KULSIN KA ZAAL CHIA'N

By ~ Vz Vualnam

Ka simlei khankhua khin a
Khapham kulsin ka zaal chia’n
Ka it in ka tanchin a za sam diam?
Nungak lai ahi maithei,
Mite’ zi ahita maithei,
Mite’ nu ahita maithei,
Mite’ pi ahita maithei,
A omna munmun ah,
Ahihna bangbang in,
Ka tanchin a kiang a va tung diam?
Hon it a hon ngaite ka kiim a
Kap leh mau a a omlai un,
A kipahna a innsung ah,
A lungkimna a pasal’ ang ah,
A tu-le-ta a pomlai in,
Tomchik beek a hon geel sam diam?
Sihna in itte a laakmang chia’n
A mun awng kua’n a hong hu dia?
Himahleh kei zaw ka lung a nuam hi-
Ka sihna in ka it a thawmhau sakkei ding!
It ngeilouhte’ sihna ah
Kua’n thawmhauna a nei ngei a!
Ka kiim a hon itte’ ziak in
Pai ding haksa sa mah leng
Hiai lungnopna in a baihlamsak!
Himahleh hiai beek ka thei ut,
Khapham kulsin ka zaal chia’n
Ka it in ka tanchin a za diam?
Tom chik beek a hon geel sam diam?
A hon it a ahon phawk ziak hilou in,
Ke’n ka it a ka phawk gige ziak in!

©Siamsinna leh Vakiangbu