BEIZIANG OLYMPIC

~By  ZM Tonsing

Christmas zangkhin pan i kisakleh Christmas tunnawn nang kha 11 kia in sam mannawn zel tel aka hia. Kum khat mawngmawng ngaklah tak a i ngak bang chi’n i zang mualliam a le? Eite it ziak a Van’ laltutphah nusia a, leimun niampen a hongpiang kipahpih in i lawmkha hia? Amah toh kigamlat semna di’n i zangkha ahi zaw hia? 

Ball peksiam chitak a piang himahle’ng ka ngaihsak vak kei a. Kum 5 (val maithei hilai) sung vingveng ball peklouhnung a i hon pek ekh le zaw ball in honlau mahmah sam. Zul a hongpai nuam mahmah lou, hongpai sunsun chia le na hetkha lou zo mah. Ball in hon nuaksak hi’n teh full time tan in le ka hetkhak zah simtheih leh kilawm! Goal 5 ngut ka khum venvon na lak uah goal khat ka khum dek ngei mai. Khe-taw a kipan luzang, samzang mong natan natlouhna himhim a om kei.

Mata a Tuailai khawmpi omlai, khawmpi kipat nitak in mi tam hetlou hi. Hall sung bang awng heuhou a, program nasan vuaksuak thei di hialkhop hileh kilawm in kilang hi. Tuailai Khrist Gimnam zou le om nawn mahmah lou khat hi’n teh, chihlouh theihlouh. Himahleh, a ninawn lam a mi tam hiaihiai, nuam deuhdeuh hi. A tawpni ngial bang a chu mi tamlua, hall bang(wall) nasan lakkhiak ngai hial.

Eilak ah, koimun-koimun ah hunzatna om himhim chiangin abul a kuama’n ngaihsak lou in a bei di kuan chiah kikhonung phur sek hi. A tung a i ngaihsak vaklouh leng a bei di hial chiang in nuam kisa khonung a diam ah, a bei di di kikhelah chiat hi. Tutung Christmas bangleng ni 2 zat dia laitui-laidal a gelhsa, lepfel diamsa himahleh khonung phur ziakin ni 3 ka zang uhi.

Kumbul a kipat a i ngaklah pen leh i hunnuam neihsun ahihman in a thupi bangpen a zang a, a bei di bangle khiatlah ngoingoih di mah ahi. Ahihziaka, a tung a ikh a le namlou hinapi a beidi hialtak a khelah thakphing a, program hihsau pen nuamthou mahleh bukim nawnlou bang hi. Dawr a van hon hap ua leleng a hoih leh manpha te hon hap thahah lou uhi.

Ahi, hichibang hunbi nei tawm mahmah ihih ziak un anuam thei bangpen a zat di mah. Christmas toh kumthak bangle zangmat top zou di zen in hatzou le nuam lo-khatel de... himahleh, hichibang hunbi, zalen theih hunte ah i minam maban di muhkholh luat in a om a, gam-le-nam it a, lungsim taktak toh vei leh awlmohte a di’n khitui-naptui nulna houh ahi kha maimah diam? I gam-le-nam’ kinepna khangthak/tuailaite’n bang chi’n a zang ua?

Saptuam’  nnsem (Mission worker) di’n interview ka bawlkha ngei. “Lak in om le chin nasepna mun (posting) na Zodawn lambang hitaleh, zi-le-ta (anei khinsa te a di’n) te toh na om khawmna d’uam?” chih dotna kidong deuh zut. Sepna deih a zong nana-in chu ‘Hi’ i chihmah louh leh! ‘Hi’ chikawm in lubang kisu ngiaungiau zozen eisam ve, ngal a. Lak a om a, zi-le-ta neikhinsa bang hitale’ng ka thuchiam zui in Zodawn ah ka khosakpih taktak mahna  d’aw?

Tua chu lak a om ut ihih chia ‘hi’ chih miau mai louh leh. Akua-akua in le chithou d’uh aka. Chi souhsouh hilele zui souhsouh khollou. A gennuam lo-na inchin a zuih hialpen haksa viau khat hi di hive. Kangkap khua a saptuam’ nnasem, a diak a skulpu tengin kimdiam a Christmas leh kumthak Kangkap a azat uh tutung kia houh ahi maimah dia aw! Hiaipen apatna leh a tawpna hi mahmah kei henla, apatna, maban a sutzoptouh det di hileh ka chi ngoihngoih mai ka chi. 

Saptuam’  nnasem te’n hichi bang a ahon zatkhoppih dipdep pen uh salam leh khalam ah lungmuan huai tuan mahmah hi. Amau ngeile lah hichibang a om di’n a kichiam thou di ua. Mihing’ mai kia hilou a, Pathian’ mai leh Ama’ gam nna gin-om, muanhuai leh chitak-tak a sem dia kipumpiak leh kichiam kihi mawk in chin maw…

Muhmaih vuallouh dia nung-le-ma a “Tuailai Khrist Gimnam” chih kigelh beuhbouh lah i om dan leh gamtat dan toh kituak hetlou chihbangle ana om thei hive aw. Khrist gim i nam vekvuk zoh gige keihial ta zongin, hiai puan-ak i aak sungteng bek zahna pia in, hiai puan-ak in hon zumzel zou leh, chi-ou? Sunglam  meima pen ngaihsak pha lou in paw-lam kilawmna ngai poimawh baihthei lo-kha deuh ihi d’uam? I potham lel etlawmna in a taktak gam hon pilut zou khollou diing hi. Khovel in a hon puaksuah chi a ngaimai mai ding maw? Khovel in ei a hon khek ding hilou a, en khovel i khek zawk ding ahi.

Khang zaw kidangta mah e. Dawi-le-kau, singbul-suangbul peuh bia a, dawi gim nam thengthung gige te tu’n Khrist gim i nam veuveu ta. I Khrist gim nasan le chimtak a, i nidanglai hunte ah lutkiik thak sawmleng i bangsim pian maimah uhi. Khristian gam a i piankhak ziak hia ahihke’h Saptuam’ thunun a om di lauhziak (?) saptuam dansiangthou in i kiteng souhsouh ua lah leitung’ thilte toh i lawmve thou ua! I Khanggui a pai lellel pen hamsiatna ahihlam phawklou a, ‘lawmlou omlou khang kidangta’ chi a ngainep nilouh laitel ding maw?

Tutung Khristmas leh kumthak zaw ni 2 zangte a di’n ni 3 vet zattouh di’n a ip-lah huai. Khristmas mah bangin kumthak leng ni 3 ka zangthak uhi. Ni 3na pen ama a program gelsa ahihlouh ziakin khosung mipi’n kipolhlimna dan in out-door games ‘Beiziang Olympic’ ka nei zuazua uhi.

Hiai kimawlna pen sawtpi zat di hilou, nikhat zangle ‘Beiziang’ di ahihman in kuapeuh in kihawmthoh a, kipakta in a kipat chil a pat hulum in nuam kisa pah hi. Sunkhua a chim chih om manse-lou leh nuamsa tak hun a kizat zoh in nitaklam in hon beisan ziang hi.

020315

©Siamsinna leh Vakiangbu