KHEN ZOU LA'NG E!

~Suanmang Hauhsing

Lianpu in gendi thei tam hetlou in a dohkan(table) mai ah tu a, a maban zek a BA 3yr exam di bang lungsim a om theilou khop in aa lungsim buai petmah in buai hi. Hiai hun chiah in zaw la phuaktu in "Kei zuanbang zuang a om diam, kei sialbang sial a om diam? Gam vangla a huiva nu zong, kei zuan kaan in zuang ken chia" achih, Lianpu a diing in dikdiak a bang se hi.

Dohkan bul a tu kawm in hun lui mualliamsa te ahon ngaihtuah zel a, bang diing a hiai bang buaina tuak a hi diam aw chih khong aki ngaihtuah vungvung zel hi. Lunsim nopna di ahih khak leh chi in lawm leh vual te khong ban call mah leh lungnop na taktak mu tuan lou hi. A lungsim in heh nemsiam laukha a ngai vungvung mai sam hi. Ngoh di lah om tuan lou, a khen chiang bang in a cell phone peuh ngoh in mohsa sim zel mahleh ahi tak in a huntam zaw a panpih tu leh kipak sak tu a cell phone ahi zaw hi.

Pawl sawm( cl-x) a zoh a, Serou leingawi paw dia zingkal beltak a thou a, khovak ma a leingawi puak di zah gari/motor a guang khin in Lamka hon zuan hi. Hiai tuh Lianpu a dia ngeina zuih na lel bang mah leh a taktak in, a damsung a a mangngilh theihlouh ding a iitpeen Naosen a muh ni ahi. Hiai hun chet in zaw Lianpu in leng a lungsim a iitna thu lam himhim ngaihtuah khak in leng a nei kei di. Himah leh Sian' lemgel hia, Ziin lemgel? Kua'n a thei zou dia? Pawl sawm-le-nih a zoh tak in Lianpu ngei leng mite gen Barapani chiaugal, Shillong vangkhua hongtung a, Synod college ah admission hon bawl hi. Gamdang a a om ma sak na ahih man in lungleng leh khattang kisak hun hau thei mahmah hi.

Hunte hong pailiam zel in mi te gen Christmass hong tung peetmah ding ahih man in lawm leh vual teng zoumi te lenna vangkhua ngai ing chi'n Lamka lam pai siausiau ua, Lianpu bel pailou in Shillong mah ah om den hi. Chimlua a hi ngei diing, a cell phone hon lakhia a, number a theih luat louh peen aa di message hon gelh in, khak zat mawk hi. Gintaak louh pi in hong ki thukkik pah a, saulou a kihou nung un Lianpu in nidang a a leingawi piakna te uh hi ding in gingta pah a himahleh a chian ngam tuan kei.

Christmass hun nuam te hong bei in, Lianpu in leng hun awl a neihteng in Naosen a di message gelh kouhkouh zel hi. A tak in kimu chiah keimah le uh, ki theihna leh ki muanna khat hon nei ta ua, a lai sinna thu khong uh kikum in nuam sa thei mahmah uhi. Hiai hun in Naosen mah leng Imphal a college kai a om ahi hi. Mel ki mu lou hi mah le uh a kal uah iitna hong piang in nikhat tuh Lianpu in Naosen kiang ah aa itna thu zumkawm pi leh kam siam lou deuh mai in hon gen melhmelh mai sam hi. Itna zaw kamsiam thu leng hilou ahi diam, Sian lemgel ziak adiam, Leingawi pia a apai lai ua pan Naosen in ana ngai adiam( hiai hial zaw a gin taak huai kei)? Naosen in leng hun sawt kivei sak lou in Lianpu itna vuaksuak sak lou hi.

Ki mu lou leh muntuam tuak a om himah le uh leng a ki-itna uh lian mahmah a, hun a neih sunsunte uh aam tak in zang ua, itna thu te suut khawm in, kua mah khen zohlouh diing a itna khuam bang kipsak diing in han chiam uhi. Hunte hong pailiam zel in, Naosen leng suty zang diing in innlam paidiing chi in Serou tuh hon zuan vengveng hi. Hiai hun in zet in zaw subuai tu omlou ahih man in nuamsa mahmah uhi. Hun lah tam, subuai tu lah om lou ahih man in a na sep uh tuh text message a itna thu gen khong ahi mai hi. Naosen in leng a unu toh message te khong sim khawm in nuam sa tak in om uhi, Lianpu in a itpen kiang a alungzuan dan leh khat tang aki sak dan thu a gen te Naosen' u in a muh chiang in hehpih mahmah a, nikhat tuh Lianpu a na text ta hi. Huchia kitheih tuah na aneih nung un, hong ki text tamluat chiang un Naosen in a u toh a itpen muan moh na hon nei ta ahih man in Lianpu leh Naosen kal tuh hong buai huai sim ta hi. Naosen mah in leng Lianpu kiang ah," ki -it lou bel hi kei hang, himahleh u te toh tangval kituh di mah kibang ahih na ah nuam salou kahi in, ka u toh hoih tak hong kingai zo mai un" chi'n Lianpu khiang ah genkhong hi. Tua bang thu hong om chiang in Lianpu'n zong a itpen theih siam sak tum in a unu toh kingai hilou leh kingai thei mawk ahih louh thu a gen ban ah, a itna pumpi amah( Naosen) pekhin ahih dan gen hi. Himahleh phatuam lolou bang sim maimah ahih man Lianpu'n leng Naosen unu kiang ah" Na nau in theisiam lou ahi in hon text non dan mai in" chi in gen a, himah leh phatuam lolou bangsim maimah hi. Lianpu leng lungbuai mahmah, text di lah a itpeen taan thei dinmun a om;text louh di lah, denchiang a poimoh pen ahih khak dilau zel. Nih kalteh a lungbuai tak a hinkhua zat tuh Lianpu ngeina hong suak sim ta. A itpeen call le lah kitot-kiseelna himai.

BA 3rd yr.exam lah hun peetmah diing hi ta, huai dia kisakkholh poimoh ahih man in Lianpu leng laisim ding in table mai ah tu. Sawt lou nung in phone hong ging, Lianpu'n leng," hello ..nao" chih pat leh, Kare! Itpeen te a pan khenna thu zadia phone call la a suak mai mah. Tam kihou lou in ki koih khum pah uh. Lianpu'n leng call kik charchar hileh le phatuam nawn lou, kua man ngaihsak lou. Sawm vei bang call mah leh ging paisuak chercher maimah. Gendi bei, sepdi bei, lohzia omlou, hehtha suak, maimong! Ngaihdan khat pawt, Lianpu'n Naosen unu call, naosen houpih ut ahih dan ahilh leh khatnu'n le va pepah. Hilehle Naosen in houpih nuam lou.

Thumvei bang tuadan a Lianpu'n call zel, hile loh sam. Beidong peetmah zo ahi di, Naosen sungkuan teng, Anu,Apa, A unu leh Upa tan a hon pih theih na lampi zong hileh le loh sam vek. Message hon gelh " iit na khuam bang kip diing sa'ng, hizong lung tup mualsuah manlou a sam gibang khen mai ding mw? Singdang in hal lou, tuun-le-zua in hallou. Hizong ziinmang simthu hiam? Sam gibang i khen zou diam?" Chi teng lel gelh in khak hi. Tua sung mah in Naosen' unu zong Lianpu heh pih lua ahih man in a nau kiang ah," Bang chitel na hia, mi'n hi chi bang a hon ngai, nang hon call zoh loh ziak a, kei, ipa,inu leh i u tanpha call a na hou pih loub tel. Gamdang a om, laisim lai, exam di kuan hilai, mi lung sim na nat sak didan ngaih tuah ve, nangziak in min a hinkhuan susia in ahinna tan leh nuam sa tuan lou di na hi" chi'a agen chiang in Naoaen zong a lungsim hong kikhek in, aphone hon lakhia a Lianpu call in a theihsiam na ngen a, Lianpu ngei in leng theihsiam kisin diing ahih dan gen hi.

Heh na leh thangpaih na zaw mihing pai dan ahi him ahi. Lungkim hun omzel, a meima pawn bel om den ut mahmah. Nikhat Lianpu innlam pai ding hon sawm. Naosen call pah in "inlam ka hong pai dek Airport ah honna ngak in". Naosen in leng kilawp tak in vangak pah, Lianpu hong tung peetmah, Naosen in nuihme toh ana ngak mupah, zumna om nonlou, mipi lak a Lianpu in Naosen' muuk san siseih tawp chot mai, Naosen zumlua, san tiaitiai kawm in" U.. eigel kingai mah hia?" Chi'n dong. Lianpu'n leng awl in kon dawn di chi in Lianpu leng Lamka hong pai suak. Lamka a tun cha Naosen call kik," Nao... nin dotna ka hon dawng ta diing, eigel iki ngaih in iki deih louh ahi" chi'a gen. Tuni tan Naosen in bang genna hiam chih thei bunlou.

©Siamsinna leh Vakiangbu