SEENCHIL PAN IN
By: Tuan Phualte
"Meng! Meng!" chi'n dak-awl te hong ging mengmeng a, nitak ann nekhin ka lawmpa pawt dia zawn dek hina pi'n sidak gin nalam kava manoh zosop a, dakkhenpa nuai a blackboard ah misi leh sihna ziak kigelh te kava sim a, mi kihouna te ka ngaihven zoh in 'zanhah zel ngai di eive maw,' chilungsim kawm in ka lawipa ka va manoh hi.
Ann a na ne phuaphua lai a, sihzoupok lak a sahou khaak leh maltameh ngari toh bawl limchi deuhmai ana meh ua, annkam tuimawl toh ahina laihi. Kou meh le a limlou hi liailou ahihchia gil vahsim kei le chuh nenon dia honchial na uh man ka ut sim na a, a common room ua tutnasau nip thihtheh tung a tukawm in kana ngak zaw ta hi.
"Guol," ka kisap dan uh ahi, 'Misi kua a?" chi'n ka lawmpa'n hon dong a.
"Vengsak deuh te nupi khat hiveh. Lungphuhat nei mi ahihtuak. A tate nih bang Delhi a lehkhajil a om uh hinalai ei." chi'n ka thu theihteng report ka pe zangzang hi. "Ann hon ne meng dih e, kiat-kuat teh, ka gil lian chichi, ann na huchi nek a eivo'i. Moi te'h va baan malam uthuai eichu. Zanhah ngai di ahihchia dak 7:00 tan khawng va hel a, huaichia lengkhawm dia kuan khawm uthuai sa hiveng aw." chi'n ka nohbawl hi.
"Hah! Nou gel nungak hel pi bang le nava gen ngam pouh ua eita?," chi'n ka lawmpa naunu Kikim in hon na chikawt geih a, Moi min ka loh khak bang ka zumthak sim hi.
"E khai, nungak hel khawng i zeisa aka." Ka lawmpa'n ann kham a kam khuah dia kisa kawm in honna pautuh chet a. Kikim ka etleh nui seisai kawm a honna en hive'n bangchi et kha ka set diam, nui selsal lai amai hong san tuaituai a, a kun suk deudau mawk hi. Ken le mundang en lalap in khua lum kasak dan khawng paulap in ka phun pih momolh khempeuh hi.
Ka lawmpa Sasang toh ka neulai ua, school a ka kisual ek ua, teacher te'n hon kilemsak teitei ua, tutna khat a hon tutkhawm sak teitei uapan ana ki theisiam in lawmhoih pen hong suak kha ka hi thethup uhi.
Amau chuh mineizou tak ahi ua, apa contractor ahihbanah saptuam upa le ahi a, midiktat mahmah khat ahi hi. A u numei nih te'n pasal a nei khin ua, ama' nuai ah Kikim toh a nu-le-pa toh khosa ahi uhi.
Kikim pe'n in a u Sang angai mahmah a, ka neu lai uapa'n ka nung uh hon zui khial ngeilou, kou le asuk-atou a ka ki zuih pih det uh ahi hi. Kei bang le hon ngaina mahmah a, ken le amah chiah chu ka ngaina mahmah hi.
Ka nungak-tangval nung un bel kou teng thum ka ki zuizui thei non kei uhi, Kikim pen nungak khat hita ahihman in, banah inn na sep ding leh lengla bang le nei law tham ta ahihman in. Hilele Sasang leh kou gel bel ka kuzui khial ngeikei uhi. Ka veng te un a phiik hon hisak uhi.
Nungak ka hel ding chiang un, Sasang te inn apan ka kuan khe khawm langlang jel ua, Kikim in hon na chikawt deuh gige hi. Adang in bel ngaihtuah in le ka nei ngei kei na a hilele tunitak chiah chu, Kikim hon chihdan leh hon et dan meinei kasa law mahmah mawk a, ka ki et tuah ua kasan puap tuak dan uapa'n ka lungsim uh banghiam khat in hon khoih kha tuak hi'n ka thei ta mawk hi. Khaih! Ka lawm pa nau chauh le hilou ka neu lawm uh hilou a maw! Bangchi kata le. Smokey te lasak 'Stoney' chih la toh ka din mun bang kibang ka honsa law mawk hi. Ka theihlouh kal in ka neulai lawm Kikim lawmta dan a ka kingaihnat pih kasak leh ken itna tatak ana suah kha ka maimah hia leh! Buai huai na e! Lawmpa hon theih di bang lauhuai himai.
Hilele Kikim in huchidan a hong en di'n bel ka gingta het kei na a, hilele...chih om jel. Hilele.... hiai thumal chiah chu mitampi sulungbuai tu eive chih peuh ka ngaihtuah thethup hi.
Ka lawmpa le hong manta ahihman in pawt khe di’n ka kisa uhi. Kikim mel ahihleh ka en ngam non kei. En leng ka melsuah apan a ka lungsim ngaihtuah na a kilat khiak khak ding lau chuh ka hi pen mai. Ka mit siik in chu ka melh phei vuat a, nidang banglou tak in tunitak ka pawt dek uh chiamnuih a chihkawt toh hon kha khe het kei zomah hi.
“Guol, misinu’ tate Delhi a nih om uh na chi hia? A hilh khin ta d’uam?” chi’n ka pawt khiak kawm un ka lawmpa’n hon dong a.
“Hi, hilh khin ta mah un teh.”
“Hong lapman mah d’uam maw. Chile, jingchiang jingkal a hong kipan khe ding hi ua, hong lapman mah ngal unteh maw. Tulai bang chu flight kiman ta hilel ven.” A chih behlap a.
“Ticket amuh liai ua le tuh lap tham e. Jingchiang chet a di ticket a muh kei ualeh tuh laplou d’uh eive.”
“Ticket mulou hi leh laplouh di… hiai chiah chu hehhuai kasa ve. Nu te luang khualgam apan delh di’n hon na kivui san hiau di chih bang tuh! Kua thutheih le a hi!” Sasang in a chi matmat a.
“Huaichu hilaw tham. Hilele, khat ngaakpih vanglak leng khah adangte le huchih vek hong kilawm jel dia, sivui khah hong nongkai law tel thei eichu. Khual a om ni khat ni nih a hong tung zoulou bang le om thei jel a maw.” Chin ka sel tei a.
“Ah, huaichu! Ni khat ninih ngak angaih lele ngak di himai eivoi. Sihna ichih khah, i dam sung a chikmah chia kimu ngei nonlou ding, vangsiat ngial leh tangtawn a le kikhen den thei ki hi mawk eichu. Kei bang hile’ng, ka nu or kapa luang ka muh tawp na dia hon dal dia kua’n thunei a chi ut di kei chu.” Hon chi non a.
“Huai himawk lele ei jiak a khotang buaisak sawt di a ut huai tuan diam, chih hijel eichu.” Ka chi leuleu a.
“Hiaichiah chu, heutute’n le mipi sou dopna nei le uh, atam jaw in ngaak teitei hoih asa himhim d’uh.” Ka lawmpa’n a chi tinten a.
“Ei dia i va kikoih le tuh himah e maw.” Ken le hiai pen chiah chuh hi kasa thou.
Kougel bel thulak dia ka kikup sunsun chiang un ka kikupna te uh bang a gil thei mahmah vanglak hi. Kikim in ‘ki debate deuh gige’ hon hisak sek hi. Kei khah a mover ka hi deuh a, ka lawmpa chuh lungkimlouh na ding zon a siam mahmah ziakin a opposer ahi deuh sek hi. Thil sawisel na ding a thei mahmah sek a, ken kana sel jel hi. Kou gel chauh khawng leng huchi’n ka ki selsel thei uhi. Ka theihlouh kal un ka hoh na ding uh ka tung dek ta ua, a inn pam ua kuva dawr ah kawm kuva ka hai malam phot ua, Moi’ a ding le ka lei keep uhi.
Sasang leh Moi bel Rayburn College a ka kai lai pek ua pan kingai ahita uhi. Hilele Sasang toh sangmah in kei toh kholai ah ka kizui mun zaw daih uhi. Sasang te zahtakhuai asak jiak in Moi in pawt na di a neih chiang inle a jawn ngam kei sek a, kei hon jawn zaw zel hi. Huaijiakin ka veng teng un kingai hong hisak ua, kou bel poisa ka om het kei ua, kou teng thum chauh ka om chiang un ken ka kawt loh sek hi.
Huai nitak chu ka ngaihtuahna ka khaam zou non ta kei a, a paizang mahmah hi. Ka mitkha ah Kikim nuihmai hong kilang siisiai te ka nuai mangmoh hial hi. Hundang a leng melhoih kasak gige tuh ahi a, hilele nau bang a ka et ahi chi'n kana ki khemzou jel sek a, ka ngaihtuahna apaisau dek chiah ka khaaktan chetchet thei sek hi. Ka lawm pa’n midang toh hon dem bawl dek chiang a le ka lungsim sunggil a banghiam khat in hi a sak theih hetlouh lah a jiak di kava ngaihtuah sau utlouh dan te khawng ka ngaihtuah thakthak a, hi ka saktheih louhna jiak pen ka kipah pih kei hial hi. Ka thil phawksuah leh ka na kitheihmohbawl gige hilele tutung a hoihtak a ka bulsut ngampat khah, bangmah genlouh a umbilh phot chu hoih in ka khensat ta hi.
Lenkhawm na di mun dak 8:00 gin ma deuh lak in ka tung ua, nupi-papi hon lusun la sa in ana lim mahmah deerdeer ua. Lungleng thei deuh mah ka diam ah, ken bel nupi-papi hon toh huihmut a vuang ngernger hi awmtak a kisoi sim ngiaingiai kawm a lasak nuam kasak lamtak ahi non jijen hi. ‘Nuai simlei ngui zouta a sung a mihing teng toh….’ Khaih! La teng bang inla chu eichauh theih dia khiatna tuam nei mah bang ta ven aw. A phuaktupa hisap na lou lamtak in kei a dia khiatna nei lua sa a kigen lut teitei bang mai in kilimsuah tak in mitsi daudau jen in kasa baba hi.
Moi ka kal ua tu hive’n hon phuphei zauh a, ka etphei leh a muk hum chemcham in hon nuihsan kutkut hi.
“Lunglut kha vanglak. Ba na hichi phattuamngaih bawl le ahi?” hon chi suausuau a.
“Hilou, la khah, a thu ngaihtuah kawm a i sak ngerhngerh leh nuam pan phet aka,” chi’n ka kihou suausuau nilouh uhi.
Ka lawmpa bel lasa le hingel lou pi mitsi deda a veilam leh taklam a kisawi sim kawm in a khut ana beng kakkak hi. Moi toh ka en ua, ka nui tuuktuuk nilouh uhi. Huchi’n ka lasak ut na teng chiamnuih lam a kihei khavet ta ahihman in Moi toh miteng khawng ban et in ka nuih na di khop uh ka ngah mahmah uhi. Kim-le-kiang a te theih louh a kisel kawm a nuihdan bang le kizei lota hijel. Theihlouh kal in hunsawt bang ana pai dek man maimah hi.
Zanhak mi atam mahmah a, a vengveng a kidem bawl dan a akipai ziak in eiveng a zanhah ngai om nanana chu nungak-tangval kuapeuh in a ki awlmoh chiat hi. Jingkal khovak dek kuan ahita a, lasak na leng kitawl pian ta ahihman in nungak fel bangjah hiam te’n coffee san gilgial leh khum chik jijen hong awm ua, huai dawn kawm in kuapeuh a ki tawlkhawl phot hi. Zuntha ut ten zuntha in. Chihleh, nupi kahtam loh siam deuh mai khat hong kap khe keuhkeuh a, a kahtam loh te na kana sa mahmah hi. Kei le ka pa hon bei san lai bang ka phawk suah dundun a, ka kisu khase sim maimah hi.
Zingkal hong hih in Moi a inn uah kava kha ua, huaijoh in kou le innlam ka juan tuak uhi. Janhah khah gimhuai pi hi ding hiven ka tun in lupna tung ka ki denna pah a mangnei lou hial in ka ihmu hithit hi. Ka khanloh in nitaklam dak 1:00 ana ging velvol ta hi. Ka thou khia a, ka nu le kanau Siamnu ana om kei ua, ka nu sigal a hoh a hi ngei dia, ka nau ahihleh hankuan hi di’n ka koih hi. Kei le thohzoh liai leh han vakuan tei ka sawm zaw hiven khangma kha ta ka hihman in pawt khiak sawm non vet lou in ka kisilsiang a, ka laptop zan a kanau te lawmta in ana bangchi chalai gawp uh a diam ah ka local drive teng access theih ngellouh a om gawp khah bawl sawm in ka buaipih nilouh hi.
Ka phone hong ki vibrate sonson a ka etleh message leh miss call ana om zengzang uhi. Ka open a leh ka lawmpa Sasang leh Moi ngen ana ahi uhi.
“Guol, thou zou nai lou maw? Hanlam ah ka om ta uh.”
“UMuan, hong man dek nailou maw?”
“Guol, na mangpi mat lakloh lua a maw? J Ka na kuan mai uh.”
“UMuan, hong ihmu lawlaw lai aw leh, thauna di bek in hong zang leteh ha ha ha….”
Chihteng ana om giap hi. Ka nui viavua a, ken le message thuk tei in tua thou khe zou pan ka hihdan khawng ka theisak tuak a, kai gawpta ahihchiah chi’a inn a om a ka laptop bawl lel ka hihdan khawng anih un ka hilh a, nitak chia lenkhawm sawm zaw mai ka hih dan ka theisak hi. Ka laptop le kanau te’n pendrive a film ana la uh hingel ven chin virus ana om gawp a, ka hard disk teng ka access thei non ta keei kei hi. Autorun Virus a chihte uh ana hita ven chin, ka antivirus ka check leh ahun ana bei zomah a, a na ki deactivate ziak ana hi phiangsan hi. Sawtsim ka buaipih kunkun nilouh a, ka bawl hoih thei khongkhong hi.
Chikmah a ka et ut ngellouh hinapi, ka laptop a kanau Siamnu in a film koih, nuam lua chia a gengen, A Walk To Remember chih kei chauh in lunglut deuh mai in ka en gemgam hi. Huai film a Mandy Moore lasak ‘Only Hope’ chih la nalh kasa law thahah a, huai asak na mun bang thumvei mahmah ka en thakthak hi. A film a tawptan ka etzoh in ka mittui ana pawt nengnang vial uhi. Huai laitak lawmpa’n hong muhkhak di lauhuai himai.
A story in ka lung hong khoih kha sim chuh ahi pen mai a. Itna diktak ichihte huai te hinteh maw leh? Lamdang ka sak chu, chikmah a theih ngei le hilou leh tanau laina chih beek le hilou midang lua khat khawng mikhat in it chihtak a it theih mawk, chih khawng kangaihtuah nilouh a. Hilele, kei adia bel theihngeilouh lah hilou a…. Kheih! Zan nitaklam a kipat thil khat pepeuh ka ngaihtuah chiah ka lungsim in thilkhat chauh a mitdel sialkhau let chinten dan khah, ka lungsim ka mohsa mahmah a, hon zuausan tuk in ka ngai a, ka om bang a nuam kei zou hi.
Atawp in ka ngaihtuah na te’n kei-le-kei hon kichimtaak sak gawp ua ka pawt khia a, NuPam te kuva dawr ah kawm kuva kava haisan neunau a, ngaihtuah ngellou pi’n ka vaksuah ta hi. Hon suhalh deuh ding chi’n ka phone a thrash metal album bangjahhiam ka koih te ka earphone toh lutang ki singkham lou phet a ngai kawm in, awlawl in ka vak khia hi.
Chihleh ka tup kholh le hilou na pi’n banghiam muhtheihlouh khat hon pipi om bang mai in Sasang te innkong kava tung kha mawk hi. A gate ua lutdia kisa lakloh ta kahih man in kiknon dan om kei, mundang pawt na ding le thei tuan khang chih ngaihdan nei kawm in leh, maingal nasa mahni inn bangmai a omom nasa hiven chi’a kisiamtan kawm in lut din ka kisa ta hi. Nidang a le maingal tak a sun ann e bang e kava sawk ngam na sa bangjiak tak a tuni khelkhel a inn ua lut na ding jiak hoih deuh ngaihtuah ngaisa ka diam ah.
Kong ka kiu kauhkauh a, Kikim in hong hon petmah hi.
“Chidan e, kong bang non kiu khempeuh a,” chi’n hon nuihsan seisai hi.
“Ki polite gawp ai’htaak chu,’ chi’n ka lutsuk galgal a, TV mai a sofa tung ah ka tu phenphan hi.
“Nang chauh om maw, Kim?”
“Hi, ka nu’n inn ana ngak dia hon sawl a,” chi’n hon dawng a. “Nang lah bang chi den oi? Na lawite’n hon ngakngak uh hilou?” chi’n ka tutna gei a tutna tung ah hong tu tei a, a mobile phone in a biang lak a nuh nilouh a. Huai teng bang le muhnop huai kisa law mawk!
“Chk! Thou zoulou kei vo’i. Kei dak 1:00 a khanglou pan,’ chi’n ka ham vuaivuai a.
“Tua le na ihmut suak lai a hi di e.”
“Suak non lou, a kham law lam ika.”
“Nang na ihmu hoih hia leh tulai, ahimhim in?,’ chi’n ka dong heihai a.
“Ihmut hoih louh chih om tuan kei. Ba chi’a e?,” chi’n hon leh dot a.
“Bang chi kei e.”
Pauthei thou ka kisak leh ka gen di teng huihmut theng abang maimah hi. Huchia ka kihou sung un khatvei le ka ki entuah ngam kei tazen uhi. Ama’n lah kun deudau kawm in a phone a khoih nilouh hi. Mi’n i it ingaih tatak te kiang a kizum ahi achih chih uh, nidang khoh gingta lou a ka nuih pih hak-hak khah, tuakkha ka hi maimah hi.
Ken le bangtak ahia pasal…chi’a ki pasalsak deuh in ka lungsim hon kam gige pen chuh gen khiak ka sawm ek ta hi.
“Kim…” Ka dang hong awk dek vial a, ka gawl ka khuah siang phot zizen hi. Amin ka sapdan le nidang khawng a kasap sek dan banglou deuh a tuam kha deuh adiam ah, hong daktou guih a, tawlkhat sung pau zaw sam omlou in ka ki entuah kha nilouh uhi.
Chihleh bang mah ka gen man non ma’n kong hong ging a, ka lawmpa ana hi maimah hi. Salah!
“Ana thouzou khongkhong maw?,’ chi’n hong nui lut vervar ta zomah!
“Thouzou zenzen e. Hanhoh a tam hia leh, guol?”
“Tam zizen. Nidang khawng a hankuan leh lenkhop khawng kithaloh ichihdan te bang non kei ve aw. Tulai khangthak te fel thei uh eive. Ei hunlai bang kei ve uh,’ chi phelphal kawm in a nui phuphulh a, fridge sung a tuithol khat la khia in ka pam ah hong tu beubau a, a dawn kutkut hi.
“Tulai in le huchi thou mah ei. Hilele tua pen chiah chu, atate’n khualgam a pan hon delh ahi ua, miteng in itheivek a ilainat chiat a hi, meithai hizomah,” kana chi tei a.
“Hmm, pan non dek geet umaw, lehloh geuh.” Kikim in ana chi a.
Kou bel ka nih un kanui vemvom uhi. Kikim ka hoih et thak leh a nui na a, aman le hon na en gige hiven a mit-hah te a nui het kei ua, ka tuike nuih khasim viaivuai hi. Ka lawmpa antenna le ana sang thou ahihchia bang ana man kha adiam ah, “Ana kitawng ek na hi d’u ka chi?” hong chi thahah a.
“Mawk! Mawk!” Kikim toh ka chi duet kha lat zawzen uhi.
Ka lawmpa’n maksak chisim in kei hon en jel a, Kikim enjel a banghiam gen di’n a kisa a, ken le kindeuh in, “Koi, na raja imuam deh,’ ka chi a.
“Ah.. bei eivo’i.’
“Na leisa te khat vala zok dih e, guol. Ka duhlaw guih,” chi’n kasawl teitei a, a room a valut nalnal in la di’n a kuan a, kanaak huai zaw zen hi. Kikim ka et phei leh, ana nui konkon petmah hi. Ken le ka ngaihtuah thak leh kanuih hong za sim a, hilele ka nuikhe khuakhua ut kei hi.
Huchi’n raja ka muam zoh un TV ah bangbang hiam ka en ua, ka thil et te khawng uh ka ki kupkup ua leh hun hong sawt dek ahihman in ken leng pai ka sawm phot hi.
“Chih le lah guol, ann nek zoh chiah hon tawn tou non in law le, a’ihkeh aman masa sa NuPam' Dawr ah kingak le eive maw,’ chi’n Sasang in hon kha khia a.
“Ken kon tawn tou di guol, ana kisa pahpah leteh. Eh, Kim nang le tunitak chu non zuih di himai. Nana kisak di, na thei hia?’ ka chi lala a.
“A’i di chu,’ chi’n a nui selsal a, ‘Ann nek lim oh aw leh, UMuan,’ chi’n kong tan hong kha a.
“Nou le aw,” chi’n lungkim lou deuh mai in ka pai nalnal hi.
Nitak ann nek khit in ka kisa a, lengkhawm di’n ka kuan khe ta hi. NuPam dawr ah kawm kuva ka hai phei malam a, lawm te a di leng ka puak cheuh hi. Sasang ahih leh ann ne khin ana daileng kiatkuat lai a, Kikim bel ana kisa lellel hi.
Huchi’n Sasang leng hong man khe khongkhong a, Moi kava tawn phei ua, lengkhawm di’n ka kuan khe ta uhi. Kuan baih thou ka ki sak ua leh innsung teng ana dim vek man dek tak a, nihnih a ka kikhen uh a ngai ta hi. Sasang te lawmta a tukhawm ua, kei leh Kikim ka tukhawm kha uhi. Tu tung lenkhop chu Kikim toh ka tutkhawm ziak uh a diam ah lasak di lamlam le ka ngaihtuah kha kei hial a, gen theihlouh a kipah na viau khat nei in ka tu renran hi. Kuamah phawkpih louh in kei bel tunitak lenkhop ka phur mahmah a, nuam kasa gu mahmah hi. Aziak bel Kikim toh ka tutkhawm ziak uh chu hipeuh mah.
Kikim toh ka kithuah khak himhim chiang in banghiam kasung lam apan hon kuang khia khat in ka awm sung a kivei vivit in ka sapum teng hong jelsuak vek thei khat a om gige hi. Ka lungsim sunggil penpen in bel huai pen bang hihiam chih haih ngeilou hi. Hileleng ke’n kitheihmohbawl ka sawm gige ana hi zaw hi. Himahleh tu nanana in chu va imim a va kidek nilouh mawk pen kei-le-kei kikhem leh kigawt maimai dan in ka ngai ta a, kul leng kasa non kei hi. Huaiziak in, ka lungsim a kavei gige tuh kazui dia, a suaksuak hon suah pih ta ve, salah! Pasal!
La leng ka sa man ngel kei a, ka ngaihtuahna ana saupau sim man geet ahihman in. Theihlouh kal in lenkhop tawp hun hong tung maimah hi. Tawp in kong ah ka pawt khia ua, Sasang kia’h, “Guol, Moi vakha aw leh. Ken Kikim kana paipih di tunitak chu,’ ka chi a, aman leng hi sa thou adiam ah, nui sim thremthram kawm in pha hon sakpih pah vanglak hi. Hon theihguuk na chiang nei a maw leh? Ah, aman leng Moi toh hunlem a mu ut sam a hizaw in teh.
Kou leng Kikim te innlam zuan in ka paisuk ta ua, khaliik jan ahih zawk mah toh, kha avakpha mahmah a, mei himhim muh ding omlou in van a siang kilkel ua, aksi te apaak phingpheng uhi. Kikim pen ka veilampang a pai hiven, ka khut uh bang a kihet kha hialhial jel ua, khat veivei bang a khedap tul sang toh paisiam lou deuh adiam ah, hon phu phei kha ek zel hi. Atawp in ken le pauhet lou in a khut ka len gaih a, aman leh hon na mek tantan a, khut kilen kawm in pau hetlou a kituak tak leh lungsim a kitheihsiam natan nei sa bang mai in lungkim tak in ka tawn khawm halhal uhi.
Kikim te inn ka tun un a innkong ua loupa pou mitmet nalh mahmah tung a tutna li hiam kidoh leh dohkan neu kikeuh nalh mahmah tung a nek ding leh dawn ding bangbang hiam koih zeizai kawm in a nu leh apa khavak nuai ah ana tu ua, verandah a electric vaak in a salhvak toh khavak toh sun mah abang zou dekta a, a nop chi mahmah hi.
“Eh, Muan, lengkhawm tawpta maw? Hiai lam ah hong tu uah, nuam mahmah ei’khah,’ apa’n hon na chi a. Ken le chair khat kava luah tei a, a pa toh bangbang hiam thuvantang khawng ka ki kum ua. Kikim bel kikhek khe di’n innsung ah a lutsuak hi. Sawtlou nung in hong pawt khe non a, ka kiang a chair khat ah hong tu tei hi.
“Nu, thoukang thak lou a maw, jan nungnung in,’ chi’n Kikim in anu a dong a.
“Thak lou vanglak. Huihzang nung hiauhiau in chin thoukang om khollou ei ve.”
A pa’n, “Muanpu, tuailai te’n lapawl jil chikchia pat non sawm na hi ua? Kumsim khawmpi ding bang kigen simsim ta, kisak hun lawta hilou a maw?’ chi’n hon dong a.
“Hun ta eimah voi. Kalnon apat pat non di chu chi uh hi’a, hilele tutung tuailai a hong lut thak bang tam sim un chin, huai te houh ot bawl di hia ka chihsim uh hive aw,’ chi’n ka nui khuakhua a.
“Hah, khelkhal! Ki upasak vang lak,’ chi’n Kikim in hon na dawi gega a, “Hiai te lawmta khah, tulai ki upat sak dan khat thei khelkhal vial un chi’n.”
“Kul a kisa sim ta ua akei dia.” A nu’n ana chi zomah a, ka nui vek uhi.
“Nou lawmta na tel kei un a hong lo kei di ua,’ apa’n le ana chi tei a.
Cold drinks khawng dawn kawm in chiamnuih leh thuvantang khawng kikum in ka kilimsuah mahmah uhi.
Bangtan hiam nung in, “Khaih! A nuam law na a, hong kitut uah, kon na lupsan d’uh.” Chi’n a nu leh pa’n lum din hon lutsan ua, kou bel poi kasa khol kei uhi.
Kou gel chauh kon tut hial uleh, gen ut tam se lua gen masak dipen theilou in tawlkhat ka tu kha deda zawzen uhi.
“Kim, tu nitak lunglen huai maw, khavak toh.”
“Eivoi, nungak te miss lua houh na hia leh?”
“Miss di le nei khang e. Ken lah nang kiang a ka om chiah nuam asak in ka sak thoh a, kuamah dang kiang le ka ut sam’h.”
“Khavak fuh sim toh na kamsiam tha khawng suak ahi di ka chi, UMuan,’ chi’n a nui seisai a.
“Kamsiam maimai a hichibang thu khawng gen ut di hong sa. Ka tatak ei ve, Kim,” chihtak meldeuh mai a chikawm in ka en phei a, amah bel a kunsuk a, a khutchin khawng a khoih tatauh hi.
“Nuam nasa kei a hilou di, muh khak louhlouh dia na om sek. UMoi bang in houh hon miss law ta lou di hia, tutan tan,’ khawng hon chi ek mawk hi. Moi toh kingai dia aman leng hong na koih gige ahi chih ka man ngal hi.
“Huai, Moi khah---’ na USang toh kingai uh eivoi ka chih dek leh Sasang in kuamah theih sak nailouh ding hon chihlam ka phawk suah guih a, ka gen ban ka sunzom zok kei hi.
“Hi, huai UMoi khah, tua non gen khawng thei leh aheh law kei dia,’ aman le chihtak meldeuh in hon chi a.
“Heh mawk lou e, hon theisiam lawtel di eingal---’ gen lem ut selua huai bang ka chikha zawzen hi. Aziaktuh, Kikim ka veidan diktak kei-le-kei le ka kitheih ma pek apan leng a na thei zaw gige tuh Moi ahihziak ahi.
“Hon theihsiam chi na ngut e maw. Gintak louh pi a guk zulhzau sim houh na hi di ka chi,’ chi’n hon chiamnuih a, hon nuihsan kakauh a, ‘bangjah tak khen ta oi?’ hon chih behlap zomah hi.
Ka kigin louhdan tak in ka kihou na uh hong pai daih mai a, Moi toh kingai dia ka veng teng un, ka nu leh ka nau nasan in le, hon koih gige pen uh poi kana sak ngeilouh khah, tua Kikim toh kakal uh hong su konok tu ding abang maimah hi. Ka kingaih louh dan uh genchian leng lah ka lawmpa Sasang in kuamah hilh louh dia hon nget pen zuausan hi maimah ding ka hih chia, ka buaithak sim phiing hi.
Hilele huaiziak a ka itpen in ka lungsim teng lui khe dia ka kisak, ka damsung a dia ka hihpatna ding hizomah, hiaiziak a hon gintak zohlouh khah na kasa mahmah hi.
Dawng zok lou a sawt kingaihtuah kha deuh ka hi diam ah,
“UMuan, bang chi e? Heh na maw?,’ bang hong na chi man hial hi.
Kei le nuihmai mel ka kipusak thak a, thudang daih ka gen zawta uhi. Ken it in ngai tawk leng le, Kikim I chih khah nungak nunhoih tak, paukam zatdan natan a leng mi mitmei ven siam mahmah, lungsim guuk nei zaat leng hilou, banah melhoih mahmah toh duang etlawm mahmah thuah hina lai. Ki lamen sanglua houh ka hi kha ding. Ngaihzawng a neih leh a neihlouh leng ka theih louh pi! Aman leng kei hon ubawl a hon maingal maimai hikha ding eive. Hai hinang e. Ka kihehsan mahmah hi. Keih louh ding ka chih pen vakei kha chu ka hi pen mai a. Utleh! Bang tak ahia. Zum leh saili a si kuamah omlou chi uh hiven chi’n ka ki khauhsak thak a, maban ah ka lungtang dawm mahmah kawm a polhdan siam zawk mai chu kasawm zaw ta ve.
Jan leng hongsawt pianta ahihman in, vante innsung ah ka nonlut pih a, tui vot ka dawn zoh in ken leng luzang a khet puak buk toh kibang a gik melmul kawm in innlam ka zuan suk niangniang ta hi. Inn ka tun in lup din ka kisa pah hi. Ka ut liai nak leh tuh lungtang khauhsakin ka ngaihtuahna te leng ka khamzou sek hi. Thil ngaihtuah luat ka neih chiah ka ngaihtuah na te apau sau luat khak ding ka deih louh man in a kham na dia ka hih ngeina dan sek in, ka phone a ka la koih te ka lup kawm in ka ngai ekek hi. Ka la ngaih te khah stage a mipi tamtak mai a ken va perform dan a ki hisaap in ka ki khim ihmu thei khong hi.
Ka theihlouh kal in ka na ihmu kha a, mang nei hita ve ning in. Ka mang in ka inn sung ua om ka na kisak leh Kikim te inn ahi peuh ka na chi jel a, music ngaihdeuh in a ging zuazua a, loudspeaker (ma-ik) in khosung teng a thawn zuazua uh khawng kana chi a. Ka khodak hoih thak leh Kikim moupuan silh a ding ziapzuap kawm a kei hon kawk a hon nuihsan ekek dan in ka mu a, Biakinn sung khawng ah kana om thethup zel hi. Huchih laitak in music thawm ging zuazua pen hong dai guih ahi ka na chi a, kei chauh in ka verandah ua ngui deuh a tu ngiungeu dan in ka kimu a, khasetak a om ka ki chih laitak in ka khanglou guih hi. Ka phone a ka la play ihmut san kha kana hi a, zankhovak a kala koih teng loop a ki play nilouh ahihchia a battery bang ana beisiang kikeuh dan ana hi hi.
Khua a na vak tham ta ahihman in ka thou khia a, ka nau Siamnu annhuan khawng kava panpih zaw ta hi. Nitak kalup kawm a ka la ngaih te banah jan nitak a thuteng khawng ka ihmut hang a kalungsim pen ana ihmu lou hial hiven, mang lamdang tak a ka ngaihtuah n ate hong kihil uh ana hi ding dan hi’n. Ka ihmut hang in ka tawldam tuan het kei a, ka nguai tha a suak den niangnuang hi.
Huai sun chu koimah a pawt khiak leng ka sawm kei a, inn a om ka sawm zawta hi. Ka pa hon beisan nung a ama’ sepna skul a ken tua kasep lel na pen lah ki kai gina mungmang lou ahi man in, skul vapha leng le hun kizang thawn maimai a suak maimah hi. Skul naupang di ngial leng omlou ahi zomah hi.
Pawt khiak leng sawm lou a ka laptop a bangbang hiam ka khoih nilouh lai tak in ka phone message tone hong ging kakauh a ka et leh tuailai ten tunitak a lajil pan ta ding chih theihsakna ana hi hi. Huai ka etzoh in Moi in hong call a ken le ka pickup pah hi.
“UMuan, tunitak la jil kipan non ding chih na thei kha ta hia?’ hong chi a.
“Hi, tua message mu chet. Jil non kei d’ua maw.”
“Eivoi, ken le nuam kasak dan. Jan nitak na fuhna uhia leh?’ hon chi thahah a, kei le Siamnu hon zaak louh di’n inn kong ah ka va pawt khia hi.
“Fuh chih mawk, bang eita?’ chi’n ka lehdot heihai a.
“Ki theihmohbawl se lou aw. Bang mah gen ngamlou jel maw leh?’ chi’n hon nuihsan sahsah a.
“Ba chia eita?”
“Eh, ba chia hi kei e. Den in kholak ah ka ki mu kha ua hi.”
“Kua toh oi?”
“Pelpol mai! Na darling toh a kei dia. Dawr a hoh ka pailam a kiton kha ung a, ka hem dot sim leh thudang daih hon gen khum gagaih aka,” a chi a.
Ken leng im nei hetlou in Moi kiang ah jan nitak a thu teng ka hilh vek sisip ta hi. Ka lawmpa nau hikei leh chu Sasang toh kikum ding hi ung a. Moi toh leng thil bangmah ka ki im ngei kei uhi. Adiak in Kikim tungtang bang ah houh amah ahi hon theisiam pen leh hon mankhe baih pen. Huaiziak a thu omdan thei ut a hong kan dan ana hihtuak.
“A poi ngei e maw, UMuan. Hilele, lungkham na ding om hetlou eih kha aw. Aman leng nang hong vei law tel ahi chih ken ka thei lua aw. Huaiziak a---”
“Huai na bang chi theih eita?’ chi’n ka na pautuh a. “Ken chu gingta lou hiveng aw. Hong lawmbawl maimai khawng hi kha leh nuamlou law di eichu,’ bang ka chi khempeuh hi, huai a chih na ziak thei ut selua.
“Chk! Maimai teh. Ei le numei I hihchia. Numei leh numei chu kitheisiam law tel eingal. Hon gingta mai le teh. Tutung chu USang pen lem kei leh le ken a hih ding dan ka thei law na aw. Ken kon buaipih hun hita, ana lungkham rengreng koh,’ hon chi saisai a.
Huai hon chihtak a kipak se lua, “Khai Moi, ken chu ahi hi hisuk mai heh chia ngaihsak nonlouh sawm mai kei chu. Ei a dia kisiam a hikei a hinteh,” bang chi phot I hihtak chu.
“Khem, khem, ana om maimai oh ken a lampi ding ka thei law na ka chi veh,’ chi’n hon tai hilh ek a.
Huchi’n ann limtak a ne dia ki deihkhaak in ka koih phot uhi. Moi in hon phone khit phet bang chuh Sinai Taang a Mosi Pathian mukhin phet hon pai suk a amaitang a tang pempom toh ka mel kibang di’n ka gingta top. Ka lungsim ah, Moi thugen Kikim in kei hong vei ahi chih ka thei a chih pen kipahna dak ging bang in a gingging mai ta hi. Limlang nin deuh mai puan siangthou takmai toh va nulsiang ka bang ta huak ve.
Innsung a ka lut a nui lut kha phempham hita ve ning in, kanau Siamnu in theihsiam chi deuh a hon na et kelkal leh ka kisuanglah sim thak a, ka ki maigum sak thak mai hi. Amah lah a nuih aza dedeuh a ka nu a en phei a.
“Nu, tazen ka zum. Hiai pa khah---’ chi’n hon pan thahah a.
Kei le kindeuh a ki save khah ka siam zawngtak hiven kanu kana houpih somsom a, kanau a gen di pen ka gen kha sak thei kei hilhel hi. Amah lah khel pan dedeuh ven chin kanu toh ka kihou na uh thumang tak in hon na ngai khe deda phot sim zizen a, ka zoh chiang un ki khel-hah sak deuh mai a hong en teutau kawm in pan din hong kisa nak a, a tawp in ken le newspaper ka man zok a, nui viavua kawm in daileng di’n ka taisiat san hi.
©Siamsinna leh Vakiangbu
"Meng! Meng!" chi'n dak-awl te hong ging mengmeng a, nitak ann nekhin ka lawmpa pawt dia zawn dek hina pi'n sidak gin nalam kava manoh zosop a, dakkhenpa nuai a blackboard ah misi leh sihna ziak kigelh te kava sim a, mi kihouna te ka ngaihven zoh in 'zanhah zel ngai di eive maw,' chilungsim kawm in ka lawipa ka va manoh hi.
Ann a na ne phuaphua lai a, sihzoupok lak a sahou khaak leh maltameh ngari toh bawl limchi deuhmai ana meh ua, annkam tuimawl toh ahina laihi. Kou meh le a limlou hi liailou ahihchia gil vahsim kei le chuh nenon dia honchial na uh man ka ut sim na a, a common room ua tutnasau nip thihtheh tung a tukawm in kana ngak zaw ta hi.
"Guol," ka kisap dan uh ahi, 'Misi kua a?" chi'n ka lawmpa'n hon dong a.
"Vengsak deuh te nupi khat hiveh. Lungphuhat nei mi ahihtuak. A tate nih bang Delhi a lehkhajil a om uh hinalai ei." chi'n ka thu theihteng report ka pe zangzang hi. "Ann hon ne meng dih e, kiat-kuat teh, ka gil lian chichi, ann na huchi nek a eivo'i. Moi te'h va baan malam uthuai eichu. Zanhah ngai di ahihchia dak 7:00 tan khawng va hel a, huaichia lengkhawm dia kuan khawm uthuai sa hiveng aw." chi'n ka nohbawl hi.
"Hah! Nou gel nungak hel pi bang le nava gen ngam pouh ua eita?," chi'n ka lawmpa naunu Kikim in hon na chikawt geih a, Moi min ka loh khak bang ka zumthak sim hi.
"E khai, nungak hel khawng i zeisa aka." Ka lawmpa'n ann kham a kam khuah dia kisa kawm in honna pautuh chet a. Kikim ka etleh nui seisai kawm a honna en hive'n bangchi et kha ka set diam, nui selsal lai amai hong san tuaituai a, a kun suk deudau mawk hi. Ken le mundang en lalap in khua lum kasak dan khawng paulap in ka phun pih momolh khempeuh hi.
Ka lawmpa Sasang toh ka neulai ua, school a ka kisual ek ua, teacher te'n hon kilemsak teitei ua, tutna khat a hon tutkhawm sak teitei uapan ana ki theisiam in lawmhoih pen hong suak kha ka hi thethup uhi.
Amau chuh mineizou tak ahi ua, apa contractor ahihbanah saptuam upa le ahi a, midiktat mahmah khat ahi hi. A u numei nih te'n pasal a nei khin ua, ama' nuai ah Kikim toh a nu-le-pa toh khosa ahi uhi.
Kikim pe'n in a u Sang angai mahmah a, ka neu lai uapa'n ka nung uh hon zui khial ngeilou, kou le asuk-atou a ka ki zuih pih det uh ahi hi. Kei bang le hon ngaina mahmah a, ken le amah chiah chu ka ngaina mahmah hi.
Ka nungak-tangval nung un bel kou teng thum ka ki zuizui thei non kei uhi, Kikim pen nungak khat hita ahihman in, banah inn na sep ding leh lengla bang le nei law tham ta ahihman in. Hilele Sasang leh kou gel bel ka kuzui khial ngeikei uhi. Ka veng te un a phiik hon hisak uhi.
Nungak ka hel ding chiang un, Sasang te inn apan ka kuan khe khawm langlang jel ua, Kikim in hon na chikawt deuh gige hi. Adang in bel ngaihtuah in le ka nei ngei kei na a hilele tunitak chiah chu, Kikim hon chihdan leh hon et dan meinei kasa law mahmah mawk a, ka ki et tuah ua kasan puap tuak dan uapa'n ka lungsim uh banghiam khat in hon khoih kha tuak hi'n ka thei ta mawk hi. Khaih! Ka lawm pa nau chauh le hilou ka neu lawm uh hilou a maw! Bangchi kata le. Smokey te lasak 'Stoney' chih la toh ka din mun bang kibang ka honsa law mawk hi. Ka theihlouh kal in ka neulai lawm Kikim lawmta dan a ka kingaihnat pih kasak leh ken itna tatak ana suah kha ka maimah hia leh! Buai huai na e! Lawmpa hon theih di bang lauhuai himai.
Hilele Kikim in huchidan a hong en di'n bel ka gingta het kei na a, hilele...chih om jel. Hilele.... hiai thumal chiah chu mitampi sulungbuai tu eive chih peuh ka ngaihtuah thethup hi.
Ka lawmpa le hong manta ahihman in pawt khe di’n ka kisa uhi. Kikim mel ahihleh ka en ngam non kei. En leng ka melsuah apan a ka lungsim ngaihtuah na a kilat khiak khak ding lau chuh ka hi pen mai. Ka mit siik in chu ka melh phei vuat a, nidang banglou tak in tunitak ka pawt dek uh chiamnuih a chihkawt toh hon kha khe het kei zomah hi.
“Guol, misinu’ tate Delhi a nih om uh na chi hia? A hilh khin ta d’uam?” chi’n ka pawt khiak kawm un ka lawmpa’n hon dong a.
“Hi, hilh khin ta mah un teh.”
“Hong lapman mah d’uam maw. Chile, jingchiang jingkal a hong kipan khe ding hi ua, hong lapman mah ngal unteh maw. Tulai bang chu flight kiman ta hilel ven.” A chih behlap a.
“Ticket amuh liai ua le tuh lap tham e. Jingchiang chet a di ticket a muh kei ualeh tuh laplou d’uh eive.”
“Ticket mulou hi leh laplouh di… hiai chiah chu hehhuai kasa ve. Nu te luang khualgam apan delh di’n hon na kivui san hiau di chih bang tuh! Kua thutheih le a hi!” Sasang in a chi matmat a.
“Huaichu hilaw tham. Hilele, khat ngaakpih vanglak leng khah adangte le huchih vek hong kilawm jel dia, sivui khah hong nongkai law tel thei eichu. Khual a om ni khat ni nih a hong tung zoulou bang le om thei jel a maw.” Chin ka sel tei a.
“Ah, huaichu! Ni khat ninih ngak angaih lele ngak di himai eivoi. Sihna ichih khah, i dam sung a chikmah chia kimu ngei nonlou ding, vangsiat ngial leh tangtawn a le kikhen den thei ki hi mawk eichu. Kei bang hile’ng, ka nu or kapa luang ka muh tawp na dia hon dal dia kua’n thunei a chi ut di kei chu.” Hon chi non a.
“Huai himawk lele ei jiak a khotang buaisak sawt di a ut huai tuan diam, chih hijel eichu.” Ka chi leuleu a.
“Hiaichiah chu, heutute’n le mipi sou dopna nei le uh, atam jaw in ngaak teitei hoih asa himhim d’uh.” Ka lawmpa’n a chi tinten a.
“Ei dia i va kikoih le tuh himah e maw.” Ken le hiai pen chiah chuh hi kasa thou.
Kougel bel thulak dia ka kikup sunsun chiang un ka kikupna te uh bang a gil thei mahmah vanglak hi. Kikim in ‘ki debate deuh gige’ hon hisak sek hi. Kei khah a mover ka hi deuh a, ka lawmpa chuh lungkimlouh na ding zon a siam mahmah ziakin a opposer ahi deuh sek hi. Thil sawisel na ding a thei mahmah sek a, ken kana sel jel hi. Kou gel chauh khawng leng huchi’n ka ki selsel thei uhi. Ka theihlouh kal un ka hoh na ding uh ka tung dek ta ua, a inn pam ua kuva dawr ah kawm kuva ka hai malam phot ua, Moi’ a ding le ka lei keep uhi.
Sasang leh Moi bel Rayburn College a ka kai lai pek ua pan kingai ahita uhi. Hilele Sasang toh sangmah in kei toh kholai ah ka kizui mun zaw daih uhi. Sasang te zahtakhuai asak jiak in Moi in pawt na di a neih chiang inle a jawn ngam kei sek a, kei hon jawn zaw zel hi. Huaijiakin ka veng teng un kingai hong hisak ua, kou bel poisa ka om het kei ua, kou teng thum chauh ka om chiang un ken ka kawt loh sek hi.
Huai nitak chu ka ngaihtuahna ka khaam zou non ta kei a, a paizang mahmah hi. Ka mitkha ah Kikim nuihmai hong kilang siisiai te ka nuai mangmoh hial hi. Hundang a leng melhoih kasak gige tuh ahi a, hilele nau bang a ka et ahi chi'n kana ki khemzou jel sek a, ka ngaihtuahna apaisau dek chiah ka khaaktan chetchet thei sek hi. Ka lawm pa’n midang toh hon dem bawl dek chiang a le ka lungsim sunggil a banghiam khat in hi a sak theih hetlouh lah a jiak di kava ngaihtuah sau utlouh dan te khawng ka ngaihtuah thakthak a, hi ka saktheih louhna jiak pen ka kipah pih kei hial hi. Ka thil phawksuah leh ka na kitheihmohbawl gige hilele tutung a hoihtak a ka bulsut ngampat khah, bangmah genlouh a umbilh phot chu hoih in ka khensat ta hi.
Lenkhawm na di mun dak 8:00 gin ma deuh lak in ka tung ua, nupi-papi hon lusun la sa in ana lim mahmah deerdeer ua. Lungleng thei deuh mah ka diam ah, ken bel nupi-papi hon toh huihmut a vuang ngernger hi awmtak a kisoi sim ngiaingiai kawm a lasak nuam kasak lamtak ahi non jijen hi. ‘Nuai simlei ngui zouta a sung a mihing teng toh….’ Khaih! La teng bang inla chu eichauh theih dia khiatna tuam nei mah bang ta ven aw. A phuaktupa hisap na lou lamtak in kei a dia khiatna nei lua sa a kigen lut teitei bang mai in kilimsuah tak in mitsi daudau jen in kasa baba hi.
Moi ka kal ua tu hive’n hon phuphei zauh a, ka etphei leh a muk hum chemcham in hon nuihsan kutkut hi.
“Lunglut kha vanglak. Ba na hichi phattuamngaih bawl le ahi?” hon chi suausuau a.
“Hilou, la khah, a thu ngaihtuah kawm a i sak ngerhngerh leh nuam pan phet aka,” chi’n ka kihou suausuau nilouh uhi.
Ka lawmpa bel lasa le hingel lou pi mitsi deda a veilam leh taklam a kisawi sim kawm in a khut ana beng kakkak hi. Moi toh ka en ua, ka nui tuuktuuk nilouh uhi. Huchi’n ka lasak ut na teng chiamnuih lam a kihei khavet ta ahihman in Moi toh miteng khawng ban et in ka nuih na di khop uh ka ngah mahmah uhi. Kim-le-kiang a te theih louh a kisel kawm a nuihdan bang le kizei lota hijel. Theihlouh kal in hunsawt bang ana pai dek man maimah hi.
Zanhak mi atam mahmah a, a vengveng a kidem bawl dan a akipai ziak in eiveng a zanhah ngai om nanana chu nungak-tangval kuapeuh in a ki awlmoh chiat hi. Jingkal khovak dek kuan ahita a, lasak na leng kitawl pian ta ahihman in nungak fel bangjah hiam te’n coffee san gilgial leh khum chik jijen hong awm ua, huai dawn kawm in kuapeuh a ki tawlkhawl phot hi. Zuntha ut ten zuntha in. Chihleh, nupi kahtam loh siam deuh mai khat hong kap khe keuhkeuh a, a kahtam loh te na kana sa mahmah hi. Kei le ka pa hon bei san lai bang ka phawk suah dundun a, ka kisu khase sim maimah hi.
Zingkal hong hih in Moi a inn uah kava kha ua, huaijoh in kou le innlam ka juan tuak uhi. Janhah khah gimhuai pi hi ding hiven ka tun in lupna tung ka ki denna pah a mangnei lou hial in ka ihmu hithit hi. Ka khanloh in nitaklam dak 1:00 ana ging velvol ta hi. Ka thou khia a, ka nu le kanau Siamnu ana om kei ua, ka nu sigal a hoh a hi ngei dia, ka nau ahihleh hankuan hi di’n ka koih hi. Kei le thohzoh liai leh han vakuan tei ka sawm zaw hiven khangma kha ta ka hihman in pawt khiak sawm non vet lou in ka kisilsiang a, ka laptop zan a kanau te lawmta in ana bangchi chalai gawp uh a diam ah ka local drive teng access theih ngellouh a om gawp khah bawl sawm in ka buaipih nilouh hi.
Ka phone hong ki vibrate sonson a ka etleh message leh miss call ana om zengzang uhi. Ka open a leh ka lawmpa Sasang leh Moi ngen ana ahi uhi.
“Guol, thou zou nai lou maw? Hanlam ah ka om ta uh.”
“UMuan, hong man dek nailou maw?”
“Guol, na mangpi mat lakloh lua a maw? J Ka na kuan mai uh.”
“UMuan, hong ihmu lawlaw lai aw leh, thauna di bek in hong zang leteh ha ha ha….”
Chihteng ana om giap hi. Ka nui viavua a, ken le message thuk tei in tua thou khe zou pan ka hihdan khawng ka theisak tuak a, kai gawpta ahihchiah chi’a inn a om a ka laptop bawl lel ka hihdan khawng anih un ka hilh a, nitak chia lenkhawm sawm zaw mai ka hih dan ka theisak hi. Ka laptop le kanau te’n pendrive a film ana la uh hingel ven chin virus ana om gawp a, ka hard disk teng ka access thei non ta keei kei hi. Autorun Virus a chihte uh ana hita ven chin, ka antivirus ka check leh ahun ana bei zomah a, a na ki deactivate ziak ana hi phiangsan hi. Sawtsim ka buaipih kunkun nilouh a, ka bawl hoih thei khongkhong hi.
Chikmah a ka et ut ngellouh hinapi, ka laptop a kanau Siamnu in a film koih, nuam lua chia a gengen, A Walk To Remember chih kei chauh in lunglut deuh mai in ka en gemgam hi. Huai film a Mandy Moore lasak ‘Only Hope’ chih la nalh kasa law thahah a, huai asak na mun bang thumvei mahmah ka en thakthak hi. A film a tawptan ka etzoh in ka mittui ana pawt nengnang vial uhi. Huai laitak lawmpa’n hong muhkhak di lauhuai himai.
A story in ka lung hong khoih kha sim chuh ahi pen mai a. Itna diktak ichihte huai te hinteh maw leh? Lamdang ka sak chu, chikmah a theih ngei le hilou leh tanau laina chih beek le hilou midang lua khat khawng mikhat in it chihtak a it theih mawk, chih khawng kangaihtuah nilouh a. Hilele, kei adia bel theihngeilouh lah hilou a…. Kheih! Zan nitaklam a kipat thil khat pepeuh ka ngaihtuah chiah ka lungsim in thilkhat chauh a mitdel sialkhau let chinten dan khah, ka lungsim ka mohsa mahmah a, hon zuausan tuk in ka ngai a, ka om bang a nuam kei zou hi.
Atawp in ka ngaihtuah na te’n kei-le-kei hon kichimtaak sak gawp ua ka pawt khia a, NuPam te kuva dawr ah kawm kuva kava haisan neunau a, ngaihtuah ngellou pi’n ka vaksuah ta hi. Hon suhalh deuh ding chi’n ka phone a thrash metal album bangjahhiam ka koih te ka earphone toh lutang ki singkham lou phet a ngai kawm in, awlawl in ka vak khia hi.
Chihleh ka tup kholh le hilou na pi’n banghiam muhtheihlouh khat hon pipi om bang mai in Sasang te innkong kava tung kha mawk hi. A gate ua lutdia kisa lakloh ta kahih man in kiknon dan om kei, mundang pawt na ding le thei tuan khang chih ngaihdan nei kawm in leh, maingal nasa mahni inn bangmai a omom nasa hiven chi’a kisiamtan kawm in lut din ka kisa ta hi. Nidang a le maingal tak a sun ann e bang e kava sawk ngam na sa bangjiak tak a tuni khelkhel a inn ua lut na ding jiak hoih deuh ngaihtuah ngaisa ka diam ah.
Kong ka kiu kauhkauh a, Kikim in hong hon petmah hi.
“Chidan e, kong bang non kiu khempeuh a,” chi’n hon nuihsan seisai hi.
“Ki polite gawp ai’htaak chu,’ chi’n ka lutsuk galgal a, TV mai a sofa tung ah ka tu phenphan hi.
“Nang chauh om maw, Kim?”
“Hi, ka nu’n inn ana ngak dia hon sawl a,” chi’n hon dawng a. “Nang lah bang chi den oi? Na lawite’n hon ngakngak uh hilou?” chi’n ka tutna gei a tutna tung ah hong tu tei a, a mobile phone in a biang lak a nuh nilouh a. Huai teng bang le muhnop huai kisa law mawk!
“Chk! Thou zoulou kei vo’i. Kei dak 1:00 a khanglou pan,’ chi’n ka ham vuaivuai a.
“Tua le na ihmut suak lai a hi di e.”
“Suak non lou, a kham law lam ika.”
“Nang na ihmu hoih hia leh tulai, ahimhim in?,’ chi’n ka dong heihai a.
“Ihmut hoih louh chih om tuan kei. Ba chi’a e?,” chi’n hon leh dot a.
“Bang chi kei e.”
Pauthei thou ka kisak leh ka gen di teng huihmut theng abang maimah hi. Huchia ka kihou sung un khatvei le ka ki entuah ngam kei tazen uhi. Ama’n lah kun deudau kawm in a phone a khoih nilouh hi. Mi’n i it ingaih tatak te kiang a kizum ahi achih chih uh, nidang khoh gingta lou a ka nuih pih hak-hak khah, tuakkha ka hi maimah hi.
Ken le bangtak ahia pasal…chi’a ki pasalsak deuh in ka lungsim hon kam gige pen chuh gen khiak ka sawm ek ta hi.
“Kim…” Ka dang hong awk dek vial a, ka gawl ka khuah siang phot zizen hi. Amin ka sapdan le nidang khawng a kasap sek dan banglou deuh a tuam kha deuh adiam ah, hong daktou guih a, tawlkhat sung pau zaw sam omlou in ka ki entuah kha nilouh uhi.
Chihleh bang mah ka gen man non ma’n kong hong ging a, ka lawmpa ana hi maimah hi. Salah!
“Ana thouzou khongkhong maw?,’ chi’n hong nui lut vervar ta zomah!
“Thouzou zenzen e. Hanhoh a tam hia leh, guol?”
“Tam zizen. Nidang khawng a hankuan leh lenkhop khawng kithaloh ichihdan te bang non kei ve aw. Tulai khangthak te fel thei uh eive. Ei hunlai bang kei ve uh,’ chi phelphal kawm in a nui phuphulh a, fridge sung a tuithol khat la khia in ka pam ah hong tu beubau a, a dawn kutkut hi.
“Tulai in le huchi thou mah ei. Hilele tua pen chiah chu, atate’n khualgam a pan hon delh ahi ua, miteng in itheivek a ilainat chiat a hi, meithai hizomah,” kana chi tei a.
“Hmm, pan non dek geet umaw, lehloh geuh.” Kikim in ana chi a.
Kou bel ka nih un kanui vemvom uhi. Kikim ka hoih et thak leh a nui na a, aman le hon na en gige hiven a mit-hah te a nui het kei ua, ka tuike nuih khasim viaivuai hi. Ka lawmpa antenna le ana sang thou ahihchia bang ana man kha adiam ah, “Ana kitawng ek na hi d’u ka chi?” hong chi thahah a.
“Mawk! Mawk!” Kikim toh ka chi duet kha lat zawzen uhi.
Ka lawmpa’n maksak chisim in kei hon en jel a, Kikim enjel a banghiam gen di’n a kisa a, ken le kindeuh in, “Koi, na raja imuam deh,’ ka chi a.
“Ah.. bei eivo’i.’
“Na leisa te khat vala zok dih e, guol. Ka duhlaw guih,” chi’n kasawl teitei a, a room a valut nalnal in la di’n a kuan a, kanaak huai zaw zen hi. Kikim ka et phei leh, ana nui konkon petmah hi. Ken le ka ngaihtuah thak leh kanuih hong za sim a, hilele ka nuikhe khuakhua ut kei hi.
Huchi’n raja ka muam zoh un TV ah bangbang hiam ka en ua, ka thil et te khawng uh ka ki kupkup ua leh hun hong sawt dek ahihman in ken leng pai ka sawm phot hi.
“Chih le lah guol, ann nek zoh chiah hon tawn tou non in law le, a’ihkeh aman masa sa NuPam' Dawr ah kingak le eive maw,’ chi’n Sasang in hon kha khia a.
“Ken kon tawn tou di guol, ana kisa pahpah leteh. Eh, Kim nang le tunitak chu non zuih di himai. Nana kisak di, na thei hia?’ ka chi lala a.
“A’i di chu,’ chi’n a nui selsal a, ‘Ann nek lim oh aw leh, UMuan,’ chi’n kong tan hong kha a.
“Nou le aw,” chi’n lungkim lou deuh mai in ka pai nalnal hi.
Nitak ann nek khit in ka kisa a, lengkhawm di’n ka kuan khe ta hi. NuPam dawr ah kawm kuva ka hai phei malam a, lawm te a di leng ka puak cheuh hi. Sasang ahih leh ann ne khin ana daileng kiatkuat lai a, Kikim bel ana kisa lellel hi.
Huchi’n Sasang leng hong man khe khongkhong a, Moi kava tawn phei ua, lengkhawm di’n ka kuan khe ta uhi. Kuan baih thou ka ki sak ua leh innsung teng ana dim vek man dek tak a, nihnih a ka kikhen uh a ngai ta hi. Sasang te lawmta a tukhawm ua, kei leh Kikim ka tukhawm kha uhi. Tu tung lenkhop chu Kikim toh ka tutkhawm ziak uh a diam ah lasak di lamlam le ka ngaihtuah kha kei hial a, gen theihlouh a kipah na viau khat nei in ka tu renran hi. Kuamah phawkpih louh in kei bel tunitak lenkhop ka phur mahmah a, nuam kasa gu mahmah hi. Aziak bel Kikim toh ka tutkhawm ziak uh chu hipeuh mah.
Kikim toh ka kithuah khak himhim chiang in banghiam kasung lam apan hon kuang khia khat in ka awm sung a kivei vivit in ka sapum teng hong jelsuak vek thei khat a om gige hi. Ka lungsim sunggil penpen in bel huai pen bang hihiam chih haih ngeilou hi. Hileleng ke’n kitheihmohbawl ka sawm gige ana hi zaw hi. Himahleh tu nanana in chu va imim a va kidek nilouh mawk pen kei-le-kei kikhem leh kigawt maimai dan in ka ngai ta a, kul leng kasa non kei hi. Huaiziak in, ka lungsim a kavei gige tuh kazui dia, a suaksuak hon suah pih ta ve, salah! Pasal!
La leng ka sa man ngel kei a, ka ngaihtuahna ana saupau sim man geet ahihman in. Theihlouh kal in lenkhop tawp hun hong tung maimah hi. Tawp in kong ah ka pawt khia ua, Sasang kia’h, “Guol, Moi vakha aw leh. Ken Kikim kana paipih di tunitak chu,’ ka chi a, aman leng hi sa thou adiam ah, nui sim thremthram kawm in pha hon sakpih pah vanglak hi. Hon theihguuk na chiang nei a maw leh? Ah, aman leng Moi toh hunlem a mu ut sam a hizaw in teh.
Kou leng Kikim te innlam zuan in ka paisuk ta ua, khaliik jan ahih zawk mah toh, kha avakpha mahmah a, mei himhim muh ding omlou in van a siang kilkel ua, aksi te apaak phingpheng uhi. Kikim pen ka veilampang a pai hiven, ka khut uh bang a kihet kha hialhial jel ua, khat veivei bang a khedap tul sang toh paisiam lou deuh adiam ah, hon phu phei kha ek zel hi. Atawp in ken le pauhet lou in a khut ka len gaih a, aman leh hon na mek tantan a, khut kilen kawm in pau hetlou a kituak tak leh lungsim a kitheihsiam natan nei sa bang mai in lungkim tak in ka tawn khawm halhal uhi.
Kikim te inn ka tun un a innkong ua loupa pou mitmet nalh mahmah tung a tutna li hiam kidoh leh dohkan neu kikeuh nalh mahmah tung a nek ding leh dawn ding bangbang hiam koih zeizai kawm in a nu leh apa khavak nuai ah ana tu ua, verandah a electric vaak in a salhvak toh khavak toh sun mah abang zou dekta a, a nop chi mahmah hi.
“Eh, Muan, lengkhawm tawpta maw? Hiai lam ah hong tu uah, nuam mahmah ei’khah,’ apa’n hon na chi a. Ken le chair khat kava luah tei a, a pa toh bangbang hiam thuvantang khawng ka ki kum ua. Kikim bel kikhek khe di’n innsung ah a lutsuak hi. Sawtlou nung in hong pawt khe non a, ka kiang a chair khat ah hong tu tei hi.
“Nu, thoukang thak lou a maw, jan nungnung in,’ chi’n Kikim in anu a dong a.
“Thak lou vanglak. Huihzang nung hiauhiau in chin thoukang om khollou ei ve.”
A pa’n, “Muanpu, tuailai te’n lapawl jil chikchia pat non sawm na hi ua? Kumsim khawmpi ding bang kigen simsim ta, kisak hun lawta hilou a maw?’ chi’n hon dong a.
“Hun ta eimah voi. Kalnon apat pat non di chu chi uh hi’a, hilele tutung tuailai a hong lut thak bang tam sim un chin, huai te houh ot bawl di hia ka chihsim uh hive aw,’ chi’n ka nui khuakhua a.
“Hah, khelkhal! Ki upasak vang lak,’ chi’n Kikim in hon na dawi gega a, “Hiai te lawmta khah, tulai ki upat sak dan khat thei khelkhal vial un chi’n.”
“Kul a kisa sim ta ua akei dia.” A nu’n ana chi zomah a, ka nui vek uhi.
“Nou lawmta na tel kei un a hong lo kei di ua,’ apa’n le ana chi tei a.
Cold drinks khawng dawn kawm in chiamnuih leh thuvantang khawng kikum in ka kilimsuah mahmah uhi.
Bangtan hiam nung in, “Khaih! A nuam law na a, hong kitut uah, kon na lupsan d’uh.” Chi’n a nu leh pa’n lum din hon lutsan ua, kou bel poi kasa khol kei uhi.
Kou gel chauh kon tut hial uleh, gen ut tam se lua gen masak dipen theilou in tawlkhat ka tu kha deda zawzen uhi.
“Kim, tu nitak lunglen huai maw, khavak toh.”
“Eivoi, nungak te miss lua houh na hia leh?”
“Miss di le nei khang e. Ken lah nang kiang a ka om chiah nuam asak in ka sak thoh a, kuamah dang kiang le ka ut sam’h.”
“Khavak fuh sim toh na kamsiam tha khawng suak ahi di ka chi, UMuan,’ chi’n a nui seisai a.
“Kamsiam maimai a hichibang thu khawng gen ut di hong sa. Ka tatak ei ve, Kim,” chihtak meldeuh mai a chikawm in ka en phei a, amah bel a kunsuk a, a khutchin khawng a khoih tatauh hi.
“Nuam nasa kei a hilou di, muh khak louhlouh dia na om sek. UMoi bang in houh hon miss law ta lou di hia, tutan tan,’ khawng hon chi ek mawk hi. Moi toh kingai dia aman leng hong na koih gige ahi chih ka man ngal hi.
“Huai, Moi khah---’ na USang toh kingai uh eivoi ka chih dek leh Sasang in kuamah theih sak nailouh ding hon chihlam ka phawk suah guih a, ka gen ban ka sunzom zok kei hi.
“Hi, huai UMoi khah, tua non gen khawng thei leh aheh law kei dia,’ aman le chihtak meldeuh in hon chi a.
“Heh mawk lou e, hon theisiam lawtel di eingal---’ gen lem ut selua huai bang ka chikha zawzen hi. Aziaktuh, Kikim ka veidan diktak kei-le-kei le ka kitheih ma pek apan leng a na thei zaw gige tuh Moi ahihziak ahi.
“Hon theihsiam chi na ngut e maw. Gintak louh pi a guk zulhzau sim houh na hi di ka chi,’ chi’n hon chiamnuih a, hon nuihsan kakauh a, ‘bangjah tak khen ta oi?’ hon chih behlap zomah hi.
Ka kigin louhdan tak in ka kihou na uh hong pai daih mai a, Moi toh kingai dia ka veng teng un, ka nu leh ka nau nasan in le, hon koih gige pen uh poi kana sak ngeilouh khah, tua Kikim toh kakal uh hong su konok tu ding abang maimah hi. Ka kingaih louh dan uh genchian leng lah ka lawmpa Sasang in kuamah hilh louh dia hon nget pen zuausan hi maimah ding ka hih chia, ka buaithak sim phiing hi.
Hilele huaiziak a ka itpen in ka lungsim teng lui khe dia ka kisak, ka damsung a dia ka hihpatna ding hizomah, hiaiziak a hon gintak zohlouh khah na kasa mahmah hi.
Dawng zok lou a sawt kingaihtuah kha deuh ka hi diam ah,
“UMuan, bang chi e? Heh na maw?,’ bang hong na chi man hial hi.
Kei le nuihmai mel ka kipusak thak a, thudang daih ka gen zawta uhi. Ken it in ngai tawk leng le, Kikim I chih khah nungak nunhoih tak, paukam zatdan natan a leng mi mitmei ven siam mahmah, lungsim guuk nei zaat leng hilou, banah melhoih mahmah toh duang etlawm mahmah thuah hina lai. Ki lamen sanglua houh ka hi kha ding. Ngaihzawng a neih leh a neihlouh leng ka theih louh pi! Aman leng kei hon ubawl a hon maingal maimai hikha ding eive. Hai hinang e. Ka kihehsan mahmah hi. Keih louh ding ka chih pen vakei kha chu ka hi pen mai a. Utleh! Bang tak ahia. Zum leh saili a si kuamah omlou chi uh hiven chi’n ka ki khauhsak thak a, maban ah ka lungtang dawm mahmah kawm a polhdan siam zawk mai chu kasawm zaw ta ve.
Jan leng hongsawt pianta ahihman in, vante innsung ah ka nonlut pih a, tui vot ka dawn zoh in ken leng luzang a khet puak buk toh kibang a gik melmul kawm in innlam ka zuan suk niangniang ta hi. Inn ka tun in lup din ka kisa pah hi. Ka ut liai nak leh tuh lungtang khauhsakin ka ngaihtuahna te leng ka khamzou sek hi. Thil ngaihtuah luat ka neih chiah ka ngaihtuah na te apau sau luat khak ding ka deih louh man in a kham na dia ka hih ngeina dan sek in, ka phone a ka la koih te ka lup kawm in ka ngai ekek hi. Ka la ngaih te khah stage a mipi tamtak mai a ken va perform dan a ki hisaap in ka ki khim ihmu thei khong hi.
Ka theihlouh kal in ka na ihmu kha a, mang nei hita ve ning in. Ka mang in ka inn sung ua om ka na kisak leh Kikim te inn ahi peuh ka na chi jel a, music ngaihdeuh in a ging zuazua a, loudspeaker (ma-ik) in khosung teng a thawn zuazua uh khawng kana chi a. Ka khodak hoih thak leh Kikim moupuan silh a ding ziapzuap kawm a kei hon kawk a hon nuihsan ekek dan in ka mu a, Biakinn sung khawng ah kana om thethup zel hi. Huchih laitak in music thawm ging zuazua pen hong dai guih ahi ka na chi a, kei chauh in ka verandah ua ngui deuh a tu ngiungeu dan in ka kimu a, khasetak a om ka ki chih laitak in ka khanglou guih hi. Ka phone a ka la play ihmut san kha kana hi a, zankhovak a kala koih teng loop a ki play nilouh ahihchia a battery bang ana beisiang kikeuh dan ana hi hi.
Khua a na vak tham ta ahihman in ka thou khia a, ka nau Siamnu annhuan khawng kava panpih zaw ta hi. Nitak kalup kawm a ka la ngaih te banah jan nitak a thuteng khawng ka ihmut hang a kalungsim pen ana ihmu lou hial hiven, mang lamdang tak a ka ngaihtuah n ate hong kihil uh ana hi ding dan hi’n. Ka ihmut hang in ka tawldam tuan het kei a, ka nguai tha a suak den niangnuang hi.
Huai sun chu koimah a pawt khiak leng ka sawm kei a, inn a om ka sawm zawta hi. Ka pa hon beisan nung a ama’ sepna skul a ken tua kasep lel na pen lah ki kai gina mungmang lou ahi man in, skul vapha leng le hun kizang thawn maimai a suak maimah hi. Skul naupang di ngial leng omlou ahi zomah hi.
Pawt khiak leng sawm lou a ka laptop a bangbang hiam ka khoih nilouh lai tak in ka phone message tone hong ging kakauh a ka et leh tuailai ten tunitak a lajil pan ta ding chih theihsakna ana hi hi. Huai ka etzoh in Moi in hong call a ken le ka pickup pah hi.
“UMuan, tunitak la jil kipan non ding chih na thei kha ta hia?’ hong chi a.
“Hi, tua message mu chet. Jil non kei d’ua maw.”
“Eivoi, ken le nuam kasak dan. Jan nitak na fuhna uhia leh?’ hon chi thahah a, kei le Siamnu hon zaak louh di’n inn kong ah ka va pawt khia hi.
“Fuh chih mawk, bang eita?’ chi’n ka lehdot heihai a.
“Ki theihmohbawl se lou aw. Bang mah gen ngamlou jel maw leh?’ chi’n hon nuihsan sahsah a.
“Ba chia eita?”
“Eh, ba chia hi kei e. Den in kholak ah ka ki mu kha ua hi.”
“Kua toh oi?”
“Pelpol mai! Na darling toh a kei dia. Dawr a hoh ka pailam a kiton kha ung a, ka hem dot sim leh thudang daih hon gen khum gagaih aka,” a chi a.
Ken leng im nei hetlou in Moi kiang ah jan nitak a thu teng ka hilh vek sisip ta hi. Ka lawmpa nau hikei leh chu Sasang toh kikum ding hi ung a. Moi toh leng thil bangmah ka ki im ngei kei uhi. Adiak in Kikim tungtang bang ah houh amah ahi hon theisiam pen leh hon mankhe baih pen. Huaiziak a thu omdan thei ut a hong kan dan ana hihtuak.
“A poi ngei e maw, UMuan. Hilele, lungkham na ding om hetlou eih kha aw. Aman leng nang hong vei law tel ahi chih ken ka thei lua aw. Huaiziak a---”
“Huai na bang chi theih eita?’ chi’n ka na pautuh a. “Ken chu gingta lou hiveng aw. Hong lawmbawl maimai khawng hi kha leh nuamlou law di eichu,’ bang ka chi khempeuh hi, huai a chih na ziak thei ut selua.
“Chk! Maimai teh. Ei le numei I hihchia. Numei leh numei chu kitheisiam law tel eingal. Hon gingta mai le teh. Tutung chu USang pen lem kei leh le ken a hih ding dan ka thei law na aw. Ken kon buaipih hun hita, ana lungkham rengreng koh,’ hon chi saisai a.
Huai hon chihtak a kipak se lua, “Khai Moi, ken chu ahi hi hisuk mai heh chia ngaihsak nonlouh sawm mai kei chu. Ei a dia kisiam a hikei a hinteh,” bang chi phot I hihtak chu.
“Khem, khem, ana om maimai oh ken a lampi ding ka thei law na ka chi veh,’ chi’n hon tai hilh ek a.
Huchi’n ann limtak a ne dia ki deihkhaak in ka koih phot uhi. Moi in hon phone khit phet bang chuh Sinai Taang a Mosi Pathian mukhin phet hon pai suk a amaitang a tang pempom toh ka mel kibang di’n ka gingta top. Ka lungsim ah, Moi thugen Kikim in kei hong vei ahi chih ka thei a chih pen kipahna dak ging bang in a gingging mai ta hi. Limlang nin deuh mai puan siangthou takmai toh va nulsiang ka bang ta huak ve.
Innsung a ka lut a nui lut kha phempham hita ve ning in, kanau Siamnu in theihsiam chi deuh a hon na et kelkal leh ka kisuanglah sim thak a, ka ki maigum sak thak mai hi. Amah lah a nuih aza dedeuh a ka nu a en phei a.
“Nu, tazen ka zum. Hiai pa khah---’ chi’n hon pan thahah a.
Kei le kindeuh a ki save khah ka siam zawngtak hiven kanu kana houpih somsom a, kanau a gen di pen ka gen kha sak thei kei hilhel hi. Amah lah khel pan dedeuh ven chin kanu toh ka kihou na uh thumang tak in hon na ngai khe deda phot sim zizen a, ka zoh chiang un ki khel-hah sak deuh mai a hong en teutau kawm in pan din hong kisa nak a, a tawp in ken le newspaper ka man zok a, nui viavua kawm in daileng di’n ka taisiat san hi.
©Siamsinna leh Vakiangbu
Comments
Post a Comment