HI DEUH LOU MAH AHI DIAM?

By~ Pau Lian

Phuah tawm vuak gelh gelh le a hideuh lou ahi diam ah ka zum tha a suak a huai ziak in phuah tawm lou deuh gelh leng tutung chu a poi lokei di ka chi hi. Siamsin [thugelh kisinna] kawm a ngaihdan khawng gelh khiak tei a milak a kua simpeih ding hikhol kei in milak ah khawng khol kei lele poimoh kasak tamlou maivun sah tak gelh ka sawm a, ahi inlah kizumpih huai sim phelphal hi a kamuh man in sawt pek a pan ka gelh nuam khol kei hi. Hiai thulu a izat 'Hi deuh lou mah ahi diam ? chih in gennop tampi hon gensak thei a, hilou deuh mah ahi a chi om lele poilou, himah e a chi om leleng poi tuanlou chi in dotna dotna bawlkawm sim in thu tamlou kon gelh nuimnem hi.

Sawt lua zaw ahi nai kei, ahi in lah kum thum bang paita din ka gingta, Maram Don Bosco a ka kailai in ka lawm te toh lasak ding zil in tumging tuamtuam toh ka chiak bolbol sek uhi, Huai hunlai in ka lawm te uh unau tangkhul te pawl sawm-le-nih [12] sinlai khat tumging lam a siam ziak in ka zawn zel ua, ala theihsa hikhol kei mah leh baihlam taktak in hon zilkhe zel a, a theisa sim kichi te sang mah in leng a hon siamzaw nak hi. Kenleng nikhat ka lazil tawp un, nang muzik koi a zil e, na zil kha himhim hia ?? chi a ka dot leh aman.. zillou e, bangziak e? hon chi a, ken leng gendi zok theilou in, na siam a ahi, a theisa leng hilou chin a hon tum thei pah mawk chin a koi hiam khong a zil hidia hon koih ing a hon ki zahtak gusim ahi ka chih leh aman len, mawkmawk eive, ka pa te'n hon zil phal le uh hiai a lehkha lunglut lou sasa a sim sang a muzik zil zaw hileng sau tungzaw ding ka hihon chi hi. Kenleng huchi ahih leh na pa convince inla muzik zil zaw ve ka chih leh aman koi a zil di eita, mundang gamdang naih a hunteng a lehkha sim bang a zil na ding gamsung ah omleh tuh zil teitei theih ding, huchi lah omlou, nu leh pate'n lah mi'n lehkha a sim ziak ua huai zil tei dia hon phut luih uh, i talent kipholh suah lou ding hita mai inteh, i lunglut na kuaman hon lunglut pih louh tuh bang i genta dia hon chih leh dik kasa mah mah a, gen ding tuan leng theilou in kalu kasu ngau ngau hi.

Hiai kon gelh nasan bel siamsin na i ngai poimoh ua, nu leh pa te lai simthei changchang te natawm inleng a hih theih teng uh suah in laisim a katapa ka tanu mi kuahiam hong suak heh chi in lai isim chiang bang in ikiang ah hon veng thoh ua, kuk e kaak e chi thei hisam lou pi in i lusuk dek chiang bang in sim in hon chi teitei ua, tampi ten bel huai ziak le hi sese lou in lailam mah lunglut a nei in sim ua, sau pi leng a tung uhi.Huchi kawm kal lak ah a poi bel, laisim lam a lunglut lou, ki mawl nalam a talent nei tak tak ding tampi te a talent uh hek kawi in a lunlut louh na pi ua gari hek a gum gotang a hek in a om ua, lai lah lunglut lou, lah a sim uh ngai, a tawp in tuh a laisim na uah a lohsam khong khong uhi. Kei mimal tak bang ah leng ka lunglut na bang ahia chi in ki dong leng, lehkha sim ngiitngiit ka chi teuh kei hi. Huai nak sang in thil dang ka lunglut a tamzaw hi. Naupan lai bang leh tu hun tan in leng na aim in life bang a chi a mi'n hon dot chiang un.. gen ding zok ki theilou in IAS, IPS, IRS, adu ada mah in zuau a ki gen, a diktak in bel i aim in life i lungsim taktak a hong suak pen huai stage tung khong a guiter zuut zelzel khong, mawltual a mipi kikou zuazua nalak a football khong thoh vawk heuhheuh, ahih kei leh bike khong a tai fenfen, ahih kei leh mipi mai a duang hoih pipi te phou khia a nuhtheih nuhmoh teng kinuh a ki elna a kipah man sang a mipi ten limlak na a mek vak zetzet hun khong leng ahi tham ding in ka um hi.

Hiai a i gen nop pentak bel, i gam uah laisim louhngal nek zonna dang omlou taktak mah adiam chi nuam dan ka hi lim hi, lai sim dia ki bui toholh ziak a tuailai tampi, pitek putek suak ua, minthanna amau a ding a ki seh kholh sa chouna leh thil hih theihna pen khah suah ki tam ta ahi, kholak i vak a, mi tampi imu, huai te kiang ah khatkhat in lai bangtan na sim a? na sim lai in na lunglut hia? Nu leh pa sawl hat thu a sim na hi hia? chi in dong leng hi a chi tampi a om ding. Nekzonna tawldam huai pen chi in lai mah iki simsak tuntun ua, tawldam lou tak in iki ning ua, i sumsen uh zaw thawn hial kei, mi haimuh louh na di tan in status khat i nei sam himah leh, huai lunglut lou sasa a i sumsen pen pammaih lua ahi chi nuam dan kahi. Nekzonna tawldam huai chih man a i lung a lut theihlouh tampi om ahi, ka chih ziak bel, lunglut na i sep khak chiang bang in ki thanuam se hi. Etsakna ding in tulai a i ngaih thupi uh boxer Mary Kom bang enta leng, nekzonna tawldam huai chi in boxing ana zil lou in BA, MA, MBA.. adg bang ana zil teitei leh hiai tan tung khollou maithei tak ahi. Nekzonna nuam, nisa thuaklou a sum muhna ahih leh chi in beautician khong ana hi hen la mi mitmul khong threading ana bawl zauzau henla, cosmeitc a chi tuamtuam a khut ah ana khoih leh tua a dinmun sum leh pai lam genlouh vai filmstar te toh lim aki la diam? koi mun hiam ah ava cat walk zahzah diam? LONDON a mu kha diam? chih bang om ahi. Huai ban ah Mike Tyson in architect lam ana paipih hileh tu in ken ka thugelh na ah a min ka zang kha diam? ahih kei leh Michael Jackson in lehkha ana hai chilh hileh khovel in a haichilh diam?

I gamsung ah siamsin na lou ngal chi in a neilou ki chi pen natawm inleng guhtui kang zen in i zil souhsouh ua, tampi leng i loh ching uh. Himahleh a loh sam bel tamzaw tham ahih na ah i paidan uh dikzou lou deuh mah ahi diam chi nuam ka hi. Hiai laizil a lou theilou a i ngaih uh a lou theilou taktak mah ahi diam? a means dang omlou ahi dia? bangziak a Lamka a siamsinna school i chih chiang a, musik school, games school, arts [khutsiam silbawl] lam ki genkha ngeilou a diam chi ka hi. Hiai te a ki genkhak lou ziak a kai ding omlou a diam ahih keh khut siam omlou hia? ahih keh musik i tem paina uh ana hilou bilbel adiam? chi in ki dong leng, hilou hial e a chi a tam ding. Zilna chih pi leng neilou a mahni lunglut ziak a tumging chi tuamtuam bang tum puak ziazia sam, zilna neilou napi a football khong a sau pipi va tung, zilna neilou pi a TV khong a a muh lel uh HIP hop laam khong ching khe zialzial pah mai te a lunglutna uah pai hi uh himai zen leh i zogam pallun ding i chih te uh hiai khong inle contribution neithou lou ding a maw ka chi hi.

Ei sang a thunei zaw te khuang tum na lamlam nai a pai pen mitdel vai lua hileh kilawm hi. Hilou deuh mah adiam na chi kei tawp inleng ngaihdan nengkha bek na neih lamet na kawm leh kei mah mimal inleng kana tuah, ka lunglut louh na pen, ka sih tan ka paipih ding laisim ana hih mawk man in ngaihdan tamlou kon gelh ahi zaw hi .Tui leng a luang nopna a a luang chiang in a tunna ding tung baih zaw hi, a ut louh na teng a va heikawi om chiang in a tam ding zah ban ah a sian ding tan a siang lou in a tun na ding mun leng tung hak hi..

©Siamsinna leh Vakiangbu