Tuailai 1434 Pro : Anti-Corruption Rally
By ~ Vz Vualnam
Zoutui mizatam suihlung kihualte’n
Tung sianmang masuan a ma i pat ni’n
Tong i chiamna simsing bang a gilna di’n
I tung thulgua’n zong mel hong mu hi e
Gia bang tang chiat dia simthu i leel ni’n
Zata’n nuihchiam in hon leel ding hi e
Heemneek tualkhia dia zaila i khia’n ni’n
Zata’n tongsia’n hon lohkha ding hi e
Sinlai gial bang khing tapeuh kei ni e
Chiamna simsing bang gilzaw ve ni e
Sinlai suan bang sou tapeuh kei ni e
Khang damtui bang luaan neem zilzaw ni e
Tu a tuanglam a khuai bang i han aw
Heina peuh ah gia bang zom ve ni e
Tu a zatam lai a kei bang i gial
Sa bang tatna peuh ah ngilhkei ni e
Tong chiam kheem in simsing bang gilkei le’ng
Vuallai lohchiang bang i dai na’ng hi e
Zata lohchiang bang i dai ding a aw
Masuan sianmang a dai sawn ding hi e
Sesum lamtam puan bang i taan zong in
Chiamzou hang e lungsit kei ve ni e
Zatam lai ah lehluan i zil zong in
Chiamzou hang e luanna dangkei ni e
Heemneek tualkhiat taantam chi kei ni e
Khangsawn zata ni bang lut na’ng hi e
Gia bang tang le’ng simzawng ding chikei aw
Khangsawnta nahsing bang lut na’ng hi e
Ma bang pat khohlou bang a hak zong in
Zaitha neemlou ma bang zaam zel ni e
Tu in mazap kiaklou a ziing zong in
Lungliaplou machiang suan zel ve ni e
Nun thak siam bang sin ding hilou a aw
Pupa nun hi e al bang mangsa hi
Eite’n tanglou bang phong gia bang zuun leng
Khangsawnte’n dawngia bang zom ding hi e
Sian in hon huai maita hen zaw zata
Chiamna sing bang gil di’n hon huai hen aw
Heina peuh ah siallum hon sung hen la
Gia bang tang kumkhua di’n hon siam hen aw
©Siamsinna leh Vakiangbu
Comments
Post a Comment