ITNA A HUN HI
By ~ Vz Vualnam
Itna na hon hilh a
Huatna na hon sinsak
Ngaihdamna n’on hilh a
Phuba na hon sinsak
Vaak na hon lak a
Mial ah na hon omsak
Huchi’n hiai leitung
A hong mial semsem
Chikchiang in vaakna ni’n
Mite hon taan ding hiam!
Itna hon lak in
Itna hon sinsak in
A thilhih theihna thupi
Leitung miteng in mu hen
Huatna, phuba, mialna
Natna, kialna, tawlna
Itna’n hawlmang hen
Itna’ thilhih theihna khut in
Michih hong lawng hen
Miteng in hiai chia’n uhen-
Itna a hun hi!
Ke’n hiai chian nuam ing-
Itna a hun hi!
Bang di’n thagum i suang dia
Kamneem in a zohtheih lai in
Bang di’n phuba i zong dia
Ngaidam le’ng, dam chiat le’ng
Bang di’n i huaiham dia
Hawm dial le’ng, tang chiat le’ng
Enna-thiikna bei dia
Veng-le-paam dialdial ding
Chi-le-kuang diamdiam ding
Vaakna ni hong suak ding!
©Siamsinna leh Vakiangbu
Comments
Post a Comment