PHATNA LEH PAHTAWI NA AW.

By ~ Tha Suante

Mihingte a hong bawl Pasian zong phata pahtawi ding ut hi. Tua mah bangin a bawl mihingte zong phata pahtawi ding ki-ut ciat hi.

Phatna leh pahtawina aw pen mihing ngeina a piang aneu alian in zaknop kisa in,aza mite heh loin lungdam zaw ciat hi. Hongpkat khem ahi cih ka theih hangin hong phat ahih manin ka kungdam veve hi. Phatna leh pahtawi na aw sanga zak tawldam zaw aw tamlo ding hi. Phatna leh pahtawi na aw azak nuamin ka lungsim tawh kituak mahmah hi. Phatna leh pahtawi na aw ka lungdampih bangin, midangte in zong lungdampih dingin ka um hi. A lungdampih lo a om zenzen leh mihing ngeina ahihlohna hi ding hi.

Mihing in aneih thupi kisakna, kihihsakna,hoihzaw kisakna, semzaw bawlzaw kisakna,pilzaw theizaw kisakna,sum leh pai muzaw lamzaw kisakna,huhzaw kemzaw kisakna, kei hizaw deuh ing cihna lungsim hangin, innsung,khosung,gamsung, minam sungah phatna leh pahtawi na aw kiza ngeilo na hi zaw gige hi. Mihingin aneih kisial pih ding, kei gina zaw ing cihna hangin gam tampi mangthangin, minam tampi mite khutnuaiah om in,innkuan tampi kisia in,nupa tampi kikhemin,unau pata na kithei khial uhi. Mihing nuntakna sungah siatna a piangsak sehthum suah sehnih pen kihihsakna, kisial nopna,kei hoihzaw ing cihna hang ahi hi. Tua ahih manin innsung, khawsung,gamsung ah phatna leh pahtawi na aw kizak theihna dingin lungsim kiniamkhiatna mah kisam zaw hi.

Na nuntakna ngaihsun dih ve, hong phat leh hong pahtawite sangin apilzaw, asiamzaw, kampau kilawm theizaw dingte kidek zo nasa hiam? Aw gensiatna,kosiat nate ah kamtam in, i aw ging lua lua napi in,phatna leh pahtawina ah kamtam in i aw gingzaw hileh a zadah om hetlo ding hi ven maw ? Aw!Aw!!! Kei mahmah zong mothak gamta khial den bangin mite phata pahtawi man ding hi napi in, ka phat man lohpi e !! Phatna leh pahtawi na aw pen aphat a dingin supna om peuh mah lo,phata om pen a dingin suangmanpha zahin manpha ahi hi. Phatna leh pahtawi na aw manphatna kisut hileh,"Nuntakna thu hi," cileng biakna makaite in hong talsawn sam ding hiam? Kamneem,kamkhum pen sum tawh kilei hi hetlo napin a manzah kiseh theilo hi. I hoih loh nate aw ging lualua tawh i kithu hilh sangin phatna leh pahtawi na aw tawh kithalopsakna in azah tampi in hoihzaw hi. Khangmasate in zong,"Tongdam ngiingei no in gual vaho leng, Lawm aw hong cilo ding ten zong lawm aw hong ci ee.........Ngaih aw hong cilo ding ten zong ngaih aw hong ci e," na ci hi.

Phatna leh pahtawina aw mihing a dingin lungnopna,cidamna zatui,sep leh bawlna ah hong thalopsak aw ahih manin khantohna piangsak hi. Midangte phata pahtawi theite pen khasum sang lo a hong kem leh hong cakte kici thei hi. Phatna leh pahtawina aw kizak ngei lohna ah thanop leh khantoh ding haksa hi. Phatna leh pahtawina aw kizak ngei lohna ah ki itna, kihehpihna,kituak diamdiam,sep khop liailiai cih om loin,khangto cih om ngei lo hi. Mihing nuntak, gamtat,sep leh bawlna ah hang santaka phutngamna dingin,phat na aw,kithalopsakna aw,a hong tosawn ding aw kisam mahmah hi. Kigensiatna,kiphunsanna leh ki uk luatna sangin hoihzaw hi. I deihsakte i thuhilh ding ciangin a citlohnate gen masa louin,ahoihna citna omte gen masa in phatna aw zasak masa leng hoihzaw ding hi. I sihkhit ciangin i hoih nate kiphata i gengen sangin, i damlai in kiphatin,kipahtawi hanciam zaw hi. Gamdai a khualzinte in mal Aksi bek kisam loin tuisik zong kisam uh hi. Tup leh ngim tangtun na dingin hong thalopsak ding phatna leh pahtawina aw kisam hi. Lungsim takpi toh mi i phat ciangin kam khamsak ci kei ni. I theihloh kalin i khualzinpihte tungah na lianpi a sem ihi hi.

Phatna leh pahtawina aw in mi a lungnopsak bangin gensiatna, kosiatna leh mawhsakna in mi siasak thei hi. Mi khatpeuh a hoihlo lam i gen ciangin mite mai ah a meivak asuh mitsak ihi hi. Ciamnuihna kigen a dik mahmah thu na om hi. Ngasa zuak leh a lei ding nu kiho na hi. A lei ding nu in phenphen in a lei ding mulo hi. A zuak nu in,"Nang zong cih leuleu in na koi lailai hiam phenin nam leng a namsiatna om ding hi,"acih bangin, Pasian Tapa nangawn gen siatna leitungah gensiat bei leh hoihkim kuamah omlo hi. Innsung khosung, gamsung, minam in, "GENSIA," kisam loin, "PHATNA LEH PAHTAWINA AW,"kisam zaw hi.

Phatna leh pahtawina aw azak nuamin,a tawldam hangin, maitang phatna kiza nuam loin, hehna,thangpaihna,muhdahna leh simmawhna in kileh lak thei leu leu hi. A hun leh amun toh kituaka i kiphata,kipahtawi siam ding ahi hi. Kei bang Q neilo BP sangte a dingin phatuam mahmah hi. Khawl tui ek sathau nuhleng a hat kik bangin lungsim thazawm leh thaneemte hatkik na dingin phat na leh pahtawina aw toh tha kipia hi. Tua manin innkuan nuam, kho sung nuam,gamsung nuam, minam sung nuam, apian theihna dingin phatna leh pahtawina aw bek kisam hi. Lungsim kiniam khiatte bekin mi phatin pahtawi thei bek hi.

1. Phatna leh pahtawina aw mihing ngeina a piang aneu alian in zaknop kisa hi. 2. Phatna leh pahtawina aw aza mite heh loin lungdam zaw hi. 3. Kamneem kamkhum pen sum toh kilei hilo napi in a man zah kiseh zolo hi. 4. Phatna aw ging sanga zaknop zaw,tawldam zaw tamlo hi. 5. Phatna leh pahtawina aw pen lungnopna,cidamna,sep leh bawl na ah khantohna ahi hi. 6.gensiatna,kosiatna sangin,phat na leh pahtawina aw aza mite a zadah omlo hi. 7. Phatna leh pahtawina aw kizak ngei lohna ah ki itna,kihehpihna, vaihawm liailiai,sepkhop diam diam khangto cih omlo hi. 8. Phatna aw in mi a lungnopsak bangin gensiatna in mi siasak hi.9. Mite in gensia kisam loin, phatna aw kisam zaw hi.

10. Lungsim kiniamkhiatna bekin phatna leh pahtawina aw zang thei bek hi. Beita.

©Siamsinna leh Vakiangbu