LEITUNG LEH BIAKNA.

By ~ Tha Suante Tuhun leitungin,"Evedence that a verdict," ci ta hi. En bang ci? Biakna icih koi-ah pan a, koi-ah tawpsak ihi hiam? Leitung toh bang tan kigam lasak ihi hiam? Lai Siangtho pen Pasian lamlahna toh hong kipia leitung a zat ding ahi hi. Kha gam kitung nailo hi. Tawm nung kik leng. Biakna in mihing lungsim laigil kisapnate kipsakin, gamtat kilawm hilhin,ahih hangin thuman leh phatuam ding omte thu-up (Doctrine) zangin a khakcip hi. Kithupi sakin itna themcik toh pai in, kim leh kianga thu kiselte bang hi hiam?? Bangci phattuam ding hiam ci loin, mihing lel hive hang, Pasian thusim eite sut zawh ding hi kei cin kihilhin, tua in i khantohna ding hong dal hi. Lungsim cim tawh ngaihsun loin,a hi lo lam kha thu a i ngaihsut a kitel phalote thupi sakin,tawldam na bang hiam a hong pia mah hi. Tua pen phatuam lua lo hi. Mihing sia leh pha theihna in, na hoih leh phatuam ding zawngkhia in, tua pen biakna in leitung vai in namu in, kha thu in na ngaihsun lo hi. Khristian biakna sunga omte in, leitung hoihna ding thugen in,nasem in, a hoihna dingin a puahpha ding ahi. Gospel thu bek hi loin, mite kisapnate, mihing manphatna thei in, a thupi sim ding ahi. Leitungah kha thu leh a mangpah ding leitung nate kikhen thei taktak lo hi. Biakinn a khami mahmah ahihna a nuntakpih a innkuan, u leh nau,innsak innkhang, khua leh tui in a phat tuampih ding ahi. Ahoih sepna tawh khami hih i sawm ding hilo hiam? Ahoih asem theilo ding bang lianga kiniamkhiat ding hi loin, a hoih sepna tawh khami hihna neih i sawm ding ahi. Robert Raikes in nipi sang a patzia zong hibang ahi hi. England ah naupang kum cinglote in factory ah na semin, mi cimawh tam hi. Tuate in nipi ni in nasem loin, khawsung ah vak mawkmawk uh hi. Tuate Raikes in kaikhawm in, annhuan buk khatah kikhoppih hi. A thulu in,"Khut siang ding,mai siang ding, sam hiat a phek ding," cih hilel hi. Tua bangin nipi sang na kipan hi. Hih bangpi mahin biakna sang tung i kici ding hiam? I san lohzia kitel mahmah hi. Tua bangte sut sese loin ahi bangin sangin, zuileng hilel icih ciangin dik i kisa tuan kei hi. Pasian thu sut sawmte leh theih haksa leh lamdangpipi a khatangte, nasemte theih sawm a sutte pen," Pasian thu dausak, leitung pilna tawh sin sawm," icih tawntung,leitung teng lai ihi hi. Lai Siangtho leitung mite zat ding a hong kipia ahi hi. Leitungah si leh sa tawh i om lai hi. Kha gam kitung nailo hi. Mihing in leitung na a muh leh theihte lo in bang mah thei in tel zo lo hi. Jesu in zong thu agen ciangin leitung nate mah tawh na hilhcian hi. Tua manin ama pianzia mihingte in a theihna dingin,leitung pianzia tawh kituakin na nasem hi. Tua ama mel a thei ding mihingte pen sia leh pha theihna pia hi. Tua tawh Pasian pianzia, kha thu man leh manlo na exam theih ding Pasian in na phal hi. I thutawp na ah, Kha thu man leh manlo na Exam ding na phal ici hi. Pasianin leitung hong koih lai in, leitung pianzia bang lo deuh a khalam kitaitehna ineih Pasian deihna mah hiding na um hiam? Biakna sung kikhum cipin, kha thu a ingaihsut theihtel haksa leh lamdangpipi a khatangte,nasemte sutcian ngam loin,hang taka dalte Pasian deihloh gen bang liangin i gensia hi. Tua bangin mihingin lamdang i sakte hong maingal deuhdeuh in, biakna paizia hong suak hi. Tua in mimal leh pawlpi bek siasak loin, a gam pumpi hong lingsakin, a deihhuai lo na tampi hong piangin, i minam hihna tawmtawm hong ne in, a hong siasak hi. A gam pumpi in Pasian thu i luansakzia manlo in,biakna pen kha hilua in i ngaihsun hi. Mihing pianzia tawh kigamla lua bangin ngaihsun in,mihing kihi lai ahih manin a balance hong buai hi. Tua ciang in mihing zong kihi nawn lo, mihing pianzia, ngeina pel a nuntakna pen Pasian thu a sanna bangin kingaihsun hi. Pasian tawh kikholhna,kihonate mihing pianzia banglo deuh ding a i ngaihsut man hi ding hiam, gupkhiatna thu mi mawl penin zong a sam ziau thei dinga kibawl puanthuah zialliangin giah pihin, a thu ngaih kulin, tua bangin zong i tel zo kei lailai hi. Biakna pen leitung mite zat ding a hing kipia ahi hi. Leitung a avanglian mahmah mihing lungsimin a ngaihsut theih dinga hong koih, mihing pianzia tawh kituak ding a bawl ahih lam phawk ni. Pasian, mihing ngaihsut na in a ngaihsut batloh a om, hong kiniamkhiat in, mihing bangin leitung ah hong teng hi. Leitung ngeina bangin hong nungta in,eite tawn hong om khawm hi. Tua banga leitung leh biakna i tuam luat manin mite in biakna huangsung ah nekguk takguk ding utlo uh hi. Leitung vai ah kisuanlahna peuhmah om loin negu lel uh hi. Biakna min tawh ahih noplohte uh pawl dang min tawh hih ziahziah lel uh hi. Himah lo a hia ? Pawl dang min tawh hih ziahziah lel cih ah i tawp hi. Tua ahih manin isut theihloh leh theih zohloh khempeuh kha gina lo, dawivai a ngaihsut pahpah ding zong hilo leuleu hi. Leitung i nuntak sungin leitung pianzia tawh kituaka sutkhiat theihloh taktak omlo hi. Tua pen mihingin Pasian piak pilna zangin sutin, hilhcet a sawm ding ahi. A hilhcetna a theih nai kei leh zong a hilhcetna om ding hi cih a up ding ahi hi. Jesu etzia na liberal mahmah aive. Judah biakna lenkip mahmahte hunin leitung hong teng hi. Sabat ni a tan mahmah uh, bang mah semlo, vangik neucik nangawn a lik ngamloh ni-in, khut leh khe zaw damsak hi. Moses thukham leitung vai suaksak hiam? Min daisak hiam? A kicing sak dinga hongpai hing,ci hi. Siampite bekin a nek theih ding Annlum David leh a lawmte in ne uh hi. Sabatni a kibawlna pen mihingte a ding hi a,mihing pen Sabatni a ding a kibawl hilo hi,na ci hi. Sabatni sang mihing thupi na,let zawkna na gen hi. Pasianin leitung ngeina ahi lo deuhin, mihingte tungah nasem ngeilo hi. Mihingte kiangah a kihil ciangin, leitung pianzia tawh kituak ding a gelsa,a bawlsa tawh kituak in na sem hi. Lai Siangtho gelhte in amai hun leitung tawh kituakin Pasian kihilna amuhte uh na gelh hi. Amau hun theihna mawlzia bangin- leitung a om na ngei ah omden in, tanglo, ni saklam pen suakin khanglam tum hi cih theihna, ngaihsutna hunlai hong gelh ahi hi. Tua ahih manin tuhun leitung tawh kituak nawnlo na om thei ta hi. Pasianin na khempeuh bawl thei hiven, hihte khawng ama a dingin a haksa om lopi cih tawh hi thei lo hi. Leitung pianzia a bawlsa bang in, husang khempeuh in huihsiang kisam leh si ding cih thei hi. Tua ngeina a bawl tawh kituak loin na sem ngei lo hi. Mihingte hong gupkhiatna dingin Pasianin a tokhom tung panin hong maisak ziau thei hi. Ahih hangin thuciam na tawh kituak in a Tapa hong sisak sese hi. Pasianin ahun toh kituakin mite tun na ciangciangah na hopih in, kitel lo cih bang om ngeilo hi. Tua Pasian nasep nate mihing mawl lai in lamdang leh ngeina banglo deuh sakna neiin, hilhcet zia ding zong na thei lo hi. Tua bangin Pasian vangletna na mu in, pilna siamna hong khangto deuhdeuh in, mawllai a sut siamloh leh hilh cet theih lohte hong hilhcianin a hong sutkhia uh hi. Mi mawl ngaihsutna panin Pasian vanglei na kimu thei in,mipil leh siamna khangtote etna panin zong kimu thei hi. Pasianin a vangletna sutkhiat zohloh ding hih leitungah a koihte pilna hong khangto zelin, na mikhia zel hi. Tu laitak a lam dang i sakte zong leitung ngeina tawh sutkhiat leh hilhcet in hong om to zel ding hi. Lai Siangtho gelh hun lai in, Helicopter in va leng leng, Dawi hiam, sikha hiam hongsa ding uh hi. Tua hun toh kituaklo lua ding ahih man in. Leitung pianzia toh kituak loin na kihil ngeilo hi. Ahih leh khatan lamdang deuh, a hun toh kituak lo luate, biakzia tuan deuhte, mihing pianzia toh a kituak lo luate, Pasian kiang pan mah hi ici ngam diam? Kha Siangtho in kitel mahmah leh pilhuai takin mi na ompih in, buai ngeilo hi. Leitung na kiselte,a lamdang nate, leitung ngeina toh mukhia in, Pasian vangletna a kimuh laiin, en a lamdang a tuam deuh gencet theih lohte ah khalam i kitaiteh, i phawkloh kalin bu na bawl khin hi. Mengmuhna thupi simna, kam sang thupi ngaihsutna, a tuam deuh a kha tangte in inuntakna hong thuzoh mahmah hi. Hihte pen thukizakna zaknopsak leh mite kikupnop pente hong hita hi. Hih thu ah a kinuihsan zaw ding i om tuan kei hi. A nuihsante in zong khalam i tehna formola in tualam mah na naih hi. Na khat peuhpeuh ah a uang deuh a om ngeina mah hi maw.(beita) Lai at na masa thucing lo," Evidence that demand a verdict,"cih ding hi. Demand kimang ngilh hi.(Hih leitung khantohna a phazo lo hi mawkta ing ei. Khangnote takkheh) A tangpi i lungsim a kibat kim lai in, a uang deuh a hong piang lai hi. Mipil misiamte bawl damdawi bang dawivai a ngaihsun bang hong om hi. Jesu leitung hongpai laiin a nasep tuamtuam sung pan khat ahi hi. Dansak na tawh kisai a lamdangpipi hong om hi. Tuate kitak bawla,gensiate, Khasiangtho gensia bang liangin i ngaihsun hi. Damsakna toh kisai in,Khristian biakna sung bekah a om hi loin, Hindu,Muslimte sungah zong a l tam mahmah ahi hi. Kha gilote nasep na sungah zong damsak theihna om hi cih i phawk ding ahi. Damsakna khempeuh Pasian pan hi,kici khin ngam lo hi. Jesu in biakna ngeinate sangin, mihinpihte thupi ngaihsut zaw dingin hong deih hi. Laisiangtho pen Pasian lamlahna toh hong kipia,leitung mite zat ding ahi hi. Biakna pen leitung mite a ding kibawl hi a, mihing biakna dingin kibawl lo hi. Biakna leitung mite a ding hi. BEITAKTAKTA ©Siamsinna leh Vakiangbu