KA TUUN

By ~ Ngaihnou Thangsing

Mite bang in tanu duat thoh takin kana piang teeisam a, kahong piankhiat takin innsunga naungek om ngeilou chi matak chu hon deihthoh peetmah ua, adiak in kapaneo le kanii in hong deihthoh peetmah in kapiankhiak apat kagei a omden in ka khutte bang ana khoih sak jel ua, kapi le kanu kiangah bang inao unle akhutguh neita cih khong in honna paata thei mahmah uhi. Adiak in kapaneo hon patak dante kanu le kapi in hon nahilh jel kanajak te kakho hettheih nung in tutan kanathei dena ngai le kangai mahmah in kaki thei a kangaih tuah thakthak le kapaneo cu tutan in ka hehpihtha ahonsuak sak khanak hi. Huci'n hunte hongpai tou a mite bang a neizo zengzun hi kei mah le ung khosak dan le thil bangkim a hon phalo om ana hi ngei diing a...

Ka innsung uh kituaklohna di deih ana um jiakin kumnih/kumthum diing khong kahnog phak tak in juau thu lamleng jiakin kanu le pa cu a kha bangzat hiam ahong kikhen kha ua...kei kahih le huai hunlai in ka sungten hon deihthoh mahmah ahihjiak un kanu omloh lam le honphok sak manlo jejen in hon duat peetmah ua, alim kanek khakloh diing bang alauthei mahmah uhi.. Zaanciang inle kapa'n lah akiang a giak dia hondeih, kanii le kapaneo lah ningkhat a kei hong kituhbol a anakisel uh..ken lah bangmah theilo in kapi le kapu kal ah kava giak jel a huciin nitak teng in ahon giak pih ud in ka innsung mite cu kei theihloh kal in anabuaithei mahmah uhi... Ka khosung ua naupang dang to teh in cu leengnu (Princess) kahi ci leng kaki ci khial kei diing.

Kanu'n hon paisan nung siah cu kasung kuante deihsakna tang diak-khol in kakithei a huchiin thil neuchik aleng aw saangsim a hon houpih chiang unle ka kikhasiat suahjel a, hu chu ahon buaipih pen uh kahi den zel hi. Aleh lamah Kanu'n le hon ngaithei mahmah chu ahi ngeei diinga suun cianga kapi chauh toh ka omciang in ahongpi jel a nektheih tui taktak te hon nesak jel in huciin Kapa te loukuan ahongtong ma un ahong kha kiksek hi. Hucia kanu'n kapate omloh kal a ahongpui sek pen nikhat cu kapa'n ahongthei kheta a, kapi tungah la hehngam taktak lo kei peen ahong hehsan di la hithei salou in amah kia in aheh peetmah a kapi le kei hong thuhilh di ci le la dencianga kakhasiat khak diing uh alauhman in ki-imim mahle ki-ip jo nawnlo ahi ngei diinga nikhat cu aloukuan na ua Kanii kiangah agen a huciin kei le kapi cu kanii in ahon thuhilh na danin kapa'n gen in aci teng ahong genkhum tahi. Huci'n kapi toh gending pen thei josam omlo in kaki entuah ua kapate loukuan khit ngak a kanu'n suunciang in hongpui somkit ngeingei ding hia huai cia bang ci'n ina gendiam ci tuak hile kilawm takin kanii thugen dong josam omlo in kaki entwah ta uhi. Kanu le ka kimuh ding uh bel kapa'n aphalloh pumpi hikhol keile leng athangtawm pan ahih kapa omdan apat in akithei thei a huai in kalung ahong khoih mahmah hi.

Kapate loukuan khit taang a um, kanu cu suun in kei pui ding in ahong petmah ta a. Nidang a kapi toh kanu nuihmai a ana lamdawn tegel cu huainia ka umdan u toh kibanglo ahijiak in kanu'n "Bawinu tuni napi toh bangci uh e nidang bang kei na ucia ciin hon thudot a ken cu adawn ding dan theijok loin ka um a, ka pi'n Bawinu nahong puidok jel pen koi apat anathei adiam apa'n lemsa khollo a suuncia inn aom meimei a potnawnlo din thuhilh hi " ci'n kapi'n kanu kiangah kipahmel khol lo in ahon genkhe tahi. Hucia kapi in hon gentakin kanu cu dahmel po tak le kapa tunga phubalak utna lungsim nei hile kilawm awmtakin amaisuah ahong kikhel panta a, Nu hong o paiphei tani ci'n kanu khut kalen a kakaih dek le thakhat in ka khut hong paihkhiak sak a huai takin kei le kiking guih jejen in, kaki puksuk dektak a kanu omdan lamdang salua a ding inga ka et det le amah le khua hongphok thak hile kilawm omtakin, Bawi hongpai ole paiphei tani ci'n maitai mel takin ka khut a honglen phei in honpom toh ahong thuah a, huci'n ken le kapi mai ka et pheile kapi in leng tuni atopna din vajui inlan nidang cia cu utle teh le na pa'n napot di honphal lo ahitoh potnawnlo din aw Bawi ahnog ci a, kenleng lungdam takin kanu cu kajui nawnta a huci'n amau innlam juan in kapotkhia uhi.

Huai ni ciah cu kanu'n le hon treat dan nidang to kibang lo deuh atuam riau in kathei a, inn a nek di kanek khit un bazar pot di bangbang nadeih a kon leisak di Bawinu hon cia, kenle dawnbut manlo in khe a pai na dia gamla ahijiak in gari hong khalh sakdin pasal melse lolo khat ana sapsa cu ahong lut a kanute innsunga alianpen hile kilawm awm takin hong ki-inn nei sak mahmah a, kamit cu adongkei hial kaci theikei, hmmm Huci'n kanu kisil khin phet bathroom apat ahong potkhiak tak in huai gari khalh dia kisampa cu kanu room ah ajuilut ta a kenleng kava jui lut tei sam hi. Hucin kathum ua kanu room a ka omlai un kanu kisil khin phet bazar pot dia kisa cu huai mipa'n ana thohthoh a huci'n kidek jo nawnlo ahi ngei ding a, kanu cu kamaitang tak ah ahon kawiphei tamei a ken leng lamdang salua a kamit nuaithak jejen a ka et kik le a kawi taktak mei mah ahihdan kamusuah a, huaitakin room polama pot di ci leng la kanu'n nop asakloh khak di launa toh akikawi sung u cu ka om tentun a, ahong kihah phet un ka daileng suaklo pi kanu kianga dailen suakdana ki gen in ekbu a cu kava tu ta ngei hi. Eksuaklo a vatutle cu hak tho hehehe Sotsimtak katut joh in kapotkhia a room kalut dek nawnle kanu room cu asunglamah ana kikalh mawk a keileng paotamlo in c'mon room ah kana ngak niloh a ahongpot khiak un nitaklam ahong hi ta a hucin kathum un bazar kaidin, kei a nunglama tu in amaugel amalam ah atu ua, huci'n bazar lam cu kahong juanta uhi.

Lamtung ton in kei omlam le phoklo awmtakin ahong kithoh den ua keila kamit a ka pianna nu hicitel a om kamuhpen kapa kianga gendok lengla kani kianga vahoh nonlo dia hon thu hilh khin hita ngal, gen kei leng la ahet di le deih jel inga, ci'n kalungsim in kei le kei kana kisel niloh a atoptop in bangmah thu taktak le la manlo in ka dawr kaina di mun uh cu ka hongtung ta ngei ua, Shopping cih khong kalunglutna pen himahle huai nii ciah cu gari sunga tutden a ana ngak bang ka ut peetmah a tua cia kahong kingaihtuah laiin, Bawinu hong kumkhia ole ciin kanu'n honsama ut kei leng le anung uh kajuih mei loh upai omlo ahihjiak in kava juive sam a, huai hun in cu awwww kei din ahaksa ngei mei ( Nidang a kapa tel a ka bazar potlai uh thel bang hong thosak thak in thuak hak hina meijen e). Kanu'n lah bangmah phok phalo in amaitai mah2 ngal a..... Huchiin hun bangtan hiam ka bazar ua kalei di teng uh kalei johnung un FAS-FUD khat ah honlut pih ua huai ah kaduh peen MOMO ahi cih kanu'n atheih jiak in kei le hon dong sese louin on order sak ngal a amaugel a di bel...hmmmmmmm kagen dahmei di anatheisiam mei leuteh maw hehehehehe huai ah kaman kanek di teng uh nejo in kamansiang tak un innlam zuan in kahong tai panta ua vaigei sim mahmah ta kahihjiak un full speed acihte un ahongtai pihta ua anamsim jek ahihjiak un kei omlam le phok phanonlo in ahalh pian sersor ua inntung dek chenchen hinapi in nullah ah kahong taikhe mei mah ta ua kei bel bangmah kaci kei na a, kanu ahihle akhupguk kiheh jek in paihak sasim in ahong um a ka gari hekpa uh ici diam huai mipa cu atal atatkek a, a sisan pot niaunuau in aom hi (kalungsim in cu nakpi takin liam le kana ci gu sim hi hehe..). Huchiin ahektheih dandan a heknon in ka hongpai ua private clinic khat ah dressing vabol sak khit in ka inntan uh hong khah ua kanu le hong lut non sese lou in akilekik pah ua....maitai tak a honna dawn kapi puanak di le akhedap diing kanu'n aleisak cu kapiak in naopang khat muamkhum piak bangmei in akipak mahmah hi.

Kapate loukuan hongtung hunta himahle huai ni cu keivaang ahimei diinga hongtung hakse ua, kaguk kipah petmah a hilele kalungsim mitkha ah cu ka nute omdan kamit a kamuh pen a mangthei ngeikei hi. Huchiin kapi toh kavanthak tuak uh kahong ki-test ta ua kapi bel kipak peetmah in a nuui nui mei a kei cu nidang kavanthak neih toh kakipak dan dih asak johloh jiak in kapi'n hon dong ut ciah kei lele hon en jel a hilele avanthak te amuh ciangin kipak lo theilo ahihdan theihtheih in a om hi. Hunsot kuam tak kana kitehteh lai un kapate loukuan cu ahongtungta ngei ua kavanthakte uh hon mule kanu honleisak ahi cih theilo diing ahihjiak in akintheilam in aningkhat ah kapi a toh kasel uhi.

Hun leh nite khollou in pai zel a, kei leng skul kai thei ding ka hita hi. Ka pa toh admission ding in ka kuan ua, skul ka tun un Headmistress room ah ka luut ngal ua, maitai takmai in ka tutna ding uh hon kawkmuh kawm in tuding in hon sawl hi. Ka pa’n a pheitung ah hon tusak a, huaikawm in Headmistress nu toh bangbang hiam gen uhi. Ken bel a gen uh theibunlou ka hihman in ka na ihmu kha hi. Ka biang hong ki-sawi kawm in “Bawi thou ta aw” chi’n ka pan hong phong a, ka mit ka hahleh Headmistress nu’n nui selsal kawm in. Na uniform ding chi’n a dohkan tung a om skul uniform saphuklai a kithuam hon pia a, zingchiang in hiai silh in skul nong kai di aw hon chi hi. Kei leng kipaklua in ka pa mai bang ka en thakthak zezen a, ka pa’n bawi nang a ding ahi, skul kaita ding neive chi’n hon pomkawm in ding tou a, ka paita uh hi.

A gaal a pan ka pi’n hon na mu ahihman in innsung apan hong pawt khia in ‘hong tung ta uh maw’ chi’n hon na delh pah a, ka pa’n a van tawite a pia in, varanda ah ka tu uh hi. Ka pi’n hon sam a bawi, hong aw na puannak hong kiteh aw, hon chi a ka Pi tutna lam ah tai pah in, puannak ka silhta hi. Ka pi’n nui keuhkeuh kawm in ka pa kiang ah, a mun a kitehsak ngallou na tel maw chi a, ka pa’n amah ihmu a Headmistress nu’n a neupen kon pe di aw a chih ziak a phong sese lou, kitehsaklou ka hi chi’n nui phempham kawm in ka pi dawng hi. Ka puannak silh in leiphiat daldal a, kei bel kipak mohlou ka hihman a suah non ding ka ut kei a, ka pi’n bawi hichia skul a na silhleh skul na tung ma a ningai vek ding ahi, koi nang a dia hun geih ding in I khui neu ding aw chi'n hon suaksak a, a khut a khui teuhteuh in hon bawlsak hi.

Skul kai ka kithalawp a, naupang dangte toh kithuah bang nuam ka sa hi. Heutute‘n la hon sakpih chiang bang un nuam kasa diak. A liante'n skul-bag a lehkhabu tampi a puak bang uh kana eng a, kenleng nitak chiang in ka Ni lehkhabu luite ka bag ah dimzen in ka na guang sek, zingkal skul kuan hun chiang in ka pi buaina khop a phasek hi. Achang in kei lehkhabu leh laipuante bang a lakhekha a, skul ah kei poimohte pokha hetlou a skul ka kaini bang a om hi. Heutute lemgel leh chihdan siamlua uh ahihman un naupang dangte ma ah hon tai leh zum di’n hon koih ngei kei uh hi.

Nikhat skul a ka omlai in ka pa leh Headmistress nu ka class kong uah hong ding ua, kenle ka muhphet, kipak leh lamdangsa ka hihman in ka tutna a pan dingtou in ka pa ka va delh hi. Headmistress nu’n heutunu kiang ah bang hiam gen a, ka tutna mun ah ka bag va la in ka pa pia hi. Ka pan hon pawm a, heutu nu’n ka sam hon zutsak in midang kuamah paima in ka pan skul apan hon paipih hi. Ka pa mel ka en a nidang toh kibanglou sa himahleng, tuni ka pa’n skul a pan hong pi zenzen kipaklua ka hihman in bangmah ka gen tuan kei a, a ngawng ka kawi lel hi.

Phun leh paulou in ka pa’n ka innlam uh hon zotpih a, ka inn uh ka gaal muh tak nidang banglou in mi ana om liailuai mawk ua lamdang ka sa hi. Ka pa ka enthakthak a bang mah a gen tuan kei. Inn sung ka lut un inn pindang teng ana kilakhia a, ka pi toh ka lupna ua ka pi lum, a kim a mitu te ka gaalmuh pah hi. Pi kei ka pa’n hong pi a, hong paipah keive, chia ka pi ka gaal muh phet a ka houpih leh, ka pi’n kihei in hon en kei, ka pi hon dawng na zak di omlou in midang a kiang a omte kah ka za a, ka pa kawi in keileng ka kap ek hi. Kal khat lam bang hita, kei lah skul kailou, ka pi, kei hong kemtu lah muhding omlou napi ka inn uah midang a om luailuai ua, ka pa leng nasem a kuan lou ahihmanin, ka pa kiang a om in nuam ka samoh kei hi. Mi leng hong pawt tawm hiaihiai ua, ka pi om louh lam hong kithei deuhdeuh a ka thawm hau in ka pi ka ngai mahmah hi.

Skul ka kai non ma, nikhat ka pa vapawt khia a, inn hong tung in a maitai het kei, hon pawm a hon zutzut mai hi. Nitak in a kiang ah hon lumsak a, hon koi thithen a, ka kha a muang a, nuam kasa mahmah hi. Zankhang lai in thakhat in ka khanglou kha a, kapa kidik hin ka thei a, amai ka en hi.. ka pa ihmu hetlou a, ana kap ahi ngei ding a lukham bang ana kawt dimdim zezen hi. Ke’n leng ka pa kawi in Pa nang kap mo, nang ka pi ngailua maw chi’n ka dong hi. Hon dawnglou a sotsim a om nung in .. “Bawi, kon ngaihlouh leh deihlouh ziak hon chiken aw.. hon ngailua, ka kiang ah om gige in na khanlet hon muthei leng utlua ka hi chih na thei gige in aw… zingchiang a pan in na skul ua convent a omta ding na hi chi’n hon gen hi. Kenle ka pa kiang ah nangle hong om di maw chin ka dong zel a, bawi, kei huai a hong omtheilou di ka hi, nang vuak na va om ngai ding ahi chi’n hon gen a, nang omlou di bang keileng omlou di chi’n ka kap hi. Ka pa leng kap, kei leng kap, ka kahna san uh zaw akibang khawl kei maithei ahihziak ka kahziak uhbel hingzenpi a nu neilou kana hihkhak ziak ana himaimah ding.

Khua hong vak a, ka pa’n leng ka vante bag khat a guang in, ka skul uniform hon silh sak a, ka man un skul lam ka manohta uh hi. Skul ka tun un Headmistress room ah ka lut ua, kei pen ka classroom ua lut din sawtlou nung in ka heutunu’n hong pi hi. Ka pa bangtan om a, chik a hon paisan chih ka thei kei. Skul tawp hun hong hi a, nidang a ka Pi din na sek ah ka pi muh ding a om kei, naupang dangte, ka omsek dan un kipaktak in amau pi dia hong kuante kiang lam taikawm in a zuan ua, kei zot ding kua mah omlou ahihman in ka pi toh ka ki-ettuah nasek ah ka ding den hi. Headmistress nu kei lam mahnoh in hong pai a, tuni a pan ken nang kon pi gige ta di aw.. chi kawm in hon pawm a, a room ah hon tonpih hi. A room ka tu’n un a tutna ah hontu sak a, ka nek di bangbang hiam hon pia a, hon pau pihpih a, nuam kasa a, nektheih bang tampi ka gai hi. Ka nek zoh in ka kilvah ahi ngei ding a, ka tutna mun ah ka lusu hi. Ka khanloh a ka etleh nidang a ka sun ihmutna mun ana hi kei a, lamdang sa sim ka hihman in ka men phemphom hi. Ka dakleh Headmistress a tutna a tu a, tha-it tak a na sem ka mu a, hon en kawm in thouta maw.. kenle zouta.. i paita di aw.. chi’n nuihmai toh hon houpih hi. A dohkan tung hon hem a, zing a ka pa’n ka vante a guanna bag  dohkan nuai a, akoih hon dawm kia a, ka khut hon len in chikmah a, ka muh ngeilou leh ka omkhak ngei hetlou na ah hon tonpih hi.

Room khat ah hon lutpih a, lupna tampi hoihtak leh feltak a kilem ana om, lupna khat toh khat kikal ah cupboard lianloulou bang, almirah bang , a om hi. Headmistress nu cupboard  neu kasak penpen kiang ah va pai a, a kiang a lupna om pen bang leng a neupen zomah hi. Hon sam a, hiai nang lupna ding, hiai ah na vante koih ni aw.. chi’n a sung a bang mah omlou cupboard hong hi. Bag a van omte lupna neupenpen tung a hon lakhevek a, ka pa guan chihmahtak a kikhep chih bang om selou. Headmistress in khat khat in hoih tak in hon khepsak a, a khep kawm in nangle na khep ut hia chi’n kei khep ding leng hon pia hi. Ka pi puan khep va kheppih zel ka hihman in ka hihtheih dandan in ka kheppih hi. Kei theihdan pen ana diklou mah ahi ding a, hoihtak a khep didan hon sinsak pah a, hon sinsak dan zui in dakkal nih leng hilou in puankhep didan zilkhin ka na himaimah hi. Ka puankhepte uh hoihtak in cupboard sung ah hoihtak leh kilawmtak in hon lepsak a, puantam neilou ka hih man in Cupboard neupen himahleh nuamtak in vante a ta hi.

Headmistress nu’n ka uniform hon suahsak a, inn omna puannak hon silhsak zoh in ka uniform khepin Cupboard kilkhat, a awng a koih na mun ah koih hi. Hiai ah na koih gige dia, na van dangte na koih kei di aw, zingkal chiang a na zon buailouh na ding in chi’n hon hilh hi. Huai room apan pawt in , room dang khat ah hon lutpih a, dohkan sau a sau leh tutna sau a sau ana om zel hi. Dohkan nuai ah lehkhabu leh skul bag a om a, munkhat a bangmah omlou na mun ah kei bag a koih a, huai zoh in khong lam ka manoh uh hi. Innliim a pai in, inn hon kolhpih dek a dia aw chia ka ngaihtuah lai in, alehlam pang ka tung ua, huai ah huan ana om a, paak bang, ka pi’n meh huan dia a atsek manta achihte bang a kung ah ana gah tiltel ua, ka gal uah mi sagih nui zaizai kawm a lei khuat ngaungau ka mu hi. Mi sagih lei khuat ngaungaute lam kama noh ua, a mun ka tun un.. Headmistress in mi sagihte kiang ah, na fel na uh e, na homework uh zouta uh maw chi’n dong a, lei khuat ngaungaute’n le Headmistress thugen a zak un hon en ua, kimeltheih tuah na hon neisak hi. Huai mi sagihte amai tai ua, ka mu khak ngei bang ka sa hi. Amau toh om ding, na neknek uh, na hihhih uh hih khawm ding na hi uh aw chi’n kam dam a hon hilh zoh in Headmistress in hon paisan hi.

Headmistress nu’n hon paisan zoh in na hihhih uh hihkawm di chi hia chin kenle a gaal apat ka muh dan in lei khuat ka va sawm hi. A lak ua a lian pen in, nang hiai bang nei nailou na hi chi’n a Tu tawi hon lak kawm in hon houpih a, “hong pai” ken na hih di kon hilh di aw.. chi’n a ka pam zek uah hon paipih a, hiai ana enen in aw.. et a et nophuai ahi chin miksi bu leisai tamlou toh om en di’n hon sawl hi. Kenlen thumang tak in, miksi kizui dandan, khen khatte a tung ua bawk liuleu om pen gik sak a sak chi a paw teitei, on dieidiei kawm a pai bang, khen khat te pua le po zezenlou amau sang a lianzo son kankan a leisai kom a hawl lut sawm bang, khen khat neuchik ngou keuhkeuh a tung ua koihtal veuvau ua taipih valval, miksi dang te makhelh vangvang, tha a tha-it misite ka na en a, a pai na ding uh lampi peuh ka na hahsak a buai in ka na buai hi.

Huaichia miksite buaipih a ka omlai in dak hong ging lengleng a, mi sagih omte’n hon sam ua, room dang khat hon lutpih ua, huai ah van tuamtuam tampi ana om luapluap a, ka mizuihte’n a tawi chiat uh huai ah koih in, room ka lut masak na pen lam hon manoh pih uhi. Kei van koihna kiang a almirah om pen miksi endia hon sawl pen in naih a hong in, a kikhekna di van leh kinulna hon la khia hi.. Midangte’n le amau van chiat hon lakhia ua, a lupna chiat uh ka theimai hi. Miksi en dia hon sawl tu’n,  nangle na kinul na ding nonla khe diam hon chi a, keile kintak a tai in ka vankoih na hong in, meitei dial, neu teutauh ka pa hon guang sak pen ka kai khia hi. A tungnung pen a omlou ahihman in, hoihtak a Headmistress toh ka vanlep teng uh, vankoihna apan hong kesosouh a, kei leng kisuanglah ka hihman in vante tawm in, a lom a henlut ka sawm hi. Midangte’n  hon naih ua, a lom in hon koihsak hetkei uh.. hon khepsak ua, ama sang a hoihzo in hon koihlutsak uhi.

Kei leh kei kitoudelh theidi dinmun hinailou, naupang dangte toh kimawl a, utnonlouh hun chia inn a pai vengveng a nu leh pa kiang a khamuangtak a om dia hoihlai himahleng, tu’n siang e sianglou e chih omlou in, kei leh kei kisil, puan kisawp, leh thilbang kim ka hihtheih na tan ah, sang a upa zo te om dan toh kituak thei dia ka hin a ngaita hi. Ka pa’n a vangkim in hong vehsek a, a mel ah kisuanglah ahi chih haihvual ding ahi kei. Ahihziak a kisuanlahna thei ka hih lam ka theisak utkei.. Ka pa ka muh chiang in ka kipak a, amah leng suk kipah ut ka hihman in, ka zilkhiat leh ka thiltheih thakte tawplou in ka hilh zungzung sek hi. Tomchik ka kimuh sung bek ua lungnuam leh kipak a om ding deih ka hihman in, suk-nui teitei ka sawm sek a, nui leng ka nuisak sek hi. A hon paisan khit chiang in bel ka pa thawmhauna ka puaknat pihtoh, ken amah ka ngaihtoh kidekzou lou in ka kap ek sek hi.

Headmistress leh ka ompih mi sagihte itna leh dohzohnate ziak in kei leng awl-awl in thilthei siam di leh kitoudelh thei di dinmun ah kong ding samta hi. Ka pa ka ngaihtuah khak chiang in thawmhau ka sa a, ka kimuh khak sunsun chiang un, amah kithuahpi ding nei mai di’n ka kunkun sek hi.  Ka tanaute unleng ana genpih ua, a mi ding bang leng om ahih dan hilh sek uh hi. Himahleh, aman kei hinkhua a, akisiamtan louh dan vuak a na gen kum gige maimah hi. A chang in ka nu ka ngaihtha a suak a khatvei bek hong in, hon mu henla ka nutoh kihou liim in ka haksatna leh ka kipahnate hilh leng chih ka lunggulh thei mahmah. Ahihziak, ka nu’n kei muh na ding in hun a nei kei, aman a buaipihte mah topsanlou in a buai zom hi. Khenchiang in kal nih bang, khenchiang in kha thum bang zin mang sek hi. Mibang a nu leh pa toh kal a khangkhete bang hampha ka sakni a tam thei mahmah.

Kong khat ah, kei leng hampha tuh kana hi veve hi, nu leh pa kal ah om kei mah leng mi nek hun teng in ka na ne sam a, a poimoh bang in a, hoihpen leh a nalhpen hikei mahleh ka silh ding leh ten ding ka kitasam kei, ka neih bangbang neuchik ka hih apan hilh a ka om bang ka kem siang a, ka silh in ka teng zel a, kilawm hon na sa ding bang ana om zel sam hi. Laisim hun a sim, sep ding om hun a sem, nek ding hun a ne, ihmut hun ding a ihmu ka hunzat ding dan tua ka omna ka lut apan zui ka hihman in. Lai lam hileh sepleh bawl lam ah ma ka sawn mahmah hi. Pawl sagih ka hong hih apan class ah topper in ka pang gige a, headmistress in hon kipahpih diak hi in ka thei hi. Kei leng, huai utmah a hahpan a pang ka hi hi.

Pawl sawm ka sim kum in ka pa natteh mahmah a avangkim in damlou sek hi. Damlou a, a gimsiat sim chiang in hong sam ua, ka pa ompih in kal nih, kal thum bang inn ah ka pa kiang ah ka va om sek a, khen chiang bang in skul kaitheih louh ni bang ka nei zeuhzeuh sek hi. A hong dam chiang in ka omna a ka kik zel a ka kailouh kal a, zillai ana zilte uh kei leh kei a pan zonchiat khiat ka sawm a, ka buai thei mahmah hi. Ka theih butlouh chiang in Headmistress kiang ah ka va tai zel a, aman kei a ding vuak liauliau in heutute hon hilh di’n hun hon ngetsak zel hi. Kumtop exam dek geigei in, ka pa hong damlou non a, kei leng sap a ka om bang in ka pa kem di’n  inn ah ka laibu teng toh ka pai hi. Ka pa ihmut kal chiang in, inn nna sep di te sem mengmeng in, ka pa thohma in ka laibu phen in, ka pa lupna bul a lai ka simsek hi. Ka pa a ihmut kei nakleh a kiang a om in ka houliimpih a, tuahtuah ka gen pihpih sek hi.

Tutung ka pa damlou, nidang toh teh in dam haksim mahmah a, kei lah exam ding nai a laisim ding awlmoh, ka pa kep ding toh, skul kai ding bel gen vual ahi kei. A vang kim in, a man dan ua zil in tanaute hong pawt in ka pa hong veh zel uh hi. Ka pa ihmutlai hong tuah khak ngeingei uhleh bel kei laisim hon tuakkha ahimai uh. Lai hoihtak in hon sim aw chi’n hon hilh zel uh hi. Ka pa leng hong dam siang a, kei leng ka omna ah ka pai non a exam ding in, ka hun mansakte khup di chi mah bang in sithu nam zen in ka pang hi. Ka tanaute’n leng ka pa ana genpihzou ta ahi ding ua, kei laisimna hon awlmohpihna ziakleh, hon sukbuai nonlouh deuh khak leh chi’n ka pa’n le ana  “AW” a, kumtawp exam ka zoh chiang a ka “Nu” (thak) ding pi ka sawm uhi. Kei leng ka pa kithuahpih ding leh kem ding omta ding chi'n ka kipak mahmah hi.

Pawl sawm kumtop exam bang hon zou in, geelsa mah bang in ka pa kithuahpih leh lawm ding ka Nu (thak) di pina ka neih zoh un, keileng ka omna mah ah kik in board exam ding in kong kisakhawl a, subuaitu ding bangmah omlou in exam ka zou thei hi. Headmistress in result suahma skul ah amah va panpih dia hon deih man in, inn pai seselou in ka omna mah a om in, Headmistress thu ka zui hi. Heutu skul hong kaiteilou a om ni in huaite onghu a pang in, huchilouh kal in Headmistress office ah hihdia nna hon piak bang ka sem zel hi. Meeting leh bang hiam skul toh kisai pawt khiatna ding a neihnakleh hon tonpih a, huchihlouh kal in a office ah nna a sep peuh theihbut toh butlouh toh hilh a hon hilh in hon semsak zel hi. Hiai hun sung in laisim a zilkhiatte a taktak a bang chizat khiat ding, lai simtam a theihna tamneih utna lungsim hon neisak a, result hong suak meng henla, pass in a ban sunzom thei leng chih vuak ka ngaihtuah hi.

Huai bang a hun ka zat lai in, ni khat ka pa school ah hong hoh mawk hi. Headmistress room ah ka thum un ka tu ua ka pa'n hichi hon gen hi. Na nu (a pianna nu) gari accident a tuahziak in tu in Damdoi inn ah puaklut in a om. Serious sim ahi ding a na pi (ka nu nu) in hon hilh banah nangle va hohthei le chin chia hon gen ka hi hon chi hi. Ka lungsim mitkha ah ka neulai a bazar hon kaipih nunung pen a accident ka tuah lai uhleh huai hun a a om dan ka mitkha'n hong kilang dundun a.. Nu aw, na omdan ngeingei a tunitan a ana omlai dan na hi maw?? chin ka lungsim in ka gen lel hi. Ka ngaihtuahna khovel a ana mang ka hi ding a, ka pa leh Headmistress kihouna za mahleng ka na thei kei hi. Ka pa'n ka ban hon sawn kawm in pai uale huai lam va hohni a hon chihleh koi ah e ka chi kha zezen hi. Damdoi inn ah hon chi gaih a, kei leng ding in ka thum un ka kizui khia ua, sot lou in ka tung uh hi.

Damdoi inn ka tung phet un, ka NU omna lam ka manoh pah ua, ICU a om ahih man in a gaal ah ka et thoh mai uh hi. Ka pi in hon muhphet in hong potkhia a, mittui paak niunieu kom in thil omdan hon gen ta hi. Kenleng pau hetlou in ka pi thugen hoihtak a ngai mahbang in om mah leng ka NU hinkhua ka na sut maimah hi. A melsia leng hilou, ngaihtuahna a leng miphalah le hilou, bang dia hichitel a amah leh amah kibawl sia a dia aw??? bang dia hi chitel a hehpihhuai hinkhua ana zang tel a dia aw? Lampam sikkhiallou zaw kuamah omlou hia? Bang dia ka Nu'n lampam a sikkhelh leh lamdik a hong kiktheilou sese a diam aw? chihpeuh kei leh kei ka na kidong nilou hi. Ka pi pau lai bottan zok in Pi kei ka va lut ding chi'n, AW achih leng ngak sese lou in apoi mohteng om na mun ah, a poimohteng la a silh in ka nu khophoklou, a nak a oxygen kituah, a mai veilam pang dup hithit a bawk zenzen ka muh in, Nu na melhoihna teng koi a man suah na mahmah hiam? ka lungsim a chikom in a khut khat ka letsak hi. Nu chia ka sap hang in hong dong kei, hon dawng hileleng ka gen ding leng ka theituan kei.. HON ITLUA, HON NGAIH LUA ka hi chih louh ngal. Kap zen in ka aw neih tengteng toh gen lengle hon za a hon dawng thei ding din mun ahi non kei. Tang le tang lou hial leh bangmah phoklou a lum dildel ka NU tuh ka pum koi a kah khum ek-ek hi. A hunloupi hon paisan ding in ka phal thei mahmah kei. Kei phallouh ziak a lentang thei lou ka hihman in huai zan in ka Nu'n hong beisanta hi.

©Siamsinna leh Vakiangbu