PIANDANG ITNA
By~ Haopu Eimi
Ruthi toh ka kingaih tung un pawl IX simlel kahi pan uhi. Sinlai hih
na ziak leh a kum a et dia le'ng naupang mahmah lai kahih man un, pupa
dan bang a nitak kileng laat chihte kou adin a omthei kei, himah leh
skul leh luimun khawng ah kaki mu thei zel ua, amah muh utman in skul
kai bang katai ma mahmah hi. Khosak na vai ah katan uh kibang kasa ua,
mi bang a hau kahih louh man un kaki ngaina diak uh hi'n kathei. Kileng
laat chihte omthei kei mahleh laithon te kipia in itna thu leh bible
tang sim diing peuh kipe tuah in itna huan sung ah kuadang englou in
kabual khawm zel uhi. Huchi'a kum nih bang hih buaitu omlou leh
khat-le-khat kipan pih tuah a ka-om lai un...
Pawl X half yearly exam anai tak toh, laisim kahah pan thei mahmah a,
ngeina bang a ka class uah khatna lak sawm in kaki sabem ten hi. Ruthi
toh bang exam sung laisim pibawl phawt di'n kaki hanchiam ua, amah leng a
hah pan mahmah sam hi. Lamdang kasak bel, kei sa'ng a laisim kuhkal zaw
hina pi'n second division khel a tung ngeikei, khen chiang bang in
laisiam lou kisa lua in a kisuan lah thu peuh hon genkhum zel hi. A
lehlam tak ah kana kipak gumahmah, a kuhkal na te thupi kasa a, tupguh
neitak a laisim ahi chihte katheih in hon kipaksak mahmah ahi hi.
Exam kon nei ngei ua, gintat louh pi'n Ruthi lawm Nancy toh katu
khawm kha letlat uhi. Nancy bel ka skul ua dia melhoih a kigen lawi ahih
ban ah, laisiam mahmah lou leh kam zang a kitan khezou gige mi ahi. A
pau nuam mahmah a, tu khawm ding kahih lam uh a theih chikchik in,
"Umung, katheih louhte nawn hilh di ahi aw?" hon chipah saisai a,
"hitham e" chih teng in kadawng lel hi. Huchi hi napi gen ding akitasam
mahmah kei, exam kon pan ngei ua, abul a pat atawp tan hon dong suak
sipsip di'n kangaih tuah hial! Zouta kasak nung in extra paper a lak beh
a, neukhah bal khia in hon den toh melh zauh thuah in apawt hi. Kenleng
teacherte hon muhman khak lau in enleng en selou in ka box sung a
kaguang gaih hi. Kazoh in Ruthi in zou naikei lai a, ngak utsim mah
le'ng laisim leh ka questionte revise ka-ut man in kana paisan mai hi.
Kapai kawm a huai laithem ka-et leh, "Umung, thanks alot" chih ana
kigelh a, hichi tuk a hon kihilh a na kipah kei leh kua akipak tadia
kachi lungsim hi.
Niteng a huchi kon kihilh touh nilouh chiang un kaki maingap hiaihiai
ua, khen chiang peuh a zou ton in peuh kaki tonkha thepthup uhi. Exam
kazoh ding ni un kakuan pah a, katutna mun a revision bawl a kana tut
leh Nancy hong nuilut salsal a, na-ut diam? hon chi mawk hi. Chiamnuih
toh thuah in ut zenzen e, a utsa keivoi kana chih gaih leh, bang eita
na-ut hon leh chih daih a, kaki nuihsan tuah uhi. Taktak in maw Umung,
tunitak video i va-en diam? ka u te'n charity show bawl dek unchin
ticket le hon zuaksak ua, na-ut ding leh kei quota in i va-en di, hon
chi hi. Lawmte toh a endia kithukim sa himah le'ung hiai hun chiah in
zaw kalung buai phiing mahmah. "Aw" va chih mawk ding lah kalungsim khat
ah Ruthi in hon thei leh, chih a om a, va nial ding lah enthou di i hih
na ah, kimuh khak a om peuhmah dia, huai chiah nuamloupi a om leiluai
khak theih, chihte ngaihtuah a kabuai sung in, na kisathei ngei, Ruthi
hon zot hileh zaw "yes madam eh! darling" chipah lalat di hi vechin hon
chihkhum hi. Ruthi va chih khelkhel nang a leng kon "yes sir" lua aw,
chin kadawng thuk sam hi. Ana "yes" mawk mah le'ng kalungsim khat a
ki-awi thei mahmah kei! khen chiang in Ruthi peuh kamohsa thepthup,
kikhami sak lawkei henla'n, hichi bang hun nuam khawng ah lawmte bang in
ki-ki zui helhel theisam leh kachi vungvung hi. Mi a kopkop a pawt ding
ua, kei katang a ittu neilou bang mai a kholai ah vakvai zel ding maw?
Ruthi lah video parlour khawng a lut di te hilou, a kikhawm dia, gosh in
a goshpel sak kei dia khawng kalungsim in kachi muatmuat mai hi. A
lehlam ah Nancy bel kipak in ana nui selsal a, ash! a film lah noptuak, a
endi tegel in leng nop asa mah di uh, peuh chiin a chiam nui salsal hi.
Huai na china a zaw, a tangvalpa kanau eive, chin kana pau tuh a
chiamnui in kaphaphet kei uhi.
Nitak hun hongtung ngei a, kisa in minlun tawnsuk malam in bazar lam
kazuanta uhi. Exam zoh nitak na-na tuh kholai ah naupang hon dim in
kidim mai a, lampi bang ana kek neu uhia, chih theih leh kilawm kasa
hial a kuapeuh leng kipah mel chiat hi'n kathei hi. Paiphei zek in
lengtong store ah kuva hai kawm in kami ngak nu galdawt in kava tu
neknak uhi. Sawtlou nung in hong pai ngei a, himahleh Ruthi toh hong
kiton uh kamuh leh kaki guih hial a, gen di theilou in kakam ka heuhou
kha zozen hi! kakiang hon tun un kathei siam pan, Ruthi le nungtolh a
video etkhawng hon sawm houh hia, kana chihpen ana dik nengkei hial hi.
Nancy hong pawt dektoh lampi ah hong kilawm zuih maimai ana hi-ua, kua
video etmalak a lenuai ah bible zep chehchah hi. Thy, kikhawm dek maw?
kachih leh nui siusiau kawm in, hongpai ou nang toh va kikhawm ni, hon
leh chih daih a, paulam di zong in kaki kilepkhe teitei hi. Lungkim
khawlkei mah leh hon samtuam zek a, laithon hon piak kawm in, na kikhawm
zel zel sam kei dia Umung, tuni khawng ei a dia ni kipah huai eive hon
chi a, gen ding katheih louh man in Pathianni chiah kawng kikhawm teitei
ta di aw, chin kakhem lungdam hi.
Kakikhen zoh un Nancy leh Minlun in leng hon na ngak lai ua, awl in
kaki zui phei uhi. Lawm tegel bel a phur mahmah ua, lamtawn a engbawl
bawl toh hon thuah in anui zuazua nilouh uhi. Lawmte mai ah lungsim
nuamlou hih utsam lou in kenleng ka kot zanzan a, Minlun nawn huchih leh
Kimkimte in phak hunhun na voknou gukthu ngaihpi a genkhe di ing a,
Nancy toh humber a na kipuak ua lamtou a nasik kai zohlouh ziak a nanung
back lai uh leng gen di kahi, kachi zialzial hi. Huchi'a kichiam nuih
kawm a kapai lanlan uleh kanung lam ua pat 'Ulun' chin hong kisam a,
kinung hei a ka-et duam uleh Kimkim zum kisa in a san tuaituai hial hi.
Kipan thak nawn in, Minlun le Kimkim a beih taktak lai a sihpih
phialphial i sak leh, tun lah angailou lem khawng akineih dendan a
kachih khum nawn leh kalawmpa kot kisa gawp leh hunlem a la in, pai Kim,
hiai gel taisan daih ni, mi chichi uh, chi'n Kimkimte inn lam hon
zotsan ua, khuak zang fuh bang kaleh sak mahmah hi.
Kougel le'ng katung ngei ua, mi ana dim phetphut mah leh boss nu chet
theihna zal in thoveng tak in emergency exit lam ah kaleh lut hiau ua,
asuak thak chi'a akigen thanghuai zen "kuch kuch hota hai" tuh apau a
ham malkhat mah le'ng theilou na pi'n kava khasiat pih hial hi. A bei in
Minlunte lawmta toh kong ah kaki sutuah nawn ua, Mung nang Nancy va kha
in lan ken Kimkim kava kha dia, lamkal ah na kisual kei di uh aw, chin
kei kawtna te thuk fuh kisa tak in anui phelphal nilouh hi. Huchi'n
mangphate kikhak in kawng kikhen ua, Siamnu te inn ah tinkle bu khelh
malam in a innlam uh kazuan uhi. Kho omdan anuam mahmah a, vante siang
in kha leh aaksi taang pha mahmah nuai ah Nancy in gen di a hau ngial
hi. YPA jubilee suang kidohna katun un, Umung hiah tuzek ni, nitak leng
sawt naikei, exam tuung apat gen dia kasit te kon genta di, chi'n hon
khawl pih hi. Tut toh thuah in bang e na gen ut chu? hon na star gulua
houh nahi hia? chi'a ka chiamnuih phei leh adai vengveng hi. Bang chi e
ci, nuak man get maw? kachih leh bang dang le gen selou in, Umung nang
Ruthi toh kingai maw? hon chi chot a, chiamnui a phaphet loupa kam
humsak mah ka bang maimah.
Atawp in, bang chi a, kuan hon gen eita? ka kingaikei uh, chi'a
kakhem leh a gingta dek kei, min gen uh ahi, ken ana theipah lou ing a
ka-itna hon na peman kahi Umung, hehpih tak in thu chian hon hilh mai
ve, huai ahi kagen ut ka chihchih, chi kawm in kadawn na ngak in a dawi
dide zozen hi. Gen ding kathei kei, gen di kathei mahmah kei! kaleite a
tang theilou dia belh kip a om a bang a, kamuk te khui bing a om a bang
hial, Nancy ana ngah lua leh ana care lua kana hikhin tham ta! bang
chi'n Ruthi kazuau san dia, kum nih lam gin-omtak a kana kingaih pih
hita hia, chih te ngaihtuah in kabuai petmah. Umung ei, na itna hon
ngen leng hinai samlou ing a, huai leltak le hilh tak hon salou nahi di
maw? tu malam teng bang lai hon na piak sawmsim man keive, himahleh thu
kithang hiauhiaute kazak chi'a nang hon dot a, apoimoh leh kam a
genthoh mai di chithak a zum-le-zah leng khual zou nawnlou a hong genkhe
mai kahi, a hon chih behlap laidep hi. Ka kitheisiam zou mahmah kei,
Ruthi toh kingai mah kahi uh, nang adi'n ka-awng nawn kei, chih ding
kangam kei mawk! Atawp in kei bang leltak na honngai taktak kei hial di,
keisa hoih zaw leh hauzaw hiai zah lai ah kei pentak nawntel kagingta
kei, kachikhe nalnal sam hi.
Umung ei, numei chilou dia kakam mahmah a kahon gen bang ziak a na
gintat louh a? huchi'a midang ngai ding hileng nang ki'ah itna thu kahon
gen keihiai ding, neih-leh-lam, pilna siamnate ziak a hon it leng kahi
kei, kalungsim tawng apat hon it hon ngai kahi. Santak nasak leh ka-itna
siit neilou a ko'n piak hon sansak ve Umung! chi'n kaliang tung ah hong
kingai suk a, kadawn na ngak in a dai dide hi. Kalungsim khat in hon
phal kei mahleh, Nancy thugente kabil in za kilkel leh pasal khat a dia
pan haksa mahmah zaw ahi ngei ding, kenle kahon ngai! kachi khe tamai
hi. Umung, kakipak lua, gin-omtak in pang chiatni aw? a himhim in Ruthi
toh min hon dem bawlbawl ua, zuau thu lel ana hi dan eivele maw? a hon
chi nawn a, gen ding kathei zok kei hial! hon dem mah uh ei, tumalam
teng kha nih hiam ka kingaikha ua, huai ziak khawng hi'n teh, chin zuau
kaphuak suk gawp hi. Huchi'a maban ding khawng genkhawm leh gin-om dia
kichiam tuah a ka-om lai un kasana ka-et leh dak 10 bang ana pelman a,
kikhen vai kasawmta uhi. Ka dingkhia ua a gate tan uh va kha kaki leh
hei leh kakhut ah hon man in mangpha leh gin-omtak in aw, chi toh tawp
cheuh hon thuah hi. Inn katun in Ruthi hon laipiak kasim pah a, maizen!
kei a dia a gin-om di dan leh hon itna pung deuhdeuh ahih dante a
gelhsuk deudau!
Zansawt tamah leh ka ihmu thei nawn vetkei, Ruthi toh kahun luite uh
kasut a Nancy kana 'aw' khak bang hai kakisa mahmah mai. Tu'n bang
kachita dia!? nancy tawpsan leulou mawk didan a ki hisap chi'ang in
le'ng kalungsim khat a bukim thei tuankei, Ruthi toh kumnih lam kaki
ngaih nung ua leng a kam apat kazak tamlouh 'ko'n ngailua' chihte leh
bangchik mah a kana don nailouh hon 'kiss' dante kamit kha in hong lang
dundun zel a, akal ah kabuaise petmah mai hi. Alehlam ah Nancy in houh
hon itzaw a diam maw? khosung a dia a neizou lawi ahih ban uah, amah
ngei leng nungak melhoih leh fel a mite theih hisam hi'a, banah akam
mahmah a a itna thu hon gen hingal a, chihte kasuangtuah nilouh a,
khenchiah kei-le-kei kimohsa in, bang dia Ruthi toh ka kingaih lam uh
kana hichi imm tentun tel uh a? chih khawng ngaihtuah a lupna tung ah
kaki hekhek sung in aakte hong khuang in, khuavak di'n hong kisa maimah
hi.
Thupukna taktak latheikei mah le'ng Nancy tuh a secondary dan in
kakoih a, Ruthi mah kapi bawl zaw hi. Hun-leh-ni'te hong kihei in skul
kahong lut nawnta ua, nidang a, a mel ka muh chi'a nuihmai gige a om pa
maisuah ah Ruthi in muanmoh huai honsa ahi dia, lamdang asak chi thei
mahmah. Thu om dante hon dong zel mahleh ka-imm bikbek hi. Bangteng imm
in selsel mahle'ng nancy toh ka-omdan ua pat muanmoh kai honsa ahi ngei
dia, nikhat Nancy ana dong khe zoukhawng hi. A zing in skul hong kaikei
a, lamdang kasa sim mahmah, nidang a zaw a kai ngaplouh chi'a le'ng hon
theisak zel hi'a, chi'n kalung buai ngel hi. Huchi'a ninih bang melmuh a
a omlouh phet in Nancy ki'ah thu omdan ka hem dot a, Ruthi damlou
hiale? tulai a mahlou bangtak in skul bang a absent zatzat a kachih leh,
zanhal a zaw bangmah chilou eive, Umung toh kingai u maw Cy? chi'a hon
dong a, kingai i hih dan imm ding chi mah lechin, lawm hoih penlawi a i
neih hisam hiven, chi'a kana hilh zozen eive, hon kipahpih lawsam hi'a,
tawp chiah i va bangsuk kei dia maw Umung? chi'n tamlou kadawtna tuh hon
dawngsuk zaihzaih mai hi. I kingaih lam maw nana hilh, kachih thakthak
hial tak in, Nancy in leng lamdang bang asa hial a, bangchi a? ana hilh
kha keimah voi, nang kikhen khin kahi uh chichin a, banah aman le
ngaihsiat in ngaikhawl ke'n teh ana chi keivoi, chi'n hon dawng hi.
Kikhen nailou kahih dante uh gensuk mai uthuai mahleh, nitak chi'ah kimu
di'n kahilh zaw mai hi. Skul kaitawp a ka aankam huai dai uh bawl a
kana omlai in naupang khat in laithon hon pechat a, inn sung ah lut in
lupna tung ah kava simpah hi. Kagintat bang ngei in Ruthi a ana hi a,
khamkha vei a sihloh hial ding bang ahih dan leh ka thil lamdang asak
dante nounel tak in a sutsuk diudeu hi. Maban ding a khual dante leh
leitung a kei bang a a it ding kuamah omlou ahih dante a gen ban ah,
atawp na ah PIANDANG ITNA vang in maban ah piching tak a nawn ki-it touh
uh kei apat deihsak na sangpen kahon khak theih hihen aw Umung! zalai
ah nasak mel ko'n muzel dia, huai hun chiang in kathuak natna bang chi'n
kapaw mah diam maw? hong kihei kik maive chi nuam mahleng, huai gen dia
chitna nei hi'n kaki theikei, mahleh Umung ei, hiai ana thei in na
haksat hun leh kei a dia nawn kileh kik hunhun a sang dia mansa gige
kahi! chi'n a hon gelh hi.
Kua ngohtheih lah hilou, kathil hih ka kisik mahmah a lah ngaihdam va
nget in omzia nei hi'n kathei tuankei, ho'n na ngaidam bang hileh leng a
langlam buai zel ding leh lemthei dia koih nawn lou in kalung sim a
puak a puak thoh di'n kathu khin hi. Nitak khuate hong mui in ngaihtuah
na apai sau mahmah, huchi vetvet kuamah toh leng kingaih ngaikei, Nancy
le'ng kakhen vet di kachi lungsim hi. Kakisa a kikimuh na ding mun uh
phur loutak in kazuan namnam a, lamtung tawn in kalungsim a kisual tuah
nilouh hi. Huchi'a ngaih tuahna sangtak toh kapai lai in lamsak lam apat
hon kibou suk guih a, pasal toupi numei khat bouh ziak lel a va huchi
lauh zezen, chi'n Nancy a nui tawp moh hial hi. Kakawng ah hon kawi belh
chitchet kawm in, bang gennawp nei e? na kipak diam ah, ke'n leng
thuthak khat hon puak kahi, Umung hon chih behlap hi. A hon bawl dante
leh a kamsiamte kazak chiang in kalung noplouhna te a bei zel a, keikia
ka-om chiang in lah khen ding peuh kasawm sek a, mi kileh bulh mahmah
zaw kahi ve, numei khat lumlehsa hilel in kaki chi vungvung hial hi.
Kamaitai louh dan amuh in Nancy in lamdang asa mahmah a, khatvei tawp
toh thuah in awl in thu omdan hon dong hi. Ki-iim zou nawnlou in Ruthi
toh kingailai leh tua ama ziak a hon khen ahih dan kahilh suk muat hi.
Heh mahmah leh amanle hon khenloh ding kasak lai in, awl in hon kawiphei
a kei ka-om na, lungkham ken Umung! Ruthi toh kikhen siang ko'n na
gintat louh mawng ahi. I kingaih lam kanu'n leng ana thei a, ho'n
deihsak lawtel ahi, huai Ruthi'n ho'n khen ziak lel in a na kingaise
zenzen ke'n, hon chi tiautiau hi. Lamdang chih louh gen ding a omkei,
ke'nleng kakawi pheisam a, Cy nawn itna thupi kasa a, na hon hehnepna te
ah kalung a muang tuan mahmah, na gensa bang in gin omtak in om gige in
aw? nang itvang a Ruthi toh kikhen leng poisa zoulou kahi, chi'n kagen
khum hi. A maisuah a kipah mel mahmah a honkawi belh tinten in, a khen
dia kuan hinapi'n kikhe lahtak in zan sawtpi tak kava tut kholoh uhi.
Inn kapai in Ruthi a ding lai kagelh sam a, huchi'a hon muang zoulou a
midang toh hon dembawl den na hih leh ke'n bang kagenta dia, na khen
nalai ahi bangbang a kana pom mai di hi mailou ding hia, a ching
zouloupa himai tave'ng, chi'n amoh teng amah khusak leh leh thuk haksapi
di'n thu kaleh bawl a, a zing in naupang khat kava pesak hi. A ninawn
in skul hong kai mahleh Ruthi mai ah kipahna khatmah leng a belh kei, a
mel etlel in leng mihing thuk vuallouh lunggim na thuak ahi chih akilang
mai! huchi kawmkal ah a absent sung a kana laksa te uh a theihlouh ziak
khawng in gawtna khawng a tuaktou zawmah lai a, hangsan tak in thuak
sawm zel mahleh kamel amuh chiang in dak leng dak khengam selou a,
kalungsim khat in kana hehpih thei mahmah zel hi. Itlouh vang hilou, kei
mittam vang a hiai bangteng tung hi'a kachi vungvung sek hi.
Hun-leh-ni'te pailiam zungzung in final exam bang kazoukhe khong uhi.
Himahleh, nidang a 1na a pang gige pa ka fail dek mahmah hi. Kuapeuh in
lamdang sachiat mahle uh, ke'n bel lamdang kasa kei hial, ni dang a
kalaisim hun teng Nancy toh kimuh na dia zang kahih man un! mahleh
kougel in bel paulam tuamtuam bawl in ka kisiamtan veve uhi. Nancy toh a
nuam thei bang pen in hun kazang ua, free mahmah leh sum zat ding tasam
chih om selou in hinkhua kazang tou neknek uhi. Board exam ah leng fail
dek geigei mah in kapass hamham get a, gintat louh pi'n Nancy le'ng a
hong pass thepthup a, kakipak...ngial uhi. Kikum khawm in huai nitak
na-na anuam thei bang pen a zat di'n kathukim ua, lawmte toh party na
ding buaipih in sun nilouh kathapai uhi. A lehlam ah, Ruthi leng pass
sam a'ihcia, kagamtat dan ah pilvang mahmah leh a khasiat vungvung na
dia omlou teitei di'n kaki hanchiam hi. Nitak hun hong tung ngei a,
kipaktak chiat in theitui leh nek ding tuamtuam kabawlte uh kane khawm
nainai ua, huaikawm in deck tape apat rock huntawk din deih anglai
cassete te kakhah lumlet uhi. Ka sana ka -et leh Nancy toh ka
kichiamhun uh ana ging man a, inn konglam kanaih pah hi. Huai ah va kimu
in, a chil apat liau dia ana kichiamsa bang in chik mah a kahih
ngeilouh zu hon pechat a, hiah kon na ngak di, pai in lan Minlunte inn
ah meh minsa ko'n sit utoh va hih meng in lan! hong kikinsak deuh
lechin, chi'n huau' guk siausiau toh inn sung alut a thuah hi. Lauthawng
kisa a dak leplep kawm a huai zu kapuan kawm ah kasel papap leh gintat
louh pi'a window apat Ruthi in hon na enden ahihlam kamu thak a hoih tak
in en ngamkei mah le'ng, amittui pak nilnel leh kaki heisan nung a
gennop nei hi awmtak a khut hon van' a a romol a amai a khuhte kathei
chiang mahmah!
Minlunte inn kava tung ngei a, tuanglai ah thallup sengsuang in ana
om hi. Phawngphawng mah le'ng phon zohdi te ahi sekei! na innkuante
zinkhe lou hi mawngmawng le'uh liak kha ding hivechin maw, chih toh
lupna ah sial kathuah a, kenleng kana a kinthei lam a valh kutkut manpah
kasawm leh a teuhkei mai e aw! zingkal in Minlun toh lupna khat ah kana
lumkhawm maimah uh aka. Ka khanloh nung sawtlou in Nancy hong diang lut
manlang a, nuih petmah in hong nuilut hi, pengnon sim toh gum deuh a na
bang kipahpih selsol na hia? kana chih leh, zan nitak mehkuan na khuk
lam theilou maw? na puan teng le kazan sawp loh eive eh! keuta ngut di
eive, chih toh kapuante piak hon thuah a, kisuah lah huai bang kasa thak
lehlam hi. Ka omdante genzom din kisa mah leh kidawm kot lou hial ding
banah Minlun le hong thoukheta a hih man in daidin kamit-at gaih a,
thudang daih kagen uhi.
Huchi'n, hun-leh-ni'te hong kihei zel in, nikhat tuh ngui meltak in
Nancy hongpai a, Umung, kei kapate'n maban zil dia gamthuk lam ah
honsawl sawm uh. Ka-utlouh dante kagen leh kanu'n hon hehsan petmah a,
va kuan lenglah nang toh kikhenkha zel dia, ka ngaingam mahmah kei,
chi'n dah kisatak in hon gen hi. Kachimoh mahmah ua, a tawptawp in
kenleng hichin kangaih dan kakum tei hi. Cy, keile mundang ah laisim
di'n kawng kingen dia, bang hiam chi'a a hon phalkei ualeh i kigusuk mai
aw? kachi hi. Ahitak in zaw Nancy ngailaw mahmah leh amah toh nikhat
lel kikhen ding le ngaingam nawnlou ka hita. Ruthi toh ka kingaihlai
sang mah un leng Nancy toh hun kahah zat khawm zaw ua, sun-leh-zan in
ka kithuah den uhi. Ka thugen a zak in akipak mahmah a, Umung, kiten
ding utlouh man hilou in, na innkuante hoih tak in hon ngen inlan,
huchile chu... a chi vungvung hial hi. Ka lungsim uh genkhiat ngai selou
a kiman tuah khin kahi leltak uhi. Keile'ng huai nitak apat ka kipan
pah tantan a, hiai lam college hoih kasaklouh dan leh facility a omlouh
kasak dante uangtak in innsung ah kagen panta hi. Huchi'a kawng kiphin
bawl chiang in kapa' ana lung himoh pah a, nikhat hoihtak a hon houlim
pih in, innsung haksat dante hon genkhum ek leltak hi. Heh mahmah kahi
dia, kalaisim di'ngle na phalkei uh, na tapa un sangpi hon tunpih sawm
mah le'ng nawn phalkei uh, chi'a phun toh apoimoh leh ka gangte a bat in
ngen le'ng hon nak piak lawtel di uh ahi. Huchi'a kamaban hiai lak
khawng a kazop di thouthou leh kai le'ng kakai keivet di, chi'n pawt
khiat toh kathuah hi.
Kapawt kal a ana kikum khawm uh ahi ngei ding ua, kapai in zansawt
simta mahleh ka nu-leh-pa'n hon na ngaklai uhi. Kanu'n, Mungbawi ei, na
laisim na maban di'ng na gang ki'ang ah na pa' toh kava tai ua leh, hon
na lemsakpih a, apoimoh bangbang in kawng pang ding a chih ziak in nang
leng na tup bang a pai di'n kisa in lan, chi'a agen tiautiau kazak in
kakipak petmah! Nancy hilh kal bang kangak lah tuntun a, zan bang sawt
tuam hi'n kathei hial hi. Hiai thu ka hilh laikhel a, akipah dan huaisia
a omkei di, chih theih ding khop in Nancy leng ana kipak a, yes.. yes
bang chi tuantuan zen in hon kawi tantan hial hi. Huai teng banah,
admission tungtang buaina bangmah omlou a aman a miset/ngansiah pa uh
tungtawn a hon hih felsak vek ding ahih dante agen in keingei leng ka
kipak mahmah hi. Nancy bang pil kasa mahmah a, amel bang hoih tuam hi'n
kathei hial hi.
Ni'te mualliam zungzung in ka kipat khiat na ding uh leng hong nai
mahmahta hi. Nikhat Minlun ki'ang kava pawt leh Kimkim leh Ruthi leng
ana om ua, lutkhinta lakloh pawt kik ding hithei salou in nuamlou pi'n
kava tukha nilouh hi. Kimkim leh Minlun in hon chiamnuih ua, ash!
Mungbawi kha, officer nawnkai chia kimangngilh chihte om theilou di ahi
aw? koulawi lah hiai khawng apat banglak kaam laisuah kei peuhmah ve
ning un, chi khawng in hon chi zialzial uhi. Nidang, koulawmta teng
ka-om chiang ua a chiakthei pen in gen ding kava maimoh hithet ve! Ruth
le bangmah genlou in a tutmun ah ana dai dide a, sawtlou nung in a ann
huan diing paulam in apai maimah hi. Pawtphet, kalsawm asuanta di aw,
chih di'n Kimkim hong kipan a, Umung Nancy kagen siat pumlum na hilou in
bangziak tak a na-na kingaih khak uh a? I maw, Ruthi hehpih huai
petmah eive, Umung in a utdandan in hon bawl mahleh ke'n zaw kakhen zou
mahmah kei, Pathian ki'ah kanget bang a lemsak pih a ka-om leh kei adin a
hong kiknawn thouthou ding, khawng chichi mai ahi. Nancy inle zaw
honngai mah himahleh Ruthi khel a hon ngai di omdi'n kagingta kei. Tua
bang munkhat ah omkhawm dia kisa zawmah uchin ua, Ruthi lungkham ding
dan lawmlawm mai, chi'n Ruthi tungtang a honhilh hi. Kalungtang tawng
deng mahleh kipasal sak leh khensa nana chi'n, hun hong paipai dia kawng
kingai thak khamoh na uh, chi'n Kimkim kaleh chiamnuih daih hi. Minlun
in hon na pautuh get a, khen oh, khen oh, huai Nancy seksuk public
carrier maimai khawng toh va kingaih, minse lawkhin nahi, hon khelai zoh
ziak khawng a ana ngai lah hipeuh mah nichin, huai lam ah nava omkhawm
ding ua, nam dang pasal khawng hon ngaihsan daih zawmah di eikha! ho'n
chi muatmuat hi.
Thu-leh-laa natamsak mah ve ua, kalung subuai khemkhem uteh. A himhim
a Minlun, nangle mi public carrier khawng va chih muatmuat zozen,
nangle hon na carry kha amaw? mi setawpte leng atup ua leh kibawl hoih
theithou eive ua, Nancy bang na huchi gen zezen na ua, amah omkei leh
huai gamgam ah maban zomdi'n le i kisazou di hia? kachih khum zungzung
leh Minlun heh kisa in alu bang asu ngaungau phet hi. Kimkim in gen ding
thei kisa nawnlou selua, i enkhe diu chu, a hon chih leh Minlun thumu
kisa in et le etthoh mahmah kenteh, hun hongpai dia liah in aliah thoh
zozen dia, nek in anek thoh na kei dia, a chi phunphum maimah hi. Lawmpa
hong sousang gawp zak ding abat hialtak in kenle pai kasawm mai a,
hundang chiah kimu thak zel dia kichiam in kapaisanta hi. Minlun
thugente leh Nancy omdan ka hisap khawm chiang in a dik na chiang omdin
ka koih a, a lehlam ah khen zou di'a ka kikoih louh phetlou a ngai
dedeuh kahih dante kahaih kei! Mihai le i haibawl leh hai dedeuh ahi,
achihte uh kahi mai.
Ka kuan khiat uh hong hun petmahta a, nitak a kapa'n thuhilhna
hoihtak hon neihpih nung in lum di'n ka kisa hi. Nidang banglou tak in
Ruthi ka ngaih tuah kha nilouh a, midang toh kiteng ding bang a kangaih
tuah khak chiang in kalungsim khat in aphal hetkei mawk hi! Kazin khiat
ding uh phur lua hina pi'n kalungsim khat asi dedu nilouh a, zankhua in
ka hun luite ngaihtuah in ka ihmu moh keei hi. Zingkal in kanu-leh-pa'n
station tan honkha ua, Nancyte leng a innkuan un station ah ana kim
thrap uhi. Anun bangbang hiam thuhilh na hon nei a, milak ah pilvan ding
dan leh a poimoh hun a Nancy nuneute hilh pahpah di'n hon hasuan hi.
Gari paidia kisata ahihman in mangphate kikhak in gari sung ah kalut ua,
ka tutna ding chiat uh kaluah khit un kanu'n tohlet apat, "innsung
kinepna nahi chih na va mangngilh kei di aw bawi" hon chih toh kiton in
gari a kikhin netnet a, a gal apat kanu a khut vei leplep leh mittui
pak niuniau a om kamuh in hon nehnou sak hial hi. Nancy toh paulou
phunlou in katu tuak ua, amah le zaw nungkaih vei mahmah hi'n kathei hi.
Khosung peldekta, kanu toh ka kikhakna uh mittui kam dekpan chih in
kagal lui lampi ah Kimkim leh Ruthi tuibel khu apaitou kagal muh a, amau
leng lamkiang ah ana ding in Kimkim leh Nancy aki bye bye uhi. Ngai in!
Ruth ei, chin ka kikou khe vongvong mai a, Ruthi'n tuh etleng hong en
ngamlou in nuailam ana nga dide hi. Nancy in hon khoih phei zauh a, gari
kham pah na maw? hon chih toh kiton in Ruthi kamit leh ngaihtuahna lel a
mu leh houpih kahih lam katheikhe pan hi.
Kisuhalh thak in window kahong lian deuh a huih ka kimuutsak vakvak hi. Nancy theih
dia Ruthi puldou hih ka-utlouh man in gari kham ka kineih a, kamit
sing in ka ki-ihmusak nilouh hi. Hiaihun chiah in zaw, Ruthi ki'ah om
hileng ngaihdam ka ngen mahmah ding! Dakkal 4 vel katai nung un station
kakhek ua, huai apat blue hill te in kapai ua, dakkal 20 val vingveng
katai nung un, ka tupna mun uh, hih buaitu om nawn dia kagintat louh na
uh katung ua, kagintat sang mah in akhua ana thupi kasa mahmah hi.
Hostel lam kanaih ma un, Nancy nuneute inn ah kava baang zual ua, huai
apat hostel ka manoh uhi. A nuneute ana siam mahmah ua, singpi khawng
hon na dawnsak ban uah, a inn uh awngliai leh hostel a om ngai selou
diing ahih dante khawng hon genpih hi. A inn uh neu va sa mahmah zaw
hining, innlam a kei lupna room chiah khawng lel phadin ka hisap hi. Ka
hostel mun uh katun un kadak vel a, thupi kasa mahmah. Buanlei a kizut a
baang leh tuang leiset khawng apat a asawng a kilam leh concrete a
kibawl, a sung a fan khawng kipei ziahziahte kamuh chi'a thupi salaw
mahmah kahi lel hi. Huchi'n ka room chiat uh kazuan ua, kihah siang in
principal ki'ah kava ki report ua, hasotna thu tamtak toh hon khahkhia
hi.
Huchi'a khanih bang nuamsa tak leh suty ni chiang khawng a Nancy toh
vak khawm leh, nupa bang zen a kawng kithuah nung un, sumzat diing ka
tasam panta hi. Innlamte lah khateng a kisawk buai gige phetlou ka
batsa uh simlouh a leng kapa'n ka bawngtal na tawm uh zuak a sum hon
khak geigei ahihna toh nget lailai ding ka kisuang lah hi. Ahitak in zaw
hon sum khakte uh a zatna diing bangtak a zang hile'ng kabuai nai
zenzen kei ding. Noptal leh pawt ka hah bawl ua, innsung enloupi a
standard tak a kava khosak ziak uh ahi. Huchih hun chiang in Nancy a
kazang khawm zel ua, kisuanlah huai sim mahleh, ka-itpen adin bangmah
ka-it kei, kisuanglah mahmah ken Umung, chi'a hon gen chiang in kalung a
nuam tuam zel hi. A kallak in innlam apat sum muzel mahle'ng ka kidaih
thei mahmah kei, huchi'a buaitak a ka-omlai in nikhat Nancy in, Umung,
inn luah di zong mai ni, hostel ah zaw ka-om zou nawn mahmah kei,
nek-leh-taak mahmah le kachimtak zak, innlamte le kahilh khinta a,
zingchiang apat innluah ding zong ngalni, hong chi phut hi. Kalung buai
mahmah a, Cy, huchi'a innluah ding bang hita le'ng a sum di koi a lata
di? hiai mun ah bawn sumzat di'ng kibuai gige a, kachih leh
hon nuihsan selsal kawm in, na-utleh 'aw' chisuk lel in, na khuak
zangdeuh ngalve! chih toh honthuah gaih mawk a lamdang kasa mahmah.
Innluah di hang a, nang toh ka omkhawm uh chih kapate hilh lou di'ing a,
i neknek nekhawm leh hostel a haksa pipi a chance zon chihte om nawnlou
dia, nang hon sumkhakte uh na zatphal leh i duhduh i leina ke, chin
chiang deuh leh chiamnuih thuah in honhilh hi.
Hiai bangthu kazak in kakipak petmah a, Nancy khuak hoih kasak banah,
hon khualsiam kasa a, amah kan a hon it leh khotuah ding om nawn din
le'ng ka ngaihsun kei. A mel ka-en a, ngaihbang huai bang kasa deuhdeuh
maimah hi. Inn awng atam man in innluah ding kamu pah ua, um-leh-beel a
poimoh bangbang anu neute ki'ah ava la a, ka inntuan ngeingai uhi.
Kuadang omleh ki-it kingai tegel vakhu tui bang in kawng omkhawm hial
uh zaw, ka lungtup uh tangtung kasa mahmah uhi! Hun-leh-ni te hong
beizel in, kuamah theihpih louh a nupa bang a nuam satak a hinkhua kazat
lai un buaina kipan diing a bangta. Nancy in gen neuhneuh a hau thei
mahmah a, college kai ngaplou, chi'a inn ngak a ana pan hun bang atam
mahmah. Nikhat tuh kenle'ng ginglel in daktol kai di'n ka zawn a, kava
ki checkup sak ualeh naupai khintham ka nahi maimah uhi. Kalung buai
mahmah mai, innlamte hilh mai kasawm chiang in Nancy a utkei bilbel a,
ka kinak loh veu uhi. Keingaih dan a zaw innlamte hilhmai a, lem honsak
pih ualeh laisim maban zoptouh lai ding chi kahi, chi'a kangaih dante
ka kup chiang in, huai di vetvet sukia in lungmuang takin maban zomtou
le'ng a lel vele, hon chih khum zel a, keilah nau sukkiat thualthahna
bang a ngai kahih banah, asung a anau mahmah le'ng khathum lam phata
ahihna toh a thugen kapom thei bilbel kei hi.
Lung nuamloupi'n college ka kaitou zel a, Nancy bel kilangsimta ahih
toh kai di'n le kazawn zou ngeikei banah, zot le'ng kasawm nawn vetkei
hi. Nitak hun chiang in ka-itdan leh nau sukkiat hoih kasak louh dante
gen in ka khamuan zel a, himahleh a lungkim thei mahmah kei! Ka beidong
mahmah a, a nuneute houh hilh mai ding kade aw? peuh kachi lungsim zelna
a lah amah thuzoh zou nailou phot kahih man in, hilh louh a amah thuzoh
phot katum tinten zaw hi.
Huchi'n hun teng a beihpi kasuah nilouh chiang in a omdan hong tuam
hiaihiai a, a hehna dingkia zong den a bang hial hi. Lungkham mangbang
tak in hunte kazang tou zel a, innlam a kakingaih tunglai ua hon mai
etdante khawng, ka video etkhawm lai ua itna thu agente bang, leh tua
hun teng a aphun a ahaan dante khawng kangaih tuah lemlum a, lungkham na
khitui in hong tuam den maimah hi. Nikhat nau tungtang mah in kaki zing
nak ek ua, heh petmah in college leng kailou din' thupuk mah le'ng
kasinlai uh lakloh lua ahihman in thadah sasa in kakuan khe nepnep hi.
Nitak lam inn katun in kong chabi ana kikalh a, kalung a nuam hetkei,
kei chabi kep pen in kong kahong a, kavante kikhek zok in innkiim innpam
kava ban kanleh, ka innkiang nu'un, ka nuneute in kava phadia, ka Umung
a hong tun chiang in ann ana huan heh, hong zekai maithei kahi, achi,
chih hon na hilh a, kanak bang a zang huaihuai hial hi. Ann ka huan
mintan in leng a hongpai nai kei a, lung himoh a anuneute mi telephone
kawm zen a ka va houpih leh hong hoh khalou, chin hon dawng ua, thu
omdan hon dong mahleh kahilh nuamkei! alawm nu toh hong hoh di chih
khawng a genkha ua hi, chi'n kalep hi.
A zon didan tuan theilou, tulai bang a mobile lah omlou (tam nailou)
ahihman in ngak in kangak thoh mai a, sana bang ka-en thithe hi. Khua
mui dia kisa cheichiaita chih in ka inn mai uah auto hong khawl guih a,
hongpaita hi'n teh chi'a konglam kava delh thoh zozen leh, maizen!
bahmel tak in auto pupa liang ah hong kibat phei diangdiang a, ka muh in
ka lungphu bang akisai puak dupdup zozen hi. Bangchi e Cy? chi'n dong
mah le'ng hon dawng zoukei, chimoh tak a auto pupa kadot a leh, kenle
katheikei, hospital apat konpuak ahi, a bahara leng a penaikei hon chih
khum hi. Nancy lupna tung ah kasial zok ua, bahara pia in auto pupa
kasawl pai ngal hi.
Akhut a len in, bangchi e bawi? bang hong chi mahmah e, honhilh ve
Cy? chi'a, ka nget ngutngut leh awl in amit hong hak a, mittui pak
niuniau kawm a hon en in, amit a si nawn maimah hi. A loh ngaihna kathei
zoukei, huchi'a hamhaih tak a ka-omlai in tuanglai ah ka thil muh in
kamit ala mahmah mawk hi! kakong biang ua pat zuihtheih hial di khop in
sisan atak phei diudeu a, Nancy lupna tan ah a mong hi. Gen ngai selou
in katheita! suamhat te khut apat hong damsuah hi dia kana ngaihsut
ka-itpen tuh, a mah-mah tualthat sa a hongpai ana hileltak hi. Kaheh
mahmah a lah genbeh diing tuan kathei kei, gen ding hita le'ngle kalawm
nu'n hon zakpih kei hial ding! Khophawk lou in lupna ah a lum dildel a,
kei lungkham na nengkhah le hon phawkpih ding te ahi kei.
Neihsa leh suan ding om tuanlou ahihman in, nidang a kana hilhngam
louh leh hon na phallouh gige thu a nuneute kahilh a, kintak in dandawi
inn kazotpih uhi. A sisan chau gawp ahihman in sisan piak hong ngai a,
vangsiat huai sawnsawn di'n ama sisan kibatpih ka omkei lai zawmah uhi.
Sisan leitawm in ahi thei dandan in kaki enkol tou nitnit ua,
sih-leh-hin kal ah beidong tak in hun kazang tou uhi. Thu omdante im
vual hinawnlou ahihman in innkhat a omkawm kahih dante uh hong kipholh
suah ta! Nidang a kamsiam tak leh maitaitak a hon houpih gige anuneu
maisuah a kidang mahmah mai! Moh sapsap di'nle moh teng khuksak in ka-om
maimah a, Nancy hong damkhiat a thu omdan leh kithukim a omkhawm kahih
dante uh hong hilh chet kal kangak lah vungvung mai hi. Nithum lam
beidong tak a hospitak ah hun kazat nung un, Nancy in halh lam hong nawt
a, thu omdante kikup pih theih din athate hong omdeuh ta hi. College
phaklouh na le'ng sawt gawpta ahihna toh, nikhat ki-awng sut in college
ka va pha zual a, ka kai theihlouh dante va phuaktawm in maban ah le'ng
damlouh na ziak a kaizom theilou ding kahih dante principal pa kava
theisak hi.
Kaman chikchik inn le'ng phalou in damdawi innlam kadelh suak ngal a,
himahleh kuamah muh phak ding ana om nawn kei uh! chimoh a nursete khat
kadot leh a pawtkhe ta uh, hon na chihsan gaih lel hi. Lamdang sasim
mah le'ng damlam manoh a pawtkhe thei na-na, chi'n kalung muang mahmah
a, kipaktak in a nuneute inn lam kamanoh nawn pah hi. Kikinsak lua
kadiam! bangmah loukal in katung a, kong kiu pan kakichih leh maizen!
kanu kapa'n le'ng hichi bang in honhou naisam keive uh e! chih vungvung
in omlel hi. Kei mimal thu kia hilou, ka innsung thu tan hial ua hon
chih hial tak in, kadoh zou nawn samkei! nuhau ei, huai tantan kichih na
dingle omkei veh, na neihsa uh kabat le'ng omsam kei, Nancy toh
kithukim a innkhat a omkhawm mah hi-ung, Nancy in le'ng thilteng a
theivek voi, ka chikhe sam hi.
Huaithu kagen in anuneu asu thangpai deuhdeuh a, Nancy in maw,
thuteng thei mah ei, na college admission fee, na innluah man uh,
nanek-leh-tak leh nalaibu man natan ama a na bat ahihdante le'ng a
theivek! a laisim maban nasuk buai nuam man a kitenpih na sawm dante
leng athei, chi'n hong hang khe lualua hi. Zumleh lamdang sak ka thuah
a, a dik na chiang om mahleh, zuau pumlum leng om ahihman in Nancy kiang
ah hilh chian din kangen hi. A lupna apat angtang kisatak in HON NUSE
MAI IN, kahinkhua na su genthei gawpta, nanglou in kaphathei law mahmah
ding, nang bang khutdoh khat toh kaki zuihkhak in ka hinkhua a suse
dimdemta, nang ziak a sihsual a om ing a, nang ziak a asang a sim seng
ung ua! hiai tan in hunsak ni, kahinkhua ah hong kigolh nawn dah mai in,
tu mahmah in le'ng pawt in, chih toh honthuah zialzial tamai hi.
Kadip a hawm a, kamuh ngeilouh gam ah om bang mai in ka-et na lamlam a
mang chuaichuai hial hi. Kho phawklou a puktop baihlam mahmah ding ahih
dan kachian mahmah! Gen beh ding tuan thei lou in kading nilouh a,
paupau lai ahihlam uh thei mahle'ng, amau thugente le'ng kazak pih nawn
vet kei. Kakhut ah honlen in, zum na chang theilou maw? paita ve, na kua
nabel na am, chi'a anuneu in hon kaih toh kiton in a inn sung ua omlai
kahih lam kaphawk khethak hi. Kipasal sak sawm mahle'ng kakidek zou nawn
mahmah kei, Cy, bangthu hita ahia? athu in i genthoh kei dia, hichi
maimai a i kal a itna akitat ding na ngaingam a maw? chi'n mittui tak
keuhkeuh kawm in kava ngen ngutngut hi. Bang itna poimoh lai na hia?
Hichi bang a kibawlna te itna chi nahi maw? muh leng kon mu peih
nawnkei, hehpih tak in hon paisan mai in, na kiang a om kachimtak tuk in
na thugen leng kaza peih nawn mahmah kei, hon chih khum zialzial hi.
Genbeh ding omnawn in katheikei, kangaihtuah na le'ng a mong gaivek!
Bangthu ana kikum ua, bang doh-ai in kakal ua vai hawm hita hiam?
PIANDANG ITNA kei di'n a thuak a hak ngei, a piandang ngei maw Cy, na
itna! Ka-itpen nahi, chi'a nawn minloh tun khutdoh katangta maw?
Om-om ngaihna omlou ahihman in awl in kading khia a, nidang a
lungtuak tak a sabang katat khawm na uh sulnung zuun di'n ka innluah na
lam uh nguitak leh khitui tamtak toh kazuanta hi. Ka tuntun in lupna
tung ka kidenna ngal a, lukham kawi in ka kapkhe huphup maisam hi. Kadak
kimvel a, ama vanteng ana tuah gai mahleh, a romol deihthoh mahmah ana
nuse kha a, huai tawikawm in kahtam ka loulou tamai hi. Puanbang
thakthei leh maw Cy? I kalsimthu patpuan bang thakthei leh ka-ut ngei,
zanmang tangmai hen aw ka hinkhua, chi'n ka kikhem lungdam moh hial hi.
Huchi'a ka kahkah nalam in kana ihmu suak kha a, zing ka khanloh in ni
ana sang mahmahta, ka kihei a, ka kiang a Nancy lum didan a ngaihtuah a
kakhoih phei leh kuamah ana omkei! Ka thawmhau tha a suak vungvung mai,
kalu bang nat chihtak in ana na a, ka thoukhia a damdawi ne in kaki
suhalh hi.
Kalungsim khat si dedu mahleh hong kibawl dante kapuaknat tha
hongsuak guih a, kisa fitfit in college kai di'n kakuan khia hi. Ahitak
in zaw, numei khat ziak a kihih buai leh ka hinkhua suse mailou dia
panlak sawm kahi, mi'n hon simmoh ualeh amau tung a leen teitei ding,
chi'a laisim engpan sawm a college lamzuan kahi hi. Himahleh kangaihtuah
dan leh thil paidan ana kilamdang mahmah.
Mi'te hon etdan ana tuam mahmah mawk a, nidang a paunuam mahmah hi'a
katheihte nasan kei apat kihep bawl uh hi'n kathei hi. Kapai suak a,
principal pa room a lut dia ka kisak leh amah hong pawtkhe chet toh ka
kituak guih ua, gen masak ding penleng theizok lou in ka dingkha nilouh
hi. Amah ngei leng amit hah apat in a lungkim kei chih a chiang mahmah, a
hon samlut a, a gawl bang khuah thakthak hial zen in, nangkha na case
damlouh na ziak didan a kana koih leh ana hi deklou ahihdan katheita a,
poi kasa mahmah! Na lawmnu na bawldan police ah report bawl hile'ng jail
tanloh hithet ding nahi na a, ka student muan mahmah leh gamlapi a hong
kipan na hihna toh, innkuan vai a na sukveng ding un kana thukim pih
hi. Himahleh na gamtat dan college authorityte toh ngentel tak a
genkhawm ahih nung in college apat dismiss na hita! ngaihsiat in ngaidah
inlan, hiai hi kei hahpan na liuliau a anemthei bang pen dia na gawtna
ko'n sukniam sak nahi, huchilou hileh tua jail tungkhinta ding nahi,
chi'n hon genkhum hi.
Lamdang satak in, Sir, bangthu om atamai a? kalawm nu toh kakal uh
zaw keimoh ahi mahmah kei, chi'n theihsiam sak sawm mahle'ng ka thugen
in gam akek kei! huai naksang in ka principal uh asu thangpai deuhdeuh
a, a aw neihteng a kikou in, mi tanu ko'n kitenpih na ding chi'a luppih
chin a, a sum apai na utdandan a zatpih chin a, huchi'a nau hon pai tak a
nasuk kiatsak a, mi hinna dengdel tak a na koihsak nung a kisiamtan
sawmlai nahi maw? a kinthei bangpen in hiai a kipan pawtkhia in, chi'n a
hang loiloi maimah hi. Hithei sa mahmah lou in, Sir, kachih nawn patpat
leh peon pa sam in a room apat hon kaikhesak hithet hi. Huai teng
behlap in kong ah mi ana dingdim phetphut maimah ua, musit tak in hon
en-ua, hon nuihsan in akihuau gu susuih uhi. Ka zumtha suak in sih bang
ka-ut tuntun mai, ka ngaihtuah na nasatak a toh buai in a om a, ka
bilte sa futfut in kataksa pum ling zungzung hial hi. Vangsia kisakna in
ka pumdim a, vual lel tak in college kapawtsan maimah hi.
Thuse bawltu leh hiai bang teng a hon minse sak Nancy leh anuneu thah
bang ka-ut tuntun mai hi. Lungsim sa vitvitsa in inn katung a, kua
theihpih louh in innsung ah kakitom zial a, bangkhawng su in kakhut
khawng ah sisan a pumdim zozen hi. Pona kisa selua in kamit tui le'ng a
pawt thei kei, huchi'a lungsou tak a ka-omlai in ka inn kiang nu uh
hong pai a, mung na phone di hong la in, chi'n honhilh hi. Kilawplou tak
in kava kuan a, hallo! kachih patpat leh kanu kahna aw kaza pah,
bangmah agenthei kei, sawtlou nung in kapa' hong pau diatdiat a, bawi,
bang thiltung atamai a, ka kinepna sun katapa in maw, hichi bang gamtat
hoihlou na-na chiin! ka khankum uh sutom lel dia nana pian sese poi hina
tel e, kaneih louh sasa a thunglak zen a na makhua ding hon gelsak sam
ing a, chi'n hong kapkhe keuhkeuh maimah hi. Lamdang sakna in kapumdim!
pa, pa ei, bangthu om atamai a, chi'a kadot leh a hon dawngthei pahkei!
Mungbawi ei, na pa'n dangka nuai khat chikmah in kakhut ah katawi
khakei, gentak louh muhle'ng kamu kha naikei, tun huai kamuh louh in
zaw, ka hin na kana pemai di aw bawi? huai chiang in na pa' hon itdan
natheisiam mai ding, hon chihkhum hi.
Thu omdan sau dot angaikei, ka mihing nu tungtang mah ahi, chih ka
chiang pah mai, kidek zouvual kahi nawnkei! kapai vengveng a Nancy
nuneute innlam temta khattoh kanaih ta! khamvual le'ng kahi samkei,
mihing hinna ladi'n ka sisan akingap mahmah. Kava tun leh a kong uh ana
kikalh a, a innpamte uh kadot leh innlam pai ahi uh, chi'n honhilh uhi.
Ka lungkim theituan mahmah kei, a kong uh kakhen hong a, ka deihdeih la
in ka paipih a, huaite zuak in lungsim nopdeuh nang ahihkhak leh chi'n
khamtheih chi tuamtuam leina in kazang hi.
Hunte hong pai zel in khenchiah innlam paipeuh lunggulh simzel
mahle'ng, paihial di'ng ka ngamkei zel, a himhim a va pai bang
hile'ngle kahih ding om in ka theikei, niteng nasep diangdiangte inlah
kabatsa uh chikmah chiah ditzoh kilam-et huailou banah, Nancyte nuta in
hon sukminsiat dimdem sa uh hilai, muhsitna dong di lel a kapai a, kanu
kapa' lungkhamna hehnem zoulou di'ng vetvet, kasuah-suah suak di'n hiai
lak khoh om zaw ning, chi'n thukhitna kaleh bawl daih zel hi. Khamsa
ngen in ka hunte kazang tou neknek a, huai ah lungnopna zong in keileh
kei ka kihehnem zel hi.
Huchi'a hunteng khamsa ngen a ko'n zat touh chiang in kasum naklam
hong tasam hiaihiai a, luhbei phialta kahihman in maban ding ka lungkham
gusim mahmah hi. Alehlam ah, khathum lambang huchi'a kong kibang ngen a
lut kahihman in kalawm dikhop kamaikhe mahmah zel hi. Innlam pailah
sawm a neinawn vetlou kahihna toh, thilteng a suahsuah suak di'n kakoih
top a, kalawmte toh kikum khawm in gang group pian kabawl khia uhi. Ka
nasep u tuh bangdang hilou in; van guk, misuam, mikhem, chihte tel in
apoimoh leh mithah le'ng koumuh ding atam danzil a sep ahi hi. Belh
ding neilou leh sih poisakna neitawm mahmah ngen kahihna uah, ka
missionte uah kalohching thei ten uhi. Keipe'n lailam hi'n
pau-leh-hamlam hitaleh ana madawk deuh kahihna toh a heutu pian in
honsep ua, kanasep di'te uh guanggal tu in kapang zel hi. Kisaktheih
pih kham di'n bangmah kihi kei mahleh, eilam mite kingaihnatna i hauh
dan uh kamusuah mahmah, i khemnop ua, eimi melpu train station lak
khawng a i tuahkhak lechu, aaktuam khumsa dan in kakoih lel uhi! Train
station khat apat a dang kawmtuah lehleh chih khawng kanasep tangpi uh
ahihman in tawlhuai veve khatsuak hi. Banah, lungsim ah lauhthawg na in
kidimden a, huai mahmah in le'ng tha suchau mahmah hi'n kathei!
Huchi'a lu-leh-taw phawklou zenzen a kham leh kou huntawk a nuamsa
mahmah a ka-om sung un, kum 6 lambang ana pailiam man maimah hi.
Alangkhat lamah, kou lawmta le'ng ka kingaina dedeuh un kathei,
kikhenlou hial a kizui kahihna uah, innkuan ki-itna bang tuk in kou
lawmta kal kaki-it uhi. Nikhat tuh mi hausa mahmah khat in suit case
dimtek a sum a khai beisei di'n kakisa uhi. Nidang teng sang a kapilvan
zawk uh angai, chihbel, police officer ahih banah, personal security leh
pistol natawm vom ahihman un! katup dan uh bel, hiai ah kalohchin
ngeingei ua leh guktak laktak tawpsan a, eimah hinkhua kibawl na dia
huai sumte kihawm di'ng, chih ahi. Kei mahmah in le'ng lungtun huai
kasa, innlam pai ngamkei mahle'ng huai sumte khak a, kabat kathamte uh
dik fel a, kanu kapa' damlai bang ana hih zenzen ualeh, a damsung ua
keizal a zoukhakna uh omsun le'ng hikhathei, chih lungsim nei kahi hi.
Panmun hoihtak leh feltak a kabawl zoh nung un kana uh ko'n panta
uhi. Miguk kahi ua, huailak a khat khutdoh lem va kineih in sum ava
ngen a, nihte a kiim ah temta toh kigingsa in a om uhi. Khutdoh pen in
suit case sahkhiat toh tai a thuah lai in a kiang a tegel in mipi buai
vengvung kalah security pa ana subuai in thautang khahna chance pelou
uhi. Keileh kalawmpa uh khat taxi kistartsa leh kong honsa sung ah
kihemkhe dia mansa in kana om ua, kalawm dang khatpen uh suitcase tawipa
back up din lamkal ah a pang a, by chance a huai in liamna a tuah
lehle'ng a suitcase pen hong taitung pih teitei ding, chih ama mohpuak
ahi. Katupdan bang un thil hong paitou zek mahleh kou innkuan adi'n
kinepna a bei hithet! Security khatkia nei dan a kakoih lai un huai ana
hi takei! lawm aw, na kipumpiak nate a thawn a mangmai ding maw? A
nungzang ah thautang in a vut pailet a, a khete'n pozou nawnlou in
leilak akiseh na ta! Kalawm uh lamkal a pangpa ki retreat di'n sign,
pemah le'ng aphatuam kei, a tem tawi thautang khahpa dip ah aphum toh
kiton in amah le'ng a dip ah thautang hunkhop phum lutsak in a om!
Kagen ding kathei kei, kalawm liangvai leh haksat gentheih kathuakpih,
kei a dia ka sanggamte sihna tungtang ah bangmah hih theih kaneikei! na
chihtak na tung uah zahna salam kahon pia!! Katup uh a vuaksuak
dimdemta! A damlai teng ka kimu khawm ua, himahleh lawm tegel tungtawn a
hon suikhe pah ding dinmun a akilatman in kabitna ding chiat uh zuan
di'n in mittui tamtak toh ka kikhen uhi.
Kikhen mah le'ung zotna ding kathei tuankei! mun thoveng deuh chi'n
park sung khat ah kava tu nilouh hi. Mite bangmah phawk lou leh
nu-leh-pa toh omkhawm hilhel leh nungak tangval ki-it tak a tukhawmte
kamuh in kadip tei a vuh mah a banghial hi. Ka hunluite hong kilang
dundun a, kanun duattak a hon na keplai, gilou leh thukhel a ka-om chi'a
aw nemtak a hon thuhilh hiathiat dante khawng ka bilkha ah hong ging
hiauhiau hi. Tunlah hondam pihlai hihiam chih nasan phawk pihkeng!
Chikmah a ngaituah dia le'ng ka koih nawnlouh, ka party nitak ua Ruthi
mittui pak niuniau a omte leh Umung kei a di'n a hong kik nawn di, chi'a
Kimkim kiang a ana gen thute ka bilkha ah hong ging viaiviai mahleh,
huaite'n kipahna sang in khasiatna leh kisikna ahon tun zaw! Aw
kahinkhua, keileh keile'ng ka kining, kahin man om hi'n kathei nawnkei.
Kalawm sisate kangaih tuah a, kasuun petmah, amau bang a ana sisam
hile'ng khawng kachi vungvung mai hi.
Huchi'a kingaise tak a omlai, kamit te hak a kadak kimvel leh kagal
muhtawp apat policete zon nei hi-awmtak in hong suakkhe thulthul ua, ka
hinkhua kining lua hinapi'n kimatsak ka-utnai tadih kei hi. Kilehhei a
kihep khiatsan kasawm nalam in kakiang a naupang kimawlte khat kapalpai
malam kha laizang a, kah chihtak in hong kapkhia hi. Ngaihsak lou a
paisuak san kasawm leh 'Mung' chi'n hong kisam guih a, ka-et phei leh
Minlun ana himaimah hi. Ahun in zillou, ka kihepkhiat kaleh mat a om
ding kahihman in kitheih moh bawl a, paisuak san kasawm leh kakhut ah
hong man a, Mung ei, hon theilou tel na maw? nalawm Minlun keive, hiai
nanau palkhak Kimkim toh kata uh ahi, Kimkim le huaipam zek ah a om, pai
singpi bek va dawnkhom ni uh, chin hon mantang den hi. Huchih sung mah
in police te hong tung guih ua, khat in kamai tangtak enkilkei kawm in a
laitawi enzel a, a tawp in naihphei toh, nang hon chih patpat leh, Minlun in ana pautuh a, hiai kalawm ahi chihtoh a
I-card lah a thuah leh salam buk in hon taisan vengveng mawk ua,
lamdang sa in kakam bang kaka heuhou zen hi.
Thu omdan dot utmah le'ng ka kisuanglah geuguau a, mahleh aman
ka-omdan teng, Nancy in hon bawldan leh innlam kapai louh dante theivek
ahihman in hon theisiam mahmah hi. Awl a ka kizuih phei uleh kagal uapat
Kimkim in hon na mu a, amit bang hak bem kilkel zen in honna en nilouh
a, gen masat di pen theilou tuak in lamdang sakna in ka pumdim uhi.
Singpi dawndin kava tu sam ua, thu tangpi kakihou khitnung un Kimkim
ki'ah ana pawt di'n athuhilh a hichi'n Minlun in hongen hi. Nang tutan
inn hong pailou tel chin a, ana lungkham law mahmah kahi uh. Nancy te'n
napate gaam ek ua, amaulah piakding nei samlou uh a'ihchia na inn nalou
teng uh na pa'n banda zen a pia ahi. Inn-leh-lou nei nawnlou thouthou
chi'n nanu leh pa'n na gangte bellut ua, kimuh khak teng a Mungbawi
honzon khiatsak teitei in, kangai law mahmah, chia nanu'n hon ngen gige
ahi.
Huchi'a kanu leh pa damlai ahihdante katheih in ka kipak petmah a,
himahleh keiziak a inn leh lou bei a om chih kangaih tuah chiang in ka
pona tuntun a amel uh muhngam huai kasa kei. Hon genzom zel a, Nancy in
leng pasal nihvei neita leh apa asih nung a khosakna uh niamkiat mahmah
ahihdante leh, Pathian in keitung a ahih bangbang uh lehthuk hidan in
hon gen hi. Nancy pasal neihthu agen in honkam sim ahingei dia, apasal
tungtang kadot leh talpakte khua a singat dia hong om zual khat hiveh,
chi'n hondawng lauh a, a hoihlam hidi'n ka koihkei pahmai hi. Noula,
chik a kiteng uchin ua, hiai ah bang ngaihtuah dan a hong omkha uh e,
Lun? chi'a kadot leh hon nuihsan heuhau a, ka kite'n na uh kum 3
phaphialta eive, nang theihak na chia a thian a pang penpen in, chi'n
akiten lai ua hon ngaihdan khawng toh thuah kawm in hon chiamnuih hi.
Kadotna hon dawngkha sazoulou deuh in, bang khawng sem a nek zong uh e?
chi'a kadot thaknawn leh, training zouphet holiday zang dan a hong
zinkhia kahi uh. Kum masa a IPS exam kana piak leh chingkha ing a huai
training zouphet chihdan kahi ahonchi hi.
Kalawmpa thupi kasa mahmah! kahihna uh kileh bulh geih eive, kei
nasepte theileh bang ngaidan anei mah di'o, IPS zet ahi a den a police
te'n salam buk chatchat uh amah vele, chih khawng kangaih tuah lemlum
kal in, Mung ei, innlam hongpai mahmah in aw, koutoh i kitawn ding uh,
zinghal chi'a pai didan in kisa ni, na lenna ticket ding leng kon laksak
di, inntun a nanu' melmuh kal mahmah kangaklah tuntun, chi'n hon gen
hi. Kalungsim khat kipak mahleh, kakipahna bukim hi'n kathei kei, mi'n
tapa taimang peuh hon na chi ding ua, lawm leh gualte mai ah niamtak a
va omding chih kangaih tuah chiang in kalin mahmah, a lehlam alah hiai a
kadinmun det nawnlou, maban ah buaina ngen paltouh ding hitamai,
vangsiat ngel leh damsung jail bang zut ding hilai chihte suangtuah in
ka hi leiluai nilouh hi. Huchi'a thu tuamtuam gen a ka kikup lai un ni
anakai mahmahta a, mundang a kapai khiat ding hon phallou ahihman un
amau kingakna hotel ah room khat hon laksak top ua, huai ah paihun ngak
in ka-om hi.
Zan in ka kingaih tuahtuah mai, bangchi dan a minlun IPS ana ching
mawk ale! paile'ng Ruthi ana damlai mah di'o, nidang a hon itbang in hon
na itlai mah diam, chih khawng ngaihtuah in Ruthi tungtang kana dot
khaklouh bang poi kasa mahmah hi. Zingkhua hongvak a, kathum ua khopi
sung fang khawm di, chih himahleh kakilep a, hotel ah ana om in amau kia
kapawtsak hi. Ahitak a zaw policete khawng toh va kimelh tuah luakluak
khak khawng lau leh lin kahi zaw! Sun nilouh in ka hun paisate kasut tou
a, kamaban di'ng toh kangaih tuah khawm chiang in lungzin huai kasa
thei mahmah hi. Huchi'a sunhunte lungngai tak a kazat zoh in minlunte
innkuan hong tung ua, ka vante hoih sakhollou zaw hi unteh, puan-ak apat
moja, khedap natan kim sipsip in hon puak uhi. Kimkim in honteh saisai
kawm in, ash! kuate hiam a buaise zou nawn di kachi, chi'n a nui salsal
hi. A thugen meinei ka saksim man in kathuduh petmah a, Ruthi thu a
genkhak teitei na di'n vek chihtak in vek mahle'ng aminloh kha mahmah
kei a, lamdang bang kasa zozen lehlam hi. Thei utlua ka hihman in,
kisuanglah tak in eh, Ruthi bang achi ngut, a damzelna maw? chi'a a thei
utlua le'ng bangngam zozenlou a kahem dot leh, damzel mah ei, chih teng
in hon dawng ton lat ua, kalung anuam hetkei! dongta vanglak chi'n,
damkhol lou amaw leh, a'ihkaleh ta nih-le-thum khawng nei a, naudon a
buaikhop hita hia? chi'a kadot behleh, a ki-en tuah gaih ua, Minlun in a
mit-at lamtak mumah le'ng thu omdan katheisiam mahmah kei, theinuam law
mahle'ng kadong ngam nawntuan kei hi.
Kathutheih nop thei zoulou kahihman in lung nuamlou pi'n ka-om
leiluai nilouh a huai kawmkal ah Minlun in hiaithu hon gen khe laizang
hi. Kal masa a ka seniorte uh IPS khat suamsawmte lak ah eilam mite khat
telkha chihthu khawng kaza mawk a, kuale'ng ahi peuhmah diam maw??
Kalungphu bang hatsot in kakho-ul nel khawng hong pawt hial a ana
nervous lawkhin mahle'ng a theikha lou ka kineih a, a thu omdan khawng
kaleh dawt thepthup hi. Vangphat huaitak in ginlelh in hon nei vetkei a
banah, a thule'ng a sautheih kei vanglak hi. Huchi'n annkhawng ne khin
in katu khawm liiliai ua, amau gel in bel kanu-leh-pa' kipah ding danmah
hah gen pen in nei ua, a lehlam ah kei bel tuplouh sakap bang khawp in
Ruthi ah ka kinem geuguau nilouh a, suantuahna lungsim apat kahalh khiat
chiang bang in haihuai bang kalehsak thei mahmah hi.
Nitak bang hongsawt pian leh zingchi'a kizing patkhiat ding kahihman
un lup vai kasawm ua, keile'ng ka room ah pai in kalumpah hi. Zanin mang
lamdang tak kaman a, kamanglam in tuilian leh san ziazua lak ah kanakia
a, singzung khawng mankha zel mahle'ng huai te'n honkhouh lou in hon
taisuk zel a, luipang ah Ruthi in hon hutkhiat sawm a hon delhsuk nilouh
in kathei hi. Huchi'a tuihak a gimtak a sihsual a kabuai lai in
kakhanglou guih a, kalu nat petmah in ana na a, kichi khawng lum vutvut
in khosik in hon na pumtuam hi. Damdawi lah omlou leh Minlunte va phawn
dia lah hisalou deuh zel in kagum thuaktop a, kavan neih teng bang
silhthuap lepluap zen in lupna tung a kathum huhut maimah hi. Ihmut
ngaihna a omnawn teuhkei, ka khosik lah uang dedeuh, puan bangchi tuk a
sah in silh mahle'ngle a phatuam tham mahmah kei! Khovak kal bang
kangaklah mahmah hi. Khenchiang bang in kamang peuh kangaihtuah a, Ruthi
in hon hunkhe manlou hi'a, chi'n si di khawng in kakikoih mawkmawk zel
hi. Huchi'a dakkal thum di mawngmawng kathuak nung in khua hong vak
khong a, thoukhe lou a ka-om nilouh in Kimkim lung himohsak ahi ngei
dia, "Umung, khangmaa na maw? innlam pai ding phurlua a zannitak ihmupah
theilou houh nahi di kachi," chi'a chiamnuih toh kapuan hawk honthuah
leh ka khosik lam a theikhia a, kintak in ka damdawi ding ngaihtuah in a
kipeibuai pah saisai hi.
Sawtlou nung in Minlun toh honglut nawn ua, Minlun in "Mung, hiai
damdawi ne inlan kisa in, hiai lak khawng a ki-etkawl sang in innlam i
delhzaw ding uh," chi'n amau leng airport lam manoh dia mansiangta uh
ahihdan a hon hilh a, ngaplou sasa a Minlun liang ah kibatsuk diangdiang
kawm in taxi kingakna mun kanaih uhi. Taxi sung ngial ah le'ng katu
tang zou mahmah kei, Minlun pheikham in last line ah kalum a, Kimkimte
nuta front seat ah atu uhi. Lamtawn in hon buaipih mahmah ua, lamkal ah
lah pharmacy kihong gina nailou ahihman in pharmacy zonbawl kawm in
driver pa gintatna lamlam ah kataikual nilouh kha zozen uhi. Kaki
suanlah thu peuh kagen momolhsek na a, kisuanlah zoulou lam zaw kahi ve!
Huchi'a pharmacy lah mu zoklou a lungbuai tak a ka-omlai un, lamnawl
ah neuchik petmah kihong khat katuak khong uhi. Lungdong ngakna petmah
hi'n kakoih top! a damdawi bawmte uh va kichek leh a hawm ngen hi diing
peuh in kaging moh hial, eilam bang hileh practamol na tawm omlou hon na
chihkhum le'u kilawm kasa maimah hi.
Ging-in gingta kei mahle'ng adang om tuanlou ahihman in kabuaina uh a
va gen ualeh, nupi thaupha mahmah khat in syrince toh gari lam hon
naihphei buaubuau a, kana nervous pianpah mawk! Chihbel, ka damsung a
dia ka kikap masatna pen ding ahihman in ka laupha mahmah phemphom hi.
Boklup di'n honsawl a, senior nurse ahihdante leh a damdawi pen khosikpi
dalna ahihdante gen zauzau in dampah ding ka hihdan na tawm, a damkhin
mah hon bangsak hial khop a gen in ana a sem fatfat hi. Kalauh luat ziak
hia! a huchi natlam kaphawk kei thepthup vanglak hi. Damdawi man natawm
pezoulou himah le'ng Minlunte nupa khotuahna zaal in piaksak in ka-om
a, amau bel kakisuan lah khak ding lau in, a beizah natawm le'ng a hon
hilhngei vet kei ua, dot le'ng kadong khezou samkei hi.
Damdawi apoimoh asak teng hon piak zoh in airport lam zuan in ka
kipan khe nawn ua, halhtuam in kitheikei mahle'ng kalawmte lunggim di'ng
khuakawm in kapau ngap dandan a pau in kakihalh sak sawm teitei hi.
Dakkal lang hu ding mahmah katai nung un airport katung khawng ua,
damlou kahihdan kilangsak lou teitei dia hilh a ka-om bang in, mendek
zenzen in kaki nuihmai sak teitei sek a, khenchiang in houh, haihuai
bang kasa lehlam sek hi. Bangmah buaina omlou in check in kazou ua,
sawtlou nung a lenna hong kidoh pah ahihman in asung ah ka kinawnlut
nainai uhi.
"Chickmah chi'a lenna khawng a tuangkha dia kikoih loupa' Minlunte
nupa tungtawn a tuangkha," chih khawng, kataksa damkei in hatkei mahleh
kalungsim in kangaih tuah dundun a, kalen sang deuhdeuh uh toh kitawn in
kakhasiat tha bang hongsuak in ka hunluite peuh ngaihtuah leh kisik in
kamit tui kaguk nul nilouh hi. "Kanu kapa' thumang a, amau deih bang a
om hile'ng tua hichi nelnawl zozen lou di'ng a, Minlunte honhih bang a
kenle'ng kanu-leh-pa' lenna bang ah leng tuangsak zousam ding hive ing"
chi'n, kanu kapa' tung ah kisik in ka kikhasiat nilouh hi. Huchi'a
dakkal khat hu ding lungngaitak a huihkhua a hun kazat nung un, katupna
mun uh katung ua, huai apat gari in kapai nawn uhi. Vangsiat huaitak in
gari sung ah ka khosik in hon ziar ek nawn a, kapum liin sungsung hial
hi. Minlun chimoh kisa in garipu te peuh va noh thithe a, Kimkim in ka
damdawi puak sunsunte uh honpia a, ka kiang ah atu a, hon taisan ngamkei
hi. Last line a lum kahihman in gari bang kising diak hi'n kathei a,
ka-etna lamlam mang chuaichuai in kathei hi. Kakiang ah Minlun paupau
hi'n thei mahle'ng ka dawng thei mahmah kei! Kimkim in kalu hon sawi
nilouh mahleh kadawng theituan kei! ka khosik sanglua ahihdante kikum
suausuau mahle'uh kamit kahak zounawn mahmah kei! Khophawk lou a lum
dildel kahita.
Kamit kahah sawm chiang in hon humsak om a bang hial a ka hakzou
mahmah kei hi. Ka kiang a mi pauging tuptup te'n "en uau, a khut
ataangsak vele" chi'a akisap khawm lamtak uh kathei! huai nung bangmah
phawklou in ka-om vengveng nawn a, a chang in ka manglam a Ruthi toh
kihou dan peuh a kithei in khenchia lah Ruthi hilou, kanu hizaw, peuh
chi'n ka-om zel hi. Huchi'a sawtkhop ka-om nung in ka lu gik petmah in
kathei a, nasa in ka kipek suangsuang hial hi. Ka kiang a omte a kisap
khawm ging uh kaza a, "oxygen kibulhna veng uau, gulcose phim etsak uau"
chi'n, chiak in achiak vengvung maimah uhi. hum in kathum khe huthut
maimah a, kamit kahah hang in miteng kamu pei dundun a, kuamah katheitum
thei mahmah kei hi. Nidang a ka awzak gige leh haihvual hilou, patauh
awtak in "Mungbawi, Mungbawi ei, halhta maw bawi" chi'a kanu'n hon
houpih nilouh a, a mel didan muchiang zoukei mahle'ng, awl in kalu kasuk
khum nalh hi. Doctor in "i tawl damsak phawt ding uh, khua phawkta ahi,
a tha achau deuhlai a atha om nang in gluclose khai beh in tawldam sak
zek le'ng honghalh khepah ding ahi" chi'n kanu-le-pa' a khamuan hi.
Huchi'n damdawi tuamtuam hon khaithak ua, kanak a oxygen a bulh ule'ng
"anak hoihta" chi'n hon lakkhiat sakta uhi.
Sawtkhop ka tawldam nung in katha hong omdeuh hi'n kathei a, ka mitte
hak a kakim kakiang ka-etvel leh maizen! chikmah chi'a mungei dia ka
kigintat nawnlouh kanu-leh-pa' banah, lamtawn a hon buaipih den Minlunte
nupa leh nidang a ka lawm-leh-gualte'n hon na um dim phetphut maimah
ua, hawmthoh tak a hon bawl dante uh kamuh in lamdang bang kasa hial hi.
Keibang leltak mi ginalou leh suamhat khat in katan kangaihtuah chi'ang
in thupi kasa petmah hi. Thil kagal ngaihtuah dan toh akikhe mahmah
mai, lungkham na ziak a amaisuah bang kikhek hialta kanu ka-en a, gen
masat ding thei zozenlou in kamittui hong takkhe zuzut hi. "Bawi, dam in
i kimunawnta a, kei nanu kipaklua kahi, na khelhna genle'ng ngai selou
in kaho'n ngaidam vek! banah, hing in sita le'ngle katapa na omta a,
katan bangbang ah kalung awi mahmahta ding" chi'n, kahtam honloh
khumhial hi. Hiai hun chiah in kakim a om numeite mittui nullou a omkei
uh, Minlun ngeile'ng banglam nga in a etna khat a en lelu maimah hi.
"Tunnu itna PIANDANG hina maizen e! leitung mite'n ka khelhna mangngilh
zoulou a mat leh kaphu bang gawtna tang dia hon zonlai ua, keitunnu'n
ngetle'ng ngailou a kamohna teng hon ngaidam maimah" chi'n ka mittui
palbang kanang moh hial hi. Ka kim a om lawm-leh-gual te'n kapa tektak
hon kailut ua, heiha! zua aw, bangdoh ai' hiam aw? kum tamlou sunglel
lungngaihna in hon nekang eitave maw? nidang a ka muanpen leh leitung a
hatpen dia kana ngaihsut gige ka zuapa aw, tuhun in nataksa lel le'ng na
pozou nawnkei maimah a! "pa aw, hon ngaidam in aw? na tapa a simtak
le'ng ka hi nawn kei, nang hon sulungkham leh na hinna sutom a, na
sisan tawp kangtu lel kahi, pa aw" chi'n, ka lupna tung ah ka kidiik
hithit lel hi. Kakiang ah awl in hong tusuk a, "Mungbawi, bawi, kihatsak
in, napa'n bang di'n kahon ngaidam lou zenzen dia? na mohna louhpi a
ngoh a om nahihlam kuapeuh in kathei chiat uh, Pathian in damna hon
pedia, tua i na khahsuahsa sang ua tamzaw tham nang tungtawn a gou
honpe ding ahi" chin hon khamuan hi. Kalungsim puakgik teng theng huak
hi'n kangai, "kanu-leh-pa' katung ah lungkimta, kamaban tuh pan kalak a
amaute alungtun natan ua ka-etkawl ding himai" chi'n, kaki hanchiam hi.
Ka mittuite nulhul in Minlun lam kanga phei a, awl a "Lun ei" kachih
patpat leh a hon bohphei a, "gen angaikei, bangmah genke'n Mung, kalawm
itpen kahon muhkik kipaklua kahi uh" chi'n ka kam hon humsak a, "nang
adin thilkhat kahon laknuam, na gintat kagingkei a, himahleh itna diktak
hichi bang ahi chih tuni apat in na chiang mahmahta ding" a honchi a,
athugen man mahmah lou ka hihman in lamdang kasa mahmah mai hi. " Amah
khel a nang a dia ginom leh muanhuai khovel ah a omle'ng kagingta
nawnkei, nangle'ng amahkhel a na poimoh omnawn di'n kagingta kei" chi'n,
mittui a pumdim, amel piandang nailou leh a ngaihbang huaidan kiam
nailou, nidang a ka itpen leh kana zuausansa RUTHI ka kiang lam hon
manoh ta di'n asam a, amel kana muh in etle'ng ka-en ngamkei! Ka kiang
ah amai hum in akidiik nilouh a, apau zawsam omlou in ka kidiik hihit
lel uhi. Kakim kakiang ua omte le'ng kuamah a dak khia a omkei uh, kun
dide in a dai khipkhep uhi.
Kimkim in awlin ahon houpih a, "Ruthi hahpan na ziak a damsuah nahi
Umung, amahmah hong kipei a na damdawi poimoh diteng leh na ki-enkawlna
khempeuh moh pawvek ahi, amah doctor a i naneih khak uh hampha mahmah i
hi uh" chi'n hon gen a, ka thuzak lamdangsa in sibup zouhial le'ng
kilawm kasa! Minlun in IPS hon kaisan, Ruthi lah doctor hita, tuakei a
mimoh diale mi a simtak le'ng hiloupi buaipih a kalawm tegel kipumpei
maimah uh chih khawng ngaihtuah in kisuanlah leh zum tuntun in ka-om hi.
Minlun hong pau nawn a, Ruthi in ka damlouh sung hon na etkawl dan leh
ka-omlouh sung a le'ng kanu kapa a damlouh nikhua ua panpih den leh
adiak a kapa damtheilou tak ama kep na ziak liuliau a tutan hon dampih
ahihdante a honhilh hi. Hiai bangthute kazak chiang in Ruthi tung a ka
kisuanlahna a lian dedeuh a, keiziak a mittui kai niuniau a a omlaini te
kamitkha khawng a hong kilang dundun hial hi. Ka zinkhiat kuan a Kimkim
ki'ah, "Pathian in kathumna hon dawnsak dia, Umung kei adin a hong
kiknawn ding" chi'a athugente khawng kabilkha ah hong ging chiaichiai
hi. A mel mahmah le'ng kamu ngam nawnkei, lehngat kawm in "thy, ka tung
ua na hoihna te chikchiang in kahon thukzou ta di ua? hichitel a nahon
khotuahna katan uh lamdang kasa, kakipahna uh nang adin vualzawlna hong
hitou den hen aw" kachikhe nulnul hi.
Kidekzou nawnlou in hon bohsuk a, "Umung ei, nangvang a hiai tan ana
tung hi'ing, ka itpen nang adia sithuai kahih khak kalauh man a katheih
tawp suah a pang a hiaitan tungzou lel ka hi. Kisuanlah na ding bangmah a
omkei, haibang ko'n na ngakna kumkhua asawt gawpta! kakipak lua, lungke
dimdem a ka-om nung nasan in ka itpen kahon mukha nawn a, Umung ei,
kaho'n itden lai, kei adia nahong kik kal ngak a ginomtak a ana omden
kahi" chi'n ka-ang ah abelh dikdek hi.
Ka hinkhua kih huaitak leh ginalou tak a kazat nung in PIANDANG ITNA
vaang a kileh kik ding kabangta! kanu-leh-pa' hon itna thupi kasa
mahmah a, huai tunglam pek ah Ruthi hon itna leh a ginom dan in ka
hinkhua a pum khek sipsip hi. PIANDANG ITNA VAANG IN!
BEITA....BEITA.....BEITA.....BEITA
©Siamsinna leh Vakiangbu
Comments
Post a Comment