KUMTHAK CHIBAI !!!

By~ ZM Tonsing

Kumbul a dingpan i kisak leh January kha bang ana bei man zel, February bangle a kimkhat bang tungnuam dilam ana hi nawnman khanglang. Tua kia hilou, 2013 Krismas tunna di kha 10 kia in samta! Hilele, simtute’ tengteng na vek un ‘2013 Kumthak Chibai!’. Eh! 2012 Krismas Chibai le k’on buk khakei, “Krismas Chibai!”

2012 kumbul a i dinlai in hiaitan dam a, hiai bang hunhoih leh manpha te mu diing in lam-etna a kinei kei. Himahleh, A vualzawlna leh hehpihnate ziak liuliau in i mu a, i kipak a ahihhang in kipahthu gen di ahih lamlam le phawkkhalou, ahi di mah bang in i ngaihsun khasek ua hi ven! Nupi khat in a thumna ah “Toupa Pasian aw, a tuung in mihing na bawl a himahleh tuchiang in kou-le-kou ka kibawl ta uh” achi, chih dan piansim in ei hihtheihziak, pilna leh siamna ziak khawng sakkhak baihlam mahmah hi.

Ahi a, nikum(2012) pen mihing i tuam dungzui in i zatdan leh vualzawlna i don dan u’leng kituam ding hi. Khenkhat-te a ding in salam leh khalam a kalsang tawina, vualzawlna thupitak i don kum ahi ding a; khenkhat leuleu a di’n bel salam leh khalam a niamkiat kum, it-le-ngaih tamtakte toh hiai khovel a kimu ngeinawnlou diing a i kikhen kum, kum kipahhuai loutak leh sawttak leng ahi kha ding. Kou, a diak a Kangkap khomite’ a di’n bel Kangkap khua a ‘Tanchinhoih’ lutnung a kum 100 chinna(kum) ahih man in kum kipahhuai, mangngilh theihvuallouh kum ahi hi.

Ngaihtuah ve, Centenary lopna dia mikhat in Sial 7 tak thoh chih lemlum tel, tazou!. Sial 7 leh Bawng 2 ngut gou, zing leh nitak a akhual-atual (Kangkap khomi ngen chu hi veve) in sa kinekhawm zuazua gige! Huai banah, gari tuamtuam dangte bel hougawp ahih man in thutuam in koih ni in, hilele, Kangkap khangthu a dia chiamteh tham, a masapen (ka theihkhelh keileh) di’n Kangkap khua ah Bus tailut zanzan maimah! Nui keive, nidang a leenna khawng in le bohsek eingal!. Salam thil a ngaihtuah in zaw Zodawn tawngpek, lamlian le tunlouhna mun a ding in thupilua chih kia in le a genlang zou kei, ‘Tazou! Nak thupi lo-zen a!’. Himahleh, tua salam i gensang a thupi zaw tuh a GOSPEL ahi. Tua Tangthupha in khalam a a honsuah taksak kia hilou in salam ah leng hon suaktasak in hon domsang a, mite’ neih leh zatte zang theisam ding in hon domsang a, pilna-siamna lam chi tuamtuam ah honpi a, salam thil a ngaihtuah a thupi i sak mahmah te leng ‘TANGTHUPHA’ ziak ahi vek uhi. Huaiziak in, Thupina, Pahtawina leh Minletna tengteng Pathian i khusak ahi.

Lehlam ah, lungkimna omlouhna gam a teenglai ihih man un hichibang hunhoih, manpha leh nuamte zaw hunlui ngaihna puanbang thaksak tulel abang uhi. Biakinn sung ka lut a, nidang a ka Nu tutna mun sek maimit ka suan a, ka Nu ana tu di ka sak leh atutna mun a hawm! Ngaihtuahna a saupai nuam tel. Kholai i vak a, nidang a lawmta, lungdeih libang ching a singdang englou nunnuam laitual ngabang lenlainite maimit laukha ah honglang lou theikei. Kipahhuai lua hinapi’n mitsan gialgual a omkhak hunton tam mahmah mawk hi. Theibang sen umbang ka kholhpihte koikuam a sawlbang heina hi u’hiam?? Himahleh, ka kipahna mahmah khat bel neulai a ka lawmhoih, a nuam-haksa hun a leng kitaisan ngeilou, omna mun leh mual banah sep-le-bawl tuamziak a kumbangzah hiam kithuah khanawnlou phetlou, muhleng kimu khalou a ka om nung un Tangthupha tungtawn a damtak a mel kimu a, A mah phatkhawm thei a ka om man un kipahhuai ka sa petmah hi.

Khaih! Kangkap Gospel Centenary thukia i gengen leh thildang genmanlou di i bang! Nikum Krismas, 31st Nitak leh Kumthak 2013-te mi bangzah mawngmawng in i gui khatel d’uam maw??!! Diangdiang tel! Nitak pawt, lampi a pai lawmta bangzahhiam singkhuah tawikawm selsol, hoi diangdiang leh hang lala kawm a i nung a hongpai ua le zaw hongkhet puakbuk khak d’uh nak eng lauhuai lo-tel ahih bang! Numei te le domsan tuankei uh! Eilawi in hichi bang hun nuam chih dandeuhte neitawm lo-telna hang a, i neih sunsun te u le a tun dikal ngaklah huai khol hetlou, i minam a dia ‘supna liantak’ hilo-tel in chin!

Laigelh louhna bangle sawtsim; gelh di tamlua hinapi’n gelh dipen kitheilou mawk! Heutute’n etsakna a hon gensek uh, “Tem nei inla, zat ngeilouh leh taat ngeilouh in koihdap mawk le chin tui-ek dia zattaak louh di ahi” achih khawng uh lungsim ah hongsuak veen. Nak dik lo-zen a! Huan, Pathang @Kimbawi’ pa’n, “Tulai a i thangsak mahmah uh facebook i khoihzek leh laisim lah kipeihlou, a gelh lah kipeihlou” achih kha zuau ahi kholkei chih k’on taklang keuh de.

A danglai a laithon lawmte toh kikhak tuah sek, laithon bangchu lu-kham nuai ah thang zengzung maimah! Laithon gelh, gelh di i maimawh sim chiang a “gelhgelh di chile’ng hun, laitui leh laipuan in hon daihlou diing ahih man in gennop tampi toh hunsak phot maini” chia kizou zel dan ahih chu.

Nu, ka kipak 

5/02/13(01)

@Siamsinna leh Vakiangbu