiana om hetlou in ka
omna lam zuan in ka pai vengveng ta hi. Zominamni di bang nai petmah ahih
man in ka lung aleng mahmah hi.
Ka omna ka tung a, ka ki-report khit in ka room ah ka lut a
ka kihah siang khit in Mercy ka phone ngal hi. Aman leng ahon ngaih thu a
gen bei theikei a, inlam vapai thak a va pii bang ka ut hial hi. Amah ka
ngaih ziak in haksa sa mah leng maban ka khual na ziak in ka sepna ah ka
om a ngai ta hi. Zominamni bang amah toh zatkhawm ka ut mahmah hi. Niteng
in ka houpih den a, ka suty kal di bang ka ngaklah mahmah hi. Zominamni
chiang a mi lak a va kihel ut tei ahihdan ahon hilh a Ken leng na ut
leh na hoh ding a himahleh pilvang in chi'n ka thu hilh hi. Huchi'n amah
leng ava hoh a kei tellou a khattang akisak dan khong ahon hilh hi. Kei
tellou a milak a om bang haksa asak dan khong ahon hilh zel hi.
Hun hong pai zel in ka suty lak hun di ahong nai deuhdeuh a
kei leng ngaklah tak in ka om a, kapai hun hun chu inn leng phalou a
Mercy te inn pha masa di chih khong ka ngaihtuah hi. Nikhat kaki hou uleh
Mercy'n dansiangthou a kite'n ut ahih dan ahon hilh a, kenleng lin sim
mah leng ka ngaih ziak in ka nial ngam kei a, ka nu-le-pa te ka theisak
ngal hi. Huchi'n ka nu-le-pa'te apan bangmah nialna omlou ahih man in
ka kipak mahmah hi. Ka suty pai hun di ahong tung petmah ta a, keileng
ka kipak mahmah a ka saap pa kiang bang uah ka gen kha hi. Aman leng ahon
kipah pih a, huchi'n lung nuamtak in innlam ka zuan vengveng ta hi. Inn ka
tun phet in ka nu'n ka zi neih di hun khong ana kihou fel khin uh ahih
dan ahon hilh hi. Niteng in Mercy toh ka kihou den ua kite'n di kal ka
ngaklah mahmah tuak uhi. Ka kite'n ni di uh ahong tung petmah ta a, buai
in ka buai uhi. Ka tanau te uh bang inn ah nek bawl di khong in a kisa ua, ahon kipah pih chiat uhi. Ka hong kiteng khin ua khovel a ka it pen leh
ngaih pen nei ka hihman in lungkim tak in ka hinkhua zang ding in ka kisa ta hi.
--------------------BEITA-----------------
©Siamsinna leh Vakiangbu
Comments
Post a Comment