SAKMIN NGAIH

By ~ Kattie Mawite Chiamnuih khat ah, "David toh Joseph in zu va dawn unchin, a zuzuaknu min Mary hizomah" chi in a kigen a. Bible a a min kibatpihte toh amau I tehkak leh, a omdan uleh a khohei uh a kibang din a gintakhuai hetkei. Eimite hi, min I ngaina ua, min hoihlou deuh bangle deihlou in min thupi taktak I kiphuak uhi. I minphuahdan uh namdangte a toh ka tehkak chiang in hoih kasa mahmah. Khang kisuina bang in a kizangthei a. Kuahiam khat I kikan a, a mintawn I gen chiangin, "Eh, ani phuah a hi maw?" Ahihkeileh, "A papi phuah ahi maw?" Chih bang in I genthei uhi. Ahi a, min hoih pipi I kiphuahsakte uh, a hoihna bang I pokhe zoukei kha naksek uhi. Tulai in aneu-a-lian in fone I nei chiat a, huai ah kuahiam toh kam mahmah a kihouna sang in, facebook leh whatsapp group chihte kithang in, group bang leng a za a sim I bawlkhe teltul uhi. I group bawlte leng min maimai I phuak nuamkei a, min thupi kuai taktak I phuakkhe venvon mai uhi. A hoihlua. I unaute'n, unau Paitete'n heutu din social media a zang uh a hon chi ua, a dikna chiang om kasa. Huchih kawmkawm in, group a tam tuk in, ahihkeileh I group minte uh a hoihtheih tuk in thuhoih la hoih gen in kikum hi maizen leng bangzahta in I phattuampih di ua? Group min hoihtaktak I phuak ua, a sung a houlimnate lah laktak di leh khanna di mawngmawng omkha mahmah lou chih bang hunkhoptak (a tamzaw lam himaithei zomah) om hi. Khovel a mihingte'n a hon theihna ding ua uthuai penpen leh min ngaihpen kasak tuh *KHRISTIAN* ihihna a hon theih ding uh ahi. Khovel ah sahkhua simsenglouh a om a, huaite lak ah Pathian hing bia omsun tuh ei Khristiante I hi uhi. I gensa mah bang in, I min, mi hon theihna ahihtoh kiton in I sung ah bang a mu uale? A bultung a chiamnuih kigente bang lel I hikha duam? Ngaihtuah tham ching mahmah hi. Khristian, Jesu Khrist nungzuite chih min I pokhe vengvong ua, ei mimal hinna in Khrist mel a dawksak kha hia? Ahihkeileh, whatsapp leh facebook group I gente mah bang a a min kia hoih in a sung a Khrist batna mawngmawng neikha lou I hi hia? Teddim Road zul ah dawr ngak in ka omkha a, huai ah ka dawr vengte, Hindu sahkhua zui, ei theihdan in Vaite chini, huaite toh ka kimaingal mahmah ua. Ka lawmnu toh, 'nou pathian lem khawng na biak uh.Kou Pathian khawng na be kei di ua. Koua chu Pathian hing taktak a hi' chi khawng in ka gen kha sek uhi. Huaihun a hon dawnna, Khristian te a dia zahlakhuai kasak mahmah tuh, "Nou Khristian na kichi ua, talab, kuva, tuibuk chihte khawng muam, zu khawng dawn zomah lai" chi in nui vevu in a hon dawngkik zel. Thudik mah gen ahi. I min a hoih luat hang in a mite'n Khrist I nungzuihpa' melvak I liahkha sek zaw uhi. Poi mahmah chihbak gen di a tam hetkei. Jesu'n *Toupa Toupa hon chi nazong vangam a lut kei ding* a chi a. Ahihleh, ei Khrist' min pute koi ah I paikha di ua? A si zen napi a, hing min pu ina hikha hia? Khrist nung zuikha lou pi a, *KHRISTIAN* min ana pokha ihi hia? Pianthakna leh Nungzuihna omlou in hiai sakmin lel in bangtan hon tun ding a hia? I sakmin lel ngaih a hikha hiam chih kivelchian thak chiat ni. 〰〰➰〰〰 ©Siamsinna leh Vakiangbu