LUNGGIMNA ZANMIAL

By ~ Muana Guite

Innkong lam ah chu vuah a zu buahbuah a, huih le a nung vutvut hi. Damdawi inn tung lam chu a dai siksek hi. Step ah mikhat dah mel mahmah, a mel ah kipahna himhim muh di omlou khop hial a dah a tu hi, cabin sung ah a itpen sisan cancer ziak a lupna ngak a om a ngaihtuah chiah a biang a khitui hon luang khia hi.

Zinglam dak 2 lak vel in, a itpen, kumkhua a dia tulpih dia a tel.....in hiai khovel gim leh tawl te paisan in a Tangtawn mun ding a zot san ta hi....

Kha nawn a kiteng di ahi ua, kha 6 vel paisa in a Ngaihzawng nu'n sisan cancer vei ahih lam a thei khia uh hi, kum 2 vel ana ki ngai ahi ta ua....

Blood cancer vei ahihlam a theih khiat tung in zaw puak dan a siam kei himahleh a Itpen kiang ah zaw kipah mel a lang sak teitei in lunglou a dampah di ahi chi'n a khamuan zel hi. A hi tak in zaw hiai Cancer pen a hat te, a damsuah zou a vang mahmah uh. Doctor ten kum 2 vel hun a neilai di chin a gen uh.

A Itpen in Cancer hon vei mawk tu lamdang a sa a, a lungsim a buai mahmah, himahleh thupuk na khat hon bawl in, a sih ma ngei a Kitenpih hon sawm ta hi..........

A bultung in zaw a numei sung ten a aw pah thei kei uh, a kisuanglah luat ziak un, himahleh a sihma ngei a etkol ut leh a anglai ah khoi lup ut ahih dan kap kawm a a nget chiang in a numei sung ten le kisuanglah kawm pipi in a kiteng di uh a lemsak pih ta uh hi.

Huchi'n a ketli te leng sak in, kitenna a di chi'n awlawl in hon kisa khawl pan ta ua, himahleh kal 1 vel nung in a natna hon zual deuh in Damdawi inn hon zot pih pah uh hi. Huch'n ah Doctor ten hon check up ua leh a natna ana lut thuk law man in a chau mahmah ta....

Kiteng ding pen a ngaihtuah khak chiah a natna pen mangngilh sawm in kipah mel a pu teitei hi, a pasal di pen a dah di a phal kei....hita mahleh, Damdawi inn a lut un chu a buaise lam ahi ta, sisan unit 5 a piak zoh nung un le bang mah a phatuam nawn kei.....

A Itpen, a Nupi dia a tel pen damlou a lupna ngak a om a ngaihtuah chiah bang mah a sem thei kei, damdawi inn ah sun a zan chih omlou in a mittui a nul keuhkeuh mai a, hon halh khe nawn di chih lam en in ni 4 sung bang mah le ne mumal lou in a om a, hilehle tunitak a thiltung pen zaw a theihsiam a hak ngei mai......

Cabin sung ah a tailut a, zum leh zah khual lou in hiai khovel minute 2 vel paisa a ana paisanta, a Itpen chu pawm top ta, Nurse leh Doctor duty ten paikhe din a sawl zou kei uh.

A itpen biang ah en kawm in a kap zoihzoih mai ta, kuamah a hehnem di a omkei uh, a hehnem siam le a om tuan sam kei di...

"Nau, a mak tel maw, hichi mai a hon paisan mai ding maw? a hi thei kei, ka thuak di hon ngaihtuah pih ve, a haksa tel mai, bang chi'n ka om ta dia? ka Zi di na hi chih i theih nitak a i kipah dan te mangngilh ta na hiam? hon dawng ve, hehpihtak in khat vei chauh na aw hon za sak lai ve? na itpen kiang ah khatvei chauh na itna simthu hon gen ve....maw?? maw??"

A Itpen luang chu a soi noknok a, a pawm a, himah leh bangmah a phatuam kei, huai lak a omkha kuamah a kisum zou omlou in a mittui uh nul in a kidik hithit vek uh hi.

A Itpen luang bul ah tu in a sam a zut kawm in

"aw...ka itpen, ka ngaihpen nang tel lou in ka om siam kei di, himahleh hiai chauh hon ngaih khiak sak in aw....

Simlei tung ah lungzuan sial in,

Samgi bang i kikhen zong in,

Thangvan tualnuam i tun chiang' i laukha zong;

Tui bang kigawm ni, ngaih aw...."

Kua a hia, huai lak ah kidek zou om di? mipi om teng chu a dai vek ua, mittui nul lou a omkei uh, hiai kan a ki-itna thupi a om diam?

A tawpna pen din a Itpen muk ah tawp cheuh in " Mangpha aw....damsung a din Mangpha "

Innkong lam ah vuah leh huih kithuah nuai ah tai khia in Van lam en kawm in kap zoihzoih mai ta hi...

BEITA 

©Siamsinna leh Vakiangbu