KARE!!! CHIH MAWK...

By ~ Eric Guite

“Tring...tring....tring.” chi in ka lukham kiang a ka phone ka koih a hong ging kelkel a, ka lak leh ka cab (Gari) ding hong pai a hihdan leh minute 30 khong a hongtung ding a hihdan thu ka za hi. Kei leng thoukhia in ka kihah a, bangthu ziak hiam, tuni ka lungsim a thawm hau mahmah mawk a, ka om a nuam thei hetkei hi. Bang hiam ka lungkhamna ding ahihkei leh ka khasiat mahmah na ding khat hong om ding a bang a, ka lungsim a muang thei kei hi. Ka lungsim ah Zomite zaila oihsiam (L) Thangboi Mangte in asak, “Gibang khenna ding in kawlni hong suak a....” chih laa bang a hong ging nilouh zaw mah a, office kai dia ka kisak kawm in zing lunglen hi-awm tak in ka sa hahauh hi. Lungsim nuam ngellou leh laasa kawm a kisa in a tawp in ka kuan khethei khong hi.

Pasal (tangval) khat hisam i hihchiang in nungak message ding kihau lotel khol kei mah leh neihbel kineihsam hi. Tua kialeng hilou in ngaihzawng bang leng kinei zaw mahlai chile midang neihlouh le zaw hituan kei na a. Huchi a office lam zuan a ka tailai un ka lungsim nuam lou beihsak theih nang ahihnak leh chi in ka nungak(ngaihzawng) nu message ding in kong kisa tei sam hi. Zingkal dak 7 bang a hi hialta na a, kei leng kithou baihsak chidan deuh in hichin innlam ate kon message hi, “Zing Pha, thouta ve tutantan lup chihtel ei bang kai dia kikuan hialta a” chih kifelsak tak in ka khak suk zat hi. Chihleh sawtlou in ka phone a hong ging keuhkeuh nawn a message hong lut ka sim leh, “Kuanpan maw???... Enbang pasal kineidek hialta eive...” chih a hongtung kik mawk a, a ki-om heuhou kha zezen hi. Kin deuh in, “Taktak in maw? Kua toh? Chikchiah?” ka chih leh “Chik in kon khem ngei a eita, zingchiang...” chih ka mu nawn hi. Ken leng hiai a himaw tuzing a kipan ka lung nuamlou sak chin ka ngaihtuah thakthak hi. Ka message thuk di lam leng phawkkha nawnlou in ka kingaihtuah den a, ka kingaih tuahtuah sung in office ka tung hi. Chair a tu in, table tung a khut nga in ka tal ka sawn ngeungau a, ka kingaih tuah zom lai hi. Bangtan hiam nung in nnasep kon pan ua, ahihhang in ka lung a lutthei mahmah kei hi. Bang nnasem ka hihiam chihnasan theilou hileng a kilawm hi. Ka lungsim in Zogam(Lamka) vangkhua ah a sak a khang in ka vak kualkual mai hi.

Ka nnasep(innlam a ka sepna lui) a ka join pat ni ahi a, kei leng phur deuh mai a kuan pah ka kichihleh town bus ka ngakngak ngai ahihman in ka lap kei dek hi. Nnasep ana pan manta ua, kei leng kisuang lah deuh in ka lut a bang tan hiam nung in kong khak a hong kihong a, ka theih ngeilouh numei khat a hong lut a, ken leng ka na ngaihsak lokei hi. Bangtan hiam nung in amah leng nnasem ding in a hong kisa a ka ma a hong tu ding in hong kisa hi. Ken leng awl a ka dak touh leh t-shirt leh jean teng a duang etlawmtak mai lianu ana hi a, ka mit hiai ka ma a ding nu a kipan in ka suan khe theizok kei hi. Ka kitheihna uh bel tuni chaing in kum 1 leh chih ding khong a hipan ding, mun khat a sem khawm ka hihziak ua ana kitheikha ka hi uhi. Ka kitheih nung uh kha 1/2 ding khongin ka hong kithuah theipah ua, ka kithuah thei mahmah mai uhi. Kei sang a taltak zaw tham a hihlam leng phawklou phial in bangtan hiam nung in ken leng kana guk ngaih hi. (Tulai a zaw numei in a sang ua naupangzaw a thuzoh theih dite uh deih ua, pasal in a sang ua u zaw a duat theih di zong uh hita veh aw. Nidang lai a thil tung pen tun kilehbulh geih a bang hi. Ken kana muh dan ahi, a dik thou inle ka thei a.)

Huchia ka hong kithuah touhtouh lai un, hun bangtan hiam nung in ka na etna dan in aman leng hon ngai in ka thei hi. (A om dante leh ka kithuahdan ua pan i a chiang mahmah huntawk a hihchia). Ka seppihte bang un a hon gen ut mahmah mai uhi. Huchi kawmkawm in koukal leng a guk in iitna pak mum zaw hong pak khia a hingei ding, ka kimessage-te uh leh ka kihoudan/nate ua kipan in a chiang mahmah mai hi. Huchin kum kim ding kong kon sep khawm nung un ka hong kilan khethei tuakta uhi. Sun nitum phial a mun khat a sem khawm a ka om nung nasan un leng nitak in kava pawt lailai a, hohlouh ni chiang bang in a lungkim kei sek a, ka hoh chiang in ka kikhelah thei mahmah mai uhi. Kei leng man liai nak leh ngaihsiang lam zuan ka hideuh reng mai a, inn kigamsa sim mah leh ngaihsiang lamzuan nana chu ka tung pahpah mai hi. Huchi a ka hong kipolh touhtouh lai un, hun in ngak neilou ahihman in kum hong bei ding a hong hihhial tak leh ka hong kikhelah diak mahmah mai uhi. Winter vacation hong kipan in ka hong kimu vang mahmah ua, zan a ka va hoh chihlouh phone tungtawn kia in ka kithuzak theilel uhi. Kum hong thak a, laa in ana gen mahbang in mihing hihna ah a sangzaw lam delh in leh maban ding khual na in, ken leng India khopi lam ka zot a ngai mai mah hi. Zing ni hong suak leh zin ding ka hihtak man in kei leng last night (a tawn tung a dia zaw ka chih hilou hia....) chi dan in ka va pawt hi. Ki-iit kingaite a ding in hun a tawm a chih uh zaw a dik ngei mah tungpan i kisak leh dak 11 leh chihbang a hong ging maw a, ki-iit in kingai lele saulim zotlouh theihlouh a hihziak in kikhelah pipi in huai zan kong kikhen ua, ken leng innlam paikawmna san in leng ka phone teitei hi. Tungsunni mual dawn ah a hong suak khe chiaichiai a, iit leh ngaihte nusia a theihlouh gam a pai ni ding tuang hong tung ana himai mah zaw zing nisuak nidang toh a kibang kei tel, a ethak mahmah mai a suak kei mai leh chih a uthuai mahmah mai hi. Ut in ut kei lengle pailouh theihlouh ahihman in kei leng lin pipi in ka hong kithoih khe khong hi. Ka zin khiak san nung kha 1 leh a kim ding khong ki-om pan a hiai bang thu’n hon buak dan hi a maw??? Sian aw mizatan bang na hawm kei tan hibang lel maw? Chihleh dotna dang tuamtuam ka lungsim ah a hong lut nilouh hi.

“Eric? Eric?” chi in hong kisam a, ken leng ka zakpahlouh ziak in a hong koih hi. Thakhat in ka ding touh guih kha , ka kiang a ding ka etleh ka heutupa (Superviserpa) ana hi a, ka kisuanglah thak hial hi. “Bang chi e?” “Sir, bang mah ka chikei, hon ngaisiam in.” “Bang hiamna lungkimlouhna leh na puaknat om  ahi hon gen in.” “bang mah huchidan a om kei, ka ngaihtuah a pai hoih lua ahi.” “Na mel a kipan in na puak nat leh na lungkimlouhna om hi’n a kilang, na lungkimlouhna leh na buaina om leh hon gen in aw.” “Awle Sir, huchi dan a om leh kon hilh pah di.” Chi a ka kihou khit un hon paisan hi. Ka ngaihtuah thak leh hunlui teng ngaihtuah thak leh hunlui teng ngaihtuah a mun khat en gegu a ana om ka hihdan ka kithei thak a, ka kisuanglah lo thak hi. Office tawp hun ding vuak ka lungsim ah a om a, sana ka enen mai hi. Hun paipai ahihman in dak a hong ching ngei a, innlam zuan in ka paita hi. Ka tha a zoi mahmah mai a, ann nasan nelou ka hihlam ka kiphok kei hi. Ka lungsim ah innlam ngaihna a hong lian mahmah mai a, kik ding kia ka ut hi. “Huai nang sang a upa zaw khong in pasal hon neihsan leh midang a tamvoi, bazar a niik khat kia kizuak lah hilou a, manghilh suk mai ve.” Chi in ka lungsim khat in a hon nem a, a khat lam ah lah, “Misawl inla pikhesak mai ve, huai tanglouh ding chihtel a fel toh, a mel a hoih toh, nang na deihdan chet hilai, phone inla na lawmte sawl suk a pikhe din” chihte leh a dangdang a hong kisual tuah nilouh a, ka buai mahmah mai hi. Innkong a khovot nuai a tu ka hihlam leng ka kiphok kei a, ahihhang in ka taksa in a na phok mahmah ahidia ka chi tengteng a vot vek a, ka khonung liin hi. Ka ngaihtuahna lah a pai hat mahmah ma, khau hual a lehlam a awhsuk mai ding chihnasan ka lungsim ah a hong lut zou hial hi.

Nidang a ka kipolh laite khong uh ka ngaihtuah a, ka lung a leng mahmah mai hi. Nidang a ka laa gelh khat, “Nang lou in zaw sianmang siang ah leng nuam zawng e...”chih khong houh tangtunsak ka ut phial hi. Huai khong ngaihtuah a ka om lai in ka phone ka et leh zinglam dak 3 bang ana ging maimah a, “Kei zing dak 6 a office kai dia kuan di pa bangziak a hiai tantan tu nilouh ka hi? Huai tanzohlouh khat ngaihtuah a” chi in kei leh kei bang hai kisakna in ka pumdim hi. Innsung ah lut in lum ding in kong kisa a, ahihhang in ka lungsim a muangthei kei a, ka ihmu thei mahmah kei hi. Zingdak 6 hong ging nawn man zel hi. Thou khia in ka kisa nawn a, gari hong paihak ziak in dak 7:30 ding khong in ka kuankhe nawn hi. Ka lungsim in tukhong a kisa san lel ding uh hi a aw chih khong ngaihtuah in gari sung ah ka lusu nilouh hi. Bangtan hiam ka lusuk nung in kitenna dak ging za hileng kilawm in ka om a ka khanglou guih hi. A hoihnate, a etlawm dante, a nuihmaite, amaitai dante, a hon khual dante khong, a aw nemtakte leh a polh nopdante khong ka mitkha ah a hong dawk thakthak a, dakkhe ding chi a tawlet lam ka ngat leh khua a nim in a nim a, kei thuakna hon theihpih uh leh hon thuakpih uh a bang zezen hi. Bangtan hiam nung in vuah a hong phiin a, vuahphiin leh ka khitui tak a kituak hial in ka thei hi. Kare!!! Chihmawk chi in office ka tun in ka nna ka pan nawn hi.

Khen - II

"Eric... na man hia? Na man leh ka computer hong etsak dih hong mit mawk a." chi in ka innkiang ua Pa Lam in hong sam a, ken leng "Man thou e, bang chih get na hia???" chi kawm in ka zui pawt ngal hi. "Kare! Pa Lam na computer kang sia a vele, bangbang hiam leithak ngai di" "Na man thou leh tun i va lei diam?" "Awle poilou" chi in computer van lei ding in Pa Lam toh ka hong kizui kheta uhi. Inn a kipan gamla lou a computer van kizuakna dawr tuamtuam om a hihman in huai lam ka manoh pah ua, sawtlou nung in ka deihteng uh lei khin in innlam manoh in ka kiknawn ngal uhi.

Lamkim lak ding kong ka tun un ka nung lam a kipan in "Eric" chi a hong kisam ka zak ziak in kei leng ka kinung hei pah a, kua hipeuh mah hiam chi in ka zong pah futfut hi. Chihleh kinep hetlouhpi in Priya ana hi a, Ken leng "Hello! Dam maw? Zenzen teh, koi lam pha dek e?" chi in ama hon houpih ma in kana dong suk pah ngal hi. "Hi! Dam e, koi lam pha dek hilou ing a hong vak khe maimai ka hi. Nang kon muh khak leh chi in a..he...he..he" chi in hong nui chemcham a, a mel a etlawm mahmah mai. Ken leng awl in Pa Lam toh ka kithei tuah sak a, introduction ka bawl tuah ngal hi. Ka kitheih tuah sak zoh in, "Eric na man hia? Non pawt pih zual diam?" chi in Priya in hon ngen a, ut selua leh kipak selua hinapi, "Koi ah eita? Nou gari hoih taktak a kikhoh zanzan theite khong toh pawt khawm din ei tel in i chin ngal di hia..." ka chi thuk hi. "Uang lokoh gam la le hikei na, hiai a pam zek hi. Khe a le pai bat di, hehpihtak in hon zui mai ve, kei kia ka ut kei a... aw.... hehpihtak in" chi a hon nget ngutngut hial chiang in zaw "NO" ka chi ngam nawn kei. Pa Lam kiang ah ka van tawi teng pia in, ka tun kik chiang a bawl pih ding ka hih dan hilh in kei Priya toh pawt ding in ka kisata hi.

Ka computer leina lam mah uah hon pai pih a, "Koi a bang hih a, hon hoih pih sawm na hi hiam?" Chi in ka dong a, zum chitak mai leh kisuanlah chitak in "Ngaihdam hon ngen ut ing a huai ziak hi, poi na sak kei a, hiai mun tak a hoh di chih chet zaw a om kei" chi in kun deudau kawm a pai in hon dawng hi. "Abang ngaihdam nget di bang mah a om nawn kei a, zan a pen zaw ken leng kon ngai dam khin thamta. Zan a non suk khak ziak a eigel kithei kha i om man in a lehlam tak ah hoih kasa zaw, kei ka kipak zaw ve." Chi in a kisuanlah ding venna kawm lah hi, lah a dik lah hisim thou in ka dawng thuk hi. Huai ka gen hial tak in zaw lungkim a hi ngei ding a, hong dak tou in "Taktak in maw? Ken le nang khong kon theih khak na dan a ka lak chiang a kipak lua ka hi, zan nitak bang le imu lou zen a ngaihtuah den ka hi. Thou ing a facebook ah na om hiam chi a Eric chih dan a kon zong chiang alah mi a tam lua a, huai a kipan kon thei khe zou kei. Na lim bek om di ka sak lelah ka mu het kei a, fb account neilou na maw?" chi in nui hiauhiau kawm in hon dawng thuk hi. "Nei mah kei dia, Eric chih khong a na zon tak in mi a tam mah ke. Eric chi a ka min ka koih leh midang in le hon koih souhsouh ua, kei dan a melhoih tuan di kisa uh a diam ah...hahahaha.. kon chiamnuih ahi aw... Eric Guite chile teh na mu di. G U I T E. Ka profile picture ah numei naupang lim khat ka koih a hi" chi in ka dawng thuk hi.

"Chiamnuih louh in le na melhoih lua aw... tua chidan ahihleh kana zong khe pah di aw. Eh! Na man thou le huai ah pam lam a i va pawt mai aw.' Chi in hon ngen nawn a. "Man louh chih zaw a om kei na a koi ah hoh di chi neita? Na ngaihdam nget di lah ngen khinta chin a, na gen di omlai amaw?" chin nuisim kawm in ka dawng hi. "Ka gil a kial lua a KFC hiam ah va hoh ni aw. Nang le ann ne nai din kon gingta kei" a hon chi nawn hi. Kha bei kuan a hih toh sum bang le ki neilou, tua le sakhau a 200 vel di lel kipua, ut toh utlouh sim ngaihtuah a ka om deudau lai in, ka liang hon beng a, kei leng thakhat in ka khophawk thak hi. "Bang chi e, utlou maw? Non ngaidam taktak leh hon va hohpih in, ka ngaihdam ngetna non pomsakna din, ban ah lawm hoih nang bang ka muh khak a lopna din aw... please..." chi kawm a khutkilh a hon nget ngutngut chiang in ka sel ngam kei zel. "Huai dan a ngaihdam nget di ahih in ei khong in kua kiang ah ngaihdam i ngen zou tel dia...." ka chihleh hon pau tuh a, "Na khel ngei e, numei khat in khut kilh zen a hon kingen a hon nial sak tel di maw Nang" hon chihtak in zaw bang mah ka gen thei nawn kei.... "Okay... Koi ah i va ne dia le?" chin ka dawn lel hi.

"Wow!!! Thank you... CP ah a diam a hihleh koilam na ut a, VV or A. Mall la?" chi in hon dong pah somsom a, ken le na utnana ah. Nang hon zot eive le.... na chihna na ah himai" ka chi thuk hi. "Hehehe.... a chihleh hiai ah ana ngak oleh... i paina di gari kava zong di aw" chi in hon pawt khiak san a, sawtlou ka ngak nung in a gari toh hong tung pah hi. Mercedes vom hiuhiau siang sitset  i mai a khawl a, ei a ding a kongkhak hong a om chu lamdang kasa a ka hiheuhou mai (Ei hon ngak a a sung a nungak melhoihtak tu hilai...wow..). Lut ngam phalou a ka din leh "Hong hohpih lou di?" hon chi a.. "Eh! Hoh man ke" chih toh ken leng lut ka thuah hi.

Mun nuam a sakna mun pen leh lemtang ding a angaihtuahna mun pen ah hon paipih a, huai a bangbang hiam ne in ka om uhi. Gil puakkham phial a duh teng ka nek khit un pai ding in kong kisa uhi. Sum nei lo dan in ken le ka wallet ka doh khiat leh "Ana om maimai aw" chi kawm in a Credit Card a hon dokkhe zat a, lai neu khat a a suai kai in "Na lungkimna maw, i paita diam?" hon chi a, "Kei a bang lungkim lou kei ta, nang na lungkim louh ziak a hiai a na lungkim na dia kon hohpih eivele, ken kon dot di pen nang non dong daih a" ka leh chih hi. Ka hohna kim lak uah sawtlou vak khawm zek in innlam zuan ding in Priya gari heksa a ka hong kikhoh nawn ua, sawtlou kal in inn kiang ka tung ua, "Chihleh awleh, Kipah huai lua, kimuh zel ka lam en, Mang pha" chi kawm a gari a kum khiat ka sawm leh, "Kei le ka kipak, kon zotnate non nial kei a. Eh! Na phone number hon pe ve na phal leh" chi in hon ngen a, ken leng "Na deih leh ana gelh khia oleh.. ka number maw 852771**** ahi, nang a le hon hilh le teh aw" chi in ka kum khia a, ka kum khiat kawm in "Kon miss call dia ana kisave mai in aw, mang pha" hon chi a, a gari start in a tai tumta a, huchin Priya toh ka dating masa uh ka zang beita hi.

©Siamsinna leh Vakiangbu