KA FIRST LOVE

~Kattie Mawite

Ama' a di mawng a piang ka hiam chihtheih phial ding ahi. Pasal himahleh ka pian ale hon dontu a pang ahihdan ka khonung theih hi. Ka hong khangkhia a, naupangchik kahih apan kenle ngaihsanna riau khat nei hi in ka kithei. Itna lampang a ka mit keuh nai hetlou himahleh, ka kianga a om chiang in ka om bang nuamtuam in kathei a, ka khamuang tuan mahmah hi. Naupang kahihziak mah in ka lunglutna dandan in hon kithuahpih a, ka deihlam bang a theisiam mahmah hi. Ka pianma apan hon na khamkhol hiam chihtheih ding khop in hon aa bawl mahmah hi.Ka hong khanglian deuhdeuh a, a hon kep ngei in hon kem a, ka lunglutna tuamta ahihman in ka lunglutna bang zel in hon kemtou zel hi. Nungak mel muthei phial di dinmun a ka hong din toh kiton in ka mel bangle hong kilawm hiaihiai a, tuamah bang in itna lampang ah ka mit a hong keuh panta. Ka lawmte bang in tangval thu bang a hon genpih theita ua, kenleng ka lungsim a lut thei panpan ta ahihman in kei veidan toh kituak in kana kuppih theizel sam hi.Skul kaisam kahihman in ka siamsinna sunsom ding in mundang ah ka zin hi. Tleirawl laitak ahihman in tangval melhoih bang kitheithei mahmah a, star a chihte uh bang kineigu giugiau sam hi. Ngaihzawng bel ka neikei. Skul khawl chiangin inlam ah ka pai zel a, hon itpa'n bel a hon nuaksan tuankei. Hon houpih ngei in hon houpih a, kamsia le hon zatkhum tuankei. Thukhat ah, ken leng vei dan khat kanei gu thou hi.Ama deihdan bel, pathianni a biakinn kai ding, saptuam vai awlmoh ding leh biakna vai himhim ngaihpoimoh ding chih ahi. A deihdan leh ama' lunglutzawng theilua kahihman in kenleng ahithei tan in ama deihdan zuih ka sawm teitei sek hi. A chang in ka kingaihtuah a,'hiai ka ngaihzawng le hilou, bangziaka a deihdan ka hichi awlmoh tel ade aw?' Ka chikha zel hi. Hon it ahi chihbel ka thei. Himahleh, kei mimal tak a kakiang a kamkhat le a genkhak louh ziak in maban a sawn theihkei. December kha ahi a, nikhat bel a lawm muanhuai mahmah khat tungtawn in hon genkhia hi. Kenleng ka ngaihtuah a, nidang a a omdan leh hon thuahdan tekhawng ka ngaihtuah a, kei lungsim ngei le hon hiip mahmah ahihman in a itna sang din ka thupukta hi.Adiktak in gen leng, ka mi ngaihsang mahmah ana hi hi. Aziak tuh, hon itdan tungtuan kasa. A deihdan lah soisel di omlou, midang toh teh theih di vual ahikei. Kaneu apan hon enkol a, tua nungak kahihtan ale hon na ngak lai chih ka ngaihtuah chiang in a itna thupi kasa petmah a, hampha bang ka kisa mahmah hi.A itna ka sangta ngei a, amah toh ka kal uh tan ngeilou ding, sihna natawm inle a khenzohlouh ding in kana kichiam uhi. Huaini apan in biakin kai chih bang ka kilawp diak a, tua phetlouh in Bible sim leh zing devotion te ka hahbawl mahmah hi. Ama' kianga om nuam kasa a, ama ziak mah in thilchiin hoihlou, khaini, talab, tuibuuk, sajan chihte khawng hihlou in ka taksa mahmah leng siangthou tak in kana kem gige hi. Himahleh, hunte hong paizel toh kiton in lungsim nengchik chik in a hong kihei a, khovel a om kahihdungzui in khovel deihdan ka zuih ton atam mahmah. Kei bel, gen ta maimai le, amah toh teh din ka lungsim a detkei. Aman chu, tangtawn dong, sihnung dong ale hon itden ding ahihdan chiangtak in hon gen a, muanlahna himhim le kanei kei.Amah toh itna gui zom a, khenlou dinga tong ka chiam uapan ka lung a nuam a, kipahna in ka dim. Amah ka neikhak hampha ka kisa diak a, keibang mizawng leh daipam, mel-le-puam ale chinlou leh, siamna-pilna ale mi phalou pen a hon it tuh hampha ka kisa mahmah hi.

Tua ahihtoh kiton in kenleng ahithei tan in ama' deihdan zuih ka sawm tinten a, a thu nial a suk khasiat ka utkei.Himahleh hun hong paizel a, mundang a omzel kahihman in ka zalen deuh in kathei. Hon itdan leh ka thuchiam uh thei zenpi in leng ginom haksa kasa mahmah hi. Ka kimuanlouh bang ngei in, ana zulhzau kha kahi chileng ka khial kei ding. Ka zulhzau mah e. Ka itna masa taisan in midang bang kana it thuah a, biakinn kai leh Pathian nasep chihte awlawl in ka tawpsan hiaihiai hi. A hon itna mangngilh zaw kahi zenzen kei, himahleh ka ngaidau kha nak hi. A hon itluat ziak in hon taisan kei na inte chih ngaihdan kanei a, midang saisan lengle hon khen ngam dia ka gingtak louh ziak in ka siamsinna lam ah ka utdandan in ka om a, tangval bangle ka kop deuh zut hi.Skul khawl a inlam ka pai chiang in bel, amah mah ka pibawl zel sam. Aman leng ka omdan ana thei mahmah a, himahleh ka gintak bang ngei in a hon itluat ziak in hon khen ngam tuankei.

Heh le hon hehsan ngamkei. Amel ka muh chiang in ka hehpih tha bang a suak a, ama adin ka ginom ta di chizel mahleng, ka zinkhiak chiang in ka omdan ngei in ka omkha zel hi.Amah toh ka kingaih kawmkawm in tangval melhoih leh pilna leh siamna ale mi englou khat toh ka kimaikha ua, ka first love in chu ka lungtang ah mun a nei nawnkei. Mipil misiam deihlou kua a om dia? Neih-le-lam kichingtak nei kuata'n a deihlou dia? Keileng huai bang mah kahi. Ka lungkim in ka kipak tel mai. Ka itna masa tuh mangngilh in ka itthak toh nuamsa tak in ka om uhi. Aman leng a hon it in hon deihthoh mahmah. Kenleng ama hon it bang ngei in ka itthuk bok. Mittam hi inle ka kikoih keia, khovel paidan ahi chi in baihlamtak in ka chillum toh ka valhkhawm suk thei hi.Ka inlam ua pai dile ka lungsim ah a om nawn vetkei a, hon itpa'n lamen tak a hon ngak gige di ahihdan le ka theipha nawnkei. Huchih sung in kum bangzah hiam ana kivei man hi.Nuamsa tak a ka khovel hinkhua zangtou zel dia ka kigingtak lai in, ka lamet batlouh leh lungsim ale ka veiphaklouh himahleh, kei adin thilteng a kilehbut vek a, ka kipahna teng lungkhamna asuakta. Ka nuihmai te kahna in adim a, ka chiamnuih gen zelte kahtam lohna asuak maimah ta hi.Ka kingaihtuah dedu zel a, kei hon itpa' itna ngaihsak lou a, ka lungtunna midang kamuhtak a amah ka nelhsiah ziaka keile nelhsiah leh pampaih a om hi din ka kigingta a, ka hinkhua kisikna in a dim hi. Ka tangval it mahmah in, ken hon itpa ka zulhzau san bang in hon zulhzau san a, sulkik lellou ding in mual hon liamsan ta hi.Ka hinkhua kingaihsiatna in a dim. Kisik in kap mahleng a phatuam nawnkei. Hunlui lah ka samkik theikei. Bawlthak ning chilengle hithei nawn tuankei. Ka niteng hunzat tuh kingaihtuah leh hon itpa itna khazak nuaia lungmuang leh kipaktak a ka omlai hunte ngaihtuah ahimai ta hi.Ka kingaise gawp a, ka skul kai leng ka sunzom ut nawnkei a, ka tawp bilbel maimah hi. Ngaihtuah di pen theilou a ka om belbul hun a tamthei mahmah.

Ka tangvalpa in ka lungsim luah thou mahleh, ka itna kapiak masakpa ka khasiatsak dan ka ngaihtuahna in ka lungsim tam aluah zaw. Ka kisuanlahna alian petmah a, gen a genvual di ahikei. Kaneu apan hon kepdan leh itdan ka haihvual kei. Ka mai ah projector a kapkhiat bang khop in hong lang dundun zozen hi.Skul lah kai nawnlou kahihman keile inlam kik din ka kisa hi. Kum bangzahhiam ka taihsan sa, khatvei mah leng ka thuzak ngeilouhpa'n bel hon it nawn ka gingta kei. Lametna leng ka neikei. Huchihnung a amel muh di tuh thil nuamlua ahikei hi. Bangteng hileh ka pai louh theihlouh ahihman in kapai a, sep theihtheih sem in ka om hi. Ka lung a leng ngei mai. December kha a hong tung a, khristmas paak leh tangsam paak te, phalbi zing a mei kai liiliai ten, itna kana piaksa, ka it masakpa hon phawksak dundun sek hi. Himahleh bangmah gen ngam di ahikei. Ka omdan kei leh kei kitheichianglua kahihman in ka kisuanglah tuntun a, amel muh lel dile haksa kasa mahmah hi.Ahi a, amah bel ana kilamdang naikei lailai.

A hon it ngei in a hon it a, nengchik le mohsakna kampau a hon zatkhum tuankei. Huai naksang in, chikchiang in keilam ah a hong kik de aw chi a hon na ngak gige ahihdan hon gen zomah hi. Ka thulimlouh dan kathei chiang a, ama adia chingzou nawnlou kahihdan ka gen hi. Ka mittui dal vuallouh in a hong luangkhe zungzung a, nul zel mahleng, luitui anaak a hong pawt bang in ka mittui a takkhe zungzung mai hi.Ka kisikdan akianga puangkhia a genkhe taak hi inle ka kikoihkei a, himahleh ka genkhiat di bel ka mohpuakna ahi chih kathei. Hon pom kik di bel ka kinem ngamkei a, pomtaak leng kahi nawnkei.Nikhat keikia in ah ka om a, hunlui ngaihtuah a lungleng leh kingaise vungvung kawm in inkhanglam ah katu a, mittui luang doudou kawm in huansung a pakte leh vasa hante bang ka enen maimah hi. "Hiai pakte hiam, vasa hiam khawng in ana kipiang mai leh zaw, lungngaihna leh gentheihna thuaklou di hi inga" chihpeuh ka ngaihtuah a,a chang in lah "kei kibawl a genthei lel kahi, kua ka mohsa thei tuan dia" ka chi thepthup zel hi.Huchi a kap kawmkawm leh lungsim giktak toh katut lai in hon itpa'n a hong tuak a, "Mawi, bang ngaihtuah nahia? Kap nawnken la, ka thugen di ana ngaikhia in. Na pianma apan kon na it khinta. Na hoihna ziaka hon it kahikei. Ka hon itna, tangtawn daih ding kon chiamta hilou hiam? Bangziaka kingaisia nahia? Keimah lampi, thutak leh hinna kahi. Na kiangah zuau kagenkei a, ka hon zuausan samkei ding. Na khelhnate ziak in Khros ah kana thuakta a, ka hon tan khinta. Na itna masa na hon piak mah bang in tu'n ka kiang ah hongkik in, ka hon pom lai ding. Ka hon itlai ahi, hongkik inla, hon zuan mai in. Na khelhnate ka thei gige nawnta kei. Ka sisan in sawpsiang khinta ahi. Hongkik in" chi in ahon gen hi.Keile ka kipak petmah a, "Ka it masak nang nahi Toupa. Na hon itna pialsan in ka itna midang kana pe khata, hon ngaidam in aw. Tu in kisik in nakiang kon zuan ahi. Hon saang lai in Toupa.

Ka hon pialsan nawnkei dinga, tangtawn dong in ka hon it denta ding" chi in, ka FIRST LOVE Toupa Jesu adin ka itna leh hinna ka pethak ta hi.(Toupa Jesu toh relationship ana neikha nailou ihihleh, neih sawm ni, kisik huailou ahi. Ana tawpsansa I om zenzen leh, Amah zuan meng ni. Ama'n hon pomlai ding ahi)

©Siamsinna Leh Vakiangbu