LUANKHI NUULNA KHENLAM AH……
By: Paumuanlal Guite BaBs
“Bawi aw…mite bang in hau in nei hikei mahle hang, loukhou a nasem a,
mite simmoh leh haitak a I khosak gige sangin ka theihtawp suah in kon
pang ding ua, na paneute va beel inla, lehkha hoihtak in non sim ding
aw. Na pa’n lah hon ompih nawnlou ahihchiang in nangkia kinepna na
hihmanin na theihtawp nangle non suah dinga, Pathian phawk in omna peuh
ah omleng a lampi ding hon om na ding ahi…”
Chi’n mittui luangkawm a thuhilhna manphatak hon neih zoh in thungetna hon neihsak hi. Huchi’n ka nu’n ka vante bag ah hong guansak a, lehkhasim ding a Lamka lam zuan a pai ding in hong kisasak hi. Kum 10 vel khawng hipan ka hihman in ka nu leh ka nau neu chikchikte bang ka en a, ngai mahmah kahihmanin amaute paikhiaksan ding haksa kasa mahmah hi. Ka naute lah naupang mahmah lai ahih utoh ka nu lah mibang a haat hilou, damlou phutphut thei ahihchiang in a khosak ding dan bang uh ka ngaihtuah a, kei ka nu dawnzaang theidekpan inga tua ka pawtkhiatsan ding chih khawng ka lungsim ngaihtuahna a sang deuhdeuh a, kideek nilouh himahleng ka utthu hi nawntalou in ka biang ah ka mittui hongluang suk hi. Ka nu’n ka ngaihtuahna thei hileh kilawm in “bawi, na mittui pawtsak ken, nang pasal hilou maw… nidang chiang a officer a hong pang ding chi’n a en nuam sak a isak na ding uh ahi..” chi’n a nuihmai honglak teitei lai hi.
Huchia ka van teng uh ka hihfel zoh un ka nu’n ka vanteng hon puaksak
a, ka nau neu chikchik nih in ka khut a hong leen in station lam ka
zuan uhi. Kou nutateng hichia kizui liailiai den thei hile ung ka ut
gige a, himahleh ka nu hon sawlna himhim nial utlou ka hihmanin utlou
lua hinapi in a kithalawp mahmah dan in ka om hi. Huchihlai in ka
naute’n ka khut a hong let kawm in “UMang, nang koi a pai dek e? Hon
paisan keive, kou kon ngailaw kei ding ua, ka kimawlpih ding ule om
nawnlou ding, kholai a lah mi’n kimawlpih dia zong hon ngailou ua, nang
na omlouh in…” chi’n hong khoukhou lai uhi. Hiaibanga ka naute kampau
ka zakchiang in ka mittui hong luang a, himahleh ka naute muh ding ut
hetlou ka hihmanin a kap hetlou dana om in ka naute kiang ah, “naute aw,
ana lungkham kei un, ken nidangchia nuam I sakna ding ua lai vasim ding
hizaw kahi aw, nou inn ah nana om ding ua, I nu chih dandan in nana
khosa ding uh aw… a thu nana mang ding ua, hoihtak in nana om ding uh..”
chi’n ka hehnem hi. Lungsim ngaihtuahna zaw a haksa mahmah mai.
Saulou ka pai nung un station ka tungsukta uhi. Ka nu’n ka ticket
ding khawng hon va ngaihtuahsakpah a, bangmah kallou a paithei mai ding
dinmun in ka omta hi. Huchi’n kenleng ka nu kiang ah “Nu aw, ka
paikhiaktan hon ompih dah un, denchia ka khase kha ding..” ka chih leh
ka nu’n leng, “Bawi, huai na chihleh hi thamtham e, dam in nava pai dia,
hong paiding lemtang aom chiang in laithon bek hong pawsak zel in aw..”
chi’n mangpha kikhak in ka kikhen uhi. Gari bang leng pai ut simta
ahihmanin asung ah ka luut hi. Sawtlou nung in gari hong gingta a,
window apan ka daak a, ka nute hin ka naute hileh muh ding aom nawnkei,
ka inn lam uh ka gal et a, ka khua ua mite’n hon simmoh mahle uh ka itna
a lian deuhdeuh hi’n ka thei a, Lamka lam pai ding ka utlouh tha asuak
deuhdeuh hi. Himahleh sel a pel theivual lah kahitakei a, ka paimai a
ngaita hi……
Lampi dung bang ah haksa kasa mahmah a, hiai bang a it leh ngaihteng
taisan a, theih ngeilouh, maingal hetlouhte kiang a va om ding in ka
ki-et chiang bang in naupang ka kisa mahmah lai hi. Ahihhang in innsung
khosak haksalua apan neukha ka dopsang theihna ding hizaw inteh, Pathian
muang peuh leng a lampi ding khat hong om nave chi’n kei leh kei bang
ka kihehnem zel hi. Lampi a gari ka tuan kawmkawm un ka khodak a, mual
leh tang hing dipdepte bang ka galmuh chiang in ka naute toh khonawl
khawng a vasa kap a ka kuan khawng uh ka lungsim ah hong kilang a, ka nu
leh ka naute ka ngaihtha suak deuhdeuh bang kasa a, kuamah theihpih
hetlouh in aguuk in khitui kana nuulnuul mai hi. Lampi bang sau kasa
mahmah a, Lamka kitunghak kasa lua hi. Lamka va tung hita leng zong ka
paneu leh ka nuneu bang in honna dawnkei le uh ken bangchi theih ding
chih bang ka lung abuai mahmah hi. Ka pa omlouh, ka neuchiklai a hong
pai ua ka muh chihlouh mukha lou kahihmanin ka theih nawnlouh ding bang
leng ka lau lehlamta hi.
Sawtkhoptak gari a ka tuan nung un station ka tung khongkhong uhi. Ka
tun phet un gari ah ka kumkhia ngal a, ka van neih sunsun teng bag
lianlou khat leh siik singlem lianlou khat a pua kahihman in ka lakhe
pah hi. Naupang chik kum 10 vel khawng mi ading in van neuchik leng a
gik baih mahmah hi. Gari handyman pa hong kum a, “nang kua toh e? na
singlem bahara ding Rs. 20 hong pia aw..” hong chi hi. Ka nu’n a sum
khol aneihsun dangka 500 ka papi piak dinga hong puaksak leh kei ading
chia dangka 10 hong puaksak lou sum ka neikei hi. Ka paneu ading a ka
sumpuak piak chih lah hitheilou, kei neihsun dangka 10 lakhia in, “U aw,
ka nu’n hiai kia hong pawsak zou eive…” chi’n a theihsiamna ka ngen hi.
Himahleh theisiam hetlou ahiding a, “sum neilou ba van hiai teng toh
khualzin e..” chi in ka biang hong betsak a, ka sum dangka 10 laksak toh
hong thuah hi. Hong betna na kasa mahmah a, kah ding zum chi a kahlouh
teitei ka sawm leh ka biang ah khitui hong luangsuk detdet mawk hi. Ka
paneu mel bek muleng ka khasiat nuamtuam ding hia maw…chi’n ka ngaihtuah
vungvung hi.
Zotna ding lah theilou ka hihman in keivuak in lamlian gei ah ka bag
angpom in ka singlem tung ah ka tu hi. Sawt bang ka tusimta a, khua leng
mial ding in hong kisa simta ahihmanin ka mangbang mahmah mai hi. Zing
ann nasan nelou kahihtoh ka gil akial mahmah a, ahizong in ann nekna
ding sum lah ka neikei a, nei hi himhim lengle koi a hotel om ahia chih
leng ka thei tuansam kei hi. Huchia mangbangtak a ka omlai in, ka
khanglam deuh a papi zukham hong hoi tou diangdiang khat ka muhman in ka
chii bang aling a, ka diip kua in ka lau mahmah hi. Hong nai hiaihiai
ahihmanin en leng ka en ngam nawnkei hi. Kun ngiungeu a ka omlai in
thakhat in ka kiang apan “Muanpu na hi hia?” hong kichi a, dak a ka
ettouh leh den a zukham ka galmuh ka paneu ana hi maimah a, ka kiguih
zozen hi. Kenleng “Pa aw, himah ing ei, nang ngak a hiai a ana tu
kahi..” chi’n ka dawng hi. Aman leng koi e na bag ken hong paw ning,
nang na singlem na lu ah hong khusuk aw.. hong chi a, gilkial-thazoi toh
singlem lupuak ding ka lin mahmah hi, himahleh ka hih ding mah
ahihmanin ka hih hong ngai zel hi.
Ka paneu hizen napi in zu khamlua ahihmanin lampi ka paina bang uah
ka guk etet a, ka lausim mahmah hi. Huchia saulou ka painung un inn ka
tung uhi. Innsung ah ka paneu zi leh a tapa Suanbawi kia ana om uhi. Ka
nuneute’n ka tunphet a ka van honna sangpah ding kasak leh hou leng
honna houpih hetkei ua, lamdang kasa sim mahmah hi. Kenleng ka vante
koihkhia in tutna nawl khat a kuamah houpih ngellouh in ka tu hi. Ka
nuneu in kamdam a hong houpih ding kasaklai in simmoh kampau toh
“Muanpu, hiai lam nongpai a, na nu’n hong enkol zou ding amaw, a koi
alah sum muhna neilou dinga..” hong chihsan hi. Ka khase sim mahmah a,
ka paikhak bang ka kisikna alian semsem hi. Na gil kial hia? Ann nekhin
maw chih beek kikan lah omlou ahihman in zankhua in gilkial thuak in
ihmu leng ka ihmu theikei hi.
Ka nute ngaihna toh, ka gilkial toh keivuak in ka lupna tung ah ka
kap khovak hilhel hi. Khua vaksiang pan ding in ka thoukhia a, ka mai
khawng phiat in ka kihihhalh hi. Sawtlou in ka paneu leh ka nuneu leng
hong thou ua, ahong kihahsiang zoh un ka nu hong sum puaksak ka paneu ka
pia hi. Ka paneu ka piak leh ka nuneu in ken kem ning chi’n ka paneu
khut apan alaksuhpah a, ka paneu inlah bangmah gen ngam tuanlou in
paulou in hehmel tak in a tu hi. Ka nuneu keilam hong nga a, “Muanpu,
zingchiang in hostel ah kong kha ngal ding ua..” hong chi a, lamdang
kasa mahmah, lah dong ngam tuanlou kahihman in kenleng “awle, nuneu nou
chih dandan..” ka chisuk hi. Amau inn a om dinga pai zaw hi inga
bangziaka hostel a om ding hon chih mawk uh ahi diam aw chi’n ka
ngaihtuah khop apha hi.
Nikhat leng om nailou himahleng ka nuneu in nasep ding tampi hong
guan hi. Ka gari tuanna ka gim leng pha nailou in puansawp ding tampi
hong pepah ngal hi. Puan teng kenleng thumang tak in ka sawp a, ka
sawpzoh in tawldam ding chia innsung ka lutpat leh “zouta maw, hoih e,
hiai baltin la inla innkong a suang teng inn nunglam ah va nawn in..”
hong chih behlap hi. Kenleng a baltin kala a, a baltin a suang adim a
dom ding ka chih leh I tha hat nailou ahihtoh dom zoulou in ka kipaihpih
a, a baltin ka susia a, ka khuk khawng suang in hong at a, anat genlouh
a si bang leng hong pawt hi. Himahleh ka nuneu in baltin ka suksiat
ziak in ka bil ah hong kai a, innsung ah hong kou zialzial hi. Na kasa
mahmah a, ka kapkha zozen hi. Ka mittui hong luang chiang in ka nuneu
hong heh deuhdeuh a, tai leh housiatna tam ka tuak mahmah hi.
Huchia haksatak a na kasep nung in khua hong mial nawn hi. Khomial
tung apan ka lumpah a, ka maban hun ding bang, ka nuneu hong kampau
zatkhumte bang leh ka nu leh ka nau neu chikchik nih tegel bang ka
ngaihtuahna ah hong suak den ahihman in ka ihmu thei mahmah kei a, ka
kiheihei mai hi. Zingkhua hong vaak leh koi mun hostel a hong omsak ding
ahi ding uam aw chih bang ka ngaihtuah chiang in ka lungbuai mahmah hi.
Achang bang in a thohma ua thoh a, pautam lou in innlam a ka nute kiang
pai a, amau toh anuam ahak thuakkhawm ding bang ka tel zaw sim hi.
Himahleh ka lungsim khat in ka nun kinepna lianpi toh hong paisak ngal
leh a kinepna tan ka tungzou kei zong in bang tan hiam bek, pasal khat
kahihngal leh chi’n pang thouthou ding in ka thupuk hi.
Zingkhua hon vaak nawn petmahta hi. Ziing ann ka nekzoh un ka nuneu
in “Muanpu, na vante na singlem ah guang in, hostel ah hong kha ding
kahita” hong chi hi. Kenleng awle chi in ka vante khep in ka singlem ah
ka guang ngal hi. Ka hih ding teng ka hihzoh vek in ka van ka lu a ka
paw nawn a, ka nuneu toh hostel zuan in ka pai uhi. Sawtkhoptak ka pai
nung un inn lianpi khat kibawl kamu a, huai mun hingei ding in ka gingta
hi. Ka gintak bang ngei in ka nuneu in “Muanpu, huai inn ahi na omna
ding..” chi’n hong hilh hi. Ka paipai ua, a gate ka tung khongkhong uhi.
Gate ka tung un ka daak leh signboard liansim khat ah, “MIGENTHEITE
KEPNA” chih ana kitaak a, genthei himahleng Hostel a om ding chi a tagah
kepna a hong khak hial uh ka nuneute ki-awi uh kasa mahmah a, ka khase
mahmah mai hi.
KHEN II na
Amun ka luutma un inn lianlou khat ah ka nuneu in hon lutpih a, ka
ngaihtuahna asang mahmah ziak hiam ka theikei, ka chihum mul khawng hong
thou a, ka nu ka itna alian semsem hi’n ka thei hi. Innsung ah papi
khelchisim khat ana tu a, ka nuneu in “Pu, hiai ahi hon omthak ding..”
chi’n kei hongkawk hi. Kenleng gen ding bangmah ka theikei. A TV uh kana
en a, Vungthiankim in asak “Tunnu aw hong itpen ing, ka ngaihpen tuun
aw, na sakmel zong etlawm semsem e… Kong itna lian semsem e, kong
ngaihna khang semsem e, tunnu siang mah nuampen lungdam pen…” chih laa
hong suak geih a, bench panga kingai in kei kia in mittui kana nuulnuul
mai hi.
Saulou huchia ka tut zoh nung un pasal pa’n ka khut ah thakhat in hon
man a, aw khauhsim in “hon zui ouh..” chi’n ka khut ah honkai suk mawk
hi. Lausim ka hihtoh ka nuneu ka etleh hong nuihsan a, innlam zuan in
hong paisan zomah hi. Ka khase petmah chihlouh gen ding ka theikei.
Pasalpa’n room khat ah hon koih a, lupna sawng bang ana tam mahmah a,
ana omsa naupang ka khanvual hunkhop omte’n hon muh ngeilouh ziak uh
ahingei dinga honna en souhsouh uhi. Ka hoh patna, ka ompatna ding
ahihtoh ka lin mahmah a, lah ka hihtheih om tuanlou ahihmanin a utpen
bang in ka omsukta mai hi.
Sun hunte hong bei a, nitaklam nitum ding kuan mualdawn ah ni inntung
a tu kawm in ka gal et a, ka nu leh ka naute ka ngaihna alian mahmah
mai. Innlam a kanaute toh innsak khawng a ka kimawl ua, ann nek hun
chiang a ka nu’n “bawi, na naute toh hong paita uau…ann nephot ding..”
chia hon sap lai bang ka bilkha ah hong ging chiaichiai hi. Ka lungsim
in taikhiat a innlam a kanu sepsep seppih in ki om mai henla, ka naute
lai hoihtak a simsak in ken kiloh in vaak zawleng maw chih peuh ka
ngaihtuahna ah hong suak hi. Huchia thil tuamtuam ka ngaihtuah laitak in
thakhat in ka nunglam apan “hey, nang naupang huai a banghih a om e,
kintak in hongpai aw, hiai mun ah nou ut dandan aom chih omtheilou…”
chih aw kaza a, kenleng kintak in ka room lam uh ka zuan nawn hi.
Hunte hongpai zel a, huchi’n lawm bang nei in ka omna nuam kasa
panpanta hi. Lawmhoih mahmah Lianbawi kichi khat kanei a, aman hon
hehpih banah honna ngaina mahmah hi. Huchi’n amah toh ka om nana uah ka
omkhawm uhi. Himahleh kou tegel lawmte laka zong aneu deuh kahih ban uah
taksa et azong mi phalou kahihman un simmohna ka hah dong mahmah uhi.
Ka lawmte uh kuang, puan bang ka sawp ni uh atam a, kou hun tunni lou
nasan ah zong ka room bang uh ka zuut gige uh angai hi. Hiai bang thute
heutute kiang ah gen ding inlah hangsanna ka neikei ua, genle ungleng
kou thuakna ding phet ahi chih ka theih man un ka dam nak ualeh kasem
gige uhi.
Ka omna neitute’n skul hong kaisak ua, nitak teng in lai kasim uhi.
Lawmte laka a siampen hih ding chih ka tup tinten man in ka hahpan thei
mahmah hi. Ken bel lai siam a, ka nu leh ka naute Lamka khua a nuamtak a
khosakpih ding chih kana tup tinten ahi. Huchia kapan ziak mah ahidinga
ka skul kaina ah a siampen in ka pang gige a, lawman bang ka sang zel
hi. Himahleh ka siamna ziak in ka omna uah ka lawmte’n hong haza ua, a
thu omlou peuh in hon vua ua, ka laibu peuh hon bohkek sak zel uhi.
Himahleh keibel ka heh tuankei a, laibu dang in ka gelhkhe zel a, ka sim
ngei bang in ka sim thouthou hi.
Final exam ding kuan ka hita ua, nikhat skul khawlsung in ka
Principal pa un a room ah honsam hi. Chikmah a kihou ngeilou banah
sappau zong siam hetlou kahihna toh ka lin mahmah hi. Bang hon genpih
nuam eide aw, ahihkeh ka hihkhelh om a hon zeep ding eide aw chihpeuh ka
lau mahmah hi. Lah a thu seelna vual omlou ahihmanin kei leng diip hawm
zen in a room ah kava luut hi. A ma a chair chikmah ale ka tutkhak ngei
nailouhna a nip thiahthiah tung khat ah hon tusak a, ka zum toh a mai
mahmah leng ka en ngam nawnkei hi. Ka peon pa uh hongluut a, singpi
honpia in ka Principal utoh ka dawn uhi.
Singpi ka dawnkawm un ka Principal pa un ka hinkhua diktak leh ka
omna khawng hoihtak in hon kan a, kenleng ka hinkhua, ka gentheihdan, ka
nu leh naute omdan, lamka a ka nuneute hon bawldan banah tua ka omna a
laisim toh kisai a haksatna ka tuah tengteng khawng hoihtak in ka gen
hi. Ka genzoh in lamdangtak in ka Principal uh mittui hong luang mawk a,
etna ding meel leng ka thei nawnken. Anung in awl in hong paukhia a,
aman leng kei banga haksatna tampitak ana palkhinta ahihdan hoihtak in
hon hilh a, hon khasiat mahmah ahihthu hon gen hi. Huchikawm in ka
kinepna khenlam ah “Mangbawi, ka inn ua kumnawn apan hon omta in, ken
lai nasim ngap tantan hon enkol ning..” honchi phut hi. Kipahna toh
khasiatna toh ka bianga mittui hong luangkhe zungzung hi…..
Skul kai ka tawp uapan ka ngaihtuahna kikhek hi’n ka thei. Akal in
kipahna toh ka om a, akal inlah ka lungsim khat si dedu bang kasa hi.
Himahleh kei kia ka nu leh ka naute kinepna ka hihmanin chi’n theihtawp
suah a pang ding in ka kisa hi. Huchi’n kenleng hun awl ka neih sungteng
lai mah ka en den a, ka lawmvualte kimawl hun na ngawn in kimawl ding
in ka pai ngeikei hi. Huchibang a ka omziak ahingei dinga, koute hon
enkoltu ka wardenpa un akallak in hon tai sek hi. Himahleh ken tup
thupitak nei kahihmanin huchibang a hun pammaihtak khahsuah ding ka
utkei a, ka tup tangtunna ding in theihtawp suah a pang tenten ding chih
louh ngaihtuah in ka neikei hi.
Theihlouh kal in hun hongpai liam zungzung a, huchi’n final examte
bang zou in ka omna uah sunnitum in nna khawng sem in ka buai thei
mahmah uhi. I ngaklah mahmah uh Krismas gim bang hong nam mahmah ta a,
biakinn tuamtuam apan Krismas laate hong kikhah le ka khua uh ngaihna
hong puang semsem hi. Nasepna gim toh lunglen toh haksa kasa mahmah mai
a, ka omna ua Krismas kuanchia innlam a apii ding omte paisak zel uh
chih thu bang kazak leh ka lung anuam tuan mahmah hi.
Hun bangtan hiam hongpai zou nawnta a, huchi’n tanaute a pii ding in
hong kuan sauhsauh uhi. Keileng ka kithalawp mahmah a, ka van teng ka
bag a guang in ka nuneu hongpai hunhun a pawtkhe thei dia mansa in ka
omta hi. Ka lawmte bang in chibai khawng hon buuk ua, mangpha hongkhaak
chiang un ka paikin ut tha asuak deuhdeuh hi. Ka nuneu ka mit hah
sungteng hongpai hiam chi’n gate lam ka en den a, ni 3 tan inleng a meel
muh ding ahi takei. Ka khase mahmah a, ka pianna ka nu leh ka naute
muhlouh ding chih ka ngaingam mahmah kei hi. Lawmteng inlah hon paisanta
uh, kei toh ka wardenpa kia uh ka omta ua, ka thawmhau mahmah mai hi.
Ka wardenpa nasan uh pai ut ahingei dinga hon philphil mai hi, himahleh
kei piitu ding omlou ahihmanin kei deihteelna hilou in ka ommai a ngai
hi.
Krismas ni ding ni 3 kia in asamta hi. Lungleng lua kisa in inntung
ah kei kia in kava tu hi. Ka mittui bang hong pawt a, ka ngaihtuahna
bang a sang mahmah hi. Ka daakvel a, ka nu leh ka naute bang mu ding mah
kabang a, lah muh ding kuamah ana om ngeikei. Lampi dung khawng ka
gal-et zel a, ka khanvualpih a lawmte toh kimawl nainaite khawng,
lamdung a pawtkhawm zaizaite khawng ka muhchia’n ka khasiat asuak
deuhdeuh hi. Huchia mittui nuul kawmkawm a omlai, ka daakkhiat leh kinem
hetlouhpi in gate lam ah……..
KHEN IIIna
Huchia mittui nuul kawmkawm a omlai, ka daakkhiat leh kinep hetlouhpi
in gate lam ah ka Principal pa uh hongpai ka galmuh hi. Ken leng ka
kiang a thu hon gensate ana theilai ka hihman in ka lungsim khat in
honpi ding hi ngeingei ding in kinepna ka na nei mawk hi. Inntung apan
hoih muh mahmah kahihchiang in keilam hon zuan hiam chi’n ka gal et-et
mai hi. Ka omna uh neitupa toh a kihoulim nilouh ua, bangtan hiam a
kihou zoh un a nih un kou omna lam hon zuanphei uhi. Kenleng paitheita
ding chih lungsim nei kahihman in ka kipak mahmah a, kintak in ka room
lam ka zuanpah hi. Ka kinep bang in ka room ah honluut ua, honpikhe ding
ahihdan hon hilh hi. A thugen ka zakleh ka lungsim noplouhna tengteng
thakhat thu a buakkhiat abang a, ka nute mukha ding chi’n ka kipahna
alian mahmah hi.
Ka vanteng kisaksa a koih kahihman in kenleng ka bag ka paw pah a, ka
Principal uh nung ka zui ngal hi. Ka khut ah hon len a, awl in hon
paikhiatpih hi. Lampi ka pai kawm un ka pautam hetkei uhi. Ka lungsim
tawng ah ngaihtuahna tampi ka nei a, ka Principal pa uh hon deihsakdan
bang thupi kasa mahmah a, huchi kawmkawm in ka nuneute bang lamdang kasa
mahmah hi. Aziakbel ei naupang nou khat kihilai ahihchiang a amau apan a
kinepna lianpi neikha mawk kahihmanin. Ka omna ua ka omlai himhim inle
Pathianni nitaklam nu leh pa leh tanaute’n veh theih chih ahihmanin ka
lawm tengteng in vehtu ding bang anei gige ua, himahleh ka omsung teng
khatvei mah leng kei hon vehtu ding aomkei a, ka lawmte ka enluat manin
ka khasiatni bel atam mahmah hi.
Saulou ka paizoh un ka Principalte uh inn ka tung ua, huai ah hon
khawlpih hi. Amel ka etchiang in kipahmel a mu hetlou ka hihman in ka
lungsim anuam hetkei hi. Bangziaka nidang a ka kianga nuihmai gige tuni
hon hichih eide aw, ka result hoihlou hia ahihkeileh ka tung a lungsim
noplouhna nei ahiam chih peuh ka ngaihtuah khop a, ka lungsim anuam thei
mahmah kei hi. Va kan ding lah hi kasakei a, lah ka thei ut mahmah hi.
Kan ngamlou a omden kahihlam hon thei hileh kilawm in hon enphei a,
“Mangbawi, innlam ah na nu damlou achi ua, na paisuak ngai ding ahi…
denchia station tan kon kha ding” honchi phut hi. Ka lungsim a nuamkei
deuhdeuh a, tut leng ka tu muang thei nawnkei hi.
Bangtan hiam zoh in “Mang, station lam zuanta ni aw..” chi’n ka bag
hon puaksak a, kenleng a nung ah thumangtak in ka zui hi. Lampi ah
nektheih tuamtuam na naute ading chi’n hon leisak a, ka kipak mahmah hi.
Theihlouh kal in station ka tungsuk pah ua, ka gari ticket ding khawng
hon laksak vek zoh in “Mang, damtak in nava pai dia, suty na hon zatzoh
phet chiang in Lamka ah honpaisuk inla, kou inn ah hong paisuak in aw..”
chi’n mangpha kikhak in ka kikhen uhi. Keileng meltheih lah om tuanlou
ahihtoh denchia mi tamleh kuamah phuzou lou ding kahihchiang in chi’n ka
tutna ding mun ka zuan hi.
Gari a mi atam mahmah a, huchikawmkal ah papi khat ka tutna lam zuan
in hongpai phei a, ka kiang hon tun tak in “naupang, nang bangziaka ka
tutna ding a tu e, kintak in paikhia aw..” chi’n pawtkhe ding in hon
sawl hi. Kenleng ka ticket ka lak a, himahleh a phatuam kei phetlou in
ka biang hon betsak a, ka khut ah hon kaikhia zomah hi. Ka tutna ka
tankhak nawnlouh banah ka biang hon betna na salua kahihman in milak
aleng zum zoulou in ka kap hi. Himahleh hon panpihtu ding kuamah omlou
ahihman in ka kah inleng gen a nei tuankei. Mite’n hon en demduam ua,
himahleh kuamah kei adia hon pausak ding aom tuansam kei uhi.
Huaiziakin, kei leng ka dai a, munkhat ah ka ding hi. Ka tha khauh
zoulou ahihmanin gari in a langlang ah hon sing a, anuam kei mahmah hi.
Gari sung ah ka dinkawm in thil ka ngaihtuah khop a, huai ka tutna
hon suanpa hon bawldan bang na kasa mahmah a, banah ka paima deuh a ka
nu damlouh thu bang in ka lungsim hon sugim mahmah hi. Inn tung leng ka
nu bang ana chide aw, ka naute ana kipak mah ding uh chi’n ka ngaihtuah
khop hi. Inn tung ding bang ka ngaklah mahmah a, gari a khawlzek chiang
bang in ka khua uh tung ding dan in kana kikoihkha pahpah hi. Lungsim
gim toh taksa gim toh sawtkhoptak gari a kon tuang nung un a tawptawp in
ka khua uh ka tung khongkhong uhi.
Ka tunphet un gari in ka kumkhe ngal a, innlam zotpah vengveng ka
sawm hi. Ka gimsim ziak hia ka bag bang gik mahmah hile kilawm kasa a,
ka naute bek in ka pai dinglam theile uzaw honna dawn ding uhia chi’n ka
ngaihtuah hi. Ka paizel a, ka nu leh ka naute bang in lampi a honna
ngak ding bang in ka ngaihtuah a, ka mitkha peuh in ka mu hi. Ahizong in
ka muhphak ding in kuamah a om nawnkei uhi. Ka inn uh ka naih mahmahta
a, kigalmuh hoih mahmahta hi. Innkong bek a ka naute kimawl a om ding
kasak leh aom hetkei ua, ka lungsim anuam kei deuhdeuh hi. Atawp in pai
leng pai thei nawnlou in tai in ka taitung thohta mai hi.
Kongbul ka tung a thawm bangmah kazaklouh chiang in lungnoplouhna ka
nei deuhdeuh a, huchi’n kong kintak in ka hong a ka luut ngal hi. Ka lut
leh ka lupna tung ua ka nu ana lum a, agei ah ka naute gel ana tu
ngiungeu uhi. Ka muhleh ka khasiat tha hong suaklaw guih a, ka van
tuangtung a khesuk in ka kapkha zozen hi. Ka nau tegel in hon delhpah
ua, amau leng bangmah gen ding tuan theilou in ka unauteng ua kikawi in
ka kikah khum ek uhi. Kivaitundan haksa kasa mahmah a, ka nu mel leng
ana ethak mahmahta hi. Kenleng ka van kheng tuanlou in ka nu kiang ah
kava tupah hi.
Ka nu nidang bang in ana pauzou kei a, tangzoulou sasa in ka lu hon
khoih a, ka sam hon zuutsak hiauhiau hi. Ka gen ding leng ka theikei a,
damdawi leina ding lah neilou kahihman un ka lungkham mahmah hi. Atawp
in sih leh sih, kei naupang himahleng ka unau ua u pen hiveng chi’n
damdawi batlak ding in pharmacy lam kava zuan hi. Pharmacy ah damdawi
kava nget leh “kou abat a kuamah pelou..” honna chihsan ngal a, gen ding
tuan theilou in mundang kava zuan nawn hi. Huai a kava nget nawnleh
Digene tangkhat honna pia ua, honna nuihsan ekh zomah uhi. Ka maizum
mahmah a, himahleh zum a pha ding bangmah aom kei hi. Ka nu damdawi ding
lah mulou kahihmanin innlam zuan di’n ka kisa hi. Himahleh khatvei
enthak lai thouthou ding chi’n munkhat ah kava ngen nawn hi. Huai a ka
ngetnate’n a damdawi uh tamkhop honna pia ua, ka kipak mahmah hi.
Ahihhang in, a damdawi hunbeisa teng uh honpia ahi a, kenbel huailam le
ka theipha kei hi.
Inn ka tunphet in ka damdawi puakte ka nu kape pah hi. Ka lungsim ah
hon dampah ding chi’n kana kinem mahmah hi. Himahleh damdawi hunbeisa in
phattuamna neilou ahingei dinga, ka nu agim deuhdeuh hi’n ka mu hi.
Amuk hon phun a, bang gen ut eide aw chi’n ka naihsuk a, himahleh
bangmah a gen tuankei. Hon thohsawm dan in om a, keila naupang lawlai
kahihman in ka nu kaitou zoulou ding kahihmanin ka unau teng un ka nu ka
phongtou ua, ka tusak uhi. Ka nu’n ka unau teng un hon kawi a, kei hon
en in “Bawi, na naute hoihtak in ana enkoltou gige in aw…” honchi a, hon
chih zoh sawtlou in a naak hong awl hiaihiai a, sawtlou nung in hon
beisan hi.
Ka unau teng un ka kap ekh-ekh ua, “Nu, hon dampihlai mahmah ve, kei
na tapa lianpen leng kum 11 milel khawng hipan inga ka naute naupang
lawlai, ken nang tellou a bangchi etkai ding kahiam…” chi’n ka nu kawi
in ka kapkap mai hi. Innkim-innpamte’n lah naupang hon kap hi chi uh
ahingei dinga delh leng honsawm vetlou uhi. Himahleh dakkal khat hial
bang kong kah chiang un hon kidelh huan ua, ka inn bang uh hon
hahsiangsak uhi. Kou unauteng ka nu luangbul a kikawi a kap keuhkeuh
nupi hon in hon muh chiang un hon hehpihlua uh ahingei dinga hon
kahpihpih uhi.
Sawtlou kal in programme hon zatpih ua, khosung alah tanau laina
hoihtak neilou kahih utoh ka paneute lah hong hoh lou uh ahihmanin
innteek thugen ding nasan ka omkei uhi. A tawp in kenleng naupang lengle
chi’n mipi mai ah kava pai a, “U leh naute, khosung mipi tengteng na
tung uah ka kipak, ka nu non itpih man un..” chihteng kava gen hi. Adang
gen ding chi lengle ka gen ding thei tuanlou kahihman in. Huchi’n
programmete kon zouta ua, haan lam a vuikhiat ding in ka nu luang hon
zawnkhiatsak uhi. Innsung apan kanu luang hon kizawn pawt leh ka
unauteng un ka om theikei ua, kah petmah in ka kap uhi. Lah thil I
deihdan a paitheilou ahihman in a om dandan ka puaksiam uh hong ngai mai
hi.
Ka nu ka vuikhiat zoh nung un kou unau teng ka thum un inn ah ka
omzel ua, ka thawmhau thei mahmah uhi. Akallak bang ah ka ann nek ding
bang uh honbei a, kiloh ding chileng lah kinaupang lua ahihman in kuaman
kiloh ding in hon deihkei ua, haksa kasa mahmah hi. Ka naute toh poison
ne a sihkhawm mai ding eide aw chihpeuh ka ngaihtuah hun a tam mahmah
hi. Krismas na ngawn ka zangkha kei uhi. Azang ding hi himhim le ungleng
kuaman bangmah hon gen kei leleng mi sum thohna a en thohlou a ann
vanek ding ka utsam kei uhi. Mite khawng ka eng thei mahmah uhi. Ka unau
teng un ka tut uale tukhawm, ka hihhih uh hihkhawm in ka kizui nainai
uhi.
Nikhat innsung a ka naute toh ka tutlai un ka lungsim ah thilkhat
honsuak hi. “Hichia ka omom ua hitheilou ding ahihman in Lamka lam ah
kipaisuk henla, ka principal pa uh kiang ah kigen henla, kanau ompihsak
in, ken kiloh theihna ding ngaihtuah in ka nau neupen uh ki-enkol leh
lampi hon omding ahi, hiai a lunggim leh lungngaitak a khosak in bangmah
hon tun kei ding..” chih ka ngaihtuah kha mawk a, diksa kahihtoh ka
naute kiang ah ka gen leh ka naute’n leng “U, nang chih dandan aom ding,
hilele I nu luang omna khua taihsat ding haksa kasalua uh..” honchi
uhi. Kenleng haksa kasa mahmah, himahleh huai haksa a thil pai theilou
ahihmanin maban etna toh Lamka lam zot ding chi’n thupukna ka lata uhi.
(aban omlai…….)
KHEN IVna
Huchi’n ken ka nu galna a sum hon piak khawmte uh ka en a, ka unau
teng ua Lamka tunna dia kidaih mahmah ding ahihmanin ka kipak mahmah hi.
Ka nu sihnung ni bangzah hiam paita ahihtoh kou leng ka thawmhauna uh
neukha a dan om deuhta hi. Huchi’n ka naute kia gen in ka van teng uh ka
kisa uhi. Inn pawtkhiatsan ding chih thil baihlam ahihlouhdan ka mu
semsem. Zingkhua bang hon vaak nawnleh Lamka lam zuan ding hita kahihman
un ka unauteng un paak tawi in ka nu haan lam ah kava hoh uhi. Ka nu
haan ah paak khawng kava koih ua, ka unauteng un ka nu haan ah kava
kapkap uhi. Khua bang hong mial dek hialta ahihtoh kou leng innlam zuan
in ka paikiik sukta uhi.
Inn ka tunphet un gen ding theile omlou in daitak in ka tu khipkhep
uhi. Meivak det ding lah nei tuanlou kahihman un khomial toh lupmai ding
ka sawm uhi. Zingkhua hong vaak lelah Lamka lam zuanta ding kahihman un
kigentuah kei mahle ung ka unauteng un ka ngaihtuah uh a tam mahmah
chiat hi’n a kilang hi. A ihmu kuamah ka omkei uh, himahleh a pau leng
ka om tuansam kei uhi. Huchia ka omlai un ka nau neupen kum 7 vel ding
hipan in “UMang, nunu ka ngailua.. aman hon kawi ihmu gige..” chi’n hon
kapkhe mawk a, ka nau toh khem tum mahle ung kouleng khase deuhdeuh
kahihman un a kikhem zaw ding sam omlou in ka kikahhuan mai uhi.
Ihmu hetlou a zankhua ka zatnung un khua hong vaakta hi. Kou leng
kihihsiang in ka unau teng un ka khua ua Pastor pa innlam kava zuan uhi.
Pastor pa ana omlem vanglak a, “Naute, banghih ding a hong pai liailiai
nahi uale..” honna chipah a, kouleng ka thilsawm teng uh hilh in
Pathian kiang a hon thumsakna deih kahihdan uh kagen ua, amah leng ana
kipak mahmah a, “Naute, na naupang mahmah hang un Pathian in lungsim
hoihtak hon guan ahi, na thilsawm uh piching tampite’n leng honpha
zoukei uh, kipahhuai mahmah e, hoihtak in hon neihsak ning aw…” honchi
a, huchi’n Pathian kiang ah thumna leh khakkhiatna hon nei a, a zoh phet
in chibai kibuuk in innlam zuan in ka pai nawn uhi.
Inn ka tun un ka vante uh tamlou chiat a pua in nihvei nawn ding
chi’n station lam zuan in ka paisukpah uhi. Station kiang a dukan
lianlou khat ngakte kiang a ka vante uh honna etsak din ka ngen ua,
huchi’n ka van puak zohlouh teng uh kava lakiik nawn uhi. Ka man un ka
naute toh gari ngak in ka om uhi. Sawtlou ka ngak nung un gari hongpai
a, ka vanteng uh a handyman pa’n hon guangsak a, ka tutna ding uh hon
hilh ngal a, huchi’n gari sung ah ka tuangpah uhi. Innlam ka zotlai toh
teh ding in mi atam hetkei a, nuamtak leh thovengtak in ka pai thei uhi.
Gari sung ah ka ngaihtuahna ah thil hon tam mahmah hi. Ka Principalpa
uh inn a ka unauteng ua va tun mawk ding chih haksa kasa mahmah hi,
aziakbel bangmah hilhkholhna chih lah nei tuanlou banah mi thum tak ka
hihman un. Aguk bang in thumna ka neinei mai a, lamzangtak a ka om
theihna ding un ka ngenngen mai hi. Tomchik tuangpan ka kisak lai un
Lamka ka tung uhi. Station ah ka kum ua, kou vuak a lah ka van ten paw
zoulou ding kahihman un auto kadawp a, huchi’n Auto in ka Principalte uh
innlam zuan in ka pai uhi.
Ka kaina skul neitupa uh inn ka tung ua, amah kia ana omkha geih hi.
Hon muhphet in “Eh, Mang, hon paita maw, suty nava zang nuam nahia, na
nu lah bang achita a?” chi’n honna dongpah hi. Kenleng ka thiltuah
tengteng ka gen a, kei taang a ka nau ompih zaw dia ka nget banah ka
innluah ding uh lianlou hon zonpih ding in ka ngen zomah hi. Lungsim
hoihtak leh hehpihna hautak khat ahihmanin aman leng “Mang, naupang nou
khat lunggel ding in piching mahmah e, na thupi lua. Na chihbang in na
nau ka ompih dia, ka enkol ding. Nang leng skul hongkai keilechin leng
konna khumluut dinga pawl X na zohma exam hun teng a non exam ding, na
lehkha sim ding ken kon pe gige dia, nitak hun teng in ana sim in..” hon
chih behlap zomah a, ka kipahna alian semsem hi.
Ka unauteng un innluah ding kamuh ma uh ka skul neitupa inn ah ka om
ua, inn nna tuamtuam khawng ka hih theih dandan un ka seppih nainai ua, a
zi bang a kipak thei mahmah hi. A nupa bang un ka innluah ding uh zong
in abuai thei mahmah ua, ka kisuanglah thei mahmah uhi. Himahleh
huchilou lampi dang om nawn tuanlou ahihchiang in ka thuak bangbang uh
thuakphot angai mai hi. Kalkhat bang hong kivei zoh in inn lianlou, kou
unau nih adia bel hun mahmah ding khat ava mu ua, ka va en uhi. Lungtun
huai kasa mahmah ua, a inn neite bang leng mihoih chi mahmah ahihlai man
un ka kipak semsem uhi.
Inn thak ding ka hah zoh un ka nau ka sam a, “Nau, skul neitupa toh
om ding hita nahihchiang in eila bangmah hilou I hihchia a thuthu uh na
mang dia, lai hoihtak in na sim dia, khatna a na pan gige ding ahi aw,
huaichiang in amau hon sawlna lou a pawt mawkmawk kenla, kal khat in
khatvei bang kou kon hoh gige zaw ding uh aw…” chi’n ka thuhilh a, aman
leng “U aw, himah tham e, leitung a hehpihtu ding I neihlouh lai a hon
hehpih a hon khotuahtute thu bangbang in ka om dia, ka theihtawp kon
suah ding. Nou leng damtak in non om ding ua, Pathian panpihna toh I
unau teng un mikhat I suak ding uh aw..” hon chithuk a, kenleng hi kasa
mahmah hi. Huchi’n ka Principalte nupa toh kou unau teng toh ka van teng
uh ka tuah ua, um leh bel zat ding leh ka van uh a kisam teng hon
leisak zomah ua, huchi’n thumna toh honkha uhi.
Ka innluahna uh gintak sang in ana nuamzaw a, ka unau un ka kipak
mahmah uhi. Ken leng septheih ding bang aom diam aw chi’n ka ngaihtuah
pah hi. Thagum a kilohna te bang a nitha tam deuh ahihman in kava kan
kawikawi a himahleh naupang honsa deuh ahi ding ua, hon deih khatbek
leng ka mukei hi. Ahitazong in ka lungke tuankei a, a langlang ka zong
kawikawi hi. Sawtkhop buaitak a ka om nung un Mahajon khat in a dawr ah
nasem ding in honna la hi. Ka kipak mahmah a, inn ka tunphet in ka nau
ka theisak pah hi.
Dawr ngak a kuanpah kahihman in ka nau a neuluat lai toh amah kia
omna dan om nailou ahihman in ka sepna ah ka tonpih hi. Na semtung mi
paidan lah thei nailou kahihman in ka hihkhelh hun bang aom pahpah a,
huchih hun chiang in ka Mahajonpa un nakpitak in hon tai ekh-ekh sek hi.
Hon hah tai sim chiang in ka nau ana khaselua ahiding a, munkhat ah ana
guuk kah zel hi, keileng ka khase thei mahmah, himahleh ka nau mai a
khasiat mel ka langsak utkei a, ka nau kiang ah, “Nau, khovel I chih
hichibang tuaklou a mi kisuak ngeilou ding ahi…” chi’n kava hehnem zel
hi. Ka nau kava huchi bawl ka Mahajonpa lungsim hi hetlou ahiding a
“Mangbawi, nang naudon dia hong kuan maw? ken huchibang mi deihlou,
mundang va zong mai aw…” chi’n hon tawpsak maimah hi.
Khaloh lah honpe lou, ka unau un nekding lah ka nei nawnkei uhi. Ka
skul neitupa kiang ua va tai ding lah ka nau ka ompihsak khit uh hita,
ngam huai ding vual hi nawnlou. Ka lungdong mahmah a, Pathian kiang a
thum kawm in ka pang uhi. Ann bang ka ngawlzel ua, naupang chik ann
ngawl chu ahaksa mahmah. Ka nau bang hai lai ahihtoh “UMang, ann ka
duh…” chih khawng in hon kap zel thei a, kei adi’n gen ding leh hih ding
dan a omkei hi. Lungkham huai mahmah chihlouh gen ding ka theikei hi.
Kei leng kisathak in sep theihna ding kava zong nawn hi. Ka thumna dawng
aom ahingei dinga teeklei sawp a kilohna ding khat kava mupah zenzen
hi.
Teeklei sawp in kava kuan a, ka nau leng ka tonpih hi. Ka nau toh ka
nih un awl-awl in ka sawp ua, ka kilohna pa un honna hehpih vanglak
ahidia ama apa toh teh ding in hon tai ngeikei banah niteng in pichingte
nitha bangbang honpia hi. Lungkhamna-dahna hunte kon zat touhtouh sung
un skul lut hunta ahihman in ka nau kava kaisak a, a skul ua vakha in
huchi’n kei nasem in ka kuanzel hi. Atawp chia pi manlou kahihman in ka
nau khatpen kiang ah ka omsak a, huchi’n kei nasem zou ka pai chiang in
ka nau neupen kava pii zel a, huchi’n inn kapai zel uhi.
KHEN Vna
Hichibang a ka unauteng ua hun kong zat touhtouh nung un theihlouh
kal in kum tampi ana paiman a, mi chia phakei mahle ung ka lian in ka
piching vekta uhi. Kei leng ka skul neitupa uh deihsakna toh skul kaikei
mahleng pawl sawm bang exam thei ding in ka om a, ka kipak mahmah hi.
Ka nau ahihleh pawl kua sim in amau pawllak ah khatna in apang gige a,
deihsakna leng a tang mahmah hi. Huchi mah bangin ka nau neupen uleng
pawl sagin bang a tungtouta hi. Ken ka theihtawp suah a sunnitum a nasem
ka hihman in ka gim thei mahmah a, ka tut zohlouh ni inleng lumkawm in
lai kana simsim samta hi.
Ni leh kha khawllou a pailiam zungzung ahihbangin pawl sawm exam ding
hun bang hong tung thei khongkhong hi. Kenleng nasem a ka kuanna khawl
zen in theihtawp suah in lai ka sim hi. Class a tel ngeilou kahihman in
midang teng sanga sim tamzawk kei adia thil poimoh ahi chih ka thei a, a
sun-azan chih omlou in lai ka simsim mai hi. Neklim lah kihih zoulou,
vitamin lah kine zou tuanlou ahihchia’n gawn loh zouhial ka bang hi.
Himahleh maban a ka hoihna ding ahihmanin lungke lou hial in kapang
semsem ahi. Huchia theihtawp suah a kapan nung in exam bang ka zouthei
khongkhong uhi.
Exam ka zohni un kenleng innlam zuan in ka pai pah vengveng hi. Inn
ka tunphet in inn ka zuutpah a, inn ka zuutlai in ka kong uh thakhat in
hon kikiu hi. Kenleng ka naute houh eide aw chia thakhat a kava hon gaih
leh, gintak hetlouhpi in regular a ka kailai a ka classmate numeite mi
giat lamtak hong luut mawk uhi. Ka zum mahmah a, etna ding leng ka
theikei. Singpi tuilum piak ding lah kineilou, a tutna ding nasan uh
omlou in tuanglai khawng ah puan ka phah a, a tubial mai uhi. Huchihlai
in alak ua Kimbawi kichinu pen in ka innzuutna puan hon laksaka, phalkei
mahleng ka inn uh hon zuut siangsak vek hi. Lamdang bang kasa zozen a,
hi heihuai hial in ka kithei ahi.
A lawmta teng un hon chiamnuih ek-ek ua, alak ua tel Roselyn bang in
“Umang, Kimbawi toh houh kiteng mai le uchin hoih ding hive aw, nang
tapa toh tanu toh thilteng na thuah tel hon dawn zangkhai ding ahi…”
peuh honchi uhi. Ki naupang thoulai ahihbanah chikmah a lawmngaih chih
ana kichiam kha nailou ahihmanin zumlua kisa in ka chi peuh hong liing
pian mawka, etna ding mel leng ka theikei hi. Ka lungsim tawng in
“hiaite lawi pai meng le uh hoih ding, mi suzum phet uh…” chihpeuh ka
ngaihtuah kha thepthup hi. Bangtan hiam zoh in ka lunggel thei uh hile
kilawm in hon paisan uhi. Apai hial uale peuh ka khiaklah tha khawng hon
suakmawk hi.
Ni hong tum nawnta a, zan huihkhi hong nung hiauhiau hi. Laisim ding
lah omlou phot, ka nau lah laisim ahihtoh chim kahihman in innkong
khawng ah huihsiang diik ding in ka pawtkhia hi. Ka omdan ah kikhekna
lianpi om hi’n ka thei a, lah hiai kikhek chih gen ding ka thei tuankei.
Banghiam thil ka ngaihtuah sawm chiang in ka lungsim ah sun a numei hon
hohte leh Kimbawi ka tunga ahoihna leh a siamna kia hong lang a,
thildang bangmah himhim ka ngaihtuah theikei hi. A tawptawp in ihmut mai
sawm in innsung a lut in k alum hi. Himahleh ka ngaihtuahna hing
deuhdeuh hileh kilawm in ka lungsim ah thil tam hong luut deuhdeuh a,
ihmut malak ah maimit siing manlou in taikhua hong vaal zel hi.
Exam zouphet kahihtoh ni khat ni nih khawl tawldam lai ding chi’n inn
ah ka om hi. Sun kei kia om kahihman in laibu khawng en in lupna tung
ah ka lum hi. Huchih laitak in kong hong ging nawn a, kava etleh Roselyn
ana hi a, kenleng “eh, Roselyn non hoh zenzen a, hon tu in..” chi’n
tutna khawng kana pepah hi. Amah leng hon tupah a, thil tuamtuam khawng
hon gen hi. Bangtan hiam ka houlim zoh nung un Roselyn in “UMang,
ngaihzawng na nei hia?” honchi phut mawk hi. Ka nuih bang aza zozen a,
kenleng “Rose, ngaihzawng nei di’n non gingta hia? Kei hichia tagah, ka
naute haksatak a enkol liailiai inga nungak nei ngam ding vual
kahihlouh..” kachi thuk hi. Himahleh Roselyn in, “Umang, huai hilou ahi.
Kimbawi toh kingai maive…” honchih beh a, etna ding leng ka theikei…
Gen ding a vaang mahmah a, kenleng atawp in “Rose, ka phu keilua….” Ka
chithuk hi. Huchia ka kihou laitak un kanau hongpai a, aban sunzom thei
nawnlou in ka kikhen uhi.
Lungsim ngaihtuahna a sang deuhdeuhta hi. Kimbawi ahihleh mi hausa
tanu neihsun ahi a, kuamah englou a nuamtaka deihdeih nei zoute ahi.
Lehkha siam banah a nun hoih mahmah mi ahi. A mel ahoih a, abiang khong
san thiuthiau zozen, a sam bang te selsel in a etlawm mahmah a, tangval
tampite deih leh ngaih ahi. Huchi kawmkal ah kei honna ngaihkhak lamdang
kasa mahmah a, ka lungsim a kisual loh hial hi. Va ngaih ding chih lah
kei tagah lua, a nute’n hon deihsak lou ding ua akhonung a kei lunggimna
ding chih om, va ngaihlouh ding lah Pathian in kei hehnem a panpihtu
dinga hon sawl bang eide aw chih omzel, ka buai mahmah hi. A tawp in
banga pasal, Roselyn hon hoh nawn ngeingei leh aw chihsuk ding hi chi’n
ka thupuk hi.
Nitak in kei leng pawtkhe lou ding chi’n inn a om ding ka sawm hi.
Himahleh ka lungsim ah thilkhat om hi’n ka thei a, kideek zoulou in
Roselynte innlam zuan in kava vaakkhia hi. Roselyn leng ana om geih a, a
nu leh pate bang ana kikhawm zomah uh ahihmanin hunlem hoihtak kava mu
hi. Roselyn in hon muhphet in thildang bangmah genlou in “UMang, aw
chimai ve, Kimbawi in hon iit petmah eive… tuale nang hon ngai a
haksatak a ihmu leng ihmu lou a om nilouh ding ahi…” khawng hon chi hi.
Kenleng “Roselyn a ngaihthu a gen ding in zaw amah sang inleng ka
ngaizaw khamoh kei ding…hilele keilam ka ki-et chiang in niam ka kisa
deuh ahi..” kachi thuk hi. Roselyn leng thumu kisa in “nang na ngaih
masak lah hilou a, huai lungkham huailou, aw achi kana chi ding…” chi’n
hon nuihsan selsal hi. Huchi’n thutuam dang khawng ka houlim ua, sawtlou
nung in kenleng innlam ka paisan hi.
Hun leh nite hong paizel a, kei leng ka nasepna ah ka kuanzel hi. Ka
nauten vacation nei uh ahihman in skul a khawl zel uhi. Kimbawi in ka
nau inn a om ding ahi chih thei ahi dinga, ka inn peuh uh honna
zuutsiang sak zel a, ann khawng huansa in honna koihsak zel hi. Ka
lungsim tawng in ka kipak petmah a, himahleh kipahthu genna ding in
kimuhtheihna hun ka nei tawm mahmah uhi. Kimbawi a nute’n lengla neih
ding phal nailou zomah uh ahihchiang in hohna ngaihna leng a omkei a,
akallak inbel Roselyn tungtawn khwng in ka kimukha theizel sam uhi.
Nikhat Roselyn hong pawt a, “UMang, tunitak Lengtonghoih Park ah
Kimbawi in kimu ding achi, dak 6 a amun tung ding achive..” chi’n hong
gen hi. Kei leng ka kithalawp mahmah a, nitak dak 6 gin ding kal bang ka
ngaklah mahmah hi. Dak 5:30 a gin in ka om thei nawnta kei a,
Lengtonghoih Park lam manoh in ka paipah hi. Sawtlou ka ngak nung in
Kimbawi leng hong tungpah a, ka kimuh vaang ziak uh ahingei dinga, ka
kimuh tuung bang un ka zumsim tuak ua, a pau masa zosam ding bang ka om
kei uhi. Huchi’n kenleng a pasal zosam hiveng chi’n Kimbawi kiang ah hon
khotuahna tung bang ah kipahthu hoihtak in ka gen a, ka sih tanpha a
ngai gige ding ka hihdan ka chiam hi. Aman leng khenlouh simthu hong
chiam a, nuamtak mai in hun ka zangkhawm uhi.
Alehlam ah, Roselyn toh ka kingaih uh thei a honna haza mahmah
tangval Thakur Lian kichi khat aom hi. Inn a om dinga hon gingta ahingei
dinga, ka inn uh honva en hi. Himahleh kei hon mukei a, ka nau vuak
petmah in ana vaw gawp hi. A vuakteng banah Kimbawi ka inn ua ahoh nawn
ngeingei leh ka unau ua hon that ding tanpha in ana vaugawp hi. Deih
bangtak a asoisak zoh nung in ka nau tang zou nawnlou a, huchi’n Thakur
Lian leh a lawmten ka van neih sunsun teng uh ana susia ua, ka um leh
beel teng khawng uh hon paih thaangsak ua, a utdan teng ua a gamtat zoh
un ana paisan uhi.
Kei bel Kimbawi toh bangmah phawklou in nuamsatak in hun ka zang uhi.
Huchia hun ka zatlai un san aka etleh zaan ana sawt gawp mana, kenleng
Kimbawi a kong tan uh vakha in inn lam ka zuan hi. Inn ka tung in kong
ka kiu masa a, hon kihong zokkei hi. Atawp in kenleng ka nau ihmu khin
hi’nteh chi’n kong ka lai hong hi. Chihleh gintak hetlouh in ka nau
sisan toh tuanglai ah ana lum a, ka van neihteng uh innsung ah ana kipai
zaak hi. Lamdang kasa mahmah a, ka nau kiang a thil omdan kan ding chih
lah a pau zou nawnkei hi. Kenleng kintak a damdawi inn a paipih ding
chi’n auto kava zong a, himahleh sum tawm nei deuh kahihman un hon paw
utkei uhi. Atawp in loh ding dan tuanlah omlou ahihchia’n ka tha in ka
nau Hospital tan ka paw tung hi.
Hospital ka tunphet un Doctorte’n honna etsak pah ngal uhi. Ka
lungsim a mangbang mahmah a, tai na ding dang lah neilou kahihmanin
Pathian kiang ah ka thumthum mai hi. Sawtlou nung in Doctor pa’n a room
ah hon sam hi. Ka lungsim ah bang hon gen ut eide aw Doctorpa’n chi’n ka
ngaihtuahna abuai mahmah a, ka kipese mahmah hi. Huchi’n kenleng a gen
ngai himhim ding chi’n Doctor pa room kava zuan hi. Doctor pa’n leng
amai ah chair khat ah hon tusak a……
KHEN VI na
Diip kaw litlitsa in ka om a, Doctor pa’n hon theisiam mahmah ahi
ding a, “Lauken, nanau bangmah a chikei ding, operation bel bawlzek ngai
ding abang, a sunglam leng ahoih chiahlou om abang a, sum tamkhop nahon
kiging angai ding, a kintheilam in..” chih teng hon gen hi. Ka dawnna
ding a vaang khopmai, ken sum lah neilou inga koi a lata ding, ka muan
omsun ka skul neitupa ulah ka nau belsak inga amah va sawk teitei ding
chih lah thil nuam hilou, ka lungkham kibehlap mahmah mai hi. Huchi’n
lungdongtak in room apan ka pawtkhia a, ka nau kiang kava zuan hi. Ka
nau ana hoih ihmut mahmah vanglak a, ka kipak mahmah hi. Ka kiim ka
kiang khong ka etchiang in vehtu ding mi atam thei mahmah a, koubel ka
unau un ka om liikliak ua, mite enhuai kasa thei mahmah uhi.
Ka nau lah taihsat theih vual ding ahikei, taihsat louh ding lah a
operation na ding sum zonga ka kuan louh theihlouh hizel, ka buai mahmah
hi. A loh dingdan lah bangmah ka theikei a, atawp in kenleng tagahte
adia om gige Pathian om hiven chi’n Pathian kiang ah mittui luang
zungzung kawm in thumna ka nei hi. Thumna ka neihzoh sawtkhop apaita’n
inleng dawnna ding bangmah ka mukei, ana kinem baihlua ka hi hiam chih
zaw ka theikei, Pathian in hon taisanta hia chih peuh ka ngaihtuahna ah
hong suak a, ka khasia zozen hi. Nute ngaihna hongthak a, amau hon
ompihlai hile uzaw hiai bangzah a haksa thuaklou ding hi inga maw…chih
vungvung in aom hi.
Doctorte’n lah sum pe dinga hon noh bawl uh hita, kei lah alakna ding
theihlouh genlouh ka nau ompih ding nasan omlou ahihman in ka buai
mahmah hi. Huchihlai in Doctor khat ka kiang ah hongpai a, “Na nau
operation na ding tutan nahon ngaihsak kei a, sum lah bangmah tawilou na
hih chiang in hospital na pawtsan mai uh ngai inteh..” hon chihsan hi.
Ka lungkham mahmah a, gen ding tuan lah theilou kahihmanin ka biang ah
ka mittui hongluang suk zungzung hi. Ka nau inlah khua thei thouta
ahihmanin ka mittui taakkhia in abiang khasuk ahi ngei dinga, hon entou
a, “U, bangchi e? Kap keive..” hon chi zomah a, keileng kintaka
kinuihmai sak in “nau, akap kahikei, ka mit ana sim a hi…” chi’n nuihtha
suaklou sasa in ka kinuisak hi.
Doctor leh nurse te’n lah a mitsiik ualeng hon en ut nawnlou uh, pawt
ding chih mawklah kanau pai le pai theilou, ka buai mahmah hi. Huchia
kingaihtuah dedu a ka omlai in konglam apan ka nau khatpen toh ka skul
neitupa uh hongpai ka galmuh a, dam huai, hing huai zozen in ka kithei
hi. Ka nau in hon muh phet in hon delhphei pah a, bangmah gen theilou in
akap keuhkeuh mai hi. Ka skul neitupa un thil omdan hoihtak in honk an
a, ken leng aomdan teng hoihtak in ka gen a, operation man ding neilou a
innlam zotmai sawm kahihthu khawng uh ka theisak hi. Ka skul neitupa
uleng poisak toh hon hehpih mahmah ziak in a hehtha asuak mahmah a,
kintak a Doctorte kiang a vapai in “Sum bangzah e na lak sawm uh,..”
chia vakan in a chihzah uh honva piaksak hi. Hiai chiah in zaw kipahthu
ka kam inleng ka gen thei nawnta kei hi.
Huchi’n ka skul neitupa uh panpihna toh ka nau hoihtak in operation
bang ka neithei ua, a ni-ni in hoihlam hon manoh deuhdeuhta hi. Huchi’n
kal khat bang ka omzoh nung un innlam zuan apaithei ding ka hihdan uh
hon hilh a, kou leng ka kipak mahmah uhi. Ka skul neitupa kiang ah ka
nau neupen uh damlouh sung inn a ka nau hon omzek phot ding in ka ngen
hi, aziakbel kei nasem a ka kuanlouh theihlouh ahihmanin. Ka ngetna hon
phalsak a, huchi’n ka unau teng un ka omkhawm uhi. Damlouh mana omkhawm
kha himahle ung koubel nuam kasa mahmah ua, kuamah ka eng tuankei uhi.
Ka nasepna uh neitupa’n ni bangzah hiam bangmah genlou a kuanlou mawk
kahihman in honna hehsan a, ka tunphet in honna tai ngal hi. Kenleng
bangmah gen tamlou in a chih bangbang in ka om hi. Ka heutupa uh hon tai
toh, a kal asim hoihtak aleng ihmu lou, ann leng ginatak a nelou kahih
toh ka nasepna gim diak in ka kithei a, haksa ka sa kholdiak hi.
Himahleh ka nau damdawi man ding khawng leina ding, ka nau damna ding
chi’n ka hahpan mahmah a, ka gim hangin ka tha anuam veve hi. Ni bang
hong tum dek hial chiang in pai ding in ka kisata uhi, kenleng haksa
mahleh ka nau damdawi man ding leh anntang man ding deih tinten kahihman
in ka nit ha dangka 100 kava ngen hi. Ka nget tung in hehlua kisa in
hon nuihsan zozen a, kenleng thil ka tuah tengteng ka leh gen daih leh a
mel hong kilamdang hial in ka thei ahi. A kisuanlah chi thak mahmah a,
hon housiatnate ngaihdam hon leh nget in, dit ngai hetlou ding in dangka
500 hon pia a, kipaklua kisa in gen ding bang ka theikei zozen hi.
Keileng kintak in innlam zuan in ka paipah hi. Lampi a anntang
khawng, ka nau damdawi ding khawng lei in mun bangzah hiam ah ka
baangtou malam hi. Huchia paitou inn ka tundek in ka inn uh ka gal-et
leh mi tamkhop a om uh chih a kilang a, ka naih deuhdeuh le ahusa uh
angaih deuhdeuh hi. Keileng ka nau bang ana chi eide aw chi’n
lauthawngna tak khat ka nei a, ka vantawite giklam himhim leng phawk
nawnlou in tai in ka taai thohta mai hi. Huchi’n kong ka kiu a, hon
hongpah kei zomah uhi. Ka lungbuai deuhdeuh in ka diip bang a kaw semsem
hi.
Bangtan hiam zoh in kong hon kihong a, kintak a luut ding chia kal
kasuan touh patleh ka kinep hetlouh in ka it mahmah Kimbawi in paakkhi
honna oksak mawk a, bangthu bangla om a hiai bang thil om hiam chihlah
theilou ka hihmanin ka buai mahmah a, ka nuih bang aleh zaat zozen hi.
Innsung ah Kimbawi, Roselyn leh ka nau tegel ana om ua, sa meh bang ana
huan mawk ua, lamdang kasa mahmah hi. Kenleng “nouteng a bangthu thei a
nana hichi om ulah..” chi’n nuikawm in ka gen hi. Huchia buaitak a ka om
hon theihchiang un hon engbawl ut deuhdeuh uh ahiding a ka naupa’n “U,
theilou maw, na theihke lah aziak kon gen tuandah ding uh…” chi’n hon
chiamnuih zomah lai hi.
Ka naute hon bawldan khawng ka lungbuai mahmah a, a thu lah bangmah
himhim kitheilou, thei ut dan a I om chiang alah hon hilh utlou deuhdeuh
uh abang hi. Atawp in Kimbawi in “Umuan, tuni exam result suak a, kou
Roselyn toh second a pass tuak unga nang first a pass banah I district
pumpi ua dinga a khatna a pang zomah nahi… a regular a kai lou penpen
thupilua chia sa khawng hon tawi kahi uh…” chi’n hon gen a, kipaklua
kahi dinga ka kikou kha zozen hi. Gen ding, bang ding chih mel leng ka
theikei a, nasem zou kisil dinglam nasan ka phawk nawnkei a, ka nuinui
tamai hi. Pathian hon vualzawlna thupi kasa deuhdeuh a, a tung ah ka
kipahna alian semsem hi.
Aleh lam ah ka itpen Kimbawi ni tamkhop mulou mu ka hi zomah toh ka
om a nuam tuan mahmah hi’n ka thei a, ka kipahna alian kholdiak hi. Amah
leng kipaklaw sam ahi dinga, hong en in a nuinui mai hi. Bangtan hiam
ka houlim ua, huaizoh in Kimbawi in “Umuan, I nau hiaibang a damlou aom
a, bangziak a mi tungtawn bek a non theihsak louh a, ka khase lua…” chih
toh a mittui hong pawt hi. Kenleng kintak in aliang a kawi in, “Kim,
huchidan hilou ahi, kuamah theisaklou, ka naute nasan in ka pawt deklam
ua hon theipan uh ahi…tua damtak a kimuthei kipahhuai lua ahi. Tuni
khasiatni hisak lou in kipahni hisak ni hang..” ka chi hi. Huai chihial
mahleng ka lungsim tawng inbel hichibang lohchinna ka tuahni in ka
pianna tun leh zuate’n hon ompih leh bangzahta in anuam diam maw chih
khawng ka ngaihtuahtuah kha veve hi.
Annkhawng konne zaizai ua, nuam kasa mahmah uhi. Kou unauteng in
kimtak a ann ka nekkhawm ni uh ahihbanah ka itpen Kimbawi natan toh ann
nekhawm kha kahihman un ka lung akim in nuam kasa kholdiak hi. Ann
khawng ka nek zoh un ka kuangteng hon silsiangsak lai uhi. Zan lah
sawtdek sim mawkta ahihmanin kenleng ngaihlouh ziak hilou in Kimbawite
pai phot ding in ka sawl hi. Amau leng thumangtak in pai ding in a kisa
ua, kenleng numei vuak a pai ding chikmah a phal ngeilou kahihman in a
inn tan uh kava zui hi. Roselyn kava kha masa ua, huaizoh in Kimbawite
innlam zuan in kapai uhi. Lampi ah Kimbawi in ka khut hoihtak in honglen
a, itna thu khawng houlim in nuam satak in ka tonkhawm helhel uhi. Ka
nihtuak ua lohching ka hih utoh ka kipak tuak mahmah uhi. Huchia saulou
ka paining un Kimbawite gate ka tung ua, kenleng “Kim, damleh I kimutou
zelzel dia, maban pai ding dan khawng I kikum ding aw…” kachi a,
alungsim lam hi ahingei dinga pautam lou in hon kawi a, ka bilbul ah
“Umang, kon ngailua….” Hon chi a, huaizoh in mangpha kikhak in ka kikhen
uhi.
Keileng inn ka paisuak pah hi. Inn ka tunnawn in ka naute’n honna
ngak ua, ana lum naikei uhi. Kenleng naute kiang ah lup ding vai ka
genpih leh ka nau in a sakhau apan lai khat hong dokkhia a, “U, hiai
UKim in na lohchin lopna ding…” chia honpiak ahi chi’n honpia hi.
Kouleng ka unau teng a enkhawm ding chi’n ken ka hong hi. Ka hon ualeh
ka kinep hetlouh un vai dangka 5,000 tak ana om venvon a, gen ding thei
omlou in kam ka zen in ka unau teng un ka ki-entuah zozen uhi. Chikmah a
hiai zah sum mu ngeilou kahihman un lamdang bang kasa ua, ka kipak
petmah uhi. Bangchi ding hiam chih natan theilou in ka lukham nuai uah
ka koih hoih zozen uhi. Huchi’n ka unau teng un kipaktak in lupna khat
ah ka lumkhawm nainai uhi.
KHEN VII na
Zingkhua hong vaak nawnta a, kou leng ka unau teng un ka thoukhia
uhi. Thou a kihahsiang zoupan ka innluahna neitupa un honsam a, keileng
kintak in kava pai hi. A kiang kava tun tak in “Mang, na lim na mu hia,
pawl sawm sangtak a na zoh velvual mana hiai a na lim hong kisuahkha
ahi..” chi’n nuikawm in niteng thukizakna hon ensak hi. Ka en a, ka
lungsim anuam mahmah mai.. Huaiteng banah ka inn neipa un “Mang, na
lohchin kipah etsakna in tukum sung innluahman konla nawnkei dia,
hoihtak in na om ta ding..” hon chih beh zomah hi. Kipahna alian semsem
a, khasiat lamlam bang asuak zozen hi.
Keileng awl in ka inn uah ka paisuk nawn a, ann huan ding in ka
kisapah hi. Huchihlai in ka skul neitupa a zi toh hong pawt uhi.
Kipakselua in amel uh kamuh le ka mittui hong pawt mawka, bangmah leng
ka gen thei pah zozen kei hi. Hon theisiam mahmah uh ahidinga, hon
hehnem ua, kipah etsakna dan in nek ding tuamtuam, meh ding tuamtuam
bang hon puak uhi. Keileng kisuhalh in singpi khawng ka awm a, huchi’n
houlim kawm in ka dawnkhawm uhi. Ka theihtawp suah in kipahthu ka gen a,
sepna ka muh leleng amau amasapen a koih ding ka hihdan ka chiam top
mai hi. Amau leng hong kipahpih mahmah mai ua, amau ta loubuang ding in
lamdang ka kisa zozen hi.
Huchia nuamsatak a ka omlai un ka nuneu honglut a, kenleng hoihtak in
kana vaidawn hi. Ka haksat, ka buai hun ua hon ngaihsak utlou a, ama
kiang a skul kai dia kuan tagah koihna a honna koihdan khawng ka mitkha
ah hongsuak a, himahleh huaite phawkkha nawnlou dan in ka om mai hi. Hon
houpih a, “Mang, na inn bang uleng neuthou hiven kou kianglam ah hon
omsuk maive ua, nuamzaw ding ahi…” chih peuh in hon gen a, ka skul
neitute ubang muhsit bawl kawmtak in “Nou kuate e? Hiai a ka tate
innsung ah bang hong hih zenzen nahi ua…” chipeuh in ahou hi. Keileng ka
hehtha hongsuak sim a, “Nuneu, amau maw ka nu leh pate ahi uh, ka
sungkuante’n ka haksat hun ua hon ngaihsak utlouh lai uale hon taisan
lou, kou adia a lungsim uh, a neih alam teng uh seng gige tute ahi ua,
amau thupiak bangbang a om ding kahi uh..” chi’n ka dawng a, a dai
vengveng hi.
Ka skul neitute unleng nuam salou uh ahingei dinga hong paisan pah
uhi. A paizoh un ka hehtha hong suak deuhdeuh a, lah I sanga piching zaw
ahihtoh bangmah ka gen ngamkei hi. Huchi kawmkal ah “Mangbawi, hiai
kholak mi te khawng hong deihsak taktak ding uh nasak leh kuaman
lungsimtak a hon deihsak hetlou ding uh ahi, pilvang in aw, kou na
nuneute kan a hon deihsak taktak ding omlou ahi..” hon chih beh zomah
hi. Kenleng “Nuneu, bangziaka ka haksat hun a hon deihsaklou a tua mite
theihphak a ka omtak a non deihsak a?” ka chihleh heh mahmah a,
“Mangbawi, nang mihaipa, na nuneute non simmoh, bangmah na suakkei
ding…” chi’n hong paisan hi.
Haksatna, nopna leh kipahna hunte kong zattouh zoh uh sawtlou in
maban sutzop hun ding bang hong kihong nawnta hi. Kenleng College khat
ah admission kava bawlpah hi. Pawl sawm a ka hihhoih mahmah ziak ahingei
dinga midangte banglou in baihlamtak leh nuamtak in admission kava
bawlthei pah hi. Huaikia hilou in ka it mahmah Kimbawi ngei inleng huai
college mah ah admission bawl a, subject kibang kala khawm zomah uhi. Ka
lungsim in kuan leh pai a ton thei ding chih ka ngaihtuah a, aguk in
kana kipak mahmah hi. Alehlam taka kei nasem a ka kiloh zel ngai ding
ahihman in deih bang a ka kai theihlouh ding kana lau mahmah hi.
Lehkha hoihtak a ziltouh lah ka ut mahmah a, lah nek ding omlou a lah
thil hithei lou ding chih ka ngaihtuah chiang in ka buai mahmah hi.
Huchia mangbangtak a ka omlai in ka lungsim ah ka skul neitupa kiang uah
thilkhat kingen leh chih hong suakphut a, keileng a innlam uh zuan in
kava paipah hi. Ka tungphet in “Bang chisim e Mang?” honna chipah a,
kenleng a sum lam gen zozen lou in “Sir, college hoihtak a kai a lehkha
mah chihphot ka ut mahmah a, huai ding in zingkal leh nitak lam kala ka
nasep theih ding hon ngaihtuahpih ve..” kava chiphut hi. Aman leng ka
deih thei mahmah hile kilawm in “Mang, lungkham ken, zingkal leh
nitaklam teng in hiai skul hong hahsiang gige inla, khaloh na kidaihkhop
ding uh honpe gige naveng…” hon chi hi. Huchi’n kei leng kipak leh
lungmuangtak mai in innlam ka zuankiik hi.
Nite hong pailiam zungzung a, College leng ka hongkaita uhi. High
skul toh teh ding in ana kilamdang mahmah a, ei sia-le-pha theihna a
kinga a tam mahmah hi. Mi hoihlou, college sung mahmah a khamtheih toh
hong kuan, a khamsa a hong kuan toh atam a, kicheina bang sang in ka
gintak khen in khengval kana sa mahmah hi. Kei bel kuadang toh
kithuahlou in Kimbawi mah toh ka kithuah den ua, mite’n hong dem in hon
chi mun mahmah uhi. Himahleh koubel a kingai mah hive hang chi’n kana
pang tinten uhi. Huaiziak mah ahi dinga, khat ka kai kei ding uale akhat
leng a kai ut zosam ka omkei uhi. Mite bang a itna thu gensiam a
kikumkumte hikei mahle ung ka lungsim tawng ua ka ki-itna uh a thupi
mahmah a, kuata hal zoh ding vual kahi nawnkei uhi.
Theihlouh kal in akha asim bang kana kaita ua, pawl asang dungzui mah
in laisim ding leng atam mahmah a, huaiziak mah in hundang banglou in
Kimbawi toh kimuhna ding hunk a neitawm mahmah hi. Kimbawi toh class
khat a omkhawm den kahihman un, ka nungaknu muh a lehkha siamlou leh
theilou a om ding chih ka ngaithei kei a, huai in ka lehkhasim hon
thanuamsak tuan mahmah in ka thei ahi. Huchimah bangin Kimbawi ngei
inleng kei muh a lehkha theilou a aom ding nuam ana sa tuankei a, nidang
sang inleng lehkha lam ah ma honsawn zaw thamtham hi’n ka thei hi.
Lehkha theihlouhte khawng kidong tuah in kuamah phawklouh in kou khom in
nuam kasa mahmah uhi.
Ka naute ngei leng pawl sawm a exam ding bang uh nai deuhdeuhta
ahihman in ka mankal in a omna kava pha a, lehkha bang va simpih in ka
hihtheih khom in ka thuhilh a, thumna bang hoihtak in kava neihpih zel
hi. Huchiziak mah ahingei dinga, dam leng a dam thei a, lehkha bangleng a
siam deuhdeuh hi’n ka mu ahi. A laibu ka phen a, ka utna munmun ka dot
chiang inleng theihlouh a neitam hetkei hi. Hiai in ka lungsim a
kipaksak mahmah a, kei sang aleng siamzaw leh sang tungzaw hong hih
theih ding ka lunggulhpen leh ka kinepna ahi gige hi.
Hunte hongpai zel a, pawl sawm-le-nih bang ka hong kaitouta uhi.
Kimbawi toh ka kal uah kimuanmohna hiam, kisiatna hiam aom ngeikei a,
hoih ka kisaklouhna uh aomleh kamdam in kithuhilh in ka kithuman tuah
gige uhi. Mi hong haza a tam mahmah a, ka hoihlouhna ding uh zong leng a
tam mahmah hi. Huchikawmkal ah nikhat ka skul neitupa uh hongpawt a,
“Mang, nungak kia buaipih a College leng hoihtak a kailou, lehkha leng
chau deuhdeuh nahi chihthu kaza a kalung a nuam hetkei…” chi’n hon gen
a, kenleng “Sir, nungak zaw ngaimah ing, ahihhang in ka lehkha sim
bangmah ka bah kei, genlouh nidang sang inleng ka hoihzaw…” chi’n ka
test result tengteng uh kana ensak a, khatna ngen a pangden kahihman in
aman leng ahoih e leh…chii’n hong paisan nawn hi.
Hichibang a thu nuamlou deuhdeuh ka zaklai in, nikhat Roselyn hong
hoh a, “UMang, Kimbawi apate’n Officer khat toh kitengsak dek uh,
Kimbawi dahlua a kapkap mai, va gu maive…” honchi phut hi. Lamdang sakna
in ka dim a, ka gen ding leng ka thei zozen kei hi. Va guk ding chihlah
kei adia thil hithei hi nailou, va gukei lenglah Kimbawi ka damsung a
kei a hikha ngei nawnlou ding chih ka ngaihtuah a, om dingdan leng ka
theikei, ka mittui hongpawt a, lah ka mittui inleng hihtheih a nei
tuansamkei hi. Kenleng Roselyn kiang ah ka kimuhtheihna ding uh lampi
hon ngaihtuahsak ding in ka ngen a, huchi’n ka nget bang in Roselyn
inleng a nitak a kimuhtheihna ding lampi hon gelsak ngal hi.
KHEN VIII na
Nitaklam ann nekhinphet chih ding in inn apan ka pawtkhe ngal hi.
Kimbawi ka muh utna alian deuhdeuh mai a, lah ka muh ding leng haksa
sakna in ka dimzel hi. Roselyn hon kawkmuhna mun ah ka na ngak hi.
Dakkal thum mahmah ka ngaktan inleng muh ding in a hongpai ngeikei hi.
Ka lungsim abuai deuhdeuh a, hongpailou ding houh ngak nilouh kahia,
ahihkeileh a nu leh pate’n phallou uh hia chih bang ka ngaihtuahna ah
honglang hi. Paisan mai bang ka ut mahmah a, himahleh kei adinga Kimbawi
ka muh tawpna leng hithei ahihchiang in chi’n ka pai ngamkei hi. A
innlam uh ka gal-et nilouh a, himahleh Kimbawi kei kiang zuan in
ahongpai ngeikei hi.
Zan dak giat bang hong gingta a, ahihhang in Kimbawi mel ka mu nai
tuankei hi. Lungkhamtak in singbul khat a kana ngak ngiungeu mai a,
Kimbawi hongpai ma inn a pailouh ding chih ka thupuk hi. Sana ka en-en
mai a, a tawptawp in Kimbawi keilam zuan a hongpai ka galmuh khongkhong
hi. Ka tutna apan kana ding a, hong tun ding kana ngak hi. Ka kiang hong
tun in ka mai ah hon ding a, bangmah a gen theikei, ka mittui luang
hongmuh chia’n kidek zoulou ahi dinga hon pumkawi in “UMang, kon
ngailua…” chihtoh kah a thuah nilouh hi. Kenleng “Kim, huchi zenzen lou
e, kap nawnken, keile bangmah chilou kahi..” chi’n ka theihtawp in ka
hehnem hi.
Awl in singbul ah ka tutpihsuk hi. Kimbawi in hon pumkawi in a kidiik
den hi. Kenleng a loh ding dan ka thei tuankei a, atawp in “Kim,
lungkham ken, na nu leh pate’n kei hon hua hi zenzen lou ahi ua, nang
maban nopsak zawkna ding adeih ziaklel uh ahi, nu leh pa thuman anah loh
peek chi uh hiven a chih bang un nava om zaw ding, kei zaw hon
lunghimoh ken, ka theihtawp in ka naute kon enkoltou lai ding…” chi’n ka
hehnem hi. Thakhat in Kimbawi hong thoutou a, “UMang, honpi mai aw…
tunitak in kon zuimai ding…” hongchi hi. Ka lung abuai deuhdeuh a, ngai
law mahmah ka hihchiang in utlouh ding lah haksa, alanglam alah kei adia
thil hithei hilou zel ahihmanin. Atawp in kenleng “Kim, bangteng hileh
Sian lemgeel louh hi’nteh I kal simthu, kon itlouh ziak hilou in kon
itluat zawk ziak in nopsatak a na om ding ka deihzaw…” chi’n ka leh
genkhum hi.
Kimbawi leng gen ding theilou, ka awm a alu nga in a kapkap mai hi.
Keileng kidek teitei ka sawm hangin haksa kasa mahmah hi. Ka genbeh a
“Kim, kap nawnken, kei kipak kahi, aziakchu ka itpen nuamtak a Officer
innsung a khosa ding ahihmanin..” ka chinawn hi. Himahleh Kimbawi in
“UMuan, ken nangtoh haksa thuak ka telzaw…’ hon chithuk nawn hi. Ka gen
ding abei deuhdeuh a, Kimbawi ka etchiang bang in ka khasiat a suak
deuhdeuh mai hi. Awl in Kimbawi lu ka phongtou a, “Kim, hichia I omdet
hoihlou ahi, hon ngai mahleng nu leh pate’n thilteng ana zouta uh
ahihmanin kei a hi nawnlou phot nahih chiang in innlam pai dingdan I
ngaihtuah mai diam?” ka chitop mai hi. Himahleh Kimbawi in dawnna
khatleng hongpe kei a, kenleng ka chih hanga amah toh omkhawm de tut
kahihman in ka gen teitei nawn tuankei hi.
Huchia ka omlai un thakhat in ka kiang uah Car khat hong khawl a,
tangval thum leh Roselyn hong kumkhia uhi. Tangval khat in ka ang apan
Kimbawi a kaitou a, car sung ah aguanglut hi. Tangval nih tegel in ka
awm ah hon man ua, khat in ka mai hon suksak a, na kasa mahmah hi. Hon
kivuak huan phet un Kimbawi toh Roselyn omtheilou in hon bohkhum ua,
himahleh tangvalte’n anih ua kaikhia in car ah akoihlut nawn uhi.
Bangtan hiam hon vawlai uh chihtan ka thei a, anung bangmah ka thei
nawnkei hi. Khophawklou a ka omphet in numei tegel tonpih in hon taisan
uhi.
Khua ka phawk phet in ka etleh ka gei ah ka nau ana tu a, ka dakvel
chiang in lamdang kasa mahmah hi. Ka nau kiang ah “Nau, bangchi e,
koimun a I omna?” ka chihleh ka nau a mittui luang pilhpelh kawm in “U,
ei damdawi inn aom, nang min hon vua unchin liam nahi” hon chi hi.
Bangmah ka thei nawnkei, ka khut leh khe khawng ka etchiang in a kituam
a, ana hahliam sim mahmah kana himawk hi. Ka lungkham mahmah a, ka nau
khatpente theihsak ding lah ka utkei a, lah ka nau inlah bangmah sai
thei nailou ahihchiang in ka lungbuai mahmah hi.
Sunnitum a nathuak a ka om zoh zankhua hongmial nawnta a, ka kiim ka
kiang ua damlou lumte tanau laina vehtu ding hau mahmahte bang ka en a,
kou unau om liikliak bang ka etchiang in ka khasiat a suak mahmah hi.
Huchia ka omlai un gintaklouhpi in Roselyn hong luut a, kenleng ka
mittui kintak a nuul in hoihtak in kana vaidawn hi. Roselyn ka lupna ah
hontu a, “UMang, hehpihtak in hon ngaidam in aw, hiaibang haksatna na
tuah poi kasa law petmah, keiziak a hiai bang tuak nahi a, na dam matan
kon ompih ding aw..” chi’n hon gen a, bag ah avan bang honpaw zozen hi.
Kenleng “Rose, hilou e, kei hon dampah ding kahi, nang mohna bangmah a
omkei, hiai tengteng a moh kuamah omlou, itna ziak vek ahi…” ka chi thuk
hi.
Pai di aka sawlzel hang in utlou ahihman in Roselyn in kal khat bang
hon ompih a, huchi’n innlam a ki-enkol thei ding in pawtsak in ka omta
hi. Innlam ah theihtawp suah a ka ki-etkol nung in ka damsiang khong hi.
Himahleh ka khe bawlhoih taktak theihlouh a aom man in nidang bang in
hoihtak in ka pai thei nawnkei a, ka bai denta hi. Hichia lampi pai
chiang bang a hoihtak a pai theilou a bai lengleng honmuh chiang un
Roselyn hin ka naute hileh hon hehpih thei mahmah uhi. Himahleh ken
“Pathian in thil bangkim I hoihzawkna ding a hon hihsak ahi, tua hichi
himahleng ka hoihzawk ding a deihle maban a Doctorte zang aleng hon
hihdam thei nawn ding ahi..” chi’n ka lungmuangsak zel hi.
Hunte hongpaizel a ka siamsin maban khawng hoihtak in kon hihtou hi.
Kimbawi toh leng ka kimukha thei ngei nawnkei ua, achang inbel Roselyn
hong vaak zel hi. Kimbawi ka ngaihna a daai thei tuan mahmah kei a, muh
theihna ding omle ka mu ut thei mahmah hi. Huchimahbangin Kimbawi leng
kei hon mu ut thei mahmah ahingei dinga, nikhat ka limlaak ngen ding in
naupang khat hon sawl hi. Piaklouh mai hoih kasa mahmah a, himahleh ka
itpen thilnget piaklouh ding lem kasak theihlouh man in kana pia hi.
Hichibang in kimutuah keimah le ung kou ommun tuak ah kana lungleng
mahmah tuak uhi.
Hunte hongpai zel a, theihlouh kal in Kimbawi pasal neih ding hun
hongtung petmahta hi. Zing ni hongsuak chu thohkhiat a haksa petmah
chihlouh gen ding bangmah ka theikei. Va uap louh dinglah ka utkei a, va
uap ding lah ka ngamkei a, ka lungsim in ka kiseltuah nilouh hi.
Kipichin sak sawm teitei in zoi mahmah sa in biakinn a akitenna uh uap
ding chidan in ka kisa hi. Ka ut mahmah bang in ka lin mahmah hi,
himahleh Roselyn in hon hahzot toh piching khat I hihsam toh chia
hohsawm chu kahi peuhmah hi. Huchia awlawl a ka kisak lai in konglam ka
etleh Roselyn kintak in kou innlam zuan a hongtai ka galmuh phut hi.
KHEN IX na
Roselyn naak hehu zozen in hong luut a, “UMang, UMang….” Hon chi in
aban bangmah a gen thei nawnkei hi. Kenleng lamdang kasa mahmah a, thil
hoihlou khat tung hi peuhmah inteh chih lungsim a neikawm in “Rose,
bangchi e? bangthu om a?” chi’n kana kan ngal hi. Awl in hong paukhia a
“UMang, huai khatvei na naupa vawte pawl in Kimbawi kidnapped uh, tua a
kiten ding uleng hitheilou ahi.. anute lungkham petmah uh, a inn bek ua I
vahoh diam?” chi’n hon gen hi. Kenleng poi kasalaw mahmah a, “Rose, na
chihle hi thamtham e, himahleh ken a inn ua kava hoh sang in ka sih
leleng amah toh si zaw ding in kava zong zaw diam?” chi’n ka leh gen a,
himahleh Roselyn in hong phalkei hi.
Huchi’n awl a kisa in Roselyn leng singpi khawng dawnsak in ka
tawldamsak phot hi. Ka man un ka nih un Kimbawite innlam zuan ding in ka
kuankhia uhi. Kimbawite inn ka tun un mi ana tam mahmah a, Policete
pawl leng a langlang ah ana kivialleh hehu gouh uhi. Kimbawi nu bang a
kapkap mai a, lusuun mah a bangzou hial uhi. Kouleng mun kilkhat ah
Roselyn toh ka tu ua, hihtheih lah om tuanlou ahihchiang in kougel ka
houlim uhi. Huchia ka houlim lai un Policete hongpai ua, ka khut ah siik
hong bulhsak in a gari ua honpi mawk uhi. Roselyn a om theikei a,
Policete toh bang hong kinakloh uhi. Kenleng “Roselyn, hiai toh kisai in
bangmah ka hihkei chih nangle na thei a, ana lungmuang in bangmah ka
chikei ding..” chi’n Roselyn ka hehnem a, innsung lam ah ka luutsak nawn
hi.
Police te’n a gari ua hong pua ua, ka mai puanvom in hong tuamsak
uhi. Sawtlou hong taipih zoh un munkhat ah hon kumpih uhi. Ka maituam
aom ahihman in koimun hiam chih bangmah ka theikei hi. Sawtlou nung in
munkhat ah hon koih ua, ka maituamna hon lakkhiatsak uhi. Pasal khat in
chiangpum in ka nungzang hong zep a, “Kimbawi koi a koih uh e? Sum
bangzah a na goih a?” chi’n dawm hetlou in aw ngaihpi a hon chih banah
hong zep ek-ek mai hi. A kallak bang in electric current chihdan in hon
shock sak ua, thuak haksa kasa law mahmah hi. Kenlah “theilou” chihlouh
gen ding bangmah theilou kahihman in amau a iim din hong muangmoh
deuhdeuh uhi. Dakkal khat hial bang hon soisak zoh nung un ka tha teng a
zoi gaita a, ka tang zou nawnkei hi.
A zingchiang tan inle a vangkim in thudotna hong nei ua, hon soisa
toutou uh ahihman in na kasa mahmah a, hon that zaw mai un bang ka
chikha zozen hi. Hon soisak zoh uh sawtlou in ka nau tegel leh Roselyn
hong hoh ua, hon muhphet un a thum un kidek zoulou in a kap ek-ek uhi.
Ka nau tegel bang aheh law petmah ua, ka sisan kai niuniaute, hon zepna
ua ka chi bawkte khawng hon khoihsak ua, gen ding mel leng theilou in a
mittui uh anul top uhi. Ka nau neupen in “U, lungkham ken, kou ka hunkhe
ding uh, mite simmoh leh nuaisiah in om gige mahle hang nikhattei ei
adia khua hongvak na ding ahi…” chi’n hong hehnem uhi. Ka kimuh ut
mahmah lai hang un kimuhtheihna hunchiam bei ahihman in mittui toh ka
kikhen uhi.
Ka naute apai zoh phet un ka inn ua anih un a paisuak uhi. Huaitan ah
Roselyn inleng va zui denlai hi. Inn a houlim nilouh ua “I u hon
pawttheihna ding in Kimbawi va zongkhe ni” chi’n kithutuak takin ana
kisa uhi. Roselyn inbel ana khou a, himahleh khouh zoh ding vual ahikei
ua, aman leng a chih ngaihna thei nawnlou in a ava zui hi. Ka naute’n
numei nahi a ana om in chi’n sawlkik mahle uh amah leng a ut tuankei a,
huchi’n a thum un huaite mi’n mukha a chihna lam uah ava kuanta uhi.
Lamkal ah sepaihte bang a tuak toutou ua, sepaihte’n ana khaam in
paisuak phalkei zel uhi. Himahleh ka naute’n “nou mohna neilou, ka u na
mat mawk uh, nou ahiloute lel man ngam kou ahi taktakte mankhe ding…nou
toh kou kisailou…” chi’n aheh lungsim utoh a chi zialzial ua,
sepaihte’n leng loh ding dan tuan theilou in a paisuak sak zel uhi.
Bangtan hiam a paizoh un gamkawm lak, nahtang huan dan a kibawl, gam pha
mahmah kawmlak atung uhi. Huailak ah khawl in awl in thawm aom hiam
chi’n hon ngai uhi. Bangtan hiam a ngaih nung un bangmah a zakei ua,
huchi’n saulou a pailai uhi.
Munkawm khat ah a khawl nawn ua, awl khakha a gamtang kawm in
thilging aom hiam chi’n a ngai nawn uhi. Huchihlai in a omna uapan leng
gamla hetlou a mi kihou thawmging aza uhi. Ka nau tegel in chiangpum
khat tuak tawi ahihman un a chiang uh hoihtak a leen in huai thawmging
omna lam a zuan uhi. Roselyn ahihleh munkhat ah ana omsak uhi. Awl in
kanaute’n a gem pheiphei ua, chihleh munkhat ah Kimbawi a khih uh
agalmuhta uhi. A nawl ah tangval nih a ding ua, khat in Pistol a tawi a,
khat in temta a tawi hi. Midang ding bel kuamah omlou phot ahi ding
uhi.
Ka naute’n leng a nunglam uapan chiangpum a khetpaih sawm in daitak
in a naihphei uhi. Kinai mahmahta achih un thakhat in khat tuak
chiangpum in a lu uh satsak ua, huchi’n mi nih tegel khophawklou in a
kipuksuk uhi. Kintak in Kimbawi kikhihna khaute aphel ua, Roselyn sam in
innlam zuan in a tai uhi. Himahleh bangmah kallou in huai mi nih tegel
in khua phawk uh ahidinga va nungdelh nawn uhi. Kigalmuh in kidelh ua,
thau tawipa pen in agal apan kapzel hi. Huchia bang tan vei hiam a
galkap nung in ka nau a lianzaw pen a nungkha a, tai zou nawnlou in a
kipuksuk hi.
Huchia hong omphet un ka nau khatpen in aliang a pua in awl in tai
thouthou uhi. A delhten lah naih deuhdeuh ahihman in amau leng theihtawp
suah in a tai ek-ek uhi. Sawtlou a tai nung un Policete omna mun atung
ua, asuakta zou khong uhi. Policete’n leng gari khat in Kimbawi vuak
tuampuak ua, amau hutkhiat dan in tuam omsak uhi. Ka nau tegel leh
Roselyn gari tuam a pua in hospital lam a zotpih uhi. Hospital atun un
ka nau a sisan tam a pawt mahmahta a, Doctor te’n kinephuai asak
nawnlouh dan uh ana genkhum zomah uhi.
Kimbawi hutkhiat hita, Police te’n inn tan tunpih uh chihthu aom phet
in kei leng Jail apan hon pikhia ua, inn ah honkha uhi. Inn ka tun in
ka naute tuilum a ka chi dupte khawng meksak ding ka chihleh ka muh ding
in kuamah ana omkei uhi. Innkimte kiang ah kan lenglah a thei kuamah
aomkei uhi. Ka lungdong gawp ahihmanin kenleng Roselynte inn kava en a,
anu’n ka gintakdan loutak in “Mang, na naute’n nang suahtak theihna ding
a lunggulhna lam ua Kimbawi va hunkhia ua, na nau thau a kapkha ua tua
hospital a om uh ahi..” hon chiphut hi. Ka chi natlam leng ka phawk
nawnkei a, kenleng kintak in Hospital lam kava zuan hi.
Ka tun in ka nau, Roselyn leh ka nau omnate nupa ana om ua, ka naupen
ahihleh Oxygen ana thuah ua, houpihtheih ding vual ahinawnkei hi. Ka
thuakna anat toh ka khasiattha hong suak law mawk a, milakpi ah pasal
hihna bei hile kilawm khop in ka mittui hong luangkhe zungzung mawk hi.
Ka kiang a omten a theihtawp uh suah in hon hehnem nilouh uhi. Ka
hinkhua ka khotheih tung apan ka ngaihtuahna ah hong suaktou dundun mai
a, bangziaka hichi lawmlawm a vangsiat ana tuakkha ka diam maw chih bang
ka lungsim ah aom nilouh hi. Gentheihna in hon taisanta maileh hoih
ding hia maw chihlouh gen ding bangmah ka theikei hi.
Awl in ka daktou a, ka nau kiang a omteng chibai ka baan buuk vek hi.
Keileng sepaihte hong soisakna tawl mahmah kahihman in tutna a tu in ka
nau lupna tung ah ka kingai hi. Roselyn in hon awlmoh mahmah a, tuilum
honva zonsak in ka nung hong zuutsak hi. Naa kasa mahmah a, hon zep
diakna mun uh tui in hon sukkhak chiang bang in taak kasa mahmah hi.
Huchia ka omlai un Kimbawi a nu leh pa leh a pasal dingpa toh hon luut
ua, ka unauteng ua hichia om liiliai, Kimbawi ziaka ka chiteng dup gai,
sepaihte ut leh dah a soisak ka thuakdan, ka nau bang in sihpih thei
ding dinmun a aom dan hon muhphet un Kimbawi kidek zoulou ahidia milak
ah hon kapkhe gawp hi.
Kimbawi nu-le-pa’n hon en ua, kisuanglah mahmah kawm in ngaihdam hon
ngen dek uhi. Himahleh ken “Nu-le-pate aw, nopsaklouhna ding aomkei,
hichibang thil omthei mah ahi. Ka tagah utoh mi simmohna leng ka don ua,
thuak leng ka thuakzel uh ngaimah ahi. Tua ka thiltuah uh ahihleh
Kimbawi ziak chihleng ahituankei, thilhoih hi a ka theih ziak ua semsuah
kahi uhi. Ka sihtak uale le kuamah mohsak ding ka neikei uh, thilhoih
hih a si kahi uh chia pom ding a kimansa kahi uh…” chi’n kaleh dawn a,
Kimbawipa bang in gen ding thei nawnlou in a mittui toh ka maitang
mahmah hong en hi’n ka thei ahi.
Roselyn leh ka nau in ka nau damloupen ana enkol ding, Kimbawi leh
apasal dingpan kei innlam a hon enkol ding chi’n vai hong hawmkhum ua,
huchi’n kei utthu hilou in innlam ah hon paisak uhi. Inn ka tunphet un
lupna tung ah honsial ua, damdawi tuamtuam hon nesak uhi. Kimbawi in ka
liamna pawnte khawng hon khoihsak a, ama ziaka hiaiteng thuak kahi chih
theilua ahingei dinga, a mittui bang a ka chitung ah hong taakkhe suk
keuhkeuh hi. Sawtkhop honkep zoh in ka hoihta chi’n utkei mahle uh a nih
ua pai ding in ka sawl nilouh a, atawp in hon paisan uhi.
Nitak hun hong hi a, ka ihmu thei mahmah kei hi. Zankhua in banghiam
om hile kilawm in ka kihei kihei den hi. Huchia ihmu thei hetlou a ka
omlai in ka kongmai uah gari khat hong khawl hi’n ka thei ahi. Kenleng
lamdang sa sim, ka lungnoplouh toh kintak a thou in kava en hi. Chihleh
ka skul neipa uh ahi a, “Mang, hong kisa in, damdawi innlam I vapha
ding…” hon chi a, kenleng athu dongsau tuanlou in “awle” chi’n ka puante
silh in damdawi innlam zuan ding in ka kisakhe ngal a, ka manphet in ka
nih un gari in Hospital lam zuan in ka tai vengveng uhi.
KHEN X na
Ka kinohluat man hia gari bang hatlou kasa mahmah a, hospital tunghak
ka kisa lua hi. Lungsim a ka nau a selam hi peuhmah ding a ngaihsutna
nei kahihman in ka lungkham mahmah hi. Hospital ka va tung petmah ua,
kintak in ka nau kiang ka delhngal hi. Ka nau ana lum dildel a, houpih
theih ding dinmun in aom nawnkei, himahleh hon paisan hial bel ahi
naisam kei hi. A sou khawng ka khoih a, a naak lai chih ka theih in ka
kipak mahmah hi. Doctorte’n hon samtuam ua, keileng kava paipah hi.
Doctorpa’n hiai mun ah vanzat leng a kimkei a, dam na ut taktak uale
vaigam lam na delh uh angai ding hong chihsan hi.
Ka lungkhamna kibehlap semsem a, ka nau damna ding ahihnakleh ka neih
ka lam teng uh zuak a, mi sum batlak ding zong a kuankhiat mai ka
sawmta hi. Himahleh zan lah sawtta ahihmanin mi inn a vapai na dan aom
nawnkei a, khovak ding ngak in ka nau lupna tung ah ka tu ngiungeu mai
hi. Huchi’n zingkhua hongvaak a, kouleng Damdawi inn a om phatuam
nawnlou ahihchiang in chi’n ka inn lam uh ka zotpih uhi. Inn ka tun un
ka nu’n adamlai a ka kep det ding ua hon nutsiat van hoihtak leh thil
manpha tak khat ka kep om a, a zuak ding in kava kuankhia ngal hi.
Thilhoih chihmah baihlamtak in kava khawngpah hi. Ahihhang in huai ka
vanzuakna sum teng in ka nau ka zinpihna ding kimkhat leng daihlou
ahihmanin mundang kava zon angai thouthou hi.
Ka paneute kiang lah tai nadan himhim omlou ahihchiang in ka meltheih
leh ka muante kiang ah kava bantai hi. Himahleh cheng khat lel ka
kiikpih ding leng ka mu zoukei hi. Ka zak tampen bel “nang tagah, a
sepna nei khat leng hilou bang a non dit sawm eita… a pung lelleng na
pezou kei ding..” chih khawng ahi maimah hi. Ka lungsim ana mahmah mai
a, ka nau ittak mai ka khahsuah ding lah ka ngaingam mahmah kei hi. Ka
lungsim bang ah hiai bang laavui hongsuak zozen hi.
“Mang leh anaute vangsel lua sa’ng e…
Simlei tung ah amau dia pang ding mimbang pianglou hiam aw…
Tagah ding inleng tagah sawnsawn uh e….
Leimi khatlel bek a lungkham nemtu ding omlou hiam aw….”
Ka nau tegel leh Roselyn innsung ah aom ua, keibel ka mittui
luangluang ahihman in innsung a om ding leng ka utkei hi. Ka innka tau
uah ka tu a, hon sap chiang unleng ka utkei hi, aziakbel a upen ka
hihtoh ka mittui mule uh ka naute kidek zoulou ding uh ahihmanin. Aloh
ngaihna theilou ka hihchiang in awl in ka tutna apan ka dingkhia a,
biakinn lam zuan in ka pai hi. Biakinn ka tun in asung lah luut
theihlouh ahihman in a kong ah khukdin in Pathian mai ah mittui toh ka
nau damna ding ngen in kava thuum hi. Ka thuum zoh in keileng ka innlam
uh zuan in ka paikiikpah hi.
Ka nau etkolna ding sum lah mu zoulou ka hihchiang un hih dingdan om
tuanlou a, Pathian kiang a theihtawp a thum kawm in ka nau taksa bang
tuilum in ka zuut saksak mai hi. Ni nih nit hum hong paizoh hial chiang
in ka gintak hetlouh in khua bang hon phawkthei a, ka lungsim natna
tampi a sukiamzou hi’n ka thei ahi. Himahleh houpih theih ding bel a hi
nai samkei hi. Pathian in ka thumna hong dawng chi’n ka kipak mahmah a,
kipahthu bang gen in a damsiangna ding in ka theihtawp suah in ka
ngetsak denlai hi. Nu leh pate ngaihna bang a lian semsem a, amau omlai
hile uh hichi zozen lou ding hi’ng a maw chih khawng ngaihtuah in kei
leh kei bang ka kisukhase semsem hi.
Doctorte’n a theihtawp asuahnung ua lametna nei nawnlou a, a si ding,
khophawk khe nawnlou dia hon koih uh himahleh awlawl in halh lam hon
manoh hiaihiai hi. Sawtpi pau zoukei mahleh, sauloulou bel a houpih
theihta hi. Huchi kawmkal ah ka sum neihteng ulah ka nau damdawi man
ding a beigai zel ahihman in ka nek ding bang uh kon tasam piansimta
uhi. Huaiziakin ka nau kiang a om a, tutpih den ut mahleng thil
hitheilou hongsuak maimahta hi. Mi inn a kiloh a va kuan nawn a, innsung
ka etkol zekphot ngaita hi. Ama a ka sepna lah kuan zom theilou ka
hihman in midang ana semsakta ua, a thak zong ding in ka kisata hi.
Mi theihsa hauloute ading in kilohna dinglel zon bangleng a haksa
mahmah hi. Mun tuamtuam ah kava daak vel a, himahleh kei hon poimoh a
omkei uhi. Aziakbel mibang a sa hoih kinei zoulou, mel etmai aleng
thahat ding chi hilou kahihman in. Sunkhua a kilohna ding zong a
kuanden, lah mu ngeilou ka hihchiang in ka tha bang hon dah piansim a,
ka lung ake mahmah hi. Himahleh lungkiat mawk a thil hitheilou ahihciang
in muh ngei lametna liantak toh a langlang ah ka paituah nilouh hi. A
tawptawp in munkhat ah sepna dan kava muzou khongkhong hi.
Alehlam ah Kimbawi lah a sungkuante’n pasal neisak thouthou sawm
zomah uh ahiding a, athuthang velte ka zak chiang in ka lungkhamna apung
semsem hi. A hihtheih nawnlouh nung in ka itna alian semsem a, amah
omlou a hizou mahmah nawnlou ka hihdan kamu hoih deuhdeuh hi. A pasalpa
ding bang ka eng mahmah a, keileng officer khat hisam leng uthuai na e
ka lungsim in a chichi mai hi. Nasem ka kuan leh ka paiteng in a innkong
uh tawnkha gige ka hihman in ka guk et gige a, himahleh Kimbawi mel
ding dan himhim ka mukha ngeikei hi. Ahitazongin a inn lel uh ka muh
inleng ka lungsim nuamsak tuan mahmah hi’n ka thei ahi.
Nikhat nasem zou ka paileh lampi ah pasal nih in khawl ding in honna
sawl uhi. Sawl a ka om bang in keileng thumangtak in ka khawlngal hi.
Huai pasalte’n “Mangbawi, nangziak a Kimbawi in pasal nei utlou ahi,
kintheipen in khenna lai bawl inla, pasal nei ding in sawl in…na huchih
kei ngeingei leh…” chih teng hon genkhum ua, huchi’n hon paisak uhi.
Lampi ka paikawm in ka ngaihtuah toutou a, Kimbawi kiang a kong ngai
nawnkei, pasal nei in va chih mawk ding haksa ka sa mahmah hi. Kimbawi
lou in ka omzou kei, amah lou in kipahna bangmah ka nei nawnkei,
himahleh a ngailou dan a houpih ding chih thu namai ahikei hi.
Inn ka tunga, ka tunphet in pau tamlou in ka kihahkhe ngal hi. Ka nau
leng nidang sang in ana haatzawta a, “U..hon tungta maw, na gim hia”
bang honna chi a, ka lung anuamsak tuan mahmah hi. Ka man in Roselyn ka
sam a, ka thiltuah teng leh ka hih dingdan ka dong hi. Himahleh Roselyn
inleng ka ngaihluat dan teng theivek ahihman in hon gen ding bangmah a
thei tuankei hi. Huchi’n keivuak in ka kingaihtuah nilouh a, atawp in
Kimbawi khenna ding lai gelh ding in ka kisa khong hi, kam a va gen ding
chihlah gen thei vual ding hilou ka hihman in. Ka ngaihtuah nilouh a,
atawp in hichi’n ka gelhkheta hi…
Chikmah chiang a ngilhlouh ding Kimbawi,
Hun paisa a nonna khotuahna leh na itna manphatak mai na hon kepsakna tung ah kipahthu ka gen masa ahi.
Mihing I hi a, I ngaihtuahna zong kikhek thei ahi chih ka
theichian semsem. Hun paisa ah konna it petmah a, nang tellou in nuam
kasa theikei hi. Himahleh tuni chiang inbel midang toh na kiten hoih
kasa zaw hi. Hon hua a hon mudah hikei mahleng ka hon ngai nawnkei hi.
Hehpihtak in a selam in ana lalou ding in ka hon ngen ahi.
Tuan a pasal dingpen mah toh hoihtak in hon kiteng unla, vondeih
zatam hong tawita un aw… Ken leng nikhattei Pathian panpihna toh kei toh
kituak ding khat kana nei ding hi.
Mangbawi.
Ka lehkhathon gelh kawmkawm in ka mittui hongluang zungzung ahihman
in ka lehkhathon bang a kawtzou zozen hi. A kawtnate ka hihsiang a,
hoihtak a khep in dakbawm ah ka thun hi. Ka thunzoh in Roeslyn kiang ah
hoihtak a honva piaksak ding in ka ngen ngal hi. Ka mai hong en a, ka
puaknatdan thei mahmah ahihmanin aman leng hon kahpih top a, ka lawmta
un ka mit bang uh a bawk zou zozen hi. Kimbawi leng ka thusel ding utlou
ahihman in ka ngetna bangin Kimbawite innlam hoh ding in a kuankhe ngal
hi. Ka lehkhathon mu leh bang achi de aw chih khawng peuh ka ngaihtuah
khop a, kei leh kei bang ka kisulunggim deuhdeuh hi.
Roselyn inleng va pepah thei ahiding a, a simzoh a athu omdan leng
hon thei dia ka vaikhak ahihmah bang in Kimbawi aw suak leng hon ngak
hi. Kimbawi in amuh in lamdang sa mahmah a, kei gelh ding bang inleng
gingta zozen lou hi. Khasia kisalua ahiding a Roselyn kawi in milak,
milak lou chih khuallou in a kapkhe ekek hi. A ngaihtuah tuah a hehlua
zaw ahingei dinga, Roselyn tonpih in a nute kiang ah “Nu, tukal mahmah
in pasal ka neita mai ding…” va chi hi. Huchia Kimbawi kampau leh omdan
teng a theih zoh in Roselyn kou inn zuan in hong painawn ngal hi. A
thuzak leh muh teng hon genvek a, pasal nei dia sawl himahleng ka kidek
zou tuankei, ka lungsim tawng in Kim kon itluat ziak zaw ahi aw, kon ngailua… ka chi vungvung hi.
KHEN XI na
Zankhovak a ihmulou hial a mittui toh hun ka zat nung in zingkhua
hongvaak khe khong hi. Keileng thoupah in ka kihahsiang a, ngap dandan a
nasem a vakuan mai ding ka sawm hi. Huchia ka omlai in gintak hetlouh
in Kimbawi nu hongluut phut hi. A mel etmai inleng a kipak hetkei chih a
chiang mahmah hi. Bang thu hon gen a bang hon chih sawm a maizen diam
maw chi’n kana lungbuai mahmah hi. Huchia ka lungbuai mahmah lai in,
thakhat in ka mai a khuttal in hon kawk a, “Mangbawi, nang bang kisa e?
Nang tagah piangsan ziak a ka tanu nu’n pasal nei theilou a, tua
nakpitak a sukhase zomah, liau ut maw, na liau ding na nei zou diam?
Ngaihdam ngen a na unau teng ua nonpaid uh ngai ding ahi. Nou maimai
khawng simmoh vual hilou kahi uh, si suk ua…” hon chih khum miatmiat hi.
Etna ding leng a vaang khopmai. Ka mitkha in amau jiaka Jail a khum a
ka om bang, ka nau tunitan pawt leng pawtkhe zoulou a aom khawng bang ka
mu dundun hi.
Kimbawinu’n a gen utteng a genzoh in hon pawtkhiatsan nawn hi. Ka
lungsim khat a si dedu a, lungkham toh puaknat ka thuah hi. Huchihlai in
Roselyn honglut a, bangmah genlou in ka kiang ah hontu hi. Kenleng
“Rose, non zing hoh ngei, bangthu om ahia?” ka chihleh bangmah genlou in
a mittui hon nuul nilouh hi. Kenleng “Rose, huchi ken, tagah khat mah
kihi ahihchiang a hiai bang khawng ka tuah ding mah uh ahi, Pathian in
hon kem dia nikhattei kuahiam ka hon suah ngei uh ka lamen..” ka chithuk
hi. Huchi’n aman leng “UMang, na piching mahmah, hilele dena Kimbawi nu
hon gen puaknat huai kasa lua, hon simmoh lawdeuh kasa…” honchi hi. Hon
genbeh a “UMang, Kimbawi toh na kiten theihna ding uh lampi
ngaihtuahlai ni…’ hon chi mawk a, lamdang bang kasa zozen hi.
Theihlouh kal in nasem a ka kuan bang hon hun dek mawk a, keileng ka
kisa pah hi. Nek ding om hiliai leh nasem a kuanlouh bang ka ut mahmah
hi, ka tha achau a ka lunggim mahmah ziak in thilteng ka thadah tha kia
asuak hi. Huchi’n peihlou sasa in awl in ka kuankhesuk hi. Ka sepna mun
uh ka tun in lawmte ana kimkhin zomah ua, nasep bang ana pan hialta uhi.
Kisuanglah sasa in kava pangngal a, ka heutupa un leng ka zekai ziak in
honna tai a, lawmte painung leng bangtan hiam ka sep ngai ding ahihdan
hon hilh zomah hi. Heh a utlouh theih vual lah hilou ahihchiang in a
chih bangbang ua ka om mai angai hi. Hon chih bang in honpaihak sak ngei
a, ka naute leng lungkham gawp uh ahidia, ka nasepna mun hon en ua, ka
paima ka kiang ah honna ngak ngiungeu ua, a chang bang in ahih theih
dandan in hon hihpih uhi.
Ka manphet in inn ah ka paitou ua, ka nau in ann ana huan ahihman in
kihahsiang in ann kane ngal uhi. Ann ka nek zoh un Kimbawi nu hon thil
gen hih teitei tum kahihman un singpi bawl in ka unau teng un ngaihdam
ngen a kuan ding in ka kisa uhi. Ka unau teng un kava kuan ua, ka nau
khat bang Kimbawi hutkhiatna ziak a hoihtak a leng pai thei nailou,
chiangkhun khun kawm in hongpai liailiai hi. Ka muh chiang in ka
hehpihtha bang asuak ua, tagah-genthei ka kisakna alian semsem hi.
Huchia awlawl a kapai nung un Kimbawite inn kava tung thei khong uhi.
Kimbawi in honna mupah a, hon muhphet in kamkhat leng paulou in a mittui
a nul ngal hi. Kenleng gen ding ka thei tuankei a, kava tu top hi.
Kimbawi pa’n “Mang, nou bangthu a singpi toh hongkuan e? Na nau pai
hoih thei nailoupi tawldamsak lai ding hia?” chi’n kamsiamtak in honna
houpih a, lamdang bang kasa zozen a, ka kha amuang tuan mahmah hi.
Kenleng “Pa aw, tuzing a Kimbawi nu hon pawt a, ngaihdam hon ngen un chi
a, kouleng tanau lah kinei tuanlou ahihchiang a ka unauteng ua ngaihdam
ngen dia hon kuan kahi uh…” chi’n ka dawng thuk hi. Ka gintak sangin
Kimbawipa mihoih mahmah khat ana hi dia, a kisuanglah law mahmah a,
“Mang, mawkmawk uteh kou ngaihdam kon nget zawk ding uh ahi, na hihkhelh
uh bangmah a omkei, kouziak a nou thuak nahi zaw uh…” chi’n aman
ngaihdam bang hon leh nget zozen hi. Ka lit uh banglou lua ahihman in ka
damhuai zozen ua, nuambang kasa lehlam daih uhi.
Houlim nuamtak a ka neihzoh un innlam zuan in ka unau teng in
lungkimtak in ka kiik uhi. Himahleh ka lungsim abel a parda kiang uapan
Kimbawi in mittui toh honna enden ahihmanin ka ngaihtuah kha den a, ka
mitkha ah ka muden hi. Ka ngailaw mahmah lai a, himahleh hihtheih ka nei
tuankei hi. Aman leng etmai in hon ngai mahmah lai ahihdan a chiang
huntawk hi. A thu in pasal neihsawm mahleh a tak inzaw a ngam mahmah kei
chih chiantak in a kimuthei hi. A poi ngei mai maw chihlouh ngal gen
ding a om takei hi. Hichia thil tuamtuam ngaihtuah kawm a pai in ka
naute hon gen bang bangmah kana za khakei a, ka lungkham ding hon
phallouh man un lampi ah chiamnuih peuh hon bawlpih ua, “U, ngaihdam
ngen dia hon kuan na chihlouh dia, Kimbawi ngen dia hon kuan khawng na
chizaw kei dia…na hai ngei..” khawng honchi ua, ka nui tou zaizai zel
uhi. Huchi’n ka inn uh muangtak in ka tung nawn uhi.
Nungak buai in bangchiteng in buai mahleng ka lehkhasim sukbuai sak
hetlouh ding chih ka thupi ahihman in inn ka tun phet un ka kisuhalh a
lehkha ka sim hi. Kenbel nikhat tei saap a panga Kimbawi leh a innkuante
panpihtu khat suah ding chih kana tup gige ahi a, huai inleng ka
lehkhasim hongsu thathou tuan mahmah hi’n kamu ahi. Mite’n laisim
ngeilou chia hon genlai ua ken amau sanga tam ana theihzawk ding ka tup
ahi gige hi. Huchibang mah in ka naute leng ka theihtawp in ka hasuan
gige a, huaiziak mah in tulel dinmun et in khosakna ah mi nuai a ka om
hang un lehkha lam ah ka unau un honphazou kuamah a omkei uhi. Hiaite
ziak bang in ka naute toh kipahthu genna hun bang kanei zel uhi.
Hunte hongpai zel a, ka laisimna lam bang ua leng theihlouh kal in
sangpi kana tungta uhi. Ka naute toh solkal nna khatbek gelhkhiat ding
chi in ka theihtawp suah in kapang uhi. Sum ka neih dandan uh lehkhabu
tuamtuam ka lei ua, ka simzoh chiang un ka naute toh asung a kigelhte ka
utna munmun uh ka kidongtuah zel ua, midang kuamah leng ngailou in
kouteng in nuam kasa mahmah uhi. Akallak inbel Roselyn hong vaak zel a,
huchilou midang kuamah hon pawt ngeikei ua, kouleng kuamah kiang ah kava
pawt ngei sese kei uhi. Ka skul neitupa uh sum tamkhop abat a la a ka
inn mai ua dawr bawl kahihman un huaikhawng ngak kikhel, a ngakloute’n
innsung na sem, huchikawm a lehkha sim kahi ua, kuaman hon eng kei
mahleh kouleng kuamah ka engtuan samkei uhi.
Nikhat ka inn uah Roselyn hong luutphut a, “UMang, kindeuh in damdawi
innlam va delh ni..” honchi hi. Kenleng a thu kan man tuanlou in kintak
in ka naute kia gen in kava zuipah hi. Hospital kava tun uale mi ana
tam mahmah a, Kimbawi leh anu khophawklou a lupna tung alum kava mupah
a, apam deuh a misi koihna a apa luang kava mu nawn hi. Athu bulbal lah
theilou kahihtoh ka lungbuai mahmah hi. Keileng awl in Kimbawi lupna ah
kava tupah a, houpih theih tuanlouh ahihchiang in daitak in a khophawk
ding ngak in ka omtop hi.
Awl in athu omdan ka theipan hi. Kimbawi moupuan ding leh a van ding
vel en a ainnkuan ua apawtna ua gari toh kiphutuah kha ua, apa si in
amah toh anu naktak a liam ahi. Poi kasak pih mahmah hi. A tanaute
khawng inlah honna ngaihsak law kholkei ua, Roselyn toh kou tegel achang
a kihou in ka omlel uhi. Huchia dakkal thum val bang ka omzoh un
Kimbawi in khua honphawk hi. Hon dakkhia a, a kiang a ka tut amuhle
kipak mahmah ahisam dinga nui zoulou sasa in hon nui a, ka khut atha
neihteng toh hon letsak a, awl in pau zoulou sasa in “UMang, hon
pawtkhiatsan nawnken aw…” hon chi a, kenleng “Kim, lungkham koh, na
kiang a omden ding kahi…” chi’n ka dawngthuk hi.
Hun sawtkhop ka ompih nung in Kimbawi leng hon damkhe khong hi. A pa
lah om nawnlou, a nu lah hatzou nawnlou, a pasal dingpa inlah nungak
dang ana neihsan ahihman in ka hehpihna leh ka itna a lian deuhdeuh a,
amah taisan zou ding dan in ka om nawnkei hi. Sepna tuamtuam ka gelhte
kilohching henla Kimbawi kipi maileh chih bang ka uttha asuak mahmah hi.
Kimbawi leng kei piaklouh damdawi bang a ne utkei a, ka ompih den mai
hi. A chang in ka naute’n honpha zel ua, kenbel innlam himhim leng kava
phaman kei a, Kimbawi kiang ah ka omden hi.
KHEN XII na (last episode)
Nikhat zing baihtak in ka nau tegel hon tungphei ua, kenleng ka
muhphet in “Nau, nou banghih dia tu zing khangkhang a hong pai e…” chi’n
ka dong hi. Ka naute’n “U, thu kipahhuai mahmah khat om a huai hon
hilhdek keive ua…” honchi uhi. Kenleng bang thu kipahhuai om e chi’n
thei uttak in ka dong a, amau hon chiamnuih in hon hilh utpah kei uhi.
Huchia kikankan a ka omlai un Roselyn leng kipahmel tak in hon luut hi.
Abang thu om a tuzing hon hichi kipah uh eide aw chi’n ka buai mahmah
hi. Huchia ka buai mahmah nung in Roselyn hon paukhia a, “Umuan, na nau
toh na nih ua na kaam gelhpen uh result suak a nou lohching tuak….” hon
chi a, ka kiguih zozen hi.
Hiaibang thu tu-le-tu a za ding in kinepna himhim leng kana neikei
hi. Ka kipak mahmah ua, ka naute hi’n Roselyn hi’n Kimbawite innkuan
hileh ka lung uh akim mahmah hi. Inn a va taipah chih lah thil hitheilou
ahihchiang in chi’n ka nau tegel singpi la ding in ka sawl a, Kimbawite
inn ah alopna dan in singpi ka dawnkhawm masa uhi. Thu tuamtuam bang
kikum khawm in kipaktak in ka nuikhawm zaizai uhi. Huchi kalah Kimbawi
nu a mit hah bang kikheng zozen in kamu ahi. A khitui hong luangkhia a,
hun paisa a honna kou, honna muhsit nate, kamsia a honna totlai nite
phawkkik ahingei dinga, ngaihdam bang hon ngen thepthup hi. Hon ngen lou
hileleng Kimbawi ka itna ziak in kenbel kana ngaidam vek khinta hi.
Nikhat ka naute kasam khawm a, Pathian kiang ah kipahthu genna ka
neihpih hi. Huaizoh in hiaitan ka tun theihna ding ua honna pitu leh
honna taisan ngeilou ka skul kaina lui uh neitupa kiang a neih dandan in
chi’n chini ser 3 tawi in ka unau teng un kipahthu genna nei ding chi’n
kava hoh uhi. Kava tun un ana siam mahmah ua, ka skul neitupa bang uh a
khasiat suak zozen ahidia honna kahkhum zozen hi. Kousang mah inleng
ana kipak zaw mah abang ua, anuam tuan mahmah hi. Singpi khawng hon bawl
ua, houlimna kawm a dawn in huchi’n kouleng ka naute toh lehkha sai
ding neuhneuh bang neilai ka hihman un awl in innlam zuan in ka
paikhiatsan uhi.
Ka nau lah hoihtak a paitheita, Kimbawite nuta inlah hoihlam nawt
deuhdeuh ua, pawt leng pawt zouta uh ahihman in ka omdan leng anuam tuan
mahmah ta hi. Ka buaitheih mahmah ziak in Kimbawite innlam leng kava
phaman ngeikei a, a kallak in alawmnu Roselyn toh amau hon hoh thoh zel
uhi. Huchi kawmkal ah ka inn neite uh tanu nu’n ka theih hetlouh a honna
deih mahmah ahiding a, hon tankhak theihna ding in lampi tuamtuam hon
zongta hi. Sun leh zan chih theihphial ding in inn a ka om nakleh hon
hoh gige banah kholai ka pawtna nasan ah ngaikhollou himahleng hon
zuizui mawkta hi.
Lungmuangtak a ka omlai in Roselyn hong hoh a, ka inn neite tanu nu
leng aom hi. Roselyn in a guuk in lehkhathon honpia a, kenleng ka
sangpah hi. Hon piakzoh nung sawtlou in Roselyn in hon paisan ngal hi.
Roselyn mel ka etchiang in kipahmel lua kasaklouh banah nidang a hon
bawldan toh kilamdanna nei hi a kamuh man in ka lungsim guuk anuam
hetkei hi. Ka inn neite tanu nu lah innsung khawng hon hahsiang sak
salsal a, pai oh va chih ding lah hilou, lah kana guuk nin mahmah hi.
Kimbawi lah ka ngai mahmah a, ahihhang in ka inn neite ka haksat hun a
innluahman nasan leng honla lou a ut bangbang a hon omsakte ahihman un
suk khasiat ding leng nuam kasa kei a, huaiziakin a tanu nu bang uleng a
ngai hikei mahleng pai di’n ka sawl ngamkei hi.
Hun sawtkhop a om zoh in hon paisan khongkhong hi. A paiphet in ka
room ah ka luut a, kei kia in ka lehkhathon ka sim hi. Ka gintaklouh
lamdaih in hichi’n ana kigelh mawk hi…
Lunglai a ngilhmoh UMang,
Sian huaina toh tangbang na dam lamen in na siang a thaikawi tong hong luan ing, hehpih in honna simsuak sak in aw.
UMang, kei dinga na hoihna gen ding chi leng gen ding atam mahmah
ding hi. kei hon khotuahtu, nangkia hilou a na naute nasan in kei adia
na thuaknate uh ka ngaihtuah chiang in thupi kasa mahmah a, hon din zou
vual ding kahikei hi. Ka hih theih sun ka damsung a nang chih bangbang
pom leh zui a na kiang a om gige ka utpen leh ka lunggulhpen ahi gige
hi. Himahleh thu ka zakzak chiang in na innkiangte naunu toh kingai chih
ngen kaza a, puaknat huai leh haksa kasa mahmah hi. Kenbel kon it
mahmah a, himahleh nang keisang a midang na iit zawk a, kumsawt loubang
tulpih dia deih chibang na teel leh na kal uah melma in ka hon pangkei
ding hi. Nang deih telna bangbang pom dia mansa kahi.
Kei na hon taihsat a, midang na teel zawk leleng na lungsim in
“Kimbawi in hon ngai gige, hon taisan ngeilou ding…” chih ana phawk gige
in aw, kon ngailua Umang…
Nanga dia chinglou,
Kimbawi.
Ka ngaihtuahna bang kikhek zou zozen abang hi. Kimbawi ka itna a lian
semsem a, midang adia ka phallouhna a uang semsem abang zozen hi. Ka
lehkhathon ka sim zohzoh in Roselyn kiang kava pha hi. Roselyn ana om a,
himahleh hoihtak in honna vaidawn nawnta kei hi. Kenleng “Rose, bangchi
e? na omdan kikhekna e?” ka chihpat leh Roselyn in “UMang, bang achia
kikheklou ding, nang adin zaw a thupi kei ding, Kimbawi adi ngaihtuahve,
huaikia hilou kenle hun neilou sasa a nou hoihna dia ka lungsim leh tha
teng seng sam inga tua na lungsim na huchi heikik lamdang konsa lua… na
utleh ka lawmta un hon taisan vengvengta oh…” hon chihkhum ngal hi.
Kenleng hilou ahihdan leh Kimbawi mah ngai kahihdan ka hilh a, himahleh
ka thugen gingta ding dan in a omkei hi. Ka lungkham mahmah a, thazoi
tak in innlam ka zuankik nawn hi.
Bangziak pentak a hon hichi hehsan lawmlawm uh ei diam aw, bang
thusia teng za uh ahia chih ka lungsim ah ka ngaihtuah khop hi. A tawp
in keileng kidek zou nawnlou in ka nau ka sam a, Roselyn kiang a thil
omdan teng kankhe ding in ka sawl hi. Ka nau leng thumangtak in ava
kuanpah hi. Sawtkhoptak ava om nung in hon tungkik a, kana dongpah hi.
Ka nau inleng hichi’n honna gen ngal hi. “U, innvengte tanu nu’n lum
leng lumkhawm kahi uh, kingai vuak hilou nupa toh kibang a om kahi uh,
ka kitengpahta ding ua, huaiziak in honna subuai nawnkei un…chia
uKimbawi kiang a va gen zel ahi ding..” hon chi hi. Ka lungsim tei a
dawt mah abang a, hehna toh naa kasa mahmah hi. Bangziak lawmlawm a hon
hichi sukminsiat eide aw chih bang ka ngaihtuah a, ka naute toh kihou
khawm in innluahna kituan ding dan ka gel uhi.
Huchi kawmkal ah Kimbawi khophawklou a hospital a pua uh ahi chih
kaza a, ka lungsim a nuamkei deuhdeuh hi. Roselyn kiang ah kava tai a,
himahleh ngaihsak in ka om nawnkei hi. Huchi’n keileng Kimbawi kiang ut
mahmah ka hihman in hospital lam kava zuan hi. Amun ka tunphet in
Kimbawi ka galmuh ngal a, lupna tung a zoi chitak a lum dingdiang ka
gal-et lel inleng ka thuak zoukei a, ka mittui a luang zungzung hi. A
kiang a va paiphei ding ka chihleh a tanaute uh pasal nih in honna dal
ua, Kimbawi lupna tan ka paithei kei hi. Ka gal etet mai a, ka hehpih
toh ka khasiat a suak mahmah hi. Hihtheih lah nei tuanlou phot kahihman
in innlam ah kapai maita hi.
Thu leh la bangmah za lou a kal nih bang hun ka zat zoh nung in
Kimbawi leng damtak a innlam zuanta ahi chih thu ka za zenzen a, ka
kipak mahmah hi. Kimbawi toh ka kisiat thu uh kuahiamte’n ana zak chiang
un ana kipak mahmah ua, Kimbawi tan theihna ding lampi ana sialta uhi.
Ahita zong in Kimbawi in kei lou pasal neilou ding chi’n apang tinten a,
huaithu in huai ka nau kapliamte pawl a hehsak mahmah hi. Huchi’n
huaite’n Kimbawi kiang ah kei thah ding tanpha in ana vau uhi. Ken
ahihleh bangmah ka theikei a, lungmuangtak in ka om nilouh hi.
Nitak khat ka lungleng lua ahihman in ka kingaihtung ua Kimbawi toh
ka kimuhna uh singbul zuan in ka pai hi. Awl a lamdung ka paikawm in mi
ki-it kingaitak a nungak leh tangval pawtkhawm helhelte bang ka en a, ka
eng thei mahmah hi. Huchia saulou ka pai nung in singphung ka tungta
hi. Ka etphei leh Kimbawi amah vuak in ana tumawk a, lamdang bang kasa
zozen hi. Ka lungsim guktak inbel ka kipak mahmah a, Kimbawi kiang a thu
omdan hoihtak a gen ding chih ka ngaihtuah ngal hi. Huchia Kimbawi
kianglam zuan a kapai lai in thakhat in Kimbawi in “UMang chih toh ka
mailam apan hon pumboh hi. Hon boh toh kiton in thau ging ka za a, ka
tung a sisan hon luang zungzung hi.
Kap a om ka hita ding chi’n ka ki-envel a, himahleh kei ana hitalou
in kei hon kapsawm uh Kimbawi ka mai a hon kidoh a, kei sih tang a si
ana hi maimah hi. Ka khasiat toh ka hehtha suak mahmah a, kintak a huai
mikap tute va nungdelh ding chi’n Kimbawi natan ngaihsak manlou in kava
delh hi. Himahleh delhphak bat ding vual ahikei uhi. Huchi’n keileng
kintak in ka lehtai a, Kimbawi kiang lam ka delh hi. Amun ka tun in
Kimbawi Police te’n hospital lam ana zotpih dek geih uhi. Policete’n hon
muhphet un kintak in sik honla khia ua ka khut ah hon bulhsak in a gari
in honpua uhi.
Kimbawi in a kapna uh thuak zoulou in leitung hon nutsiatsanta chih
Jail sung ah Roselyn in hon hilh hi. Sepaih heutute kiang a alung bek
hon musak un chi’n kap kawm in ka ngen ngutngut a, himahleh hon musak ut
kei uhi. Roselyn kaplum khate’n sum tampi pia a Policete ana guai zou
uh ahihman in kei Kimbawi thattu a ngoh in ka om hi. Ka pawna mahmah a,
ka itpen kei sih tanga si a, ken a hun tawpna, a luang bek leng mukhalou
chih ka ngaihtuah khop a, Jail sung a hon soisakna uh anatlam leng
bangmah ka phawk zozen kei hi. Ka mittui a luanluan nalam in ka tha
bangleng a chau gawp a, ngaihtuahna leng bangmah ka nei theikei hi.
Tualthat a ngoh aom kahihman in soisakna ka hah thuak mahmah hi.
Akallak in chiangpum, siikpum in hon kikhet huan ua, a kallak bang in
electric current in hon shock uhi. Thuak ahaksa mahmah mai. Ka itpen ka
suunna toh, ka thuakna toh na kholdiak hi’n ka thei ahi. Kimbawi limlak
bek kem thei ding in ka ngen a, hon phalsak hamham uh ahihman in Kimbawi
limlak ka angpom den a, soisak a ka om hi’n bangteng hun ah Kimbawi lim
ka khahsuah ngeikei hi. Hon soisaktu te’n zaw na sa a kap honsa ding
uh, himahleh kenbel hon soisak na sang un Kimbawi ka itna na kasa zaw a,
huaiziak mah a mittui ana nulnul kahizaw hi.
Kal khat sung bang hehpihna tellou a hon soisak zoh nung un thuak zou
nawnlou in keileng ka itpen Kimbawi omna lam zuan ding in ka kha a
paita hi. Simleitung zaw dah a khitui luanna gam ahi a, haksatna leh
kibawlsiatna gam ahi. Hiai nuaisimlei gentheihna tengteng tuangnung ka
siahta a, LUANKHI NULNA KHENLAM AH pialgal gam ah ka itpen Kimbawi toh
khen ni om ngei nawnlou ding in tuibang ka kigawmta uhi.
(NB: Hiai tangthu hon ngaihnatsak a, honna simsuaksakte tengteng
tung ah nakpitak in kipahthu ka hon gen ahi…. Ka kipak e…. – Paumuanlal
Guite)
©Siamsinna leh Vakiangbu
Comments
Post a Comment