LUNGSIM LEH AW TOH TOUPA PHAT NING.

By ~ Mary Naulak "Ka hinna aw Toupa phat inla, ka sung a om tengteng aw, a min siangthou phat in. Amah lah a thupi mahmah ngal a..." Nidang lai in I pi-pu te dawi leh kau bia in mawl tak in ana khosa ua himahleh Pathian in a hon it luat ziak in tuipi gal a pat a tangthupha hong puak in sawt lou cik in I gam a zel suak ta. Huai a pat in I gam in lam chituam tuam ah khantouhna I nei ua, a bik in LAA lampang ah leng a vualzawlna thupi tak dong in ei Zomi te lak bang ah leng laasak siam kitam petmah ta hi. Mun tuamtuam ah om in foreign tan bang leng I lut banta ua kuamah I phalah tuan kei uhhi. Hiai bang a nam niam, kuamah phawk phak louh te, nam mangthangte hi ding lai a hon dopsang na ziak in thupina leh pahtawina tengteng Pathian I pe masa hi. Awle, I gen ut pentak ahihleh, Pathian in a siamsa sing leh lou te leh ganhing cituam tuam te'n ki dam hetlou a ahihtheih na zahzah ua siamtu a thupi na a phuang lai ua bangziak a ei amah batpih a hon bawl te'n I phat ding bangtak a kiphat zoulou ahia? cihkhawng I ngaihtuah chiang in ei hon siamtu Pathian lungsim bang cituk in ana dia? Cih cikmah a leng ka ngaihtuah khak ngei hetlouh himah leh ka lungsim a ka veina hong lian mahmah mawk a asiam pen hikei mah leng bang cileng a kilawm thei pen inleh amah i phat ding bang tak in i phat thei dia cih theih dandan saulou cik in kikum khom leng ci ut I hi. Laasak siam hihet kei mah leng ka neu a pat ka lunglut na ana hi gige a, school hiam ahihkeileh lawmte lak bang a ka hobby hon dot ciang un "LAASAK" ahi kana chi gige tei sam hi. Kum 4/5 ka hih lak vel in ei Zomi te lak a laasiam minthang mahmah "The Jewels" te lak bang ah leng kana tel sam a himah leh buaina tuamtuam ziak leh om na mun lemchang louh ziak in bangmah tan tung zou manlou in kana tawpsan kha a huai nung in siamna dia laasak kizil cidan deuh te kana sunzom kha non khol kei hi. Himahleh ka lunglutna bei tuanlou in tuailai lak a ka kihel a pat in ka hihtheih dandan in ka dam liai nak leh laapawl ah ka pangtou zel hi. Laasak I cih bang leng ana maimai het kei a asiam te sak a ngaihnop mahmah hang in ei asiam hetlou te a din laa sak ana haksa mahmah zel hi. Sungna nei mite a d bang in a haksa khol diak a damtheihna poimoh petmah ahi cih bang theih in a om hi. Kei bang diak in ka aw khahkhiak dan kasiam louh ziak hia ahihkei leh bangziak a diam ah laasak haksa kasa petmah a laa thu hoih kasak te bang nuam deuh a sa ding ka cihchiang inleng ka hithei mahmah kei hi. Ka hahpan zoh khop leh haksa kasa deuhdeuh a atawl huai thei mahmah hi.Laa pu te kiang bang ah kasak d dan hon hilh un, bang cileng hoihtak a sa thei d ka hia? ci a ka dot hun bang a tam mahmah a hilehleng amau le a hon hilh d dan tuan a thei kei ua akhenchiang bang in ka lungke mahmah a Pathian kiang bang ah thum in "Toupa ken leng ka hihtheih tan a hon phat ka utlua, AW ging kilawm hon bawlsak in aw..." cipeuh in ka thum zel hi. Himah leh "AW ging kilawm" leng poimoh petmah thou mah leh amasa pen ana hi hetkei a, Pathian kiang a ka thumna hon dawnna hi a ka theih chu "Lungsim leh aw taktak toh Toupa phat ding" cih ahi. Toupa....ka hihtheih tawp suah a pang ing a manlou sasa a leng na phatna laazil te ngai poimoh ing a gim leh tawl kisa tak in kapang sam hilou maw? Hiai kan a bang ci pang tuan d ka hia? cih lungsim ah hong lian mahmah zel hi. Hiai ka lungsim a dotna om pen dawnna ka muh non chu "Pathian a om gige ding, I lungsim te amah thuzoh sak ding leh hiai tengteng ma ah HOTDAM ta taktak hih phot ding cih te ana hi maimah hi. T.V. khawng ah leng I na musek ua sap te khawng in laa asak chiang ua bang ziak a laam ziahziah a a taksa pumpi toh pang ua diang a kitawm ziahziah thei mawk uh ahi ua I cih leh amau Pathian ana neitak tak ua., bangkim tung a leng kipak tak a aomthei ziak uhleh a lungsim ngaihtuahna te ua thildang himhim omlou a Pathian phat ut na lungtang kia nei uh ahih man ua huci bang a om thei uh ana hi zaw uh hi. Eilam te leng laasak siam pipi ngen himah le hang Pathian I neih taktak zoh louh ziak ua I siam d bang tak ua leng kisiam theilou ahi. I ngaihtuahna te uh hon thuzoh a tam theih luat ziak a laa thu hoih pipi sasek mah lehang I mel uah leng kipahna himhim kilang theilou in ki keu petmah a, Amah toh I kinaih nang hon daltu a tam luatziak a kipum piak tak a leng Pathian a hi d bang tak a kiphat theilou ahi mai mah hi. Kei mahmah hinkhua ah leng ka theichian mahmah ta a, hehna-thangpaih na hiam ahih keileh ka lungsim hon kaibuai tu a om ngeingei leh amah phat ding a ka AW nangawn leng ka suah khethei himhim kei hi. Huai ban ah I biak Pathian siangthou petmah ahih man in lungsim ban ah taksa pum mahmah leng kep siangthou ana poimoh pet mah hi. Phatna laa thupi taktak te sa in ei siangthou het keileng mi'n a hinkhua ua a muh khiak uh lungsim taktak a laa hoih pipi ana phuah te'n omzia neilou ding hi. Angai khe mite mahmah inleng ei laasak khiak a thu te ngaihtuah sang in ei asa tu hon en zaw kha ding ua i laasak khiak a vualzawlna leh khamuanna thute ana tangkha lou thei uh hi. Huaiziak a amah I phat a I biakna te Pathian pom tak a hihtheih a I sakkhiak laa te apat angai khetu te'n vualzawlna a tang theihna ding un nek leh dawn, teptheih muamtheih te a pat kikem siangthou ni. Kei mahmah inleng ka hinkhua a salam siangthouna ka taksap lian pen ana hi gige a huai in leng Pathian toh ka kinaih na ding hon dal petmah a himahleh amah hatna muang kom a hiai ka thugelh tung tawn a kipat a mah deihdan a kikep siangthou ding cih ka tup thupi pen ahi a ka zoh ngei leng ka kilamen mahmah hi. Pathian phat ding mah ana hi a himahleh siamtak a aphatna laa sa khempeuh te tung ah leng I Pathian ana lungkim vek tuanlou hi. Bible ah Caina leh Abel in ahihtheih na lam ciat uah Pathian kiang ah kithoihna ana laan ua, Caina loubawl mi ahih ziak in alou a huan hai te alan a Abel bel ganching mi ahihziak in agan te lak a ahoih penpen te alan hi. Kithoihna chiatchiat himah leh Pathian in Caina kithoihna pen kipahpih lou in Abel kithoihna a kipahpih zaw hi. Sa leh sisan a kithoihna ahih ziak ahi hetkei a Abel in a lungsim taktak toh aneih teng lak a ahoih pen alat ziak a lungsim enchian pa Pathian in kipahpih a hizaw hi. Huai ziak in a laa sak ding ahihziak hiam leh mite sang a i siam tuam ziak hiam leh Pathian phat ding cihziak in a kilawm sak na maimai a Pathian phat himai lou in Kolossate 3:24 na a "Na hih peuh mah uh, mihing a ding bang a hihlou in, Toupa a ding bang a hih in, kilawp tak in hih un" ana cih mah bang in siam leh siam louh thutuam hita leh Amah ah om gige in I lungsim taktak toh kipumpiak in amah bia in phat leng Pathian in I phatna gim namtui a hon san sak ngeingei ding a nuam tak leh kipak tak in I phat ding bang tak in Pathian I phat theita ding hi. *Hiai ka thugelh siam kisak ziak hiam ahih keileh chin pen kisak ziak a kon gelh a hi het kei a, kei mahmah hinkhua a kipat cikmah a ka theihkhak ngeilouh leh ka na ngaihtuah khak ngei hetlouh nuam tak leh kipak tak a "Lungsim leh aw toh a taktak a Pathian phat ding" ahihdan ka muhkhiak thak ahihziak a awlmohna liantak toh kon gelh ahi zaw. Thagum hatna a Pathian phat zoh ding ana hi het kei a huai sang a Pathian a om gige a bangteng tung a leng kipak gige a I ngaihtuah na tengteng a man a thuzoh ciang kia a nuam leh kipak tak a mite bang a Pathian kiphat thei ta ding ahi cih theithak chiat leng uthuai kasa mahmah hi cih keileng ka veng ua laapawl member khat ka hihna toh kon gen ahi. Simtu te tengteng "LUNGSIM LEH AW TOH A TAKTAK A PATHIAN PHAT" thei ciat din Pathian in hon vualzawl chiat hen. Ka kipak. Johan 4:24. Pathian zaw Kha ahi, a be mite'n kha leh thutak a abiak ding uh ahi. ©Siamsinna leh Vakiangbu