NGAIH AW, NANG DOUGAAL NA HI SESE

~Kattie Mawite

(Lamka fights back)

Nitaklam ahi a, zingchianga sports zangdek kahihman un ka kisa buai mah2 laih2 ua, tawphun ngei in ka tawp kei uhi. Huchia bangbang hiam sai a kabuai lai in ka phone hong ging rengreng a, ka etleh ka paneu an hihi. A bank account apan sum hunkhop tak kilakhia ahihdan hon gen a, bangchidan hi di hiam chi in hon dong hi. Kenle mak kasa a,aziak di ka theikei. A ATM lah kei kep ahi a, kenlah ka lakhe si kei. Va pai a ATM BOOTH a balance check dia lah, bandh kipanta ahihman in kahoh thei nawnkei a, lungbuai tak in ka om hi. A zingchiang lah bank holiday ahi ngal si. Lungnuamlou tak in ka om ua, a phone a message lut penle a hon forward zozen hi.Rs5000 withdrawn at SBG ATM 0911 on 04115 at UCOATM.Txn#7712.Avl bal Rs. 53061.64 chih ana kigelh deudou mawk hi. Lamdang kasa petmah. Expected balance chu 1.2 lakhs vel ahi a, tua 5000 ana withdraw mai2 ualeh remaining balance huaizah chouh om chu mak kasa petmah. Ama a alaknate bangziaka message pailou ahi dia? Bangzahvei ana kiluh ahi dia? A card lah kei kep hia.... Akhen chiang in ama a aki-withdraw nate tua message lutpan hinte chi in ka kilungnuam sak hi.

Balance check theihna hun ka muhtak in Dorcas Hall mai a ATM ah kava check pah a, ka thil muh in hon kiguihsak.Message lut pen adik mah ana hi a, balance le message a zah mah ana om hi. Ka beidong petmah. Aloh didan theilou in Ebenezer Academy gate lui gei bul ah ka ding deldul a, ka lungsim a mang khop mai. Chimoh selua in ka tangvalpa ka call leh, huaimun a ana ngak din hon sawl a, hongpai sawm ahihdan hon gen hi.Kenle kana ngak a, ahongtun ma in ka lungsim a vaksau telmai. Ka lungsim sa hehu ahihman in chihdan dituan theilou in ATM a sum ka draw chianga receipt hong pawtte bang kava check thak zozen uhi. Himahleh ka hihtheih a om tuankei. Passbook lah ki update ngeilou ahihman in bangchik a ki-draw ahia chih theihbut di ahikei. A chang in ka beidot luat man in ka tangvalpa bang ka ngoh a, ama'n leng kei himah ning chi in chiamnuih in hon dawngkik zel hi.

Bangteng hileh passbook ki-update leh a ki-draw ni theihdan om inte chi in hun lemchang masa penpen in ka Ute khat toh kava update uhi. A chiang kuau khop mai. Himahleh kua lak hi di?Bank ate kianga kagen chiang un a account info hon check sak ua, himahleh ATM CARD khat kia ki-issue ahi hon chi uhi.Ahihleh, ATM BOOTH cctv te a et theih diam? Chia ka dot chiang un police a FIR file masak ngai ahihdan hon gen uhi. Koule Police Station a tailut chen2 in FIR kava file sak uhi.Huai nung chu kou hih di atam vak nawnkei a, policete gamtat ka ngak mai uhi. Ka paneu bel kho tuamtuam a zinkual a vanzuak a kivei ahi a, a sum muhna ka theih luat ahihman in poi kasa mahmah. Mi khenkhat dana tut hiuhiau leh contract na asaina a amuh le ahikei a, a thatang mahmah toh alohkhiat ahihman in ka pona mahmah a, ka hehpih tha asuak petmah. Alangkhat ah, a card kei kep ahihman in kei mohna ahi ka chi a, ka kisuanglah petmah. Lah, hihtheih ka neikei.

Ka ankam bang a limkei zou top a, ka ihmut leng a lim kei. Kei saiveng theih hilezaw, nikhat a saifel di hi'nga! Policete zia ngak ngai ahihman in dohzou tak in amau apan thupawt ka ngak ngitnget mai uhi.Amau le na ana semsem uh zaw ahingei ding, nikhat police station ah hon sam ua, kava pai uleh sum a ki-withdraw nate lak a mun nih, SBI ATM tuak ahi a, cctv footage alakte uh ahon ensak ua, a chianglouh luat man in kua ahia chih ka theithei kei. Alak nanung na pen UCO ATM pen ale lak dia gen in ka kikhen nawn phot uhi. Ni khat hiam nung in ahon sam ua, police station ah kava pai nawn uhi. Cctv footage ka etdek in ka dip a kaw petmah, lah ka kithalawp.

Aziak tuh huai a achiang leh sum draw tu kimankhe thei di ahihchia!Muanmoh thu a gen di chileng, muanmoh di ka theikei. Ka sungkuan tele ka muangmoh keia, ka seppih tele ka muangmoh kei. Ka tangvalpa le ka muangmoh samkei. Himahleh ka ATM CARD kep apan sum draw thei chu kakiang nai a om, ka kinaihpih mahmah ahi di chih bel kathei.Cctv footage ava copy na uh pendrive pen laptop ah ahon thuah ua, a ki-draw hunchet lak teng hon play uh chu, ka haklian kuau zozen. A chiang khop mai. Ki im zoh di vual le ahikei. Gari neu a hong tai chen2 in akong ah hong khawl geih a, sum lakhia in a taikhe pah chenchen nawn hi. Gen di ka theikei. Lah, hiai ahi chi a kagen a poimoh tlats. Ahaksa khop mai. Ka lungtang leh ka ngaihtuahna van a khai a bang hiauhuau. Ka paneu leh ka Ute kiang ah bang kagen dia? Gen di ka theikei. Amau le bang agen tuansam kei uh.Police ten atuam in honsam ua, amat theih didan hon kikuppih uhi. Savdhan India a nupi khat in apasal police a apiakkhiat toh a kilamdanna a omkei.

Ka mit in kamu a, himahleh gintak haksa kasa. Kathei, himahleh ka theisiam theikei.Kenle ahihna leh a address ka theih dandan policete kiang ah kagen a, adangteng amau khut ah ka nga uhi.Kou lah hoihtak in ka kihou ua, himahleh kei bel kalungsim amuangkei. Khatveitei police station a kimaituah ding kahi uh chih thei kahihman in kapau a lem thei nawnkei a, ka ki-ip zoukei dekdek hi. Himahleh ka pang teitei a, kideek zou chu kahimai ve. A khenchiang in ka itna bang a lian tualtual mah a bang a, alangkhat ah lah ka thangpai petmah zel. Ngaihtuah di dukdak le ka theikei a, ka hehtha kia asuak maimah hi.Pathianni zing ahi a, keile lungsim a puakgik paw lulu kawm in Biakinn lam kazuan hi. Katawp in missed call bangzah hiam ana om te lak ah ka ngaihnou' hon call na le a omkha.Police station a hoh din sap in ka om nawn a, kava pai leh kuakua hiam kava mu hi. Police te'n le ana man uh ahi ngei dinga, apa toh kou sungkuan toh sappa theihpih in sum thu toh kisai ka kihou khawm uhi. Amah bel room tuam ah akoih ua, kei toh kimuh ut ahihdan gen mahleh kei ka utlouh ziak in ka kimukei uhi.

Kei ka khasiat tha peuh ana suak a, kana kisikhop ten hi. Gen di bangbang ka genkhit un kei kana pawt masa a, gate bul a bench kikoih pen ah nisum awi in kana tu hi.Huchia ka tut lai in ka ngaihnou tuh apa toh hong kiton pawt ua, gate lam manoh in apai uhi. A ethak tel mai. It mahleng, ka dougaal ana hi maimah.Anglai nau bang pom ding lunglai ka gel chian'Pianna zua' laukha'n hon awi diam chi'ngHizong sam gibang ken hong khen la'ng eNgaih aw nang dougaal na hi seseChi in atum tan uh ka en liam vungvung tamai hi.

©Siamsinna leh Vakiangbu