KA TUUN' LUNGGEL PIANDANG LUA SA'NG E …!!!

Written By: K Lianthansang

Khanglou mah leng ka mit ka hakkei tuankei a, mitsi kawm in ka veilampang ah ka kiheiphei hi. Ka taklam khut in; ka phawkphak hunteng aa ka meek gige, etlouh a leng ka meektheih taak, miteng in leng a-pahtaak mahmah uh ka zong a, lupna tung ah ka vaakkualsak hianhian hi. Muslim-te’ biakbuk bangmai a puan hon phupuaktou liin-leen khat ka khoihkhak tak in chu, ka zonzon mu ka hihdan ka chian ngal mai. Puannuai a om ahihman in, a-puan leem(hawk) a ka khoih leh, hong liing dilh-dilh zozen hi. Huaihun chiah in chu; hawmthoh leh duattak a ka kep gige, ka ‘Mobile Phone’ ah message honglut chet a, vibration ka koih ziak a ka phone liing dilh-dilh zozen ahihdan ka thei ngal hi..!!.

Ka ‘Bed-sheet’ nuai(under) ah, ka Phone ana omtheih mawk pen lamdang sakawm a, message ka etleh; ‘Kei’ Kimte’ chi’a ka save apan ahihdan ka chian ngal hi. Message ka hong(open) leh,” U Muan, tuni Lamka District Hospital ah ka-va ki-ensak dek, tuzan ka-omnuam hetlou inchin….” Chih teng hon khak leuhlauh hi. Ken leng message gelh ngal in,” Lamka District bang non zangpah lawlaw a, heutu-te na muanna thupi kasa. Himahleh, tuni 1st April(April Fool) ahihziak in na thilgen pen, zuau ahihkhak di ka laugu mahmah zel. Lamka District(?) ah ki-ensak dek taktak nahihleh, hon hilhthak teitei in aw Kim?” chi’n ka thuk(reply) ngal hi.

Kimte ka ngaih bangbang a, ka mitvun-te(anuailam+atunglam)leng kingailua uh ahihman in, hong ki kiss pah chenchen uhi(mitsi nawn pah). Ka mitsiin kawm in; 4th March, 2015 nitaak a Kimte in, khasetak a hon thilgeen-te ka ngaihtuah khe zungzung hi. Huai nitaak bel, kum 2015 a ding aa Full Moon a-thumveina leng ahi a, a Birth Day(Pian Ni) leng ahi bok hi.

Huai nitaak ahihleh vot leng a votlaw nawnkei a, huih bel nung hiauhiau hi. Kimte ahihleh, a pu’ damlouh ziak a Damdoi Inn aa, a-giahpih dia om ahi. Apian ni 4th March ahihlam leng phawkman ding in ka gingta kei(hon hilh sese lou ahih chia)..!!. Numei dang-te toh kibanglou in kichei ngaina lou a, kihhuai di zeen a trop in bel a-omngei sam kei. Melhoihna phiatkhiat theih(make-up) chihte khawng zat ding in leng a koih ngeikei himhim hi. Ama’ melhoih dan bel hou ahou hina pi, a genchet didan a omkei. Hiai toh a-melhoih dan uh a kibang chi a tehpih di leng, tuni chiangtan a piangnailou adiam a, kamu naikei..!!

Kimte in,”4th March ka Birth Day eive, bang non pe di..?” hon chih soisoi lam ka thei ngeikei. Himahleh, a Pian Ni a 21-veina(4th March, 2015) nitaak; Damdoi Inn ah vahoh a, a pu vehkawm a hun vazatpih ding chi’n kong kisa hi. Sathau ka neihsun uh(mustard oil) ka sam ah taatzol ngiik-ngeek in, fair & lovely ka kinuh a, Damdoi Inn lam ka naihpah vengveng hi. Ka hohdek lam leng Kimte’ kiang ah ka gentuan sese kei a, sap te’n “Surprise” a chih uh thumal zat ka sawm hi.

Damdoi Inn compound sung a gari mang a-tamluat ziak in, gate saklam pen kikhak a, a khanglam kia kihong in Police-te duty uhi. Gate khanglam zaw ah luut in, tangtak in ka paisuak phei a, singkung nuai ah ka dinkhawl zual hi. Kimte’ kiang ah,” Na omna room uh ka theichian chiahkei a nong pi mai diam?” chi’n, ka omna mun hoihtak in ka hilh ngal hi. Singkung liim(khavaak ziak a a-liim om) nuai apan, veilampang(Building ki vaaikham) lam nga in, Kimte ka etbawl den hi. Khavaak nuai ah, nungak khat hong pawtkhe phei a, a paidan apan in Kimte ahihdan ka theipah ngal hi.

Sawtlou nung in ka kiang hongtung phei ngal hi. Bangtan hiam thunepnoi gen a ka om nung un Kimte in,” U Muan, paiphei kawm in huai Park chih dandeuh ah va omzual ni. Ka nu neu-te le honghoh chet ua, kinohhuai kei..” hon chi hi. Ka maai zawn ka etphei leh, Park dandeuh; a-baang sang lawlou, mau(bamboo) zang(used) a kigaan singseng ka mu a, a sung ah Buuk tung zumsim ziuh-zeuh, sexy(a baang omlou; singzawl kikilh zek) deuh a om khat ka khawnung muh phiing hi. Denlam a leng muh awmtak hi a, Kimte kia ana mitsuan chu ka hipeuhmah di..!!

Khut kileen kawm in, huai buuk sung ah ka luut ua, tutna di a-omlouh ziak in iitna tellou kingaihna - khuam(post) ah ka kingaai ngehngah uhi. Laizial duhsim mah leng, Kimte’ muh a ka teep ngamlouh phet hilou, a-buuk aa “NO SMOKING” chih a kitaak man in ka kideek hamham mai hi. Damdawi Inn baang ah; Kuva tui neng khawng baang belbual a, eimah pau a “Kuva tui siattheih louh” chih peuh, kitaak zawzen pen in gen anei tuankei. Meitei te’n, a Lengpa uh Churachand’ min manmawhna di leh theihgigena ding a Churachandpur District ana phuah bang deuh un, Meitei pau in Notice hong taak belbual le uh zuihnuam kisa zaw di adiam chih sim in om hi.

Hun bangtan hiam, a pau masa zawsam omlou a ka omnung un, Kimte in ” U Muan, tuni khapi vaakpha na e maw? Khapi in ei tegel lungtuak a vabang lengkhawm hon muhnuam ziak a, a vaaktheihna zahzah suah a hon vaakkhum mai hiale…hehe” chi kawm in, kei lam ah hong kihei cheuh hi. Ken leng,”Full Moon chih dandeuh chu hi a, na melhoihna-te chian deuh a Khapi nasan in munuam ahi diam maw Kim?” ka chitei sam hi. Kimte’ sam, kha pi’n bangchi hiam a a-salhkhak chiang bang in, tevaak setset zozen a, a sam kawm a GOLD neng om di ka sahial sek hi.

Kimte in,”U Muan, hon taisan ngeiken aw…? Ken honngai theilua keive..!!. I Gam ua Free and Fair Election a-om mateng kon iitna a bei ngeikei ding chih, thei in aw U Muan?” hon chikawm in ka khut hon leen kip tinten a, lamdang bang ka sa zozen hi. Ken leng, ka khut a liangtung ah ka baat touh kawm in,” Hon taisan ngeilou di ka hi Kim. Nang style copy chihna leng hituanlou in; Lanva Lui tui a kang ma teng kon iitna a bei ngeikei di chi leng lah, denchiah hong kang phut kha dia…Vuahzuk chiang a hawktui toh mihing-te Lampi a kituh lai siah kon iit den ding, lungkham ken aw Kim.?” Ka chih leh, “Awle….U Muan, ka kipaak lua..” hon chi hi.

Nihvei hiam hong ki diik a,” Leivui a khuthei lua a, hitaang sim neive maw Kim?” ka chih leh, dawnna bangmah ka zakei. Awl a kiheiphei kawm a, Kimte’ maai ka et leh a mit ah tui ana vung kilkel a, huai-te khapi’n salhvaak setset ahihman in,”Bang chi e Kim? Hawktui toh mihingte lampi kituh nawnlou pah dia gingta thak maw..?” ka chisuk mawk hi. Dang awk kawm in,” U Muan, thil khat hon gen leng non taisan di..? Huai ka ngaihtuah pen ahi hon khasesak U Muan?” hon chi hi. Ken leng kintak in,” Kon taisan ngeikei di ka chi voi Kim, na U Muan Muantaak salou maw.? Na khasiatna hehpihtak in hongen ve maw Kim..?” ka chithuk tei sam hi.

Kimte in,”Na kiang a kon genngei hetlouh thu ahi U Muan? Zanlam a non dot lai a, nidang chiah kon hilh di ka chih pen..” hon chi a, ka manpah ngal hi. Agawl hon khuah a,” Ka nu’ omdan tangpi teng na theihsa ahih ka gingta. Himahleh, na theihlouh leng tampi om di ahi U Muan. Ka Nu’n a pasal masa toh ta pasal khat anei ua, himahleh apian nung sawtlou in a singal. Hun bangtan hiam nung in, ka nu’n tangval dang(ka pa) a ngai a, huai toh kiteeng in kei ka na piang kha…..” chi’n a ban gennawnlou in hon khawl hi.

Sawtlou nung in,” Kou unau kei kia kahi…ka Pa bel zudawn mi ahi a, a chang a ka nu toh Zudawn a apawt hun uh leng atam mahmah. Hongpai chiang un, khamsa ngen in inn hongtung ua, ann ka huanlouh ziak bang in hon vaw ekh-ekh uhi. Ken bel ann ka huantheikei a, Gas koihna dohkan leng ka banpha naikei..!!. Achang in, ka innluahna-te’ uh annkhing khawng ka nezel a, ann ka ngolh hun leng a tamthei mahmah…” chi’n hong ki diik hithit a, kideek a haksa ngei mai.

Amit a khitui vung kilkel-te toh khapi a en vungvung a, “Hunte hongpai zel in, ka Pa ‘Overdose’ in hong si a, ka nu toh haksatak in ka khawsa nimnem uhi. Class-X ka exam deklai, Chrismass kuan in ka nu’n ‘ Sum haksat toh Class-X zoh a-ban zaw zomnawn dah mai in aw?….Zu man di toh, anntang man di toh, Innluah man di toh, nang fee di sum laakna di kathei zoukei di..’ hon chi tamai hi. Etna di le ka theikei a, dawng le ka dawngkei a, ka khitui ka nuul den mai hi.

Ni bangzah hiam kapden a ka omtak in, ka nu’n lohngaihna hon theilou ahi ngei dia,’Scholarship khawng na muhtheih khak leh, hoihtak in hongpang in la’n, I inn neite uh; na U Siam lai kihilhsak zeel lechin hoih inte..Delhi a School kai a va om a, thil tuamtuam graduate sa a hongtung saam hiven..!!’ hon chi hi. Ka nu’n ‘na U Siam’ a chih pen a omdan ka teihsa ahihman in ka chimul bang a thou zozen hi. Ka inn neite uh ahihleh, a nu uh a-omnawn kei a, amau pata kia om ahi uh.

Pathian nitaak khat, kikhawm dia ka kisak leh ka nu’n,’Kikim, kikhop ngailou…tunitaak ka pawtna di om a, inn na ngak ngai di. Na U Siam le den a lai honghilh dia ka vadawp sa ahi. Na theihlouh kia hilou, ama’ hon hilh nopnop hoihtak a na ngaihkhiat a, na zuih di ahi..’ hon chi a, ka BP bang a sang zot zozen hi. Nu-le-pa’ thumang-te nahloh peek ahi chih, Sunday School kailai pek a ka theih ahihman in, ka kikheng thak a laisim di’n ka kisa ngal hi.

Sawtlou nung a ka nu’n, ‘Siam, tunitaak beek Kikim lai hoihtak in non hilhsak di aw…huah Room lam ah va luutsuak lechin, kei ka pawtna di om a…’ a chih ka za petmah ta hi. Ka U Siam leng a sam nepnuap toh, khekol le tengkip zoulou pi in Room ah honglut gulgul ngal hi. Ka nu’n ngaihdeuh in,’Siam, na lungtunna bang aa, asiam matan ana hilh in aw’ chi’n kongkhak hon pawkalh khum ta hi.

Bangtan hiam lai honhilh zawh in, thil tuamtuam hon dong a, ken leng kamsiam tak in ka dawng tiautiau hi. Kamsiam tak a ka dawn pen, aman lametna(hope) pia dan a ana la ahi ngei dia, kipaak in nui phalhphalh hial hi. Atawp in, ‘na nu’n phalna bangkim honpiak sa ahi, nang hon enkol dia phalna honpiak ziak a ka inn uh luahluah thei nahi uh Kim. Class-X form fill-up na ding a sum na seen teng uh leng ka pa’n hon piaksak vek ahi. Nang leng, aman piaksa nahi chi’n a utdan teng in hon kimawlpih ta….” Chi’n a lehlam hon ngatsan vengveng mai hi.

Zumlua ahi chih ka haihkei, ahihhang in ken leng gentheih ka neituan kei a, pasal ka hihziak in ka mittui a ommuang tuankei. Sawt kihallou in,” Huaini apan ka hinkhua a ki seta…!!. Zawnziak in mi inn ka luah ua, ka inn luahna-te un kou hon luah-ta uh. Chrismass ni khawng nuamtak a zangnuam himah leng, mittui toh ann ne in hunte ka na zangta U Muan. 31st nitaak in leng ka U Siam honghoh nawn a, kei leng daileng di chi a ki ngen in ka innkong uah ka pawt hi. Pen ka tawikhak zenzen ziak in, varandah a calender kitaak laikhia in, a lehlam ah ‘NUNU, LUNGKHAM A NGAIKEI…HON BAWL PA PATHIAN IN HON NGAWLSAK HIAL KENTE..MANGPHA’ chih teng gelh in, kongkhak ah ka khai a, khovotlak ah liing kenken kawm in ka pawtkheta hi.

Kholak a mi atam ngei mai..!!. Ka eng mahmah mai a, ahihhang in ka lunggel leh puakgik kuaman hon theihpih kei. Gari hat taktak a taituah hehu-te bang ka enliam vungvung a, ka lunggimna hon puakmangsak thei hile chin zaw maw..? ka chi vungvung hi. Ka pute(ka nu’ pate) innlam zotlouh ngal paina di dang ka theituankei…!. Linpi-pi in ka pute’ inn ka tung a, thil omdan bangkim ka gen ngal hi. Ka pute’n ahihleh ‘na nu mi thulimlou, a ut nana ah ki om leh himai, nang damtak a na om nakleh’ hon chilel uhi.

Huchi’n, hun leh kumte hongpai zel in, ka pute’ deihsakna zal in BA bang ka zilta hi. Pathian hehpihna ziak liauliau a hiaitan ana tung kahi. Ka khawnung theihthak leh, ka nu’n; innluahman, zuman, leh mehman di khawng peuh a zuak a honna zuakguk thoh ahihdan ka theisuah phiing a, ka nu’n leng huchibang mah a sum ana guuk zonzon ahihdan ka theihman in, ‘Ka Tuun’ Lunggel Piandang Lua Sa’ng E’ chih vungvung louh ngal gen di dang ka theikei..!!.

Huchibang teng ka mualsuah nung, nikum 31st December, 2014 nitaak aa; ‘Amazing Grace’ panpihna dia, Coffee Nite saina mun ah kon muhkhak pat himah lechin, na kipiakzohna thupi kasa U Muan. Himahleh, tua kon gen teng mai in leng, nang a ding in ka chingkei chih ka thei…..!! Nang thuthu ahi U Muan.?” Hon chi hi. Ka sakhausung a zungbuh lakhe kawm in,”Happy Birthday Kim…Tuni nang adia kipahni ahi a, kikhasiat saksak angai nawnkei. Hiai zungbuh tungsolkha’ theihpih in kon bunsak dia, kei aa nahi chih chiamtehna ahi den ta ding. Na hihna bangbang a hon pom kahi..kei leng bangmah ka hituankei…” chikawm in zungbuh ka bunsak a, a pu’ omna room lam ah ka paikhawm phei helhel ta uhi.

Laigelh-tu’ Lungsung Pan:

Hiai Tangthu,”Ka Tuun’ Lunggel Piandang Lua Sa’ng E” kichi, A TAKTAK pansan a gelh ahi a, MIN kizang-te bel laaktawm maimai ngen ahi. Nang min toh a kituahkhak taak leh leng,’Nang hilou hial nahi’ chih ana thei in. Ban-ah, Hun leh mun min kazang-te leng a kituak khawm ding a kaihtuah maimai ahi.

0104 – Ka Kipak - 2015

©Siamsinna leh Vakiangbu