ZUANNA DANGLOU
(Pupu tangthu)
By : Leon Guite
©Siamsinna leh Vakiangbu
Hun sawt painailou in ka veng uah innkuan khat hong pem thak
a om uhi. Amau innkuan 7 pha ua, puteek sim mahmah ta khat zong tel hi.
Amah chauh in om a, lawm neilou leh lungleng tak in hunzang zel hi.
Akhenchiangin laithon hileh kilawmtak khat enzel in a mittui nulnul sek
in kamu khazel hi. Hiaibang puteek hehpihhuai mahmah kamuh in haksatna
nei a, aguk a thuakthuak mai hi ding hitah e... Chi'n ahaksatna leh
alungngaih nate thei ut in nikhat a inn uah kava lengla tei hi.
A inn uh kava tun in asungte ana omkei ua, amah kia in
varandah ah nisalum awi in ana tu hi. Akhut ah laipek se nimnem ton
nimnem khat ana tawi in a mittui ana vung pilh pelh hi. Kei leng akiang
ah kava tu tei a, thuvantang kava houlimpih phot zozen hi. Aman leng
amah toh houlim ut kahihman in kipahthu ahon gen masa a, nidanga a
thiltuah, tutan a amangnglh theihlouh omte genkhiak ut mahmah lah
genkhiakna di neilou a; tunitan a thuaktou ngitnget ahihdan ahon gen hi.
Kenleng tuabang thu ka zak ut mahmah zathei dinga ka om man
in kakipak gu mahmah a, pupu kiang ah,"pu aw na tanchin kimtak in hon
hilh in, genkhe lechin na thuak le hong nuamtuam mahmah ding ahi." ka
chisuk pah rumrum hi. Huaitak in aman alehkha tawi ahon pia a, "ka
tanchin kagen ma in na theihsiam sem na ding in hiai lai anasim phot in
aw bawi." ahon chi hi. Kenleng kalapah a, chi liing sim pepelh in theih
utluatna toh kasim pah poppop hi. Pencil a kigelh ahi a, alaipuan ton
nimnem leh luitak ahihtak man in a chiang ngel nawnkei hi. Kasimsuk zel
a, alailak katun takin aban kasim thei nawnkei... Ka neh hong nou in ka
mittui in ka mit ahon tuum hi. Anungaknu laikhak nanungpen ahi a, pupu
asungten adeihlouh ziak ua ngai ngoihngoih kawm a pasal neihsan ahih dan
agen hi. Apasal neihna mun ah leng pai utlou a, alupna puan toh zawng
kawm a ava khak uh ahih dan leh hiai laithon agelh ni tan a, pupu ngai
ngoihngoih ahihdan leh va pikhe mai dinga asapna laithon ahi hi. Kenleng
kasim suak teitei a, kasim zohtak in pupu kapekik nawn hi. Tua zoh in
pupu in, "katanchin ngaikhe nuam a kakiang na hong zot man in kipahthu
kahon gen masa hi." chi'n atanchin lungkhoih huaitak mai gen ahon panta
hi.
1944 vel in zoudawn mun nuamtakmai Khazang khua ah kapiang
hi. Kamin ahih leh Luanzathang ahi hi. Kapian zoh nung sawtlou in kapa
agamvakna ah hong tuahsia in ahon omlouhsan hi. Kapa mel ding dan
katheiman kei a, ka khophawk takin pabei kana himaimah hi. Kum 3 vel
kahong hih in kanu'n ahon taisan a, ka pute'n ahon kemtou uhi.
Huaiziakin, ka nu-le-pa sakmel mukhalou kasuak hi. Kanu'n hunbangtan
hiam honna kemkha mahleh, kaneu lai ahon taisan ahihman in amel dingdan
katheizou kei hi. Kaputen bel kapa sun mahmah kahihdan ahon hilh uhi.
Kapute' etkolna nuai ah kahong khanglian tou hi. Ahon duat
mahmah mai ua, anuam mahmah hi. Himahleh, tagah hinkhua zaw anuam taktak
chih a om ngeikei... Khosung ah, lawm-le-vual lak ah ka vuallel thei
mahmah hi. Koubel kapu toh kapi toh, ka paneu chauh toh ka om ua,
innsung ah bel duat a om kahih man in nuam kasa mahmah vanglak a,
kanu-le-pa ngai a ka kah khak chiang bang in ka pi'n akhem dingdan hon
theilou in ahon kahpih maimah sek hi. Ahon duat mahmah ua, amau ziak in
ka pate ngaihna neuchik nuamtuam in ahon khamuan zou mahmah uhi.
Himahleh, kum 10 kaphak kum in nitak khat ka hinkhua tengteng hon
kilehbulh sak vek ding thil ka hon tuak khata hi. Huaibel bangdang hilou
in kapaneu in zi ahon nei a, atung inbel asiam mahmah mai a, ata mah
bang in ahon bawl a, kenleng nu neilou kahihman in kanu taktak dan in ka
en a, kangaina mahmah hi. Himahleh, hun hong sawt hiaihiai in, ahong
inteek hiaihiai a, ta 3 bang ahon neih nung in a GIAL diktak ahong pawt
ta... Keipen mission sikul ah kai kahi a, buailua chih paulam in ka
sikul kai hon tawpsak in niteng in azu-aham thuak in lou lam ah ahon
kuansak den hi. Ann lah ginatak a honpe lou ahihman in thagim toh
gilkial toh niteng in ka gawng hulhul a, siat lam kamanoh hiaihiai hi.
Chik mah a nasem ngeile hilou nagum kahon sep tak in haksa
kasa mahmah hi. Hon makaih ding kuamah omlou, kei kia a hon kuansak zel
ahihman in haksa kasa mahmah a, aguk in ka tun-le-zua ngai in ka kapkap
hi. Lou khoh lah chikmah a kikhou khalou, koite haichi hi a, bangte
loupa hi hiam? Chih bangmah kitheilou, khoukei lenglah tai thuak ding,
vuak leh sat thuak ding kahihman in haksa sakawm tak in ka hih theih
dandan in kalou uh kakhou zel hi. Inn katung alah kampha kamnem a hon
hou a, honna dawn ding omlou. Huaikia hilou ann natawm hon gaihsanzel uh
ahihman in gil kial in aguk in ka kap kap sek hi. Ui nekval te khawng
atheihlouh un kane suk zel a, limkei mahleh silou in ka omthei hamham
zel hi.
Ka pute lah paungamlou uh ahihman un aguk in ahon kah pihpih
sek uhi. Nikhat an hon gaihsan nawn ua, gilkial lotel mahmah kahihman
in ka ui uh nek val omte kanek laitak ka nuneu in hong tuak kha in ka
sam ah hon man in hon kai khia a, innkong ah miteng muh in, "Nang tagah
vak lah, duh gawlpa, ka ui an diteng na nek gaih himhim. Nang sanga ka
ui ka it zawk ahi chih thei ou." chi'n singkhuah in ahon zep ek-ek hi.
Miten lah hon panpih naksang in hon nuihsan zomah ua,
naupangte bang in, "DUHGAWLPA, UI AN NEPA, TAGAHPA" chi'n ahon kou lai
zomah uhi. Kanuneu hon zepna sang in ahon kouna te uh na kasa zaw tham
hi. Atawp in thuakzou nawnlou in sih-le-sih, dam-le-dam chi'n ka nuneu
khutsung pan in ka hong taisuah hi. Zotna tumta neituanlou in lampi khat
zui in kahong taizel hi.
Lampi ah kathil tuah haksa taktak te zaw hon hilh kasawm kei.
Tunitan a ka ngaihtuah thakthak chiang in, ka chihumte suak in ka
lungsung tawng ah lauhna in adim lailai hi. Nibangzah ann nelou a
paikahia chih katheikei, khua ka tot khakn te sun a lut ngamlou in
khopua ah ka ngak zel a, zan ahong hih a, khosung ahong daih zikzik
chiang in khosung ah kalut pan zel hi.
Kanu neu hon satna keh ten akhem hon la in, akhente ahong
nasia a, kikepna dinglah neituanlou, ahon hahsiangsaka, hon tuamsak ding
kuamah omlou ahihman in gentheitak in kapai zomzel a, kei sanga vangse
zaw kua a om diam aw? Chi'n khitui-naptui toh ka pa ngai in ka kap kap
mai hi.
Nibangzah pai kahi a chih kathei nawnkei, ka gil kial petmah
in ahong kial tamai a, paizou nawnlou in munkhat ah ka lum hi. Gim
lopetmah kahih manin, ka imu kha a, ka mang in kapa kana mu hi. Aman
ahon it dan leh, ka maban ding hon ngaihtuahsak zel ding ahihdan hon
hilh in ahon paisan hi. Kapa ngailua kahihman in, ahon paisan ding
phallou in ka pa sam in kah petmah in kahong kap hi. Huchih laitak in
kahong khanglou a, lamdang kasapetmah hi. Gintaklouh pi in inn hoihtak
sung a, lupna nuamtak khat tung ah lum kana hi a, ka kiang ah nupi
chingkam meltak khat in ahonna en gige hi. Ka khanloh takin, nuihmai
kawmtak in ahon houpih pah a, apasal in lampi gei ah khophawk lou a lum
lai hon mu a inn tan hon pawtung a, ka halhkhiak ding ngaklah tak a
honna ngak ahihdan kamnem tak in ahon gen hi. Deihsakna kampau nemtak ka
zak patna ahihman in leh ka tanau meltheihte'n kamnem a hon houpih
utlou a, katheih ngeilouh khat in kamnemtak lh duat taka ahon houpih
kazak chiang in kalungtang sung ah kipahna leh khasiatna kithuah in ka
mittui khamvuallouh in ka mit apan ahong luang khe ziahziah hi. Nupi
nu'n a romol nemtal in ka mittui te hon nulsak in kap nawnlou ding in
ahon ngen a, amau in ah omta kahihman in kisukhaselou a, kipaktak a
omzaw ding in ahon ngen hi. Keileng kipah leh kisuanglah thuahkawm tak
in khovel a ka kamsiam theih tawpkhawk suah in kipahthu ka gen ekh
maisam hi.
Kei honna kemtute pa Lal leh nu Mawi chi'n kasam hi. Paina
ding dang theituanlou kahihman in, amau ahon ngaihnat thou uh toh
amaukiang a om a, laisim sunzom ding in ahon khou uhi. kenleng lem
sasukpah in a in uah ka om panta hi. Numawi a siam mahmah mai a, a pasal
zahtak in athu amang mahmah mai hi. Keileng ata banga hon en in ka
poimoh bangkim kei gen ngailou in ahon suktuahsak zou gige hi.
Palal ten tapa dang neilou in tanukhat Chingsutsiam @Siamboi
anei uhi. Keisang in kum 4 in anaupang zaw a, kenleng kanau banga en in
aman leng ahon ngaina mahmah hi. Tuakum in kum 14 vel khawng phapan din
kaki gingta hi. Niteng in Siamboi bankaih in sikul kakai pan nawnta hi.
Sikul tawp chiang in nu mawi anasepte huh in ka buaithei mahmah a, ana
om maimai ding in hon sawlsek mahleh, ka om maimai ut kei. Katung ah
migi a, itna tak toh honkem numawi panpih ding ka thasial kei, kakipak
zaw thamtham hi. Ka nuneu in hehpihna beia na ahon sepsak nate ziak in
septheihlouh omlou in numei nna leh pasal nna teng kakop theivek hi. Tua
ka nuneu nuai a ka training lakte haksa hetlou a numawite kiang ah
zangthei ka hihman in ka instructor, ka nuneu tung ah kakipahna lian
peuhmah hi.
Tuakum in pawl sagih ah kaki khum a, Siamboi pen pawl li ah
kikhum hi. Sikul kailouhna sawt lota ahihman in, achiil in haksa kasa
mahmah hi. Mangkang pau a hilha om kahihman un haksa kasa diak hi.
Himahleh, Pa Lal leh numawi hon deihsaknate uh athawn mai a, aom ding
ngaingam lou in hahpan in kapang hi. Tua hang in kumtawp laivuanna ah I
div in kazou thei vanglak hi. Palal te nupa in hon kipahpihlua in akpi
tuilai gou in ka pass ka lawm zuazua uhi. Kei adinga akhatveina ahihman
in thupisa in palalte hon itna leh khotuahna ziaka laisim sunzomthei a
ka om man in, ka hihtheihsun chi'n nasep leh laisim ka hahkat deuhdeuh
hi.
Theihlouhkal in hunte hongpaizel in pawl 10 bang kahon
simtou ta hi. Tangval dia kisapan kahita a, aw te bang hong kikheng in
ngaihtuahnate bang ahong kikheng panpan ta hi. Siamboi ngeileng ataksate
hongkhang tou zel in, amelbang ahong hoih mahmah hi. Naupang chik
himahleh khangthei mahmah ahihmanin ataksa piching pianpah hi. Kaki
ngaina mahmah ua, sepding bawlding omte kinolh tuah chih omlou in
semkhawm bawlkhawm in kituaktak leh kipaktak in kuamah englou in hunte
kahon zangtou zel uhi.
Hunte hongpai zel in, theihlouh kal in pawl sawm exam ahong
nai mahmah ta hi. Keileng numawi in na kasep ding hon phalnawnlou in
laisim kia nasep in ahon neisak hi. Ka ngaihtuaha, numawite hoihna ziak
liauliau a pawl sawm exam theiding chih kangaih tuah chiang in hampha
kakisa mahmah hi. Ka nu-le-pa ngailou hituankei mahleng, amau toh
damtaka khosakhawm nahita him lengle hiai tantan katun ka ki gingta kei
hi. Ka nu-le-pa hon omlouhsan leh ka nuneu in ahonna deihsaklouhna
ziakpen Pathian in kei a dia vualzawlna koih guk ana neihziak ahi chi'n
kathuak anuamtuam mahmah hi. Nidanga haksatna kathuak te kei adinga
hamphatna leh vualzawlna katantheihna dinga kalbi poimoh mahmah khat ana
hihdan katheisuah semsem a, palal te innkuan le Pathian kiang ah
kipahthu ka gengen hi.
Siamboi bel nasep kizen mahmah in amel hoih toh atatna
lampeuh aetlawm mahmah mai hi. Kangaina mahmah mai a, amanle hon ngaina
mahmah mai hi. Kakiang ah a omchiang bang in nuamtuam kana sathei mahmah
hi. Lengla nei theipanta ahihman in lengla anei zeuhzeuh zel a, tua
chiang in ken lenglate kana haza gu thei mahmah mawk hi. Ka lungsim
bangchi ahita mai a, setan honglut ahi diam? Kei tagah mipangbel leltak
in bangziaka mi nuamsate tate kahaza thei mawk dia? Lamdang kasa mahmah
hi. Mite gendan leh itna mit a ana enkha kahi diam?
Hiaibang lungsim pu thei din kaki koih ngeikei, lah Siamboi
ka it ngoihngoih mai hi. Lamdang kakisa mahmah mai a, kei leltak hon it
din ka gingta kei, kei mah athawn a kisulung gim lel hin kakikoih hi.
Mangngilh mai a, kanau dan a et kasawm hang in ahi theikei. Niteng in ka
itna apung deuhdeuh zomah hi. Midang in ahong hel khak chiang bang un
aguk in kana hehthei mahmah mai a, laisim theilou phial in ka lunggim
nang phet kangah zel hi. Atawp in kalaisimna bahloh thei dia gintakna
kaneihman in, khapetzen a pang in kalaisim ah kilunglut sak in leh
nikhat tei saplian khat suahtei ding hanchiam in, kalai simna ah ka
hahpan thei mahmahta hi.
Huchi'n, Siamboi ngaipetmah in akiang ah om ut petmah
mahleng. Amah ngaihsaklou bangtakin ka laimah en in, amahtoh kithuahna
ding hun ka kibawl nawnkei hi. Nikhat ka room ah ahong lut hi. Kei bel
atheilou banga om in ngaihsaklou dandan in kana om hi. Ka kiang ah ahong
tu a, khasia in ahong kidik huthut mawk hi. Kenleng lamdang salua in
kintaka thou in "bang chi e Siamboi?" chi'n kadong pah hi. Mittui pak
niuniau kawm a hon en in ka kiang ah, "U aw, bangziak hihiam tulai nahon
kithuahpih ut nawnlouh? Ken hon ngailua keive, nang tellou a keichauh
zaw hing zou mahmah lou ding hi ing. Numei in pasal kiang ah itna thu
gen chi'n hon simmoh hetken aw, hiai inn ah nahong lut apan in ka honna
ngai mahmah mai a, tamveitak nang nahon gen ding ngak in ka hun kana
zang hi. Himahleh, nang lah hon gen ngeilou na hihman in zum-le-zah
khualzou lou in ka hon gen mai ahi. Na lunglou lam genkha kahih leh
hehpihtak in hon hehsan lou in hon ngaidam in aw... Tulaiteng na hon
thuah ut nawnlouh ziaka thuakzoulou a hon genkhe mai kahi." chi'n kamai
natawm en ngamlou in kun dide kawm in aki dik huthut hi.
Ka itpen apan lam-et hetlouh itna thu kazak tak in kakipak
mahmah mai a, kenle kahon ngailua chi a kawisuk ek maibang ka ut tuntun
hi. Himahleh, awlchik in akiang ah, "Siamboi aw, na hon itna ziakin
kakipak mahmah hi. Himahleh, kei tagah migenthei nou pangbel a khosa
maimai kahi a, hon it in hon ngai mahleng, denchiah i nu te'n ahon
theikhe ding ua, kei tagah a dinga atanu hawmthoh uh phallou ding uhi.
Tunung chianga nanga dingleh kei ading a gentheihna leh innsung a dinga
kituahlouhna hon tuntu lel kahih khak di kalau" chi'n ka dawng hi.
Kagen zoh in Siamboi in ka kiang ah hichi'n ahon chi hi, "U
thang aw, inu kiang ah bangkim kagen khit veksa ahihman in tualam thu ah
zaw lunghimoh hetken, i nu deihdan zui a kon gen mah ahihi. Na tagahna
ziak in kon pampaihkei a, nangmah ka it nahihziak in hon ittu tamtak
nawlkhin a nang hontel kahizaw hi. Na paina na ah kapai ding a, na sihna
mun ah kasi ding hi. Uthang aw, ken hon taisan ngeilou ding hi ing..."
Hichitel a Siamboi hon itna thu katheih in, kakipak mahmah
mai a, numawi inlah hon deihsak zomahlai chih katheih zawkmah toh
kalungsung teng kipahna tui aluanglet ahipen mai. Nui themtham kawm in
Siamboi lu' a khabe ah domtou in a mittak ah en kawm in, "Siamboi aw,
hiaibang a itna thupi. Nanga pan a za ngei dinga kaki gintak louh, tua
nakam ngei a nagen kazak man in kakipak petmah hi. Kei bangmahlou nahon
itman in kenleng kahon piaktheihsun ka ITNA kahon pethuk sam hi. Kei din
ginomtak in hong om in aw..." chi'n ama hon dawnna ngakman tuanlou in
kakawi sukpah a, amuk ah deihthawh tak in katawp vengveng hi. Nuamsatak a
kakithuah laitak un, numawi in innsung apan in ann nek hunta chi'n
ahonsam a, nui hiuhiau kawm in kipaktakin ann neding in kakizui pawt
uhi.
Hunte hongpaizel in ka ki itna uh le anini in akhang hulhul
hi. Sepding ompeuhmah hiai numei nna, hiai pasal nna chih omsak selou in
kituaktak in kasem khawm zel ua, kuamah hon subuai ding omlou in
nuamtak in kahunte uh kahon zangtou zel uhi.
Hun in kuamah ngak neilou ahihman in, theihlouh kal in exam
hun ahong tungta hi. Bangmah buaina omlou in exam bul kahon panthei a,
kamaban ah bangthil hongtung ding ahia? Chih himhim ngaihtuah phalou in
ka examna ah fail khak ding lau in kahah pan mahmah hi. Siamboi in ahon
hanthawn gige a, tuamahbang in palal leh numawi ten hon hanthawn in hon
thumsak gige uhi.
Exam nitawpni in bu nih ka exam uhi. Zingkal in numawi in
thumna toh hon khakhia a, lungsim zangkhaitak in kakuan khia hi. Exam
kahih hoihthou a katheihman in kalung amuang mahmah hi. Nitaklam exam ka
zoh hak man in, kazoh phet in kintak in innlam kazuanpah hi. Inn katun
kuan in innkong ah parachute kizak kamu a, midang tampi ka inn uah
gamtang om kamuh in kalung ahong nuam kei mahmah hi. Bangthil tung om
ahi diam aw chi a lungphu kisai litlit kawm in inn kazuan mengmeng hi.
Kuaman honna houlou uh ahihman in innsung kalut suakpah hi. Kalauhthawng
mah bang in, innteng ana ki hahsianga. Tutna tampi kikoih in, anawl
khata lupna tung ah numawi tanghetlou in analum zinzen a, akiang ah
Siamboi khasetak in numawi sam in ana kap zuahzuah tamai hi.
Kintakin numawi luang bul ah kava tusuk nokh a, kidek zoulou
in Siamboi toh kaki kah huan uhi. Numawi ka it mahmah mai a, ka pianna
nu' suun mah kabang a, ka pawna petmah hi. Siamboi ka en a, nu bei a
khosa mai ding tuh ka hehpih mahmah mai hi. Palal lah tangval suak
mahmah lai ahih manin tangkhat a damsung zang ding in ka gingta kei hi.
Kou it banga numawi hon it pih atam mahmah mai hi. Han kilawmtak lah
melsetak mai ah numawi it tak leh khelah takmai in kavui liam ta uhi.
Siamboi in nikhat ka kiang ah, "u thang, inu'n lah
honpaisanta, nangchauh kakinepna nahita hi. Hehpihtak in nang zaw hon
paisan mahmah ken aw..." chi'n ka ngawng ah hon kawi in ahong kap khe
huphup hi. Ken leng deihthohtaka pombelh kawm in,"Siamboi aw, tawp in.
Kap nawnken. Ken nang hon taisan lou ding hi ing." chi'n kaheh nem hi.
"Uthang, kon ngailua. Hehpihtak in hon paisan ken aw... Nahon paisan leh
kei damzoulou ding hi ing." chi'n ahon kawi kip semsem hi.
Kenleng,"Siamboi aw, ken zong hon ngailua kahi. Hontaisan lou ding kahih
manin, kap nawn ken." ka chi hi. Tua thu a zaktak in akah lai hong tawp
in, ka ang pan hong daktou kawm in amit etlawmtak, akahkah na a bawk
gawp ahon entou in ahong nui siusiau hi. "Uthang, keizaw kahai lua
maw... Hon kipaksaktu dingpen hon sulungnuam lou tupen in kapang khasek
a, hon ngaidam in aw.... Ann huan hun ding hita, paini in ann vahuanta
ni aw..." chi'n annhuan ding in kakizui kheta uhi.
Hunte hongpai zel in ka exam result leng a hong suak
khongkhongta a, ka up bang ngei in keileng first division in ka pass a,
kou sikul pumpi ah sangpen hihna kala hi. Heututen hon kipahpih mahmah
ua, thilpiak tampi hon pia in kipaktak in ka it Siamboi hilh kal ngaklah
tak kawm in inn kazuan hi. Inn katun in Siamboi in kipaktak in honna
dawn a, ka result theikhin ahihman in kipahpihna thilpiak in ka muk ah
ahonna tawp vengveng hi. Siamboi hon thilpiak pen lungsungtawng apan
deihsakna leh itna thilpiak ahihman in, thilpiak ka don tengteng lak ah
thupi kasa pen a, tuni tan a kangaihtuah thak chiang in huai ni ka ngai
mahmah mai hi. Kou gel ading a kipaktaka kakithuah khawm tawpni pen ding
uh ahihlam theilou in, nuam kasa mahmah mai uhi.
Huchi'n kipaktak in nitak ann ding huan in kahong kithuah
tou uhi. Palal ahongpai hakluat man in ngakzoulou in ann kana neksan
uhi. Nidak dak 8 vel in palal ahong tungta a, ka na ginmoh mah bang in
aji ding nuthawi khat toh ahong tonkhawm uhi. Inn ahong tuntak in, nui
themtham kawm in a ji dinga hontonpih nu pen kou kiang ah mellahna ahon
nei hi. Siamboi kiang ah anu ding ahihdan hilh in kei kiang ah nu niang
chi a kasap ding ahih dan ahon gen hi.
Kenbel Siamboi maban ding haksa athuak ding bangtanhiam
kamuh man in ka kipak lokei hi. Siamboi in apa kiang ah examna ah pass
kahihdan agenleh nuniang in pautuh pah in kipaklua hi awmtak in
NASIAMLUA ahon chiphei deidai zozen hi. Palal inleng Thangpu kipahhuai
mahmah ei... Zingchiang in ilawm dupdup ding uh aw, ahon chitei hi.
Huchi'n zan sawtluatma in chi'n lup vai kahon sawmta uhi.
Hun hongpai zel in nuniang ngeileng ahong maingal hiaihiai
a, tuatoh kiton in palal athuzoh deuhdeuh hi. Palal pen nuniang in
remote a, a control mah ahong bang pah hi. Keipen palal ta taktak hilou
kahih dan theilua ahihman in, niteng in pampaih in ka om hiaihiai hi.
Sepding tengteng kei kia in kasep ding chih ahong hita hi. Siamboi in
kei ahong huh sawm chiang in nuniang hehna khop apha gige a, keiziak in
nutate kiselna atun gige hi.
Nikhat nuniang in anik sawp ding in kei ahon sawl hi. Siamboi
hehlua in anukiang ah, "nu ei, ka uthang i suak/sikha uh nasak hiam? Na
numei van natawm nasawp sak tel zum lou nahiam?" chi'n genkhum hi.
Tuatak in nuniang hong heh mahmah mai a, hichi'n ahong hangzak hi, "nang
phiangsan in maw kei nanu nahon simmoh. Napa kiang ah nahon kouna teng
gen di kahi. Hiai tagah, mipangbel a om maimai maw na panpih. Ka inn ah
om avele ka utleh ka underpant le kasawpsak ke. Kathu aka..." hon chi
motmot tamai hi.
Ka etna ding kathei nawnkei, ka kisuanglah gawp a, ka zakta
gawpta. Ka nu-le-pa leh numawi ka ngaihna hong lian mahmah mai hi. "Aw
nu hoih leh zaidam, numawi aw damlai hilechin zaw aw... Hiaibang
engbawlna tuaklou ding hinga maw..." ka chi vungvung hi. Ka mit apan
khitui luangkhe ding in ahong kisa a, Siamboi leh nuniang muh ding ka
utlouh man in kintakin puansawp dingte la in luikhuk lam kamanoh hi.
Lampi ah ka ngaihtuahna apaisau mahmah mai hi. Palalte kiang ah ka om
sawt hoihlou ahihdan kathei a, pawl sawm zousam kahihman in kei ma ding
kakhual theisam ta ding. Himahleh, kei pawt khiaknung chianga Siamboi
thuakna dingte ka ngaihsut chiang in haksa kasa in ka hehpih mahmah hi.
Adougal nawk ding thupi in a huphulh huai mahmah hi.
Tuabangteng ngaihtuah kawm in kapai suksuk a, theihlouh kal
in luikhuk katung suk hi. Nungak bangzah hiam puansawp in ana om ua, ka
puansawp dingte amuhtak un, "thaiboipa zite' nik sawp kipanpah ding
maw?" chi a hon chiamnuih in ahon nuihsan ekh-ekh uhi. Pautamlou in ka
sawpzel a, kasawp zoh in kintak in kapaitou hi.
Inn katun in nuniang ana omkei a, Siamboi tutphahsau tung ah
analum hi. Ka tun in hong dingtou pah in kap kawm in ahon ngawngkoi hi.
sawt kuamtak akah nung in hichi'n ahon chi hi, "uthang aw, i inn uh
nuam nasa nawnkei ding chih kathei, pasal nahi a, na ut leh mundang ah
na omkhethei chih kathei. Himahleh, hehpihtakin hon paisan ken aw...
Nangtellou in bangchi'n ka hingzou mahmah dia? Aw nu aw ka hon ngai na e
maw... Hon endih kou natate... Haksa kasalua uh nu aw... Hong kik nawn
maive maw..." chi'n khase tak in ahong kap keuhkeuh nawn hi.
Adawn di dan haksa kasa mahmah mai hi. Hiaibang a ki
gelgawtna hinkhua taisan a keimah deihtelna a pai ka ut petmah hi.
Alangkhat ah lah ka itpen in ka omlouh nunga haksatna atuah ding ka
ngaihsut chiang in taisan ngam vual ding kahikei zel hi. Kalungtang
akisual nilouh a, atawp in Siamboi kiang ah, "Siamboi aw, kon itpetmah
chih nathei, kenleng hon taisan ding ka ut kei hi. Himahleh, hiaimun ah
omden taleng, i maban ding bangmah geltheilou ding ka hihman in kei din
paikhiak phot mai hoih zaw in kathei hi. Kava pai dinga, sepna hoihtak
kava zong dinga, tuazoh chiang in nang kahong pi ding aw..." chi'n ka
dawng hi.
Ka thugen azaktak in ama sanga kip zaw in ahon kawi a, kap
ngaih zaw sem kawm in, "hitheilou uthang aw, tuabang hitheilou ding,
hehpihtak in hon paisan mahmah ken, nanglou in ka hing zoukei ding. Na
pai teitei ding leh kenle kahon zui ding." ahon chi hi. Kenbel akiang
ah, "Siamboi aw, kenleng nangtoh omkhawm det ka ut petmah hi. Himahleh,
tu lel dinmun ah thil hithei hilou phot ahi. Ipa ngaihdan leng hilou
ding ahih man in keikia kava pai phot hoih zaw ding hi." chi'n ka dawng
hi.
Himahleh, Siamboi pen utlou bilbel hi. Hon zuih teitei sawm
tinten hi. Keilah paikhe leng koi ah pai ding? Koimun tung ding chih
kigen theilou ahihman in amah kapi ding lemtheilou hi. Atawp in
dalzoulou ding kahi chih katheihman in pawt lou a, inn ah om zaw ding,
anuam-ahaksa thuakkhawm ding ka chihtakin, lungkim meltak in ahong
nuikhe sisiai hi. Huchi'n kihahsiang in innsungna sepding omte ka
semkhawm uhi. Siamboi bel kathupukna ziakin akipak mahmah hi. Kei
kahihleh bang thu hong piang ding hiam? Chih lauthawng sim giugiau in ka
om hi. Siamboi bel bangmah katheisak utkei hi.
Nitaklam nitum kuan in nuniang ahong pai a, phun na ding
honzong pah in thil thulim lou chikchik in ahon phun khum den hi. Kenbel
kamkhat mah in ka dawng kei hi. Huchi'n ann kahon ne ua, ann nekzoh in
thil khat ziakin nutate ahong kina nawn uhi. Gen ding katheikei, ka ning
akitel mahmah mai hi. Siamboi hehlua in a room sung ah lut a, houpih
zoh vual ahita kei hi. Kenleng nuamsalou in ka lupna kazuan a, kalumsuk
pah hi. Nuniang lah phun den ahihman in ka imu theikei hi. Athugente ka
ngaikhia a, thilteng keimoh hisak in ahon phunkhum den hi.
Atawp in palal hong pai a, kou ahon muhlouhtak in nuniang
kiang ah ka omna uh akanpah hi. Tuatak in nuniang inleng khase pau
kawmtakin apasal kiang ah, "natate nungak-tangval hisamta ua, a omdan uh
pilvang dinga deihsaka ka thu hilh leh, anu uh kahihna bangmah a
ngailou in; kou theih kou moh in ahonkou uhi. Natate na thuhilh kei leh
hiaimun ah ka omkei ding. Kapai ding. Haksa kasalua, Thangpu bang in hon
simmoh lua, hon vaw dia akhut hon lik khum ahi..." chi'n kah aw in agen
daldal hi.
Kaheh petmah a, lah kahih theih bangmah a omkei, numawi ngai
in kaluankhi kanul den hi. Nuniang in agenzom zel a, palal kiang ah,
"kei nahon ngaizaw hia? Natate? Hiaibang thilteng Thangpu pat vek ahi.
Unau dan a kithuah uh kasak leh ana kingaihbawl ua, ka omlouh kal a
Thangpu in Siamboi a ut danteng a ana ompih ahi. Huai deihlou a ka
gentakin Thangpu in hon vuaksawm in akhut ahon liika, laulua in katai
khia hi. Tuaziak in hiai inn ah om kei din lauhuai ahi. Kei nahon it leh
Thangpu nohkhia inla, ahuchih keileh kei kapai ding." chi'n ahon gen
hi.
Tuabang thu kazaktak in na kasa mahmah mai a, ut danteng a
bawlnunga hihlouhna tan ah gensiata ki omlai chih kazaktak in hiai inn
ah omna vual hin kathei nawnkei hi. Aban teng za ut nawnlou in kabil
kahuma, palal in bangteng gen ahia? Chih kathei nawn kei. Kei a ding in
akinthei bangpena hiai inn nutsiat ahoih pen ding chih ahita mai hi.
Khua hongvak leh bangthu ahong piang dia aw? Chi'n ihmu
theilou in kaki ngaihtuah den hi. Ka it Siamboi in theileh bangchi'n a
om dia? Haksa kasa mahmah mai a, lah kei din paikhiak mah hoihzaw in
kathei zel hi. Tuabang teng ngaihtuah a ka omlai in ihmu kha kana hi
ding a, kamang in kapa puanngou silh kawm in kakiang ah ahong pai hi.
Kakiang ah, "bawi aw, lungkham ken, Pathian in na maban ding hon
ngaihtuahsak na ding ahi." chi'n ahon paisan hi. Kapa ngailua in ka sam
a, nakpitak a kakikou leh thakhat in ka khanglou guih hi. Khua
vakpetmahta ahihman in ka maban a kamaituah ding thil ompen lin petmah
kawm in kathou khia hi. Ka vante bag ah guansa in ka koih hi. Ka room
apan kapawt khiak tak in ka gintaklouh lamdaih in nuniang ana maitai
mahmah mawk hi. Nui heuhau kawm in singpi ahon pepah a, "kakipak
nuniang" chi'n kasang hi. Kalungsim in "athiltup tangtun ding hitah e...
Huaiziaka maitai lel neive maw..." kachi lungsim hi.
Ann nek hun ding ahihtak in Siamboi room ah kava lut a, ann
ne ding in kava phawng hi. Himahleh ann duhlou ahihdan gen in keikia a
vane mai ding in ahon sawl hi. Tuatak in akiang ah, "Siamboi aw,
tuzingkal i annkuang sawk khawm ni nanungpen himaithei ahi. Hon sam ut
mah lengle kon sap phak nawnlouh ding hun tungdek ahihlam theilou maw?
Ken hon aam lua keive..." kachi hi. Tuabang thute azaktak in kidiik
hithit kawm in, "Uthang aw, inu damlai hileh zaw hiaibangteng tunglou
ding hi a maw..." chi'n ann neding in peihlou kawmpi in ahong thoukhe
niangniang hi.
Ann nekzoh in palal in bangmah genlou in office kai ding in
ahon kuansan hi. Kalungsim in "Palal mangpha bek hon khaksam lou tel
ding maw?" kachi phet hi. Tuanung sawtlou in nuniang ahong lut a, nui
selsal kawm in, "Na palal in inn ah a omna kumkhua sawtsamta a, pawl
sawm bang zoukhethei samta ahihman in amaban ding ngaihtuah thei dia
piching ahita hi. Huaiziak in ngai mahle hang, amaban ding dalsaktu
hikha lel ding ihihman in muntuam ana zuan phot mai heh ahon chi a, na
bahara ding in hiai ₹ 500 ahon nutsiat hi. Pawt nang poimoh kanei a kana
pawt ding aw." ahon chi hi. Tuabang thu Siamboi in azaktak in hehmahmah
mai a, anukiang ah, "nu aw, ka Uthang simmoh mahlechin le na thilhih
dan diklou ahi. Min a innluahte uh a hawlpawt dek chiang ua ama
khakhat-khanih a hilh khol masa ua, nang tua ka Uthang, nasiatna ding
kampau zangkha hilou zankhat thu a nanoh khiak himhim na sisan in zou
tel hia nu? Tuale mangpha natawm khak utlou a pawtsan dek deidui zomah
lai." a chihkhum hi. Tuatak in nuniang hong ki heithak in mangpha
ahonkhak sam hi. Kenleng ahon kepna te ziak in kipahthu ka gentei sam
hi.
Kavanteng kasa thak nawna, Siamboi in paulou hial in ahonna
en-en hi. Atawp in koilam zuan a paisawm nahia Uthang? Chi'n ahon dong
hi. Kenleng Siamboi kiang a, "Siamboi aw, ka paneute ka taisan ni in
koilam manoh a pai ding kahia chih katheikei. Himahleh Pathian in nang
kiang ahon pitung hi. Amah ah muanna koih kahih manin kalung amuang hi.
Kava pai dinga, nikhat tei nang pi ding in kahong painawn ding aw.."
kachi hi. Aman ahon dawng a, "Uthang aw, hon phal mahmah lou kahi.
Nangtellou in bang chi'n kana khosa mahmah dia? Na pai ding leh leng
tuni bek hehpihtakin nituang laive maw..." ahon chi ngutngut hi. Ken ka
dawng a, hichi'n haksa sakawmtakin ka chi hi."Siamboi aw, kon ngaih
nathei, kon itdan zong nathei hi. Himahleh inu-ipa ten a mohpuakna uh
zouta ua, tuaziakin kenleng kamohpuakna amaute' hong pai nawnma a ka zoh
teitei ngai ahi. Ki halhsak inla, khomual tanbek hongkha ve maw..."
kachita hi.
Khouhvual kahi nawnkei chih leh khouh chi kahikei chih
atheih man in Siamboi leng awla hong kisa in huchi'n awl in khomuallam
zuan in kahong kizui kheta uhi. Lampi ah kuamah pau omlou in kapaizel
ua, khomual katuntak un, Siamboi in ka ngawng ah hon kawi in ahon
kahkhum nawn hi. Kenleng ka it toh kikhen ding haksa kasa mahmah mai a,
anep ding dan tuan theilou in ki pasal sak zou nawnlou in ken leng kakah
khum maimah hi. Atawp in hichi'n omom leng hoihlou ding chih katheih
man in Siamboi ka pomna khut awl in kakhah a, a bilbuk ah huau siausiau
kawm in, "Ka it, kana paita mai ding, damtak in mangpha man ni aw,
lunglai ah hon ngilh ken aw ka it, kamun katun phet chiang in lai kahon
thon pah ding aw..." ka chi hi. Siamboi in leng awl a hon khah in,
"Uthang hon khamthei lou kahih man in hon ngai mahmah mahleng, nangleng
mangpha hoihtak man inla, heina peuh ah kei din ginom in aw..." ahon
chihi.
Huchi'n maban sawn in haksa sakawmpi in khovel a ka itpen
nusia in kal kahon suan panta hi. Kal sawm le suan nailou chih ding in
Siamboi in kah aw in, "Uthang" chi'n ahon sam hi. Keileng ka kalsuan
khawl in ka it mel munuam in kakinung hei hi. Tuaphet in ka it Siamboi
keilam zuan in ahong tai a, ka ang ah hong belh in ka muk tak ah ahon
tawp kawm in, "damtak in mangpha aw Uthang. Kon ngailua." ahonchi hi.
Kenleng it tak a tawp thuk kawm in, "nangle damtakin aw ka it, kenle
kahon ngailua, nikhatni chianga khen nawnlou a omkhawm theihna din
Sianmang sumbang be den ni aw..." chi'n haksa sakawm tak in mailam ka
manoh tahi. Ka tum dek kuan in kinunghei a ka etleh, ka it in romol pei
leplep kawm in bye-bye ahon khak hi. Kenleng atawpna pen ding in kakhut
vai lep-lep kawm in ka bye-bye teihi. Huchi'n kihei in mailam kazuan
pannawnta hi. Ka kihei kawm in ka mittui heikhe khawmkha in kithei ing.
Huchi'n lungzuangtak leh nungkaih veitak in maban kahon sawn
zel hi. Sun hun dingkhawng ahong hihtak in khua thupi sim mahmah khat ka
tung hi. Gil kiallua ahihman in hotel khat ah lut in singpi ka dawn hi.
Huchia singpi dawna ka omlai in papi khat leh tangval khat ahong lut
uhi. Kakiang ah ahong tu ua, akihouna uapan in tangvalpa pen sepaih
kilak sawm ahihdan katheikhia hi. Keileng kamaban paina ding theituanlou
kahihman in sepaih kilakna ah vatelmai ka lungsim ta hi. Patate kiang
kava naih a, thu omdan kava dong chian ta hi. Amau leng hoihtak a hon
hilh in, amau vazui thei ding kahihdan zong ahon hilh ngal uhi. Kakipak
mahmah mai a, singpi dawn man piak zoh in tua patate toh sepaih kilakna
ding munlam kazuanta uhi.
Amun katun un kilak ana panta ua, kenleng ka zuih tangval
tununga kalawm hoihpen hong hiding Lianpu toh kilak dingte dinna mun ah
kava ding pah uhi. Sepaih sapten ahong en ua, ka saput leh ka mel puak
dan ahon et nung un; ahonsam khia ua, muntuam khat ah mibangzah hiam
omkhawmte lak ah ahon sawl uhi. Anungzek in Lianpu ngei inleng ahong
zomtei a, sepaih sap khat hong pai in kouteng sepaih dinga lak a om
kahihdan uh ahon hilh hi. Tua inlam vapai phot a, zingchianga ki report
nawn ding in ahon thukhak ngal hi. Sepaih dinga lak aom himawk kahi mai
a, kakipak mahmah mai hi. Kamang a ka pa'n lauken Pathian in hon ompih
gige a, namaban ding hon ngaihtuahsak ding ahi. Ahon chih ka phawk khia
a, kipaklua in mittui kai zungzung kawm akhuk din in Pathian kiang ah
kipahthu ka gen hi.
Kingakna ding dang neituanlou kahihman in tuazan Lianpute'
inn ah kaki nga hi. Anitakin ka itpen Siamboi ading laithon ka gelh pah
hi. Lamka khua tung kahih dan, sepaih dia lak aom kahihdan leh sawtlou
nunga training akuanpah ding kahihdan. Ban ah, kangaih dan khawng kagelh
hi. Vangphathuai takin, Azing a Siamboite khua Mata ah paiding kamu lem
pah a, laithon pen Siamboi kiang kia ah apiak ding ahihdan ka hilh
thakthak zozen hi. Tuanitak kipahna in kadim hi. PATHIAN honpi dan
kangaihtuah chiang in thupi kasa petmah hi. Lianpu pan ka sepaih chin uh
kipahpihna in sameh limtak in ahon lopsaka, kalu tung uah akhut nga in
ahon vualzawl hi. Azing in Sepaih te kiang ah kava ki report pah ua,
apoimohteng saifel khit nung in gamthuk lam ah training ding in kakuan
kheta uhi.
Ka training namun ding uh ARC Shillong vangkhua katun un, ka
lung aleng mahmah mai hi. Ka etna lam peuh lenmui kai thithiai in bawm
den ahihman in ka lungzuan behlap sem hi. Ka it Siamboi a ding in
laithon ka gelh pah hi. Ka address kimtak a gelh in ka khaksuk vengveng
hi. Huchi'n itna thute laithon tungtawn in kaki kum khawm theizel ua,
lungzuan nengkhah anuamtuam deuh hi. Ka tupdan in training zoh chiang a,
innlam pai a ka it Siamboi toh khennawn lou a tulkhawm denta ding chih
ahi hi.
Huchi'n kithalawp tak in training kahon neitou zel uhi. Ei
nagum sem gige te a ding in ahaksa lawkei a nuamtak in ka zoutou zel hi.
Tua hunlaitak in India leh China gamgi thu ah ahong ki ngik sim
panpanta uhi. Officer ding taksapna lian ahihman in JCO course pai utte a
ding in Screening ahon bawl ua, ka lawmpa Lianpu toh officer training
dinga lak in ka om uhi.
Officer training dinga laka ka omman un deihdan in thil apai
theinawn kei hi. Kha guk training ding pen tun kumkhat behlap in om hi.
Ka it muh dingkal ngaklah taka ka ngak pen hitheilou ding a bangta hi.
Lungzuang tak in hunte kazang a, akhenchiah sepaih kalut khak bang
kakisik mahmah sek hi. Himahleh, ka nna ding a kipia, ka ma a ompen
zohlouh khak ding lau in kahah pan mahmah sek hi.
Ka it Siamboi in bangchi'n hunte ana zang diam aw? Ken ka
ngaih ngoihngoih a, haksa kasak bang in hun ana zangtei diam? Ahihkei
leh nuniang tongsuah douzoulou in haksa satak in hun ana zang diam? Ka
ngai mahmah mai a, ka khotuah petmah hi. Ka hihtheih omsun ka it Siamboi
a ding in niteng, hunteng in thumna kanei den hi.
Ka training na uh leng buaina omlou in tluangtak in ka
neitou zel uhi. Ka zohnang uh kha 3 lel omta chih ding in India leh
China kal a ki ngiktuahna pen puakzak in, alangtang in kidouna phuan
ahong hita hi. Niteng in sepaih hangsanten gam humbitna dinga hinna
pephal in gamgi lam zuan zungzung uhi. Tampi tak ten gam-le-nam a ding
in ahinna uh pia ua, kiknawnlou ding in ana pai masa uhi.
Kidouna hong huaise deuhdeuh in India in sepaihlam ah
kitaksapna nasatak tuak ahihman in kou training hun ding kha 3 omlaipen
suktomsak in ka om ua, ahunloupi in attestation parade ahon neihpih uhi.
Tuazoh in Arunachal ah posting ahon pengal uhi. Innlam ah suty paina
ding hun om mahmah lou ahihman in thadah tak kawm in ka post ah paiding
in kahong kisa ningniang ta hi.
Hucih laitakin dak hawmpan ka laithon ding ahong pia a, ka
etleh ka it Siamboi apan ana hi a, lunglen laitak a itpen apan laithon
mu chi'n ka lawmpa Lianpu bang sial zozen in kipaktak in ka hong a,
kahon sim hi. Ka itpen laithon himahleh kipahna sang in dahna,
lungkhamna leh kahna ahontun hi. Katusuk nokh a, ka mittui dan vuallouh
in ahong phul khe ziahziah tamai hi. Lianpu'n ka omdan kikheng ahon mu
a, lamdang satak in ka kiang ah ahong pai a, thu omdan ahon dong hi.
Bangmah genlou in laithon kapia a kasimsak hi. Laithon ah ka itpen in
haksa asak dan leh nuniang in tangval khat toh thagum a kitensak sawm
ahihdan ahon gen a, kintaka akiang ah vapai a, vapikhe dinga ahon sapna
ahi hi. Keilah suty paina ding van ah gah toh kibang ahihman in ka
lungtang ana a, ahaizou ding mah kabang hi. Kalawm Lianpu natawm in ahon
hehnep dingdan theituan lou in ka kah sung ka kiang ah phunlou paulou
in ahon tutpih den top hi.
Dah
in, kap in, mau mahleng ka kuankhiakna ding dak in hon ngaklou ahihman
in laithon natawm athukna ding gelh manlou in Arunachal gamgi lam zuan
in ka kuankheta uhi. Lampi ah ka ngaihtuahna apaisau khopmai, ka hinna,
ka sisan, ka itpen Siamboi haksatna thuak dingte ka ngaihtuah a,
bangziaka kon zui ding achih lai a phallou kahiam? Bangziaka hichitel a
honna it tu taisan kahia? Kakisik petmah hi. Bangmah lunglutna kanei
kei, ka lungtang sungteng Siamboi ka itna kia in a dim hi. Kalawm Lianpu
in ka haksatna thuak ahon theihpih mahmah mai a, kakipahna ding zong in
chiamnuih peuh hon genzel hi. Ka nuihpih khemkhem seka lah ka lungtang
tawng teng khasiatna mittui in apumtuam hi.
Ka post mun ding uh katuntak un, panmun ding kabawlpah ua, kou company chauh om kahih man un athawm hau huai mahmah hi. Panmun dingteng ka bawlzoh un duty ding kisep in ka post uh venbitna kahon panta uhi. Vangphathuai hia vangsiatna in honna ngak hizaw? Kalkhat ka om nungtan un leng kuamah in kuk e-kak e hong chikei uhi. Himahleh akal nihna, anithumni nitak dak 10 vel ding in duty pan galte hong pai uh ahi chi'n thau ahon khah hi.
Ka post mun ding uh katuntak un, panmun ding kabawlpah ua, kou company chauh om kahih man un athawm hau huai mahmah hi. Panmun dingteng ka bawlzoh un duty ding kisep in ka post uh venbitna kahon panta uhi. Vangphathuai hia vangsiatna in honna ngak hizaw? Kalkhat ka om nungtan un leng kuamah in kuk e-kak e hong chikei uhi. Himahleh akal nihna, anithumni nitak dak 10 vel ding in duty pan galte hong pai uh ahi chi'n thau ahon khah hi.
Kouleng
kintaka thou in ka galvan teng uh toh inn kong lam ah katai pawt uhi.
Gintakna lamteng bankap in sawt tak kaki kaptuah uhi. Khua hongvak
dingkuan in melmate hong dai thei khong uhi. Khua hong vaksiangtak in
kim-le-kiang ah siluang adim in ana om hi. Lawmte tampi in gam a ding in
hinna ana pia uhi. Sisan lum laitak in bangmah kaphawk kei hi. Ni ahong
sang hiaihiai a, ahong lum deuhdeuh toh kiton in ka taklam, kapang lak
nat in ahong na tenten hi. Lamdang sakawm taka ka et leh kapang lakteng
sisan in ana dim hi. Thautang in honkha ahi dinga, hong na deuhdeuh
ahihman in damdawi inn ah etkol ding in ahon pawkhia uhi.
Damdawi inn ah ahon en pah ua, kapang ah thautang tang ahihman in operation ahon bawl pah uhi. Ama adamtheih pahlouh man in kha thum vingveng lupna ngak in ka om hi. Melmak gam ah it tak a hon enkol ding omlou ahihman in ka thawmhau mahmah mai hi. Siamboi ka ngai mahmah mai a, ka kiang ah om a hon enkol himaileh aw... Ka chi vungvung phet hi. Ka laithon khakte lah adawnna khatle muh om nawnlou ahihman in kalungkham gawp in, ka nin kitel gawp hi. Ning kitel a lupna tung ah kaki pekpek nate ziakin ka liamna ma damtheilou hi.
Nikhat lungzuangtak in ka room tukvelh ah ka dak khia a, damdawi inn paam a park ah mite nuamsatak a omkhawmte ka en a, ka it Siamboi toh kipaktak a kalen khawmlai nite uh ka phawk suah rumrum hi. Kuamah phawk lou a, nuamsatak a midang poimoh vetlou a kalenlai nite uh ngai in ka biang ah danvuallouh in ahong luang suk ngiaingiai hi. Huchih laitak in nurse te khat hong lut in ka laithon ding ahong pia hi. Khutgelh apan in Siamboi gelh ahi chih kathei a, kipak mahmah lah bangthu a om dia aw...? Chih lauthawng giugiau kawm in ka hong hi. Tua laithon pen ka tanchin ka gen ma a kahon simsak pen ahi hi. Anuten phutluih a pasal neisak uh ahihdan leh amah utlou a, alupna puanteng toh zawng kawm a apasalte inn ah vakha uh ahih dan ahon gen hi. Hon ngailua ahihman a vapai a vapi khe ding in ahon sam hi. Na kasa mahmah mai a, leitung ah kakinepna tengteng abeita. Kei din lam-et bangmah a om nawnkei. Toupa aw bang dinga vangphatna kichi himhim kei dia siam a omlou ahia? Ka it teng leh kei hon it tu tengteng ka taanta. Toupa aw ka hinna lamai in chin ka kikou kheta hi. Bangchi om kahia chih katheikei, ka room ah mibangzah hiam honglut om uh chih bel kathei. Ahihhang in bangmah katheizui nawnkei hi.
Bangtan ihmu a, khawphawklou a om kahia chih katheikei. Ka khanloh tak in ka room omdan teng ana tuam vek hi. Kakiang ah kalawm Lianpu in ka khanloh hun ding ngaklahtak in ahonna ngakden hi. Kalawmpa kamuh phet in thil omdan teng kadong hi. Khawphawk lou a ka omziak in ICU ah koih a om kahihdan leh khakhat sung mawngmawng khawphawk lou a om kahih dan ahon hilh hi.
Damdawi inn ah ahon en pah ua, kapang ah thautang tang ahihman in operation ahon bawl pah uhi. Ama adamtheih pahlouh man in kha thum vingveng lupna ngak in ka om hi. Melmak gam ah it tak a hon enkol ding omlou ahihman in ka thawmhau mahmah mai hi. Siamboi ka ngai mahmah mai a, ka kiang ah om a hon enkol himaileh aw... Ka chi vungvung phet hi. Ka laithon khakte lah adawnna khatle muh om nawnlou ahihman in kalungkham gawp in, ka nin kitel gawp hi. Ning kitel a lupna tung ah kaki pekpek nate ziakin ka liamna ma damtheilou hi.
Nikhat lungzuangtak in ka room tukvelh ah ka dak khia a, damdawi inn paam a park ah mite nuamsatak a omkhawmte ka en a, ka it Siamboi toh kipaktak a kalen khawmlai nite uh ka phawk suah rumrum hi. Kuamah phawk lou a, nuamsatak a midang poimoh vetlou a kalenlai nite uh ngai in ka biang ah danvuallouh in ahong luang suk ngiaingiai hi. Huchih laitak in nurse te khat hong lut in ka laithon ding ahong pia hi. Khutgelh apan in Siamboi gelh ahi chih kathei a, kipak mahmah lah bangthu a om dia aw...? Chih lauthawng giugiau kawm in ka hong hi. Tua laithon pen ka tanchin ka gen ma a kahon simsak pen ahi hi. Anuten phutluih a pasal neisak uh ahihdan leh amah utlou a, alupna puanteng toh zawng kawm a apasalte inn ah vakha uh ahih dan ahon gen hi. Hon ngailua ahihman a vapai a vapi khe ding in ahon sam hi. Na kasa mahmah mai a, leitung ah kakinepna tengteng abeita. Kei din lam-et bangmah a om nawnkei. Toupa aw bang dinga vangphatna kichi himhim kei dia siam a omlou ahia? Ka it teng leh kei hon it tu tengteng ka taanta. Toupa aw ka hinna lamai in chin ka kikou kheta hi. Bangchi om kahia chih katheikei, ka room ah mibangzah hiam honglut om uh chih bel kathei. Ahihhang in bangmah katheizui nawnkei hi.
Bangtan ihmu a, khawphawklou a om kahia chih katheikei. Ka khanloh tak in ka room omdan teng ana tuam vek hi. Kakiang ah kalawm Lianpu in ka khanloh hun ding ngaklahtak in ahonna ngakden hi. Kalawmpa kamuh phet in thil omdan teng kadong hi. Khawphawk lou a ka omziak in ICU ah koih a om kahihdan leh khakhat sung mawngmawng khawphawk lou a om kahih dan ahon hilh hi.
ICU
ah khathum ka om a, kahong dam deuh takin room dang ah suan in ka om
nawn hi. Siamboi ka ngaihna beithei mahmah lou ahihman in a chang in ka
buai hun in ahon pha khazel hi. Psychologist te etkolna nuai ah kum khat
vingveng ka oma, atawp in ngeina bang pu nawnta chi'n damdawi inn ah
kumkhat leh a kim ka om nung in ka pawtsan ta hi. Ka Headquarter ah kava
ki report pah hi. Hangsan a record a om kahihman in bravery awards ka
dong a, 2nd lieut. a kaisansak in ka om hi. Sisan tam senglua kahihman
in katha chau a, ngeina bang thei nawnlou kahihman in Army sung ah kum 7
ka om nung in medical ground in pension ahon pia uhi.
Huchi'n kum tampi ka taihsansa Lamka vangkhua zuanin kahong paikik nawn hi. Lamka tun kik ding kaki lawp zah in ka lin mahmah hi. Siamboi koi ah a om dia aw? Chih ngen in ka lungsim aluah den hi. Mu udlua kahihman in omngei dinga ka gintakna Mata khua ah inn mun lei in tua ah kava tengtou ta hi. Himahleh kamuh ut pen kamu kha kei. Palal te natawm muhkhak in a omkei uhi.
Nikhat vengkhung lam ah kava vaktouh leh naupang nih puansetak silh in lampi kiang ana thaithai uhi. Lamdang sakawm tak in amaute kavanaih hi. Khat numei hi a, khatpen pasal ahi hi. Numeipen amel ka etchiang in tehpih khat kanei. Kaphu zot zozen hi. Ka itpen Siamboi mel asun mahmah hi. Amin ka dong a, kimboi ahihdan hon hilh in anaupen khupboi ahih dan ahon hilh hi. Anu-le-pa min ka dot leh, apa min Khualpu hi a, anu min Siamboi ahih dan ahon hilh hi.
Naupangte unau ah kalung alut gawpta, ka om maimai thei nawnkei. Ka itpen' tate ahihman un kangaina mahmah mawk hi. Anu-le-pate' koi ah om uhiam chih kadot tak in amit ah khitui hong luang khia in apa pen in anaupa ngek lai a zungolvei a sihsan ahihdan leh anu un nikum a, damlou a sihsan in, huainung amau gel kemtu ding omlou a, muh peuh ne in om ua, kuaman ngaihsak lou uhi. A inn-le-lou te uh atanau te un tang ua, a unau ua kholak ah vakthaap mai ding a nohsuah ana hi uhi.
Aw ka itpen mel muthei leng maw... Siamboi aw kon itna dang ngeilou hi. Nang ngai a lungzuanga huibang kamau na dang ngeilou ding hi. Kei din zuanna dang ngeilou a, ken chikchiang konngilh zou dia? Kha kapham dong lunglai hong ngilhlou ding hing.
Unau te ka inn ah kapi a, ka itpen ta ahihman in. Amah melmuhna hikawm in duat tak leh ittak in kakemtou hi. Ahong let deuhtak un ka tanchin kimtak in kahilh hi. Amau leng ahon ngaina mahmah mai ua, amel uh kamuh teng in ka it Siamboi mel mu tuk in kaki ngai a, kathuak anuamtuam mahmah hi. Tun teektak kahita a, amau apa taktak bang ua hon en in a tate uh natawm in apu taktak uh bang in hon en ua, thumang un it tak in ahon enkol den uhi. Tun teektak hitamah leng niteng hunteng in Siamboi ka itna thak deuhdeuh in ka hunlui, Siamboi toh nuamtak leh kipaktaka kazat khawmlai nite uh kaphawk in kangai thei mahmah mai a, kei din ka damsung in Siamboi ngaia ka zuanna dang ngeingei loua, niteng hunteng in thak deuhdeuh hi.
~BEITA~
Huchi'n kum tampi ka taihsansa Lamka vangkhua zuanin kahong paikik nawn hi. Lamka tun kik ding kaki lawp zah in ka lin mahmah hi. Siamboi koi ah a om dia aw? Chih ngen in ka lungsim aluah den hi. Mu udlua kahihman in omngei dinga ka gintakna Mata khua ah inn mun lei in tua ah kava tengtou ta hi. Himahleh kamuh ut pen kamu kha kei. Palal te natawm muhkhak in a omkei uhi.
Nikhat vengkhung lam ah kava vaktouh leh naupang nih puansetak silh in lampi kiang ana thaithai uhi. Lamdang sakawm tak in amaute kavanaih hi. Khat numei hi a, khatpen pasal ahi hi. Numeipen amel ka etchiang in tehpih khat kanei. Kaphu zot zozen hi. Ka itpen Siamboi mel asun mahmah hi. Amin ka dong a, kimboi ahihdan hon hilh in anaupen khupboi ahih dan ahon hilh hi. Anu-le-pa min ka dot leh, apa min Khualpu hi a, anu min Siamboi ahih dan ahon hilh hi.
Naupangte unau ah kalung alut gawpta, ka om maimai thei nawnkei. Ka itpen' tate ahihman un kangaina mahmah mawk hi. Anu-le-pate' koi ah om uhiam chih kadot tak in amit ah khitui hong luang khia in apa pen in anaupa ngek lai a zungolvei a sihsan ahihdan leh anu un nikum a, damlou a sihsan in, huainung amau gel kemtu ding omlou a, muh peuh ne in om ua, kuaman ngaihsak lou uhi. A inn-le-lou te uh atanau te un tang ua, a unau ua kholak ah vakthaap mai ding a nohsuah ana hi uhi.
Aw ka itpen mel muthei leng maw... Siamboi aw kon itna dang ngeilou hi. Nang ngai a lungzuanga huibang kamau na dang ngeilou ding hi. Kei din zuanna dang ngeilou a, ken chikchiang konngilh zou dia? Kha kapham dong lunglai hong ngilhlou ding hing.
Unau te ka inn ah kapi a, ka itpen ta ahihman in. Amah melmuhna hikawm in duat tak leh ittak in kakemtou hi. Ahong let deuhtak un ka tanchin kimtak in kahilh hi. Amau leng ahon ngaina mahmah mai ua, amel uh kamuh teng in ka it Siamboi mel mu tuk in kaki ngai a, kathuak anuamtuam mahmah hi. Tun teektak kahita a, amau apa taktak bang ua hon en in a tate uh natawm in apu taktak uh bang in hon en ua, thumang un it tak in ahon enkol den uhi. Tun teektak hitamah leng niteng hunteng in Siamboi ka itna thak deuhdeuh in ka hunlui, Siamboi toh nuamtak leh kipaktaka kazat khawmlai nite uh kaphawk in kangai thei mahmah mai a, kei din ka damsung in Siamboi ngaia ka zuanna dang ngeingei loua, niteng hunteng in thak deuhdeuh hi.
~BEITA~
©Siamsinna leh Vakiangbu
Comments
Post a Comment